4.3.2016   

MT

Il-Ġurnal Uffiċjali tal-Unjoni Ewropea

L 59/22

(1)

Fis-27 ta' Awwissu 2008, il-Kummissjoni rċeviet ilment mingħand Bundesverband der Deutschen Fluggesellschaften e.V. (L-Assoċjazzjoni Federali tal-Linji tal-Ajru Ġermaniża) (minn hawn 'il quddiem imsejħa “BDF”) rigward l-allegata għajnuna illegali mill-Istat lil Flugplatz Altenburg-Nobitz-GmbH u Ryanair Ltd. (minn hawn 'il quddiem imsejħa “Ryanair”). L-ilment ġie rreġistrat taħt in-numru tal-għajnuna mill-Istat CP 227/2008.

(2)

Fid-9 ta' Awwissu 2010, il-Kummissjoni għaddiet l-ilment lill-Ġermanja u talbet l-informazzjoni. Il-Ġermanja pprovdiet l-informazzjoni mitluba fit-30 ta' Settembru 2010.

(3)

Fit-8 ta' April 2011, il-Kummisjoni talbet informazzjoni mingħand Air Berlin u Ryanair. Air Berlin ipprovdiet l-informazzjoni mitluba fl-10 ta' Mejju 2011. Ryanair ipprovdiet l-informazzjoni mitluba fl-20 ta' Ġunju 2011. Verżjoni tradotta ta' dawn il-kummenti u l-annessi ntbagħtet lill-awtoritajiet tal-Ġermanja permezz ta' ittra tal-11 ta' Awwissu 2011. Fit-28 ta' Settembru 2011, l-awtoritajiet Ġermaniżi ddikjaraw li ma kienx biħsiebhom jikkummentaw f'dak l-istadju.

(4)

Permezz tal-ittra tagħha tas-26 ta' Jannar 2012, il-Kummissjoni rrakkomandat sabiex il-Ġermanja tibda l-proċedura stipulata fl-Artikolu 108(2) tat-Trattat dwar il-Funzjonament tal-Unjoni Ewropea (TFUE) (2) fir-rigward tal-investiment u l-għajnuna operatorja lil Flugplatz Altenburg-Nobitz GmbH, l-imposti mnaqqsin tal-ajruport u l-kuntratti tas-servizzi ta' kummerċjalizzazzjoni ma' Ryanair (“id-deċiżjoni li tiftaħ il-proċedura”).

(5)

Id-deċiżjoni tal-Kummissjoni li tiftaħ il-proċedura ġiet ippubblikata f'Il-Ġurnal Uffiċjali tal-Unjoni Ewropea  (3). Il-Kummissjoni talbet lill-partijiet sabiex jissottomettu kummenti dwar l-allegati miżuri ta' għajnuna.

(6)

Fil-21 ta' Frar 2012, il-Kummissjoni talbet iktar informazzjoni mingħand il-Ġermanja. Il-Ġermanja ssottomettiet il-kummenti tagħha dwar id-deċiżjoni li tiftaħ il-proċedura u t-tweġibiet tagħha għall-informazzjoni li talbet il-Kummissjoni fl-24 ta' Frar 2012, it-30 ta' Marzu 2012 u t-2 ta' April 2012.

(7)

Fit-13 ta' April 2012, il-Kummissjoni rċeviet kummenti mingħand iż-żewġ partijiet interessati, jiġifieri Ryanair u Airport Marketing Services (4) (minn hawn 'il quddiem “AMS”).

(8)

Peress li kien hemm għadd ta' tweġibiet għat-talba tagħha għal informazzjoni tal-21 ta' Frar 2012 li kienu neqsin, il-Kummissjoni talbet iktar informazzjoni mingħand il-Ġermanja fl-20 ta' April 2012. Il-Ġermanja wieġbet fil-11 ta' Mejju 2012.

(9)

Fil-25 ta' Ġunju 2012, il-Kummissjoni rċeviet kummenti oħrajn mingħand il-partijiet interessati (Ryanair, is-sussidjarja ta' Ryanair AMS u kumpanija ta' konsulenza li aġixxiet għal Ryanair). Il-Kummissjoni għaddiet dawn il-kummenti lill-Ġermanja permezz tal-ittra datata t-22 ta' Awwissu 2012. Il-Ġermanja talbet li jiġu tradotti d-dokumenti u mbagħad bagħtet il-kummenti tagħha fl-4 ta' Diċembru 2012.

(10)

Il-Kummissjoni talbet iktar informazzjoni mingħand il-Ġermanja permezz tal-ittra tad-29 ta' Novembru 2012. Il-Ġermanja wieġbet fis-17 ta' Jannar 2013.

(11)

Fl-10 ta' April 2013, Ryanair issottomettiet kummenti oħrajn (5), li għaddew lill-Ġermanja fit-3 ta' Mejju 2013.

(12)

Il-Kummissjoni talbet iktar informazzjoni mingħand il-Ġermanja permezz tal-ittra tal-14 ta' Novembru 2013. Il-Ġermanja wieġbet fl-14 ta' Jannar 2014. Peress li t-tweġibiet mingħand l-awtoritajiet Ġermaniżi ma kinux sħaħ, il-Kummissjoni bagħtet tfakkira lill-Ġermanja fid-19 ta' Marzu 2014. Il-Ġermanja wieġbet fit-22 ta' April 2014.

(13)

Fl-20 ta' Diċembru 2013, Ryanair issottomettiet kummenti oħrajn, li ngħaddew lill-Ġermanja fit-8 ta' Jannar 2014. Il-Ġermanja bagħtet ir-reazzjoni tagħha għall-kummenti ta' Ryanair fis-27 ta' Jannar 2014.

(14)

Fis-17 ta' Jannar 2014 u l-31 ta' Jannar 2014, Ryanair issottomettiet kummenti oħrajn, li għaddew lill-Ġermanja fis-7 ta' Marzu 2014. Fis-7 ta' April 2014, il-Ġermanja ddikjarat li ma kellha ebda kumment ieħor x'tagħmel dwar l-informazzjoni li pprovdiet Ryanair.

(15)

Permezz tal-ittra tal-25 ta' Frar 2014, il-Kummissjoni avżat lill-Ġermanja dwar l-adozzjoni fl-20 ta' Frar 2014 tal-Linji Gwida tal-2014 dwar l-Avjazzjoni (6) u dwar il-fatt li dawk il-Linji Gwida kienu sejrin ikunu japplikaw f'dan il-każ mid-data tal-pubblikazzjoni tagħhom f'Il-Ġurnal Uffiċjali tal-Unjoni Ewropea. Hija tat ukoll lill-Ġermanja l-faċilità li tikkummenta fuq il-Linji Gwida u l-applikazzjoni tagħhom fi żmien 20 jum mill-pubblikazzjoni tagħhom f'Il-Ġurnal Uffiċjali.

(16)

Permezz tal-ittra tal-24 ta' Frar 2014, il-Kummissjoni avżat ukoll lill-partijiet terzi dwar l-adozzjoni fl-20 ta' Frar 2014 tal-Linji Gwida tal-2014 dwar l-Avjazzjoni u dwar il-fatt li dawk il-Linji Gwida kienu sejrin ikunu japplikaw f'dan il-każ mid-data tal-pubblikazzjoni tagħhom f'Il-Ġurnal Uffiċjali tal-Unjoni Ewropea. Tat ukoll lill-partijiet terzi kkonċernati l-faċilità li jikkummentaw fuq il-Linji Gwida u l-applikazzjoni tagħhom fi żmien 20 jum mill-pubblikazzjoni tagħhom f'Il-Ġurnal Uffiċjali.

(17)

Il-Linji Gwida tal-2014 dwar l-Avjazzjoni ġew ippubblikati f'Il-Ġurnal Uffiċjali tal-Unjoni Ewropea fl-4 ta' April 2014. Ħadu post il-Linji Gwida tal-1994 dwar l-Avjazzjoni (7) u l-Linji Gwida tal-2005 dwar l-Avjazzjoni (8).

(18)

Fil-15 ta' April 2014, ġie ppubblikat avviż f'Il-Ġurnal Uffiċjali tal-Unjoni Ewropea, li bih l-Istati Membri u l-partijiet interessati kienu mistednin jikkummentaw fuq l-applikazzjoni tal-Linji Gwida tal-2014 dwar l-Avjazzjoni għal dan il-każ fi żmien xahar mid-data tal-pubblikazzjoni tat-tali Linji Gwida tal-2014 dwar l-Avjazzjoni (9)

(19)

Fid-29 ta' April 2014, il-Kummisjoni talbet informazzjoni mingħand il-Ġermanja, li wieġbet fis-7 ta' Mejju 2014.

(20)

Fis-6 ta' Mejju 2014, Deutsche Lufthansa AG ssottomettiet kummenti dwar il-każ ta' għajnuna b'rabta mal-adozzjoni tal-Linji Gwida l-ġodda. Verżjoni mhux kunfidenzjali ta' dawk il-kummenti għaddiet lill-Ġermanja fit-8 ta' Mejju 2014. Il-Ġermanja ssottomettiet il-kummenti tagħha dwar dawn is-sottomissjonijiet fil-15 ta' Mejju 2014.

(21)

Fis-7 ta' Mejju 2014, l-ilmentatur issottometta kummenti dwar il-każ ta' għajnuna b'rabta mal-adozzjoni tal-Linji Gwida l-ġodda. Verżjoni mhux kunfidenzjali għaddiet lill-Ġermanja fil-21 ta' Mejju 2014. Il-Ġermanja wieġbet fit-28 ta' Mejju 2014.

(22)

Fl-10 ta' Settembru 2014, il-Kummissjoni talbet iktar informazzjoni mingħand il-Ġermanja u mingħand Ryanair. Il-Ġermanja u Ryanair wieġbu fis-16 ta' Settembru 2014.

(23)

Fit-12 ta' Settembru 2014, Ryanair u kumpanija ta' konsulenza li aġixxiet f'isimha ssottomettew il-kummenti tagħhom fuq dan il-każ ta' għajnuna. Verżjoni mhux kunfidenzjali ta' dawk il-kummenti għaddiet lill-Ġermanja fid-19 ta' Settembru 2014. Il-Ġermanja ssottomettiet il-kummenti tagħha dwar dawn is-sottomissjonijiet fis-6 ta' Ottubru 2014.

(24)

Il-kumpanija tal-Istat Flugplatz Altenburg-Nobitz GmbH (10) ilha s-sid u ilha topera l-Ajruport Leipzig-Altenburg (li qabel kien jismu Flughafen-Altenburg-Nobitz, minn hawn 'il quddiem imsejjaħ “AOC”) fin-naħa tan-Nofsinhar tal-Land ta' Thüringen fil-Ġermanja mill-1992. Fl-imgħoddi, l-AOC kien mitjar militari Russu li ġie abbandunat fil-bidu tas-snin disgħin. Imbagħad, Flugplatz Altenburg-Nobitz GmbH ġiet inkarigata bil-bini u t-tħaddim tal-mitjar tal-AOC. Skont l-artikoli ta' inkorporazzjoni, l-objettiv tal-kumpanija huwa li ttejjeb l-infrastruttura kummerċjali u, b'hekk, issaħħaħ s-setgħa tal-ekonomija tal-Lvant ta' Thüringen u l-Punent ta' Sachsen.

(25)

L-eqreb ajruporti għall-AOC huma:

(26)

L-AOC ra inqas minn 150 000 passiġġier fis-sena mindu beda jaħdem bħala ajruport ċivili. It-Tabella 1 tiġbor fil-qosor in-numri tal-passiġġieri fl-AOC mis-sena 2000.

Tabella 1  (11)

In-numri ta' passiġġieri fl-AOC mis-sena 2000 sal-2013  (12)

(27)

Eurowings ipprovdiet disa' titjiriet fis-sena 2000. Air Berlin operat 62 titjira fl-2001 u 57 titjira fl-2002 u mbagħad waqqfet it-titjiriet lejn l-AOC.

(28)

Fit-3 ta' Marzu 2003, l-operatur tal-AOC, Flugplatz Altenburg-Nobitz GmbH, u Ryanair ikkonkludew kuntratt tas-servizzi tal-ajruport għal tul ta' għaxar snin.

(29)

Fl-eqqel snin (2008-2010), Ryanair offriet sa erba' destinazzjonijiet mill-AOC. Għall-ewwel, Ryanair ipprovdiet titjiriet ta' kuljum lejn Londra u, mill-2007, titjiriet lejn Barċellona (Ġirona). Il-kumpanija serviet ukoll lil Edinburgh fl-2009 u bdiet titjiriet lejn Alicante fl-2010. Mill-1 ta' Mejju 2003, Ryanair kienet l-unika linja tal-ajru li kienet qiegħda tipprovdi rotot lejn u mill-AOC.

(30)

Ryanair waqqfet l-operazzjonijiet ta' titjiriet tagħha fl-AOC fil-31 ta' Marzu 2011. Minn dakinhar, ebda linja tal-ajru oħra ma operat titjiriet skedati mill-AOC. Dan huwa kkonfermat mis-sit web tal-AOC.

(31)

Kif irrakkomandat fl-2010 il-kumpanija ta' konsulenza KE-Consult GbR (15) (minn hawn 'il quddiem imsejjaħ “l-istudju ta' KE-Consult”), l-ajruport beda jifrex in-negozju tal-avjazzjoni ġenerali tiegħu, billi beda jiffoka fuq titjiriet kummerċjali u jisfrutta l-qrubija tiegħu lejn ir-reġjun ekonomiku emerġenti ta' Chemnitz-Zwickau. L-ajruport waqqaf is-servizzi tal-ajru low-cost u beda jopera wkoll bħala sit ta' taħriġ għall-persunal tat-titjiriet u tas-sigurtà.

(32)

L-iktar raġunijiet importanti għal din il-konverżjoni kienu (16):

(33)

Il-maniġment tal-ajruport ikkunsidra għadd ta' għażliet għall-konverżjoni tal-ajruport. L-iktar għażla prattika kienet li jiġu offruti rotot ġodda u titjiriet charter fl-2012 mingħajr ebda għotja għall-kummerċjalizzazzjoni. Għal dak il-għan, l-ajruport beda jinnegozja ma' Rheinjet fl-2011 dwar titjiriet lejn Barċellona. Wara d-deċiżjoni adottata minn Ryanair fis-26 ta' Lulju 2011 li ttir minn Leipzig-Halle, inbidlet il-pożizzjoni fis-suq tal-AOC u twarrbet il-kunsiderazzjoni ta' kwalunkwe rotta ġdida bħal din.

(34)

Għalhekk, fl-2011 ġie deċiż li l-ajruport jiġi kkonvertit billi:

(35)

Skont il-maniġment tal-kumpanija, dawn il-miżuri għandhom jippermettu lill-kumpanija biex issir kapaċi tiffinanzja lilha nfisha fit-terminu medju, minħabba tnaqqis konsiderevoli fl-ispejjeż, peress li jkun jista' jiġi ffrankat sa EUR 520 000 fis-sena. Finalment, dan inaqqas l-ispariġġ tal-likwidità tal-ajruport. L-ajruport jinżamm u jgħin sabiex jiżdied it-tkabbir ekonomiku reġjonali.

(36)

Bejn l-1992 u l-2010 ġew investiti madwar EUR 21 miljun fi Flugplatz Altenburg-Nobitz GmbH, li għalihom il-Land ta' Thüringen ikkontribwixxa EUR 17-il miljun u l-azzjonisti tal-kumpanija pubblika kkontribwixxew madwar EUR 4 miljun (19).

(37)

Bejn l-2000 u l-2011, Flugplatz Altenburg-Nobitz GmbH irċeviet żewġ tipi ta' għotjiet pubbliċi, li kienu injezzjonijiet ta' kapital mill-azzjonisti u għotjiet mingħand organizzazzjonijiet pubbliċi oħrajn, speċjalment il-Land ta' Thüringen. (20) Skont il-Ġermanja u r-rapport finanzjarju ta' Flugplatz Altenburg-Nobitz GmbH, il-Land ta' Thüringen kien jiffinanzja l-iktar investimenti infrastrutturali, filwaqt li l-azzjonisti għenu sabiex jiffinanzjaw it-telf operatorju. It-Tabella 2 fiha lista tal-għotjiet pubbliċi riċevuti mill-ajruport, li l-objettivi ewlenin tagħhom kienu kif ġej:

Tabella 2  (21)

Ħarsa ġenerali tal-għotjiet pubbliċi li rċeviet Flugplatz Altenburg-Nobitz GmbH

(38)

Skont il-Ġermanja, b'kollox Flugplatz Altenburg-Nobitz GmbH investiet EUR 6 474 035 fl-infrastruttura mill-2000 sal-2011. Dik il-figura hija analizzata b'mod disaggregat fit-Tabella 3. L-investimenti kienu jinkludu l-estensjoni tar-runway (total ta' EUR 687 882 fl-2003/2004) u l-bini ta' terminal ġdid (li sewa EUR 1 003 571 fl-2009), li nfetaħ fl-2010 (23)).

Tabella 3  (24)

Ħarsa ġenerali tal-investimenti infrastrutturali fl-AOC u l-kostijiet ta' investiment mill-2000 sal-2011

(39)

Kif spjegat f'dettall fit-taqsima 3.4.2 iktar 'il quddiem, l-AOC kellu bżonn jestendi r-runway u jipprovdi żoni tas-servizzi għall-kumpaniji li jikru l-karozzi skont il-kuntratt tas-servizz ma' Ryanair. Mir-rapporti finanzjarji ta' Flugplatz Altenburg-Nobitz GmbH għas-snin inkwistjoni jidher ċar li r-runway ġiet estiża (28).

(40)

Il-bord tad-diretturi ta' Flugplatz Altenburg-Nobitz GmbH iddiskuta pjan ta' investiment ġenerali mifrux fuq għaxar snin li kien jinvolvi investimenti li b'kollox kienu jiswew madwar EUR 20 miljun matul il-laqgħa tiegħu fit-23 ta' Ġunju 2000 b'rabta mal-iżvilupp tal-ajruport.

(41)

Flugplatz Altenburg-Nobitz GmbH irrapporta t-telf annwali elenkat fit-Tabella 4 mill-operat tal-AOC tul il-perjodu 2000-2011.

Tabella 4  (29)

Ħarsa ġenerali u finanzjament tat-telf annwali ta' Flugplatz Altenburg-Nobitz GmbH

(42)

Il-Ġermanja ssottomettiet id-dejta mogħtija fit-Tabella 5 fuq l-injezzjonijiet speċifiċi annwali ta' kapital li għamlu l-azzjonisti sabiex ikopru t-telf operatorju ta' Flugplatz Altenburg-Nobitz GmbH (33). Dawk l-injezzjonijiet ta' kapital laħqu total ta' EUR 8,9 miljun.

Tabella 5

Injezzjonijiet ta' kapital mill-azzjonisti għal finijiet operatorji

(43)

Mir-rapporti finanzjarji ta' Flugplatz Altenburg-Nobitz GmbH jidher ċar li, mill-bidu tal-perjodu kkonċernat hawnhekk, il-pożizzjoni finanzjarja tal-ajruport kienet tiddependi ħafna mill-injezzjonijiet ta' kapital tal-azzjonisti. Fir-rapport finanzjarju tal-2002 tagħha, il-kumpanija tispjega li s-sopravvivenza tal-kumpanija tkun f'riskju mingħajr injezzjonijiet ta' kapital mill-azzjonisti u li kien hemm bżonn ta' iktar injezzjonijiet. Bosta rapporti finanzjarji oħrajn (għall-2003 u l-2004) jiddikjaraw li l-kumpanija tista' tibqa' topera biss bl-injezzjonijiet ta' kapital tal-azzjonisti. (34). Il-kumpanija diġà kienet bassret fin-nota dwar il-prospetti għas-sena ta' wara fir-rapport finanzjarju tal-2003 li l-azzjonisti kien sejjer ikollhom bżonn jagħmlu injezzjonijiet ta' kapital fis-snin finanzjarji ta' wara. Skont ir-rapport finanzjarju annwali tal-2006, fl-2006 it-theddida ta' insolvenza kienet evitata biss bis-saħħa ta' injezzjonijiet ta' kapital tal-azzjonisti.

(44)

Il-Ġermanja spjegat li l-ispejjeż tas-servizzi pubbliċi għamlu riferiment għal spejjeż tal-persunal għall-kontroll tat-traffiku tal-ajru, il-kontroll tal-perimetru, l-amministrazzjoni, iċ-check-in, it-taħriġ u l-bdoti u dawn kienu ffinanzjati kemm mir-riżorsi proprji ta' Flugplatz Altenburg-Nobitz GmbH kif ukoll mil-Land ta' Thüringen. Dan jidher fit-Tabelli 6 u 7.

Tabella 6

Il-finanzjament tal-kostijiet tas-servizzi pubbliċi fi Flugplatz Altenburg-Nobitz GmbH  (35)

Tabella 7  (36)

Disaggregazzjoni tal-finanzjament mil-Land ta' Thüringen skont it-tip ta' spiża tas-servizzi pubbliċi

(45)

It-Tabella 8 tiġbor fil-qosor l-iktar dispożizzjonijiet importanti tar-regolament dwar it-tariffi standard tal-ajruport applikati fl-AOC tul il-perjodu 2002-2010 (37).

Tabella 8

Ir-regolament dwar it-tariffi tal-ajruport applikat fl-AOC fil-perjodu 2002-2010  (38)

(46)

F'Jannar 2011 ġie adottat regolament ġdid dwar it-tariffi tal-ajruport, u d-dispożizzjonijiet ewlenin ta' dan huma stipulati fit-Tabelli 9 u 10.

Tabella 9

Ir-regolament dwar it-tariffi tal-ajruport applikabbli għall-inġenji tal-ajru mill-2011  (39)

Tabella 10

Ir-regolament dwar it-tariffi tal-ajruport applikabbli għall-passiġġieri mill-2011  (41)

(47)

Fit-3 ta' Marzu 2003, Flugplatz Altenburg-Nobitz GmbH (fil-kuntratt imsejjaħ l-“AOC”), u Ryanair ikkonkludew kuntratt tas-servizzi tal-ajruport twil għaxar snin. Il-kuntratt daħal fis-seħħ fil-bidu tar-rotazzjoni ppjanata ta' kuljum għall-Ajruport Stansted ta' Londra, li kellha tibda fl-1 ta' Mejju 2003.

(48)

Skont it-termini tal-kuntratt, Ryanair riedet tagħmel il-pagamenti li ġejjin lill-AOC:

(49)

Il-Ġermanja spjegat li Ryanair ħallset it-tariffi għall-forniment tas-servizzi skont ir-regolament dwar it-tariffi standard applikabbli għall-AOC dak iż-żmien. Dawn kienu jfissru tariffa fissa għall-illandjar ta' […]* għal kull inġenju tal-ajru u tariffa tal-passiġġieri ta' […]* għal kull passiġġier (netta mingħajr il-VAT) (43) (it-tariffi mħallsin f'Ġunju 2009).

(50)

Il-kuntratt tas-servizzi tal-ajruport tat-3 ta' Marzu 2003 imsemmi iktar 'il fuq jistipula li, min-naħa tiegħu, l-AOC jaqbel li:

(51)

Minbarra l-obbligu fuq Flugplatz Altenburg-Nobitz GmbH li jipprovdi r-runway, l-Anness A għall-kuntratt jipprovdi għal servizzi oħrajn li jrid jipprovdi l-AOC:

(52)

It-tariffi li ħallset Ryanair, kif imsemmi fil-paragrafu 48 ikopru bosta servizzi elenkati fl-Anness B għall-kuntratt tas-servizzi tal-ajruport tat-3 ta' Marzu 2003 intitolat “Servizzi ta' mmaniġġjar u oħrajn relatati li jridu jiġu pprovduti mill-aġent tal-groundhandling”, bħal: (44): it-tagħbija u l-ħatt ta' bagalji (mhux merkanzija); […]* l-użu ta' kamra tal-banju u provvista tal-ilma fuq talba; […]* il-forniment u l-applikazzjoni ta' sistemi ta' tneħħija tas-silġ fuq talba ta' Ryanair, bħal fluwidi ta' tneħħija tas-silġ li jiswew […]* il-litru, check-in, tlugħ abbord u nżul mill-ajruplan tal-passiġġieri u kontroll tad-dokumenti tal-ivvjaġġar.

(53)

Skont l-Appendiċi għall-Anness B għall-kuntratt tas-servizzi tal-ajruport tat-3 ta' Marzu 2003 intitolat “Sistema ta' Prenotazzjoni”, il-fornitur tas-servizzi tal-immaniġġjar irid jistabbilixxi u jopera desk tas-servizzi għall-passiġġieri, jara li t-taħriġ tal-persunal tal-prenotazzjoni jibqa' ta' standard tajjeb, iħallas għall-ħardwer tal-kompjuter, għat-telefowns, magni tal-faks u tagħmir tal-ITC tal-avjazzjoni (SITA) u għall-ispejjeż kollha ta' manutenzjoni tas-sistema u ta' skambju tat-tagħmir imġarrab minnu matul l-operat tad-desk tal-passiġġieri. Minkejja dan[…]*.

(54)

Flugplatz Altenburg-Nobitz GmbH ikkonkludiet tliet kuntratti ta' kummerċjalizzazzjoni b'kollox, bl-ewwel wieħed ikun ma' Ryanair u t-tnejn ta' wara ma' Airport Marketing Services Limited (AMS), flimkien ma' ittra ta' akkumpanjament għall-aħħar kuntratt konkluż fil-25 ta' Jannar 2010.

Tabella 11

Il-kuntratti ta' kummerċjalizzazzjoni bejn Flughafen Altenburg-Nobitz GmbH u Ryanair/AMS

(55)

Skont l-ewwel kuntratt ta' kummerċjalizzazzjoni bejn Flugplatz Altenburg-Nobitz GmbH (fil-kuntratt imsejħa l-“AOC”) u Ryanair tas-7 ta' April 2003, li daħal fis-seħħ fil-15 ta' April 2003 għal perjodu ta' għaxar snin, Ryanair hija meħtieġa tagħmel sforzi biex tirreklama ż-żona ta' Altenburg. Skont il-kuntratt, apparti mis-sit web tal-AOC, Ryanair għandha setgħa eżekuttiva fuq kull deċiżjoni dwar ir-reklamar u l-miżuri promozzjonali.

(56)

Flugplatz Altenburg-Nobitz GmbH trid tħallas it-tariffi li ġejjin għall-ħidma mwettqa minn Ryanair:

(57)

Fit-28 ta' Awwissu 2008 ġie konkluż it-tieni kuntratt tas-servizzi ta' kummerċjalizzazzjoni bejn Flugplatz Altenburg-Nobitz GmbH (fil-kuntratt imsejjaħ l-“AOC”), u Airport Marketing Services Limited. Skont dak il-kuntratt, l-AOC kien biħsiebu jirreklama b'mod attiv il-faċilitajiet disponibbli fil-belt u r-reġjun u li jżid il-perċentwal ta' turisti ġejjin fuq titjiriet ta' Ryanair u b'hekk jikseb l-ikbar dħul possibbli li jista' jagħmel minn attivitajiet mhux marbutin mal-avjazzjoni. Il-kuntratt kien jesiġi li Ryanair ikollha rotta mill-AOC għal Londra (Stansted) kuljum fis-sajf u erba' darbiet fil-ġimgħa fix-xitwa u rotta lejn Ġirona tliet darbiet fil-ġimgħa fis-sajf.

(58)

Il-kuntratt kellu terminu inizjali ta' sentejn. L-AOC ħallas EUR […]* għall-ewwel sena u EUR […]* għat-tieni sena. Min-naħa tiegħu, l-AOC irċieva […]*. Il-kuntratt ma kien fih ebda informazzjoni fuq id-durata, il-post jew dettalji oħrajn tal-link.

(59)

Flugplatz Altenburg-Nobitz GmbH kellha d-dritt li tagħżel il-ħin ippreferut għall-miżuri ta' kummerċjalizzazzjoni. Madankollu, minħabba d-disponibbiltà limitata tiegħu, dan il-ħin ma setax jiġi ggarantit. Flugplatz Altenburg-Nobitz GmbH kellha d-dritt ukoll li tagħżel is-siti web li setgħu jiġu aċċessati permezz ta' link fuq is-sit web ta' Ryanair. Madankollu, dak id-dritt kien limitat mill-fatt li s-siti web ma setgħu jinkludu ebda servizz ta' titjira, kiri ta' karozzi jew akkomodazzjoni u/jew servizz ieħor li jista' jiġi kkummerċjalizzat fuq is-sit web ta' Ryanair. Barra minn hekk, Ryanair kellha setgħa deċiżjonali u setgħet tiċħad milli tippubblika sit web. Flugplatz Altenburg-Nobitz GmbH kellha tissorvelja wkoll is-servizzi sabiex tara li kienu qegħdin jiġu pprovduti skont il-kuntratt.

(60)

Fil-25 ta' Jannar 2010 ġie konkluż it-tielet kuntratt tas-servizzi ta' kummerċjalizzazzjoni bejn Flugplatz Altenburg-Nobitz GmbH (fil-kuntratt imsejjaħ l-“AOC”), u Airport Marketing Services Limited. Skont dak il-kuntratt, AMS ipprovdiet servizzi ta' kummerċjalizzazzjoni turistika fuq is-sit web ta' Ryanair sabiex l-AOC ikun jista' jirreklama l-potenzjal kummerċjali tiegħu u l-attrazzjonijiet turistiċi. Il-kuntratt jeħtieġ li Ryanair taqbel li tipprovdi rotot mill-AOC mis-sajf 2010 'il quddiem fl-istaġun tas-sajf tal-IATA biss (46) lejn Londra (Stansted) (seba' darbiet fil-ġimgħa), lejn Ġirona (tliet darbiet fil-ġimgħa) u lejn Alicante (darbtejn fil-ġimgħa).

(61)

Il-kuntratt kellu terminu inizjali ta' sena. L-AOC ħallas EUR […]* għal sena u rċieva l-pakkett ta' servizzi ta' kummerċjalizzazzjoni li ġej: […]*. Id-drittijiet u l-obbligi tal-AOC f'termini tal-ħinijiet ippreferuti, il-konfigurazzjoni tas-sit web u s-setgħa deċiżjonali ta' Ryanair kienu l-istess bħal dawk tal-kuntratt ta' qabel.

(62)

L-ittra ta' akkumpanjament tal-21 ta' Settembru 2010 ġiet iffirmata bejn Flughafen Altenburg-Nobitz GmbH (fil-kuntratt imejħa l-“AOC”) u Airport Marketing Services Limited. Il-kuntratt jissupplimenta l-kuntratt tas-servizzi ta' kummerċjalizzazzjoni oriġinali tal-25 ta' Jannar 2010, peress li l-AOC xtaq li jixtri iktar servizzi ta' reklamar (47) li ammontaw għal EUR […]* għall-istaġun tax-xitwa tal-2010 biss. L-ittra ta' akkumpanjament skadiet fil-31 ta' Marzu 2011.

(63)

Skont l-ittra ta' akkumpanjament, AMS kienet meħtieġa tipprovdi servizzi ta' reklamar fil-forma ta' “link għal sit web magħżul minn Flugplatz Altenburg-Nobitz GmbH, li trid tintwera fuq il-paġna ewlenija ta' Ryanair UK ryanair.com għal 12-il jum matul it-terminu tal-ittra ta' akkumpanjament”.

(64)

Skont il-Ġermanja, il-pagamenti skont din l-ittra ta' akkumpanjament saru minn impriżi privati, wara li qablu fuq iż-żamma tal-operazzjonijiet ta' Ryanair fl-AOC.

(65)

Il-Kummissjoni qajmet il-mistoqsijiet li ġejjin fid-deċiżjoni tagħha li tibda l-proċedura rigward il-miżuri li jridu jiġu vvalutati:

(66)

Skont il-Ġermanja, l-għotjiet pubbliċi għall-investimenti infrastrutturali fl-ajruport kienu bbażati fuq l-istess loġika bħall-konverżjoni tal-ajruport u li l-konverżjoni tiegħu minn mitjar militari għal ajruport ċivili kienet iġġustifikata f'termini tal-iżvilupp ekonomiku tar-reġjuni tal-Lvant ta' Thüringen u l-Punent ta' Sachsen. (48). L-Artikolu 2.1 tal-artikoli ta' inkorporazzjoni ta' Flugplatz Altenburg-Nobitz GmbH tabilħaqq jiddikjara li wieħed mill-objettivi tal-kumpanija huwa li ttejjeb l-infrastruttura kummerċjali u, b'hekk, li ssaħħaħ l-ekonomiji tal-Lvant ta' Thüringen u l-Punent ta' Sachsen. Rapport tal-maniġment tal-kumpanija. (49) jistma d-dħul annwali għar-reġjun sħiħ tal-Ġermanja Ċentrali mill-passiġġieri tat-trasferimenti fl-ajruport għal EUR 10,7 miljun.

(67)

Il-Ġermanja tiddikjara li l-forniment tal-infrastruttura jagħmel parti mill-mandat tal-Istat fil-kuntest tar-responsabbiltà tiegħu għall-ġestjoni tat-territorju, l-iżvilupp reġjonali u l-politika dwar it-trasport reġjonali. Għalhekk, mhux talli dawn l-investimenti infrastrutturali huma bbażati biss fuq raġunijiet purament ekonomiċi għall-benefiċċju ta' impriża; talli huma wkoll parti mill-kompitu tal-Istat li jaqdi l-interess ġenerali.

(68)

Il-Ġermanja tiddikjara wkoll li l-Land huwa intitolat biss (50) li jiffinanzja ċerti attivitajiet li huma fl-interess immedjat tiegħu u mhux vijabbli mingħajr sussidju pubbliku. Kumpens eċċessiv huwa evitat billi jsir awditjar ex post tal-approprjazzjoni tar-riżorsi pprovduti (51).

(69)

Skont il-Ġermanja, huwa fatt magħruf li, b'mod partikolari, l-ajruporti reġjonali spiss ma jkunux jistgħu jkopru l-kostijiet ta' investiment u operatorji tagħhom mill-imposti tal-ajruport u li jista' jkun hemm bżonn ta' kofinanzjament pubbliku. L-argument ewlieni li għamlet hawnhekk il-Ġermanja huwa li l-investimenti infrastrutturali kellhom jiġu ffinanzjati mill-awtoritajiet pubbliċi sabiex jiġi żgurat li jkunu jistgħu jiġu rrispettati r-rekwiżiti statutorji f'termini tas-sigurtà u l-prevenzjoni tal-perikli, li ajruporti reġjonali bħall-AOC ma jkunux kapaċi jiġġeneraw biżżejjed dħul mill-imposti tal-ajruport sabiex jiffinanzjaw l-investimenti infrastrutturali u li, mingħajr sussidju pubbliku, il-kumpaniji ma kinitx tkun kapaċi tirrilaxxa l-obbligi statutorji tagħha, inkluż f'termini tar-rekwiżiti tas-sigurtà imposti fuq il-linja tal-ajru.

(70)

Il-Ġermanja tindika li x-xogħlijiet ta' rinnovament tat-terminal saru fl-2009 sabiex jiġu rrispettati r-rekwiżiti dwar is-sikurezza u d-dispożizzjonijiet li jirregolaw l-immaniġġjar separat ta' passiġġieri ġejjin mix-Schengen u dawk mhux mix-Schengen. Skont il-Ġermanja, ġew ikkunsidrati alternattivi għar-rinnovament, iżda kien ġie deċiż favur is-soluzzjoni fit-tul ta' rinnovament tat-terminal minħabba n-numru ikbar ta' passiġġieri u l-kost għoli tal-alternattivi.

(71)

Il-Ġermanja tiddikjara li l-ammont sħiħ ta' EUR 6 474 034 (52) investit fl-infrastruttura tul il-perjodu ta' bejn l-2000 u l-2011 kien marbut biss ma' attivitajiet mhux ekonomiċi. Skont il-Ġermanja, dawn l-investimenti infrastrutturali ma jikkostitwixxux għajnuna mill-Istat u, għalhekk, ma jaqgħux taħt id-dispożizzjoni dwar l-għajnuna mill-Istat tal-Artikolu 107 TFUE. Il-Ġermanja tispjega wkoll li dawn l-investimenti għall-fini ta' attivitajiet mhux ekonomiċi jistgħu jiġu suddiviżi f'investimenti għas-sigurtà u investimenti għall-prevenzjoni ta' periklu għall-pubbliku u l-avjazzjoni. Il-Ġermanja tispjega f'dettall li l-funzjonijiet ta' sorveljanza u prevenzjoni tal-periklu, is-sikurezza kontra nirien, is-sigurtà pubblika u s-sigurtà operazzjonali, servizz meteoroloġiku u kontroll tat-traffiku tal-ajru lkoll huma kompiti sovrani. Il-Ġermanja tiċċara wkoll li sehem kbir mill-fondi riċevuti ntużaw sabiex jiġu ggarantiti s-sigurtà u r-rinnovament tal-infrastruttura minflok ma jkollha tinbena infrastruttura ġdida.

(72)

Il-Ġermanja tispjega wkoll li 30 % tal-ammont sħiħ ta' EUR 6 474 034 investit kien iffinanzjat minn fondi proprji ta' Flugplatz Altenburg-Nobitz GmbH u li l-bqija kien ġie mingħand il-Land ta' Thüringen. Il-Ġermanja tindika li l-fondi għal dawn l-investimenti infrastrutturali kienu ġew ipprovduti bħala assistenza finanzjarja mhux rifondibbli minflok bħala self. It-termini ta' dik l-assistenza finanzjarja kienu bbażati fuq ir-rekwiżiti stipulati fit-Thüringer Landeshaushaltsordnung [Regolament tal-Baġit Reġjonali ta' Thüringen] (53).

(73)

Il-Ġermanja tispjega wkoll li l-proġetti ta' konverżjoni għas-sostenn tal-iżvilupp ekonomiku reġjonali fi stati federali oħrajn b'rispett tal-Artikolu 107(3)(c) TFUE kienu ffinanzjati bis-sħiħ minn riżorsi pubbliċi. Hawnhekk il-Ġermanja tirreferi għal deċiżjoni preċedenti tal-Kummissjoni (54) li sabet li l-bini jew l-estensjoni ta' ajruporti reġjonali f'żoni bi struttura dgħajfa kienu kompatibbli mat-Trattat dwar l-Unjoni Ewropea.

(74)

Il-Ġermanja tiddikjara b'rabta mal-investimenti li talbet Ryanair fil-kuntratti tas-servizzi tagħha (runway b'ċerti proprjetajiet tekniċi li kellha tiġi pprovduta sal-31 ta' Diċembru 2003 u li kellha titlesta u tiġi estiża sal-31 ta' Mejju 2004 (55)) li din l-estensjoni speċjali ma tlestietx għal kollox u li ma tqieset bħala prekundizzjoni korretta għall-illandjar fl-AOC għal kull linja tal-ajru iktar milli obbligu kuntrattwali. Il-Ġermanja tispjega f'dettall li t-tul tar-runway fl-AOC kien ġie estiż tul is-snin minn 2 185 m (7 ta' Lulju 2003) għal 2 235 m (9 ta' Settembru 2004) u finalment għal 2 435 m (9 ta' Diċembru 2008). Madankollu, ir-runway kienet disponibbli għall-utenti kollha. Skont il-Ġermanja, il-fatt li din ir-runway kienet tintuża biss minn Ryanair ma jibdilx dik l-opinjoni.

(75)

Il-Ġermanja tiċħad ukoll l-argument tal-ilmentatur li r-runway ġiet estiża apposta għall-ajruplani Boeing 737-800 ta' Ryanair (107 inġenji tal-ajru fl-2007) fuq il-bażi li l-inġenju tal-ajru spiss jintuża minn linji tal-ajru oħrajn ukoll, bħad-Deutsche Lufthansa (132 inġenju tal-ajru fl-2007). Il-Ġermanja tindika wkoll li s-suġġeriment tal-ilmentatur li l-fondi pubbliċi ta' EUR 28 miljun ġew investiti sal-2007 fil-modernizzazzjoni tal-ajruport huwa żbaljat u li l-ilmentatur kien qiegħed jirreferi għal tagħrif li fih l-ispejjeż potenzjali kienu sempliċiment stmati. Skont il-Ġermanja, l-investimenti propji ammontaw għal EUR 16.7 miljun.

(76)

Il-Ġermanja targumenta wkoll li l-obbligi li talbet Ryanair fil-kuntratt tas-servizzi tal-ajruport (l-Annessi A u B u l-appendiċi għall-Anness B) kienu obbligi ġenerali li ajruport irid jirrilaxxa sabiex jipprovdi s-servizzi li jeħtieġu l-linji tal-ajru. Il-Ġermanja tispjega li s-servizzi msemmijin fil-paragrafi 50 sa 53 huma obbligi standard inkombenti fuq l-ajruporti kollha u li l-infrastruttura tal-ajruport kienet disponibbli għal kull min jużah. Il-Ġermanja żżid li wħud mis-servizzi elenkati fl-Anness A għall-kuntratt tas-servizzi tal-ajruport (bħal konferenzi għall-istampa, ivvjaġġar tal-ġurnalisti u avvenimenti filgħaxija organizzati minn aġenziji tal-ivvjaġġar) ma kinux ipprovduti.

(77)

Il-Land ta' Thüringen investa EUR 12,25 miljun fl-infrastruttura tal-ajruport bejn l-1993 u l-1997. Il-Land ta' Thüringen approva għotjiet ta' EUR 4,5 miljun għal Flugplatz Altenburg-Nobitz GmbH bejn is-sena 1998 u l-2011. Dawn il-fondi ngħataw fuq il-bażi tar-regolamenti ppubblikati dwar l-għajnuna tal-Istat tal-Land ta' Thüringen, li ma kienx hemm bżonn li jiġu notifikati. Skont il-Ġermanja, l-għajnuna hija disponibbli skont dawn ir-regolamenti għall-operaturi kolha tal-ajruporti f'Thüringen. Skont dawk ir-regolamenti, il-fondi pubbliċi jistgħu jingħataw għal investimenti infrastrutturali li huma meħtieġa għas-settur tal-avjazzjoni, li huma disponibbli għall-utenti potenzjali kollha u li huma fl-interess pubbliku ġenerali. Barra minn hekk, dawk il-fondi huma limitati għal ammonti xierqa u neċessarji. Il-Ġermanja tispjega wkoll f'dettall li l-ajruporti kkontribwixxew għall-ispejjeż infrastrutturali mill-1997. Il-Ġermanja tispjega wkoll li dawn ir-regolamenti ma jistgħu jikkaġunaw ebda tgħawwiġ tal-kompetizzjoni.

(78)

Fir-rigward tal-investimenti infrastrutturali bejn it-12 ta' Diċembru 2000 (id-data li fiha l-Qorti qatgħet is-sentenza fil-każ tal-għajnuna li kien jinvolvi l-Aéroports de Paris u d-9 ta' Diċembru 2005 (id-data li fiha daħlu fis-seħħ il-Linji Gwida tal-2005 dwar l-Avjazzjoni), il-Ġermanja hija tal-fehma li l-kriterji applikabbli mhumiex ċari. Jekk japplikaw il-Linji Gwida tal-1994 dwar l-Avjazzjoni, l-infrastruttura ma tistax titqies bħala għajnuna mill-Istat bil-quddiem. Fuq dan il-punt, il-Ġermanja targumenta li l-Linji Gwida tal-1994 kienu japplikaw sakemm daħlu fis-seħħ il-Linji Gwida tal-2005, li s-sentenza f'Aéroports de Paris ma tibdilx dan il-fatt u li, peress li l-Linji gwida tal-1994 huma vinkolanti fuq il-Kummissjoni fuq il-bażi tal-prinċipju ta' aspettattiva leġittima, għalhekk għandhom ikunu japplikaw għall-miżuri infrastrutturali li saru sal-2005 u, għalhekk, il-miżura ma tistax tiġi kklassifikata bħala għajnuna mill-Istat. Targumenta li, għad li saru pagamenti għall-infrastruttura minn fondi pubbliċi, il-fondi ġew ipprovduti għal attivitajiet li jaqgħu taħt kompiti tal-politika pubblika u mhux għal attivitajiet ekonomiċi.

(79)

Fir-rigward tal-miżuri infrastrutturali implimentati wara d-9 ta' Diċembru 2005, l-ewwel nett il-Ġermanja hija tal-fehma li ma jikkostitwixxux għajnuna għar-raġunijiet mogħtijin fil-paragrafi 66 sa 73 u tiddikjara li, jekk il-Kummissjoni xorta waħda tikkonkludi li dawk l-investimenti fil-fatt huma għajnuna, l-għajnuna tkun kompatibbli mas-suq intern skont l-Artikolu 107(3)(c) TFUE, peress li tissodisfa kull waħda mill-prekundizzjonijiet stipulati fil-paragrafu 61 tal-Linji Gwida dwar l-Avjazzjoni.

(80)

Fl-aħħar, il-Ġermanja hija tal-fehma li l-miżura ma theddidx li tgħawweġ u lanqas ma tgħawweġ il-kompetizzjoni fis-suq intern, peress li l-infrastruttura hija miftuħa għall-utenti kollha b'mod mhux diskriminatorju. Tiddikjara li l-ajruport jilqa' fih inqas minn 150 000 passiġġier fis-sena, li, bħala ajruport tal-kategorija D skont it-tifsira tal-Linji Gwida tal-2005 dwar l-Avjazzjoni, ma kienx f'kompetizzjoni ma' ajruporti oħrajn, li l-kompetizzjoni bejn l-AOC u ajruporti oħrajn fi Dresden, Erfurt-Weimar u Hof kienet negliġibbli u li, peress li l-AOC kellu biss 0,1 % tat-traffiku kollu fl-ajruporti Ġermaniżi fl-ADV (58), dan ma jikkompetix ma' ajruporti Ewropej. Il-Ġermanja tiddikjara li dan ifisser li l-kompetizzjoni fis-suq intern mhijiex mgħawġa u li l-kummerċ bejn l-Istati Membri mhuwiex affettwat. Fuq dan il-punt, il-Ġermanja tiddikjara wkoll li l-AOC fih biss 2 % tal-unitajiet tat-traffiku li jara l-Ajruport Leipzig/Halle, pereżempju.

(81)

Meta jsir ovvju li x-xenarju previst fl-2007 ma kienx sejjer iseħħ, l-ajruport talab lill-kumpanija ta' konsulenza KE-Consult sabiex tħejji studju dwar l-AOC u ż-żona industrijali fl-inħawi. L-istudju ġie sottomess fl-2010. L-istudju kkonkluda li espansjoni ulterjuri tal-ajruport bħala destinazzjoni tal-linja tal-ajru low-cost ma kinitx ekonomikament vijabbli. Huwa rakkomandat li l-ajruport jerġa' jiffoka fuq is-settur tal-avjazzjoni ġenerali. Għal din ir-raġuni, il-bord tad-diretturi ta' Flugplatz Altenburg-Nobitz GmbH ippreżenta pjan ta' żvilupp ġdid għall-ajruport f'Settembru 2011, li ġie approvat mill-bord superviżorju u l-azzjonisti. L-AOC mhuwiex sejjer jintuża għal linji tal-ajru low-cost jew għan-negozju tal-avjazzjoni kummerċjali u dan l-iżvilupp kummerċjali l-ġdid għandu jippermetti sabiex l-ajruport ikun jista' jiġġenera profitt sal-2015.

(82)

L-istudju ta' KE-Consult jagħraf li l-azzjonisti ta' Flugplatz Altenburg-Nobitz GmbH jissussidjaw lill-kumpanija b'mod konsistenti. Minħabba l-ħtieġa dejjem ikbar ta' sussidji, l-azzjonisti kienu laħqu l-limitu tal-effiċjenza ekonomika.

(83)

L-istudju ta' KE-Consult sar sabiex jiġu investigati l-prospettivi ta' żvilupp potenzjali tal-AOC fuq il-bażi tal-effetti reġjonali, politiċi, ekonomiċi u fiskali tal-ajruport. B'hekk, tħejjew bosta xenarji għall-għeluq ta', ebda bidla fi jew l-espansjoni tat-traffiku tal-ajru b'linji tal-ajru low-cost u għall-iżvilupp taż-żona industrijali madwar l-ajruport.

(84)

Fix-xenarju tas-“settur tal-avjazzjoni ġenerali” biss, li jinkludi l-waqfien tat-traffiku low-cost fl-AOC, l-ajruport seta' jikseb bilanċ finanzjarju u fiskali tajjeb. Huwa l-uniku xenarju li fih l-ajruport jeħtieġ biss l-injezzjoni ta' kapital obbligatorja addizzjonali annwali ta' EUR 227 000 għal kull azzjonist, iżda ebda pagament ieħor. F'dan ix-xenarju, l-ajruport jiġġenera benefiċċju ekonomiku ġenerali. Dan ix-xenarju jkun jiswa lill-azzjonisti EUR 0,83 miljun sal-2015, li jista' jkun kopert bl-injezzjoni ta' kapital obbligatorja ta' EUR 227 000 fis-sena. Ma jkun hemm bżonn ta' ebda sussidju ieħor mingħand l-azzjonisti wara l-2015, diment li d-deprezzament ikompli jonqos. Din l-effiċjenza ekonomika reġjonali hija ferm ogħla minn kwalunkwe xenarju ieħor. Anki l-bilanċ fiskali huwa pożittiv għal Thüringen u l-muniċipalitajiet tagħha fl-2015.

(85)

L-ebda wieħed mix-xenarji l-oħrajn li fihom jinżamm jew jiġi estiż it-traffiku tal-ajru low-cost ma huwa awtosuffiċjenti finanzjarjament bl-injezzjonijiet ta' kapital obbligatorji mill-azzjonisti waħedhom. L-impatt fiskali fuq Thüringen huwa ta' bejn EUR 115 000 u EUR 375 000, skont ix-xenarju. Fix-xenarji kollha li involvew linji tal-ajru low-cost, l-effett baġitarju pożittiv iġġenerat mill-AOC u l-muniċipalitajiet huwa inqas mill-injezzjonijiet ta' kapital u l-għotjiet meħtieġa mill-ajruport. Għalhekk, il-proporzjon tad-dħul u n-nefqa huwa negattiv.

(86)

L-effetti ekonomiċi nazzjonali addizzjonali tat-traffiku tal-ajru low-cost jistgħu jinkisbu biss b'investimenti ta' bejn EUR 6,7 u 10 miljun, minbarra l-injezzjonijiet ta' kapital obbligatorji mill-azzjonisti. L-effiċjenza ekonomika reġjonali tax-xenarji b'linji tal-ajru low-cost hija inqas mix-xenarju tal-avjazzjoni ġenerali. Meta mqabblin max-xenarju tal-“avjazzjoni ġenerali”, l-għotjiet meħtieġa għax-xenarji tal-linji tal-ajru low-cost huma 11 sa 15-il darba ogħla, iżda l-effetti ta' valur miżjud huma darbtejn sa tliet darbiet ogħla biss. Filwaqt li l-proporzjon fiskali ta' dħul għan-nefqa huwa pożittiv fix-xenarju tal-“avjazzjoni ġenerali”, huwa negattiv fix-xenarji kollha tal-linji tal-ajru low-cost.

(87)

Barra minn hekk, ġew ikkunsidrati bosta kundizzjonijiet bażiċi wkoll:

(88)

Għalhekk, l-istudju ta' KE-Consult jikkonkludi li ż-żamma jew l-espansjoni tat-traffiku tal-ajru low-cost fl-AOC ma jistax jiġi rakkomandat lill-azzjonisti u lill-Land ta' Thüringen.

(89)

Ir-rapporti finanzjarji ta' Flugplatz Altenburg-Nobitz GmbH jispjegaw li l-ajruport ma jistax jissalvagwardja operazzjonijiet mingħajr għotjiet pubbliċi li jkopru t-telf. Il-kumpanija waqqfet sistema li biha tħejjew pjanijiet ta' direzzjoni tan-negozju ta' kull sena għas-sena li ġejja, approvati mil-laqgħa ġenerali tal-azzjonisti u mbagħad aġġornata matul is-sena finanzjarja inkwistjoni bir-riżultati propji tal-ajruport (59). Fi kliem ieħor, din is-sistema ppermettiet sabiex l-ajruport iżomm l-għotjiet pubbliċi meħtieġa biex ikopri t-telf li kien għamel sa dak iż-żmien.

(90)

Il-Ġermanja tispjega li t-telf irrapportat mill-bidu tas-snin elfejn, li rriżulta f'injezzjonijiet ta' kapital mill-azzjonisti, ma kinux ikkawżati biss minn investimenti infrastrutturali. Id-deprezzament ma jispjegax bis-sħiħ it-telf, u lanqas il-kostijiet ta' finanzjament, peress li l-ajruport ma kien ħa ebda self. Il-kostijiet tad-deprezzament kienu jinvolvu biss parti mit-telf annwali ta' Flugplatz Altenburg-Nobitz GmbH u l-Ġermanja ma torbothomx direttament ma' Ryanair.

(91)

Il-Ġermanja tiċħad l-allegazzjonijiet kollha li għamel l-ilmentatur u ċċitati fid-deċiżjoni li biha fetħet il-proċedura. Skont il-Ġermanja, l-ilmentatur naqas milli jqis il-metodu “single till” applikat fl- (60) AOC. Il-Ġermanja tispjega li d-dħul mhux marbut mal-avjazzjoni fl-2009 kien l-istess bħad-dħul mis-settur tal-avjazzjoni. F'dak ir-rigward, il-Ġermanja tiċħad l-allegazzjoni li n-numru dejjem ikbar ta' passiġġieri kien jinvolvi telf dejjem ikbar għal Flugplatz Altenburg-Nobitz GmbH minħabba l-pagamenti sigrieti lil Ryanair. Il-Ġermanja tispjega li kien hemm bosta raġunijiet għat-telf imġarrab, li xejn ma kellhom x'jaqsmu ma' Ryanair.

(92)

B'mod partikolari, il-Ġermanja tiċħad l-allegazzjoni li s-servizz ta' Ryanair mill-AOC għal Londra (Stansted) kien f'kompetizzjoni diretta mas-servizz ta' Air Berlin minn Leipzig/Halle lejn Londra (Stansted) u li din kienet ir-raġuni għaliex Air Berlin waqqfet is-servizz minn Leipzig/Halle lejn Londra (Stansted). Il-Ġermanja tisħaq li Air Berlin waqqfet is-servizz lejn Londra (Stansted) għaliex Leipzig/Halle waqaf jissussidja lil Air Berlin u ddaħħlet projbizzjoni fuq titjiriet billejl.

(93)

Il-Ġermanja hija tal-fehma li l-injezzjonijiet annwali ta' kapital mill-azzjonisti fi Flugplatz Altenburg-Nobitz GmbH ma jikkwalifikawx bħala għajnuna mill-Istat, peress li r-rekwiżiti tal-prinċipju ta' investitur privat f'ekonomija tas-suq, li skont dawn irid jingħata kont lill-vantaġġi ekonomiċi mogħtijin lid-distrett rurali ta' Altenburger Land, jiġifieri l-azzjonist ewlieni, ġew issodisfati (61). Il-Ġermanja tirreferi għal studju li sar fl-2007 mill-Prof. Dr Klophaus (62) intitolat “L-importanza ekonomika reġjonali u l-prospettivi tal-Ajruport ta' Altenburg-Nobitz” (minn hawn 'il quddiem imsejjaħ “l-istudju ta' Klophaus”), li jsemmi l-“għotjiet li marru ħażin” tad-distrett rurali ta' Altenburger Land, u josserva li l-pagamenti mill-azzjonisti kellhom impatt ekonomiku pożittiv fuq id-distrett rurali ta' Altenburger Land minħabba pagamenti addizzjonali tat-taxxa, li d-dħul pubbliku fl-2006 mill-operazzjoni tal-AOC laħaq total ta' EUR 7,9 miljun, li EUR 1 miljun minnhom dovuti primarjament lid-distrett rurali ta' Altenburger Land u li din is-somma kienet sejra tittrippla sal-2015 jekk in-numri annwali tal-passiġġieri jiżdiedu għal 500 000. Peress li r-redditu mill-pagamenti tat-taxxa huwa ogħla mill-pagamenti annwali tal-azzjonisti, il-Ġermanja tikkonkludi li d-distrett rurali ta' Altenburger Land qiegħed jaġixxi bl-istess mod bħal investitur privat.

(94)

Bħala tweġiba għall-argumetn li, minflok ma l-azzjonisti jinjettaw kapital addizzjonali, forsi l-ajruport għandu jingħalaq, il-Ġermanja tikkonferma li d-distrett rurali ta' Altenburger Land kien qiegħed jaġixxi bl-istess mod kif kien jagħmel investitur privat peress li, kieku jingħalaq l-ajruport, l-operatur tal-ajruport kien ikollu jħallas lura madwar EUR 7 miljun lil-Land ta' Thüringen, peress li l-użu tal-infrastruttura jkun twaqqaf b'mod prematur. Bil-prevenzjoni ta' dik ir-rifużjoni, l-azzjonisti mill-ġdid kienu qegħdin jaġixxu bl-istess mod kif kien jagħmel investitur privat.

(95)

L-istudju ta' Klophaus tal-2007 joħroġ bil-konklużjonijiet li ġejjin. L-istudju jispjega li l-AOC għandu effetti diretti, indiretti u indotti pożittivi u konsiderevoli u effett katalitiku fuq l-ekonomija u l-attraenza tar-reġjun, speċjalment f'termini tal-impjiegi. Skont l-istudju, l-AOC għad għandu prospettivi pożittivi, peress li għandu l-potenzjal li jsir il-bażi ta' Ryanair għall-Ġermanja Ċentrali, xi ħaġa li kienet tikkoinċidi mal-isforzi li kienu qegħdin isiru minn Flugplatz Altenburg-Nobitz GmbH. B'hekk, b'bosta inġenji tal-ajru ta' Ryanair stazzjonati fl-AOC, huwa possibbli li jiżdiedu n-numri ta' passiġġieri sa miljun fis-sena fit-terminu medju. Dan jippermetti lil AOC sabiex isir ajruport reġjonali u jagħti lil Altenburger Land possibbiltà li jibdel il-profil internazzjonali tiegħu u b'hekk li jtejjeb l-istruttura ekonomika u kummerċjali tiegħu. L-istudju jispjega li, bħala ajruport tal-linja tal-ajru low-cost, l-AOC sejjer jiġġenera benefiċċju ekonomiku ġenerali sinifikanti.

(96)

Skont il-kalkoli li saru fl-istudju, l-AOC jista' jkun mistenni li jipprovdi 658 impjieg fl-2015 (żieda ta' 95,3 % meta mqabbel mal-2006), kif ukoll 881 impjieg indirett ieħor (żieda ta' 157,6 %) u 438 impjieg indott (żieda ta' 184,4 %). L-istudju jixħet dawl ukoll fuq l-importanza tal-aċċessibilità nazzjonali u internazzjonali tar-reġjuni li għandhom impatt qawwi fuq l-iżvilupp ekonomiku fir-reġjun ikkonċernat.

(97)

Skont l-istudju fuq dan il-punt, kemm l-għotjiet pubbliċi għar-rinnovament u l-espansjoni tal-AOC kif ukoll il-kostijiet tal-kummerċjalizzazzjoni u d-dħul mit-taxxa relatati għal-Land ta' Thüringen u l-muniċipalitajiet tiegħu għandhom ikunu inklużi fil-kalkoli. L-istudju jikkonkludi billi jiddikjara li għandha tingħata kunsiderazzjoni kemm lill-aspetti finanzjarji kif ukoll lill-effetti ekonomiċi ġenerali.

(98)

Il-Ġermanja tiddikjara li la t-tariffi tal-ajruport u lanqas il-kuntratti ta' kummerċjalizzazzjoni ma jikkostitwixxu għajnuna mill-Istat. Il-Ġermanja tisħaq li l-kuntratti tas-servizzi tal-ajruport u l-kuntratti tas-servizzi ta' kummerċjalizzazzjoni mhumiex relatati ma' xulxin u għandhom jiġu vvalutati b'mod separat. Il-kuntratti tas-servizzi ta' kummerċjalizzazzjoni jipprovdu għall-forniment ta' servizzi ta' reklamar u ma jinvolvux xi tnaqqis fid-dħul tal-ajruport.

(99)

Il-Ġermanja tispjega li l-ajruport qies l-aspettattivi ekonomiċi pożittivi miż-żieda fit-traffiku tal-ajru li xkattat Ryanair. Fir-riżoluzzjoni tagħha sabiex tidħol fin-negozju mal-linja tal-ajru, il-laqgħa ġenerali tal-azzjonisti li saret fit-22 ta' April 2003 ħadet f'kunsiderazzjoni d-dejta ppreżentata fit-Tabella 13 (63) u kkonkludiet li, anki fix-xenarju konservattiv ta' titjira waħda kuljum b'fattur ta' tagħbija ta' 70 %, jista' jiġi ġġenerat profitt annwali ta' […]* minn Ryanair.

Tabella 13

Id-dħul antiċipat mill-attivitajiet ta' Ryanair fl-AOC  (64) (2003)

(100)

In-nefqa fix-xahar mogħtija fit-Tabella 13 tinkludi l-kostijiet tal-persunal, is-servizzi ta' tneħħija tas-silġ u tneħħija tal-borra mir-runway. Il-Kummissjoni ssib li d-dokument imressaq fil-laqgħa ġenerali tal-azzjonisti li saret fit-22 ta' April 2003 jikkwota investimenti annwali totali ta' EUR 902 155. Dik is-somma mhijiex inkluża fil-previżjonijiet ippreżentati fit-Tabella 13.

(101)

Il-Ġermanja tispjega li, fuq il-bażi tar-regolament dwar it-tariffi tal-ajruport fis-seħħ dak iż-żmien, Ryanair kienet qiegħda tħallas tariffa tal-illandjar ta' […]* għal kull inġenju tal-ajru u tariffa tal-passiġġieri ta' […]* għal kull passiġġier (66). Dawn it-tariffi japplikaw għal-linji tal-ajru potenzjali kollha u, fid-dawl tat-traffiku u d-dħul iġġenerati għall-AOC minn Ryanair, Flugplatz Altenburg-Nobitz GmbH qisithom xierqa.

(102)

Il-Ġermanja tispjega li s-servizzi li kellhom jiġu pprovduti skont l-Anness A għall-kuntratt konkluż ma' Ryanair fit-3 ta' Marzu 2003 ma ġewx ipprovduti. Is-servizzi li jinsabu fl-Anness B u fl-appendiċi għall-Anness B (“sistema ta' prenotazzjoni”) ġew ipprovduti mingħajr ma ntalab ħlas żejjed mingħand Ryanair.

(103)

Il-Ġermanja tispjega li Ryanair ħallset lill-AOC total ta' EUR […]* għas-servizzi tal-ajruport mill-2003 sal-2011 skont il-kuntratt tas-servizzi tal-ajruport tat-3 ta' Marzu 2003 skont ir-regolament dwar it-tariffi standard tal-ajruport. L-AOC ħallas lil Ryanar total ta' EUR […]* għas-servizzi ta' kummerċjalizzazzjoni bejn l-2003 u l-2011, skont il-kuntratt ta' kummerċjalizzazzjoni tas-7 ta' April 2003. Id-differenza bejn iż-żewġ pagamenti rriżultat f'pagament nett mingħand Ryanair lil AOC ta' EUR […]* tul il-perjodu sħiħ ta' bejn l-2003 u l-2011. Peress li n-numru totali ta' passiġġieri tul dak il-perjodu kien ta' 408 291 (67), il-Ġermanja tikkonkludi li Ryanair ħallset lill-AOC imposta netta ta' madwar EUR […]* għal kull passiġġier tielaq.

Tabella 14

Il-fatturi mingħand u lil Ryanair 2003-2011  (68)

(104)

Il-Ġermanja tispjega li l-operatur tal-ajruport ma ħallas ebda kontribuzzjoni oħra għall-kummerċjalizzazzjoni fi Frar u Marzu 2011 wara li Ryanair ħabbret li kien biħsiebha twaqqaf ir-rotot mill-AOC f'Marzu 2011.

(105)

Il-Ġermanja tispjega li l-pagamenti għall-kummerċjalizzazzjoni skont il-kuntratt bejn Flugplatz Altenburg-Nobitz GmbH u Ryanair datat il-21 ta' Settembru 2010 saru minn impriżi privati, wara li qablu fuq iż-żamma tal-operazzjonijiet ta' Ryanair fl-AOC. Kif spjegat f'rapport tal-2011 mill-maniġment tal-kumpanija (69), l-istaġun tal-avjazzjoni tax-xitwa tal-2010/2011, li matulu saret titjira waħda biss lejn Londra, kien possibbli biss bl-appoġġ tal-impriżi reġjonali.

(106)

Il-Ġermanja targumenta li Ryanair irreklamat lill-AOC u r-reġjun fuq is-sit web tagħha. Dak is-sit web huwa t-tieni l-iktar sit web Ewropew popolari wara Google u, għalhekk, iġib ċertu prezz. Kelma tar-riklami waħda fuq Google tiswa bejn EUR 0,05 u EUR 2,00 għal kull klikk. Skont il-kalkoli tal-Ġermanja, bejn 100 000 u 150 000 passiġġier ta' Ryanair fis-sena jiġġeneraw rati ta' reklamar ta' bejn EUR 100 000 u EUR 150 000 fis-sena għall-AOC bi prezz tal-kelma tar-riklami ta' EUR 1,00 għal kull klikk, jekk jiġi supponut li kull passiġġier jikklikkja darba. Peress li l-passiġġieri ġeneralment jikklikkjaw iktar minn darba u peress li ċerti passiġġieri jikklikkjaw mingħajr ma jagħmlu prenotazzjoni, il-Ġermanja tikkonkludi li l-kuntratt ta' kummerċjalizzazzjoni konkluż bejn Flugplatz Altenburg-Nobitz GmbH u Ryanair huwa bbażat fuq prezz raġonevoli li minnu Ryanair ma tikseb ebda vantaġġ.

(107)

Skont il-Ġermanja, Ryanair iffinanzjat il-miżuri elenkati fit-Tabella 15.

Tabella 15

It-tariffi tal-kummerċjalizzazzjoni pagabbli mill-AOC lil Ryanair

(108)

Il-Ġermanja tiddikjara li Ryanair ma kisbet ebda vantaġġ mit-tariffa ta' suċċess, peress li kienet pagament ibbażat fuq is-suq għall-attivitajiet ta' kummerċjalizzazzjoni mwettqa minn Ryanair. Skont il-Ġermanja, il-miżuri ta' kummerċjalizzazzjoni kienu suċċess, peress li n-numru ta' passiġġieri żdiedu minn 25 000 (2012) għal 140 000 (2009), li min-naħa tagħhom wasslu sabiex id-dħul ġenerali żdied minn EUR 316 000 għal EUR 1,12 miljun. Id-dħul mit-tariffi tal-ajruport żdied minn EUR 132 000 għal EUR 530 000 u d-dħul mill-imposti tal-parkeġġ żdied minn żero għal EUR 263 000.

(109)

Il-Ġermanja tiddikjara li l-pagamenti li saru skont il-kuntratti tas-servizzi tal-kummerċjalizzazzjoni ma jikkostitwixxux għajnuna mill-Istat għar-raġunijiet li ġejjin:

(110)

Ryanair targumenta li l-għajnuna mill-Istat lill-ajruporti ma għandhiex tiġi imputata lil Ryanair, li l-presuppożizzjoni li l-għajnuna mill-Istat hija ttrasferita lil-linji tal-ajru permezz tal-ajruporti tikser il-liġi tal-UE u li t-tali presuppożizzjoni tiddiskrimina kontra l-ajruporti tal-Istat, għad li r-regoli dwar il-kompetizzjoni għandhom jiġu applikati b'mod indiskriminat għal impriżi pubbliċi u privati. Ryanair tiddikjara li l-evidenza użata mill-Kummissjoni sabiex tintwera l-imputabbiltà lill-Istat mhijiex biżżejjed u li, għad li l-evidenza forsi tirrifletti l-interess tal-awtoritajiet fir-relazzjonijiet kummerċjali u l-ġejjieni tal-ajruport, ma turi ebda parteċipazzjoni vera ta' xi awtorità pubblika fin-negozjati u l-kuntratti bejn l-ajruport u Ryanair. Li l-ministeri tal-Land ta' Thüringen ċaħdu l-kuntratti ma' Ryanair jindika li, tal-inqas, il-Kummissjoni għandha teżamina bir-reqqa l-imputabbiltà tal-kuntratti ta' Ryanair lill-Istat.

(111)

Ryanair targumenta li l-kwistjoni mhijiex jekk l-Istat missux investa flusu xi mkien ieħor; hija jekk l-Istat tax lil linja tal-ajru vantaġġ li kieku ma kinitx tikseb. Ryanair tiddikjara li kulma għamlet hu li nnegozjat il-patti u l-kundizzjonijiet ma' ajruporti tal-Istat li kienu simili għal dawk li kienet tikseb mingħand ajruporti privati komparabbli.

(112)

Ryanair targumenta li ma kinitx ibbenefikat b'mod indirett mill-għajnuna mill-Istat u li, diment li l-patti ta' relazzjoni kummerċjali bejn Ryanair u ajruport iridu jkunu ġġustifikati fid-dawl tal-prinċipju ta' investitur privat f'ekonomija tas-suq, ir-responsabbiltà għar-ripagament ma tistax tkun estiża għal Ryanair. Ryanair targumenta li l-prinċipju ta' investitur privat f'ekonomija tas-suq dejjem irid ikun japplika għal kwalunkwe għajnuna mill-Istat allegatament mogħtija lil Ryanair permezz ta' ajruporti tal-Istat. Skont il-linja tal-ajru, fil-fatt ma hemm ebda ġustifikazzjoni ekonomika jew legali għall-esklużjoni tal-ajruporti tal-Istat mill-prinċipju ta' investitur privat f'ekonomija tas-suq, il-Kummissjoni applikat il-prinċipju ta' investitur privat f'ekonomija tas-suq għal kuntratti li kienu jinvolvu l-finanzjament ta' proġetti infrastrutturali pubbliċi kbar għal mezzi oħrajn tat-trasport, bħal portijiet tal-Istat u, meta daħal fil-ftehimiet, l-ajruport kien qiegħed jeżerċita funzjoni ekonomika. Tiddikjara wkoll li l-ajruporti tal-istat u privati jikkompetu ma' xulxin fis-swieq u li l-kuntratti bejn il-linji tal-ajru u l-ajruporti jistgħu jġibu l-profitt għall-ajruporti.

(113)

Ryanair tqis li valutazzjoni tal-effiċjenza għandha tinjora l-injezzjonijiet ta' kapital għal investimenti fis-settur tas-servizzi pubbliċi, li l-kostijiet inkrementali u mhux il-kostijiet li marru ħażin għandhom ikunu inklżi fil-valutazzjoni u, finalment, li l-analiżi għandha tkun ibbażata fuq il-valur ta' referenza ta' ajruport tipiku mmexxi kif suppost. Ryanair targumenta li, jekk ajruport reġjonali jemmen li kuntratt sejjer jgħin sabiex titjieb l-effiċjenza tiegħu, tranżazzjoni tista' tħalli l-profitt anki jekk ikun jidher li jkun fiha prezzijiet inqas mill-kostijiet meta jiġi ffirat il-kuntratt u li wieħed jista' jistenna li ajruporti ineffiċjenti li joperaw b'kapaċità mhux sħiħa jagħmlu l-profitt biss jekk jiksbu ekonomiji ta' skala u effetti tan-netwerk estern, li jistgħu jieħdu 25 sa 30 sena. Tiddikjara li l-linji tal-ajru low-cost huma f'post ideali sabiex jiġġeneraw żidiet sinifikanti fid-dħul għall-ajruporti reġjonali, li għalihom normalment ma jkunux meħtieġa investimenti infrastrutturali jew oħrajn ġodda. B'xhieda ta' dan, Ryanair issemmi d-deċiżjoni adottata mill-Awtorità tal-Avjazzjoni Ċivili tar-Renju Unit fis-27 ta' Mejju 2011, li tirrikonoxxi l-użu orħos tas-servizzi tal-ajruport minn linji tal-ajru low-cost.

(114)

Ryanair targumenta li, meta jiġi applikat il-prinċipju ta' investitur privat f'ekonomija tas-suq, il-kostijiet li ma jmorrux tajjeb iridu jiġu injorati kemm f'analiżi komparattiva kif ukoll f'analiżi tal-kostijiet. Ryanair tiddikjara li investitur privat li jopera l-AOC mill-1992 kien ikollu jirrapporta kemm il-kostijiet infrastrutturali kif ukoll il-kostijiet operatorji fissi tal-ajruport bħala kostijiet li ma jmorrux tajjeb u li, minħabba l-attraenza ekonomika dgħajfa u s-saħħa fis-suq ferm limitata tal-AOC, ma kien hemm ebda possibbiltà realistika li jiġu rkuprati t-tali kostijiet. B'hekk, l-aċċettazzjoni ta' kwalunkwe xenarju alternattiv li joffri prospettivi aħjar jew sempliċiment inqas onerużi għas-sid(ien) tal-ajruport mix-xenarju kontrafattwali li fih ma jsir xejn jew li jingħalaq l-ajruport b'kost li jista' jitqies konsiderevoli, kienet iżżomm bis-sħiħ mal-prinċipju ta' investitur privat f'ekonomija tas-suq.

(115)

Ryanair tisħaq ukoll li l-kostijiet speċifiċi li jappartjenu għal Ryanair għandhom jiġu kkunsidrati b'mod separat mill-kostijiet imġarrbin għall-ajruport, iżda li setgħu kienu inqas mir-rikavat iġġenerat mill-effetti tan-netwerks esterni pożittivi li ġabu magħhom l-attivitajiet ta' Ryanair fl-ajruport.

(116)

Ryanair tispjega li l-ftehim fuq it-tariffi mal-AOC jissodisfa r-rekwiżiti tal-prinċipju ta' investitur privat f'ekonomija tas-suq u, sabiex turi dan, tipprovdi lill-Kummissjoni b'żewġ rapporti mħejjin minn kumpanija ta' konsulenza. Dawk l-istudji jqabblu l-kuntratt inkwistjoni ma' ftehimiet oħrajn fuq it-tariffi bejn Ryanair u ajruporti li jew kellhom maġġoranza ta' azzjonisti privati u huma ffinanzjati privatament jew li nkella jaġixxu f'pożizzjoni simili biżżejjed għal dik tal-AOC bħala investituri privati f'ekonomija tas-suq.

(117)

Ryanair tispjega l-metodi użati fir-rapporti sabiex tqabbel l-ajruporti kif ġej: l-investigazzjoni kienet ibbażata biss fuq kuntratti oħrajn ta' Ryanair, peress li Ryanair għandha mudell kummerċjali differenti minn ħafna mil-linji tal-ajru l-oħrajn (ebda pontijiet tal-imbark għall-passiġġieri, karozzi tal-linja jew swali għall-passiġġieri, ebda titjiriet ta' konnessjoni, ħin fuq l-art ta' 20 minuta u maġġoranza ta' bagalji tal-idejn). Barra minn hekk, l-istudji jinkludu biss ajruporti operati skont l-prinċipju ta' investitur privat razzjonali f'ekonomija tas-suq. L-ajruporti li setgħu rċevew appoġġ konsiderevoli fil-forma ta' għajnuna mill-Istat ġew esklużi. Madwar ħmistax-il ajruport fin-netwerk ta' Ryanair jissodisfaw dawk il-kriterji u ġew inklużi fl-istudju.

(118)

L-ewwel rapport iqis lil […]* bħala l-iktar ajruport komparatur xieraq. Ir-rapport jiddikjara li “idealment, l-ajruport komparatur li jingħażel għall-finijiet tal-analiżi jkun ta' qies simili bħall-Ajruport ta' Altenburg. Għad li ma kienx possibbli li jinstab ajruport komparatur li huwa simili ħafna għall-Ajruport ta' Altenburg fuq id-dimensjonijiet relevanti kollha, l-Ajruport […]* huwa simili biżżejjed għall-finijiet tal-analiżi ppreżentata hawnhekk”. It-tieni rapport jestendi l-ajruporti komparaturi għal […]* u jqabbel l-imposti mħallsin lil dawk l-ajruporti bejn l-2003/2004 u l-2010/2011 kemm għal kull passiġġier kif ukoll għal kull inġenju tal-ajru mmaniġġjat.

(119)

Ir-rapporti jikkonkludu li l-imposta totali mħallsa minn Ryanair lill-AOC kienet bħala medja ikbar minn jew daqs it-tariffa komparabbli mħallsa mil-linja tal-ajru lill-ajruporti komparaturi matul il-perjodu investigat u li dan jissuġġerixxi li l-imposti mħallsin minn Ryanair lill-AOC skont il-bosta kuntratti kienu simili fl-ammont għat-tariffa li Ryanair kienet tiġi offruta f'ċirkustanzi simili minn investitur privat f'ekonomija tas-suq li kien sid ajruport.

(120)

Ryanair tiddikjara li kwalunkwe valutazzjoni tat-tariffi tal-ajruport għandha tkun ibbażata fuq il-kostijiet mariġinali u mhux fuq il-kostijiet varjabbli medji jew il-kostijiet ġenerali medji.

(121)

Ryanair tisħaq li l-kuntratti tal-AOC ma' Ryanair u AMS għandhom jiġu vvalutati separati minn xulxin, li ż-żewġ kumpaniji ma jistgħux jitqiesu bħala benefiċjarju wieħed tal-għajnuna mill-Istat allegata u li l-kuntratti kienu kuntratti separati li ġew innegozjati b'mod indipendenti minn xulxin, kienu jikkonċernaw servizzi differenti u ma kinux interkonnessi tant li jiġġustifikaw il-kunsiderazzjoni tagħhom bħala sors wieħed tal-allegata għajnuna. Skont Ryanair, il-konklużjoni ta' kuntratt ta' kummerċjalizzazzjoni ma' AMS ma kinitx prerekwiżit għall-operat ta' rotot ta' Ryanair lejn u minn ajruport u, fuq il-bażi tal-perċezzjoni tagħha stess tar-rekwiżiti ta' kummerċjalizzazzjoni tagħhom, ħafna ajrporti servuti minn Ryanair ma kkonkludewx kuntratti ma' AMS. Ryanair tisħaq li x-xiri ta' servizzi ta' kummerċjalizzazzjoni bil-prezzijiet tas-suq għandu jiġi kkunsidrat b'mod separat minn kwalunkwe ftehim kuntrattwali relatat bejn l-ajruport u l-linja tal-ajru.

(122)

Ryanair tispjega wkoll li ma hemm xejn x'jissuġġerixxi li linja tal-ajru li ggarantiet it-tali numri f'termini ta' passiġġieri u/jew groundhandling ta' inġenji tal-ajru ma tkunx kisbet ukoll “imposti orħos” u li l-Kummissjoni kienet naqset milli tindirizza l-kwistjoni ta' jekk linja tal-ajru li kienet offriet it-tali garanzija kinitx tikseb imposti simili minn ajruport privat komparabbli.

(123)

F'dak li għandu x'jaqsam mal-valur tal-kummerċjalizzazzjoni, Ryanair tiddikjara li l-ispazju tar-reklamar fuq is-sit web ta' Ryanair huwa limitat u għandu domanda kbira, inkluż mingħand kumpaniji li mhumiex ajruporti, li bħalissa s-sit web kien qiegħed jirreġistra madwar 4.5 biljun żjara fis-sena u li anki l-linji tal-ajru tradizzjonali kienu jafu bil-valur tas-siti web tagħhom għal finijiet ta' kummerċjalizzazzjoni u reklamar. Min-naħa l-oħra, ħafna ajruporti kienu qegħdin jagħmlu l-għażla finanzjarjament sensibbli li jużaw l-ispazju tar-reklamar fuq ryanair.com jew fuq is-siti web l-oħrajn ta' linji tal-ajru oħrajn sabiex jistabbilixxu isimhom u rnexxielhom japprofittaw minn dan l-għarfien ikbar ta' isimhom b'mod komplimentari li jinvolvi appoġġ reċiproku. Skont Ryanair, l-Ajruport ta' Altenburg huwa ferm inqas magħruf f'livell internazzjonali mill-Aéroports de Paris jew Heathrow Airport u, għalhekk, kellu bżonn jinvesti fir-reklamar sabiex iżid is-saħħa tal-isem u s-sehem tiegħu ta' passiġġieri ġejjin.

(124)

Ryanair issottomettiet analiżi mill-kumpanija ta' konsulenza li qabblet il-prezz mitlub minn AMS għas-servizzi ta' kummerċjalizzazzjoni fuq il-web mal-prezzijiet mitlubin minn siti web oħrajn tal-ivvjaġġar għal servizzi simili. L-analiżi tqabbel il-prezzijiet li talbet AMS fl-ewwel lista ta' prezzijiet (2005) mal-prezzijiet ta' referenza ta' servizzi simili pprovduti fiż-żmien inkwistjoni mis-siti web tal-ivvjaġġar. Il-prezzijiet mitlubin skont il-lista attwali (2013) tal-prezzijiet ta' AMS huma mqabblin mal-prezzijiet ta' servizzi simili pprovduti minn siti web oħrajn marbutin mal-ivvjaġġar ukoll. L-analiżi tikkonkludi li l-prezzijiet mitlubin minn AMS għar-reklamar fuq ryanair.com kienu jew inqas mill-medja jew fil-medda medjana tal-prezzijiet mitlubin minn siti web fil-grupp komparatur fil-listi ta' prezzijiet. Skont Ryanair, din il-konklużjoni tikkonferma li l-ftehimiet bejn l-ajruporti pubbliċi u AMS jgħaddu mit-test ta' investitur privat f'ekonomija tas-suq.

(125)

Ryanair issottomettiet ukoll skritratti li juru li s-servizzi pprovduti minn AMS skont il-kuntratti kienu ssorveljati bi prova tas-servizzi pprovduti. Dawn l-iskritratti ġeneralment għaddew lill-ajruport li jkun ikkonkluda kuntratt ma' AMS, bħala prova ta' attivazzjoni tas-servizzi miksubin fuq ryanair.com. Ryanair tixħet dawl fuq il-valur tas-servizzi pprovduti lill-ajruporti minn AMS u hija tal-fehma li l-benefiċċji miksubin mill-ajruporti minn kuntratti konklużi ma' AMS jistgħu jiġu kkwantifikati b'mod affidabbli.

(126)

Minkejja l-pożizzjoni ta' Ryanair li l-kuntratt ta' AMS u l-kuntratt tas-servizzi tal-ajruport għandhom jiġu indirizzati b'mod separat, Ryanair kienet issottomettiet analiżi tal-profittabilità minn kumpanija ta' konsulenza fuq il-bażi tal-prinċipju ta' investitur privat f'ekonomija tas-suq li tinkludi kemm il-kuntratt konkluż bejn Ryanair u l-ajruport kif ukoll il-kuntratti ta' kummerċjalizzazzjoni konklużi bejn AMS u l-ajruport. Skont Ryanair, billi tqis l-inklużjoni possibbli ta' AMS f'analiżi konġunta tal-profittabilità tal-kuntratti ta' AMS u l-kuntratt ta' servizzi tal-ajruport, din l-analiżi għandha tgħin lill-Kummissjoni fl-approċċ konġunt tagħha għall-kuntratt tas-servizzi tal-ajruport u l-kuntratti ta' AMS.

(127)

Il-kumpanija ta' konsulenza tikkonkludi li l-metodu tal-fluss tal-flus huwa metodu xieraq għall-inklużjoni tal-valur ta' AMS f'analiżi konġunta tal-profittabilità tal-kuntratti ta' AMS u l-kuntratt tas-servizzi tal-ajruport, peress li dak il-metodu jkun ikopri kemm il-profitti inkrementali dovuti lill-ajruport mill-kuntratt tas-servizzi tal-ajruport kif ukoll il-benefiċċji taar-reklamar skont il-kuntratt ma' AMS. Dak il-metodu jippermetti li l-pagamenti li jsiru mill-ajruport lil AMS jiġu ttrattati bħala nefqa operatorja inkrementali f'analiżi tal-profittabilità u tal-fluss tal-flus skontat. Dak il-metodu jqis ukoll il-benefiċċju mill-attivitajiet ta' kummerċjalizzazzjoni skont il-kuntratti ta' AMS u l-kuntratti tas-servizzi tal-ajruport tul il-perjodu tal-kuntratt u wara t-tmien ippjanat tas-servizzi tal-ajruport, peress li l-attivitajiet ta' kummerċjalizzazzjoni għenu sabiex jissaħħaħ il-valur tad-ditta u aktarx iġġenera opportunitajiet kummerċjali futuri u profitti wkoll.

(128)

Permezz ta' konklużjoni minn dak l-istudju, Ryanair tosserva li, jekk tkompli tqis il-kuntratt tas-servizzi tal-ajruport u l-kuntratti ta' AMS flimkien, il-Kummissjoni għandha tapplika l-prinċipji deskritti mill-kumpanija ta' konsulenza għall-għajnuna inkwistjoni sabiex tkun żgura li l-analiżi tal-profittabilità bbażata fuq il-prinċipju ta' operatur privat f'ekonomija tas-suq tiġi applikata kif suppost għall-eżaminar kemm tal-kuntratt tas-servizzi tal-ajruport kif ukoll għall-kuntratti ta' AMS.

(129)

Ryanair issottomettiet ukoll sensiela ta' annessi mħejjin mill-kumpanija ta' konsulenza u analiżi mħejjija mill-Professur Damien P. McLoughlin.

(130)

Il-kumpanija ta' konsulenza hija tal-fehma li l-metodu tal-Kummissjoni li taċċetta biss ajruporti komparaturi fl-istess żona koperta mill-ajruport eżaminat huwa żbaljat. Il-kumpanija ta' konsulenza targumenta li l-prezzijiet ta' referenza tas-suq miksubin mill-ajruporti komparaturi mhumiex “gravati” minn għajnuna mill-Istat mogħtija lil ajruporti fl-inħawi u li punt ta' riferiment tas-suq jista' jiġi stmat b'mod affidabli għat-test fuq il-bażi tal-prinċipju ta' investitur privat f'ekonomija tas-suq, peress li:

(131)

Il-kumpanija ta' konsulenza targumenta li l-analiżi tal-profittabilità mwettqa minnha fir-rapporti mibgħuta lill-Kummissjoni tirrispetta l-prinċipji li japplika investitur privat razzjonali, li l-analiżi tal-profittabilità tirrifletti l-approċċ issuġġerit minn deċiżjonijiet fundamentali adottati mill-Kummissjoni u li l-analiżi tal-profittabilità hija bbażata fuq il-prinċipji li ġejjin:

(132)

L-iskop ta' dan id-dokument huwa li jiddeskrivi l-loġika ekonomika wara d-deċiżjonijiet tal-ajruporti reġjonali li jixtru spazju ta' reklamar fuq ryanair.com mingħand AMS. L-awtur jiddikjara li hemm numru kbir ta' ajruporti b'saħħithom ħafna, rinomati u użati spiss u li, jekk iridu jespandu n-negozju tagħhom, il-kompetituri dgħajfin iridu jibdlu x-xejriet ta' xiri statiċi tal-konsumaturi. Ajruporti reġjonali żgħar iridu jsibu mod kif jikkomunikaw b'mod kontinwu l-messaġġ tad-ditta tagħhom lill-ikbar pubbliku possibbli. Forom tradizzjonali ta' kummerċjalizzazzjoni jinvolvu kostijiet li ma jistgħux jintlaħqu.

(133)

Ryanair ma taqbilx mas-sejba tal-Kummissjoni li l-pagamenti lil AMS jirrappreżentaw kostijiet għall-ajruport, peress li dak l-approċċ jinjora l-valur għall-ajruport tas-servizzi li tipprovdi AMS. Ryanair hija konvinta wkoll li, għall-fini tal-analiżi fuq il-bażi tal-prinċipju ta' investitur privat f'ekonomija tas-suq, ix-xiri ta' servizzi ta' kummerċjalizzazzjoni siewja bil-prezzijiet tas-suq għandu jiġi kkunsidrat b'mod separat minn ftehim kuntrattwali simili bejn l-ajruport u l-linja tal-ajru. B'appoġġ tal-analiżi tagħha, Ryanair ipprovdiet studju minn kumpanija ta' konsulenza li kien fih paragun normattiv tal-prezzijiet mitlubin minn AMS u prezzijiet għal servizzi simili pprovduti minn siti web oħrajn tal-ivvjaġġar. (77) L-istudju jikkonkludi li l-prezzijiet mitlubin minn AMS kienu jew inqas mill-medja jew fil-medda medjana tal-prezzijiet mitlubin minn siti web fil-grupp komparatur. Minn dan, Ryanair tikkonkludi li l-prezzijiet li talbet AMS huma l-prezzijiet tas-suq u li d-deċiżjoni ta' ajruport tal-Istat li jixtri servizzi ta' AMS jgħaddi mit-test ta' investitur privat f'ekonomija tas-suq. Ryanair issottomettiet ukoll fatturi għal servizzi pprovduti lil ajruporti skont il-kuntratti ta' AMS bħala prova tal-valur ta' dawn is-servizzi għall-ajruporti.

(134)

Ryanair titlob lill-Kummissjoni sabiex terġa' tikkunsidra l-approċċ li ħadet dak iż-żmien fir-rigward tal-kuntratti ta' AMS. Ryanair hija tal-fehma li l-ftehimiet ma' AMS għandhom jiġu kkunsidrati b'mod separat mill-ftehimiet ta' Ryanair fuq servizzi tal-ajruport u għandhom ikunu soġġetti għal test separat ibbażat fuq il-prinċipju ta' investitur privat f'ekonomija tas-suq. Jekk il-Kummissjoni tinsisti fuq test konġunt fuq il-bażi tal-prinċipju ta' investitur privat f'ekonomija tas-suq għall-ftehimiet ta' AMS u l-ftehimiet ta' Ryanair fuq servizzi tal-ajruport, il-valur tas-servizzi ta' AMS għall-ajruport ma għandux jiġi injorat.

(135)

Ir-rapport tal-kumpanija ta' konsulenza tal-20 ta' Diċembru 2013 fuq il-prezzijiet ta' AMS jirreferi għall-konklużjonijiet mir-rapporti ta' qabel sottomessi li juru l-importanza tar-reklamar għal kumpaniji żgħar. Dawk ir-rapporti jikkonfermaw li Ryanair hija kumpanija pan-Ewropea b'saħħitha li tista' titlob primjum għas-servizzi ta' reklamar tagħha. Ir-rati ta' AMS huma mqabblin ma' kampjun ta' prezzijiet tar-reklamar tas-siti web meħudin fl-istess żmien, meħudin bħala reklami normattivi ta' qies identiku matul il-perjodu bejn l-2004 u l-2005, jiġifieri l-perjodu li fih ġew introdotti għall-ewwel darba l-listi ta' prezzijiet ta' AMS, u għall-2013. Milli jidher ryanair.com għandu d-doppju ta' viżitaturi fix-xahar meta mqabbel mat-tieni l-iktar sit web tal-ivvjaġġar popolari. Huwa ferm probabbli wkoll li l-viżitaturi jwettqu tranżazzjonijiet online oħrajn. Dawn il-funzjonijiet uniċi, flimkien ma' livell għoli ta' popolarità tal-isem jippermettu sabiex il-linja tal-ajru titlob primjum.

(136)

Il-paragun sar bejn ir-reklami ta' qies identiku li kienu stabbiliti mid-dejta disponibbli u mqiegħda fuq il-paġna ewlenija tas-siti web individwali. Minħabba n-nuqqas ta' trasparenza fuq l-offerti speċjali u l-iskontijiet diskrezzjonali, li xorta waħda huma prattika kummerċjali standard, tqabblu biss il-prezzijiet tal-listi ta' prezzijiet. Lista ta' prezz għal kull prezz tfisser prezz għal kull elf żjara, jiġifieri prezz imħallas darba kull meta r-riklam iżuruh 1 000 viżitatur. Il-prezzijiet għal reklami online jvarjaw skont il-qies tagħhom (f'pixels) u fejn jitqiegħdu fuq is-sit web. L-iktar servizz ta' reklamar importanti fuq il-paġna ewlenija pprovdut fuq ryanair.com bejn l-2004 u l-2005 kien kartellun f'format ta' 468 × 60 pixel. Ġeneralment il-kartelluni jintwerew fin-nofs fin-naħa ta' fuq tas-sit web. Il-prezz għal reklam tal-kartellun bejn l-2004 u l-2005, skont il-lista ta' prezzijiet tal-2005 ta' AMS, tqabbel ma' 54 sit web tal-ivvjaġġar Ewropew.

(137)

Fl-2013 iddaħħlu żewġ tipi oħrajn ta' reklami, jiġifieri torrijiet (120 × 600 pixel) u unitajiet f'nofs il-paġna (300 × 250 pixel). Ir-reklami torrijiet huma twal u dojoq u jintwerew f'tarf il-paġna, filwaqt li l-unitajiet f'nofs il-paġna ġeneralment jintwerew bejn il-kontenut online editorjali u b'hekk jiġbdu l-għajn. Il-prezzijiet għar-reklami torrijiet u l-unitajiet f'nofs il-paġna skont il-lista ta' prezzijiet ta' AMS tqabblu mal-prezzijiet mitlubin minn 22 sit web tal-ivvjaġġar u 135 sit web ieħor. Irriżulta li għaż-żewġ perjodi u għas-setturi kollha l-prezzijiet mitlubin minn AMS jaqgħu fi ħdan jew taħt il-medda ta' prezzijiet tas-siti web fil-grupp komparatur.

(138)

Ryanair issottomettiet rapport imħejji minn kumpanija ta' konsulenza fuq il-prinċipji li tqis li għandhom japplikaw għal test ta' investitur privat f'ekonomija tas-suq, li jkopri kemm il-kuntratti tas-servizi tal-ajruport konklużi bejn Ryanair u l-ajruporti kif ukoll il-kuntratti ta' kummerċjalizzazzjoni konklużi bejn AMS u dawk l-ajruporti. (78) Ryanair tosserva li dan huwa mingħajr ħsara għall-opinjoni tagħha li l-kuntratti ta' AMS u l-kuntratti tas-servizzi tal-ajruport għandhom ikunu soġġetti għal testijiet separati tal-investitur privat f'ekonomija tas-suq.

(139)

Ir-rapport jispjega li d-dħul b'rabta ma' AMS għandu jkun inkluż fuq in-naħa tad-dħul tal-analiżi konġunta tal-profittabilità li fiha l-kostijiet għal AMS huma rrapportati fuq in-naħa tan-nefqa. Fir-rapport huwa ssuġġerit metodu bbażat fuq il-fluss tal-flus, li fih il-kostijiet għal AMS jiġu ttrattati bħala nefqa operatorja inkrementali. Ir-rapport jiddikjara li l-attivitajiet ta' kummerċjalizzazzjoni għenu sabiex jinħoloq u jissaħħaħ il-valur tal-isem u li dan, min-naħa tiegħu, iġġenera l-kummerċ u l-profitti anki wara li ntemm it-terminu tal-kuntratt ta' kummerċjalizzazzjoni. Jiddikjara li kuntratt ma' Ryanair jattira linji tal-ajru oħrajn lejn l-ajruport u li, min-naħa tiegħu, dan jagħmlu iktar attraenti għal impriżi kummerċjali u jżid id-dħul mhux marbut mal-avjazzjoni tal-ajruport. (79) Jekk il-Kummissjoni tagħmel analiżi konġunta tal-profittabilità, dawn il-vantaġġi għandhom jittieħdu f'kunsiderazzjoni billi l-kostijiet għal AMS jitqiesu bħala kostijiet operatorji inkrementali u l-profitti inkrementali għandhom jiġu kkoreġuti għall-pagamenti ta' AMS.

(140)

Barra minn hekk, skont ir-rapport, valur terminali għandu jkun inkluż fil-profitti inkrementali previsti fi tmiem il-kuntratt tas-servizzi tal-ajruport, sabiex jiġi inkluż il-valur dovut wara li skada l-kuntratt. Il-valur terminali jista' jiġi aġġustat skont suppożizzjoni konservattiva tal-probabbiltà ta' estensjoni għall-kuntratt ma' Ryanair jew ftehim b'termini simili ma' linji tal-ajru oħrajn. Dan jippermetti sabiex ikun jista' jiġi stmat limitu inqas għall-vantaġġi ġġenerati kemm mill-kuntratti ta' AMS kif ukoll mill-kuntratti tas-servizzi tal-ajruport, filwaqt li titqies l-inċertezza ta' profitti inkrementali wara li jiskadi l-kuntratt tas-servizzi tal-ajruport.

(141)

Ir-rapport jiġbor fil-qosor ir-riżultati tal-istudji fl-impatt tar-reklamar fuq il-valur tad-ditta bħala korroborazzjoni ta' dan il-metodu. Josserva li dawk l-istudji jirrikonoxxu li r-reklamar isaħħaħ il-valur tad-ditta u jista' jtejjeb il-lealtà tal-klijenti, li r-reklamar fuq ryanair.com b'mod partikolari jżid il-profil ta' ajruport u li ajruporti reġjonali iżgħar li jippruvaw iżidu t-traffiku tagħhom jistgħu jtejbu l-valur tad-ditta tagħhom billi jidħlu f'kuntratti ta' reklamar ma' AMS (80).

(142)

Ir-rapport jissuġġerixxi li l-metodu tal-fluss tal-flus għandu jkun ippreferut iktar minn metodu ta' kapitalizzazzjoni li jittratta l-kostijiet għal AMS bħala nefqa li tifforma l-kapital għal assi fissi intanġibbli (jiġifieri l-valur tad-ditta tal-ajruport). In-nefqa tal-kummerċjalizzazzjoni tkun ikkapitalizzata bħala assi fissi intanġibbli u mbagħad tiġi deprezzata tul il-ħajja utli tal-assi sabiex jinħareġ valur residwu fi tmiem it-terminu supponut tal-kuntratt tas-servizzi tal-ajruport. Madankollu, dak il-metodu jinjora l-benefiċċju addizzjonali għall-ajruport mill-kuntratt tas-servizzi tal-ajruport ma' Ryanair. Barra minn hekk, ikun diffiċli li jiġi stmat il-valur tal-assi fiss intanġibbli, minħabba l-kostijiet ta' mmaniġġjar tad-ditta, u l-ħajja utli tal-assi.

(143)

Finalment, huwa argumentat li l-metodu tal-fluss tal-flus jirrispetta d-deċiżjonijiet fundamentali tal-Kummissjoni dwar l-għajnuna mill-Istat u mhux mill-Istat. Hawnhekk ir-rapport jirreferi għall-każ ta' għajnuna BayernLB, (81) li fih il-Kummissjoni ddikjarat li kienet sejra tuża l-Mudell ta' Skont tad-Dividendi biex tistima l-flussi tal-flus u mbagħad tistabbilixxi valur terminali bbażat fuq it-tkabbir previst tad-dividendi. Jirreferi wkoll għad-diskrepanza bejn il-prezz u l-kost b'rabta ma' Telefónica (82); f'dak il-każ, il-Kummissjoni inkludiet valur terminali fl-analiżi tal-fluss tal-flus skontat tagħha.

(144)

Airport Marketing Services tiddefinixxi lilha nfisha bħala sussidjarja ta' Ryanair li għandha skop ekonomiku ġenwin u kienet ifformata sabiex tiffoka fuq attività li ma tappartjenix għan-negozju ewlieni ta' Ryanair. Tintuża minn Ryanair sabiex taġixxi ta' sensara għall-bejgħ tal-ispazju ta' reklamar fuq is-sit web tagħha. Bażikament, il-kuntratti ta' kummerċjalizzazzjoni huma nnegozjati u konklużi ma' ajruporti minn AMS b'mod separat mill-kuntratti ta' Ryanair ma' dawk l-istess ajruporti.

(145)

AMS tispjega li ma bbenefikatx minn għajnuna mill-Istat u li l-ajruport aġixxa bħala investitur privat f'ekonomija tas-suq fit-tranżazzjonijiet tiegħu ma' AMS. AMS targumenta li ġie ssodisfat il-kriterju ta' investitur privat f'ekonomija tas-suq, peress li ma tista' ssir ebda distinzjoni bejn ir-reklamaturi pubbliċi u privati f'termini ta' rati għall-ispazju ta' reklamar ipprovdut minn AMS u d-daqs relatat tat-tali spazju ta' reklamar. L-istituzzjonijiet pubbliċi u privati jikkompetu sabiex jiksbu aċċess għall-ispazju ta' reklamar limitat disponibbli fuq ryanair.com.

(146)

AMS tispjega li l-kuntratti ta' kummerċjalizzazzjoni ġew innegozjati bil-prezz tas-suq b'rispett tal-prinċipji bażiċi tan-negozju u l-valur kummerċjali tagħhom. Ħafna ajruporti, kemm reġjonali jew ċentrali, jagħżlu li jtejbu l-fama tagħhom billi jqiegħdu reklami fuq is-sit web ta' Ryanair jew fuq siti web oħrajn u rnexxielhom jiġġeneraw bosta benefiċċji minn din il-fama ikbar. Pereżempju, din il-fama tista' tiġbed lil passiġġieri ġejjin permezz tas-sit web tal-linja tal-ajru li fuqha jintwera r-reklam tal-ajruport. Il-passiġġieri ġejjin jiġġeneraw dħul fl-ajruport minn attivitajiet mhux marbutin mal-avjazzjoni, peress li l-passiġġieri barranin iħallsu ammont ġmielu ta' flus f'ajruport għal tifkiriet, prodotti lokali, karozzi tal-kiri, ikel, eċċ. Dan id-dħul jammonta għal kważi nofs id-dħul tal-ajruport minn attivitajiet mhux marbutin mal-avjazzjoni.

(147)

AMS tispjega li dan japplika b'mod partikolari għall-AOC peress li meta Ryanair fetħet ir-rotta tagħha bejn Altenburg u Londra, l-ajruport ma kien għad kellu ebda traffiku regolari ta' passiġġieri u ma kienet għadha ġiet żviluppata ebda attività li minnha seta' jiġi ġġenerat dħul mhux marbut mal-avjazzjoni. B'hekk, l-attivitajiet ta' kummerċjalizzazzjoni kienu tassew siewja sabiex itejbu l-proporzjon ta' passiġġieri ġejjin għan-numru totali ta' passiġġieri, li Ryanair ħadet impenn li żżid, u sabiex titħeġġeġ is-suppożizzjoni ta' attivitajiet mhux marbutin mal-avjazzjoni fl-ajruport.

(148)

Is-sit web ta' Ryanair għandu għadd ta' funzjonijiet siewja minn perspettiva ta' kummerċjalizzazzjoni: Is-sit web ta' Ryanair huwa wieħed mill-iktar siti web tal-ivvjaġġar popolari fid-dinja; id-ditta Ryanair u s-sit web ta' Ryanair huma ferm magħrufin u r-rata “bounce” ta' […]* biss tissuġġerixxi li l-kontenut huwa attraenti. Il-viżitaturi għandhom tendenza li jibqgħu fuq is-sit web għal żmien twil ħafna u fil-mira tiegħu s-sit għandu l-klijenti potenzjali tal-ajruport inkwistjoni. Dawn il-funzjonijiet tas-sit web huma riflessi fit-tariffi ta' kummerċjalizzazzjoni mitlubin mingħand l-AOC.

(149)

AMS tispjega li t-tariffi ta' kummerċjalizzazzjoni tagħha ġew stabbiliti fuq il-bażi tal-prezz tas-suq u li AMS ma taqsamx il-klijenti tagħha f'ajruporti u impriżi li jinnegozjaw f'setturi oħrajn. Il-prezzijiet mitlubin minn AMS huma bbażati fuq kriterji oġġettivi u huma elenkati b'mod trasparenti fuq is-sit web tagħha (83). Il-prezzijiet li AMS titlob mingħand l-ajruport irrispettaw il-lista ta' prezzijiet tagħha. Bħala paragun: reklam ta' paġna waħda għall-ajruport fid-Daily Telegraph kien jiswa madwar EUR 2 385 000 għal perjodu ta' 45 jum (GBP 46 000 kuljum). L-ispazju ta' reklamar ipprovdut minn AMS fuq is-sit web ta' Ryanair huwa fiss ukoll, filwaqt li r-reklami fuq bosta siti web oħrajn ġeneralment jinbidlu.

(150)

Il-kuntratt tas-servizzi ta' kummerċjalizzazzjoni għal sentejn konkluż ma' AMS fl-2008 kien jistipula li l-ajruport iħallas tariffa għal servizzi ta' kummerċjalizzazzjoni fuq il-bażi ta' żjarat fil-paġna fl-2007. B'mod simili, il-kuntratt ta' kummerċjalizzazzjoni tal-2010 kien ibbażat fuq is-suppożizzjonijiet f'termini tan-numru ta' żjarat fil-paġna fl-2009. L-istatistiki disponibbli juru li n-numru ta' żjarat fuq is-sit web ta' Ryanair żdied b'mod konsiderevoli tul l-aħħar snin.

(151)

AMS tikkonkludi li ma bbenefikatx minn għajnuna mill-Istat u li Flugplatz Altenburg-Nobitz GmbH aġixxiet bħala investitur privat f'ekonomija tas-suq fit-tranżazzjonijiet tagħha ma' AMS.

(152)

Lufthansa tikkummenta li Flugplatz Altenburg-Nobitz GmbH irrapportat telf annwali ta' EUR 567 000 u EUR 437 000 fil-kontijiet annwali tal-2010 u l-2011. Dan juri li l-kumpanija ma rnexxilhiex tiġġenera profitt, lanqas bis-sussidju pubbliku. Skont Lufthansa, l-azzjonisti jagħmlu injezzjonijiet ta' kapital f'żewġ forom differenti.

(153)

Fuq il-bażi tal-analiżijiet li qegħdin isiru, Lufthansa tosserva li l-infrastruttura maqbula b'kuntratt ma' Ryanair ovvjament inħolqot għal Ryanair biss. Lufthansa tispjega li investitur privat kien jaġixxi b'dan il-mod biss li kieku Ryanair kienet qablet li min-naħa tagħha sservi lill-ajruport għal ċertu numru ta' snin.

(154)

Lufthansa tiddikjara wkoll li Flugplatz Altenburg-Nobitz GmbH irċeviet għajnuna ta' salvataġġ mill-Istat bejn l-2003 u l-2011, peress li l-imposti tal-ajruport ma kinux ikopru l-kostijiet operatorji. Lufthansa tiddefinixxi lill-kumpanija bħala kumpanija f'diffikultà skont it-tifsira ta' Il-linji gwida dwar l-għajnuna mill-Istat għas-salvataġġ u r-ristrutturar ta' impriżi mhux finanzjarji f'diffikultà  (84), xi ħaġa li tfisser li dawn il-Linji Gwida nkisru, peress li l-għajnuna ma ġietx notifikata u, għalhekk, l-għajnuna mhijiex kompatibbli mas-suq intern.

(155)

Fir-rigward tal-imposti tal-ajruport u l-appoġġ tal-kummerċjalizzazzjoni, Lufthansa tosserva li Ryanair irċeviet ammonti kbar ta' għajnuna fil-forma ta' tariffi preferenzjali u appoġġ ta' kummerċjalizzazzjoni. Lufthansa tiddikjara li dawn il-vantaġġi huma inkompatibbli mas-suq intern, peress li l-kriterji tal-kompatibilità tal-Linji Gwida tal-2005 dwar l-Avjazzjoni ma jistgħux jiġu applikati għaliex ma japplikawx għall-każijiet li fihom l-għajnuna operatorja tiġi applikata fuq bażi permanenti u kontinwa u l-Linji Gwida tal-2014 dwar l-Avjazzjoni ma jistgħux jiġu applikati għaliex huma marbutin biss mal-għajnuna tal-bidu għal linji tal-ajru li jkunu ġew notifikati jew li jingħataw wara li daħlu fis-seħħ il-Linji Gwida. Tiddikjara li, anki li kieku kienu japplikaw il-Linji Gwida tal-2014 dwar l-Avjazzjoni, il-kriterji għall-kompatibbiltà tal-għajnuna tal-bidu għal-linji tal-ajru ma kinux issodisfati.

(156)

L-Assoċjazzjoni Federali tal-Linji tal-Ajru Ġermaniżi (“BDF”) ma taqbilx li l-Linji Gwida tal-2014 dwar l-Avjazzjoni japplikaw għal għajnuna operatorja mhux notifikata qabel ma ġew ippubblikati l-Linji Gwida, peress li dan imur kontra l-objettiv ta' prevenzjoni tat-tgħawwiġ tal-kompetizzjoni u l-ħolqien ta' kundizzjonijiet ekwi fis-suq intern. Skont il-BDF, kwalunkwe applikazzjoni bħal din tkun qiegħda tiffavorixxi lil impriżi li jkunu aġixxew sabiex jirrispettaw il-linji gwida li kienu japplikaw qabel l-4 ta' April 2014. Fil-fehma tal-BDF, il-Linji l-Gwida l-ġodda tal-2014 dwar l-Avjazzjoni jkunu qegħdin jillegalizzaw b'mod retroattiv kondotta illegali. Għalhekk, l-għajnuna tal-bidu għal Ryanair u l-għajnuna għall-investiment għal Flugplatz Altenburg-Nobitz GmbH għandhom jiġu vvalutati bħala għajnuna mhux notifikata fuq il-bażi tal-liġi li kienet tapplika fiż-żmien relevanti.

(157)

Fir-rigward tar-rapport imħejji mill-kumpanija ta' konsulenza, il-Ġermanja tosserva li r-rapport jagħmel referenza għall-possibbiltà li Germanwings serviet lill-AOC. Madankollu, il-Ġermanja tikkonferma li Germanwigs qatt ma serviet lil dan l-ajruport.

(158)

Bħala tweġiba għall-kummenti ta' Ryanair, il-Ġermanja tispjega li l-awtoritajiet tal-Land ta' Thüringen qatt ma kienu involuti fin-negozjati tal-kuntratti bejn l-ajruport u Ryanair/AMS.

(159)

Fir-rigward tal-kuntratti ta' kummerċjalizzazzjoni bejn Ryanair u l-AOC, il-Ġermanja ssostni l-pożizzjoni ta' Ryanair, li dawk il-kuntratti ta' kummerċjalizzazzjoni jikkonformaw mal-prinċipju ta' investitur privat f'ekonomija tas-suq u, għalhekk, ma kien fihom ebda għajnuna mill-Istat. Il-Ġermanja taqbel b'mod partikolari mal-konklużjoni li ħareġ biha l-aħħar rapport tal-kumpanija ta' konsulenza li bagħtet Ryanair fl-20 ta' Diċembru 2013 u tiddikjara li l-pagamenti li saru lil AMS u/jew Ryanair għas-servizz li pprovdew għal negozju fi ħdan il-kuntest ta' kuntratt tas-servizzi normali kienu raġonevoli.

(160)

Il-Ġermanja targumenta li l-kummenti ta' Lufthansa ma jipprovdu ebda informazzjoni ġdida għall-investigazzjoni attwali u li l-Kummissjoni diġà għandha l-informazzjoni relevanti kollha fuq din il-kwistjoni.

(161)

Il-Ġermanja tiċħad għadd ta' dikjarazzjonijiet li għamlet Lufthansa fuq il-bażi li kienu skorretti.

(162)

Il-Ġermanja tiddikjara wkoll li, meta l-bord superviżorju ta' Flugplatz Altenburg-Nobitz GmbH iddeċieda li jdaħħal investitur privat f'Diċembru 2013, kien possibbli li jkomplu jonqsu iktar is-sussidji pubbliċi. Minħabba d-direzzjoni l-ġdida li ħa l-ajruport, li mhuwiex sejjer jibqa' jkun servut minn titjiriet charter jew skedati, l-AOC daqt għandu jibqa jaqa' barra mill-kamp ta' applikazzjoni tad-dispożizzjonijiet li jirregolaw l-għajnuna mill-Istat.

(163)

Il-Ġermanja targumenta li, b'massimu ta' 150 000 passiġġier fis-sena, l-AOC jikkwalifika bħala ajruport tal-kategorija D skont il-Linji Gwida tal-2005 dwar l-Avjazzjoni, li, għalhekk, l-ajruport huwa żgħir wisq biex jikkompeti ma' ajruporti oħrajn, aħseb u ara biex jgħawweġ il-kompetizzjoni, u li, għalhekk, ma jaffettwax il-kummerċ bejn l-Istati Membri. Il-Ġermanja tiċħad l-allegazzjonijiet li għamlet Lufthansa rigward l-allegata għajnuna mogħtija lil Ryanair. Il-Ġermanja tiċħad ukoll id-dikjarazzjoni li Ryanair ingħatat allegata għajnuna fil-forma ta' imposti tal-ajruport u appoġġ tal-kummerċjalizzazzjoni u b'rabta ma' dan tirreferi għall-kummenti li għamlet qabel.

(164)

Fl-aħħar, il-Ġermanja tirreferi għal stqarrija għall-istampa tal-Kummissjoni datata d-19 ta' Jannar 2005 (85) li tikkonferma li skema ta' għajnuna għall-bini u l-iżvilupp ta' ajruporti reġjonali f'reġjuni bi struttura u ekonomija dgħajfin hija kompatibbli mas-suq intern.

(165)

Skont l-Artikolu 107(1) TFUE, “kull għajnuna, ta' kwalunkwe forma, mogħtija minn Stat Membru jew permezz ta' riżorsi tal-Istat, li twassal għal distorsjoni jew theddida ta' distorsjoni għallkompetizzjoni billi tiffavorixxi ċerti impriżi jew ċerti produtturi għandha, safejn tolqot il-kummerċ bejn l-Istati Membri, tkun inkompatibbli mas-suq”.

(166)

Il-kriterji stipulati fl-Artikolu 107(1) TFUE huma kumulattivi. Sabiex jiġi stabbilit jekk miżura tikkostitwixxix għajnuna mill-Istat skont it-tifsira tal-Artikolu 107(1) TFUE, trid tiġi ssodisfata kull waħda mill-kundizzjonijiet li ġejjin. L-appoġġ finanzjarju jrid:

(167)

Hija ġurisprudenza stabbilita li l-ewwel nett il-Kummissjoni trid tistabbilixxi jekk Flugplatz Altenburg-Nobitz GmbH hijiex impriża skont it-tifsira tal-Artikolu 107(1) TFUE. Il-kunċett ta' impriża jkopri kwalunkwe entità attiva f'attività ekonomika, indipendentement mill-istatus legali tagħha, min hu sidha u l-mod li bih hija ffinanzjata. (86) Kwalunkwe attività li tikkonsisti fl-offerta ta' prodotti u servizzi f'suq partikolari hija attività ekonomika (87).

(168)

Fis-sentenza ta' Leipzig-Halle Airport, il-Qorti kkonfermat li l-operat ta' ajruport għal finijiet kummerċjali u l-bini ta' infrastruttura tal-ajruport jikkostitwixxu attività ekonomika. (88) Malli operatur ta' ajruport iwettaq attività ekonomika, billi joffri servizzi tal-ajruport għal remunerazzjoni, jikkwalifika bħala impriża skont it-tifsira tal-Artikolu 107(1) TFUE indipendentement mill-istatus legali tiegħu jew il-mod li bih huwa ffinanzjat. Għalhekk, id-dispożizzjonijiet tat-Trattat li jirregolaw l-għajnuna mill-Istat jistgħu jiġu applikati għal vantaġġi mogħtijin lill-operatur tal-ajruport inkwistjoni mill-Istat jew permezz ta' riżorsi tal-Istat (89).

(169)

F'termini taż-żmien li fih il-bini u l-operat ta' ajruport isiru attività ekonomika, il-Kummissjoni tosserva li l-iżvilupp gradwali tal-forzi tas-suq fis-settur tal-ajruport jagħmilha impossibbli li tiġi stabbilita data preċiża. Madankollu, il-Qorti tal-Ġustizzja tal-Unjoni Ewropea rrikonoxxiet l-iżviluppi fl-għamla tal-attivitajiet tal-ajruporti. B'rabta mal-Ajruport ta' Leipzig/Halle, il-Qorti ddikjarat li ma kienx għadu possibbli li tiġi eskluża l-applikazzjoni tar-regoli dwar l-għajnuna mill-Istat għall-finanzjament tal-infrastruttura tal-ajruporti mis-sena 2000. Għalhekk, il-bini u l-operat tal-infrastruttura tal-ajruporti trid titqies li hija attività ekonomika mid-data tas-sentenza f'Aéroports de Paris (12 ta' Diċembru 2000).

(170)

Fuq il-bażi tal-valutazzjonijiet fil-paragrafi (168) u (169), l-operat ta' ajruport huwa attività ekonomika. Minn naħa, l-ajruporti jikkompetu għal linji tal-ajru u t-traffiku tal-ajru korrispondenti (passiġġieri u merkanzija) u, min-naħa l-oħra, l-operaturi tal-ajruporti jikkompetu ma' xulxin. Jistgħu jikkompetu għal kuntratt sabiex joperaw ajruport partikolari. Barra minn hekk, l-ajruporti mhux fl-istess żona koperta jew saħansitra fl-Istat Stat Membru jistgħu jkunu f'kompetizzjoni ma' xulxin, speċjalment għal linji tal-ajru low-cost u carter.

(171)

Il-Kummissjoni ssib li l-infrastruttura tal-ajruport ikkonċernata f'din id-deċiżjoni għandha tiġi operata fuq bażi kummerċjali mill-operatur tal-ajruport Flugplatz Altenburg-Nobitz GmbH. Peress li l-operatur tal-ajruport sejjer jitlob lil min jużah tariffa sabiex juża dik l-infrastruttura, din hija sfruttabbli kummerċjalment. Minn dan isegwi li l-entità li tisfrutta dik l-infrastruttura hija impriża għall-finijiet tal-Artikolu 107(1) TFUE.

(172)

Mhux l-attivitajiet kollha ta' operatur ta' ajruport bilfors ikunu attivitajiet ekonomiċi (90). Il-Qorti (91) ddikjarat li l-attivitajiet li għalihom l-Istat normalment ikun responsabbli matul l-eżerċizzju tal-awtorità uffiċjali tiegħu bħala awtorità pubblika mhumiex ekonomiċi fl-għamla tagħhom u ma jaqgħux taħt il-kamp ta' applikazzjoni tar-regoli dwar l-għajnuna mill-Istat. Attivitajiet bħal dawn jinkludu, pereżempju, is-sigurtà, il-kontroll tat-traffiku tal-ajru, is-sorveljanza, id-dwana eċċ. Il-finanzjament tat-tali attivitajiet irid ikun strettament limitat għal kumpens għall-kostijiet imġarrbin u ma jistax jintuża biex jiffinanzja attivitajiet ekonomiċi oħrajn (92).

(173)

Għalhekk, il-finanzjament tal-attivitajiet li jaqgħu taħt il-mandat tal-politika pubblika jew tal-infrastruttura direttament assoċjata mat-tali attivitajiet ġeneralment ma jikkostitwixxix għajnuna mill-Istat. (93) F'ajruport, l-attivitajiet bħall-kontroll tat-traffiku tal-ajru, is-sorveljanza, id-dwana, is-servizz tat-tifi tan-nar, l-attivitajiet għall-ħarsien tal-avjazzjoni ċivili minn interferenza illegali u l-investimenti fl-infrastruttura u t-tagħmir meħtieġa sabiex jitwettqu dawk l-attivitajiet ġeneralment ma jikkostitwixxux attivitajiet ekonomiċi. (94)

(174)

Il-finanzjament pubbliku ta' attivitajiet mhux ekonomiċi marbutin mal-prestazzjoni ta' attività ekonomika ma jistax jirriżulta f'diskriminazzjoni indebita bejn il-linji tal-ajru u l-operaturi tal-ajruporti. Fil-fatt hija ġurisprudenza stabbilita li jeżisti vantaġġ meta l-awtoritajiet pubbliċi jeħilsu lill-impriżi mill-ispejjeż inerenti fl-attivitajiet ekonomiċi tagħhom. (95) Għalhekk, jekk huwa normali f'sistema legali partikolari li l-linji tal-ajru jew l-operaturi tal-ajruporti jġarrbu l-kostijiet ta' ċerti servizzi, iżda wħud mil-linji tal-ajru jew l-operaturi tal-ajruporti li jipprovdu l-istess servizzi f'isem l-istes awtoritajiet pubbliċi ma għandhomx iġarrbu dawk il-kostijiet, dawn jistgħu jibbenefikaw minn vantaġġ anki jekk is-servizzi kkonċernati jikkwalifikaw minnhom infushom bħala attivitajiet mhux ekonomiċi. Għal dik ir-raġuni, hemm bżonn li jiġi analizzat il-qafas legali applikabbli għall-operatur tal-ajruport sabiex jiġi vvalutat jekk, f'dak il-qafas legali, l-operatur tal-ajruport jew il-linji tal-ajru jridux iġarrbu l-kostijiet tal-attivitajiet li mhumiex ta' għamla ekonomika iżda li saru matul l-eżerċizzju tal-attivitajiet ekonomiċi tagħhom.

(175)

Il-Ġermanja tispjega li s-sussidji pubbliċi għall-investimenti infrastrutturali msemmijin fil-paragrafu (71) huma assoċjati ma' attivitajiet mhux ekonomiċi biss. Il-Ġermanja tinkludi l-investimenti fis-sikurezza, is-sigurtà pubblika u l-kontroll tat-traffiku tal-ajru f'dawk l-attivitajiet mhux ekonomiċi. B'mod partikolari, il-Ġermanja tindika li l-kompiti ta' sigurtà u l-kompiti ta' sorveljanza, il-miżuri għas-sikurezza kontra n-nar, is-sikurezza pubblika u s-sikurezza operazzjonali, is-servizz meteoroloġiku u l-kontroll tat-traffiku tal-ajru huma parti mill-mandat tal-politika pubblika.

(176)

Il-qafas legali relevanti fil-Ġermanja huwa stabbilit b'mod partikolari mit-taqsima 8 tal-Luftsicherheitsgesetz [l-Att dwar is-Sikurezza fl-Ajru], li jirregola s-salvagwardji tal-ajruporti, u t-Taqsima 27(c) Nru 2 tal-Luftverkehrsgesetz [l-Att dwar it-Traffiku tal-Ajru], li jirregola l-miżuri sabiex jiġu ggarantiti sikurezza operazzjonali, kontroll tat-traffiku tal-ajru u sikurezza tat-traffiku tal-ajru.

(177)

Il-Kummissjoni hija tal-fehma li l-miżuri fit-Taqsima 8 tal-Luftsicherheitsgesetz, il-miżuri fit-Taqsima 27(c) Nru 2 tal-Luftverkehrsgesetz, u s-servizz tat-temp u s-servizz tat-tifi tan-nar huma, fil-prinċipju, attivitajiet li jistgħu jitqiesu li jaqgħu taħt il-mandat tal-politika pubblika.

(178)

Madankollu, f'dak li għandu x'jaqsam ma' miżuri marbtin biss mas-sikurezza operazzjonali, il-Kummissjoni hija tal-fehma li l-miżuri li jiggarantixxu l-operat sikur tal-ajruport jifformaw parti normali mill-attività ekonomika tal-operat tal-ajruport. (96) Soġġetta għal investigazzjoni dettaljata tal-attivitajiet u l-kostijiet individwali, il-Kummissjoni tiddikjara li l-miżuri mfasslin sabiex jiġi ggarantit l-operat sikur ta' ajruport mhumiex attivitajiet li jaqgħu taħt il-mandat tal-politika pubblika. Kwalunkwe impriża li tixtieq topera ajruport trid tiggarantixxi s-sikurezza tal-faċilitajiet bħar-runway u r-rampa tal-ajruport.

(179)

Fir-rigward tas-sikurezza kontra n-nar, il-Kummissjoni tosserva li r-rimborż tal-kostijiet normalment ikun soġġett għall-kompetenzi reġjonali u li t-tali kostijiet normalment ikunu rimborżati mill-awtoritajiet reġjonali relevanti. Ir-rimborż tat-tali kostijiet huwa limitat għall-ammont meħtieġ sabiex ikunu koperti l-kostijiet ikkonċernati.

(180)

Fir-rigward tal-kontroll tat-traffiku tal-ajru u l-miżuri ta' kontroll tat-traffiku tal-ajru, it-Taqsima 27(d) tal-Luftverkehrsgesetz tipprovdi sabiex il-kostijiet imġarrbin għall-miżuri taħt it-Taqsima 27(c) tal-Luftverkehrsgesetz ikunu koperti mill-Istat għal għadd ta' ajruporti speċifiċi. L-ajruporti jistgħu jiksbu ħelsien mill-ispejjeż bħala “mtajjar rikonoxxuti” skont it-Taqsima 27(d) tal-Luftverkehrsgesetz jekk il-Ministeru Federali għat-Trasport jirrikonoxxi li hemm ħtieġa għal servizzi ta' kontroll tat-traffiku tal-ajru u miżuri ta' kontroll tat-traffiku tal-ajru fuq il-bażi ta' motivi ta' sikurezza bbażati fuq it-traffiku u interessi tal-politika tat-trasport. (97) L-ajruporti Ġermaniżi mingħajr rikonoxximent bħal dan ma jistgħux jitolbu l-ħelsien minn kost skont it-Taqsima 27(d) tal-Luftverkehrsgesetz u, għalhekk, fil-prinċipju jridu jġarrbu l-kostijiet huma stess tal-miżuri pprovduti fit-Taqsima 27(c) tal-Luftverkehrsgesetz. Dawn il-kostijiet jagħmlu parti mill-operat tal-ajruport. Peress li ċerti ajruporti jridu jġarrbu dawn il-kostijiet huma stess u oħrajn le, jista' jingħata vantaġġ lil dawn tal-aħħar jekk il-miżuri ta' kontroll tat-traffiku tal-ajru u oħrajn jistgħu jiġu kklassifikati bħala miżuri mhux ekonomiċi. Il-Kummissjoni tosserva li l-AOC mhuwiex wieħed mill-ajruporti li jaqgħu taħt it-Taqsima 27(d) tat-tali Att u ssib li l-investimenti marbutin mas-servizzi ta' kontroll tat-traffiku tal-ajru u l-miżuri ta' kontroll tat-traffiku tal-ajru ma jistgħux jitqiesu bħala kostijiet li jaqgħu taħt il-mandat tal-politika pubblika.

(181)

Fir-rigward tal-miżuri skont it-Taqsima 8 tal-Luftsicherheitsgesetz, il-Ġermanja tidher li hija tal-fehma li l-kostijiet kollha marbutin mal-miżuri stipulati hemm jistgħu jiġġarrbu mill-awtoritajiet pubbliċi relevanti. Madankollu, il-Kummissjoni tosserva li, skont it-Taqsima 8(3) tal-Luftsicherheitsgesetz, huma biss il-kostijiet ta' forniment u żamma tal-kmamar u ż-żoni meħtieġa għall-implimentazzjoni tal-miżuri tat-Taqsima 5 tal-Luftsicherheitsgesetz li jistgħu jiġu rimborżati. Il-kostijiet kollha l-oħrajn irid iġarrabhom l-operatur tal-ajruport. Peress li l-finanzjament pubbliku mogħti lil Flugplatz Altenburg-Nobitz GmbH ħeles lill-impriża minn kostijiet li kellha ġġarrab skont it-Taqsima 8(3) tal-Luftsicherheitsgesetz, dak il-finanzjament pubbliku mhuwiex eżentat mill-analiżi approfondita skont ir-regoli tal-Unjoni dwar l-għajnuna mill-Istat.

(182)

Finalment, il-Kummissjoni taċċetta fir-rigward tal-investimenti infrastrutturali li saru u l-kostijiet operatorji mġarrbin bejn is-sena 2000 u l-2011 li n-nefqa assoċjata direttament mas-sikurezza kontra n-nirien u l-forniment tas-servizzi meteoroloġiċi jistgħu jitqiesu bħala nefqa li taqa' taħt il-mandat tal-politika pubblika, diment li r-rimborż tat-tali kostijiet ikun strettament limitat għall-ammont meħtieġ sabiex jitwettqu dawk l-attivitajiet. Fir-rigward tal-investimenti u l-kostijiet operatorji marbutin mal-miżuri meħudin skont it-Taqsima 8 tal-Luftsicherheitsgesetz, il-Kummissjoni hija tal-fehma li huma biss dawk il-kostijiet li għalihom l-operatur tal-ajruport għandu talba ta' rimborż skont it-Taqsima 8(3) tal-Luftsicherheitsgesetz li jistgħu jitqiesu li huma kostijiet li jaqgħu taħt il-mandat tal-politika pubblika.

(183)

Fir-rigward tal-investimenti skont it-Taqsima 27(c) Nru 2 tal-Luftsicherheitsgesetz b'rabta mas-servizzi ta' kontroll tat-traffiku tal-ajru u l-miżuri ta' kontroll tat-traffiku tal-ajru, il-Kummissjoni ssib li, peress li l-AOC mhuwiex wieħed mill-ajruporti li jaqgħu taħt it-Taqsima 27(d) tat-tali Att, li l-investimenti u l-kostijiet operatorji marbutin mas-servizzi ta' kontroll tat-traffiku tal-ajru u l-miżuri ta' kontroll tat-traffiku tal-ajru ma jistgħux jitqiesu bħala kostijiet li jaqgħu taħt il-mandat tal-politika pubblika. Fl-aħħar, l-investimenti u l-kostijiet operatorji li jiggarantixxu s-sikurezza operazzjonali tal-ajruport ma jistgħux jiġu kklassifikati bħala kostijiet li jaqgħu taħt il-mandat tal-politika pubblika. B'mod partikolari, dan ifisser li l-investimenti fl-immodernizzar u l-estensjoni tar-runway u l-installazzjoni tas-sinjali tal-ajrudromi eċċ. ma jistgħux jiġu kklassifikati li jaqgħu taħt il-mandat tal-politika pubblika.

(184)

Il-klassifikazzjoni legali ta' dawn il-kostijiet bħala li jaqgħu taħt jew barra l-mandat tal-politika pubblika minkejja li, intwera li, skont il-qafas legali fis-seħħ, dawn il-kostijiet iridu jiġġarrbu mill-operatur tal-ajruport. Għalhekk, jekk l-Istat ħallas għal dawn il-kostijiet, l-operatur tal-ajruport inħeles minn kostijiet li normalment kien ikollu jġarrab.

(185)

Għaldaqstant, il-Kummissjoni hija tal-fehma li r-riżorsi pubbliċi mogħtijin lil Flugplatz Altenburg-Nobitz GmbH sabiex tiffinanzja l-investimenti infrastrutturali u t-telf operatorju ħelsu lill-impriża minn kostijiet inerenti għall-attivitià ekonomika tagħha. Dan ma japplikax għall-kostijiet li jaqgħu taħt il-mandat tal-politika pubblika deskritti fil-paragrafi 182 u 183. Għall-kuntrarju tal-opinjoni li esprimiet il-Ġermanja, il-fondi tal-Land ta' Thüringen użati sabiex ikopru servizzi ta' kontroll tat-traffiku tal-ajru u ta' kontroll tal-ajruport, kif żvelati fit-Tabella 7, ma jistgħux jitqiesu bħala attivitajiet li jaqgħu taħt il-mandat tal-politika pubblika. Mill-ġdid, għall-kuntrarju tal-opinjoni li esprimiet il-Ġermanja, parti mill-investimenti infrastrutturali żvelati fit-Tabella 3 ma jaqgħux taħt il-mandat tal-politika pubblika. Dan japplika b'mod partikolari għall-immodernizzar u l-estensjoni tar-runway.

(186)

Kwalunkwe vantaġġ mogħti minn riżorsi tal-Istat mill-Istat innifsu jew minn korp delegat li jaġixxi bis-setgħat ittrasferiti lilu mill-Istat jikkwalifika bħala għajnuna mill-Istat. (98) L-Artikolu 107 TFUE fuq ir-riżorsi tal-Istat japplika għar-riżorsi tal-awtoritajiet lokali. (99)

(187)

F'dan il-każ, l-għotjiet mogħtijin lil Flugplatz Altenburg-Nobitz GmbH sabiex tkopri l-investimenti infrastrutturali huma ffinanzjati mill-baġit ta' istituzzjonijiet pubbliċi, jiġifieri jew l-azzjonisti pubbliċi, (100) il-Land ta' Thüringen jew istituzzjonijiet pubbliċi oħrajn u awtoritajiet reġjonali u lokali. Konsegwentement, l-għotjiet fihom għajnuna mill-Istat u jridu jiġu imputati lill-Istat ukoll.

(188)

Il-Kummissjoni tapplika l-kriterju tal-“investitur privat f'ekonomija tas-suq” sabiex tistabbilixxi jekk impriża kisbitx vantaġġ ekonomiku mir-riżorsi finanzjarji mogħtijin b'termini preferenzjali. Fuq il-bażi ta' dak il-prinċipju, il-kapital imqiegħed direttament jew indirettament għad-dispożizzjoni ta' impriża mill-Istat, f'ċirkustanzi li jikkorrispondu għal kundizzjonijiet normali tas-suq ma għandhomx jitqiesu bħala għajnuna mill-Istat. (101)

(189)

F'dan il-każ, il-Kummissjoni trid tistabbilixxi jekk it-termini tas-sussidji pubbliċi mħallsin lil Flugplatz Altenburg-Nobitz GmbH tawx lill-impriża vantaġġ ekonomiku, li l-benefiċjarju ma kienx jikseb f'kundizzjonijiet normali tas-suq.

(190)

L-għotjiet pubbliċi għall-miżura kkonċernata hawnhekk tħallsu lil Flugplatz Altenburg-Nobitz GmbH “mingħajr ħlas”, mingħajr imgħax jew mingħajr ebda obbligu ta' ripagament (102). Konsegwentement, l-għotjiet imħallsin mill-awtoritajiet Ġermaniżi għall-investimenti infrastrutturali ħelsu lill-impriża mill-kost li jkollha tiffinanzja l-infrastruttura hija stess jew minn self tal-bank inkella mill-ekwità proprja tagħha. Għalhekk, dawn l-għotjiet jagħtu vantaġġ ekonomiku lill-ajruport.

(191)

L-Artikolu 107(1) TFUE jistipula li sabiex miżura tiġi definita bħala għajnuna mill-Istat, trid tkun tiffavorixxi lil “ċerti impriżi jew il-produzzjoni ta' ċerti prodotti”. Il-Kummissjoni tosserva li l-għotjiet għall-investimenti infrastrutturali tħallsu biss lil Flugplatz Altenburg-Nobitz GmbH. Konsegwentement, dawk l-għotjiet kienu miżuri selettivi skont it-tifsira tal-Artikolu 107(1) TFUE.

(192)

Jekk l-għajnuna mogħtija minn Stat Membru ssaħħaħ il-pożizzjoni ta' impriża meta mqabbla ma' impriżi oħrajn li jikkompetu fis-suq intern, irid jiġi supponut li kienu affettwati mill-għajnuna inkwistjoni. Hija ġurisprudenza stabbilita (103) li l-kompetizzjoni tkun mgħawġa jekk il-benefiċjarju tal-għajnuna jikkompeti ma' impriżi oħrajn fi swieq miftuħin għall-kompetizzjoni.

(193)

Kif spjegat qabel, l-operat ta' ajruport huwa attività ekonomika u l-ajruporti jikkompetu għall-passiġġieri u l-linji tal-ajru. Flugplatz Altenburg-Nobitz GmbH tikkompeti ma' impriżi oħrajn fi swieq miftuħin għall-kompetizzjoni. Il-vantaġġ ekonomiku miksub isaħħaħ il-pożizzjoni tagħha meta mqabbla mal-kompetituri tagħha fis-suq Ewropew fis-servizzi tal-ajruport.

(194)

Għalhekk, ir-riżorsi pubbliċi analizzati hawnhekk ifixklu jew jheddu li jfixklu l-kompetizzjoni. Barra minn hekk, jaffettwaw il-kummerċ bejn l-Istati Membri.

(195)

Għar-raġunijiet spjegati, il-Kummissjoni ssib li l-għotjiet imħallsin mill-awtoritajiet reġjonali u muniċipali tal-Ġermanja għall-investimenti infrastrutturali tal-AOC fil-perjodu mit-12 ta' Diċembru 2000 jikkostitwixxu għajnuna mill-Istat skont it-tifsira tal-Artikolu 107(1) TFUE.

(196)

Kwalunkwe vantaġġ mogħti minn riżorsi tal-Istat mill-Istat innifsu jew minn korp delegat li jaġixxi bis-setgħat ittrasferiti lilu mill-Istat jikkwalifika bħala għajnuna mill-Istat. (104) L-Artikolu 107 TFUE fuq ir-riżorsi tal-Istat japplika għar-riżorsi tal-awtoritajiet lokali. (105)

(197)

F'dan il-każ, l-għotjiet mogħtijin lil Flugplatz Altenburg-Nobitz GmbH sabiex tkopri t-telf operatorju huma ffinanzjati mill-baġit ta' istituzzjoni pubblika, jiġifieri jew l-azzjonist pubbliku (106) (il-Land ta' Thüringen) jew istituzzjonijiet pubbliċi oħrajn u awtoritajiet reġjonali u lokali. Konsegwentement, l-għotjiet fihom għajnuna mill-Istat u jridu jiġu imputati lill-Istat ukoll.

(198)

Vantaġġ ekonomiku skont it-tifsira tal-Artikolu 107(1) TFUE jfisser kwalunkwe benefiċċju ekonomiku li impriża ma kinitx tikseb f'kundizzjonijiet normali tas-suq, jiġifieri mingħajr l-intervent tal-Istat. (107) L-uniku kriterju huwa l-effett tal-miżura fuq l-impriża, mhux il-kawżi jew it-tiri tal-intervent tal-Istat. (108) Dejjem hemm vantaġġ li bih il-pożizzjoni finanzjarja tal-impriża titjieb minħabba l-intervent tal-Istat.

(199)

Il-Kummissjoni tfakkar ukoll li “l-kapital imqiegħed direttament jew indirettament għad-dispożizzjoni ta' impriża mill-Istat f'ċirkustanzi li jikkorrispondu għal kundizzjonijiet normali tas-suq ma jistgħax jitqies bħala għajnuna mill-Istat”. (109) Sabiex f'dan il-każ jiġi stabbilit jekk il-finanzjament pubbliku ta' Flugplatz Altenburg-Nobitz GmbH tax lill-impriża vantaġġ li ma kinitx tikseb f'kundizzjonijiet normali tas-suq, il-Kummissjoni trid tqabbel il-kondotta tal-awtoritajiet pubbliċi li injettaw il-kapital u l-kondotta ta' investitur privat f'ekonomija tas-suq b'politika fit-tul fil-mira tiegħu mingħajr ma jagħti kas ir-redditu immedjat. (110)

(200)

Il-Ġermanja targumenta li l-effett tal-għotjiet pubbliċi inkwistjoni għandu jiġi vvalutat fir-rigward tal-vantaġġi ekonomiċi għar-reġjun sħiħ u li, għalhekk, l-azzjonist ewlieni ta' Flugplatz Altenburg-Nobitz GmbH, id-distrett rurali ta' Altenburger Land, aġixxa bħala investitur privat f'kundizzjonijiet normali tas-suq. Fir-rigward tal-vantaġġi għar-reġjun, il-benefiċċju għad-distrett rurali ta' Altenburger Land, skont il-Ġermanja, kien ikbar mill-għotjiet imħallsin. Il-Ġermanja tiddikjara wkoll li l-injezzjonijiet ta' kapital tal-azzjonisti jistgħu jiġu kklassifikati bħala “għotjiet li ma marrux tajjeb” (111) għall-ajruport. Madankollu, il-vantaġġi possibbli għar-reġjun ma jistgħux jiġu kkunsidrati f'valutazzjoni bbażata fuq il-prinċipju ta' investitur privat f'ekonomija tas-suq. Il-valutazzjoni trid tinjora kwalunkwe impatt pożittiv fuq l-ekonomija tar-reġjun fejn jinsab l-ajruport, peress li l-Qorti stipulat li l-uniku kriterju li japplika meta jiġi applikat il-prinċipju ta' investitur privat f'ekonomija tas-suq “jekk f'ċirkustanzi simili, azzjonist privat, li jkollu l-kisba ta' redditu fil-mira u li jinjora kull kunsiderazzjoni soċjali, tal-politika reġjonali u settorjali, kien jissottoskrivi l-kapital inkwistjoni” (112).

(201)

F'dan il-każ tal-għajnuna, ir-riżorsi pubbliċi ngħataw lil Flugplatz Altenburg-Nobitz GmbH “mingħajr ħlas”, mingħajr imgħax jew mingħajr ebda obbligu ta' ripagament. L-istituzzjonijiet pubbliċi taw lill-operatur tal-ajruport riżorsi mingħajr ma talbu xi kunsiderazzjoni u, għalhekk, ħelsuh mill-bżonn li jiffinanzja lilu nnifsu permezz ta' self mill-bank jew ekwità.

(202)

L-injezzjonijiet annwali ta' kapital mill-azzjonisti ntużaw sabiex ikopru t-telf anwali ta' Flugplatz Altenburg-Nobitz GmbH. Għaldaqstant, finalment, l-injezzjonijiet ta' kapital addizzjonali ntużaw sabiex ikopru parti min-nefqa operatorja normali tal-ajruport u, għalhekk, ħelsu lill-impriża mill-kostijiet li normalment kien ikollha ġġarrab. Il-Ġermanja ma spjegatx għaliex investitur privat f'ekonomija tas-suq kien ikompli jinjetta l-kapital f'impriża li rrapportat telf b'mod konsistenti.

(203)

Fid-dawl tal-kunsiderazzjonijiet ta' hawn fuq, il-Kummissjoni hija tal-fehma li investitur privat f'ekonomija tas-suq ma kienx jiddeċiedi li jkopri t-telf dejjem ikbar ta' Flugplatz Altenburg-Nobitz GmbH sena wara l-oħra. Għalhekk, l-għotjiet imħallsin mill-awtoritajiet reġjonali u l-istituzzjonijiet pubbliċi Ġermaniżi għat-telf operatorju ħelsu lil Flugplatz Altenburg-Nobitz GmbH mill-bżonn li jkopri t-telf operatorju kollu tiegħu u tawh vantaġġ ekonomiku li ma kienx jikseb f'kundizzjonijiet normali tas-suq.

(204)

L-Artikolu 107(1) TFUE jistipula li sabiex miżura tiġi definita bħala għajnuna mill-Istat, trid tkun tiffavorixxi lil “ċerti impriżi jew il-produzzjoni ta' ċerti prodotti”. Il-Kummissjoni tosserva li l-għotjiet għall-investimenti għat-telf operatorju tħallsu biss lil Flugplatz Altenburg-Nobitz GmbH. Konsegwentement, dawk l-għotjiet kienu miżuri selettivi skont it-tifsira tal-Artikolu 107(1) TFUE.

(205)

Jekk l-għajnuna mogħtija minn Stat Membru ssaħħaħ il-pożizzjoni ta' impriża meta mqabbla ma' impriżi oħrajn li jikkompetu fis-suq intern, irid jiġi supponut li kienu affettwati mill-għajnuna inkwistjoni. Hija ġurisprudenza stabbilita (113) li l-kompetizzjoni tkun mgħawġa jekk il-benefiċjarju tal-għajnuna jikkompeti ma' impriżi oħrajn fi swieq miftuħin għall-kompetizzjoni.

(206)

Kif spjegat qabel, l-operat ta' ajruport huwa attività ekonomika u l-ajruporti jikkompetu għall-passiġġieri u l-linji tal-ajru. Għalhekk, Flugplatz Altenburg-Nobitz GmbH tikkompeti ma' impriżi oħrajn fi swieq miftuħin għall-kompetizzjoni. Il-vantaġġ ekonomiku miksub mill-impriża jsaħħaħ il-pożizzjoni tagħha meta mqabbla mal-kompetituri tagħha fis-suq Ewropew fis-servizzi tal-ajruport.

(207)

Għalhekk, ir-riżorsi pubbliċi analizzati jgħawġu jew jheddu li jgħawġu l-kompetizzjoni. Barra minn hekk, jaffettwaw il-kummerċ bejn l-Istati Membri.

(208)

Għar-raġunijiet spjegati, il-Kummissjoni ssib li l-għotjiet imħallsin mill-awtoritajiet reġjonali u l-istituzzjonijiet pubbliċi tal-Ġermanja għat-telf operatorju ta' Flugplatz Altenburg-Nobitz GmbH fil-perjodu mit-12 ta' Diċembru 2000 jikkostitwixxu għajnuna mill-Istat skont it-tifsira tal-Artikolu 107(1) TFUE.

(209)

Il-Kummissjoni eskludiet il-kuntratt ta' kummerċjalizzazzjoni finali konkluż ma' AMS fil-21 ta' Settembru 2010 u l-“ittra ta' akkumpanjament” mill-analiżi tagħha, peress li dawn kienu ffinanzjati minn impriżi reġjonali privati li kienu qablu li jżommu l-attivitajiet ta' Ryanair fl-ajruport (114).

(210)

Skont l-Artikolu 107(1) TFUE, id-dispożizzjonijiet dwar l-għajnuna mill-Istat japplikaw biss jekk il-benefiċjarju jkun “impriża”. Il-Qorti tal-Ġustizzja tal-Unjoni Ewropea ddefinixxiet b'konsistenza lill-impriżi bħala entitajiet attivi f'attività ekonomika, indipendentement mill-istatus legali tagħhom, min hu sidhom u l-mod li bih huma ffinanzjati (115). Kwalunkwe attività li tikkonsisti fl-offerta ta' prodotti u servizzi f'suq partikolari hija attività ekonomika (116).

(211)

Ryanair toffri servizzi tat-traffiku tal-ajru tal-passiġġieri skedati fis-suq. Huwa ċar li hija attiva f'attività ekonomika.

(212)

AMS hija sussidjarja 100 % ta' Ryanair. Għalhekk, jista' jiġi supponut li Ryanair għandha influwenza deċiżjonali fuq il-kondotta ta' AMS. Barra minn hekk, il-kuntratti ta' kummerċjalizzazzjoni tal-2008 u l-2010 ġew iffirmati f'isem AMS mis-Sur Eddie Wilson, li dak iż-żmien kien kemm id-direttur ta' AMS kif ukoll direttur ta' Ryanair. (117) Il-preambolu għal dawn il-kuntratti ta' kummerċjalizzazzjoni jistipula li “AMS għandha liċenzja esklussiva li toffri servizzi ta' kummerċjalizzazzjoni fuq is-sit web tal-ivvjaġġar www.ryanair.com, is-sit web tal-linja tal-ajru low-cost Ryanair”. Għalhekk, għall-fini tal-applikazzjoni tad-dispożizzjonijiet dwar l-għajnuna mill-Istat, AMS u Ryanair jitqiesu bħala impriża waħda skont it-tifsira tal-Artikolu 107(1) TFUE.

(213)

Kwalunkwe vantaġġ mogħti minn riżorsi tal-Istat mill-Istat innifsu jew minn korp delegat li jaġixxi bis-setgħat ittrasferiti lilu mill-Istat jikkwalifika bħala għajnuna mill-Istat. (118) L-Artikolu 107 TFUE fuq ir-riżorsi tal-Istat japplika għar-riżorsi tal-awtoritajiet lokali. (119)

(214)

F'dan il-każ, l-Istat eżerċita kontroll dirett jew indirett fuq ir-riżorsi inkwistjoni f'dan il-każ f'kull ħin materjali. Flugplatz Altenburg-Nobitz GmbH kellha maġġoranza ta' azzjonisti pubbliċi mindu daħlet f'negozjati ma' Ryanair. Bħalissa, hija proprjetà sħiħa ta' azzjonisti pubbliċi (l-azzjonisti kollha huma awtoritajiet pubbliċi jew huma awtoritajiet pubbliċi bi sjieda sħiħa) u l-kumpanija stess għandha 32 % tal-istokk tagħha.

(215)

Għaldaqstant, il-Kummissjoni hija tal-fehma li r-riżorsi kollha ta' Flugplatz Altenburg-Nobitz GmbH iridu jitqiesu li huma riżorsi tal-Istat.

(216)

Il-Qorti ddikjarat li, anki jekk l-Istat ikun f'pożizzjoni li jikkontrolla impriża pubblika u li jeżerċita influwenza dominanti fuq l-operat tagħha, l-eżerċitar propju ta' dak il-kontroll f'każ partikolari ma jistax jiġi presupponut b'mod awtomatiku. Impriża pubblika tista' taġixxi b'inqas indipendenza jew b'iktar, skont il-grad ta' awtonomija li jħalliha l-Istat. Is-sempliċi fatt li impriża pubblika tkun taħt il-kontroll tal-Istat mhuwiex biżżejjed għall-miżuri meħudin minn dik l-impriża, bħall-kuntratt tat-3 ta' Marzu 2003 konkluż bejn Flugplatz Altenburg-Nobitz GmbH u Ryanair u l-kuntratti ta' kummerċjalizzazzjoni sussegwenti inkwistjoni hawnhekk, li jridu jiġu imputati lill-Istat (120).

(217)

Skont il-Qorti, dawn li ġejjin huma indikaturi ta' imputabbiltà (121):

(218)

Il-Ġermanja targumenta li l-Ministeru għall-Bini u t-Trasport tal-Land ta' Thüringen ma kellu ebda dritt ta' kontroll matul il-konklużjoni tal-kuntratti ma' Ryanair jew AMS. Skont il-Ġermanja, il-ministeru relevanti u l-gvern tal-Land ta' Thüringen kienu involuti biss fil-proċess ta' teħid ta' deċiżjonijiet tal-investimenti infrastrutturali fl-ajruport. Il-Ġermanja tiċħad l-argument tal-Kummissjoni fir-rigward tal-funzjoni superviżorja tal-Ministeru għall-Bini u t-Trasport tal-Land ta' Thüringen u b'hekk l-imputabbiltà presupponuta tal-miżuri inkwistjoni għall-Istat.

(219)

Il-Ġermanja tiċħad ukoll l-argument tal-Kummissjoni li t-tariffi tal-ajruport kellhom jiġu approvati minn qabel mill-awtoritajiet ta' sorveljanza skont l-Att Ġermaniż dwar it-Traffiku tal-Ajru, jiġifieri s-Sezzjoni 43a LuftVZO [ir-Regolament dwar il-Liċenzjar tat-Traffiku tal-Ajru]. Skont il-Ġermanja, Flugplatz Altenburg-Nobitz GmbH irnexxielha tintroduċi tariffi tal-ajruport mingħajr l-approvazzjoni tal-awtorità superviżorja, peress li l-awtorità superviżorja kellha sempliċiment teżamina t-tariffi li jaqbżu ammont speċifiku.

(220)

F'Awwissu 2010, il-Kamra tal-Kummerċ Gera (istituzzjoni pubblika) nediet kampanja favur iż-żamma tal-kunċett ta' low-cost fl-AOC u sejħet lill-gvern tal-Land ta' Thüringen sabiex jinnegozja mill-iktar fis destinazzjonijiet u miżuri ta' kummerċjalizzazzjoni ma' Ryanair (122). Skont il-Ġermanja, dan l-argument jikkorrobora l-analiżi bbażata fuq il-prinċipju ta' investitur privat f'ekonomija tas-suq, li sab li kien jagħmel sens ekonomiku li jinżammu u jiġu appoġġjati r-rotot ta' Ryanair.

(221)

Madankollu, il-Kummissjoni hija tal-fehma li l-ministeri kompetenti tal-Land ta' Thüringen kienu involuti fil-konklużjoni tal-kuntratti ma' Ryanair. Il-Land ta' Thüringen milli jidher ħa sehem fin-negozjati ta' qabel il-konklużjoni tal-kuntratt tas-servizzi tal-ajruport bejn Flugplatz Altenburg-Nobitz GmbH u Ryanair. Skont artiklu fl-istampa, in-negozjati mexew bil-lajma għaliex il-ministeri tal-Land ta' Thüringen ppruvaw jimblokkaw in-negozjata (123). Fl-istess ħin, il-Ministeru ta' Thüringen għall-Affarijiet Ekonomiċi Schuster qies li l-Land kien f'pożizzjoni li japprova l-miżuri meħtieġa. Huwa kkwotat li qal li jekk Ryanair kienet teħtieġ runway itwal, kienet sejra tiġi pprovduta runway itwal. L-artiklu jispjega wkoll li l-operazzjonijiet il-ġodda ta' Ryanair fl-AOC jistgħu jwasslu għal tnaqqis fin-numri ta' passiġġieri fl-Ajruport ta' Dresden u l-Ajruport ta' Leipzig/Halle (124).

(222)

Il-Ministeru tal-Bini u t-Trasport tal-Istat Ħieles tat-Turinġja huwa l-awtorità superviżorja ta' Flugplatz Altenburg-Nobitz GmbH. Barra minn hekk, skont l-Att Ġermaniż dwar it-Traffiku tal-Ajru, jiġifieri s-Sezzjoni 43a LuftVZO, it-tariffi tal-ajruport iridu jiġu approvati bil-quddiem mill-awtorità superviżorja. Ir-Regolamenti tal-AOC dwar it-Tariffi tat-18 ta' Settembru 2006 jipprovdu wkoll għall-firma ta' rappreżentant tal-Ministeru għall-Bini u t-Trasport.

(223)

Mid-dibattiti fil-Landtag [il-Parlament reġjonali] tal-Istat Ħieles tat-Turinġja, jidher ċar li l-ministeri kienu involuti f'livell politiku. Skont il-minuti dettaljati, il-Landtag iddibatta kemm kwistjonijiet tekniċi kif ukoll il-vijabbiltà ekonomika ġenerali tal-ajruport. (125).

(224)

Il-kuntratti ta' kummerċjalizzazzjoni ma' Ryanair ġew diskussi fil-Kreistag [kunsill tal-kontea] ukoll. Skont artiklu fl-istampa, il-Kreistag approva l-ħlas ta' EUR 670 000 għall-miżuri ta' kummerċjalizzazzjoni b'rabta mal-introduzzjoni ta' rotta ġdida ta' Ryanair (126). Il-Landrat huwa kkwotat jgħid li r-rotot skedati kienu jiġu sospiżi mingħajr il-pagamenti tal-kummerċjalizzazzjoni.

(225)

Finalment, il-Kummissjoni tosserva li l-involviment tal-Kamra tal-Kummerċ Gera (korp awtoregolatorju tal-liġi pubblika) fil-konklużjoni tal-kuntratti ta' Ryanair jikkonferma li l-influwenza pubblika ġiet eżerċitata matul il-proċess ta' teħid ta' deċiżjonijiet rigward dawk il-kuntratti.

(226)

Finalment, fid-dawl tas-superviżjoni eżerċitata mill-Ministeru għall-Bini u t-Trasport tal-Land ta' Thüringen, l-involviment tal-ministeri f'livell politiku, il-bosta dibattiti fil-Landtag tal-Land ta' Thüringen u l-involviment tal-istituzzjonijiet pubbliċi, jidher li l-korpi pubbliċi kienu f'pożizzjoni li jikkontrollaw l-attivitajiet ta' Flugplatz Altenburg-Nobitz GmbH. Jidher ukoll li kienu involuti f'deċiżjonijiet importanti rigward l-użu kummerċjali tal-ajruport. B'mod partikolari, meta l-kumpanija kienet qiegħda tissielet ma' problemi fl-ajruport, l-awtoritajiet pubbliċi kienu involuti f'taħditiet dwar il-ġejjieni tal-ajruport. Id-dibattiti kontroversjali saru fil-Land ta' Thüringen f'livell politiku. Il-bidla fil-gvern tal-istat federali fl-2010 ikkontribwixxiet għad-deċiżjoni ta' konverżjoni tal-ajruport u sabiex jieqaf it-traffiku tal-ajru low-cost (127).

(227)

Għalhekk, il-Kummissjoni hija tal-fehma li d-deċiżjoni li jitwettaq il-kuntratt tat-3 ta' Marzu 2003 u l-kuntratt ta' kummerċjalizzazzjoni tas-7 ta' April 2003 konkluż bejn Flugplatz Altenburg-Nobitz GmbH u Ryanair u l-kuntratti ta' kummerċjalizzazzjoni sussegwenti konklużi bejn Flugplatz Altenburg-Nobitz GmbH u Airport Marketing Services trid tiġi imputata lill-awtoritajiet pubbliċi.

(228)

Sabiex jiġi stabbilit jekk Ryanair jew AMS kisbux vantaġġ permezz tas-servizzi tal-ajruport u l-kummerċjalizzazzjoni, il-Kummissjoni trid teżamina jekk ajruport li jaġixxi f'kundizzjonijiet normali tas-suq u ggwidat minn prospetti ta' profitabilità fit-tul kienx jidħol fl-istess ftehimiet kummerċjali bħal Flugplatz Altenburg-Nobitz GmbH f'ċirkustanzi simili. L-eżistenza ta' vantaġġ normalment tista' tiġi skontata jekk (a) il-prezz mitlub għas-servizzi tal-ajruport jikkorrispondi għall-prezz tas-suq jew (b) jekk analiżi ex ante turix li l-kuntratti mal-linja tal-ajru jikkontribwixxu b'mod inkrementali għall-profittabilità tal-ajruport u jagħmlux parti minn strateġija ġenerali li jsir iktar profittabbli fit-tul.

(229)

Skont is-sentenza Cherleroi (128), il-Kummissjoni, meta tivvaluta l-miżuri kkonċernati, trid teżamina l-karatteristiċi relevanti kollha tal-miżuri u l-kuntest tagħhom. Fi kliem ieħor, il-Kummissjoni, meta tivvaluta l-impatt antiċipat tal-kuntratti fuq l-AOC, trid teżamina l-funzjonijiet relevanti kollha tal-miżuri inkwistjoni.

(230)

Fis-sentenza tagħha fi Stardust Marine, il-Qorti ddikjarat li “sabiex teżamina jekk l-Istat adottax il-kondotta ta' investitur prudenti li jopera f'ekonomija tas-suq, hemm bżonn li wieħed jimmaġina lilu nnifsu fil-kuntest tal-perjodu li matulu ttieħdu l-miżuri ta' appoġġ finanzjarju sabiex jiġi vvalutat il-ħsieb ekonomiku wara l-kondotta tal-Istat, u b'hekk joqgħod lura milli jagħmel valutazzjoni fuq il-bażi ta' sitwazzjoni li seħħet wara” (129).

(231)

Sabiex tapplika t-test ta' investitur li jopera f'ekonomija tas-suq, il-Kummissjoni trid tqiegħed lilha nfisha fil-perjodu li matulu ġew konklużi l-kuntratti bejn l-AOC u Ryanair, jiġifieri l-2003 għall-kuntratt tas-servizzi tal-ajruport u l-ewwel kuntratt ta' kummerċjalizzazzjoni, l-2008 għat-tieni kuntratt ta' kummerċjalizzazzjoni u l-2010 għat-tielet kuntratt. Il-Kummissjoni trid tibbaża l-valutazzjoni tagħha wkoll fuq l-informazzjoni u s-suppożizzjonijiet ta' qabel l-ajruport meta ġew iffirmati l-kuntratti.

(232)

Il-Kummissjoni trid tistabbilixxi jekk it-termini tal-prezzijiet applikati minn Flugplatz Altenburg-Nobitz GmbH għal Ryanair u AMS kinux prezzijiet tas-suq. Fuq dan il-punt, il-Ġermanja targumenta li l-kuntratt tas-servizzi tal-ajruport konkluż bejn l-AOC u Ryanair fit-3 ta' Marzu 2003 ġie konkluż bit-termini tas-suq u li t-tariffi tal-ajruport mitlubin lil Ryanair kienu jirrispettaw it-tariffi stipulati fir-Regolament dwar it-Tariffi tal-Ajruport deskritti fit-Taqsima 3.4.1. Ir-Regolament dwar it-Tariffi japplika għal-linji tal-ajru kollha li potenzjalment sejrin jillandjaw u jitilqu mill-ajruport. Il-Ġermanja hija tal-fehma li l-fatt li Ryanair kienet l-unika linja tal-ajru li użat l-Ajruport Altenburg-Nobitz bejn l-2003 u l-2011 huwa irrelevanti.

(233)

Il-Ġermanja tieħu l-pożizzjoni li l-kuntratti tas-servizzi ta' kummerċjalizzazzjoni konklużi ma' Ryanair u AMS għandhom jiġu kkunsidrati b'mod separat. Madankollu, il-Kummissjoni tosserva li AMS hija sussidjarja 100 % ta' Ryanair. Għaldaqstant, il-Kummissjoni hija tal-fehma li ż-żewġ tipi ta' kuntratti ma' Ryanair u AMS għandhom jiġu kkunsidrati f'daqqa. It-tieni punt li jrid jiġi nnotat f'dak li għandu x'jaqsam mal-valutazzjoni separata tal-kuntratt tas-servizzi tal-ajruport ma' Ryanair u l-kuntratt ta' kummerċjalizzazzjoni tas-7 ta' April 2003 huwa li l-kuntratt ta' kummerċjalizzazzjoni nnifsu jgħid li t-tariffa ta' suċċess trid titnaqqas mill-imposta netta pagabbli minn Ryanair. Fil-kuntratt stess il-partijiet jagħżlu li jirrikorru għal imposta netta miksuba mit-tariffi pagabbli minn Ryanair għal servizzi tal-ajruport, minn naħa, u t-tariffi ta' kummerċjalizzazzjoni pagabbli mill-ajruport, mill-oħra.

(234)

Sabiex jiġi stabbilit jekk il-linja tal-ajru inkwistjoni kinitx qiegħda tħallas prezz tas-suq, il-Kummissjoni trid teżamina l-prezz sħiħ imħallas mil-linja tal-ajru. Bejn l-2003 u l-2011, meta serviet fl-AOC, Ryanair tabilħaqq ħallset it-tariffi tal-ajruport lil Flugplatz Altenburg-Nobitz GmbH u rċeviet pagament mingħand l-ajruport għal servizzi ta' kummerċjalizzazzjoni. Kif stipulat fil-paragrafu 49, skont l-awtoritajiet Ġermaniżi, l-AOC talab lil Ryanair tariffa fissa għall-illandjar ta' […]* għal kull inġenju tal-ajru u tariffa tal-passiġġieri ta' […]* għal kull passiġġier. Jidher li ma kien hemm ebda tariffa separata għall-immaniġġjar, peress li t-tariffi mħallsin minn Ryanair kienu jinkludu l-immaniġġjar (130). Madankollu, dawn it-tariffi tnaqqsu bit-“tariffa ta' suċċess” tal-kummerċjalizzazzjoni, jiġifieri Ryanair finalment ħallset biss tariffa fissa ta' […]*. (131) għal kull passiġġier tielaq. Konsegwentement, Ryanair irċeviet skont fuq it-tariffi uffiċjali stabbiliti fir-Regolament tal-AOC dwar it-Tariffi u deskritti fit-Taqsima 3.4.1.

(235)

Irid jiġi stabbilit punt ta' riferiment xieraq sabiex jiġi stabbilit jekk il-prezz mitlub minn ajruport ta' linja tal-ajru huwiex prezz tas-suq. Madankollu, il-Kummissjoni għandha dubji serja li jista' jiġi stabbilit punt ta' riferiment xieraq bl-użu ta' proċedura normattiva f'dan il-każ sabiex jiġi stabbilit il-prezz tas-suq veru tas-servizzi pprovduti minn Ryanair u AMS. Il-Kummissjoni xorta waħda hija tal-fehma li proġett ta' punti ta' riferiment għandu jkun ibbażat fuq paragun tat-tariffi tal-ajruport — nieqes il-benefiċċji mogħtijin lil-linja tal-ajru inkwistjoni (bħall-appoġġ għall-kummerċjalizzazzjoni, skontijiet jew inċentivi oħrajn) — u li kwalunkwe proġett bħal dan irid ikun ibbażat fuq numru adegwat ta' ajruporti komparaturi xierqa mal-operaturi tas-suq. Fid-dawl tad-diffikultà f'dan il-każ sabiex jiġu identifikati ajruporti komparaturi, il-Kummissjoni tqis li analiżi tal-profittabilità inkrementali ex ante hija l-iktar kriterju xieraq għall-valutazzjoni tal-kuntratti konklużi bejn l-AOC u Ryanair/AMS.

(236)

Il-Kummissjoni hija tal-fehma li l-ftehimiet konklużi bejn il-linji tal-ajru u ajruport jistgħu jitqiesu li jgħaddu mit-test ta' investitur f'ekonomija tas-suq jekk, minn perspettiva ex ante, jikkontribwixxu b'mod inkrementali għall-profittabilità tal-ajruport. L-ajruport għandu juri bil-provi li, meta jidħol fi ftehim ma' linja tal-ajru (pereżempju skont kuntratt individwali jew regolament komprensiv dwar it-tariffi tal-ajruport), ikun f'pożizzjoni li jkopri l-kostijiet kollha dovuti skont dan il-ftehim tul it-terminu tal-ftehim b'marġni ta' profitt raġonevoli (132) fuq il-bażi ta' prospettivi affidabbli fit-terminu medju (133).

(237)

Għaldaqstant, il-Kummissjoni sejra teżamina l-kostijiet antiċipati kollha mġarrbin b'mod inkrementali mill-ajruport b'rabta mal-attività tal-linja tal-ajru fl-ajruport. (134). Il-kostijiet inkrementali jistgħu jinkludu kull xorta ta' nefqa jew investimenti, bħal kostijiet inkrementali għall-persunal, tagħmir u investimenti ġġenerati mill-preżenza tal-linja tal-ajru fl-ajruport. Jekk, pereżempju, l-ajruport irid jestendi terminal jew jibni terminal ġdid jew faċilitajiet oħrajn primarjament sabiex jissodisfa l-ħtiġijiet ta' linja tal-ajru partikolari, it-tali kostijiet iridu jiġu kkunsidrati meta jiġu kkalkolati l-kostijiet inkrementali.

(238)

Il-Kummissjoni sejra tibbaża l-analiżi ex ante inkrementali tagħha fuq l-iskeda oriġinali pprovduta fil-kuntratt, għad li l-kuntratt fil-fatt intemm qabel id-data ta' tmiem oriġinali.

(239)

Il-Kummissjoni sejra tqis it-tliet analiżijiet inkrementali għall-fini ta' valutazzjoni tal-profittabilità tal-erba' kuntratti kollha kemm huma konklużi bejn l-ajruport u Ryanair/AMS:

(240)

Il-Kummissjoni sejra tibda billi tagħmel analiżi ex ante għall-perjodu 2003-2013 (fuq il-bażi tal-fatt li ż-żewġ kuntratti kellhom terminu ta' għaxar snin), sabiex teżamina jekk il-kuntratt tas-servizzi tal-ajruport tat-3 ta' Marzu 2003 konkluż ma' Ryanair u l-ewwel kuntratt ta' kummerċjalizzazzjoni tas-7 ta' April 2003 konkluż ma' Ryanair ikkontribwixxiex b'mod inkrementali għall-profittabilità tal-ajruport.

(241)

Sabiex tivvaluta l-kontribuzzjoni kemm taż-żewġ kuntratti ta' Ryanair għall-profittabilità tal-ajruport, il-Kummissjoni sejra tistabbilixxi s-suppożizzjonijiet rigward il-kostijiet u d-dħul inkrementali li Flugplatz Altenburg-Nobitz GmbH kienet f'pożizzjoni li tagħmel fuq il-bażi tal-informazzjoni disponibbli għaliha meta daħlet fin-negozju ma' Ryanair fl-2003. Il-Kummissjoni sejra tibbaża l-valutazzjoni tagħha fuq id-dejta li l-Ġermanja pprovdiet fit-tabella mħejjija mill-ajruport u mressqa fil-laqgħa ġenerali tal-azzjonisti li saret fit-22 ta' April 2003. Dik it-tabella turi li r-relazzjoni kummerċjali l-ġdida ma' Ryanair tiġġenera profitt annwali addizzjonali ta' […]* (135).

(242)

Il-kostijiet inkrementali jinkludu:

(243)

Il-kostijiet tas-servizzi ta' kummerċjalizzazzjoni huma riflessi, skont il-kuntratt ta' kummerċjalizzazzjoni tal-2003, fl-imposta netta pagabbli minn Ryanair għal kull passiġġier tielaq.

(244)

Fir-rigward tal-kostijiet ta' investiment inkrementali, il-Kummissjoni tosserva li l-estensjoni tar-runway kienet obbligu impost fuq l-AOC mill-kuntratt konkluż bejnu u Ryanair. Għad li l-Ġermanja ddikjarat li r-runway ma kinitx estiża kemm talab il-kuntratt ta' Ryanair, l-estensjoni hia kkonfermata fir-rapporti annwali 2003 u 2004 ta' Flugplatz Altenburg-Nobitz GmbH. Jiddikjaraw li r-runway kellha bżonn tiġi estiża b'rabta mal-kuntratt tas-servizzi ta' Ryanair, sabiex Ryanair tkun tista' topera fl-ajruport. Il-Kummissjoni sejra tinkludi l-estensjoni tar-runway fl-2003 u l-2004 għal dik ir-raġuni. Peress li l-Ġermanja ma ħejjietx pronjożi ex ante tal-kostijiet assoċjati, il-Kummissjoni sejra tqis is-somma kumplessiva effettiva ta' EUR 687 882 (136) għaż-żewġ estensjonijiet (l-ewwel waħda fl-2003 u t-tieni fl-2004) (137). Skont il-Ġermanja, ir-runway ma ġietx estiża kemm talbet Ryanair. Suppożizzjoni bħal din taħdem favur Ryanair.

(245)

Fir-rigward tal-kostijiet operatorji inkrementali assoċjati direttament ma' Ryanair, il-Kummissjoni sejra tqis is-somma fix-xahar ta' EUR 12 137,50 li kkwotat il-Ġermanja fit-tabella datata t-22 ta' April 2003, li tiġi EUR 145 650 fis-sena. Din is-somma sejra tiġi korretta għall-inflazzjoni (2 % fis-sena).

(246)

Fir-rigward tad-dħul inkrementali antiċipat minn din l-attività l-ġdida ma' Ryanair, il-Kummissjoni sejra tqis id-dħul li ġej:

(247)

Il-Kummissjoni sejra tieħu bħala n-numru ta' passiġġieri n-numru ta' passiġġieri li Flugplatz Altenburg-Nobitz GmbH kienet tantiċipa fl-2003. Fl-2003 intlaħaq ftehim fuq titjira waħda ta' kuljum minn Altenburg-Nobitz lejn Londra. B'fattur ta' tagħbija ta' 80 %, li hija projjezzjoni saħansitra iktar ottimista mir-rata użata mill-ajruport fil-projjezzjoni tiegħu tal-2003 (70 %), jiġu 118-il passiġġier. (142). Din tipprovdi 43 216-il passiġġier addizzjonali fis-sena minn Ryanair. (143).

(248)

Il-Ġermanja la ma pprovdiet rata ta' skont u lanqas kostijiet kapitali medji ponderati għall-ajruport. Għaldaqstant, il-Kummissjoni sejra tapplika rata ta' skont ta' 4,80 % fuq il-bażi tal- (144) komunikazzjoni tal-2008 tagħha dwar ir-rati tal-imgħax ta' referenza, li tikkwota rata tal-imgħax ta' referenza ta' 4,80 % għall-Ġermanja għall-perjodu ta' bejn l-1 ta' Jannar 2003 u l-31 ta' Lulju 2003.

(249)

It-Tabella 17 turi l-pjan ta' direzzjoni tan-negozju inkrementali li jirriżulta, inkluża kull suppożizzjoni deskritta. Sabiex jiġi żgurat li l-kuntratti ma' Ryanair jagħmlu kontribuzzjoni inkrementali għall-profittabilità tal-ajruport, il-pjan kellu jittieħed f'kunsiderazzjoni minn Flugplatz Altenburg-Nobitz GmbH qabel ma daħlet fin-negozju ma' Ryanair. Il-valur preżenti nett tal-flussi tal-flus huwa pożittiv. Dan juri li, fuq il-bażi ta' projjezzjoni ex ante, il-kuntratt tas-servizzi ma' Ryanair, flimkien mal-ewwel kuntratt ta' kummerċjalizzazzjoni (2003), kien iħalli l-profitt għall-ajruport.

Tabella 17

Pjan ta' direzzjoni tan-negozju ex ante għall-kuntratt tas-servizzi tal-ajruport u l-kuntratt ta' kummerċjalizzazzjoni

(250)

Il-Kummissjoni sejra twettaq analiżi ex ante sabiex tixtarr jekk il-kuntratt ta' kummerċjalizzazzjoni konkluż ma' AMS fit-28 ta' Awwissu 2008 u l-kuntratt tas-servizzi tal-ajruport tal-2003 u l-kuntratt ta' kummerċjalizzazzjoni kkontribwixxewx b'mod inkrementali għall-profittabilità tal-ajruport. Għaldaqstant, il-Kummissjoni sejra tistabbilixxi l-kostijiet inkrementali u d-dħul li Flugplatz Altenburg-Nobitz GmbH setgħet tistenna minn dan il-kuntratt il-ġdid fuq il-bażi tal-informazzjoni disponibbli għaliha fl-2008. Peress li l-kuntratt tal-2008 kellu terminu ta' sentejn, l-analiżi sejra ssir għal sentejn (145).

(251)

Il-kostijiet inkrementali jinkludu:

(252)

Il-kostijiet tas-servizzi ta' kummerċjalizzazzjoni huma riflessi, skont il-kuntratt ta' kummerċjalizzazzjoni tal-2003, fl-imposta netta ta' […]* (146) pagabbli minn Ryanair għal kull passiġġier tielaq. It-tieni (2008) kuntratt ta' kummerċjalizzazzjoni introduċa wkoll ammont fiss pagabbli mil-ajruport lil AMS ta' […]* EUR għall-2008 u […]* EUR għall-2009.

(253)

Fir-rigward tal-kostijiet operatorji inkrementali assoċjati direttament ma' Ryanair, il-Kummissjoni sejra tqis is-somma fix-xahar ta' EUR 12 137,50 li kkwotat inizjalment il-Ġermanja f'April 2003 li, wara jekk titqies rata annwali tal-inflazzjoni ta' 2 %, tiġi EUR 13 401 fl-2008. Imbagħad dak l-ammont jiġi rivedut b'mod annwali fuq il-bażi tar-rata ta' inflazzjoni (2 % fis-sena).

(254)

Il-Kummissjoni sejra tqis id-dħul li ġej sabiex tivvaluta d-dħul inkrementali:

(255)

Il-Kummissjoni sejra tieħu bħala n-numru ta' passiġġieri n-numru ta' passiġġieri li Flugplatz Altenburg-Nobitz GmbH kienet tantiċipa fl-2008. Il-kuntratt tas-servizzi ta' kummerċjalizzazzjoni tal-2008 jirreferi taħt l-intestatura “suġġett” għas-servizz ta' bejn l-AOC u Londra, li kellu jiġi pprovdut erba' darbiet fil-ġimgħa fl-istaġun tax-xitwa u kuljum fis-sajf, u rotta lejn Ġirona, li kellha tiġi pprovduta biss tliet darbiet fil-ġimgħa fis-sajf (148). Fuq il-bażi ta' fattur ta' tagħbija ta' 80 % f'inġenju tal-ajru b'189 sit (149), il-Kummissjoni tikkalkola li n-numru antiċipat ta' passiġġieri huwa ta' 45 333 fis-sena għat-titjiriet lejn Londra u 13 797 għat-titjiriet lejn Ġirona.

(256)

Il-Ġermanja la ma pprovdiet rata ta' skont u lanqas kostijiet kapitali medji ponderati għall-ajruport. Għaldaqstant, il-Kummissjoni sejra tapplika rata ta' skont ta' 5,59 % fuq il-bażi tal-komunikazzjoni tagħha tal-2008 dwar ir-rati tal-imgħax ta' referenza (150), li tikkwota rata bażi ta' 4,59 % għall-Ġermanja għall-perjodu ta' bejn l-1 ta' Lulju 2008 u l-31 ta' Awwissu 2008, li magħha jridu jiżdiedu 100 punt bażi.

(257)

It-Tabella 18 turi l-pjan ta' direzzjoni tan-negozju inkrementali li jirriżulta, inkluża kull suppożizzjoni deskritta. Sabiex jiġi żgurat li dan il-kuntratt jagħmel kontribuzzjoni inkrementali għall-profittabilità tal-ajruport, il-pjan kellu jittieħed f'kunsiderazzjoni minn Flugplatz Altenburg-Nobitz GmbH qabel ma ffirmat il-ftehim ta' kummerċjalizzazzjoni tagħha ma' AMS fl-2008. Il-valur preżenti nett tal-flussi tal-flus huwa pożittiv. Dan juri li, fuq il-bażi ta' projjezzjoni ex ante, dan it-tieni kuntratt ta' kummerċjalizzazzjoni, flimkien mal-kuntratt tas-servizzi tal-ajruport tal-2003 u l-ewwel kuntratt ta' kummerċjalizzazzjoni, kien iħalli l-profitt għall-ajruport.

Tabella 18

Il-pjan ta' direzzjoni tan-negozju ex ante għall-kuntratt tas-servizzi tal-ajruport tal-2003 u l-kuntratt ta' kummerċjalizzazzjoni tat-28 ta' Awwissu 2008

(258)

Il-Kummissjoni sejra twettaq analiżi ex ante sabiex tixtarr jekk il-kuntratt ta' kummerċjalizzazzjoni konkluż ma' AMS fil-25 ta' Jannar 2010 u l-kuntratt tas-servizzi tal-ajruport tal-2003 u l-kuntratt ta' kummerċjalizzazzjoni kkontribwixxew b'mod inkrementali għall-profittabilità tal-ajruport. Għaldaqstant, il-Kummissjoni sejra tistabbilixxi l-kostijiet inkrementali u d-dħul li Flugplatz Altenburg-Nobitz GmbH setgħet tistenna minn dan il-kuntratt il-ġdid fuq il-bażi tal-informazzjoni disponibbli għaliha fl-2010.

(259)

Il-kuntratt tal-2010 kellu terminu ta' iktar minn sena (beda fil-25 ta' Jannar 2010 u ntemm sena wara li bdiet l-ewwel rotta, li kellha tibda mal-istaġun tas-sajf tal-2010). Madankollu, is-servizzi pprovduti minn Ryanair damu għal seba' xhur (l-istaġun tas-sajf tal-IATA). Għaldaqstant, il-Kummissjoni sejra twettaq analiżi inkrementali għal seba' xhur.

(260)

Il-kostijiet inkrementali jinkludu:

(261)

Il-kostijiet tas-servizzi ta' kummerċjalizzazzjoni huma riflessi, skont il-kuntratt ta' kummerċjalizzazzjoni tal-2003, fl-imposta netta ta' […]* (151) pagabbli minn Ryanair għal kull passiġġier tielaq. It-tielet (2010) kuntratt ta' kummerċjalizzazzjoni introduċa wkoll ammont fiss pagabbli mill-ajruport lil AMS ta' […]* EUR għall-2010 u […]* EUR għall-2010.

(262)

Fir-rigward tal-kostijiet operatorji inkrementali assoċjati direttament ma' Ryanair, il-Kummissjoni sejra tqis is-somma fix-xahar ta' EUR 12 137,50 li kkwotat inizjalment il-Ġermanja f'April 2003 li, wara jekk titqies rata annwali tal-inflazzjoni ta' 2 %, tiġi EUR 13 942 fl-2010.

(263)

Il-Kummissjoni sejra tqis id-dħul li ġej sabiex tivvaluta d-dħul inkrementali:

(264)

Il-Kummissjoni sejra tieħu numru ta' passiġġieri fuq il-bażi ta' dak li Flugplatz Altenburg-Nobitz GmbH kienet tantiċipa fl-2008 (sic) mill-konklużjoni tal-kuntratt tas-servizzi ta' kummerċjalizzazzjoni tal-2010. Taħt “suġġett”, il-kuntratt jirreferi għas-servizz ta' kuljum bejn l-AOC u Londra, il-konnessjoni ma' Ġirona tliet darbiet fil-ġimgħa u l-konnessjoni ma' Alicante darbtejn fil-ġimgħa mill-istaġun tas-sajf tal-2010. Fuq il-bażi ta' fattur ta' tagħbija ta' 80 % f'inġenju tal-ajru b'189 sit (153), il-Kummissjoni tikkalkola li n-numru ta' passiġġieri tul dawn is-seba' xhur huwa ta' 32 193 għat-titjiriet lejn Londra, 13 979 għat-titjiriet lejn Barċellona u 9 198 għat-titjiriet lejn Alicante.

(265)

It-Tabella 19 turi l-pjan ta' direzzjoni tan-negozju inkrementali li jirriżulta, inkluża kull suppożizzjoni deskritta. Sabiex jiġi żgurat li dan il-kuntratt jagħmel kontribuzzjoni inkrementali għall-profittabilità tal-ajruport, il-pjan kellu jittieħed f'kunsiderazzjoni minn Flugplatz Altenburg-Nobitz GmbH qabel ma ffirmat il-ftehim ta' kummerċjalizzazzjoni tagħha ma' AMS fl-2010. Il-fluss tal-flus tul il-perjodu inkwistjoni huwa negattiv. Dan juri li, fuq il-bażi ta' projjezzjoni ex ante, dan it-tielet kuntratt ta' kummerċjalizzazzjoni, flimkien mal-kuntratt tas-servizzi tal-ajruport tal-2003 u l-kuntratt ta' kummerċjalizzazzjoni, ma kienx iħalli profitt għall-ajruport.

Tabella 19

Il-pjan ta' direzzjoni tan-negozju ex ante għall-kuntratt tas-servizzi tal-ajruport tal-2003 u l-kuntratt ta' kummerċjalizzazzjoni tal-25 ta' Jannar 2010

(266)

Għaldaqstant, l-ajruport ħallas lil Ryanair jew AMS EUR […]* għal seba' xhur servizzi tal-ajruport fl-2010, li ġġeneraw EUR […]* fi dħul marbut mal-avjazzjoni u EUR […]* fi dħul mhux marbut mal-avjazzjoni għall-ajruport. F'dak iż-żmien u tul il-perjodu mill-2003, is-sena li fiha l-ajruport daħal f'negozju ma' Ryanair, l-ajruport qatt ma għamel il-profitt, lanqas f'livell operatorju, mingħajr sussidji pubbliċi.

(267)

Fil-qosor, il-Kummissjoni tikkonkludi li t-termini offruti lil Ryanair/AMS fi ħdan il-qafas tat-taħlita tal-kuntratt tas-servizzi tal-ajruport konkluż fit-3 ta' Marzu 2003 u l-kuntratti ta' kummerċjalizzazzjoni konklużi fis-7 ta' April 2003 u t-28 ta' Awwissu 2008 bejn Flugplatz Altenburg-Nobitz GmbH u Ryanair/AMS kienu termini tas-suq. Għaldaqstant, il-Kummissjoni hija tal-fehma li Ryanair/AMS ma kisbux vantaġġ ekonomiku selettiv minn dik it-taħlita ta' kuntratti.

(268)

Madankollu, il-Kummissjoni tikkonkludi li t-termini offruti lil Ryanair/AMS fi ħdan il-qafas tat-taħlita tal-kuntratt tas-servizzi tal-ajruport konkluż fit-3 ta' Marzu 2003 u l-kuntratti ta' kummerċjalizzazzjoni konklużi fis-7 ta' April 2003 u l-25 ta' Jannar 2010 bejn Flugplatz Altenburg-Nobitz GmbH u Ryanair/AMS ma kinux termini tas-suq. Għaldaqstant, il-Kummissjoni hija tal-fehma li Ryanair/AMS kisbu vantaġġ ekonomiku selettiv minn dik it-taħlita ta' kuntratti.

(269)

L-Artikolu 107(1) TFUE jistipula li sabiex miżura tiġi definita bħala għajnuna mill-Istat, trid tkun tiffavorixxi lil “ċerti impriżi jew il-produzzjoni ta' ċerti prodotti”. Il-Kummissjoni ssib li l-kuntratti tas-servizzi tal-ajruport u ta' kummerċjalizzazzjoni ġew konklużi biss ma' Ryanair u s-sussidjarja tal-kummerċjalizzazzjoni 100 % tagħha AMS.

(270)

Għad li linji tal-ajru oħrajn (Eurowings u Air Berlin) taru minn Altenburg matul il-perjodu ta' bejn l-2000 u l-2002, ma għamlux profitt minn kuntratti ta' kummerċjalizzazzjoni bħal dawn. Il-Ġermanja targumenta li t-termini tal-kuntratt tas-servizz ta' Ryanair kienu bbażati fuq ir-regolament tal-ajruport dwar it-tariffi li kien fis-seħħ dak iż-żmien, u li kien japplika għal-linji tal-ajru potenzjali kollha. Madakollu, il-Kummissjoni hija tal-fehma li t-taħlita ta' dan il-kuntratt tas-servizz speċjali u l-kuntratti ta' kummerċjalizzazzjoni sussegwenti taw vantaġġ lil Ryanair. Konsegwentement, dawn il-kuntratti kollha huma miżuri selettivi skont it-tifsira tal-Artikolu 107(1) TFUE.

(271)

Jekk l-għajnuna mogħtija minn Stat Membru ssaħħaħ il-pożizzjoni ta' impriża meta mqabbla ma' impriżi oħrajn li jikkompetu fis-suq intern, irid jiġi supponut li kienu affettwati mill-għajnuna inkwistjoni (154). Hija ġurisprudenza stabbilita li l-kompetizzjoni (155) tkun mgħawġa jekk il-benefiċjarju tal-għajnuna jikkompeti ma' impriżi oħrajn fi swieq miftuħin għall-kompetizzjoni.

(272)

Il-kuntratti tas-servizzi u ta' kummerċjalizzazzjoni inkwistjoni jgħinu sabiex jinkiseb tnaqqis konsiderevoli fl-imposti tal-ajruport minn Ryanair u jonqsu l-imposti operatorji nromali ta' linja tal-ajru li tibbenefika minn tnaqqis bħal dan. Għaldaqstant, dik il-linja tal-ajru hija f'pożizzjoni li tikkonsolida l-pożizzjoni tas-suq tagħha. Barra minn hekk, is-settur tal-avjazzjoni fih kompetizzjoni xierfa bejn l-operaturi minn bosta Stati Membri, speċjalment mindu tlesta t-tielet stadju tal-liberalizzazzjoni tal-avjazzjoni (“it-tielet pakkett tal-avjazzjoni”) fl-1 ta' Jannar 1993 (156). Minn dan isegwi li l-imposti mnaqqsin jaffettwaw il-kummerċ bejn l-Istati Membri u jgħawġu jew jheddu li jgħawġu l-kompetizzjoni fis-settur tal-avjazzjoni

(273)

Għalhekk, il-kuntratti tas-servizzi u ta' kummerċjalizzazzjoni konklużi ma' Ryanair jgħawġu jew jheddu li jgħawġu l-kompetizzjoni. Jaffettwaw il-kummerċ bejn l-Istati Membri wkoll.

(274)

Il-Kummissjoni tikkonkludi li, fuq il-bażi tas-sentenza f'Aéroports de Paris, il-kuntratt tas-servizzi tal-ajruport konkluż fit-3 ta' Marzu 2003, flimkien mal-kuntratti ta' kummerċjalizzazzjoni konklużi fis-7 ta' April 2003 u t-28 ta' Awwissu 2008 bejn Flugplatz Altenburg-Nobitz GmbH ma jikkostitwixxux għajnuna mill-Istat lil Ryanair/AMS skont it-tifsira tal-Artikolu 107(1) TFUE.

(275)

Il-Kummissjoni tikkonkludi li, fuq il-bażi tas-sentenza f'Aéroports de Paris, il-kuntratt tas-servizzi tal-ajruport konkluż fit-3 ta' Marzu 2003, flimkien mal-kuntratti ta' kummerċjalizzazzjoni konklużi fis-7 ta' April 2003 u l-25 ta' Jannar 2010 bejn Flugplatz Altenburg-Nobitz GmbH jikkostitwixxu għajnuna mill-Istat lil Ryanair/AMS skont it-tifsira tal-Artikolu 107(1) TFUE.

(276)

Il-Kummissjoni trid tivvaluta jekk l-għajnuna tistax tiġi ddikjarata kompatibbli mas-suq komuni. L-Artikolu 107(3) TFUE jistipula ċerti eċċezzjonijiet għar-regola ġenerali stabbilita fl-Artikolu 107(1) TFUE li l-għajnuna mal-Istat hija inkompatibbli mas-suq intern. L-Artikolu 107(3)(c) jistipula li “għajnuna maħsuba sabiex tiffaċilita l-iżvilupp ta' ċerti attivitajiet jew ta' ċerti reġjuni ekonomiċi, basta dik l-għajnuna ma tfixkilx il-kondizzjonijiet tal-kummerċ sa grad li jkun kuntrarju għall-interess komuni” tista' tkun kompatibbli mas-suq intern.

(277)

Il-Linji Gwida tal-2014 dwar l-Avjazzjoni jipprovdu qafas għall-fini ta' valutazzjoni ta' jekk l-għajnuna lill-ajruporti tistax tiġi ddikjarata kompatibbli mas-suq intern skont l-Artikolu 107(3)(c) TFUE. Il-Kummissjoni sejra tapplika għall-għajnuna illegali għall-investiment dawk ir-regoli li kienu fis-seħħ meta ngħatat l-għajnuna, kif stipulat fil-paragrafu (173) tal-Linji Gwida tal-2014 dwar l-Avjazzjoni. Għaldaqstant, mhijiex sejra tapplika l-prinċipju stipulati fil-Linji Gwida tal-2014 dwar l-Avjazzjoni għall-għajnuna illegali għall-investiment mogħtija lill-ajruporti qabel l-4 ta' April 2014, id-data li fiha ġew adottati dawk il-linji gwida.

(278)

Il-finanzjament għall-infrastruttura tal-AOC ingħata bejn l-2000 u l-2011. Għaldaqstant, il-kompatibilità tal-finanzjament tal-infrastruttura mogħti bejn l-2005 u l-2011 sejra tiġi vvalutata fuq il-bażi tal-prinċipji stipulati fil-Linji Gwida tal-2005 dwar l-Avjazzjoni. Fir-rigward tal-finanzjament tal-infrastruttura mogħti qabel l-2005, ma kien hemm ebda kriterju partikolari dwar il-kompatibilità f'dak iż-żmien għall-valutazzjoni tal-kompatibilità tal-għajnuna għall-investiment lill-ajruporti. Għaldaqstant, il-Kummissjoni trid tivvaluta dawk il-miżuri direttament fuq il-bażi tal-Artikolu 107(3)(c) TFUE, filwaqt li tqis il-prattika ta' teħid ta' deċiżjonijiet tagħha f'dawn il-kwistjonijiet. Il-prattika tal-Kummissjoni għall-valutazzjoni tal-kompatibilità tal-għajnuna lil operaturi tal-ajruporti hija spjegata fil-Linji Gwida tal-2005 dwar l-Avjazzjoni. Għaldaqstant, il-Kummissjoni sejra tivvaluta l-kompatibilità tal-għajnuna għall-investiment mogħtija lil Flugplatz Altenburg-Nobitz GmbH qabel l-2005 fuq il-bażi tal-kriterji stipulati fil-Linji Gwida tal-2005 dwar l-Avjazzjoni.

(279)

Il-Linji Gwida tal-2005 dwar l-Avjazzjoni jipprovdu qafas għall-fini ta' valutazzjoni ta' jekk l-għajnuna għall-infrastruttura lill-operaturi tal-ajruporti tistax tiġi ddikjarata kompatibbli mas-suq intern skont l-Artikolu 107(3) TFUE. Skont il-paragrafu 61 tal-Linji Gwida tal-2005 dwar l-Avjazzjoni, il-Kummissjoni trid tixtarr jekk:

(280)

Apparti l-bżonn li jiġu ssodisfati ċerti kriterji dwar il-kompatibilità stabbiliti fil-Linji Gwida tal-2005 dwar l-Avjazzjoni, l-għajnuna mill-Istat lill-ajruporti, bħal kull miżura oħra ta' għajnuna mill-Istat, għandu jkollha effett ta' inċentiv. Għandha tkun neċessarja u proporzjonata għall-objettiv legali stabbilit ukoll sabiex tiġi ddikjarata kompatibbli mas-suq intern. (157).

(281)

Skont il-Ġermanja u l-memorandum u l-istatut ta' assoċjazzjoni tal-operatur tal-ajruport, it-tir tal-operatur huwa li titjieb l-infrastruttura relevanti ekonomikament u, b'hekk, li tissaħħaħ l-ekonomiji tal-Land ta' Thüringen u l-Punent ta' Sachsen.

(282)

Billi ffinanzja l-iktar proġett infrastrutturali importanti tal-ajruport matul il-perjodu inkwistjoni, il-Land ta' Thüringen ħa impenn li jtejjeb l-aċċessibilità tar-reġjun u, b'hekk, jistimola l-iżvilupp reġjonali u joħloq impjiegi ġodda f'reġjun bi struttura dgħajfa, peress li konnessjonijiet tajbin għall-passiġġieri u l-merkanzija huma importanti f'termini tal-kompetittività tal-impriżi u l-industrija lokali.

(283)

Fil-fatt, il-Ġermanja bbażat il-valutazzjoni tagħha tal-2007 tal-finanzjament tal-miżuri ta' infrastruttura fuq l-istudju ta' Klophaus, li jispjega li l-AOC għandu effetti diretti, indiretti u indotti pożittivi u konsiderevoli u effett katalitiku fuq l-ekonomija u l-attraenza tar-reġjun, speċjalment f'termini tal-impjiegi. Numri dejjem ikbar ta' passiġġieri jippermettu lill-AOC sabiex isir ajruport reġjonali u jagħti lil Altenburger Land possibbiltà li jibdel il-profil internazzjonali tiegħu u b'hekk li jtejjeb l-istruttura ekonomika u kummerċjali tiegħu. Skont dak l-istudju, l-AOC jkun jista' jiġġenera benefiċċju ekonomiku komprensiv importanti ta' interess ġenerali għar-reġjun sħiħ tal-Ġermanja Ċentrali.

(284)

Kif turi t-Tabella 1, in-numri ta' passiġġieri mmaniġġjati mill-ajruport żdied b'mod konsiderevoli sas-snin 2007-2010. L-ajruport ġibed numru ta' passiġġieri ġejjin lejn ir-reġjun, xi ħaġa li kienet ta' importanza partikolari għall-ekonomija ta' dik iż-żona. Il-previżjonijiet tat-traffiku kienu pożittivi fil-bidu tas-snin elfejn u sa madwar is-sena 2007 u kkorroboraw il-ħtieġa ta' miżuri infrastrutturali addizzjonali. Barra minn hekk, l-ajruport innifsu kellu rwol importanti bħala impjegatur u b'mod indirett għen sabiex jinħolqu impjiegi indotti fir-reġjun (158).

(285)

L-investimenti infrastrutturali inkwistjoni ma kinux kopja tal-infrastruttura eżistenti. L-eqreb ajruport għall-AOC huwa l-Ajruport ta' Leipzig/Halle, li huwa madwar 85 km u iktar minn siegħa bil-karozza 'l bogħod mill-AOC. Barra minn hekk, l-Ajruport ta' Leipzig-Halle huwa ajruport internazzjonali li jservi kemm lil Leipzig (Sachsen) u Halle (Sachsen-Anhalt). Bħala ajruport reġjonali, l-AOC jaqdi lill-parti tan-Nofsinhar tal-Land ta' Thüringen. Minn perspettiva kummerċjali, l-ajruport huwa importanti għall-impriżi fiż-żona industrijali fl-inħawi.

(286)

Għaldaqstant, il-Kummissjoni tikkonkludi li l-finanzjament tal-infrastruttura tal-ajruport fl-AOC issodisfa objettiv definit ċar ta' interess ġenerali.

(287)

Skont il-memorandum u l-istatut ta' assoċjazzjoni ta' Flugplatz Altenburg-Nobitz GmbH, it-tir tal-kumpanija huwa li ttejjeb l-infrastruttura ekonomikament relevanti u, b'hekk, li ssaħħaħ l-ekonomiji tal-Lvant ta' Thüringen u l-Punent ta' Sachsen. Matul il-perjodu ta' bejn l-2000 u l-2011, l-ajruport għamel l-investimenti infrastrutturali meħtieġa sabiex jintlaħaq dak l-objettiv.

(288)

Fil-bidu tal-perjodu inkwistjoni, meta kien ġie deċiż li jiġi kkonvertit l-eks mitjar militari f'ajruport ċivili, kien hemm bżonn ta' investimenti sabiex l-infrastruttura ġenerali tal-eks mitjar militari tiġi adattata għar-rekwiżiti tal-linji tal-ajru.

(289)

Kif tispjega l-Ġermanja, il-miżuri infrastrutturali kienu meħtieġa fl-AOC, sabiex jiġu ssodisfati r-rekwiżiti l-ġodda tas-sikurezza u s-sigurtà tal-ajruport fid-dawl tan-numri dejjem ikbar ta' passiġġieri li kien qiegħed jittama li jiġġenera permezz tal-kuntratt tas-servizzi ma' Ryanair. Kien hemm anki bżonn ta' investimenti għall-fini ta' tiġdid u modernizzazzjoni tal-ajruport. Il-miżuri ta' sikurezza u sigurtà ġew implimentati tul dak il-perjodu sħiħ sabiex l-ajruport jiġi adattat għaż-żieda antiċipata fin-numri ta' passiġġieri ta' Ryanair. L-istudji kollha tal-2007 (159) dwar il-vijabbiltà ekonomika tal-ajruport bassru attivitajiet ikbar fl-AOC tul il-perjodu ta' bejn l-2007 u l-2015.

(290)

Ix-xogħlijiet ta' rinnovament tat-terminal saru fl-2009 sabiex jiġu rrispettati r-rekwiżiti dwar is-sikurezza u jipprovdu mmaniġġjar separat ta' passiġġieri ġejjin mix-Schengen u dawk mhux mix-Schengen. Skont il-Ġermanja, ġew ikkunsidrati alternattivi għar-rinnovament, iżda kien ġie deċiż favur is-soluzzjoni fit-tul ta' rinnovament tat-terminal minħabba n-numru ikbar ta' passiġġieri u l-kost għoli tal-alternattivi.

(291)

Peress li l-operatur tal-ajruport ma kellux biżżejjed fondi u l-Ġermanja tgħid li l-investimenti ewlenin kienu jikkonċernaw attivitajiet li jaqgħu taħt il-mandat tal-politika pubblika, kien hemm bżonn ta' riżorsi pubbliċi.

(292)

Għaldaqstant, il-Kummissjoni hija tal-fehma li kien hemm bżonn ta' investimenti infrastrutturali bħala adattament għan-numri ta' passiġġieri li kienu qegħdin jiżdiedu u sabiex jiġu ssodisfati l-ħtiġijiet attwali ta' infrastruttura ta' ajruport modern. Bl-infrastruttura mibnija biss l-ajruport seta' jaqdi lill-konnessjonijiet tat-trasport u l-iżvilupp tar-reġjun.

(293)

Għalhekk, il-ħtieġa u l-proporzjonalità tal-għajnuna għall-investiment lil Flugplatz Altenburg-Nobitz GmbH jirriżultaw mill-bżonn li jiġu ssodisfati r-rekwiżiti tal-lum ta' infrastruttura ta' ajruport modern. Għaldaqstant, il-Kummissjoni tikkonkludi li l-investimenti infrastrutturali inkwistjoni kienu meħtieġa u proporzjonati għall-objettiv li kien ġie stabbilit.

(294)

L-infrastruttura eżistenti kellha prospettivi sodisfaċenti għall-użu għat-terminu medju, tal-inqas sal-2009. Il-bord tad-diretturi ta' Flugplatz Altenburg-Nobitz GmbH diġà kien ipprovda fil-laqgħa tiegħu tat-23 ta' Ġunju 2000 għal investimenti infrastrutturali li ammontaw għal ammont stmat ta' EUR 20 miljun tul il-perjodu ta' bejn is-sena 2000 u l-2010. In-numri ta' passiġġieri annwali baqgħu tilgħin sal-eqqel snin tal-2008-2009.

(295)

Wara perjodu ta' tkabbir konsiderevoli, it-traffiku tal-ajru fil-Ġermanja u l-Ewropa ntlaqat mill-kriżi ekonomika u finanzjarja fl-2009. It-traffiku tal-ajru tal-passiġġieri fil-Ġermanja fl-2009, li kienet l-agħar sena għall-avjazzjoni, naqas b'4,6 %. Madankollu, it-tendenza ġenerali ta' tkabbir fit-traffiku tal-ajru kkalmat, iżda ma waqfitx. Ir-rati ta' tkabbir fix-xahar fit-traffiku tal-ajru tal-passiġġieri fil-Ġermanja reġgħu bdew jiżdiedu f'Ġunju 2010, u qabżu r-rata ta' tkabbir fix-xahar tas-sena ta' qabel b'7 %. Il-previżjonijiet jindikaw li l-Ġermanja esperjenzat tkabbir ekonomiku b'saħħtu ta' madwar 3 % fis-sena mill-2009 'l hawn. It-tkabbir fis-suq tal-avjazzjoni ġeneralment ikun ogħla mit-tkabbir ekonomiku ġenerali (160).

(296)

It-tliet studji tal-2007 kollha kemm huma (161) jiddikjaraw li l-operatur tal-ajruport kellu jtejjeb ir-riżultati annwali tiegħu u li d-dħul u n-nefqa operatorji kellhom jilħqu kważi punt ta' ekwilibriju sal-2015 u li ż-żona industrijali fl-inħawi kellha tissaħħaħ ukoll. Dan ġie kkonfermat fl-abbozz tal-pjan ta' direzzjoni tan-negozju għall-perjodu ta' bejn l-2007 u l-2015. Il-Ġermanja bbażat l-argumenti tagħha fuq il-profittabilità tal-linji tal-ajru low-cost u x-xenarju li l-AOC seta' jikseb 500 000 passiġġier sal-2015.

(297)

Konsegwentement, skont l-informazzjoni li pprovdiet il-Ġermanja, l-infrastruttura inkwistjoni laħqet id-domanda fit-terminu medju tal-linji tal-ajru u tal-passiġġieri u kellha prospettivi tajbin għall-użu.

(298)

Il-Ġermanja tikkonferma li, għad li Ryanair kienet l-unika linja tal-ajru li kienet qiegħda topera mill-AOC fil-perjodu ta' bejn l-2003 u l-2011, l-infrastruttura kienet disponibbli għall-utenti kollha mingħajr ebda diskriminazzjoni ekonomikament mhux iġġustifikata.

(299)

Skont il-paragrafu 39 tal-Linji Gwida tal-2005 dwar l-Avjazzjoni, il-kategorija ta' ajruport tipprovdi indikazzjoni ta' kemm l-ajruporti qegħdin jikkompetu ma' xulxin u, għalhekk, anki kemm il-finanzjament pubbliku mogħti lil ajruport jista' jgħawweġ il-kompetizzjoni. Il-Linji Gwida tal-2005 dwar l-Avjazzjoni jiddikjaraw li huwa improbabbli li l-finanzjament mogħti lil ajruporti reġjonali żgħar (kategorija D) jgħawweġ il-kompetizzjoni jew jaffettwa l-kummerċ tant li jmur kontra l-interess komuni. Madankollu, dan ma jfissirx u lanqas ma jimplika li t-tgħawwiġ tal-kompetizzjoni u l-effetti fuq il-kummerċ huma esklużi.

(300)

L-AOC qeda lil inqas minn 150 000 passiġġier fis-sena tul il-perjodu inkwistjoni, jiġifieri jikkwalifika bħala ajruport reġjonali żgħir (kategorija D) skont il-Linji Gwida tal-2005 dwar l-Avjazzjoni.

(301)

L-AOC huwa ajruport reġjonali tipiku. Dan huwa bbażat fuq il-fatt li numru kbir ta' passiġġieri li jużaw l-ajruport ġejjin mil-Land ta' Thüringen. Fuq il-bażi tal-kunċett ta' żona koperta ta' madwar 100 km u ħin ta' vvjaġġar ta' 60 minuta, jista' jiġi supponut li l-eqreb ajruport (Leipzig/Halle, 85 km u madwar siegħa u għaxar minuti bil-karozza mill-AOC) jinsab fit-tarf ta' barra tal-istess żona ta' kopertura. L-Ajruport ta' Leipzig-Halle huwa ajruport internazzjonali li jservi kemm lil Leipzig (Sachsen) kif ukoll lil Halle (Sachsen-Anhalt). Bħala ajruport reġjonali, l-AOC jaqdi lill-parti tan-Nofsinhar tal-Land ta' Thüringen.

(302)

Apparti d-distanza ġeografika bejniethom, iż-żewġ ajruporti għandhom mudelli kummerċjali differenti ħafna u jiġbru tipi differenti ta' passiġġieri. L-Ajruport ta' Leipzig/Halle huwa ajruport immexxi sew li joffri infrastruttura iktar sofistikata u kumdità ikbar għall-passiġġieri. Jaqdi kemm titjiriet internazzjonali kif ukoll domestiċi, sensiela ta' destinazzjonijiet għall-btala u traffiku tal-merkanzija bl-ajru. L-AOC għandu infrastruttura li, meta mqabbla, ftit li xejn toffri kumdità u l-mudell kummerċjali tiegħu huwa bbażat fuq linji tal-ajru low-cost.

(303)

Dawn id-dikjarazzjonijiet jippermettu lill-Kummissjoni sabiex tikkonkludi li l-għajnuna għall-investiment lil Flugplatz Altenburg-Nobitz GmbH la tgħawweġ il-kompetizzjoni u lanqas ma taffettwa l-kummerċ tant li tmur kontra l-interess komuni.

(304)

L-għajnuna mogħtija mill-Ġermanja lil Flugplatz Altenburg-Nobitz GmbH sabiex tiffinanzja l-infrastruttura għandu jkollha effett ta' inċentiv u tkun meħtieġa u proporzjonata għall-objettiv li ġie stabbilit.

(305)

Il-Kummissjoni trid tistabbilixxi jekk l-għajnuna mill-Istat mogħtija lil Flugplatz Altenburg-Nobitz GmbH affettwatx lill-impriża vvantaġġjata b'tali mod li teżerċita attivitajiet li jgħinuha tilħaq objettiv fl-interess pubbliku li (i) ma kinitx teżerċita mingħajr l-għajnuna jew li (ii) kienet teżerċita b'mod limitat jew differenti. Barra minn hekk, l-għajnuna tista' titqies biss bħala proporzjonata jekk ma setax jinkiseb l-istess riżultat b'inqas għajnuna u inqas tgħawwiġ tal-kompetizzjoni. Dan ifisser li l-ammont u l-intensità tal-għajnuna jridu jkunu limitati għall-minimu meħtieġ għall-attività sussidjata.

(306)

Skont l-informazzjoni pprovduta mill-Ġermanja, l-investimenti infrastrutturali meħtieġa sabiex jintlaħaq l-istandard ta' ajruport funzjonanti miftuħ għal titjiriet kummerċjali ma setgħux isiru mingħajr l-għajnuna. L-ajruport irrapporta telf tul ħafna mill-perjodu kkonċernat. Il-Ġermanja konsistentement iddikjarat li t-tali ajruporti reġjonali ma jistgħux jiġu operati mingħajr finanzjament pubbliku u li, b'mod partikolari, l-ajruport ma kienx jilħaq il-livell ta' servizz għal-linji tal-ajru u l-passiġġieri mingħajr l-għajnuna u l-firxa tal-attivitajiet ekonomiċi tal-ajruport kienet tonqos.

(307)

Għaldaqstant, jista' jiġi konkluż li l-miżura ta' għajnuna inkwistjoni kellha effett ta' inċentiv, għaliex ippermettiet lill-benefiċjarju sabiex jagħmel l-investimenti meħtieġa.

(308)

F'termini tal-proporzjonalità tal-għajnuna, jista' jiġi supponut li l-intensità tal-għajnuna għall-proġett sabiex l-ajruport jiġi kkonvertit minn eks mitjar militari għal ajruport ċivili għal-linji tal-ajru potenzjali kollha kienet limitata għall-investimenti meħtieġa. Barra minn hekk, il-proċedura ta' finanzjament tal-investiment fis-seħħ fi Flugplatz Altenburg-Nobitz GmbH tfasslet sabiex tevita kumpens eċċessiv. Pjan ta' direzzjoni tan-negozju għas-sena li jkun imiss ġie maqbul fi tmiem kull sena u ġie rivedut matul is-sena fl-isfond tal-iżvolġiment tan-negozju (162). Jekk proġett ikun ingħata finanzjament eċċessiv, l-ajruport kellu jrodd lura r-riżorsi lill-investitur pubbliku. Peress li l-ammont fl-għajnuna kien limitat għall-minimu meħtieġ sabiex ikunu jistgħu jsiru l-attivitajiet sussidjati, f'dan il-każ l-għajnuna għall-investiment tista' tiġi ddikjarata bħala meħtieġa u proporzjonata għall-objettiv legali.

(309)

Fid-dawl tal-valutazzjoni ta' hawn fuq, il-Kummissjoni tikkonkludi li l-għajnuna għall-investiment għal Flugplatz Altenburg-Nobitz GmbH hija kompatibbli mal-Artikolu 107(3)(c) TFUE, peress li tissodisfa l-kriterji ta' kompatibbiltà stipulati fil-paragrafu 61 tal-Linji Gwida tal-2005 dwar l-Avjazzjoni. Għaldaqstant, il-miżura hija kompatibbli mas-suq intern.

(310)

B'konformità mal-Linji Gwida tal-2014 dwar l-Avjazzjoni, il-Kummissjoni hija tal-fehma li l-avviż tagħha dwar id-determinazzjoni tar-regoli applikabbli għall-valutazzjoni tal-Għajnuna illegali mill-Istat ma għandux ikun japplika għal każijiet pendenti ta' għajnuna operatorja illegali lil ajruporti mogħtijin qabel l-4 ta' April 2014. Minflok, il-Kummissjoni sejra tapplika l-prinċipji stabbiliti f'dawk il-linji gwida għall-każijiet kollha li jikkonċernaw għajnuna operatorja (notifiki pendenti u għajnuna illegali mhux notifikata) lil ajruporti anki jekk l-għajnuna tkun ingħatat qabel l-4 ta' April 2014 u l-bidu tal-perjodu transitorju. (163)

(311)

Il-Linji Gwida tal-2014 dwar l-Avjazzjoni jipprovdu qafas għall-fini ta' valutazzjoni ta' jekk l-għajnuna lill-ajruporti tistax tiġi ddikjarata kompatibbli mas-suq intern skont l-Artikolu 107(3)(c) TFUE. (164) Il-paragrafu 137 (sic) tal-Linji Gwida tal-2014 dwar l-Avjazzjoni (165) jiddikjara li jridu jiġu ssodisfati l-kundizzjonijiet kumulattivi li ġejjin sabiex l-għajnuna operatorja mogħtija qabel il-pubblikazzjoni ta' dawn il-linji gwida titqies kompatibbli mas-suq intern:

(312)

Skont it-Taqsima 5.1.2(a) tal-Linji Gwida tal-2014 dwar l-Avjazzjoni, sabiex l-ajruporti jkollhom biżżejjed żmien ħalli jadattaw għal realtajiet ġodda tas-suq u jevitaw kwalunkwe tfixkil fit-traffiku tal-ajru u l-konnettività tar-reġjuni, l-għajnuna operatorja lil ajruporti sejra titqies li tikkontribwixxi għall-kisba ta' objettiv ta' interess komuni jekk: (i) iżżid il-mobilità taċ-ċittadini tal-Unjoni u l-konnettività tar-reġjuni billi jiġu stabbiliti punti ta' aċċess għal titjiriet fi ħdan l-Unjoni jew (ii) tiġġieled il-konġestjoni tat-traffiku tal-ajru f'ajruporti ċentrali ewlenin fl-Unjoni jew (iii) tħaffef l-iżvilupp reġjonali.

(313)

Skont l-awtoritajiet Ġermaniżi, kien hemm bżonn li jiġi ffinanzjat it-telf operatorju ta' Flugplatz Altenburg-Nobitz GmbH sabiex jinżammu l-operazzjonijiet fl-ajruport, sabiex jintlaħaq l-objettiv tal-kumpanija, stipulat fil-memorandum u l-istatuti ta' assoċjazzjoni, sabiex titjieb l-infrastruttura ekonomikament relevanti u b'hekk jissaħħu l-ekonomiji ta' Thüringen tal-Lvant u Sachsen tal-Punent.

(314)

Peress li kien hemm bżonn ta' aċċess tajjeb sabiex jiġi sostnut l-iżvilupp reġjonali fil-Ġermanja Ċentrali, kien hemm ħtieġa fundamentali li l-ajruport jibqa' operazzjonali. L-operazzjoni tal-ajruport għenet l-iżvilupp reġjonali u l-ħolqien tal-impjiegi. Għalhekk, l-objettiv tal-għajnuna operatorja mogħtija kien wieħed ċar ta' promozzjoni tal-iżvilupp reġjonali.

(315)

Skont it-Taqsima 5.1.2(b) tal-Linji Gwida tal-2014 dwar l-Avjazzjoni, sabiex jiġi vvalutat jekk l-għajnuna mill-Istat hijiex effettiva sabiex tgħin fil-kisba ta' objettiv ta' interess komuni, hemm bżonn li tiġi identifikata l-problema li trid tiġi indirizzata. F'dak ir-rigward, l-għajnuna mill-Istat trid tkun immirata lejn sitwazzjonijiet li fihom it-tali għajnuna tkun tista' tipprovdi titjib materjali li s-suq innifsu ma jistax jipprovdi.

(316)

Il-Ġermanja targumenta li l-intervent tal-Istat kien meħtieġ peress li l-ajruport kellu diffikultajiet sabiex jiffinanzja l-operazzjoni waħdu. Ir-rapporti finanzjarji ta' Flugplatz Altenburg-Nobitz GmbH spiss jiddikjaraw li l-pożizzjoni finanzjarja tal-ajruport tiddependi ħafna mill-injezzjonijiet ta' kapital tal-azzjonisti jew għotjiet pubbliċi oħrajn u li, mingħajr l-injezzjonijiet ta' kapital mill-awtoritajiet pubbliċi, anki l-eżistenza stess tal-kumpanija tkun f'riskju (166).

(317)

L-għajnuna operatorja mogħtija tat lill-ajruport il-fondi meħtieġa sabiex jiġi żgurat l-operat tagħha u jiġi aġġustat il-mudell kummerċjali tagħha għar-rekwiżiti tal-linji tal-ajru low-cost.

(318)

Il-Kummissjoni tirrikonoxxi li l-AOC huwa ajruport reġjonali żgħir b'inqas minn 150 000 passiġġier fis-sena, li ma jistax ikopri l-kostijiet operatorji tiegħu bis-sħiħ f'kundizzjonijiet normali tas-suq u li, għaldaqstant, l-intervent tal-Istat kien neċessarju.

(319)

Skont it-Taqsima 5.1.2(c) tal-Linji Gwida tal-2014 dwar l-Avjazzjoni, l-għajnuna lil ajruport trid tkun strument politiku xieraq sabiex jintlaħaq l-objettiv ta' interess komuni. Għaldaqstant, l-Istat Membru jrid juri li l-istess objettiv ma jistax jinkiseb bi strumenti tal-politika jew strumenti tal-għajnuna li joħolqu inqas tgħawwiġ.

(320)

Skont il-Ġermanja, il-miżura ta' għajnuna inkwistjoni hawnhekk hija strument xieraq sabiex jintlaħaq l-objettiv ta' interess komuni, li ma setax jinkiseb bi strumenti tal-politika li joħolqu inqas tgħawwiġ.

(321)

L-ammont fl-għajnuna ġie kkalkolat sabiex ikopri l-ispariġġ tal-likwidità antiċipat għall-kostijiet operatorji tas-sena li jmiss.