14.2.2018   

MT

Il-Ġurnal Uffiċjali tal-Unjoni Ewropea

L 41/1

(1)

Ir-Regolament (UE) Nru 1380/2013 għandu l-għan li jelimina b'mod progressiv l-iskartar tal-ħut fis-sajd kollu tal-Unjoni bl-introduzzjoni tal-obbligu ta' ħatt l-art għall-qabdiet ta' speċijiet li huma soġġetti għal-limiti ta' qbid.

(2)

Skont l-Artikolu 15(1)(a) tar-Regolament (UE) Nru 1380/2013, l-obbligu ta' ħatt l-art japplika fis-sajd għas-salamun mill-1 ta' Jannar 2015.

(3)

L-Artikolu 15(6) tar-Regolament (UE) Nru 1380/2013 jagħti s-setgħa lill-Kummissjoni, fin-nuqqas ta' pjanijiet pluriennali stabbiliti skont l-Artikolu 9 ta' dak ir-Regolament, biex tadotta pjan ta' skartar tal-ħut li jispeċifika d-dettalji tal-implimentazzjoni tal-obbligu ta' ħatt l-art għal perjodu inizjali ta' tliet snin, li jista' jiġġedded għal perjodu ieħor ta' tliet snin. Dawk il-pjanijiet ta' skartar tal-ħut iridu jiġu adottati fuq il-bażi ta' rakkomandazzjonijiet konġunti żviluppati mill-Istati Membri b'konsultazzjoni mal-Kunsilli Konsultattivi rilevanti.

(4)

Ir-Regolament Delegat tal-Kummissjoni (UE) Nru 1396/2014 (2) stabbilixxa pjan ta' skartar tal-ħut rigward is-sajd għas-salamun, għall-aringa, għal-laċċa kaħla u għall-bakkaljaw fil-Baħar Baltiku. Dan il-pjan ta' skartar jinkludi, fost l-oħrajn, eżenzjoni mill-obbligu ta' ħatt l-art għall-merluzz u għas-salamun minħabba rati ta' sopravivenza għoljin li ntwerew għal dawk l-ispeċijiet kif stipulat fl-Artikolu 15(4)(b) tar-Regolament (UE) Nru 1380/2013. Ir-Regolament Delegat (UE) Nru 1396/2014 jiskadi fil-31 ta' Diċembru 2017.

(5)

Ir-Regolament (UE) 2016/1139 tal-Parlament Ewropew u tal-Kunsill (3) jistabbilixxi pjan pluriennali għas-sajd tal-merluzz, tal-aringi u tal-laċċ ikħal fil-Baħar Baltiku. Dak il-pjan pluriennali ma jkoprix l-istokkijiet tas-salamun u s-sajd għal dak l-istokk fil-Baħar Baltiku.

(6)

Fin-nuqqas ta' pjan pluriennali applikabbli għall-istokkijiet tas-salamun u għas-sajd ta' dak l-istokk fil-Baħar Baltiku, id-dettalji għall-implimentazzjoni tal-obbligu ta' ħatt l-art wara l-iskadenza tar-Regolament Delegat (UE) Nru 1396/2014, iridu jiġu adottati fil-qafas ta' pjan ġdid ta' skartar tal-ħut ibbażat fuq rakkomandazzjoni konġunta ppreżentata mill-Istati Membri.

(7)

Id-Danimarka, il-Ġermanja, l-Estonja, il-Latvja, il-Litwanja, il-Polonja, il-Finlandja u l-Iżvezja għandhom interess dirett ta' ġestjoni fil-Baħar Baltiku. Fil-31 ta' Mejju 2017, dawn l-Istati Membri ressqu rakkomandazzjoni konġunta (4) lill-Kummissjoni, wara li kkonsultaw mal-Kunsill Konsultattiv tal-Baħar Baltiku. Inkisbet kontribuzzjoni xjentifika mill-korpi xjentifiċi rilevanti.

(8)

Ir-rakkomandazzjoni konġunta tissuġġerixxi li l-eżenzjoni mill-obbligu ta' ħatt l-art għas-salamun li jinqabad fix-xbieki tad-tidwir, fil-kavetti/fin-nases tal-ħut, fix-xbieki fyke u fix-xbieki nases, prevista bir-Regolament Delegat (UE) Nru 1396/2014, jenħtieġ li tkompli tapplika wara l-31 ta' Diċembru 2017.

(9)

Ir-rakkomandazzjoni konġunta hija bbażata fuq evidenza xjentifika ta' livell għoli ta' sopravvivenza, li ngħatat mill-Forum dwar is-Sajd fil-Baħar Baltiku (BALTFISH) u ġiet rieżaminata mill-Kumitat Xjentifiku, Tekniku u Ekonomiku għas-Sajd (STECF). L-STECF ikkonkluda li billi dawn it-tipi ta' rkaptu jaħdmu billi jaqbdu l-ħut fi struttura statika ta' xbieki, u mhux, pereżempju, billi l-ħut jitgħaqqad f'xibka jew jibla' ganċ, huwa raġonevoli li wieħed jassumi li b'dawn it-tipi ta' rkaptu il-mortalità tkun baxxa.

(10)

Il-miżuri li ġew issuġġeriti fir-rakkomandazzjoni konġunta jikkonformaw mal-Artikolu 15(6) tar-Regolament (UE) Nru 1380/2013 u għaldaqstant, b'konformità mal-Artikolu 18(3) tar-Regolament (UE) Nru 1380/2013, jenħtieġ li jiġu inklużi f'dan ir-Regolament.

(11)

Billi r-Regolament Delegat (UE) Nru 1396/2014 jiskadi fil-31 ta' Diċembru 2017, dan ir-Regolament jenħtieġ li japplika mill-1 ta' Jannar 2018,

“Il-Baħar Baltiku” tfisser id-diviżjonijiet IIIb, IIIc u IIId tal-ICES, kif speċifikat fl-Anness III tar-Regolament (KE) Nru 218/2009 tal-Parlament Ewropew u tal-Kunsill (5).