(1)

Is-solidarjetà fost iċ-ċittadini tal-Unjoni u fost l-Istati Membri hija waħda mill-valuri universali li fuqhom hija mibnija l-Unjoni. Dan il-valur komuni jiggwida l-azzjonijiet tal-Unjoni u jipprovdiha bl-unità neċessarja biex tindirizza l-isfidi kurrenti u tal-ġejjieni tas-soċjetà, li ż-żgħażagħ Ewropej huma lesti li jgħinu jindirizzaw billi jesprimu s-solidarjetà tagħhom fil-prattika. Is-solidarjetà tistimola wkoll l-interess taż-żgħażagħ fil-proġett komuni Ewropew. Il-prinċipju tas-solidarjetá huwa minqux fl-Artikolu 2 tat-Trattat dwar l-Unjoni Ewropea (TUE) u fil-preambolu tal-Karta tad-Drittijiet Fundamentali tal-Unjoni Ewropea.

(2)

Matul id-diskors dwar l-Istat tal-Unjoni tal-14 ta' Settembru 2016, kien enfasizzat li hemm bżonn li ninvestu fiż-żgħażagħ u kien imħabbar li l-Korp Ewropew ta' Solidarjetà kellu jiġi stabbilit bl-għan li jinħolqu opportunitajiet għaż-żgħażagħ madwar l-Unjoni biex dawn jagħtu kontribut sinifikanti lis-soċjetà, juru solidarjetà u jiżviluppaw il-ħiliet, il-kompetenzi u l-għarfien tagħhom, u b'hekk jiksbu esperjenza umana imprezzabbli, li hija essenzjali wkoll biex tinħoloq ċittadinanza tal-Unjoni attiva u impenjata.

(3)

Fil-Komunikazzjoni tagħha tas-7 ta' Diċembru 2016 intitolata “Korp Ewropew ta' Solidarjetà”, il-Kummissjoni saħqet fuq il-bżonn li jissaħħu l-pedamenti għal ħidma ta' solidarjetà madwar l-Ewropa, biex iż-żgħażagħ jiġu pprovduti b'iktar opportunitajiet u ta' kwalità aħjar għall-attivitajiet ta' solidarjetà ta' kwalità għolja li jkopru firxa wiesgħa ta' oqsma, u biex jingħata appoġġ lill-atturi nazzjonali, reġjonali u lokali, fl-isforzi tagħhom biex jindirizzaw sfidi u kriżijiet differenti. Dik il-Komunikazzjoni nediet l-ewwel fażi tal-Korp Ewropew ta' Solidarjetà li fiha kienu mobilizzati programmi differenti tal-Unjoni biex joffru opportunitajiet ta' volontarjat, traineeships jew impjiegi liż-żgħażagħ mal-Unjoni. Dawn l-attivitajiet ta' solidarjetà, kemm jekk implimentati qabel jew inkella wara d-dħul fis-seħħ ta' dan ir-Regolament, jenħtieġ li jkomplu japplikaw ir-regoli u l-kundizzjonijiet stabbiliti mill-programmi rispettivi tal-Unjoni li ffinanzjawhom fl-ewwel fażi tal-Korp Ewropew ta' Solidarjetà.

(4)

Fil-kuntest ta' dan ir-Regolament, is-solidarjetà taf tinftiehem bħala sens ta' responsabbiltà min-naħa ta' kulħadd fir-rigward ta' kulħadd sabiex wieħed jimpenja ruħu għall-ġid komuni, li huwa espress permezz ta' azzjonijiet konkreti mingħajr ma jkun mistenni servizz lura bħala tpattija.

(5)

Jenħtieġ li ż-żgħażagħ jiġu pprovduti b'opportunitajiet li jkunu faċilment aċċessibbli biex jinvolvu ruħhom f'attivitajiet ta' solidarjetà ta' kwalità għolja b'dimensjoni qawwija Ewropea bħala mezz biex jikkontribwixxu għat-tisħiħ tal-koeżjoni, is-solidarjetà, l-inklużjoni soċjali u d-demokrazija fil-pajjiżi parteċipanti għall-benefiċċju tal-komunitajiet lokali, filwaqt li jtejbu l-kompetenzi tagħhom għall-iżvilupp personali tagħhom, u b'hekk iħeġġu l-kunfidenza fihom infushom, l-awtonomija u l-motivazzjoni għat-tagħlim, jistimolaw l-iżvilupp edukattiv, soċjali, artistiku, lingwistiku, kulturali, ċiviku u professjonali tagħhom, kif ukoll jiffaċilitaw iċ-ċittadinanza attiva, l-impjegabbiltà u t-tranżizzjoni tagħhom fis-suq tax-xogħol. Dawk l-attivitajiet ta' solidarjetà jappoġġjaw ukoll il-mobbiltà tal-parteċipanti.

(6)

Dan ir-Regolament jistabbilixxi programm għal azzjoni tal-Unjoni msejjaħ il-Korp Ewropew ta' Solidarjetà bħala bażi biex issir bidla pożittiva fis-soċjetà billi jipprovdi appoġġ lill-komunitajiet ta' individwi u lill-entitajiet impenjati favur it-titjib tas-solidarjetà madwar l-Ewropa. Għalhekk, huwa jipprovdi għal strument ta' nfiq ta' azzjoni tal-Unjoni stabbilit bl-għan li japplika mid-data tad-dħul fis-seħħ ta' dan ir-Regolament fuq bażi kontinwa u jistabbilixxi wkoll il-bażi għall-Korp Ewropew ta' Solidarjetà bħala komunità u bħala sors ta' ispirazzjoni għal spirtu ta' solidarjetà aktar b'saħħtu fl-Ewropa permezz tal-impatt usa' tal-attivitajiet imwettqa fil-qafas tal-Korp Ewropew ta' Solidarjetà.

(7)

L-attivitajiet ta' solidarjetà offruti liż-żgħażagħ jenħtieġ li jkunu ta' kwalità għolja, fis-sens li jenħtieġ li jikkontribwixxu biex jintlaħqu l-għanijiet tal-Korp Ewropew ta' Solidarjetà u jgħinu biex jingħelbu l-isfidi tas-soċjetà, waqt li jindirizzaw il-ħtiġijiet tal-komunitajiet lokali. L-attivitajiet ta' solidarjetà jenħtieġ li joffru liż-żgħażagħ l-opportunità li jiksbu kompetenzi siewja għall-iżvilupp personali, soċjali, ċiviku u professjonali, inkluża d-dimensjoni ta' tagħlim u taħriġ solidu, ikunu aċċessibbli għaż-żgħażagħ kollha, jiġu implimentati f'kundizzjonijiet sikuri u tajbin u jkunu vvalidati kif xieraq. L-attivitajiet ta' solidarjetà jenħtieġ li ma jkollhomx impatt negattiv fuq l-impjiegi u t-traineeships eżistenti u jenħtieġ li jikkontribwixxu biex isaħħu l-impenji tar-responsabbiltà soċjali korporattiva tal-kumpaniji, filwaqt li ma jissostitwixxuhomx.

(8)

Jenħtieġ li kwalunkwe entità li tkun lesta tipparteċipa fil-Korp Ewropew ta' Solidarjetà, kemm jekk iffinanzjata mill-baġit tal-Korp Ewropew ta' Solidarjetà, minn xi programm ieħor tal-Unjoni kif ukoll minn sors ta' finanzjament differenti, tirċievi tikketta tal-kwalità dment li jiġu ssodisfati r-rekwiżiti speċifiċi. Jenħtieġ li r-rekwiżit li tirċievi tikketta tal-kwalità ma jkunx japplika għal persuni fiżiċi li jfittxu appoġġ finanzjarju f'isem grupp informali ta' parteċipanti għall-proġetti ta' solidarjetà tagħhom. Jenħtieġ li t-tikketta tal-kwalità attribwita lill-organizzazzjonijiet parteċipanti tiċċertifika l-kapaċità ta' dawk l-organizzazzjonijiet li jiżguraw il-kwalità tal-attivitajiet ta' solidarjetà offruti minnhom. Il-proċess lgħall-għoti ta' tikketta tal-kwalità jenħtieġ li jitwettaq mill-korpi ta' implimentazzjoni tal-Korp Ewropew ta' Solidarjetà b'mod aċċessibbli u trasparenti. It-tikketta tal-kwalità mogħtija jenħtieġ li terġa' tiġi vvalutata b'mod perjodiku u jenħtieġ li jkun possibli li tiġi revokata t-tikketta tal-kwalità fejn, fil-kuntest tar-rivalutazzjoni, jinstab li l-kundizzjonijiet li wasslu għall-għoti tagħha m'għadhomx issodisfati.

(9)

Il-Korp Ewropew ta' Solidarjetà jkun jipprovdi punt ta' dħul uniku għall-attivitajiet ta' solidarjetà fi ħdan l-Unjoni. Jenħtieġ li jiġu żgurati l-konsistenza u l-komplementarjetà tal-Korp Ewropew ta' Solidarjetà ma' politiki, strumenti u ma' programmi rilevanti oħra tal-Unjoni. Jenħtieġ li l-Korp Ewropew ta' Solidarjetà jibni fuq il-vantaġġi u fuq is-sinerġiji tal-programmi eżistenti u dawk preċedenti, b'mod partikolari l-programmi Erasmus+ u ż-Żgħażagħ fl-Azzjoni. Jenħtieġ li jikkomplimenta wkoll l-isforzi magħmula mill-Istati Membri biex jappoġġjaw liż-żgħażagħ u biex jiffaċilitaw it-tranżizzjoni mill-iskola għax-xogħol taħt skemi bħall-Garanzija għaż-Żgħażagħ stabbilita f'konformità mar-Rakkomandazzjoni tal-Kunsill tat-22 ta' April 2013 dwar it-twaqqif ta' Garanzija għaż-Żgħażagħ (3) billi jipprovdulhom opportunitajiet addizzjonali biex jieħdu sehem f'attivitajiet ta' solidarjetà fil-forma ta' traineeships jew ta' impjiegi fi ħdan l-Istat Membru rispettiv tagħhom jew b'mod transfruntier. Jenħtieġ li l-komplimentarjetà tiġi żgurata wkoll ma' netwerks eżistenti fil-livell tal-Unjoni li huma pertinenti għall-attivitajiet taħt il-Korp Ewropew ta' Solidarjetà, bħan-Netwerk Ewropew tas-Servizzi Pubbliċi tal-Impjiegi, EURES u n-netwerk Eurodesk,. Barra minn hekk, il-komplimentarjetà u l-kooperazzjoni leali bejn l-iskemi relatati eżistenti u l-Korp Ewropew ta' Solidarjetà jenħtieġ li jitrawmu b'mod partikolari permezz ta' skemi ta' solidarjetà, volontarjat, servizzi ċiviċi u mobbiltà għaż-żgħażagħ, li joperaw fuq livell nazzjonali, reġjonali jew lokali, kif ukoll ma' prijoritajiet marbuta mas-solidarjetà u ż-żgħażagħ fil-pajjiżi parteċipanti, kif xieraq, biex itejbu u jsaħħu b'mod reċiproku l-impatti u l-kwalitajiet ta' skemi bħal dawn u jibnu fuq prattiki tajba. Il-Korp Ewropew ta' Solidarjetà jenħtieġ li ma jissostitwixxix skemi nazzjonali simili ta' solidarjetà, volontarjat, servizzi ċiviċi u mobbiltà. Jenħtieġ li jiġi żgurat aċċess ugwali taż-żgħażagħ kollha għall-attivitajiet ta' solidarjetà nazzjonali. Jenħtieġ li jitħeġġu sħubijiet ma' netwerks Ewropej li huma speċjalizzati f'ċerti problemi soċjali urġenti.

(10)

Biex jiġi mmassimizzat l-impatt tal-Korp Ewropew ta' Solidarjetà, jenħtieġ li programmi oħra tal-Unjoni jkunu jistgħu jikkontribwixxu għall-objettivi tal-Korp Ewropew ta' Solidarjetà billi jappoġġjaw attivitajiet li jaqgħu fi ħdan il-kamp ta' applikazzjoni tiegħu. Jenħtieġ li din il-kontribuzzjoni tiġi ffinanzjata skont l-atti legali rispettivi tal-programmi kkonċernati bil-għan li jiġi żgurat involviment akbar taż-żgħażagħ, tas-soċjetà ċivili u tal-iskemi ta' volontarjat eżistenti fl-Istati Membri. Ladarba jkunu kisbu tikketta tal-kwalità valida l-organizzazzjonijiet parteċipanti jenħtieġ li jingħataw aċċess għall-portal tal-Korp Ewropew ta' Solidarjetà u jirċievu miżuri ta' kwalità u ta' appoġġ ipprovduti skont it-tip ta' attività ta' solidarjetà offruta.

(11)

Jenħtieġ li l-Korp Ewropew ta' Solidarjetà jiftaħ opportunitajiet ġodda għaż-żgħażagħ biex dawn jinpenjaw ruħhom f'volontarjat, traineeships jew impjiegi kif ukoll biex ifasslu u jiżviluppaw, fuq l-inizjattiva tagħhom stess proġetti ta' solidarjetà li jippreżentaw valur Ewropew ċar. Jenħtieġ li dawk l-opportunitajiet jgħinu fl-indirizzar tal-ħtiġijiet mhux issodisfati tas-soċjetà u jikkontribwixxu għat-tisħiħ tal-komunitajiet u tal-iżvilupp personali, edukattiv, soċjali, ċiviku u professjonali taż-żgħażagħ. Jenħtieġ ukoll li l-Korp Ewropew ta' Solidarjetà jappoġġja lill-attivitajiet ta' netwerking għall-parteċipanti u għall-organizzazzjonijiet parteċipantikif ukoll il-miżuri li jiżguraw il-kwalità tal-attivitajiet appoġġjati u li jsaħħu l-validazzjoni tal-eżiti tat-tagħlim tagħhom. Jenħtieġ li jikkontribwixxi wkoll għall-appoġġ u t-tisħiħ ta' organizzazzjonijiet eżistenti li jimplimentaw azzjonijiet ta' solidarjetà.

(12)

Il-volontarjat jikkostitwixxi esperjenza rikka f'kuntest ta' tagħlim formali u mhux formali li ssaħħaħ l-iżvilupp personali, soċjoedukattiv u l-iżvilupp professjonali, l-impjegabbiltà u ċ-ċittadinanza attiva. Il-volontarjat jenħtieġ li ma jissostitwixxix traineeships jew impjiegi u jenħtieġ li jkun ibbażat fuq ftehim ta' volontarjat bil-miktub. Il-Kummissjoni u l-Istati Membri se jikkooperaw fir-rigward tal-politiki ta' voluntarjat fil-qasam taż-żgħażagħ permezz tal-metodu miftuħ ta' koordinazzjoni.

(13)

It-traineeships u l-impjiegi jenħtieġ li jkunu separati b'mod ċar mill-volontarjat, kemm mil-lat finanzjarju kif ukoll dak organizzattiv. It-traineeships ma għandhom qatt ma jwasslu għas-sostituzzjoni tal-impjiegi. Madankollu, it-traineeships u l-impjiegi remunerati jistgħu jirrappreżentaw inċentiv għaż-żgħażagħ żvantaġġati u għal żgħażagħ b'inqas opportunitajiet biex jipparteċipaw f'attivitajiet relatati mas-solidarjetà li altrimenti jaf ma jkunux jistgħu jiksbu aċċess għalihom. It-traineeships jistgħu jiffaċilitaw it-tranżizzjoni taż-żgħażagħ mill-edukazzjoni għall-impjieg u jistgħu jrawmu l-impjegabbiltà taż-żgħażagħ, li hija essenzjali biex tintlaħaq l-integrazzjoni sostenibbli tagħhom fis-suq tax-xogħol. It-traineeships u l-impjiegi offruti mill-Korp Ewropew ta' Solidarjetà jenħtieġ li jitħallsu dejjem mill-organizzazzjoni parteċipanti li tospita jew li timpjega lill-parteċipant. It-traineeships jenħtieġ li jkunu bbażati fuq ftehim ta' traineeship bil-miktub skont il-qafas regolatorju applikabbli tal-pajjiż fejn isir it-traineeship, kif xieraq, u jenħtieġ li jsegwu l-prinċipji spjegati fir-Rakkomandazzjoni tal-Kunsill tal-10 ta' Marzu 2014 dwar Qafas tal-Kwalità għat-Traineeships (4).

L-impjiegi jenħtieġ li jkunu bbażati fuq kuntratt ta' impjieg f'konformità mal-qafas regolatorju nazzjonali jew ftehimiet kollettivi applikabbli jew iż-żewġ pajjiżi parteċipanti fejn ikun qed jitwettaq l-impjieg. It-traineeships jenħtieġ li jkunu temporanji u b'durata massima ta' sitt xhur rinnovabbli darba b'tul ta' żmien massimu ta' 12-il xahar fi ħdan l-istess organizzazzjoni parteċipanti. Jenħtieġ li l-appoġġ finanzjarju għall-organizzazzjonijiet parteċipanti ma jaqbiżx tnax-il xahar. It-traineeships u l-impjiegi jenħtieġ li jiġu akkumpanjati minn tħejjija, taħriġ fuq il-post tax-xogħol u appoġġ wara l-kollokament adegwati b'rabta mal-parteċipazzjoni tal-parteċipant. It-traineeships u l-impjiegi jistgħu jiġu ffaċilitati mill-atturi rilevanti tas-suq tax-xogħol, b'mod partikolari mis-servizzi pubbliċi u privati tal-impjiegi, mis-sħab soċjali u mill-Kamra tal-Kummerċ, kif ukoll l-organizzazzjonijiet membri tal-EURES, skont ir-Regolament (UE) 2016/589 tal-Parlament Ewropew u tal-Kunsill (5) fil-każ ta' attivitajiet transfruntiera.

(14)

L-ispirtu ta' inizjattiva taż-żgħażagħ u ċ-ċittadinanza attiva tagħhom huma kwalitajiet importanti għas-soċjetà. Jenħtieġ li l-Korp Ewropew ta' Solidarjetà jikkontribwixxi għat-trawwim ta' dan l-aspett billi joffri l-opportunità liż-żgħażagħ li jfasslu u jimplimentaw il-proġetti tagħhom stess li jippreżentaw valur miżjud ċar immirati biex jindirizzaw sfidi ewlenin għall-benefiċċju tal-komunitajiet lokali, b'mod partikolari komunitajiet f'żoni rurali, iżolati jew marġinalizzati. Jenħtieġ li dawk il-proġetti jkunu opportunità għaż-żgħażagħ biex jiżviluppaw soluzzjonijiet innovattivi u biex jiġu ppruvati ideat b'mod sostenibbli u biex ikollhom l-esperjenza li jkunu huma stess dawk li jixprunaw l-attivitajiet ta' solidarjetà. Dawn jistgħu jservu wkoll bħala punt tat-tluq għall-involviment ulterjuri f'attivitajiet ta' solidarjetà u jistgħu jkunu l-ewwel pass biex il-parteċipanti jitħeġġu jinvolvu ruħhom f'intraprenditorija soċjali jew bħala voluntiera f'assoċjazzjonijiet, organizzazzjonijiet mhux governattivi (NGOs), organizzazzjonijiet taż-żgħażagħ jew korpi oħra attivi fis-setturi tas-solidarjetà, dawk mingħajr skop ta' qligħ u dawk taż-żgħażagħ kif ukoll jistabbilixxu l-assoċjazzjonijiet tagħhom stess. L-appoġġ ta' wara l-kollokament se jkollu l-għan li jappoġġja liż-żgħażagħ jibqgħu impenjati u attivi fis-settur tas-solidarjetà, inkluż permezz ta' involviment ma' assoċjazzjonijiet, kooperattivi, intrapriżi soċjali, organizzazzjonijiet taż-żgħażagħ u ċentri tal-komunità.

(15)

Il-volontarjat u l-proġetti ta' solidarjetà jenħtieġ li jkopru l-ispejjeż tal-parteċipanti li jirriżultaw mill-parteċipazzjoni f'tali attivitajiet ta' solidarjetà iżda jenħtieġ li ma jipprovdulhomx salarji jew xi benefiċċju ekonomiku.

(16)

Jenħtieġ li l-parteċipanti u l-organizzazzjonijiet parteċipanti jħossu li huma jappartjenu għal komunità ta' individwi u għal entitajiet li jkunu ħadu impenn li jsaħħu s-solidarjetà madwar l-Ewropa u lil hinn minnha. Fl-istess ħin, l-organizzazzjonijiet parteċipanti jeħtieġu l-appoġġ biex isaħħu l-abilità tagħhom biex joffru attivitajiet ta' solidarjetà ta' kwalità tajba għal għadd dejjem jiżdied ta' parteċipanti u jattiraw parteċipanti ġodda. Jenħtieġ li l-Korp Ewropew ta' Solidarjetà jappoġġja l-attivitajiet ta' netwerking li jfittxu li jsaħħu l-kapaċità taż-żgħażagħ u tal-organizzazzjonijiet parteċipanti biex jimpenjaw ruħhom f'din il-komunità, irawmu spirtu tal-Korp Ewropew ta' Solidarjetà, kif ukoll iħeġġu l-iskambju ta' prattiki u ta' esperjenza tas-solidarjetà siewja billi jisiltu wkoll mill-esperjenza fil-protezzjoni ċivili, fejn ikun xieraq. Jenħtieġ li l-attivitajiet ta' netwerking jikkontribwixxu għas-sensibilizzazzjoni dwar il-Korp Ewropew ta' Solidarjetà fost entitajiet pubbliċi u privati kif ukoll għall-ġbir ta' feedback mingħand il-parteċipanti u mingħand l-organizzazzjonijiet parteċipanti dwar l-implimentazzjoni tal-Korp Ewropew ta' Solidarjetà.

(17)

Jenħtieġ li tingħata attenzjoni partikolari għall-iżgurar tal-kwalità tal-attivitajiet ta' solidarjetà u ta' opportunitajiet oħra offruti mill-Korp Ewropew ta' Solidarjetà, b'mod partikolari billi jiġu offruti lill-parteċipanti taħriġ online u offline u appoġġ lingwistiku b' mod li jirrispetta l-prinċipju tal-multilingwiżmu, assigurazzjoni, appoġġ amministrattiv u appoġġ qabel l-attività ta' solidarjeta', wara l-attività ta' solidarjeta', jew it-tnejn, kif ukoll il-validazzjoni ta' kompetenzi miksuba permezz tal-esperjenza tagħhom fil-Korp Ewropew ta' Solidarjetà. Jenħtieġ li dawk il-miżuri ta' appoġġ jiġu żviluppati u jkunu pprovduti f'kollaborazzjoni mal-organizzazzjonijiet taż-żgħażagħ u ma' organizzazzjonijiet oħra mingħajr skop ta' qligħ u ma' organizzazzjonijiet tas-soċjetà ċivili sabiex jiġi sfruttat l-għarfien espert tagħhom fil-qasam. Dawk il-miżuri ta' appoġġ jenħtieġ li jqisu l-ambjent u n-natura tal-attivitajiet imwettqa mill-parteċipanti, b'attenzjoni speċjali għal kwalunkwe riskju potenzjali.

(18)

Biex jiġi żgurat l-impatt tal-attivitajiet tal-Korp Ewropew ta' Solidarjetà fuq l-iżvilupp personali, edukattiv, artistiku, soċjali, ċiviku u professjonali tal-parteċipanti, jenħtieġ li l-kompetenzi li huma l-eżiti tat-tagħlim tal-attivitajiet ta' solidarjetà jiġu identifikati u ddokumentati kif xieraq, f'konformità maċ-ċirkustanzi u mal-ispeċifiċitajiet nazzjonali, kif irrakkomandat fir-Rakkomandazzjoni tal-Kunsill tal-20 ta' Diċembru 2012 dwar il-validazzjoni tat-tagħlim mhux formali u informali (6). Għal dak il-għan, jenħtieġ li jitħeġġeġ, kif xieraq, l-użu ta' strumenti effettivi fil-livell tal-Unjoni u dak nazzjonali għar-rikonoxximent ta' tagħlim mhux formali u informali, bħalma huma l-Youthpass u l-Europass.

(19)

Jenħtieġ li kwalunkwe entità pubblika jew privata, inklużi organizzazzjonijiet internazzjonali, organizzazzjonijiet tas-soċjetà ċivili, organizzazzjonijiet taż-żgħażagħ u l-intrapriżi soċjali jkunu jistgħu japplikaw għal tikketta tal-kwalità. Jenħtieġ li jiġu introdotti tikketti tal-kwalità separati għall-volontarjat u għat-traineeships u l-impjiegi biex tiġi żgurata l-konformità effettiva u kontinwa ta' organizzazzjonijiet parteċipanti mal-prinċipji u mar-rekwiżiti tal-Korp Ewropew ta' Solidarjetà fir-rigward tad-drittijiet u tar-responsabbiltajiet tagħhom matul l-istadji kollha tal-esperjenza ta' solidarjetà. Jenħtieġ li l-kisba ta' tikketta tal-kwalità tkun prekundizzjoni għall-parteċipazzjoni iżda jenħtieġ li din ma twassalx b'mod awtomatiku għal finanzjament mill-Korp Ewropew ta' Solidarjetà.

(20)

L-organizzazzjonijiet parteċipanti jistgħu jwettqu ħafna funzjonijiet fil-Korp Ewropew ta' Solidarjetà. Fil-funzjoni ospitanti, huma se jwettqu attivitajiet relatati mar-riċeviment tal-parteċipanti, inklużi l-organizzazzjoni ta' attivitajiet u l-għoti ta' gwida u appoġġ għall-parteċipanti matul l-attività ta' solidarjetà, kif xieraq. F'funzjoni ta' appoġġ, huma se jwettqu attivitajiet biex il-parteċipanti jintbagħtu u jiġu ppreparati qabel it-tluq, u matul u wara l-attività ta' solidarjetà, inkluż li jitħarrġu l-parteċipanti u jiġu ggwidati għall- organizzazzjonijiet lokali wara l-attività ta' solidarjetà.

(21)

Jenħtieġ li ċ-Ċentri tar-Riżorsi tal-Korp Ewropew ta' Solidarjetà jassistu lill-korpi ta' implimentazzjoni, lill-organizzazzjonijiet parteċipanti u lill-parteċipanti biex tiżdied il-kwalità tal-attivitajiet ta' solidarjetà u tal-implimentazzjoni tagħhom kif ukoll tissaħħaħ l-identifikazzjoni u l-validazzjoni tal-kompetenzi miksuba permezz ta' attivitajiet ta' solidarjetà, inkluż permezz tal-ħruġ ta' Youth passes.

(22)

Jenħtieġ li l-Portal tal-Korp Ewropew ta' Solidarjetà jiġi żviluppat b'mod kontinwu biex jiġi żgurat aċċess faċli għall-Korp Ewropew ta' Solidarjetà u jiġi pprovdut punt uniku ta' kuntatt kemm għall-individwi kif ukoll għall-organizzazzjonijiet interessati fir-rigward, fost l-oħrajn, tar-reġistrazzjoni, tal-identifikazzjoni u tat-tlaqqigħ tal-profili u tal-opportunitajiet, tal-bini ta' netwerks u tal-iskambji virtwali, tat-taħriġ online, tal-appoġġ lingwistiku kif ukoll tal-appoġġ kollu l-ieħor qabel l-attività ta' solidarjetà, jew wara l-attività ta' solidarjetà, jew it-tnejn u ta' funzjonijiet siewja oħra, li jistgħu jinħolqu fil-futur.

(23)

L-istrutturi ta' implimentazzjoni se jieħdu l-miżuri neċessarji bil-għan li jiżguraw li kandidati rreġistrati jiġu offruti opportunitajiet ta' volontarjat, traineeships u impjiegi f'ammont ta' żmien raġonevoli u relattivament prevedibbli. Barra minn hekk, se jiġu implimentati attivitajiet regolari ta' informazzjoni u komunikazzjoni u netwerking sabiex jistimulaw l-involviment ta' kandidati rreġistrati.

(24)

Dan ir-Regolament jistabbilixxi pakkett finanzjarju għall-perjodu 2018-2020 li għandu jikkostitwixxi l-ammont ta' baġit globali, fit-tifsira tal-Punt 17 tal-Ftehim Interistituzzjonali tat-2 ta' Diċembru 2013 bejn il-Parlament Ewropew, il-Kunsill u l-Kummissjoni dwar dixxiplina baġitarja, kooperazzjoni f'materji baġitarji u ġestjoni finanzjarja tajba (7), għall-Parlament Ewropew u għall-Kunsill matul il-proċedura baġitarja annwali.

(25)

Biex tiġi żgurata l-kontinwità fl-attivitajiet appoġġjati mill-programmi li jikkontribwixxu għall-Korp Ewropew ta' Solidarjetà, l-appoġġ finanzjarju għall-attivitajiet ta' solidarjetà jenħtieġ jkun b'mod indikattiv 90 % għal proġetti ta' volontarjat u ta' solidarjetà, fuq naħa waħda, u 10 % jew għal traineeships, jew għal impjiegi, jew it-tnejn, fuq in-naħa l-oħra, b'massimu ta' 20 % għall-attivitajiet fil-pajjiż.

(26)

Biex jiġi mmassimizzat l-impatt tal-Korp Ewropew ta' Solidarjetà, jenħtieġ li jsiru dispożizzjonijiet biex il-pajjiżi parteċipanti jitħallew jagħmlu finanzjament nazzjonali, reġjonali jew lokali addizzjonali disponibbli f'konformità mar-regoli tal-Korp Ewropew ta' Solidarjetà.

(27)

Biex jiġu ssimplifikati r-rekwiżiti għall-benefiċjarji, jenħtieġ li jintużaw kemm jista' jkun somom f'daqqa, kostijiet għal kull unità jew finanzjament b'rata fissa.

(28)

L-Istati Membri jenħtieġ li jkunu jistgħu jipparteċipaw f'attivitajiet ta' volontarjat, ta' traineeships, ta' impjiegi, ta' proġetti ta' solidarjetà u f'attivitajiet ta' netwerking. Barra minn hekk, kif inhu l-każ għas-Servizz Volontarju Ewropew, l-attivitajiet ta' volontarjat, ta' proġetti ta' solidarjetà u ta' netwerking jenħtieġ li jkunu miftuħin għall-parteċipazzjoni ta' pajjiżi oħra, billi tingħata attenzjoni partikolari lil pajjiżi fil-viċinat tal-Unjoni. Jenħtieġ li dik il-parteċipazzjoni tkun ibbażata, fejn rilevanti, fuq approprjazzjonijiet addizzjonali li jridu jsiru disponibbli f'konformità mal-proċeduri li jridu jiġu miftiehma mal-pajjiżi kkonċernati.

(29)

Jenħtieġ li l-parteċipazzjoni fil-Korp Ewropew ta' Solidarjetà tkun miftuħa għaż-żgħażagħ ta' età bejn 18 u 30 sena. Il-parteċipazzjoni fl-attivitajiet ta' solidarjetà jenħtieġ li tkun tirrikjedi reġistrazzjoni minn qabel fil-Portal tal-Korp Ewropew ta' Solidarjetà li huwa disponibbli għal individwi ta' età bejn 17 u 30 sena.

(30)

Jenħtieġ li tingħata attenzjoni speċjali biex ikun żgurat li l-attivitajiet appoġġjati mill-Korp Ewropew ta' Solidarjetà jkunu aċċessibbli għaż-żgħażagħ kollha, b'mod partikolari ż-żgħażagħ b'inqas opportunitajiet, kif spjegat f'aktar dettall fl-Istrateġija ta' Inklużjoni u Diversità żviluppata u applikata fi ħdan il-qafas tal-programm Erasmus+ fil-qasam taż-żgħażagħ. Għaldaqstant jenħtieġ li jittieħdu miżuri speċjali, bħal formats xierqa ta' attivitajiet ta' solidarjetà u gwida personalizzata, biex jiġu promossi l-inklużjoni soċjali, il-parteċipazzjoni taż-żgħażagħ żvantaġġati, kif ukoll jiġu meqjusa r-restrizzjonijiet imposti mid-distanza remota tar-reġjuni ultraperiferiċi tal-Unjoni u tal-Pajjiżi u tat-Territorji extra-Ewropej skont id-Deċiżjoni tal-Kunsill 2013/755/UE (8). B'mod simili, jenħtieġ li l-pajjiżi parteċipanti jiimpenjaw ruħhom li jadottaw il-miżuri xierqa kollha biex ineħħu l-ostakli legali u amministrattivi għall-funzjonament xieraq tal-Korp Ewropew ta' Solidarjetà. Dak jinkludi s-soluzzjoni, fejn possibbli, u mingħajr ħsara għall-acquis ta' Schengen u għal-liġi tal-Unjoni dwar id-dħul u r-residenza ta' ċittadini ta' pajjiżi terzi, ta' kull kwistjonijiet amministrattivi li joħolqu diffikultajiet fil-kisba ta' viżi u ta' permessi ta' residenza.

(31)

Entità li tkun tixtieq tapplika għal finanzjament biex toffri attivitajiet ta' solidarjetà skont il-Korp Ewropew ta' Solidarjetà jenħtieġ li l-ewwel tkun irċeviet tikketta tal-kwalità bħala prekundizzjoni b'mod aċċessibbli u trasparenti. Dan ir-rekwiżit jenħtieġ li ma jkunx japplika għal persuni fiżiċi li jfittxu appoġġ finanzjarju f'isem grupp informali ta' parteċipanti għall-proġetti ta' solidarjetà tagħhom. Il-korpi ta' implimentazzjoni kompetenti jenħtieġ li jwettqu kontrolli tal-kwalità biex jaċċertaw il-konformità, minn dawk il-persuni fiżiċi, mar-rekwiżiti tal-Korp Ewropew ta' Solidarjetà.

(32)

Il-ħtiġijiet u l-aspettattivi tal-komunitajiet lokali jenħtieġ li jkunu kriterju importanti għall-evalwazzjoni tal-kwalità tal-proġetti. Għaldaqstant, jenħtieġ li jiġu stabbiliti indikaturi xierqa.

(33)

Il-ġestjoni effikaċi tal-prestazzjoni, inklużi l-monitoraġġ u l-evalwazzjoni, jeħtieġu l-iżvilupp ta' sett speċifiku, miżurabbli u realistiku ta' indikaturi kwalitattivi u kwantitattivi li jistgħu jitkejlu maż-żmien u li jirriflettu l-loġika tal-intervenzjoni.

(34)

Jenħtieġ li jiġu żgurati sensibilizzazzjoni, pubbliċità u disseminazzjoni xierqa tal-opportunitajiet u tar-riżultati tal-attivitajiet appoġġjati mill-Korp Ewropew ta' Solidarjetà fil-livelli Ewropew, nazzjonali, reġjonali u lokali. Jenħtieġ li tingħata attenzjoni speċjali lill-intrapriżi soċjali, billi jitħeġġu jappoġġjaw l-attivitajiet tal-Korp Ewropew ta' Solidarjetà. Jenħtieġ li l-attivitajiet ta' sensibilizzazzjoni, ta' pubbliċità u ta' disseminazzjoni jibbażaw, mingħajr ma jżidu l-piż amministrattiv, fuq il-korpi ta' implimentazzjoni kollha tal-Korp Ewropew ta' Solidarjetà, inkluż, fejn jkun rilevanti, bl-appoġġ tal-partijiet ikkonċernati ewlenin l-oħra.

(35)

Sabiex jintlaħqu aħjar l-objettivi tal-Korp Ewropew ta' Solidarjetà, il-Kummissjoni, l-Istati Membri u l-aġenziji nazzjonali jenħtieġ li jaħdmu flimkien mill-qrib fi sħubija mal-NGOs, mal-organizzazzjonijiet taż-żgħażagħ u mal-partijiet ikkonċernati lokali li għandhom għarfien espert fl-azzjonijiet ta' solidarjetà.

(36)

Biex tkun żgurata l-implimentazzjoni effiċjenti u effettiva ta' dan ir-Regolament, jenħtieġ li l-Korp Ewropew ta' Solidarjetà jagħmel użu massimali mill-arranġamenti ta' ġestjoni eżistenti li diġà jinsabu fis-seħħ fil-programm Erasmus+. Għaldaqstant, jenħtieġ li l-implimentazzjoni tal-Korp Ewropew ta' Solidarjetà tiġi fdata f'idejn l-istrutturi eżistenti, bħall-Kummissjoni, l-Aġenzija Eżekuttiva għall-Edukazzjoni, l-Awdjoviżiv u l-Kultura, u l-aġenziji nazzjonali maħtura għall-ġestjoni tal-azzjonijiet imsemmija fil-Kapitolu III tar-Regolament (UE) Nru 1288/2013 tal-Parlament Ewropew u tal-Kunsill (9). Proċeduri ċari u dettaljati għall-parteċipanti u għall-organizzazzjonijiet parteċipanti se jiġu stabbiliti għall-fażijiet kollha tal-attività ta' solidarjetà fid-dokumenti xierqa tal-programm, bħalma huma l-Programm ta' Ħidma Annwali u l-Gwida tal-Programm. Il-Kummissjoni jenħtieġ li tikkonsulta regolarment mal-partijiet ikkonċernati ewlenin, inklużi organizzazzjonijiet parteċipanti, dwar l-implimentazzjoni tal-Korp Ewropew ta' Solidarjetà.

(37)

Biex jiġu żgurati implimentazzjoni finanzjarjament soda u monitoraġġ mill-qrib tal-Korp Ewropew ta' Solidarjetà fil-livell nazzjonali, importanti li jintużaw l-awtoritajiet nazzjonali maħtura għall-ġestjoni tal-azzjonijiet imsemmija fil-Kapitolu III tar-Regolament (UE) Nru 1288/2013.

(38)

L-awtoritajiet nazzjonali maħtura għall-ġestjoni tal-azzjonijiet imsemmija fil-Kapitolu III tar-Regolament (UE) Nru 1288/2013 jenħtieġ li jaġixxu wkoll bħala awtoritajiet nazzjonali għall-finijiet ta' dan ir-Regolament. Madankollu, jenħtieġ li dan ma jipprevenix il-ħatra ta' aktar minn awtorità nazzjonali waħda f'konformità mal-liġi u l-prattika nazzjonali, kif previst fl-Artikolu 27(1) ta' dak ir-Regolament. Fejn pajjiż parteċipanti jixtieq li jissostitwixxi l-awtorità nazzjonali tiegħu matul il-ħajja tal-Korp Ewropew ta' Solidarjetà, jenħtieġ li tapplika l-proċedura prevista fl-Artikolu 27(2) ta' dak ir-Regolament.

(39)

Biex jiġu żgurati l-ġestjoni finanzjarja tajba u ċ-ċertezza tad-dritt f'kull pajjiż parteċipanti, jenħtieġ li kull awtorità nazzjonali taħtar korp indipendenti tal-awditjar. Fejn ikun fattibbli, u biex tiġi mmassimizzata l-effiċjenza, il-korp indipendenti tal-awditjar jista' jkun l-istess bħal dak maħtur għall-azzjonijiet imsemmija fil-Kapitolu III tar-Regolament (UE) Nru 1288/2013.

(40)

L-interessi finanzjarji tal-Unjoni jenħtieġ li jitħarsu permezz ta' miżuri proporzjonati fiċ-ċiklu kollu tal-infiq, inklużi l-prevenzjoni, l-identifikazzjoni u l-investigazzjoni tal-irregolaritajiet, l-irkupru ta' fondi mitlufa, imħallsa bi żball jew użati b'mod ħażin u, fejn ikun xieraq, il-penali,

(41)

Sabiex jiġu żgurati kundizzjonijiet uniformi għall-implimentazzjoni ta' dan ir-Regolament, jenħtieġ li l-Kummissjoni tingħata setgħat ta' implimentazzjoni fuq il-. Dawk is-setgħat jenħtieġ li jiġu eżerċitati f'konformità mar-Regolament (UE) Nru 182/2011 tal-Parlament Ewropew u tal-Kunsill (10).

(42)

Skont ir-Regolament (UE, Euratom) 2018/1046 tal-Parlament Ewropew u tal-Kunsill (11), jenħtieġ li l-Kummissjoni tadotta programmi ta' ħidma u tinforma lill-Parlament Ewropew u lill-Kunsill dwar dan. Jenħtieġ li programmi ta' ħidma jistabbilixxu l-miżuri meħtieġa għall-implimentazzjoni f'konformità mal-objettivi ġenerali u speċifiċi tal-Korp Ewropew ta' Solidarjetà, mal-kriterji tal-għażla u tal-għoti għall-għotjiet, kif ukoll mal-elementi l-oħra kollha meħtieġa. Jenħtieġ li l-programmi ta' ħidma u kwalunkwe emenda għalihom jiġu adottati b'atti ta' implimentazzjoni f'konformità mal-proċedura ta' eżami.

(43)

Ladarba l-għan ta' dan ir-Regolament, jiġifieri li jistabbilixxi l-Korp Ewropew ta' Solidarjetà, ma jistax jinkiseb b'mod suffiċjenti mill-Istati Membri iżda jista' pjuttost, minħabba l-iskala u l-effetti tiegħu, jinkiseb aħjar fil-livell tal-Unjoni, l-Unjoni tista' tadotta miżuri, f'konformità mal-prinċipju tas-sussidjarjetà, kif stipulat fl-Artikolu 5 tat-TUE. Skont il-prinċipju tal-proporzjonalità, kif stipulat f'dak l-Artikolu, dan ir-Regolament ma jmurx lil hinn minn dak li huwa meħtieġ sabiex jinkiseb dak l-għan.

(44)

Għal raġunijiet ta' effiċjenza u ta' effikaċja, jenħtieġ li l-kumitat imwaqqaf skont ir-Regolament (UE) Nru 1288/2013 jassisti wkoll lill-Kummissjoni fl-implimentazzjoni ta' dan ir-Regolament. Fir-rigward tal-Korp Ewropew ta' Solidarjetà, jenħtieġ li dak il-kumitat jiltaqa' f'konfigurazzjoni speċifika u jenħtieġ li l-mandat tiegħu jiġi allinjat biex jissodisfa dan ir-rwol il-ġdid. Jenħtieġ li l-pajjiżi parteċipanti jaħtru r-rappreżentanti rilevanti għal dawk il-laqgħat, filwaqt li jitqiesu s-suġġett, l-għan, l-objettivi u l-azzjonijiet tal-Korp Ewropew ta' Solidarjetà.

(45)

Jenħtieġ li r-Regolament (UE) Nru 1288/2013 jiġi emendat biex jittieħed kont tat-tibdiliet fis-Servizz Volontarju Ewropew li jirriżultaw mill-volontarjat taħt dan ir-Regolament.

(46)

Il-pakkett finanzjarju tal-Korp Ewropew ta' Solidarjetà taħt l-Intestatura 1a tal-Qafas Finanzjarju Pluriennali jibni wkoll fuq il-fondi riallokati mill-programm Erasmus+. Jenħtieġ li dawk il-fondi jiġu esklussivament mill-approprjazzjonijiet immirati għall-finanzjament tal-attivitajiet tas-Servizz Volontarju Ewropew li jaqgħu taħt il-kamp ta' applikazzjoni tal-volontarjat taħt dan ir-Regolament.

(47)

Jenħtieġ li l-pakkett finanzjarju tal-Korp Ewropew ta' Solidarjetà taħt l-Intestatura 1a tal-Qafas Finanzjarju Pluriennali jiġi ssupplimentat ukoll minn kontribuzzjonijiet finanzjarji minn programmi u minn intestaturi oħra, li jeħtieġu l-emenda tar-Regolamenti (UE) Nru 1293/2013 tal-Parlament Ewropew u tal-Kunsill (12) kif ukoll tad-Deċiżjoni Nru 1313/2013 tal-Parlament Ewropew u tal-Kunsill (13).

(48)

Dan ir-Regolament jenħtieġ li japplika mid-data tad-dħul fis-seħħ tiegħu. Sabiex tiġi żgurata l-applikazzjoni immedjata tal-miżuri previsti f'dan ir-Regolament, jenħtieġ li dan ir-Regolament jidħol fis-seħħ fil-jum wara dak tal-pubblikazzjoni tiegħu f'Il-Ġurnal Uffiċjali tal-Unjoni Ewropea,