9.4.2011

MT

Il-Ġurnal Uffiċjali tal-Unjoni Ewropea

L 96/1

---

DEĊIŻJONI TAL-KUNSILL

tat-13 ta’ Diċembru 2010

dwar l-iffirmar, f’isem l-Unjoni, u l-applikazzjoni provviżorja tal-Ftehim bejn l-Unjoni Ewropea u r-Repubblika tal-Kap Verde dwar ċerti aspetti tas-servizzi bl-ajru

(2011/228/UE)

IL-KUNSILL TAL-UNJONI EWROPEA,

Wara li kkunsidra t-Trattat dwar il-Funzjonament tal-Unjoni Ewropea, u b’mod partikolari l-Artikolu 100(2), flimkien mal-Artikolu 218(5) tiegħu,

Wara li kkunsidra l-proposta mill-Kummissjoni Ewropea,

Billi:

(1)	Fid-Deċiżjoni tiegħu tal-5 ta’ Ġunju 2003, il-Kunsill awtorizza lill-Kummissjoni biex tiftaħ negozjati ma’ pajjiżi terzi dwar is-sostituzzjoni ta’ ċerti dispożizzjonijiet fil-ftehimiet bilaterali eżistenti bi ftehim fil-livell tal-Unjoni.

(2)	F’isem l-Unjoni, il-Kummissjoni nnegozjat Ftehim mar-Repubblika tal-Kap Verde dwar ċerti aspetti tas-servizzi bl-ajru (“Il-Ftehim”) skont il-mekkaniżmi u d-direttivi fl-Anness għad-Deċiżjoni tal-Kunsill tal-5 ta’ Ġunju 2003.

(3)	Il-Ftehim għandu jiġi ffirmat u applikat provviżorjament, suġġett għall-konklużjoni tiegħu,

ADOTTA DIN ID-DEĊIŻJONI:

Artikolu 1

L-iffirmar tal-Ftehim bejn l-Unjoni Ewropea u r-Repubblika tal-Kap Verde dwar ċerti aspetti tas-servizzi bl-ajru (il-“Ftehim”) huwa b’dan approvat f’isem l-Unjoni, suġġett għall-konklużjoni ta’ dan il-Ftehim.

It-test tal-Ftehim huwa mehmuż ma’ din id-Deċiżjoni.

Artikolu 2

Il-President tal-Kunsill huwa b’dan awtorizzat li jinnomina l-persuna/i bis-setgħa li tiffirma/jiffirmaw il-Ftehim f’isem l-Unjoni, suġġett għall-konklużjoni tiegħu.

Artikolu 3

Sakemm jidħol fis-seħħ, il-Ftehim għandu jiġi applikat provviżorjament mill-ewwel jum tal-ewwel xahar wara d-data li fiha l-partijiet ikunu nnotifikaw lil xulxin dwar it-tlestija tal-proċeduri neċessarji għal dan il-għan (1).

Artikolu 4

Il-President tal-Kunsill huwa b’dan awtorizzat jagħmel in-notifika prevista fl-Artikolu 8(2) tal-Ftehim.

Artikolu 5

Din id-Deċiżjoni għandha tidħol fis-seħħ fid-data tal-adozzjoni tagħha.

---

(1)  Id-data li minnha l-Ftehim jibda jiġi applikat provviżorjament ser tiġi ppubblikata f’Il-Ġurnal Uffiċjali tal-Unjoni Ewropea mis-Segretarjat Ġenerali tal-Kunsill.

---

9.4.2011

MT

Il-Ġurnal Uffiċjali tal-Unjoni Ewropea

L 96/1

---

FTEHIM

bejn l-Unjoni Ewropea u r-Repubblika tal-Kap Verde dwar ċerti aspetti tas-servizzi bl-ajru

L-UNJONI EWROPEA, minn hawn ’il quddiem imsejħa “l-Unjoni”

minn naħa waħda, u

IR-REPUBBLIKA TAL-KAP VERDE, minn hawn ’il quddiem imsejħa “Kap Verde”

min-naħa l-oħra

minn hawn ’il quddiem imsejħa “il-Partijiet”

FILWAQT LI JINNUTAW li ġew konklużi ftehimiet bilaterali dwar is-servizzi bl-ajru bejn diversi Stati Membri tal-Unjoni u Kap Verde li fihom dispożizzjonijiet kontra l-liġi tal-Unjoni,

FILWAQT LI JINNUTAW li l-Unjoni għandha kompetenza esklussiva fir-rigward ta’ diversi aspetti li jistgħu jiġu inklużi fi ftehimiet bilaterali dwar is-servizzi bl-ajru bejn l-Istati Membri tal-Unjoni u pajjiżi terzi,

FILWAQT LI JINNUTAW li skont il-liġi tal-Unjoni, it-trasportaturi bl-ajru tal-Unjoni stabbiliti fi Stat Membru tal-Unjoni għandhom id-dritt għal aċċess mhux diskriminatorju għal rotot tal-ajru bejn l-Istati Membri tal-Unjoni u pajjiżi terzi,

WARA LI KKUNSIDRAW il-ftehimiet bejn l-Unjoni u ċerti pajjiżi terzi li jipprovdu l-possibbiltà għaċ-ċittadini ta’ dawn il-pajjiżi terzi li jiksbu sjieda ta’ trasportaturi bl-ajru liċenzjati skont il-liġi tal-Unjoni,

FILWAQT LI JIRRIKONOXXU li ċerti dispożizzjonijiet tal-ftehimiet bilaterali dwar is-servizzi bl-ajru bejn l-Istati Membri tal-Unjoni u Kap Verde, li huma kontra l-liġi tal-Unjoni Ewropea, għandhom jinġiebu f’konformità magħha biex tiġi stabbilita bażi legali tajba għas-servizzi bl-ajru bejn l-Unjoni u Kap Verde u biex tiġi ppreżervata l-kontinwità ta’ dawn is-servizzi bl-ajru,

FILWAQT LI JIRRIKONOXXU li fil-konklużjoni ta’ kwalunkwe ftehimiet dwar is-servizzi bl-ajru mill-Gvern tar-Repubblika tal-Kap Verde ma’ Stati li mhumiex Stati Membri tal-Unjoni, Kap Verde jimplimenta l-politika u r-regoli tiegħu stess dwar is-sjieda u l-kontroll tat-trasportaturi bl-ajru,

FILWAQT LI JINNUTAW li skont il-liġi tal-Unjoni, it-trasportaturi bl-ajru tal-Unjoni ma jistgħux, bi prinċipju, jagħmlu ftehimiet li jistgħu jaffettwaw il-kummerċ bejn l-Istati Membri tal-Unjoni u li jkollhom bħala għan jew effett il-prevenzjoni, ir-restrizzjoni jew id-distorsjoni tal-kompetizzjoni,

FILWAQT LI JIRRIKONOXXU li d-dispożizzjonijiet fil-ftehimiet bilaterali dwar is-servizzi bl-ajru konklużi bejn l-Istati Membri tal-Unjoni u Kap Verde li i) jirrikjedu jew jiffavorixxu l-adozzjoni ta’ ftehimiet bejn impriżi, deċiżjonijiet minn assoċjazzjonijiet ta’ impriżi jew prattiki miftiehma li jipprevjenu, joħolqu distorsjoni jew jirrestrinġu l-kompetizzjoni bejn trasportaturi bl-ajru fuq ir-rotot rilevanti; jew ii) isaħħu l-effetti ta’ kwalunkwe ftehim, deċiżjoni jew prattika miftiehma bħal dawn; jew iii) jiddelegaw lit-trasportaturi bl-ajru jew lil operaturi ekonomiċi privati oħra r-responsabbiltà għat-teħid tal-miżuri li jipprevjenu, joħolqu distorsjoni jew jirrestrinġu l-kompetizzjoni bejn it-trasportaturi bl-ajru fuq ir-rotot rilevanti jistgħu jrendu r-regoli tal-kompetizzjoni applikabbli għall-impriżi ineffettivi,

FILWAQT LI JINNUTAW li mhuwiex għan tal-Unjoni, bħala parti minn dan il-Ftehim, li jiżdied il-volum totali tat-traffiku fl-ajru bejn l-Unjoni u Kap Verde, li jiġi affettwat il-bilanċ bejn it-trasportaturi bl-ajru tal-Unjoni u t-trasportaturi bl-ajru ta’ Kap Verde, jew li jiġu nnegozjati emendi għad-dispożizzjonijiet tal-ftehimiet bilaterali eżistenti dwar is-servizzi bl-ajru li jikkonċernaw id-drittijiet tat-traffiku.

FTIEHMU KIF ĠEJ:

Artikolu 1

Dispożizzjonijiet ġenerali

1.   Għall-finijiet ta’ dan il-Ftehim, l-‘Istati Membri’ għandha tfisser l-Istati Membri tal-Unjoni Ewropea; it-‘Trattati tal-UE’ għandha tfisser it-Trattat dwar l-Unjoni Ewropea u t-Trattat dwar il-Funzjonament tal-Unjoni Ewropea; ‘Parti’ għandha tfisser parti kontraenti ta’ dan il-ftehim; ‘trasportatur bl-ajru’ għandha tfisser ukoll linja tal-ajru; ‘territorju tal-Unjoni’ għandha tfisser territorji tal-Istati Membri li għalihom japplikaw it-Trattati tal-UE.

2.   Ir-referenzi f’kull wieħed mill-ftehimiet elenkati fl-Anness 1 għaċ-ċittadini tal-Istat Membru li jkun Parti minn dak il-ftehim għandhom jinftiehmu bħala li jirreferu għaċ-ċittadini tal-Istati Membri.

3.   Ir-referenzi f’kull wieħed mill-ftehimiet elenkati fl-Anness 1 għal trasportaturi bl-ajru jew linji tal-ajru tal-Istat Membru li huwa Parti minn dak il-ftehim għandhom jinftiehmu li qed jirreferu għal trasportaturi bl-ajru jew linji tal-ajru magħżula minn dak l-Istat Membru.

Artikolu 2

Deżinjazzjoni, awtorizzazzjoni u revoka

1.   Id-dispożizzjonijiet fil-paragrafi 2 sa 4 ta’ dan l-Artikolu għandhom jieħdu post id-dispożizzjonijiet korrispondenti fl-artikoli elenkati fl-Anness 2 (a) u (b) rispettivament, fir-rigward tad-deżinjazzjoni ta’ trasportatur bl-ajru, u l-liċenzji u l-permessi mogħtija lilu.

2.   Mal-wasla ta’ deżinjazzjoni minn Stat Membru, Kap Verde għandu jagħti l-awtorizzazzjonijiet u l-permessi xierqa bl-anqas dewmien proċedurali, bil-kondizzjoni li:

(a)	it-trasportatur bl-ajru jkun stabbilit, fit-territorju tal-Istat Membru li jagħmel id-deżinjazzjoni, skont it-Trattati tal-UE u jkollu Liċenzja Operattiva valida skont il-liġi tal-Unjoni; u

(b)	jiġi eżerċitat u jibqa’ jsir kontroll regolatorju effettiv tat-trasportatur bl-ajru mill-Istat Membru responsabbli biex joħroġ iċ-Ċertifikat tal-Operatur bl-Ajru tiegħu u l-awtorità ajronawtika rilevanti tkun identifkata b’mod ċar fid-deżinjazzjoni; u

(c)	it-trasportatur bl-ajru jkun il-proprjetà, direttament jew permezz ta’ maġġoranza azzjonarja, u jkun effettivament ikkontrollat mill-Istati Membri u/jew miċ-ċittadini tal-Istati Membri, u/jew minn stati oħra elenkati fl-Anness 3 u/jew ċittadini ta’ stati oħra bħal dawn.

3.   Kap Verde jista’ jirrifjuta, jirrevoka, jissospendi jew jillimita l-awtorizzazzjonijiet jew il-permessi ta’ trasportatur bl-ajru magħżul minn Stat Membru meta:

(a)	it-trasportatur bl-ajru ma jkunx stabbilit, fit-territorju tal-Istat Membru li jagħmel id-deżinjazzjoni, skont it-Trattati tal-UE jew ma jkollux Liċenzja Operattiva valida skont il-liġi tal-Unjoni; jew

(b)	ma jiġix eżerċitat jew ma jibqax isir kontroll regolatorju effettiv tat-trasportatur bl-ajru mill-Istat Membru tal-UE responsabbli biex joħroġ iċ-Ċertifikat tal-Operatur bl-Ajru tiegħu, jew l-awtorità ajronawtika rilevanti ma tkunx identifikata b’mod ċar fid-deżinjazzjoni; jew

(c)	it-trasportatur bl-ajru ma jkunx il-proprjetà, direttament jew permezz ta’ maġġoranza azzjonarja, jew ma jkunx effettivament kontrollat mill-Istati Membri u/jew miċ-ċittadini tal-Istati Membri, u/jew minn stati oħra elenkati fl-Anness 3 u/jew ċittadini ta’ stati oħra bħal dawn.

4.   Fl-eżerċizzju tad-dritt tiegħu skont il-paragrafu 3 ta’ dan l-Artikolu, Kap Verde m’għandux jiddiskrimina bejn it-trasportaturi bl-ajru tal-Istati Membri fuq bażi ta’ nazzjonalità.

Artikolu 3

Sikurezza

1.   Id-dispożizzjonijiet fil-paragrafu 2 ta’ dan l-Artikolu għandhom jikkumplimentaw id-dispożizzjonijiet korrispondenti fl-artikoli elenkati fl-Anness 2 (c).

2.   Meta Stat Membru jkun iddeżinja trasportatur bl-ajru li l-kontroll regolatorju tiegħu jkun eżerċitat u miżmum minn Stat Membru ieħor, id-drittijiet ta’ Kap Verde taħt id-dispożizzjonijiet tas-sikurezza tal-ftehim bejn l-Istat Membru li jkun iddeżinja t-trasportatur bl-ajru u Kap Verde għandhom japplikaw b’mod ugwali fir-rigward tal-adozzjoni, l-eżerċizzju jew iż-żamma tal-istandards tas- sikurezza mill-Istat Membru l-ieħor u fir-rigward tal-awtorizzazzjoni għall-operat ta’ dak it-trasportatur bl-ajru.

Artikolu 4

Tassazzjoni tal-karburant tal-avjazzjoni

1.   Id-dispożizzjonijiet fil-paragrafu 2 ta’ dan l-Artikolu għandhom jikkumplimentaw id-dispożizzjonijiet korrispondenti fl-artikoli elenkati fl-Anness 2 (d).

2.   Minkejja kwalunkwe dispożizzjoni oħra kontra dan, xejn f’kull wieħed mill-ftehimiet elenkati fl-Anness 2 (d) m’għandu jżomm Stat Membru milli jimponi, fuq bażi mhux diskriminatorja, taxxi, imposti, dazji, drittijiet jew ħlasijiet fuq karubrant ipprovdut fit-territorju tiegħu għall-użu fuq inġenju tal-ajru ta’ trasportatur bl-ajru ddeżinjat ta’ Kap Verde li jopera bejn punt fit-territorju ta’ dak l-Istat Membru u punt ieħor fit-territorju ta’ dak l-Istat Membru jew fit-territorju ta’ Stat Membru ieħor.

Artikolu 5

Il-kompatibbiltà mar-regoli dwar il-kompetizzjoni

1.   Minkejja kwalunkwe dispożizzjoni oħra kontra dan, xejn f’kull wieħed mill-ftehimiet elenkati fl-Anness 1 m’għandu (i) jirrikjedi jew jiffavorixxi l-adozzjoni ta’ ftehimiet bejn impriżi, deċiżjonijiet minn assoċjazzjonijiet tal-impriżi jew prattiki mifteihma li jipprevjenu jew joħolqu distorsjoni tal-kompetizzjoni; (ii) isaħħaħ l-effetti ta’ kwalunkwe ftehim, deċiżjoni jew prattiki miftiehma bħal dawn; jew (iii) jiddelega lil operaturi ekonomiċi privati r-responsabbiltà għat-teħid ta’ miżuri li jipprevjenu, joħoqu distorsjoni jew jirrestrinġu l-kompetizzjoni.

2.   Id-dispożizzjonijiet inklużi fil-ftehimiet elenkati fl-Anness 1 li huma inkompatibbli mal-paragrafu 1 ta’ dan l-Artikolu m’għandhomx jiġu applikati.

Artikolu 6

Annessi għal dan il-Ftehim

L-Annessi għal dan il-Ftehim għandhom jiffurmaw parti integrali minnu.

Artikolu 7

Reviżjoni jew emendi

Il-Partijiet jistgħu, f’kull ħin, jirrevedu jew jemendaw dan il-Ftehim b’kunsens reċiproku.

Artikolu 8

Dħul fis-seħħ u applikazzjoni provviżorja

1.   Dan il-Ftehim għandu jidħol fis-seħħ meta l-Partijiet jkunu nnotifikaw lil xulxin bil-miktub li l-proċeduri interni rispettivi tagħhom meħtieġa għad-dħul fis-seħħ tiegħu ikunu tlestew.

2.   Minkejja l-paragrafu 1, il-Partijiet jaqblu li japplikaw dan il-Ftehim provviżorjament mill-ewwel jum tax-xahar wara d-data li fiha l-Partijiet ikunu nnotifikaw lil xulxin dwar it-tlestija tal-proċeduri meħtieġa għal dan il-għan.

3.   Dan il-Ftehim għandu japplika għall-ftehimiet u l-arranġamenti kollha elenkati fl-Anness 1 inklużi dawk li, fid-data tal-iffirmar ta’ dan il-Ftehim, ikunu għadhom ma daħlux fis-seħħ u għadhom mhux qed jiġu applikati b’mod provviżorju.

Artikolu 9

Terminazzjoni

1.   Fil-każ li ftehim elenkat fl-Anness 1 jiġi tterminat, id-dispożizzjonijiet kollha ta’ dan il-Ftehim li jirrigwardaw il-ftehim elenkat fl-Anness 1 ikkonċernat għandhom jiġu tterminati fl-istess waqt.

2.   Fil-każ li l-ftehimiet kollha elenkati fl-Anness 1 jiġu tterminati, dan il-Ftehim għandu jiġi tterminat fl-istess waqt.

---

ANNESS 1

LISTA TAL-FTEHIMIET IMSEMMIJA FL-ARTIKOLU 1 TA’ DAN IL-FTEHIM

(a)

Ftehimiet dwar is-servizzi bl-ajru bejn Kap Verde u l-Istati Membri li, fid-data tal-iffirmar ta’ dan il-Ftehim, ġew konklużi, iffirmati u/jew qed jiġu applikati provviżorjament — Ftehim bejn il-Gvern tar-Renju tal-Belġju u l-Gvern tar-Repubblika tal-Kap Verde dwar it-Trasport bl-Ajru ffirmat fi Brussell fit-22 ta’ Ġunju 1998, minn hawn 'il quddiem imsejjaħ “Il-Ftehim Kap Verde – Belġju” fl-Anness 2; — Ftehim dwar it-Trasport bl-Ajru bejn il-Gvern tar-Repubblika Federali tal-Ġermanja u l-Gvern tar-Repubblika tal-Kap Verde ffirmat f’Berlin fid-19 ta’ Ġunju 2001, minn hawn 'il quddiem imsejjaħ “Il-Ftehim Kap Verde – Ġermanja” fl-Anness 2; — Ftehim bejn il-Gvern tar-Repubblika Taljana u l-Gvern tar-Repubblika tal-Kap Verde dwar is-Servizzi bl-Ajru ffirmat fi Praia fis-7 ta’ Lulju 1998, minn hawn 'il quddiem imsejjaħ “Il-Ftehim Kap Verde – Italja” fl-Anness 2; — Ftehim bejn ir-Renju tal-Pajjiżi l-Baxxi u r-Repubblika tal-Kap Verde għas-servizzi bl-ajru ffirmat fl-Aja fil-21 ta’ Diċembru 1988, minn hawn 'il quddiem imsejjaħ “Il-Ftehim Kap Verde – Pajjiżi l-Baxxi” fl-Anness 2; — Ftehim dwar it-Trasport bl-Ajru bejn ir-Repubblika Portugiża u r-Repubblika tal-Kap Verde, iffirmat f’Cidade da Praia fit-30 ta’ Marzu 2004, minn hawn 'il quddiem imsejjaħ “Il-Ftehim Kap Verde – Portugall” fl-Anness 2; — Ftehim bejn il-Gvern tar-Repubblika Soċjalista tar-Rumanija u l-Gvern tar-Repubblika tal-Kap Verde dwar is-Servizzi bl-Ajru ffirmat f’Bukarest fil-31 ta’ Awwissu 1983, minn hawn 'il quddiem imsejjaħ “Il-Ftehim Kap Verde – Rumanija” fl-Anness 2; — Ftehim bejn ir-Renju ta’ Spanja u r-Repubblika ta’ Kap Verde fir-rigward ta’ Servizzi bl-Ajru ffirmat f’Madrid fid-19 ta’ Settembru 2002, minn hawn 'il quddiem imsejjaħ “Il-Ftehim Kap Verde – Spanja” fl-Anness 2; — Ftehim bejn il-Gvern tar-Renju Unit tal-Gran Brittanja u l-Irlanda ta’ Fuq u l-Gvern tar-Repubblika tal-Kap Verde dwar is-Servizzi bl-Ajru ffirmat fi Praia fid-9 ta’ Jannar 2007, minn hawn 'il quddiem imsejjaħ “Il-Ftehim Kap Verde – Renju Unit” fl-Anness 2;

(b)	Ftehimiet dwar is-servizzi bl-ajru u arranġamenti oħra inizjalati jew iffirmati bejn Kap Verde u l-Istati Membri li, fid-data tal-iffirmar ta’ dan il-Ftehim, għadhom ma daħlux fis-seħħ u għadhom mhux qed jiġu applikati provviżorjament.

---

ANNESS 2

LISTA TA’ ARTIKOLI FIL-FTEHIMIET ELENKATI FL-ANNESS 1 U MSEMMIJA FL-ARTIKOLI 2 SA 4 TA’ DAN IL-FTEHIM

(a)

Id-deżinjazzjoni: — L-Artikolu 3 tal-Ftehim Kap Verde – Belġju; — L-Artikolu 3(4) tal-Ftehim Kap Verde – Ġermanja; — L-Artikolu 4 tal-Ftehim Kap Verde – Italja; — L-Artikolu 3 tal-Ftehim Kap Verde – Pajjiżi l-Baxxi; — L-Artikolu 3 tal-Ftehim Kap Verde – Rumanija; — L-Artikolu 3 tal-Ftehim Kap Verde – Spanja;

(b)

Ir-rifjut, ir-revoka, is-sospensjoni jew il-limitazzjoni tal-awtorizzazzjonijiet jew tal-permessi: — L-Artikolu 5 tal-Ftehim Kap Verde – Belġju; — L-Artikoli 3(4) u l-Artikolu 4 tal-Ftehim Kap Verde – Ġermanja; — L-Artikoli 4 u 5 tal-Ftehim Kap Verde – Italja; — L-Artikoli 3 u 4 tal-Ftehim Kap Verde – Pajjiżi l-Baxxi; — L-Artikolu 4 tal-Ftehim Kap Verde – Rumanija; — L-Artikolu 4 tal-Ftehim Kap Verde – Spanja;

(c)	Is-sikurezza: — L-Artikolu 12 tal-Ftehim Kap Verde – Ġermanja; — L-Artikolu 10 tal-Ftehim Kap Verde – Italja; — L-Artikolu 15 tal-Ftehim Kap Verde – Portugall; — Artikolu 9 tal-Ftehim Kap Verde – Rumanija; — L-Artikolu 13 tal-Ftehim Kap Verde – Spanja;

(d)

t-tassazzjoni tal-karburant tal-avjazzjoni: — L-Artikolu 10 tal-Ftehim Kap Verde – Belġju; — L-Artikolu 6 tal-Ftehim Kap Verde – Ġermanja; — L-Artikolu 6 tal-Ftehim Kap Verde – Italja; — L-Artikolu 6 tal-Ftehim Kap Verde – Pajjiżi l-Baxxi; — L-Artikolu 11 tal-Ftehim Kap Verde – Rumanija; — L-Artikolu 5 tal-Ftehim Kap Verde – Spanja.

---

ANNESS 3

LISTA TA’ STATI OĦRA MSEMMIJA FL-ARTIKOLU 2 TA’ DAN IL-FTEHIM

(a)	r-Repubblika tal-Islanda (taħt il-Ftehim dwar iż-Żona Ekonomika Ewropea);

(b)	l-Prinċipat tal-Liechtenstein (taħt il-Ftehim dwar iż-Żona Ekonomika Ewropea);

(c)	r-Renju tan-Norveġja (taħt il-Ftehim dwar iż-Żona Ekonomika Ewropea);

(d)	l-Konfederazzjoni Svizzera (taħt il-Ftehim bejn il-Komunità Ewropea u l-Konfederazzjoni Svizzera dwar it-Trasport bl-Ajru)