This document is an excerpt from the EUR-Lex website
Document 32016D0077
Council Decision (EU) 2016/77 of 18 January 2016 confirming the position taken on behalf of the European Union within the 10th Ministerial Conference of the World Trade Organization as regards export competition and development issues
Deċiżjoni tal-Kunsill (UE) 2016/77 tat-18 ta' Jannar 2016 li tikkonferma l-pożizzjoni meħuda f'isem l-Unjoni Ewropea fl-10 Konferenza Ministerjali tal-Organizzazzjoni Dinjija tal-Kummerċ fir-rigward tal-kompetizzjoni fl-esportazzjoni u kwistjonijiet ta' żvilupp
Deċiżjoni tal-Kunsill (UE) 2016/77 tat-18 ta' Jannar 2016 li tikkonferma l-pożizzjoni meħuda f'isem l-Unjoni Ewropea fl-10 Konferenza Ministerjali tal-Organizzazzjoni Dinjija tal-Kummerċ fir-rigward tal-kompetizzjoni fl-esportazzjoni u kwistjonijiet ta' żvilupp
ĠU L 16, 23.1.2016, p. 23–24
(BG, ES, CS, DA, DE, ET, EL, EN, FR, HR, IT, LV, LT, HU, MT, NL, PL, PT, RO, SK, SL, FI, SV)
In force
|
23.1.2016 |
MT |
Il-Ġurnal Uffiċjali tal-Unjoni Ewropea |
L 16/23 |
DEĊIŻJONI TAL-KUNSILL (UE) 2016/77
tat-18 ta' Jannar 2016
li tikkonferma l-pożizzjoni meħuda f'isem l-Unjoni Ewropea fl-10 Konferenza Ministerjali tal-Organizzazzjoni Dinjija tal-Kummerċ fir-rigward tal-kompetizzjoni fl-esportazzjoni u kwistjonijiet ta' żvilupp
IL-KUNSILL TAL-UNJONI EWROPEA,
Wara li kkunsidra t-Trattat dwar il-Funzjonament tal-Unjoni Ewropea, u b'mod partikolari l-Artikoli 91, 100 u 207(4), flimkien mal-Artikolu 218(9), tiegħu,
Wara li kkunsidra l-proposta mill-Kummissjoni Ewropea,
Billi:
|
(1) |
L-Unjoni tagħti importanza kbira ferm lill-funzjonament u t-tisħiħ progressiv tas-sistema kummerċjali multilaterali. F'dan ir-rigward, waqt li l-Unjoni kienet immirat lejn eżitu komprensiv fir-rigward taċ-Ċiklu ta' Doha fl-10 Konferenza Ministerjali tal-Organizzazzjoni Dinjija tal-Kummerċ (WTO) f'Nairobi, il-Membri tad-WTO laħqu kunsens biss dwar ġabra aktar limitata ta' kwistjonijiet: il-kompetizzjoni fl-esportazzjoni fil-qasam tal-agrikoltura u kwistjonijiet ta' żvilupp ta' interess partikolari għal dawk il-Membri tad-WTO rikonoxxuti bħala pajjiżi membri l-anqas żviluppati (LDCs, least developed countries). |
|
(2) |
Id-dixxiplina fl-użu ta' miżuri ta' appoġġ għall-esportazzjoni agrikola hija talba li ilha pendenti minn bosta Membri tad-WTO interessati sabiex jipprovdu livell wieħed ta' kundizzjonijiet għal kummerċjanti u hija element ewlieni taċ-Ċiklu ta' Doha. Il-mira tal-Unjoni tal-10 Konferenza Ministerjali tad-WTO kienet li jinkiseb eżitu komprensiv u bilanċjat fir-rigward ta' kull forma ta' għajnuna għall-esportazzjoni fl-agrikoltura (jiġifieri sussidji għall-esportazzjoni, krediti għall-esportazzjoni, intrapriżi agrikoli statali kummerċjali li jesportaw u għajnuna alimentari), mhux limitata għas-sussidji għall-esportazzjoni biss, f'konformità mal-abbozz tal-modalitajiet agrikoli (TN/AG/W/4/Rev.4) tad-WTO kif aġġornat permezz tal-proposta konġunta tal-Unjoni u ta' numru ta' pajjiżi datata s-16 ta' Novembru 2015 (JOB/AG/48). |
|
(3) |
L-iżvilupp huwa fil-qalba tan-negozjati kummerċjali taċ-Ċiklu ta' Doha, u diversi kwistjonijiet, inklużi l-implimentazzjoni tat-trattament preferenzjali favur il-fornituri tas-servizzi tal-LDCs, regoli preferenzjali tal-oriġini għall-LDCs u l-qoton, kienu s-suġġett ta' negozjati attwalment għaddejjin fid-WTO. |
|
(4) |
Id-Deċiżjoni dwar ir-regoli preferenzjali tal-oriġini għall-pajjiżi l-anqas żviluppati meħuda fid-disa' Konferenza Ministerjali tad-WTO f'Bali (WT/MIN (13)/42) tistipula li r-regoli preferenzjali tal-oriġini għandhom ikunu trasparenti, sempliċi u oġġettivi kemm jista' jkun possibbli. Il-proposta mressqa mill-Grupp LDC (JOB/TNC/53) kellha l-mira li tikseb eżiti vinkolanti fl-oqsma kollha koperti minn dik id-Deċiżjoni. B'kunsiderazzjoni għall-iskema unilaterali eżistenti tal-Unjoni dwar regoli preferenzjali tal-oriġini, fl-10 Konferenza Ministerjali tad-WTO l-Unjoni appoġġat dawk l-eżiti li ma jmorrux lil hinn mis-sett ambizzjuż attwali tar-regoli preferenzjali fl-Unjoni u huma vinkolanti għall-Membri kollha tad-WTO. |
|
(5) |
Jinħtieġ li tiġi kkonfermata l-pożizzjoni meħuda f'isem l-Unjoni fl-10 Konferenza Ministerjali tad-WTO fir-rigward tal-kompetizzjoni fl-esportazzjoni u kwistjonijiet ta' żvilupp, |
ADOTTA DIN ID-DEĊIŻJONI:
Artikolu 1
Il-pożizzjoni meħuda f'isem l-Unjoni fl-10 Konferenza Ministerjali tad-WTO fir-rigward tad-Deċiżjonijiet tad-WTO dwar il-kompetizzjoni fl-esportazzjoni (WT/MIN(15)/45) u kwistjonijiet ta' żvilupp (WT/MIN(15)/46, WT/MIN(15)/47, WT/MIN(15)/48) hija b'dan ikkonfermata.
Artikolu 2
Din id-Deċiżjoni tidħol fis-seħħ fid-data tal-adozzjoni tagħha.
Magħmul fi Brussell, it-18 ta' Jannar 2016.
Għall-Kunsill
Il-President
A.G. KOENDERS