(1)

Il-Ftehim Ewro-Mediterranju li jistabbilixxi Assoċjazzjoni bejn il-Komunitajiet Ewropej u l-Istati Membri tagħhom, min-naħa waħda, u r-Renju Ħaxemita tal-Ġordan, min-naħa l-oħra (“il-Ftehim”), ġie konkluż mill-Unjoni permezz tad-Deċiżjoni tal-Kunsill u tal-Kummissjoni 2002/357/KE, KEFA (1) u daħal fis-seħħ fl-1 ta’ Mejju 2002.

(2)

Il-Ftehim jinkludi l-Protokoll 3 dwar id-definizzjoni tal-kunċett ta’ “prodotti oriġinarji” u l-metodi ta’ kooperazzjoni amministrattiva (Protokoll 3). Skont l-Artikolu 4 tal-Protokoll 3, il-Kunsill ta’ Assoċjazzjoni stabbilit bl-Artikolu 89 tal-Ftehim (“il-Kunsill ta’ Assoċjazzjoni”) jista’ jiddeċiedi li jemenda d-dispożizzjonijiet tal-Protokoll 3.

(3)

Il-Konvenzjoni reġjonali dwar ir-regoli preferenzjali tal-oriġini pan-Ewro-Mediterranji (“il-Konvenzjoni PEM”) ġiet konkluża mill-Unjoni bid-Deċiżjoni tal-Kunsill 2013/94/UE (2) u daħlet fis-seħħ fir-rigward tal-Unjoni fl-1 ta’ Mejju 2012. Din tistabbilixxi dispożizzjonijiet dwar l-oriġini tal-oġġetti nnegozjati skont ftehimiet bilaterali rilevanti ta’ kummerċ ħieles konklużi bejn il-Partijiet Kontraenti għall-Konvenzjoni PEM, li japplikaw mingħajr preġudizzju għall-prinċipji stabbiliti f’dawk il-ftehimiet bilaterali.

(4)

Wara l-adozzjoni tad-Deċiżjoni tal-Kunsill (UE) 2020/2067 (3) rigward il-pożizzjoni li għandha tittieħed f’isem l-Unjoni fi ħdan il-Kunsill ta’ Assoċjazzjoni fir-rigward tal- emenda għall-Ftehim billi jiġi ssotitwit il-Protokoll 3, il-Kunsill ta’ Assoċjazzjoni adotta d-Deċiżjoni Nru 1/2021 (4) li tissostitwixxi l-Protokoll 3 b’test ġdid.

(5)

Il-Protokoll 3 fih, min-naħa, referenza dinamika għall-Konvenzjoni PEM, li tagħmel il-Konvenzjoni PEM applikabbli bejn l-Unjoni u l-Ġordan, u, min-naħa l-oħra, ir-regoli tranżitorji li kienu applikabbli bħala sett alternattiv ta’ regoli tal-oriġini għal dawk stabbiliti fil-Konvenzjoni PEM attwali mill-1 ta’ Settembru 2021.

(6)

Bħala parti mill-appoġġ tal-Unjoni għall-Ġordan fil-kuntest tal-kriżi tar-refuġjati Sirjani, f’Lulju 2016 l-Unjoni u l-Ġordan qablu li temporanjament jirrilassaw ir-regoli tal-oriġini li japplikaw għall-esportazzjonijiet ta’ prodotti Ġordaniżi lejn l-Unjoni skont il-Ftehim.

(7)

Konsegwentement, il-Kumitat ta’ Assoċjazzjoni UE-Ġordan adotta d-Deċiżjoni Nru 1/2016 (5) sabiex jiġu emendati d-dispożizzjonijiet tal-Protokoll 3, rigward id-definizzjoni tal-kunċett ta’ “prodotti oriġinarji” u sabiex tiġi ssupplimentata l-lista ta’ ħidma jew ipproċessar meħtieġ li jsir fuq materjali mhux oriġinarji sabiex ċerti kategoriji ta’ prodotti, manifatturati fit-territorju tal-Ġordan, u konnessi mal-ġenerazzjoni ta’ impjiegi għar-refuġjati Sirjani u l-Ġordaniżi, jiksbu status oriġinarju.

(8)

Il-Kumitat ta’ Assoċjazzjoni UE-Ġordan adotta Deċiżjoni Nru 1/2018 (6) sabiex jemenda d-dispożizzjonijiet tal-Protokoll 3 billi jirrilassa r-regoli tal-iskema oriġinali ulterjorment u jestendi d-durata tal-iskema stabbilita bid-Deċiżjoni Nru 1/2016 sal-31 ta’ Diċembru 2030. Id-Deċiżjoni Nru 1/2018 daħlet fis-seħħ fl-4 ta’ Diċembru 2018.

(9)

Sabiex tiġi żgurata l-applikazzjoni kontinwa tad-Deċiżjonijiet Nru 1/2016 u Nru 1/2018, huwa meħtieġ li dawn jintrabtu mar-regoli tranżitorji li kienu applikabbli mill-1 ta’ Settembru 2021. Dan jeħtieġ l-adozzjoni ta’ deċiżjoni li temenda l-Protokoll 3 billi jiżdied Appendiċi B tiegħu sabiex il-faċilitajiet imsemmija fid-Deċiżjonijiet Nru 1/2016 u Nru 1/2018 jibqgħu applikabbli. Il-Kunsill ta’ Assoċjazzjoni ser jadotta tali deċiżjoni emendatorja. Huwa għalhekk xieraq li tiġi stabbilita l-pożizzjoni li għandha tittieħed f’isem l-Unjoni fil-Kunsill ta’ Assoċjazzjoni rigward l-emendar tal-Protokoll 3.

(10)

L-applikazzjoni tal-Appendiċi B tal-Protokoll 3 jenħtieġ li tkun akkumpanjata minn obbligi xierqa rigward monitoraġġ u rapportar. Barra minn hekk, jenħtieġ li jkun possibbli li tiġi sospiża l-applikazzjoni tal-Appendiċi B tal-Protokoll 3 jekk il-kundizzjonijiet għall-applikazzjoni tagħha ma jibqgħux jiġu ssodisfati jew jekk il-kundizzjonijiet għall-miżuri ta’ salvagwardja jiġu ssodisfati.

(11)

Sabiex tiġi żgurata l-kontinwità fl-applikazzjoni tad-Deċiżjonijiet Nru 1/2016 u Nru 1/2018, inkluż id-derogi pprovduti fihom, u biex b’hekk tippermetti li esportaturi awtorizzati jevitaw li jġarrbu telf ekonomiku skont id-Deċiżjoni Nru 1/2016, id-deċiżjoni tal-Kunsill ta’ Assoċjazzjoni jenħtieġ li tinkludi klawżola ta’ retroattività.

(12)

Il-pożizzjoni tal-Unjoni fi ħdan il-Kunsill ta’ Assoċjazzjoni jenħtieġ għaldaqstant li tkun ibbażata fuq l-abbozz ta’ deċiżjoni tal-Kunsill ta’ Assoċjazzjoni,