(1)

L-Artikolu 40, l-ewwel paragrafu, tar-Regolament (UE) Nru 1306/2013 jipprevedi li kwalunkwe pagament magħmul mill-aġenziji tal-pagamenti tal-Istati Membri lill-benefiċjarji qabel l-aktar data bikrija ta’ pagament possibbli u wara l-aktar data tard ta’ pagament possibbli huma ineliġibbli għall-finanzjament mill-Unjoni, ħlief f’ċerti każijiet.

(2)

L-Artikoli 5 u 5a tar-Regolament ta’ Delega tal-Kummissjoni (UE) Nru 907/2014 (2) jistabbilixxu l-kundizzjonijiet li fihom u f’konformità mal-prinċipju tal-proporzjonalità, l-infiq imwettaq wara l-limiti ta’ żmien għall-pagamenti jiġi kkunsidrat bħala eliġibbli għall-pagamenti tal-Unjoni.

(3)

Il-paragrafu 3a iddaħħal fl-Artikolu 5 tar-Regolament ta’ Delega (UE) Nru 907/2014 permezz tar-Regolament ta’ Delega tal-Kummissjoni (UE) 2015/160 (3) sabiex tiġi pprovduta ċ-ċertezza tad-dritt u sabiex jiġu ċċarati l-kundizzjonijiet li applikaw għall-pagamenti diretti li saru fis-sena finanzjarja 2015 skont ir-Regolament tal-Kunsill (KE) Nru 73/2009 (4). Dik id-dispożizzjoni ma għadhiex applikabbli u għalhekk tista’ titħassar.

(4)

Għandhom jitwettqu kontrolli dwar il-konformità mal-aħħar skadenzi tal-pagamenti kemm għall-pagamenti fil-qafas tal-Fond Agrikolu Ewropew ta’ Garanzija (“FAEG”), kif ukoll għall-pagamenti fil-qafas tal-Fond Agrikolu Ewropew għall-Iżvilupp Rurali (“FAEŻR”). Madankollu, il-verifiki dwar il-konformità mal-iskadenzi tal-pagamenti għall-FAEG jitwettqu darbtejn għal kull sena finanzjarja, jiġifieri fuq l-infiq imwettaq sal-31 ta’ Lulju u l-bqija tal-infiq imwettaq sal-15 ta’ Ottubru, filwaqt li l-konformità mal-iskadenza tal-pagament għall-FAEŻR tiġi vverifikata darba kull sena finanzjarja fir-rigward tal-pagamenti kollha li jkunu saru għal dik is-sena finanzjarja.

(5)

Għal raġunijiet ta’ sempliċità u effiċjenza u sabiex jitnaqqas il-piż amministrattiv għall-Istati Membri u l-Kummissjoni, jenħtieġ ukoll li tiġi stabbilita verifika waħda dwar il-konformità mal-iskadenzi tal-pagamenti għas-sena finanzjarja kollha fir-rigward tan-nefqa tal-FAEG. Jenħtieġ li dik il-verifika titwettaq fuq l-infiq imwettaq sal-15 ta’ Ottubru. Madankollu, meta jkun hemm nuqqas ta’ konformità mal-iskadenzi tal-pagamenti fil-kuntest tad-dikjarazzjonijiet tal-infiq, jenħtieġ li tkun possibbli għall-Kummissjoni li twettaq verifika addizzjonali fuq l-infiq imwettaq sal-31 ta’ Lulju.

(6)

Ir-Regolament (UE) 2020/2220 tal-Parlament Ewropew u tal-Kunsill (5) emenda r-Regolament (UE) Nru 1305/2013 tal-Parlament Ewropew u tal-Kunsill (6) u estenda l-perjodu tat-tul ta’ żmien tal-programmi tal-iżvilupp rurali appoġġati mill-Fond Agrikolu Ewropew għall-Iżvilupp Rurali FAEŻR sal-31 ta’ Diċembru 2022, filwaqt li jipprovdi lill-Istati Membri bil-possibilità li jiffinanzjaw il-programmi estiżi tagħhom mill-allokazzjoni tal-baġit korrispondenti għas-snin 2021 u 2022. Barra minn hekk, ir-Regolament (UE) 2020/2220 għamel disponibbli r-riżorsi addizzjonali mill-Istrument ta’ Rkupru tal-Unjoni Ewropea (“EURI”) fil-programmi estiżi fis-snin 2021 u 2022 biex jiġu ffinanzjati miżuri skont ir-Regolament (UE) Nru 1305/2013 bil-għan li jiġi indirizzat l-impatt tal-kriżi tal-COVID-19 u tal-konsegwenzi tagħha għas-settur agrikolu u ż-żoni rurali tal-Unjoni.

(7)

Kif stabbilit fil-premessa (24) tar-Regolament (UE) 2020/2220, ir-riżorsi addizzjonali mill-EURI huma soġġetti għal kundizzjonijiet speċifiċi. Għalhekk jenħtieġ li dawk ir-riżorsi addizzjonali jiġu pprogrammati u mmonitorjati b’mod separat mill-appoġġ tal-Unjoni għall-iżvilupp rurali, filwaqt li jiġu applikati, bħala regola ġenerali, ir-regoli stabbiliti fir-Regolament (UE) Nru 1305/2013. Għaldaqstant, dawk ir-riżorsi addizzjonali jenħtieġ li jiġu implimentati permezz tar-Regolament (UE) Nru 1305/2013 u jitqiesu fil-qafas ta’ dak ir-Regolament bħala ammonti li jiffinanzjaw il-miżuri li jaqgħu taħt il-FAEŻR. B’konsegwenza ta’ dan, ir-regoli rispettivi dwar il-livelli massimu u tnaqqis stabbiliti fl-Artikolu 5a tar-Regolament Delegat (UE) Nru 907/2014 jenħtieġ li jiġu kkalkulati b’mod separat fir-rigward tal-allokazzjonijiet tal-FAEŻR u r-rigward tar-riżorsi addizzjonali msemmija fl-Artikolu 58a tar-Regolament (UE) Nru 1305/2013.

(8)

Skont ir-Regolament ta’ Delega (UE) Nru 907/2014, il-Kummissjoni għandha tagħmel pagamenti f’intervalli ta’ xahar jew f’intervalli regolari oħra lill-Istati Membri ibbażati fuq id-dikjarazzjonijiet tal-infiq mibgħuta minn dawn tal-aħħar. Billi tagħmel hekk, jenħtieġ, madankollu li l-Kummissjoni tqis id-dħul riċevut mill-aġenziji tal-pagamenti f’isem il-baġit tal-Unjoni, u ddikjarat mill-Istati Membri fid-dikjarazzjonijiet ta’ kull xahar tagħhom. Attwalment, fil-qafas tal-FAEG, il-Kummissjoni qed tinnettja l-ammonti tal-infiq mal-ammonti tad-dħul assenjat fid-deċiżjoni tal-pagamenti ta’ kull xahar maħruġa mill-Kummissjoni. Din l-operazzjoni finanzjarja tidderoga mill-mod ta’ kif jiġi ġestit id-dħul assenjat taħt Fondi oħra tal-Unjoni, fejn dan ma jkunx innettjat iżda rkuprat permezz ta’ ordni ta’ rkupru mfassla skont l-Artikolu 98 tar-Regolament (UE, Euratom) 2018/1046 tal-Parlament Ewropew u tal-Kunsill (7). Sabiex jiġu armonizzati l-prattiki kontabilistiċi tal-Kummissjoni u, b’mod partikolari, il-mod ta’ kif id-dħul assenjat huwa ġestit, huwa meħtieġ li l-aspett tekniku tal-ġestjoni finanzjarja tal-FAEG jiġi allinjat mal-fluss użat minn Fondi oħra tal-Unjoni. Għaldaqstant, jenħtieġ li jiġu emendati l-kundizzjonijiet li fihom, id-dħul assenjat fil-qafas tal-FAEG irid jiġi paċut, mingħajr ma titqiegħed f’riskju l-eżekuzzjoni f’waqtha tal-pagamenti lill-Istati Membri.

(9)

Għaldaqstant, jenħtieġ li r-Regolament ta’ Delega (UE) Nru 907/2014 jiġi emendat skont dan,

(1)

L-Artikolu 5 huwa emendat kif ġej:

(2)

fl-Artikolu 5a, jiżdied il-paragrafu li ġej:

(3)

fl-Artikolu 7, il-paragrafu 1 huwa sostitwit b’dan li ġej: