30.5.2015   

MT

Il-Ġurnal Uffiċjali tal-Unjoni Ewropea

L 134/8

(1)

Skont l-Artikolu 51 tar-Regolament (UE) Nru 1306/2013 u abbażi tal-kontijiet annwali mressqa mill-Istati Membri, flimkien mat-tagħrif meħtieġ għall-approvazzjoni tal-kontijiet u opinjoni ta' verifika rigward il-kompletezza, il-preċiżjoni u l-veraċità tal-kontijiet u r-rapporti stabbiliti mill-korpi ta' ċertifikazzjoni, il-Kummissjoni għandha tapprova l-kontijiet tal-aġenziji tal-pagamenti msemmija fl-Artikolu 7 ta' dak ir-Regolament.

(2)

F'konformità mal-Artikolu 39 tar-Regolament (UE) Nru 1306/2013, is-sena finanzjarja agrikola tibda fis-16 ta' Ottubru tas-sena N – 1 u tispiċċa fil-15 ta' Ottubru tas-sena N. Meta jiġu approvati l-kontijiet għas-sena finanzjarja 2014, sabiex jiġi allinjat il-perjodu ta' referenza għan-nefqa tal-Fond Agrikolu Ewropew għall-Iżvilupp Rurali (il-FAEŻR) ma' dak tal-Fond Agrikolu Ewropew ta' Garanzija (l-FAEG), għandha titqies in-nefqa mġarrba mill-Istati Membri bejn is-16 ta' Ottubru 2013 u l-15 ta' Ottubru 2014, kif stipulat fl-Artikolu 11(1) tar-Regolament ta' Implimentazzjoni tal-Kummissjoni (UE) Nru 908/2014 (2).

(3)

It-tieni subparagrafu tal-Artikolu 33(2) tar-Regolament ta' Implimentazzjoni (UE) Nru 908/2014 jistipula li l-ammonti li jistgħu jiġu rkuprati mingħand kull Stat Membru jew imħallsa lilu, skont id-deċiżjoni tal-approvazzjoni tal-kontijiet imsemmija fl-ewwel subparagrafu tal-Artikolu 33(1) tar-Regolament imsemmi, għandhom jiġu stabbiliti billi jitnaqqsu l-pagamenti intermedji għas-sena finanzjarja kkonċernata min-nefqa rikonoxxuta għall-istess sena skont l-Artikolu 33(1). Il-Kummisjoni għandha tnaqqas dak l-ammont mill-pagament intermedju li jkun imiss jew iżżidu miegħu.

(4)

Il-Kummissjoni vverifikat it-tagħrif li ressqu l-Istati Membri u kkomunikat ir-riżultati tal-verifiki tagħha lill-Istati Membri qabel it-30 ta' April 2015, flimkien mal-emendi meħtieġa.

(5)

Għal ċerti aġenziji tal-pagamenti, il-kontijiet annwali u d-dokumenti mehmuża jippermettu lill-Kummissjoni tieħu deċiżjoni dwar il-kompletezza, il-preċiżjoni u l-veraċità tal-kontijiet annwali mressqa.

(6)

It-tagħrif imressaq minn ċerti aġenziji tal-pagamenti oħra jeżiġi li jsir aktar stħarriġ u għalhekk il-kontijiet tagħhom ma jistgħux jiġu approvati f'din id-Deċiżjoni.

(7)

Il-Kummissjoni tista' tnaqqas jew tissospendi temporanjament il-pagamenti interim lill-Istati Membri, skont l-Artikolu 41 tar-Regolament (UE) Nru 1306/2013. Din għandha tinforma lill-Istat Membru jew lill-Istati Membri kif xieraq. Hija u tadotta din id-Deċiżjoni, il-Kummissjoni għandha tqis l-ammonti mnaqqsa jew sospiżi sabiex tevita li tagħmel pagamenti mhux xierqa jew mhux f'waqthom, jew li tħallas lura ammonti li aktar tard jistgħu jkunu soġġetti għal aġġustament finanzjarju. B'mod partikolari, ir-raba' dikjarazzjoni trimestrali tal-2013 u l-ewwel dikjarazzjoni trimestrali tal-2014 inkludew rispettivament l-ammonti ta' EUR 51 543 u EUR 26 892 għall-Programm tal-Iżvilupp Rurali tar-reġjun ta' Lazio, l-Italja (il-Programm CCI 2007IT06RPO005). Dawn l-ammonti ġew inklużi wkoll fid-dikjarazzjoni annwali għas-sena finanzjarja 2014. L-ammonti kkonċernati kienu soġġetti għal tnaqqis skont l-Artikolu 41 tar-Regolament (UE) Nru 1306/2013, kif ordnat mid-Deċiżjonijiet ta' Implimentazzjoni tal-Kummissjoni C(2014)3268 u C(2014)5156 għal nuqqas ta' konformità mal-limiti taż-żmien għal verifika obbligatorja. Billi l-proċedura skont l-Artikolu 34 tar-Regolament ta' Implimentazzjoni (UE) Nru 908/2014 għadha għaddejja, dan it-tnaqqis għandu jinżamm. F'dak li jirrigwarda l-programm għall-iżvilupp rurali għall-Bulgarija (CCI 2007BG06RPO001), l-ammonti ta' EUR 420 467,77 u EUR 598 402,41 kienu ddikjarati fit-tielet kwart tal-2014 fil-miżuri 311 u 312 rispettivament. Dawn l-ammonti ġew iddikjarati wkoll fid-dikjarazzjoni annwali għas-sena finanzjarja 2014. L-ammonti kkonċernati għandhom jiġu esklużi mill-finanzjament tal-Unjoni b'din id-Deċiżjoni peress li għandu jitqies kull tnaqqis skont l-Artikolu 41 tar-Regolament (UE) Nru 1306/2013. Fil-fatt, kull tnaqqis għandu natura provviżorja u mingħajr ħsara għal deċiżjonijiet li jittieħdu skont l-Artikolu 52 tar-Regolament (UE) Nru 1306/2013.

(8)

Skont l-Artikolu 54(2) tar-Regolament (UE) Nru 1306/2013, l-Istat Membru kkonċernat għandu jagħmel tajjeb għal 50 % tal-konsegwenzi finanzjarji ta' nuqqas ta' rkupru tal-irregolaritajiet jekk l-irkupru ta' dawk l-irregolaritajiet ma jkunx sar fi żmien erba' snin mid-data tat-talba għall-irkupru, jew fi żmien tmien snin jekk l-irkupru jitressaq quddiem il-qrati nazzjonali. L-Artikolu 54(4) tar-Regolament (UE) Nru 1306/2013 jeżiġi lill-Istati Membri biex fil-kontijiet annwali jdaħħlu l-ammonti li jkollhom jagħmlu tajjeb għalihom huma skont il-paragrafu 2 ta' dak l-Artikolu. Ir-regoli dwar l-applikazzjoni tal-obbligu tal-Istati Membri li jirrappurtaw l-ammonti li għandhom jiġu rkuprati huma stipulati fir-Regolament ta' Implimentazzjoni (UE) Nru 908/2014. L-Anness II tar-Regolament ta' Implimentazzjoni (UE) Nru 908/2014 jistipula l-mudell tat-tabella li l-Istati Membri għandhom jużaw sabiex jipprovdu informazzjoni dwar l-ammonti li għandhom jiġu rkuprati fl-2015. Abbażi tat-tabelli mimlija mill-Istati Membri, il-Kummissjoni għandha tiddeċiedi dwar il-konsegwenzi finanzjarji minħabba nuqqas ta' rkupru tal-irregolaritajiet li jmorru lura għal iktar minn erba' jew tmien snin, rispettivament.

(9)

Skont l-Artikolu 54(3) tar-Regolament (UE) Nru 1306/2013, l-Istati Membri jistgħu jiddeċiedu li ma jiħdux passi għall-irkupru jekk ikollhom raġunijiet iġġustifikati kif imiss. Din id-deċiżjoni tista' tittieħed biss jekk it-total tal-ispejjeż li jkunu ġġarrbu diġà u ta' dawk li x'aktarx jiġġarrbu, ikun jaqbeż l-ammont li għandu jiġi rkuprat jew jekk jirriżulta li l-irkupru ma jkunx jista' jsir minħabba insolvenza, irreġistrata u rrikonoxxuta skont il-liġi nazzjonali, tad-debitur jew tal-persuni legalment responsabbli għall-irregolarità. Jekk dik id-deċiżjoni tittieħed fi żmien erba' snin mid-data tat-talba għall-irkupru jew fi żmien tmien snin jekk l-irkupru jitressaq quddiem il-qrati nazzjonali, il-konsegwenzi finanzjarji ta' nuqqas ta' rkupru għandhom jiġġarrbu 100 % mill-baġit tal-Unjoni. L-ammonti li għalihom Stat Membru partikolari ddeċieda li ma jiħux passi għall-irkupru u fuq liema bażi ttieħdet id-deċiżjoni tiegħu għandhom ikunu inklużi fil-kontijiet annwali skont l-Artikolu 29(e) tar-Regolament ta' Implimentazzjoni (UE) Nru 908/2014, imsemmi fil-punt (c) (iii) tal- Artikolu 102(1) tar- Regolament (UE) Nru 1306/2013. Għaldaqstant, l-Istati Membri kkonċernati ma għandhomx jagħmlu tajjeb għal dawn l-ammonti u minflok l-ammonti għandhom jitħallsu mill-baġit tal-UE.

(10)

Skont l-Artikolu 34(2) tar-Regolament (UE) Nru 1306/2013, l-ammont totali ta' prefinanzjament u pagamenti interim ma għandux jaqbeż il-95 % tal-kontribuzzjoni mill-FAEŻR għal kull programm tal-iżvilupp rurali. Dawn il-programmi laħqu dan il-limitu: 2007AT06RPO001, 2007BE06RPO001, 2007DE06RPO004, 2007DE06RPO010, 2007IE06RPO001 u 2007UK06RPO003. Il-bilanċ pendenti ta' dawn il-programmi se jitħallas mal-għeluq tal-perjodu ta' programmazzjoni.

(11)

Ir-Regolament tal-Kunsill (UE) Nru 1306/2013 ħassar u ssostitwixxa r-Regolament tal-Kunsill (KE) Nru 1290/2005 (3). L-Artikolu 26(3)(b) tar-Regolament tal-Kunsill (KE) Nru 1290/2005, li jikkorrispondi għad-dispożizzjoni tal-Artikolu 36(3)(b) tar-Regolament (UE) Nru 1306/2013, ipprovda li l-pagamenti intermedji għandhom isiru mingħajr ma tinqabeż il-kontribuzzjoni programmata finanzjarja totali tal-FAEŻR. Barra minn hekk, ir-Regolament ta' Implimentazzjoni (UE) Nru 908/2014 ħa xi dispożizzjonijiet tar-Regolament tal-Kummissjoni (KE) Nru 883/2006 (4) li kien tħassar mir-Regolament Delegat tal-Kummissjoni (UE) Nru 907/2014 (5). L-Artikolu 17(4) tar-Regolament (KE) Nru 883/2006, li jikkorrispondi għad-dispożizzjoni tal-Artikolu 23(2) tar-Regolament ta' Implimentazzjoni (UE) Nru 908/2014, ipprovda li meta t-total tad-dikjarazzjonijiet tan-nefqa jkun jisboq it-total tal-kontribuzzjoni pprogrammata għal programm ta' żvilupp rurali, l-ammont li jrid jitħallas huwa limitat għall-ammont ipprogrammat, mingħajr ħsara għal-limitu stipulat fl-Artikolu 24(4) tar-Regolament (KE) Nru 1290/2005 li jikkorrispondi għad-dispożizzjoni tal-Artikolu 34(2) tar-Regolament (UE) Nru 1306/2013. Il-pjan finanzjarju tal-Assi 2 tal-Programm għall-Iżvilupp Rurali 2007EE06RP0001 inqabeż b'EUR 1 122 778,99 fit-tieni u t-tielet dikjarazzjoni trimestrali għall-2014. Il-pjan finanzjarju tal-Assi 5 tal-Programm għall-Iżvilupp Rurali 2007ES06RPO009 inqabeż b'EUR 18 560,56 fit-tielet dikjarazzjoni trimestrali għall-2014. Il-pjan finanzjarju tal-Assi 2 tal-Programm għall-Iżvilupp Rurali 2007FI06RPO001 inqabeż b'EUR 5 599 314,3 fit-tieni dikjarazzjoni trimestrali għall-2014. Il-pjanijiet finanzjarji tal-Assi 2 tal-Programm għall-Iżvilupp Rurali 2007LU06RPO001 inqabżu b'EUR 169 459,49 fit-tielet dikjarazzjoni trimestrali għall-2014. Il-pjanijiet finanzjarji tal-Assi 2 u tal-Assi 5 tal-Programm għall-Iżvilupp Rurali 2007UK06RPO002 inqabżu b'EUR 2 597 538,87 u EUR 427 086,47 rispettivament fit-tieni u t-tielet dikjarazzjoni trimestrali għall-2014. Dawn l-ammonti ma tħallsux mill-Kummissjoni. Il-pjanijiet finanzjarji emendati ma ġewx adottati mill-Kummissjoni qabel id-data ta' adozzjoni ta' din id-Deċiżjoni. Għalhekk, l-ammont totali ta' EUR 9 934 738,68, li hu inkluż fid-dikjarazzjonijiet annwali għas-sena finanzjarja 2014, għandu jiġi eskluż mid-deċiżjoni tal-approvazzjoni finanzjarja għas-sena finanzjarja 2014. Dan se jkun soġġett għal rimborż aktar tard mill-Kummissjoni wara l-adozzjonijiet tal-pjanijiet finanzjarji emendati jew mal-għeluq tal-perjodu tal-programmazzjoni.

(12)

F'konformità mal-Artikolu 36(3)(b) tar-Regolament (UE) Nru 1306/2013, l-ammont ta' EUR 913 212,81 iddikjarat għall-Programm għall-Iżvilupp Rurali 2007PT06RPO001 ġie eskluż mid-Deċiżjoni ta' approvazzjoni għas-sena finanzjarja 2013. Wara l-adozzjoni tal-pjan finanzjarju emendat, dak l-ammont ġie rimborżat mill-Kummissjoni fl-2014 u għalhekk għandu jiġi inkluż f'din id-Deċiżjoni ta' approvazzjoni.

(13)

Skont l-Artikolu 51 tar-Regolament (UE) Nru 1306/2013, din id-Deċiżjoni hija bla ħsara għad-deċiżjonijiet li l-Kummissjoni tista' tieħu biex teskludi nefqa mill-finanzjament tal-Unjoni li ma tkunx saret skont ir-regoli tal-Unjoni,