This document is an excerpt from the EUR-Lex website
Document 32020D0272
Council Decision (EU) 2020/272 of 20 February 2020 on the signing, on behalf of the European Union, and provisional application of the Sustainable Fisheries Partnership Agreement between the European Union and the Republic of Seychelles and its implementing protocol (2020-2026)
Deċiżjoni tal-Kunsill (UE) 2020/272 tal-20 ta’ Frar 2020 dwar l-iffirmar, f’isem l-Unjoni Ewropea, u l-applikazzjoni provviżorja tal-Ftehim ta’ Sħubija dwar is-Sajd Sostenibbli bejn l-Unjoni Ewropea u r-Repubblika tas-Seychelles u tal-protokoll ta’ implimentazzjoni tiegħu (2020–2026)
Deċiżjoni tal-Kunsill (UE) 2020/272 tal-20 ta’ Frar 2020 dwar l-iffirmar, f’isem l-Unjoni Ewropea, u l-applikazzjoni provviżorja tal-Ftehim ta’ Sħubija dwar is-Sajd Sostenibbli bejn l-Unjoni Ewropea u r-Repubblika tas-Seychelles u tal-protokoll ta’ implimentazzjoni tiegħu (2020–2026)
ST/5242/2020/INIT
ĠU L 60, 28.2.2020, p. 3–4
(BG, ES, CS, DA, DE, ET, EL, EN, FR, GA, HR, IT, LV, LT, HU, MT, NL, PL, PT, RO, SK, SL, FI, SV)
In force
ELI: http://data.europa.eu/eli/dec/2020/272/oj
|
28.2.2020 |
MT |
Il-Ġurnal Uffiċjali tal-Unjoni Ewropea |
L 60/3 |
DEĊIŻJONI TAL-KUNSILL (UE) 2020/272
tal-20 ta’ Frar 2020
dwar l-iffirmar, f’isem l-Unjoni Ewropea, u l-applikazzjoni provviżorja tal-Ftehim ta’ Sħubija dwar is-Sajd Sostenibbli bejn l-Unjoni Ewropea u r-Repubblika tas-Seychelles u tal-protokoll ta’ implimentazzjoni tiegħu (2020–2026)
IL-KUNSILL TAL-UNJONI EWROPEA,
Wara li kkunsidra t-Trattat dwar il-Funzjonament tal-Unjoni Ewropea, u b’mod partikolari l-Artikolu 43, flimkien mal-Artikolu 218(5) tiegħu,
Wara li kkunsidra l-proposta mill-Kummissjoni Ewropea,
Billi:
|
(1) |
Fil-15 ta’ Lulju 2019, il-Kunsill awtorizza lill-Kummissjoni tiftaħ negozjati mar-Repubblika tas-Seychelles (“Seychelles”) bil-għan li tikkonkludi Ftehim ġdid ta’ Sħubija dwar is-Sajd Sostenibbli bejn l-Unjoni Ewropea u r-Repubblika tas-Seychelles (il-“Ftehim ta’ Sħubija”) u protokoll ġdid ta’ implimentazzjoni tiegħu (il-“Protokoll”). |
|
(2) |
In-negozjati ntemmu b’suċċess permezz tal-inizjalar tal-Ftehim ta’ Sħubija u l-Protokoll fit-22 ta’ Ottubru 2019. |
|
(3) |
Il-Ftehim ta’ Sħubija jħassar il-Ftehim ta’ Sħubija fis-Settur tas-Sajd bejn il-Komunità Ewropea u Repubblika tas-Seychelles (1), li daħal fis-seħħ fit-2 ta’ Novembru 2007 għal perijodu ta’ sitt snin u li ġġedded b’mod taċitu, u li għalhekk għadu fis-seħħ. |
|
(4) |
L-aktar protokoll reċenti li jimplimenta l-Ftehim ta' Sħubija fis-Settur tas-Sajd bejn il- Komunità Ewropea u r-Repubblika tas-Seychelles (2) ġie ffirmat fit-18 ta’ Diċembru 2013 u ġie applikat provviżorjament mit-18 ta' Jannar 2014. Huwa ntemm fis-17 ta’ Jannar 2020. |
|
(5) |
L-għan tal-Ftehim ta’ Sħubija u tal-Protokoll huwa li jippermetti lill-Unjoni u lis-Seychelles jaħdmu flimkien aktar mill-qrib biex ikomplu jippromwovu l-iżvilupp ta’ politika tas-sajd sostenibbli u li jippermetti l-użu responsabbli tar-riżorsi tas-sajd fiż-żona tas-sajd tas-Seychelles u fl-Oċean Indjan, filwaqt li jikkontribwixxu għal kundizzjonijiet deċenti tax-xogħol fis-settur tas-sajd. |
|
(6) |
Jenħtieġ li l-Ftehim ta’ Sħubija u l-Protokoll jidħlu fis-seħħ malajr kemm jista’ jkun minħabba l-importanza ekonomika tal-attivitajiet tas-sajd tal-Unjoni fiż-żona tas-sajd tas-Seychelles u l-ħtieġa li titnaqqas kemm jista’ jkun l-interruzzjoni ta’ tali attivitajiet. |
|
(7) |
Sabiex ikunu jistgħu jitkomplew l-attivitajiet tas-sajd tal-bastimenti tal-Unjoni, jenħtieġ li l-Ftehim ta’ Sħubija u l-Protokoll jiġu applikati fuq bażi provviżorja minn meta jiġu ffirmati. |
|
(8) |
Għalhekk jenħtieġ li l-Ftehim ta’ Sħubija u l-Protokoll jiġu ffirmati u applikati fuq bażi provviżorja, sakemm jitlestew il-proċeduri neċessarji għad-dħul fis-seħħ tagħhom, |
ADOTTA DIN ID-DEĊIŻJONI:
Artikolu 1
L-iffirmar f'isem l-Unjoni tal-Ftehim ta’ Sħubija dwar is-Sajd Sostenibbli bejn l-Unjoni Ewropea u r-Repubblika tas-Seychelles (il-“Ftehim ta’ Sħubija”) u tal-Protokoll dwar l-Implimentazzjoni tal-Ftehim ta’ Sħubija dwar is-Sajd Sostenibbli bejn l-Unjoni Ewropea u r-Repubblika tas-Seychelles (2020–2026) (il-“Protokoll”) huwa b’dan awtorizzat, soġġet għall-konklużjoni tal-atti msemmija (3).
Artikolu 2
Il-President tal-Kunsill huwa b'dan awtorizzat li jinnomina l-persuna jew persuni li jkollhom is-setgħa li jiffirmaw il-Ftehim ta’ Sħubija u l-Protokoll f'isem l-Unjoni.
Artikolu 3
Il-Ftehim ta' Sħubija u l-Protokoll għandhom jiġu applikati fuq bażi provviżorja mid-data tal-iffirmar tagħhom (4), sakemm jitlestew il-proċeduri neċessarji għad-dħul fis-seħħ tagħhom.
Artikolu 4
Din id-Deċiżjoni għandha tidħol fis-seħħ fid-data tal-adozzjoni tagħha.
Magħmul fi Brussell, l-20 ta’ Frar 2020.
Għall-Kunsill
Il-President
B. DIVJAK
(1) ĠU L 290, 20.10.2006, p. 2.
(2) Protokoll li jistabbilixxi l-opportunitajiet tas-sajd u l-kontribuzzjoni finanzjarja previsti fil-Ftehim ta’ Sħubija fis-Settur tas-Sajd bejn l-Unjoni Ewropea u r-Repubblika tas-Seychelles (ĠU L 4, 9.1.2014, p. 3).
(3) Ara l-paġna 5 ta’ dan il-Ġurnal Uffiċjali.
(4) Id-data minn meta il-Ftehim ta’ Sħubija u l-Protokoll ser jiġu applikati b'mod provviżorju ser tiġi ppubblikata f'Il-Ġurnal Uffiċjali tal-Unjoni Ewropea mis-Segretarjat Ġenerali tal-Kunsill.