(1)

L-Artikolu 168 tad-Direttiva 2006/112/KE jistabbilixxi, fost l-oħrajn, id-dritt li persuni taxxabbli jnaqqsu t-taxxa fuq il-valur miżjud (“VAT”) dovuta jew imħallsa fl-Istat Membru rilevanti mill-VAT imposta fuq il-provvisti lilhom ta’ merkanzija u ta’ servizzi li jintużaw għall-finijiet tat-tranżazzjonijiet taxxabbli tagħhom. Skont il-punt (a) tal-Artikolu 26(1) ta’ dik id-Direttiva, l-użu ta’ mekanzija li tifforma parti mill-assi ta’ negozju għall-użu privat ta’ persuni taxxabbli jew tal-persunal tagħhom jew, b’mod iktar ġenerali, għal skopijiet oħra barra dawk tan-negozju tagħhom, fejn il-VAT fuq tali merkanzzija kienet deduċibbli kollha jew parti minnha, irid jiġi ttrattat bħala provvista ta’ servizzi bi ħlas.

(2)

Permezz tad-Deċiżjoni ta’ Implimentazzjoni tal-Kunsill 2012/232/UE (2), ir-Rumanija kienet awtorizzata, sal-31 ta’ Diċembru 2014, tillimita għal 50 % id-dritt għat-tnaqqis tal-VAT fuq ix-xiri, l-akkwist intra-Komunitarju, l-importazzjoni, il-kiri jew il-lokazzjoni ta’ ċerti vetturi tat-triq bil-mutur kif ukoll tal-VAT imħallsa fuq in-nefqa relatata ma’ dawk il-vetturi, meta l-vetturi ma jintużawx b’mod esklużiv għal finijiet ta’ negozju, u li teħles lill-persuni taxxabbli milli jkollhom jittrattaw l-użu ta’ tali vetturi għal skopijiet oħra barra dawk tan-negozju tagħhom bħala provvista ta’ servizzi bi ħlas skont il-punt (a) tal-Artikolu 26(1) tad-Direttiva 2006/112/KE. Permezz tad-Deċiżjoni ta’ Implimentazzjoni tal-Kunsill 2015/156 (3), il-perijodu ta’ validità tad-Deċiżjoni ta’ Implimentazzjoni 2012/232/UE ġie estiż sal-31 ta’ Diċembru 2017. Permezz tad-Deċiżjoni ta’ Implimentazzjoni tal-Kunsill (UE) 2017/2012 (4), ir-Rumanija kienet awtorizzata tapplika l-miżuri ta’ deroga sad-data tad-dħul fis-seħħ tar-regoli tal-Unjoni li jiddeterminaw in-nefqa marbuta mal-vetturi tat-triq bil-mutur li mhijiex eliġibbli għal tnaqqis sħiħ tal-VAT, jew sal-31 ta’ Diċembru 2020, skont liema data tiġi l-ewwel.

(3)

B’ittra rreġistrata mal-Kummissjoni fit-13 ta’ Marzu 2020, ir-Rumanija talbet awtorizzazzjoni biex tkompli tapplika miżura ta’ deroga mill-punt (a) tal-Artikolu 26(1), u mill-Artikolu 168, tad-Direttiva 2006/112/KE sabiex tkompli tirrestrinġi d-dritt ta’ tnaqqis b’rabta man-nefqa fuq ċerti vetturi tat-triq bil-mutur li ma jintużawx b’mod esklużiv għal finijiet ta’ negozju.

(4)

L-applikazzjoni ta’ rata perċentwali fissa għall-ammont tal-VAT fuq in-nefqa eliġibbli għal tnaqqis li tikkonċerna l-vetturi tat-triq bil-mutur li ma jintużawx b’mod esklużiv għal finijiet ta’ negozju tissimplifika l-proċedura għall-ġbir tal-VAT.

(5)

Skont it-tieni subparagrafu tal-Artikolu 395(2) tad-Direttiva 2006/112/KE, il-Kummissjoni, b’ittra datata t-2 ta’ April 2020, bagħtet it-talba tar-Rumanija lill-Istati Membri l-oħra. B’ittra datata t-3 ta’ April 2020, il-Kummissjoni nnotifikat lir-Rumanija li kellha l-informazzjoni kollha meħtieġa biex tqis it-talba.

(6)

Skont l--Artikolu 4(2) tad-Deċiżjoni ta’ Implimentazzjoni 2012/232/UE, ir-Rumanija, flimkien mat-talba għal estensjoni, ippreżentat rapport lill-Kummissjoni dwar l-applikazzjoni ta’ dik id-Deċiżjoni ta’ Implimentazzjoni. Abbażi tal-informazzjoni disponibbli attwalment, ir-Rumanija tiddikjara li l-limitu ta’ 50 % għadu ġustifikabbli u għadu xieraq.

(7)

Jenħtieġ li l-estensjoni tal-miżuri ta’ deroga tkun limitata għaż-żmien meħtieġ biex tiġi evalwata l-effettività ta’ dawk il-miżuri ta’ deroga u l-adegwatezza tal-limitu tal-perċentwali. Għalhekk, jenħtieġ li r-Rumanija tkun awtorizzata tkompli tapplika l-miżuri ta’ deroga sal-31 ta’ Diċembru 2023.

(8)

Fil-każ li r-Rumanija tikkunsidra li estensjoni tal-awtorizzazzjoni lil hinn mill-2023 tkun neċessarja, jenħtieġ li tippreżenta talba ta’ estensjoni lill-Kummissjoni sal-31 ta’ Marzu 2023, flimkien ma’ rapport li jinkludi reviżjoni tar-restrizzjoni tal-perċentwali applikata fuq id-dritt għal tnaqqis tal-VAT fuq il-bażi tad-Deċiżjoni ta’ Implimentazzjoni 2012/232/UE..

(9)

Il-miżuri ta’ deroga ser ikollhom biss effett negliġibbli fuq l-ammont kumplessiv tad-dħul mit-taxxa miġbur fl-istadju tal-konsum finali u mhu ser ikollhom l-ebda impatt avvers fuq ir-riżorsi proprji tal-Unjoni li ġejjin mill-VAT.

(10)

Id-Deċiżjoni ta’ Implimentazzjoni 2012/232/UE għaldaqstant jenħtieġ li tiġi emendata skont dan,