(1)

Ir-Regolament ta’ Implimentazzjoni tal-Kummissjoni (UE) 2018/659 (3) jistabbilixxi l-kundizzjonijiet biex jidħlu fl-Unjoni ekwidi u s-semen, l-ova u l-embrijuni tagħhom. Din tistabbilixxi l-lista ta’ pajjiżi terzi minn fejn l-Istati Membri għandhom jawtorizzaw id-dħul ta’ ekwidi u ta’ semen, ova u embrijuni ta’ annimali tal-ispeċi ekwina, u tispeċifika l-kundizzjonijiet tas-saħħa tal-annimali u taċ-ċertifikazzjoni veterinarja għal dawn l-entrati.

(2)

Id-Direttiva 2009/156/KE tistipula r-rekwiżiti tas-saħħa tal-annimali li jirregolaw l-importazzjoni tal-ekwidi fl-Unjoni minn pajjiżi terzi. Id-Direttiva tipprevedi li l-importazzjoni tal-ekwidi fl-Unjoni hija awtorizzata biss minn pajjiżi terzi jew minn partijiet mit-territorji tagħhom li ilhom ħielsa mill-glanders (Burgholderia mallei) għal perjodu ta’ mill-inqas sitt xhur.

(3)

Fil-25 ta’ Lulju 2019, il-Kuwajt għarraf lill-Kummissjoni b’żewġ każijiet ta’ glanders (Burkholderia mallei) fi żwiemel reġistrati li kienu miżmuma fil-kwarantina ta’ qabel l-esportazzjoni biex jintbagħtu lejn l-Unjoni. Il-Kuwajt minnufih issospenda l-esportazzjoni lejn l-Unjoni ta’ żwiemel reġistrati, u wettaq il-miżuri meħtieġa ta’ sorveljanza u kontroll. Għalhekk, id-dħul fl-Unjoni ta’ żwiemel irreġistrati mill-Kuwajt ġie sospiż bl-adozzjoni tar-Regolament ta’ Implimentazzjoni tal-Kummissjoni (UE) 2019/2147 (4). Fit-8 ta’ Settembru 2019, tliet żwiemel oħra fl-istess razzett ġew ikkonfermati pożittivi għall-glanders permezz ta’ test ta’ fissazzjoni ta’ komplement (CFT) imwettaq fil-Laboratorju Reġjonali ta’ Referenza tal-Organizzazzjoni Dinjija għas-Saħħa tal-Annimali (OIE). Fit-23 ta’ Ġunju 2020, il-Kuwajt informa lill-Kummissjoni li fit-30 ta’ April 2020 kien lesta stħarriġ kliniku u seroloġiku attiv, inkluż l-ittestjar għall-glanders ta’ 7 914-il żiemel imwettaq b’riżultati negattivi f’Laboratorju ta’ Referenza Reġjonali tal-OIE.

(4)

Il-Kuwajt għalhekk wera li baqa’ ħieles mill-glanders minn meta nstab l-aħħar każ fit-8 ta’ Settembru 2019. Għalhekk, jenħtieġ li jiġu awtorizzati d-dħul temporanju ta’żwiemel reġistrati, id-dħul mill-ġdid ta’żwiemel reġistrati wara l-esportazzjoni temporanja, u l-importazzjoni ta’ żwiemel reġistrati, kif ukoll it-tranżitu ta’ ekwidi mill-Kuwajt. Għalhekk jixraq li tiġi emendata l-annotazzjoni għall-Kuwajt fl-Anness I tar-Regolament ta’ Implimentazzjoni (UE) 2018/659.

(5)

Fil-25 ta’ Diċembru 2019, it-Turkija nnotifikat permezz tas-Sistema ta’ Notifika tal-Mard tal-Annimali li fl-4 ta’ Diċembru 2019 ġie kkonfermat każ ta’ glanders f’żiemel fil-Gżira ta’ Büyükada, il-Provinċja ta’ Istanbul, it-Turkija. Id-dħul fl-Unjoni ta’ ekwidi u ta’ prodotti ġerminali ta’ ekwidi mit-Turkija ġie sospiż għal perjodu ta’ mill-inqas sitt xhur bl-adozzjoni tar-Regolament ta’ Implimentazzjoni tal-Kummissjoni (UE) 2020/581 (5).

(6)

It-Turkija pprovdiet l-informazzjoni li tiddokumenta li l-Provinċji ta’ Ankara, Edirne, Istanbul, Izmir, Kirklareli u Tekirdag ilhom ħielsa mill-glanders għal aktar minn sitt xhur wara li ġiet innotifikata t-tifqigħa fil-Gżira ta’ Büyükada, fil-Provinċja ta’ Istanbul fil-25 ta’ Diċembru 2019. Barra minn hekk, dak il-pajjiż implimenta miżuri biex jitnaqqas ir-riskju li jiddaħħal il-glanders f’dawk il-provinċji. Għalhekk, jenħtieġ li jiġu awtorizzati d-dħul temporanju ta’ żwiemel reġistrati, id-dħul mill-ġdid ta’ żwiemel reġistrati wara l-esportazzjoni temporanja, u l-importazzjonijiet ta’ żwiemel reġistrati, kif ukoll it-tranżitu ta’ ekwidi mill-Provinċji ta’ Ankara, Edirne, Istanbul, Izmir, Kirklareli u Tekirdag. Għalhekk jixraq li tiġi emendata l-annotazzjoni għat-Turkija fl-Anness I tar-Regolament ta’ Implimentazzjoni (UE) 2018/659.

(7)

Għalhekk, jenħtieġ li r-Regolament ta’ Implimentazzjoni (UE) 2018/659 jiġi emendat skont dan.

(8)

Il-miżuri previsti f’dan ir-Regolament huma skont l-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,