(1)

L-Artikolu 39, il-paragrafu 1, tar-Regolament (KE) Nru 73/2009 jistabbilixxi li erjas li jintużaw għall-produzzjoni tal-qanneb ikunu eliġibbli biss għal pagamenti diretti jekk il-varjetajiet użati jkun fihom kontenut ta’ tetraidrokannabinol li ma jaqbiżx 0,2 %.

(2)

L-Artikolu 124, il-paragrafu 3, tar-Regolament (KE) Nru 73/2009 jistabbilixxi li l-Artikolu 39 ta’ dak ir-Regolament japplika għall-erjas fi ħdan l-iskema ta’ pagament uniku skont l-erja.

(3)

L-Artikolu 10 tar-Regolament tal-Kummissjoni (KE) Nru 1120/2009 tad-29 ta’ Ottubru 2009 li jippreskrivi regoli dettaljati għall-implimentazzjoni tal-iskema ta’ pagament uniku li hemm provvediment dwarha fit-Titolu III tar-Regolament tal-Kunsill (KE) Nru 73/2009 li jistabbilixxi regoli komuni għal skemi ta’ appoġġ dirett għal bdiewa fi ħdan il-politika agrikola komuni u li jistabbilixxi ċerti skemi ta’ appoġġ għal bdiewa (2) jistabbilixxi li l-pagament tad-drittijiet għall-erjas tal-qanneb se jkun suġġett għall-użu ta’ żerriegħa tal-varjetajiet elenkati fil-“Katalgu Komuni ta’ Varjetajiet ta’ Speċijiet ta’ Pjanti Agrikoli”, bl-eċċezzjoni tal-varjetajiet Finola u Tiborszállási, u jipprovdi għaċ-ċertifikazzjoni tagħhom.

(4)

Il-Finlandja u l-Ungerija nnotifikaw lill-Kummissjoni b’dejta dwar il-kontenut ta’ tetraidrokannabinol tal-varjetajiet Finola, imkabbra fil-Finlandja, u Tiborszállási, mkabbra fl-Ungerija, fejn instab li matul is-snin li għaddew dan il-kontenut kien taħt il-livell ta’ 0,2 %.

(5)

Abbażi ta’ din l-informazzjoni, il-Kummissjoni tikkunsidra li dawn il-varjetajiet tal-qanneb għandhom isiru eliġibbli, rispettivament, fl-Istati Membri kkonċernati.

(6)

Ir-Regolament (KE) Nru 1120/2009 għalhekk għandu jiġi emendat skont dan.

(7)

Il-miżuri pprovduti f’dan ir-Regolament huma konformi mal-fehma tal-Kumitat ta’ Ġestjoni għall-Pagamenti Diretti,