This document is an excerpt from the EUR-Lex website
Document 32010H0253
Commission Recommendation of 28 April 2010 on the research joint programming initiative on Agriculture, food security and climate change
Rakkomandazzjoni tal-Kummissjoni tat- 28 ta’ April 2010 dwar l-inizjattiva għall-ipprogrammar konġunt fil-qasam tar-riċerka dwar L-agrikoltura, is-sigurtà tal-ikel u t-tibdil fil-klima
Rakkomandazzjoni tal-Kummissjoni tat- 28 ta’ April 2010 dwar l-inizjattiva għall-ipprogrammar konġunt fil-qasam tar-riċerka dwar L-agrikoltura, is-sigurtà tal-ikel u t-tibdil fil-klima
ĠU L 111, 4.5.2010, p. 27–29
(BG, ES, CS, DA, DE, ET, EL, EN, FR, IT, LV, LT, HU, MT, NL, PL, PT, RO, SK, SL, FI, SV)
In force
4.5.2010 |
MT |
Il-Ġurnal Uffiċjali tal-Unjoni Ewropea |
L 111/27 |
RAKKOMANDAZZJONI TAL-KUMMISSJONI
tat-28 ta’ April 2010
dwar l-inizjattiva għall-ipprogrammar konġunt fil-qasam tar-riċerka dwar “L-agrikoltura, is-sigurtà tal-ikel u t-tibdil fil-klima”
(2010/253/UE)
IL-KUMMISSJONI EWROPEA,
Wara li kkunsidrat it-Trattat dwar il-Funzjonament tal-Unjoni Ewropea, u b’mod partikulari l-Artikolu 181 tiegħu,
Billi:
(1) |
Is-setturi tal-agrikoltura u l-forestrija huma esposti ħafna għat-tibdil fil-klima minħabba li huma jiddependu direttament fuq il-kundizzjonijiet klimatiċi filwaqt li l-emissjonijiet mill-agrikoltura fl-Unjoni jammontaw għal 14 % tal-emissjonijiet globali tal-gassjiet b’effett ta’ serra. |
(2) |
It-tibdil fil-klima huwa wieħed mill-isfidi ewlenin għall-agrikoltura biex titma l-popolazzjoni tad-dinja, li hija mistennija tilħaq id-9 biljun ruħ sal-2050. |
(3) |
Id-domanda globali għall-ikel hija mistennija li se tkun żdiedet b’50 % sal-2030 u li sal-2050 se tkun irduppjat, fi żmien meta d-domanda għall-bijomassa għal skopijiet mhux tal-ikel hija prevista li se tikber bil-qawwa. |
(4) |
L-agrikoltura u l-forestrija qed iħabbtu wiċċhom ma’ domanda għal oġġetti mhux tal-ikel għall-bijomassa li qed tiżdied bil-qawwa, immexxija mill-isforzi tal-mitigazzjoni f’setturi oħrajn u mill-ħtieġa li naqilbu għal ekonomija b’livell baxx ta’ emissjonijiet tal-karbonju. |
(5) |
Il-ħażniet globali ta’ ċertu ikel bażiku naqsu, u l-prezzijiet għoljin fl-ikel, bħal dawk li rajna matul l-2008, jistgħu jkunu iktar frekwenti jekk id-domanda li dejjem qed tikber ma tkunx tista’ tintlaħaq b’mod konsistenti mill-provvista. |
(6) |
It-tibdil fil-klima jista’ jaffettwa l-uċuħ tar-raba’, il-ġestjoni tal-bhejjem u l-post tal-produzzjoni, u jista’ jkollu konsegwenzi importanti fuq id-dħul tal-irziezet, l-użu tal-art u l-ekonomiji rurali f’ċerti partijiet tal-Unjoni. |
(7) |
Is-settur agrikolu tal-pajjiżi tropikali u subtropikali, partikolarment dak tal-Afrika ta’ ‘l isfel mis-Saħara, huwa vulnerabbli ferm għat-tibdil fil-klima, u kwalunkwe kriżi ewlenija tal-ikel f’dawk ir-reġjuni jkollha impatt fuq l-Ewropa. |
(8) |
Jeħtieġu azzjonijiet miftiehma biex nevitaw li dawn ir-riskji, meħudin flimkien, iwasslu għal ħsara li ma tistax titraġġa’ lura u biex niksbu provvista sostenibbli tal-ikel taħt il-kundizzjonijiet klimatiċi li qed jinbidlu. |
(9) |
Din l-inizjattiva għall-ipprogrammar konġunt hija rilevanti wkoll għall-iżvilupp tal-Politika Agrikola Komuni. |
(10) |
Fil-laqgħa tiegħu tat-3 ta’ Diċembru 2009, il-Kunsill Kompetittività għaraf “l-agrikoltura, is-sigurtà tal-ikel u t-tibdil fil-klima” bħala qasam fejn l-ipprogrammar konġunt se jipprovdi valur miżjud ewlieni għall-isforzi frammentati attwali fil-qasam tar-riċerka fl-Istati Membri. Għalhekk, huwa adotta konklużjonijiet li fihom għaraf il-ħtieġa li titnieda inizjattiva għall-ipprogrammar konġunt dwar dan is-suġġett u li fihom stieden lill-Kummissjoni tagħti kontribut fit-tħejjija ta’ dik l-inizjattiva. Il-Kunsill ikkonferma mill-ġdid ukoll li l-ipprogrammar konġunt huwa proċess li jmexxuh l-Istati Membri u li fih il-Kummissjoni għandha biss ir-rwol li tiffaċilitah. |
(11) |
L-ipprogrammar konġunt fir-riċerka dwar il-qasam tal-agrikoltura, is-sigurtà tal-ikel u t-tibdil fil-klima se jħeġġeġ il-ġbir flimkien tal-ħiliet, l-għarfien u r-riżorsi, bil-għan li tiġi avvanzata r-riċerka biex tindirizza l-isfida tas-sigurtà tal-ikel u t-theddida kkaġunata mit-tibdil fil-klima, iż-żieda fil-popolazzjoni globali, u d-domanda għall-ikel u għal oġġetti mhux tal-ikel. |
(12) |
Sabiex jintlaħqu l-għanijiet stabbiliti b’din ir-Rakkomandazzjoni, l-Istati Membri għandhom jikkooperaw mal-Kummissjoni billi jesploraw inizjattivi li tista’ tieħu l-Kummissjoni sabiex l-Istati Membri jiġu megħjuna jiżviluppaw u jimplimentaw l-aġenda strateġika tar-riċerka. L-Istati Membri għandhom jikkooperaw ukoll mal-Kumitat Permanenti dwar ir-Riċerka Agrikola biex jiżguraw li l-attivitajiet tal-ipprogrammar konġunt ikunu kkoordinati mal-aġenda usa’ tar-riċerka agrikola. |
(13) |
Sabiex il-Kummissjoni tkun tista’ tirrapporta lill-Parlament Ewropew u lill-Kunsill, l-Istati Membri għandhom jirrapportaw b’mod regolari lill-Kummissjoni dwar il-progress li jkun qed isir f’din l-inizjattiva għall-ipprogrammar konġunt, |
ADOTTAT DIN IR-RAKKOMANDAZZJONI:
1. |
L-Istati Membri huma mħeġġa jiżviluppaw viżjoni komuni dwar kif il-kooperazzjoni u l-koordinazzjoni fil-qasam tar-riċerka fil-livell tal-Unjoni jistgħu jindirizzaw l-isfida tas-sigurtà tal-ikel u t-theddida tat-tibdil fil-klima, iż-żieda fil-popolazzjoni globali, u d-domanda għall-ikel u għal oġġetti mhux tal-ikel. |
2. |
L-Istati Membri huma mħeġġa jiżviluppaw aġenda strateġika komuni tar-riċerka li tistabbilixxi l-ħtiġijiet u l-għanijiet medji u fit-tul tar-riċerka fil-qasam tas-sigurtà tal-ikel permezz tal-adattament għat-tibdil fil-klima u l-mitigazzjoni tal-effetti ta’ dan it-tibdil fl-agrikoltura. L-aġenda strateġika tar-riċerka għandha tinkludi pjan tal-implimentazzjoni li jistabbilixxi l-prijoritajiet u meta dawn għandhom jintlaħqu u li jispeċifika l-azzjonijiet, l-istrumenti u r-riżorsi meħtieġa biex l-aġenda strateġika tar-riċerka tiġi implimentata. |
3. |
L-Istati Membri huma mħeġġa jinkludu l-azzjonijiet li ġejjin bħala parti mill-aġenda strateġika tar-riċerka u mill-pjan tal-implimentazzjoni:
|
4. |
L-Istati Membri huma mħeġġa jistabbilixxu struttura ta’ ġestjoni komuni fil-qasam tal-agrikoltura, is-sigurtà tal-ikel u t-tibdil fil-klima li jkollha s-setgħa tistabbilixxi kundizzjonijiet, regoli u proċeduri komuni għall-kooperazzjoni u l-koordinazzjoni u li jkollha s-setgħa timmonitorja l-implimentazzjoni tal-aġenda strateġika tar-riċerka. |
5. |
L-Istati Membri huma mħeġġa jimplimentaw l-aġenda strateġika tar-riċerka b’mod konġunt, inkluż permezz tal-programmi nazzjonali tar-riċerka tagħhom jew permezz ta’ attivitajiet nazzjonali oħrajn tar-riċerka. |
6. |
L-Istati Membri huma mħeġġa jikkooperaw mal-Kummissjoni bil-għan li jiġu esplorati inizjattivi li tista’ tieħu l-Kummissjoni biex l-Istati Membri jiġu megħjuna jiżviluppaw u jimplimentaw l-aġenda strateġika tar-riċerka u bil-għan li l-programmi konġunti jiġu kkoordinati mal-inizjattivi l-oħra tal-Unjoni Ewropea f’dan il-qasam. |
7. |
L-Istati Membri huma mħeġġa jikkooperaw mal-Kummissjoni fit-tfittxija ta’ forom possibbli ta’ involviment tal-komunità tal-bdiewa u ta’ persuni interessati oħrajn fl-applikazzjoni tar-riżultati miksuba u fil-kunsiderazzjoni ta’ kif l-inizjattiva għall-ipprogrammar konġunt tista’ tiġi integrata bl-aħjar mod fl-iżvilupp tal-Politika Agrikola Komuni. |
8. |
L-Istati Membri huma mħeġġa jikkooperaw mal-Kummissjoni fl-użu tal-istrumenti kollha rilevanti tal-politika tal-innovazzjoni biex jiffaċilitaw it-trasformazzjoni tar-riżultati tar-riċerka fi prodotti u servizzi, u b’mod partikulari billi jagħmlu l-forom kollha tal-innovazzjoni aċċessibbli għall-intrapriżi żgħar u ta’ daqs medju, inklużi l-bdiewa. |
9. |
L-Istati Membri huma mħeġġa jikkooperaw mal-Kummissjoni fit-tfittxija ta’ forom possibbli ta’ konsultazzjoni u kooperazzjoni dwar dan is-suġġett ma’ entitajiet jew gruppi xierqa fil-livell internazzjonali. |
10. |
L-Istati Membri huma mħeġġa jikkooperaw mal-Kumitat Permanenti dwar ir-Riċerka Agrikola biex jiżguraw li l-attivitajiet tal-ipprogrammar konġunt ikunu kkoordinati mal-aġenda usa’ tar-riċerka agrikola. |
11. |
L-Istati Membri huma mħeġġa jirrapportaw b’mod regolari lill-Kummissjoni dwar il-progress li jkun qed isir f’din l-inizjattiva għall-ipprogrammar konġunt. |
Magħmul fi Brussell, it-28 ta’ April 2010.
Għall-Kummissjoni
Máire GEOGHEGAN-QUINN
Membru tal-Kummissjoni