This document is an excerpt from the EUR-Lex website
Document 32019D2174
Commission Implementing Decision (EU) 2019/2174 of 17 December 2019 on the existence of market conditions, within the meaning of Article 35 of Commission Implementing Regulation (EU) 2019/317, in respect of some of the terminal air navigation services at the airports of Alicante and Ibiza (notified under document C(2019) 8919) (Only the Spanish text is authentic)
Deċiżjoni ta’ Implimentazzjoni tal-Kummissjoni (UE) 2019/2174 tas-17 ta’ Diċembru 2019 dwar l-eżistenza ta’ kundizzjonijiet tas-suq, fit-tifsira tal-Artikolu 35 tar-Regolament ta’ Implimentazzjoni tal-Kummissjoni (UE) 2019/317, fir-rigward ta’ wħud mis-servizzi tan-navigazzjoni bl-ajru fit-terminals tal-ajruporti ta’ Alicante u Ibiza (notifikata bid-dokument C(2019) 8919) (It-test bl-Ispanjol biss huwa awtentiku)
Deċiżjoni ta’ Implimentazzjoni tal-Kummissjoni (UE) 2019/2174 tas-17 ta’ Diċembru 2019 dwar l-eżistenza ta’ kundizzjonijiet tas-suq, fit-tifsira tal-Artikolu 35 tar-Regolament ta’ Implimentazzjoni tal-Kummissjoni (UE) 2019/317, fir-rigward ta’ wħud mis-servizzi tan-navigazzjoni bl-ajru fit-terminals tal-ajruporti ta’ Alicante u Ibiza (notifikata bid-dokument C(2019) 8919) (It-test bl-Ispanjol biss huwa awtentiku)
C/2019/8919
ĠU L 329, 19.12.2019, p. 95–96
(BG, ES, CS, DA, DE, ET, EL, EN, FR, HR, IT, LV, LT, HU, MT, NL, PL, PT, RO, SK, SL, FI, SV)
In force
19.12.2019 |
MT |
Il-Ġurnal Uffiċjali tal-Unjoni Ewropea |
L 329/95 |
DEĊIŻJONI TA’ IMPLIMENTAZZJONI TAL-KUMMISSJONI (UE) 2019/2174
tas-17 ta’ Diċembru 2019
dwar l-eżistenza ta’ kundizzjonijiet tas-suq, fit-tifsira tal-Artikolu 35 tar-Regolament ta’ Implimentazzjoni tal-Kummissjoni (UE) 2019/317, fir-rigward ta’ wħud mis-servizzi tan-navigazzjoni bl-ajru fit-terminals tal-ajruporti ta’ Alicante u Ibiza
(notifikata bid-dokument C(2019) 8919)
(It-test bl-Ispanjol biss huwa awtentiku)
IL-KUMMISSJONI EWROPEA,
Wara li kkunsidrat it-Trattat dwar il-Funzjonament tal-Unjoni Ewropea,
Wara li kkunsidrat ir-Regolament (KE) Nru 550/2004 tal-Parlament Ewropew u tal-Kunsill tal-10 ta’ Marzu 2004 dwar il-forniment ta’ servizzi ta’ navigazzjoni tal-ajru fl-ajru uniku Ewropew (ir-Regolament tal-forniment ta’ servizz) (1), u b’mod partikolari l-Artikolu 16(1) tiegħu,
Wara li kkunsidrat ir-Regolament ta’ Implimentazzjoni tal-Kummissjoni (UE) 2019/317 tal-11 ta’ Frar 2019 li jistabbilixxi skema ta’ prestazzjoni u imposti fl-Ajru Uniku Ewropew (2), u b’mod partikolari l-Artikolu (35)(3) tiegħu,
Billi:
(1) |
Fid-29 ta’ Lulju 2019, Spanja nnotifikat lill-Kummissjoni bid-deċiżjoni maħsuba tagħha li wħud mis-servizzi tan-navigazzjoni bl-ajru fit-terminals tal-ajruporti ta’ Alicante u Ibiza huma suġġetti għal kundizzjonijiet tas-suq (“id-deċiżjoni maħsuba ta’ Spanja”). Dawk is-servizzi jikkonċernaw il-kontroll tat-traffiku tal-ajru tal-ajrudrom. Id-deċiżjoni maħsuba ta’ Spanja tikkonċerna t-tielet perjodu ta’ referenza skont it-tifsira tal-Artikolu 7(1) tar-Regolament ta’ Implimentazzjoni (UE) 2019/317. |
(2) |
Skont l-Artikolu 35(3) tar-Regolament ta’ Implimentazzjoni (UE) 2019/317, u fuq il-bażi ta’ valutazzjoni ddettaljata tal-kundizzjonijiet kollha stipulati fl-Anness X ta’ dak ir-Regolament, l-awtoritajiet Spanjoli jqisu li s-servizzi kkonċernati huma soġġetti għall-kundizzjonijiet tas-suq. L-awtoritajiet Spanjoli kkonsultaw lir-rappreżentanti tal-utenti tal-ispazju tal-ajru, kif ukoll lil partijiet ikkonċernati oħra bħall-operaturi tal-ajruport u l-fornituri tas-servizzi tan-navigazzjoni bl-ajru. |
(3) |
Il-valutazzjoni tal-awtoritajiet Spanjoli qieset is-sitt kriterji li huma previsti fl-Anness X tar-Regolament ta’ Implimentazzjoni (UE) 2019/317. Skont il-punt 6 tiegħu, il-kriterji preċedenti ġew ivvalutati individwalment għal kull ajruport. Għall-kriterji stipulati fil-punti 1) u 2) tiegħu, l-awtoritajiet Spanjoli sabu li ma kienx hemm ostakli sinifikanti li jipprevjenu lil fornitur tas-servizzi milli joffri servizzi tal-kontroll tat-traffiku tal-ajru tal-ajrudrom. L-abbozz ta’ kuntratt tal-provvista tas-servizz jipprevedi l-kundizzjonijiet u l-proċeduri li skonthom l-ajruporti jistgħu jitterminaw il-kuntratt u jaqilbu għall-awtoforniment. Il-valutazzjoni tal-awtoritajiet Spanjoli turi wkoll li hemm fis-seħħ proċeduri li jipprevedu t-trasferiment tal-persunal u tal-assi kollha lejn kumpanija differenti. Fir-rigward tal-punt 3 tal-Anness X, ta’ min jinnota li Spanja organizzat sejħa li tapplika proċess ta’ sejħa għall-offerti pubblika eżistenti għall-forniment tas-servizzi inkwistjoni. Fil-mument tal-proċess tal-offerti, ġew iċċertifikati tmien fornituri differenti tas-servizzi tan-navigazzjoni tal-ajru minn Spanja, li jikkostitwixxu fornituri ta’ servizz alternattivi kredibbli biex jipparteċipaw fil-proċess tal-offerti. Uħud minn dawk il-fornituri tas-servizzi kienu diġà pprovdew servizzi tan-navigazzjoni bl-ajru. Fir-rigward tal-kriterju stabbilit fil-punt 4 tal-Anness X, l-ajruporti ta’ Alicante u Ibiza huma t-tnejn soġġetti għal pressjonijiet kummerċjali u tabilħaqq jikkompetu b’mod attiv għat-traffiku turistiku. L-offerent magħżul huwa distint u indipendenti mill-fornitur kurrenti tas-servizzi tan-navigazzjoni tal-ajru en route, li jiżgura li l-kontabbiltà u r-rappurtar ikunu separati, kif imsemmi fil-punt 5 tal-Anness X. |
(4) |
Il-Kummissjoni eżaminat id-deċiżjoni maħsuba ta’ Spanja u l-valutazzjoni sottostanti tagħha, u waslet għall-konklużjoni li l-valutazzjoni tal-kundizzjonijiet tas-suq għall-forniment ta’ servizzi tal-kontroll tat-traffiku tal-ajru tal-ajrudrom, kif notifikata minn Spanja fid-29 ta’ Lulju 2019, twettqet skont il-kundizzjonijiet stabbiliti fl-Anness X tar-Regolament ta’ Implimentazzjoni (UE) 2019/317. |
ADOTTAT DIN ID-DEĊIŻJONI:
Artikolu 1
Il-valutazzjoni tal-kundizzjonijiet tas-suq għall-forniment ta’ servizzi ta’ kontroll tat-traffiku tal-ajru tal-ajrudrom fiż-żoni tal-imposti tat-terminals fl-ajruporti ta’ Alicante u Ibiza matul it-tielet perjodu ta’ referenza skont it-tifsira tal-Artikolu 7(1) tar-Regolament ta’ Implimentazzjoni (UE) 2019/317, kif innotifikat minn Spanja fid-29 ta’ Lulju 2019, twettqet skont il-kundizzjonijiet stabbiliti fl-Anness X tar-Regolament ta’ Implimentazzjoni (UE) 2019/317.
Artikolu 2
Din id-Deċiżjoni hija indirizzata lir-Renju ta’ Spanja.
Magħmul fi Brussell, is-17 ta’ Diċembru 2019.
Għall-Kummissjoni
Adina-Ioana VĂLEAN
Membru tal-Kummissjoni