14.9.2016   

MT

Il-Ġurnal Uffiċjali tal-Unjoni Ewropea

L 245/5

(1)

Ir-Regolament (UE) Nru 575/2013 jistipula li ekwitajiet jew bonds konvertibbli li jinsabu f'indiċi ewlieni jistgħu jintużaw mill-istituzzjonijiet bħala kollateral eliġibbli. Wieħed mill-kriterji ta' eliġibbiltà għall-kollateral huwa li jinħtieġ li jkun likwidu biżżejjed. L-indiċijiet tal-ekwità, sabiex jiġu kkunsidrati bħala indiċijiet ewlenin għall-finijiet ta' dan ir-Regolament, jinħtieġ li għaldaqstant ikunu prinċipalment ekwitajiet li b'mod raġonevoli jistgħu jinkisbu, meta istituzzjoni għandha bżonn tillikwidahom. Dan jinħtieġ li jkun il-każ meta mill-inqas 90 % tal-komponenti ta' indiċi jkollhom volum varjabbli ta' mill-inqas EUR 500 000 000 jew, fin-nuqqas ta' informazzjoni dwar il-volum varjabbli, kapitalizzazzjoni tas-suq ta' mill-inqas EUR 1 000 000 000.

(2)

L-istituzzjonijiet jinħtieġ li jkollhom ukoll il-possibilità, li jirrikonoxxu bħala eliġibbli l-istrumenti tal-kollateral li jkunu likwidi skont is-swieq li jkunu qegħdin jaħdmu fihom u li jilħqu livell minimu ta' likwidità, irrispettivament minn jekk suq huwiex stabbilit fl-Unjoni jew f'pajjiż terz. Għaldaqstant, l-indiċi ta' ekwità jinħtieġ li jitqies bħala indiċi ewlieni meta jinkludi mhux aktar minn nofs l-għadd totali ta' kumpaniji li l-ishma tagħhom huma nnegozjati fis-suq li fih jkun ibbażat l-indiċi, fejn il-fatturat medju ta' kuljum ikun ta' mhux inqas minn EUR 100 000, u meta dan ikun jissodisfa tnejn mit-tliet kriterji li ġejjin: il-kapitalizzazzjoni totali tas-suq tal-indiċi tkun mill-inqas 40 % tal-kapitalizzazzjoni tas-suq tal-kumpaniji kollha li l-ishma tagħhom jkunu nnegozjati f'dan is-suq; il-fatturat totali tal-kummerċ fil-komponenti tal-indiċi jkun mill-inqas 40 % tal-fatturat totali tal-ishma kollha nnegozjati f'dan is-suq; u l-indiċi jservi bħala sottostanti għall-prodotti ta' derivattivi.

(3)

L-indiċijiet tal-bonds konvertibbli jinħtieġ li jitqiesu biss bħala indiċijiet ewlenin meta bonds kostitwenti jistgħu jiġu kkonvertiti f'ekwitajiet fejn mill-inqas 90 % ta' dawn l-ekwitajiet ikollhom volum varjabbli ta' mill-inqas EUR 500 000 000 jew, fin-nuqqas ta' informazzjoni dwar il-volum varjabbli, kapitalizzazzjoni tas-suq ta' mill-inqas EUR 1 000 000 000.

(4)

Meta żewġ indiċijiet jissodisfaw il-kriterji sabiex jiġu kkunsidrati bħala indiċi ewlieni, u wieħed ikun sottogrupp tal-ieħor, għal raġunijiet ta' sempliċità, l-aktar wieħed ġenerali biss jinħtieġ li jiġi inkluż fil-lista ta' indiċijiet ewlenin.

(5)

Ir-Regolament (UE) Nru 575/2013 jistipula li t-titoli ta' dejn maħruġa minn ċerti istituzzjonijiet, li ma jkollhomx valutazzjoni tal-kreditu minn istituzzjoni esterna tal-valutazzjoni tal-kreditu (external credit assessment institution, ECAI), jistgħu jintużaw bħala kollateral eliġibbli meta dawn jissodisfaw għadd ta' kundizzjonijiet, b'waħda minnhom tkun li jkunu elenkati f'borża rikonoxxuta.

(6)

Sabiex borża titqies bħala borża rikonoxxuta għall-finijiet tar-Regolament (UE) Nru 575/2013, borża trid tissodisfa l-kundizzjonijiet stabbiliti fl-Artikolu 4(1)(72) ta' dan ir-Regolament. Rigward waħda minn dawn il-kundizzjonijiet, jiġifieri din li l-borża jinħtieġ li jkollha mekkaniżmu ta' kklerjar, is-swieq irregolati kollha li jinnegozjaw strumenti finanzjarji li mhumiex elenkati fl-Anness II tar-Regolament (UE) Nru 575/2013 jinħtieġ li jissodisfaw din it-tieni kundizzjoni billi jkunu lliċenzjati bħala suq irregolat skont id-Direttiva 2004/39/KE tal-Parlament Ewropew u tal-Kunsill (2) u permezz ta' regoli u proċeduri għall-ikklerjar u għas-saldu ta' tranżazzjonijiet fis-seħħ, skont id-Direttiva 2004/39/KE.

(7)

Meta l-mekkaniżmu tal-ikklerjar ta' borża jkun ipprovdut minn kontroparti ċentrali (central counterparty, CCP), din is-CCP jinħtieġ li tikkonforma mar-rekwiżiti stabbiliti fir-Regolament (UE) Nru 648/2012 tal-Parlament Ewropew u tal-Kunsill (3). Għall-boroż ta' derivattivi rari li ma jkunux servuti mis-CCPs, ir-regoli għall-proviżjonament tal-marġni stabbiliti fir-Regolament (UE) Nru 648/2012 jinħtieġ li jintużaw bħala punt ta' riferiment sabiex jiġi vvalutat jekk r-rekwiżiti għall-proviżjonament tal-marġni stabbiliti minn dawn il-boroż huma adegwati.

(8)

Dan ir-Regolament huwa bbażat fuq l-abbozz tal-istandards tekniċi ta' implimentazzjoni sottomess mill-Awtorità Ewropea tat-Titoli u s-Swieq (European Securities and Markets Authority, ESMA) lill-Kummissjoni.

(9)

Fis-17 ta' Diċembru 2015, il-Kummissjoni nnotifikat lill-ESMA bl-intenzjoni tagħha li tapprova l-abbozz tal-istandard tekniku ta' implimentazzjoni b'emendi sabiex jittieħed inkonsiderazzjoni l-fatt li xi indiċijiet ta' ekwità, li jissodisfaw il-kriterji ta' eliġibbiltà biex jitqiesu bħala indiċijiet ewlenin, ma ġewx inklużi fil-lista pprovduta f'dan l-abbozz tal-istandard. Fl-opinjoni formali tagħha tat-28 ta' Jannar 2016, l-ESMA kkonfermat il-pożizzjoni inizjali tagħha u ma reġgħetx ippreżentat l-istandard tekniku ta' implimentazzjoni emendat b'mod konformi mal-emendi proposti tal-Kummissjoni. L-abbozz tal-istandard tekniku ta' implimentazzjoni jinħtieġ li għalhekk jiġi approvat bl-emendi meħtieġa sabiex tiġi evitata l-esklużjoni ta' indiċijiet li jissodisfaw il-kriterji ta' eliġibbiltà biex jiġu kkunsidrati bħala indiċijiet ewlenin għall-finijiet tar-Regolament (UE) Nru 575/2013.

(10)

L-ESMA għamlet konsultazzjonijiet pubbliċi miftuħa dwar l-abbozz tal-istandards tekniċi ta' implimentazzjoni li fuqhom dan ir-Regolament huwa bbażat u talbet l-opinjoni tal-Grupp tal-Partijiet Interessati tat-Titoli u s-Swieq stabbilit skont l-Artikolu 37 tar-Regolament (UE) Nru 1095/2010 tal-Parlament Ewropew u tal-Kunsill (4). L-ESMA ma analizzax fid-dettall il-kostijiet u l-benefiċċji potenzjali relatati mal-abbozz tal-istandards tekniċi ta' implimentazzjoni għax dawn kienu jkunu sproporzjonati fir-rigward tal-kamp ta' applikazzjoni u l-impatt tagħhom,