(1)

Fil-11 ta’ Marzu 2021, il-Health and Safety Executive tar-Renju Unit f’isem il-Health and Safety Executive tal-Irlanda ta’ Fuq (“l-awtorità kompetenti tar-Renju Unit”) adottat deċiżjoni f’konformità mal-Artikolu 55(1), l-ewwel subparagrafu tar-Regolament (UE) Nru 528/2012 biex tippermetti t-tqegħid fis-suq u l-użu tal-prodott bijoċidali għas-sanitizzatur tal-idejn Mydis fl-Irlanda ta’ fuq, sal-21 ta’ Awwissu 2021 (“l-azzjoni”). F’konformità mal-Artikolu 55(1), it-tieni subparagrafu ta’ dak ir-Regolament, l-awtorità kompetenti tar-Renju Unit għarrfet lill-Kummissjoni u lill-awtoritajiet kompetenti tal-Istati Membri bl-azzjoni u bil-ġustifikazzjoni tagħha.

(2)

Skont l-informazzjoni li tat l-awtorità kompetenti tar-Renju Unit, l-azzjoni kienet meħtieġa biex titħares is-saħħa pubblika. Fil-11 ta’ Marzu 2020, l-Organizzazzjoni Dinjija tas-Saħħa (WHO) iddikjarat li t-tifqigħa tal-marda tal-coronavirus (COVID-19) tista’ minn dakinhar ’il quddiem tiġi kkaratterizzata bħala pandemija. Il-Gvern tar-Renju Unit iddikjara r-riskju għar-Renju Unit bħala “għoli” u fit-23 ta’ Marzu 2020 daħlu fis-seħħ miżuri restrittivi. L-użu ta’ sanitizzaturi tal-idejn b’bażi ta’ alkoħol huwa rrakkomandat mill-WHO bħala miżura preventiva kontra l-imxija tal-COVID-19, bħala alternattiva għall-ħasil tal-idejn bis-sapun u bl-ilma.

(3)

Il-Mydis fih kloru attiv rilaxxat mill-aċidu ipokloruż bħala sustanza attiva. Il-kloru attiv rilaxxat mill-aċidu ipokloruż huwa approvat għall-użu fil-prodotti bijoċidali għat-tip ta’ prodott 1, “Iġjene tal-bniedem”, kif definit fl-Anness V tar-Regolament (UE) Nru 528/2012.

(4)

Mindu t-tifqigħa tal-COVID-19, is-sanitizzaturi tal-idejn kellhom domanda estremament għolja fir-Renju Unit, u din wasslet għal nuqqas ta’ provvista mingħajr preċedent ta’ tali prodotti. Qabel l-azzjoni, kienu ftit ferm is-sanitizzaturi tal-idejn awtorizzati fir-Renju Unit f’konformità mar-Regolament (UE) Nru 528/2012. Il-COVID-19 tirrappreżenta theddida serja għas-saħħa pubblika fir-Renju Unit u huwa kruċjali li jkun hemm sanitizzaturi tal-idejn addizzjonali għall-prevenzjoni tat-tixrid tagħha.

(5)

F’konformità mal-Artikolu 55(1), it-tielet subparagrafu tar-Regolament (UE) Nru 528/2012, fis-17 ta’ Awwissu 2021, il-Kummissjoni rċeviet talba motivata mingħand l-awtorità kompetenti tar-Renju Unit biex l-azzjoni tiġi estiża fir-Renju Unit fir-rigward tal-Irlanda ta’ Fuq. It-talba motivata saret abbażi ta’ tħassib li s-saħħa pubblika tista’ titqiegħed fil-periklu mill-COVID-19 lil hinn mill-21 ta’ Awwissu 2021 u b’kont meħud tal-fatt li huwa kruċjali li jitħallew jitpoġġew fis-suq sanitizzaturi tal-idejn addizzjonali sabiex jitrażżan il-periklu kkawżat mill-COVID-19.

(6)

Peress li skont l-awtorità kompetenti tar-Renju Unit, id-domanda għas-sanitizzaturi tal-idejn għadha għolja, jeħtieġ li l-azzjoni tiġi estiża fir-Renju Unit fir-rigward tal-Irlanda ta’ Fuq.

(7)

Il-kumpaniji li kienu rċevew derogi għas-sanitizzaturi tal-idejn f’konformità mal-Artikolu 55(1), l-ewwel subparagrafu tar-Regolament (UE) Nru 528/2012 wara d-dikjarazzjoni tad-WHO dwar il-pandemija ġew imħeġġa jitolbu awtorizzazzjoni regolari tal-prodott malajr kemm jista’ jkun. Madankollu, sal-lum ma waslu l-ebda applikazzjonijiet ġodda għall-awtorizzazzjoni regolari tal-prodott għand l-awtorità kompetenti tar-Renju Unit.

(8)

Peress li l-COVID-19 għadha ta’ periklu għas-saħħa pubblika u peress li minħabba li dan il-periklu ma jistax jitrażżan b’mod adegwat fir-Renju Unit fir-rigward tal-Irlanda ta’ Fuq fin-nuqqas ta’ sanitizzaturi tal-idejn addizzjonali permessi fis-suq, jixraq li l-awtorità kompetenti tar-Renju Unit titħalla testendi l-azzjoni fir-Renju Unit fir-rigward tal-Irlanda ta’ Fuq.

(9)

Billi l-azzjoni skadiet fil-21 ta’ Awwissu 2021, jenħtieġ li din id-Deċiżjoni jkollha effett retroattiv.

(10)

Il-miżuri previsti f’din id-Deċiżjoni huma f’konformità mal-opinjoni tal-Kumitat Permanenti dwar il-Prodotti Bijoċidali,