(1)

Ir-Regolament ta’ Implimentazzjoni tal-Kummissjoni (UE) 2020/600 (2) introduċa għadd ta’ derogi għar-regoli eżistenti, inter alia fis-settur tal-inbid, bil-għan li joffri sostenn lill-operaturi fil-qasam tal-inbid sabiex ikunu jifilħu għall-impatt tal-pandemija tal-COVID-19. B’mod partikolari ngħatat deroga temporanja mill-Artikolu 2(1) tar-Regolament ta’ Implimentazzjoni tal-Kummissjoni (UE) 2016/1150 (3) biex l-Istati Membri jitħallew jibdlu l-programmi nazzjonali ta’ appoġġ fis-settur tal-inbid kull meta jkun meħtieġ anke b’rabta mal-miżuri li jissemmew fl-Artikolu 45(1)(a) u fl-Artikoli 46 sa 52 tar-Regolament (UE) Nru 1308/2013.

(2)

Din il-flessibbiltà kellha l-għan li tippermetti lill-Istati Membri jirreaġixxu malajr għaċ-ċirkostanzi eċċezzjonali li ġabet magħha l-pandemija tal-COVID-19 u biex jissottomettu bidliet fil-programmi nazzjonali ta’ appoġġ tagħhom kmieni kemm jista’ jkun. Ir-raġuni sottostanti għal dan kienet il-ħtieġa li l-Istati Membri jitħallew jaġġustaw il-miżuri diġà fis-seħħ b’mod aktar frekwenti iżda wkoll, kif imsemmi fil-premessa (6) tar-Regolament ta’ Implimentazzjoni (UE) 2020/600, biex jinkludu miżuri ulterjuri fil-programmi nazzjonali ta’ appoġġ tagħhom immedjatament malli jidħol fis-seħħ dak ir-Regolament minflok ikollhom jistennew l-iskadenza li jmiss għall-emendi.

(3)

Minbarra l-miżuri previsti fl-Artikolu 45(1)(a), u l-Artikoli 46 sa 52 tar-Regolament (UE) Nru 1308/2013, l-Istati Membri ngħataw il-possibbiltà li fil-programmi nazzjonali ta’ appoġġ tagħhom jinkludu wkoll il-miżuri temporanji eċċezzjonali tad-“distillazzjoni tal-inbid f’każ ta’ kriżi” u l-“għajnuna għall-ħżin tal-inbid fi kriżi” kif imsemmija rispettivament fl-Artikoli 3 u 4 tar-Regolament Delegat tal-Kummissjoni(UE) 2020/592 (4). Madankollu, minħabba omissjoni mhux intenzjonata, dawn iż-żewġ miżuri eċċezzjonali ma ssemmewx b’mod espliċitu fost il-miżuri elenkati fl-Artikolu 2(1) tar-Regolament ta’ Implimentazzjoni (UE) 2020/600.

(4)

Mill-Artikoli 3(9) u 4(8) tar-Regolament Delegat (UE) 2020/592 huwa ċar li l-Artikolu 2 tar-Regolament ta’ Implimentazzjoni (UE) 2016/1150 japplika mutatis mutandis għall-miżuri “distillazzjoni tal-inbid f’każ ta’ kriżi” u “għajnuna għall-ħżin tal-inbid fi kriżi” rispettivament. Dawn id-dispożizzjonijiet jippruvaw jiżguraw li l-miżuri eċċezzjonali jsegwu kemm jista’ jkun ir-regoli applikabbli għall-miżuri previsti fir-Regolament (UE) Nru 1308/2013. Madankollu, l-Artikolu 2(1) tar-Regolament ta’ Implimentazzjoni (UE) 2020/600 jidderoga temporanjament mill-Artikolu 2(1) tar-Regolament ta’ Implimentazzjoni (UE) 2016/1150 billi jippermetti lill-Istati Membri jinkludu jew jibdlu l-miżuri fil-programmi nazzjonali ta’ appoġġ tagħhom kull meta jkun meħtieġ. Għaldaqstant, sabiex jiġi żgurat li l-miżuri eċċezzjonali jiġu implimentati bl-istess mod bħal kwalunkwe miżura ta’ appoġġ eżistenti oħra, l-Artikolu 2(1) tar-Regolament ta’ Implimentazzjoni (UE) 2020/600 japplika wkoll għad-“distillazzjoni tal-inbid f’każ ta’ kriżi” u għall-“għajnuna għall-ħżin tal-inbid fi kriżi”.

(5)

Barra minn hekk, jeħtieġ li jiġi enfasizzat li ż-żamma tad-“distillazzjoni tal-inbid f’każ ta’ kriżi” u “l-għajnuna għall-ħżin tal-inbid fi kriżi” barra mill-kamp ta’ applikazzjoni tal-Artikolu 2(1) tar-Regolament ta’ Implimentazzjoni (UE) 2020/600 kienet tmur kontra l-iskop veru u proprju ta’ dawn il-miżuri li jipprovdu għajnuna urġenti għas-suq tal-inbid fi żminijiet ta’ kriżi. Li l-Istati Membri ma jitħallewx jintroduċu bidliet fil-programmi nazzjonali ta’ appoġġ tagħhom speċifikament għal dawk iż-żewġ miżuri, filwaqt li jkun possibbli li dan jagħmluh għal kwalunkwe miżura oħra, kien ikun f’kuntrast mal-intenzjoni ċara li l-Istati Membri jitħallew jużaw dawn il-miżuri malajr u spiss skont il-bżonn.

(6)

Għal dawk ir-raġunijiet, ir-Regolament ta’ Implimentazzjoni tal-Kummissjoni (UE) 2021/1785 (5). jikkoreġi l-Artikolu 2(1) tar-Regolament ta’ Implimentazzjoni (UE) 2020/600 billi jinkludi referenza espliċita għall-miżuri eċċezzjonali stabbiliti fl-Artikoli 3 u 4 tar-Regolament Delegat (UE) 2020/592 b’effett mill-4 ta’ Mejju 2020.

(7)

Madankollu, ir-Regolament ta’ Implimentazzjoni tal-Kummissjoni (UE) 2021/78 (6) estenda l-applikazzjoni tal-miżuri introdotti bir-Regolament ta’ Implimentazzjoni (UE) 2020/600 għad-durata tas-sena finanzjarja 2021 billi ssostitwixxa l-Artikolu 2(1) ta’ dak ir-Regolament. Dik id-dispożizzjoni tħalli ukoll barra r-referenza għall-miżuri eċċezzjonali stabbiliti fl-Artikoli 3 u 4 tar-Regolament Delegat (UE) 2020/592. Għalhekk, huwa xieraq li dik id-dispożizzjoni tiġi kkoreġuta wkoll.

(8)

Għalhekk jenħtieġ li r-Regolament ta’ Implimentazzjoni (UE) 2021/78 jiġi kkoreġut skont dan.

(9)

Sabiex jiġi evitat li l-Istati Membri li jkunu introduċew fis-sena finanzjarja 2021 jiġu penalizzati bidliet fil-programmi nazzjonali ta’ appoġġ tagħhom relatati mal-miżuri eċċezzjonali stabbiliti fl-Artikoli 3 u 4 tar-Regolament Delegat (UE) 2020/592, jenħtieġ li dan ir-Regolament japplika b’mod retroattiv mid-data tal-applikazzjoni tal-emenda rilevanti magħmula mir-Regolament ta’ Implimentazzjoni (UE) 2021/78.

(10)

Il-miżuri stipulati f’dan ir-Regolament huma skont l-opinjoni tal-Kumitat għall-Organizzazzjoni Komuni tas-Swieq Agrikoli,