(a)

Messaġġ ċar mill-konsultazzjoni pubblika kien li l-partijiet interessati appoġġaw l-approċċ aktar iffukat tal-Kummissjoni fejn tipprijoritizza x-xogħol biex twassal elementi ewlenin li huma meħtieġa biex jitlesta s-suq intern tal-enerġija. Il-partijiet interessati huma tal-fehma li l-Kummissjoni, fil-konsultazzjoni tagħha, enfasizzat il-kompiti l-aktar importanti li jridu jsiru sabiex ikun hemm aktar integrazzjoni tas-suq intern tal-enerġija u m’għandu jiżdied l-ebda kompitu fil-lista annwali ta’ prijoritajiet għall-2014.

(b)

Bosta partijiet interessati qed jenfasizzaw l-importanza ta’ implimentazzjoni xierqa tal-kodiċijiet tan-netwerk li diġà ġew adottati, u wħud minnhom qed jappellaw għal rwol aktar attiv tal-Kummissjoni u tal-ACER biex jiżguraw implimentazzjoni koerenti. Barra minn hekk, il-partijiet interessati qed ifittxu ċarezza dwar emendi futuri tal-kodiċijiet tan-netwerk li diġà ġew adottati u x’governanza se jkun hemm. Waħda mill-partijiet interessati tistqarr il-ħtieġa urġenti li jkun hemm lista ta’ definizzjonijiet globali u unika li tkun valida għal kull kodiċi tan-netwerk.

(c)

Bosta partijiet interessati enfasizzaw l-importanza ta’ proċess trasparenti, effiċjenti u koerenti li jiggarantixxi l-involviment bikri u mill-qrib tal-partijiet interessati. Issemma wkoll il-bżonn li jingħataw il-perjodi ta’ żmien meħtieġa għall-iżvilupp ta’ kodiċijiet tan-netwerk b’saħħtihom, b’biżżejjed żmien għall-konsultazzjoni tal-atturi involuti. F’dan il-kuntest il-partijiet interessati talbu li l-abbozzi tal-proposti għal-linji gwida tal-qafas u għall-kodiċijiet tan-netwerk għandhom ikunu akkumpanjati mill-Valutazzjoni tal-Impatt rilevanti li kienet suġġetta għal konsultazzjoni mal-partijiet interessati.

(a)

Diversi partijiet interessati wrew tħassib li l-kodiċijiet tan-netwerk li qegħdin jiġu żviluppati ma jipprovdux livell suffiċjenti ta’ armonizzazzjoni fuq livell Ewropew, b’enfażi fuq il-fatt li bosta deċiżjonijiet (pereżempju dwar il-valuri jew il-metodoloġiji) mhumiex jittieħdu fil-kodiċi nnifsu iżda tħallew miftuħa għal proċess ta’ teħid ta’ deċiżjonijiet/approvazzjoni ulterjuri mit-TSOs u l-awtoritajiet regolatorji nazzjonali. Il-partijiet interessati jibżgħu li dan jista’ jwassal għal saff regolatorju supplimentari fil-livell Ewropew, u jżid aktar milli jsolvi d-diversità eżistenti fil-ġestjoni tan-netwerk u fir-regoli għat-tfassil tas-suq.

(b)

Xi partijiet interessati kienu mħassba dwar il-possibbiltà ta’ inkonsistenzi bejn il-kodiċijiet tan-netwerk u ddikjaraw li l-iżvilupp ta’ diversi kodiċijiet tan-netwerk skont l-istess linja gwida tal-qafas wera li mhuwiex l-aktar mod effiċjenti biex jiġu stabbiliti r-regoli Ewropej u għalhekk ipproponew li jiġi żviluppat kodiċi tan-netwerk wieħed biss f’konformità mal-linja gwida tal-qafas rispettiva. Xi wħud enfasizzaw li sabiex tiġi żgurata l-konsistenza, jinħtieġ li tal-anqas xi kodiċijiet tan-netwerk jiġu żviluppati flimkien bħalma huma r-regoli dwar ir-rekwiżit għal ġeneraturi, r-regoli għal allokazzjoni (bil-quddiem) tal-kapaċità fuq terminu twil, regoli ta’ bbilanċjar u regoli dwar rekwiżiti ta’ emerġenza.

(c)

Bosta partijiet interessati jappoġġaw l-iżvilupp ta’ regoli dwar l-istrutturi tariffarji tat-trażmissjoni armonizzati, peress li l-varjetà ta’ strutturi tariffarji attwali toħloq l-inugwaljanzi għall-ġeneraturi tal-elettriku fi ħdan l-UE minħabba li xi wħud, pereżempju, huma meħtieġa li jħallsu t-tariffi tal-grid u oħrajn le.

(d)

L-ENTSO-E esprima it-tħassib tiegħu li l-lista annwali ta’ prijoritajiet għall-2014 ma tinkludix regoli dwar l-inċentivi għall-investiment filwaqt li dawn kienu parti mil-lista għall-2013. L-ENTSO-E huwa tal-opinjoni li s-serħan fuq il-proċess stabbilit bir-Regolament il-ġdid dwar linji gwida għall-infrastruttura tal-enerġija trans-Ewropea (4) (‘Ir-Regolament TEN-E’), li permezz tiegħu il-KE tista’ toħroġ linji gwida fil-każ li tqis li l-metodoloġija li għandha tiġi ppubblikata sal-31 ta’ Marzu 2014 mill-awtoritajiet regolatorji nazzjonali fuq il-bażi ta’ rakkomandazzjonijiet dwar l-aħjar prattika mill-ACER, mhijiex suffiċjenti biex tkun żgurata l-implimentazzjoni f’waqtha tal-proġetti ta’ interess komuni, jipperikola l-effiċjenza tar-Regolament TEN-E kollu.

(a)

Il-maġġoranza tal-partijiet interessati jilqgħu b’mod pożittiv il-fatt li l-kapaċità inkrementali tqiegħdet fuq il-lista annwali ta’ prijoritajiet għall-2014 u jenfasizzaw li l-partijiet interessati jridu jiġu kkonsultati bir-reqqa fit-tħejjija tar-regoli u dawn għandhom ikunu koerenti mal-kodiċi tan-netwerk dwar il-mekkaniżi tal-allokazzjoni tal-kapaċità. Bosta partijiet interessati fosthom l-ENTSOG enfasizzaw l-interazzjoni b’saħħitha tar-regoli dwar it-tariffi u l-kapaċità inkrementali u li hemm bżonn tingħata attenzjoni għall-konsistenza bejn iż-żewġ suġġetti.

(b)

Bosta partijiet interessati fosthom l-ENTSOG appoġġaw it-twettiq ta’ eżerċizzju dwar id-definizzjoni tal-ambitu dwar regoli għall-kummerċ fl-2014 sabiex jiġi identifikat jekk humiex meħtieġa regoli Ewropej armonizzati għat-tfassil tal-kapaċità tal-prodotti u l-kuntratti fir-rigward ta’ fermezza, restrizzjonijiet għall-allokazzjoni u swieq sekondarji. Fl-ambitu għandha titqies l-esperjenza miksuba mill-implimentazzjoni tal-kodiċi tan-netwerk dwar il-mekkaniżmi ta’ allokazzjoni tal-kapaċità u l-ibbilanċjar u l-impatti possibbli miż-żieda fil-penetrazzjoni tal-enerġija rinnovabbli fis-swieq tal-elettriku. Waħda mill-partijiet interessati qed tipproponi li twettaq analiżi pass pass tad-differenzi fit-termini kuntrattwali u tal-proċessi tal-operaturi tas-sistema ta’ trażmissjoni f’kull Punt ta’ Interkonnessjoni. L-ENTSOG jappella biex jiġi rikonoxxut il-fatt li d-diskrepanzi tal-kapaċità u d-differenza fil-livelli ta’ fermezza huma konsegwenza inevitabbli tal-implimentazzjoni tas-sistemi tad-dħul u tal-ħruġ. Waħda mill-partijiet interessati qajmet oppożizzjoni qawwija fir-rigward tat-tfassil aktar armonizzat ta’ prodotti u kuntratti tal-kapaċità peress li mhuwiex meħtieġ u jista’ jwassal għal nuqqas ta’ offerta ta’ kapaċità kostanti u finalment għal investimenti ineffiċjenti. Barra minn hekk ġie ddikjarat li r-regoli għall-kummerċ għandhom jevitaw li jżidu l-kumplessità fil-proċess tal-implimentazzjoni tar-Regolament (UE) Nru 1227/2011 tal-Parlament Ewropew u tal-Kunsill (5) dwar l-Integrità u t-Trasparenza tas-Swieq tal-Enerġija.

(c)

Waħda mill-partijiet interessati qed tappella għal kodiċi tan-netwerk għall-kwalità tal-gass u kodiċi ta’ netwerk għall-effiċjenzi relatati mal-punt ta’ riferiment inklużi t-tariffi sabiex jintlaħaq l-għan ta’ suq intern b’mod effiċjenti u effikaċi, filwaqt li tissuġġerixxi bħala l-ewwel pass li jingħata mandat lill-ACER biex isir paragun bejn it-TSOs Ewropej kollha, inklużi s-servizzi pprovvduti kollha.

(d)

Waħda mill-partijiet interessati tissuġġerixxi li jiġi inkluż fil-lista ta’ prijoritajiet l-iżvilupp ta’ linji gwida biex tissolva s-sitwazzjoni tal-kuntratti storiċi, skont l-Artikolu 23.1 tar-Regolament (KE) Nru 715/2009.

(a)

Xi partijiet interessati laqgħu b’mod pożittiv ir-regoli dwar l-istabbiliment ta’ prinċipji biex jiġġudikaw l-adegwatezza tan-netwerks ta’ trażmissjoni, u għalhekk ir-rekwiżit lejn il-partijiet terzi. Partijiet interessati oħra huma tal-opinjoni li r-regoli dwar ir-riżervi, l-adegwatezza u l-mekkaniżmi tal-kapaċità mhumiex inklużi fl-Artikolu 8(6) tar-Regolament tal-Elettriku u tal-Gass u għalhekk ma jidhrux ġuridikament sodi, iżda minflok jaqgħu taħt il-kompetenzi tal-gvernijiet nazzjonali.

(b)

Bosta partijiet interessati qed jitolbu għal kjarifika dwar x’se jiġi inkluż fir-regoli dwar il-koordinazzjoni operazzjonali.

(c)

Waħda mill-partijiet interessati qed tipproponi li jiġu żviluppati regoli dwar l-akkwist, il-kummerċ u l-governanza ta’ servizzi anċillari kif ukoll it-tipi kollha ta’ flessibbiltà u ta’ servizzi ta’ kapaċità bl-għan ġenerali li jiġi żviluppat suq Ewropew għas-servizzi ta’ appoġġ tal-grid, inkluż l-ibbilanċjar u t-tipi kollha ta’ servizzi ta’ flessibbiltà.

(a)

Bosta partijiet interessati kienu tal-opinjoni li r-regoli dwar il-konnessjoni man-netwerk u l-proċeduri ta’ emerġenza għandhom ikunu koerenti mar-Regolament (UE) Nru 994/2010 tal-Parlament Ewropew u tal-Kunsill (6) dwar miżuri li jissalvagwardjaw is-sigurtà tal-provvista tal-gass.

(b)

Il-partijiet interessati kienu qed jiddubitaw l-ambitu tar-regoli dwar il-konnessjoni man-netwerk fir-rigward tal-provvediment ta’ sinjali tal-lokalità u ma kinux qed jappoġġaw l-iżvilupp ta’ regoli bħal dawn.

—

regoli dwar ir-rekwiżiti għall-ġeneraturi (fażi ta’ adozzjoni mill-Kummissjoni)

—

regoli dwar l-operatur tas-sistema ta’ distribuzzjoni u l-konnessjoni tat-tagħbija industrijali (fażi ta’ adozzjoni mill-Kummissjoni)

—

regoli dwar konnessjoni ta’ sistema ta’ trażmissjoni b’kurrent dirett b’vultaġġ għoli (finalizzazzjoni tal-kodiċi tan-netwerk u tinbeda l-fażi ta’ adozzjoni mill-Kummissjoni)

—

regoli dwar is-sigurtà tal-operat (fażi ta’ adozzjoni mill-Kummissjoni)

—

regoli dwar l-ippjanar u l-iskedar tal-operat (fażi ta’ adozzjoni mill-Kummissjoni)

—

regoli dwar il-kontroll u r-riżervi tal-frekwenza tat-tagħbija (fażi ta’ adozzjoni mill-Kummissjoni)

—

regoli dwar ir-rekwiżiti u l-proċeduri ta’ emerġenza (finalizzazzjoni tal-kodiċi tan-netwerk u tinbeda l-fażi ta’ adozzjoni mill-Kummissjoni)