(1)

Il-Parlament Ewropew, il-Kunsill u l-Kummissjoni qablu li jikkooperaw sabiex jaġġornaw u jissimplifikaw il-leġiżlazzjoni tal-Unjoni permezz tal-Ftehim Interistituzzjonali tat-13 ta’ April 2016 dwar it-Tfassil Aħjar tal-Liġijiet (3).

(2)

Sabiex jitnaddaf u jitnaqqas il-volum ta’ leġiżlazzjoni tal-Unjoni, hemm bżonn li tiġi identifikata l-leġiżlazzjoni li tkun obsoleta jew li ma għadhiex adattata għall-iskop maħsub għaliha. Permezz tat-tħassir ta’ tali leġiżlazzjoni, il-qafas leġiżlattiv jibqa’ trasparenti, ċar u faċli biex jintuża.

(3)

Ir-Regolament (UE) Nru 256/2014 tal-Parlament Ewropew u tal-Kunsill (4) jirrikjedi li l-Istati Membri jinnotifikaw lill-Kummissjoni dwar il-proġetti ta’ investiment li fuqhom inbdiet ħidma ta’ kostruzzjoni jew ta’ dekummissjonar jew li fuqhom ittieħdet deċiżjoni finali dwar l-investiment.

(4)

L-obbligi skont ir-Regolament (UE) Nru 256/2014 dwar in-notifika ta’ proġetti ta’ investiment, u ċertu informazzjoni u data relatati ma' tali notifika, kienu ġew stabbiliti qabel fir-Regolament tal-Kunsill (UE, Euratom) Nru 617/2010 (5). Il-Qorti tal-Ġustizzja annullat ir-Regolament (UE, Euratom) Nru 617/2010 (6), għar-raġuni li dan kellu jiġi adottat fuq bażi ġuridika oħra, iżda l-effetti tiegħu nżammu sad-dħul fis-seħħir-Regolament (UE) Nru 256/2014.

(5)

Ir-Regolament (UE, Euratom) Nru 617/2010 kien maħsub biex jipprovdi lill-Kummissjoni bid-data u bl-informazzjoni dwar l-iżviluppi ppjanati fil-kapaċitajiet ta’ produzzjoni, ta’ trażmissjoni u ta’ ħżin, kif ukoll dwar proġetti fis-setturi tal-enerġija. Kien maħsub biex jagħti lill-Kummissjoni stampa ġenerali tal-iżvilupp tal-investiment fl-infrastruttura tal-enerġija fl-Unjoni.

(6)

Minn mindu nħolqu l-obbligi stabbiliti fir-Regolament (UE, Euratom) Nru 617/2010 u r-Regolament (UE) Nru 256/2014, saru tliet eżerċizzji ta’ rappurtar, fl-2011, fl-2013 u fl-2015. Barra minn hekk, il-Kummissjoni għamlet arranġamenti għal studju estern li kellu jitwettaq wara tliet eżerċizzji ta’ rappurtar mill-Istati Membri li saru skont ir-Regolament (UE) Nru 256/2014. Għaldaqstant, għadda biżżejjed żmien u nkisbet esperjenza suffiċjenti biex il-Kummissjoni tkun tista’ twettaq analiżi kritika bbażata fuq l-evidenza dwar jekk ir-Regolament (UE) Nru 256/2014 wassalx għar-riżultati mistennija jew le.

(7)

Fl-2016, il-Kummissjoni wettqet ir-rieżami previst fl-Artikolu 11 tar-Regolament (UE) Nru 256/2014, inkluż konsultazzjoni mal-partijiet ikkonċernati li tkopri l-obbligi kollha ta’ ppjanar u ta’ rappurtar fis-settur tal-enerġija. Il-Kummissjoni waslet għall-konklużjoni li kien hemm sovrappożizzjoni sinifikanti bejn l-obbligi ta’ rappurtar tal-Istati Membri skont ir-Regolament (UE) Nru 256/2014 u l-obbligi tal-Istati Membri li jirrappurtaw lin-netwerk Ewropew tal-operaturi tas-sistema ta’ trażmissjoni tal-elettriku (l-“ENTSO-E”) u n-netwerk Ewropew tal-operaturi tas-sistema ta’ trażmissjoni tal-gass (l-“ENTSOG”). Deher ċar ukoll li l-kwalità u l-adegwatezza tal-informazzjoni u tad-data riċevuti ħafna drabi ma kinux ta' kwalità tajba, u li dik l-informazzjoni u din id-data kienu tqiegħdu għad-dispożizzjoni tal-Kummissjoni permezz ta’ sorsi oħra, bħan-netwerk Ewropew tal-operaturi tas-sistemi tat-trażmissjoni (l-“ENTSOs”), il-pjanijiet ta' għaxar snin għall-iżvilupp tan-netwerk (it-“TYNDPs”), ir-rapporti annwali tal-Operaturi tas-Sistema ta’ Trażmissjoni u ta' kumpaniji tal-utilitajiet u pjanijiet ta’ żvilupp nazzjonali. Barra minn hekk, ġie nnutat li l-Kummissjoni għandha aċċess dirett għal data tas-suq permezz tas-Sistema għall-Osservazzjoni tas-Suq tal-Enerġija (l-“EMOS”).

(8)

Għaldaqstant, ir-Regolament (UE) Nru 256/2014 ma wassalx għar-riżultati mistennija f’termini ta’ kwantità, kwalità u adegwatezza tad-data u tal-informazzjoni li rċeviet il-Kummissjoni.

(9)

Ir-Regolament (UE) Nru 256/2014 jenħtieġ għalhekk li jitħassar,