31.12.2010   

MT

Il-Ġurnal Uffiċjali tal-Unjoni Ewropea

L 347/29

(1)

Permezz ta’ e-mail tat-30 ta’ April 2004, l-awtoritajiet Pollakki nnotifikaw żewġ skemi ta’ għajnuna favur l-operatur postali Pollakk Państwowe Przedsiębiorstwo Użyteczności Publicznej Poczta Polska (minn issa ’l quddiem PP), skont il-“proċedura tal-mekkaniżmu temporanju”, stabbilita fl-Anness IV.3 tal-Att tal-Adeżjoni, li jifforma parti mit-Trattat tal-Adeżjoni tar-Repubblika Ċeka, l-Estonja, Ċipru, il-Latvja, il-Litwanja, l-Ungerija, Malta, il-Polonja, Slovenja u Slovakkja fl-Unjoni Ewropea.

(2)

Iż-żewġ skemi tal-għajnuna ġew irreġistrati bin-numri li ġejjin: PL 45/04: Kumpens lill-PP biex iwettaq servizzi universali postali u PL 49/04: Għajnuna lill-PP għal investiment relatat mal-provvista tas-servizzi universali postali.

(3)

Fis-26 ta’ Lulju 2004, is-26 ta’ Novembru 2004 u s-7 ta’ Frar 2005, il-Kummissjoni talbet informazzjoni addizzjonali. L-awtoritajiet Pollakki ssottomettew informazzjoni addizzjonali permezz ta’ ittri ta’:l-10 ta’ Settembru 2004, is-27 ta’ Ottubru 2004, it-3 ta’ Diċembru 2004 u d-29 ta’ Marzu 2005.

(4)

Żewġ laqgħat bejn l-awtoritajiet Pollakki u s-servizzi tal-Kummissjoni seħħew fil-25 ta’ Ottubru 2004 u fil-31 ta’ Jannar 2005. Fl-20 ta’ Ġunju 2005, il-Kummissjoni rċiviet informazzjoni addizzjonali mill-awtoritajiet Pollakki.

(5)

Permezz ta’ ittra tad-29 ta’ Ġunju 2005, il-Kummissjoni infurmat lill-Polonja li kienet iddeċidiet tibda l-proċedura stabbilita fl-Artikolu 88(2) tat-Trattat KE fir-rigward taż-żewġ skemi ta’ għajnuna. Iż-żewġ skemi ta’ għajnuna kienu rreġistrati bin-numri li ġejjin: C 21/05: Kumpens lill-PP għat-twettiq tas-servizzi postali universali u C 22/05: Għajnuna lill-PP għal investimenti relatati mal-provvista ta’ servizzi postali universali.

(6)

Id-deċiżjoni tal-Kummissjoni li tinbeda l-proċedura ġiet ippubblikata f’Il-Ġurnal Uffiċjali tal-Unjoni Ewropea  (3) Il-Kummissjoni stiednet lill-partijiet interessati biex iressqu l-kummenti tagħhom.

(7)

Il-Kummissjoni ma rċeviet ebda kummenti minn partijiet interessati oħra.

(8)

Il-Polonja ssottomettiet il-kummenti tagħha permezz ta’ ittra tad-9 ta’ Awwissu 2005. Laqgħa bejn l-awtoritajiet Pollakki u l-Kummissjoni seħħet fl-10 ta’ Jannar 2006. Il-Kummissjoni talbet informazzjoni addizzjonali permezz ta’ ittra tal-24 ta’ Jannar 2006.

(9)

Permezz ta’ ittra tal-10 ta’ Frar 2006, l-awtoritajiet Pollakki infurmaw lill-Kummissjoni li kellhom il-ħsieb jirtiraw in-notifika tal-iskema tal-għajnuna C 22/05: Għajnuna lill-PP għal investimenti marbuta mal-provvista ta’ servizzi postali universali. Wara t-talba tal-Kummissjoni tas-27 ta’ Frar 2006, l-awtoritajiet Pollakki indikaw permezz ta’ ittra tat-13 ta’ Marzu 2006 li ma kinux se jipproċedu bil-proġett ta’ għajnuna kopert min-notifika msemmija fuq u biddlu l-qafas legali tal-iskema sabiex ineħħu l-possibbiltà ta’ għoti ta’ għajnuna għall-investiment (4).

(10)

Permezz ta’ deċiżjoni tas-27 ta’ April 2006, il-Kummissjoni ddeċidiet ittemm il-proċeduri tal-Artikolu 88(2) tat-Trattat KE rigward l-għajnuna C 22/05: Għajnuna lill-PP għal investimenti marbuta mal-provvista ta’ servizzi postali universali, għax dawn kienu saru mingħajr għan (5) peress li l-għajnuna qatt ma kienet ġiet implimentata.

(11)

Permezz ta’ ittra tat-23 ta’ Frar 2006, l-awtoritajiet Pollakki bagħtu informazzjoni addizzjonali lill-Kummissjoni fir-rigward tal-każ dwar l-għajnuna mill-Istat C 21/05: Kumpens lill-PP għat-twettiq tas-servizz postali universali. Huma indikaw madankollu li fl-2004 u l-2005, ebda kumpens mill-Istat ma kien ingħata lill-PP għat-twettiq tal-obbligu tas-servizz postali universali. L-iskema in kwistjoni qatt ma kienet ġiet iffinanzjata u qatt ma ġiet applikata fl-2004 u l-2005.

(12)

Permezz ta’ deċiżjoni tad-9 ta’ Jannar 2007, il-Kummissjoni ddeċidiet ittemm parzjalment il-proċedimenti skont l-Artikolu 88(2) tat-Trattat KE fir-rigward tal-għajnuna C 21/05: Għajnuna lill-PP għat-twettiq ta’ servizz postali universali għall-perjodu 2004-2005, peress li dawn kienu saru mingħajr għan peress li l-għajnuna ma kinetx ġiet implimentata fl-2004 u l-2005. Il-proċedimenti skont l-Artikolu 88(2) tat-Trattat KE baqgħu miftuħa għall-perjodu mill-1 ta’ Jannar 2006 ’il quddiem (6). Permezz ta’ ittra tat-3 ta’ Jannar 2007 il-Kummissjoni talbet informazzjoni dwar l-iskema ta’ għajnuna in kwistjoni għall-perjodu 2006 ’il quddiem. L-awtoritajiet Pollakki wieġbu permezz ta’ ittra tal-1 ta’ Frar 2007.

(13)

PP kien ikklassifikat bħala Kumpanija ta’ Servizzi Pubbliċi u eżerċita l-attivitajiet tiegħu fuq il-bażi tal-“Att tat-30 ta’ Lulju 1997 dwar l-Intrapriża tal-Istat ta’ servizzi pubbliċi PP”. Fid-deċiżjoni tagħha tal-24 ta’ April 2007 rigward il-każ dwar l-għajnuna mill-Istat E 12/05: Garanzija Statali Mingħajr Limitu lill-Poczta Polska, il-Kummissjoni kkunsidrat li l-impossibbiltà li PP ifalli minħabba l-istat legali tiegħu pprovdiet lill-impriża garanzija Statali mingħajr limitu (7).

(14)

Skont il-pjan addottat mill-Kunsill tal-Ministri fil-11 ta’ April 2006, it-trasformazzjoni tal-pussess tal-Poczta Polska kellha sseħħ f’żewġ stadji, jiġifieri l-kummerċjalizzazzjoni u l-privatizzazzjoni. Fil-25 ta’ Ġunju 2008, il-Polonja infurmat lill-Kummissjoni rigward id-dħul fis-seħħ fil-25 ta’ April 2008 ta’ liġi ġdida tal-11 ta’ April 2008 li temenda dik li tipprovdi lill-PP l-impossibbiltà li jkun suġġett għal proċedimenti ordinarji ta’ falliment. Fuq il-bażi tal-liġi l-ġdida, ma kienx ċar għall-Kummissjoni liema sistema legali tapplika għall-PP peress li ma deherx li kien hemm tibdil fl-istat legali tiegħu.

(15)

L-ewwel stadju ta’ trasformazzjoni ġie implimentat skont l-Att tal-5 ta’ Settembru 2008 dwar il-kummerċjalizzazzjoni tas-servizz pubbliku PP (8), u għalhekk il-PP ġie mibdul minn intrapriża Statali għal kumpanija ta’ azzjonijiet konġunti (Spółka akcyjna) li t-Teżor għandu fiha 100 % tal-ishma. Bħala konsegwenza ta’ dan, PP tilef l-istat legali li kien jipprevijeni li dan ifalli. Il-garanzija Statali mingħajr limitu favur PP kienet għalhekk imneħħija u l-kumpanija hija issa suġġetta għal proċedimenti ordinarji ta’ falliment.

(16)

Diversi laqgħat bejn l-awtoritajiet Pollakki u l-Kummissjoni seħħew fis-27 ta’ Ġunju 2007, l-20 ta’ Lulju 2007, is-26 ta’ Settembru 2007 u l-25 ta’ Lulju 2008.

(17)

Wara dawn il-laqgħat l-awtoritajiet Pollakki ttrażmettew informazzjoni komplementarja li ġiet reġistrata mill-Kummissjoni fis-7 ta’ Diċembru 2007 (A/40109/a), fit-8 ta’ Frar 2008 (A/2536), fil-15 ta’ April 2008 (A/7047), fit-28 ta’ April 2008 (A/8137), fit-18 ta’ Ġunju 2008 (A/13261), fis-7 ta’ Novembru 2008 (A/23609), fis-6 ta’ Jannar 2009 (A/191), fit-2 ta’ Frar 2009 (A/2483), fid-29 ta’ April 2009 (A/10409), fil-15 ta’ Ġunju 2009 (A/14530), fl-4 ta’ Settembru 2009 (A/19121), fl-14 ta’ Settembru 2009 (A/19796), fil-25 ta’ Settembru 2009 (A/20558), fl-1 ta’ Ottubru 2009 (A/20997) u fit-2 ta’ Novembru 2009 (A/23309).

(18)

PP huwa l-operatur postali nazzjonali kurrenti, li ġie stabbilit fl-1 ta’ Jannar 1992, permezz ta’ Ordinanza mill-Ministru tal-Komunikazzjoni tal-4 ta’ Diċembru 1991 u jirriżulta mit-trasformazzjoni tal-Uffiċċju tal-Posta u t-Telekomunikazzjonijiet f’unitajiet postali u tat-telekomunikazzjoni.

(19)

Permezz tal-“Att tat-12 ta’ Ġunju 2003 – Liġi Postali” (minn hawn ’il quddiem “Il-Liġi Postali”) (9), PP huwa inkarigat (10) bl-obbligu li jipprovdi s-servizz postali universali fit-territorju kollu tar-Repubblika tal-Polonja.

(20)

Permezz tal-implimentazzjoni tal-Istrateġija għall-Iżvilupp tal-PP għall-2004-2006, PP ġie mibdul f’kumpanija holding. Bħala konsegwenza ta’ dawn il-bidliet, il-grupp PP li jappartjeni lill-Istat huwa magħmul minn dawn is-sussidjarji:

(21)

Fl-2007, il-kumpanija pprovdiet is-servizzi tagħha permezz ta’ 8 692 uffiċċji tal-posta, li minnhom 53 % kienu jinsabu f’żoni rurali u 47 % f’żoni urbani. PP huwa l-akbar impjegatur fil-Polonja; fl-2006, impjega iktar minn 95 000 impjegati.

(22)

PP huwa attiv l-aktar fis-settur postali. Il-kumpanija tipprovdi, minbarra s-servizz postali universali (riżervat u mhux riżervat), servizzi b’xejn li mhumiex ta’ natura universali bħal servizzi ta’ kunsinna espressa, filatelija, u distribuzzjoni tal-gazzetti jew servizzi ta’ bejgħ dirett.

(23)

Bħala riżultat tax-xejra li tonqos kontinwament fl-ammonti ta’ servizzi postali pubbliċi, b’mod partikolari fl-uffiċċji rurali, sabiex jagħmel użu massimu mill-infrastruttura u r-riżorsi umani filwaqt li jirrispetta r-rekwiżit tiegħu ta’ aċċessibbiltà obbligatorja, l-Uffiċċju Postali Pollakk ilu diversi snin jiżviluppa attivitajiet finanzjarji u attivitajiet kummerċjali oħra kif ukoll jikkoopera ma’ xi kumpaniji finanzjarji jew tal-assigurazzjoni. Xi servizzi kummerċjali li jagħmlu telf qegħdin ikunu preżentement eliminati fil-kwadru tal-“programm korrettiv” imniedi fit-tmiem tal-2008. Barra minn hekk, il-Posta Pollakka qed timmira li żżid fil-ġejjieni qarib in-numru u l-ammont ta’ servizzi provduti għall-Bank Pocztowy, PAUF u PTUW li, flimkien mal-proċedura kurrenti ta’ negozjar mill-ġdid tal-prezzijiet tat-trasferiment għandhom, skont l-aspettazzjonijiet tal-Polonja, iwasslu fi ftit snin biex jiżguraw lill-grupp tal-PP riżultat sodisfaċenti mill-attivitajiet imwettqa f’isem dawn is-sussidjarji.

(24)

L-attivitajiet finanzjarji tal-PP jinkludu l-bejgħ ta’ prodotti li jappartjenu lill-Bank Pocztowy (sussidjarju tal-bank PKO BP u PP) jiġifieri self, kontijiet u depożiti, servizzi ta’ kiri (permezz tas-sussidjarju tal-PP -Post Media Serwis), servizzi finanzjarji differenti inkluż trasferimenti ta’ flus fil-kontijiet tal-bank, kunsinna ta’ flus fid-dar tad-destinatarju forma ta’ Istruzzjoni Postali ta’ Ħlas bil-Flus, ġbir tal-ħlas tal-liċenzji tar-Radju u tat-TV u l-ipproċessar ta’ ċekks bankarji maħruġa minn banek differenti u krediti tal-flus. PP huwa attiv ukoll fis-suq tal-assigurazzjoni bid-distribuzzjoni tal-prodotti tal-assigurazzjoni u finanzjarji minn intrapriżi li għandhom irbit tal-kapital ma’ Poczta Polska, jiġifieri PAUF, OFE Pocztylion u TUW Pocztowe (12). PP imexxi wkoll fond ta’ pensjoni bl-isem Pocztylion-Arka PTE S.A.

(25)

Fl-aħħar nett, PP jipprovdi wkoll servizzi tal-IT permezz tas-sussidjarju tiegħu-Postdata u servizzi kummerċjali elettroniċi.

(26)

Minn perspettiva organizzattiva, PP jikkonsisti (13) f’

(27)

Matul is-sena finanzjarja 2006 PP kiseb fatturat ta’ PLN 6 289 miljun (14), qligħ operattiv ta’ PLN 146 miljun u qligħ nett ta’ PLN 124 miljun. Sal-31 ta’ Diċembru 2006 il-kapital proprju ammonta għal PLN 1 573 miljun, l-obbligazzjonijiet totali inkluż dispożizzjonijiet għall-obbligazzjonijiet PLN 2 597 miljun li PLN 1 525 miljun kienu l-obbligazzjonijiet kurrenti.

(28)

Poczta Polska jipprovdi servizzi fi 3 tipi ta’ attivitajiet:

(29)

Fl-2006 99 % mill-fatturat tal-PP ġie ġġenerat mill-attivitajiet bażiċi, li jikkonsistu f’ (i) servizzi postali universali (riżervati u mhux riżervati), (ii) servizzi kuntrattati (l-akart servizzi postali oħra li jaqgħu ’l barra mill-ambitu tas-servizz postali universali, servizzi finanzjarji bħal pagamenti bil-flus fil-kontijiet tal-bank u l-ġestjoni tas-self u d-depożiti tal-Bank Pocztowy, il-ġestjoni tal-liċenzji tar-radju u tat-televixin u medjazzjoni fl-assigurazzjoni) u (iii) servizzi kummerċjali (l-aktar bejgħ ta’ prodotti kummerċjali, filatelija, ordni bil-posta ta’ kotba, kummerċ b’munita barranija).

(30)

Permezz tal-Artikolu 46(2) tal-Liġi Postali tat-12 ta’ Lulju 2003 (17), PP huwa inkarigat bl-obbligu li jipprovdi servizz postali universali fit-territorju tar-Repubblika tal-Polonja.

(31)

L-Artikolu 3(25) tal-Liġi postali jiddefinixxi bħala servizzi postali universali s-servizzi postali ta’:

ipprovduti fit-traffiku domestiku u internazzjonali fit-territorju tar-Repubblika tal-Polonja, b’mod konsistenti b’kundizzjonijiet kumpatibbli u għal prezzijiet li jintlaħqu, filwaqt li tinżamm il-kwalità mitluba mil-liġi u l-iżgurar tat-tbattil tal-kaxxa postali u l-kunsinna tal-oġġetti postali mill-inqas f’kull ġurnata tax-xogħul u mhux inqas spiss minn 5 darbiet fil-ġimgħa.

(32)

Il-kundizzjonijiet għad-dispożizzjonijiet tas-servizz postali universali huma definiti mill-Ordinanza tal-Ministru tal-Infrastruttura tad-9 ta’ Jannar 2004 dwar il-kundizzjonijiet għall-provvista tas-servizzi postali universali (18).

(33)

Il-ħinijiet tal-kunsinna huma definiti kif ġej:

—   ittri prijoritarji: D + 1 82 %, D + 2 90 %, D + 3 94 %,

—   ittri mhux prijoritarji: D + 3 85 %, D + 5 97 %,

—   pakketti prijoritarji: D + 1 80 %,

—   pakketti mhux prijoritarji: D + 3 90 %.

(34)

Uffiċċju postali għandu jitħaddem:

(35)

Barra minn hekk kull kontea (gmina) ta’ iktar minn 2 500 abitant għandu jkollha mill-inqas uffiċċju postali wieħed. Kontea b’inqas minn 2 500 abitant tista’ tinqeda bl-uffiċċju postali tal-kontea ta’ ħdejha jew uffiċċju postali mobbli sakemm dan jiżgura kwalità aqwa tas-servizz jew ikollu l-kunsens preċedenti tal-awtoritajiet lokali. Kull uffiċċju postali għandu jkun miftuħ mill-inqas 5 darbiet fil-ġimgħa.

(36)

L-Artikolu 47 tal-Liġi Postali jiddefinixxi s-servizzi li huma riżervati għall-PP. Dawn is-servizzi huma:

(37)

Skont l-Artikolu 47 tal-Liġi Postali, il-miżati għall-provvista ta’ servizzi postali universali għandhom jiġu stabbiliti fir-rigward tal-ispejjeż tal-provvista tagħhom, għandhom ikunu uniformi fit-territorju kollu tal-pajjiż, trasparenti u mhux diskriminatorji.

(38)

Barra minn hekk is-sussidjar tas-servizzi postali universali li mhumiex riżervati bid-dħul mis-servizzi riżervati huwa espliċitament projbit fl-istess liġi.

(39)

Skont l-Art 12 tal-“Att tat-30 ta’ Lulju 1997 dwar l-Intrapriża Statali tas-servizz pubbliku PP” il-Posta Pollakka għandha tmexxi l-kummerċ tagħha fuq il-bażi tal-pjanijiet tagħha stess, billi ssegwi r-regola tal-effiċjenza fl-ispejjeż u l-effettività ekonomika.

(40)

Fuq il-bażi tad-Direttiva 2008/6/KE tal-Parlament Ewropew u tal-Kunsill tal-20 ta’ Frar 2008 li temenda d-Direttiva 97/67/KE dwar it-twettiq sħiħ tas-suq intern tas-servizzi postali Komunitarji, il-Polonja għandha l-ħsieb li tneħħi l-monopolji legali fuq is-servizzi postali sa mhux aktar tard mill-31 ta’ Diċembru 2012.

(41)

Fuq il-bażi tal-Artikolu 17 tal-“Liġi tat-30 Lulju 1997 dwar l-Intrapriża Statali tas-servizz pubbliku PP” (19), fuq il-bażi tal-“Liġi Postali”, tal-“Ordinanza tal-Ministru tal-Infrastruttura tad-9 ta’ Jannar 2004 dwar il-kundizzjonijiet għall-provvista ta’ servizzi postali universali” u tal-“Ordinanza tal-Ministru tal-Finanzi tal-24 ta’ Diċembru 2003”, l-awtoritajiet Pollakki għandhom il-ħsieb li jagħtu sussidji lil PP biex jikkumpensaw għal telf potenzjali mġarrab b’rabta mal-provvista tas-servizz postali universali.

(42)

Dawn is-sussidji se jingħataw ex post fuq il-bażi tat-telf possibbli reġistrat ta’ ċerta sena finanzjarja, jekk applikabbli. L-ammont tas-sussidji għandu jkun limitat għall-ammont tat-telf imġarrab.

(43)

L-ambitu tal-evalwazzjoni dettaljata tal-Kummissjoni tal-iskema ffoka fuq jekk il-miżura hix konformi mal-kundizzjonijiet ta’ kumpatibbiltà stabbiliti fil-qafas Komunitarju għall-għajnuna mill-Istat forma ta’ kumpens għas-servizzi pubbliċi. Din il-verifika kkonċentrat l-aktar fuq il-kisba ta’ assigurazzjoni raġonevoli li l-Istat mhux se jagħti wisq kumpens għall-ispejjeż netti addizzjonali (20) li Poczta Polska għandha ġġarrab fit-twettiq tal-obbligu tas-servizz pubbliku universali.

(44)

Ma tressqu ebda kummenti minn partiijet oħra interessati.

(45)

Il-Polonja ressqet il-kummenti tagħha matul l-investigazzjoni (ara l-premessa 17 fuq).

(46)

Il-Polonja ressqet informazzjoni dwar l-istruttura organizzattiva tal-PP, l-attivitajiet u s-swieq rilevanti li fihom hija attiva l-impriża (ara t-Taqsima II.1), leġiżlazzjoni applikabbli, regoli ta’ kontabbiltà u metodoloġija pertinenti, dejta relevanti differenti u rapporti mill-awtorità Nazzjonali Regolatorja dwar il-konformità tas-sistema tal-kontabbiltà tal-ispejjeż mal-Art 52 tal-Liġi Postali u l-Ordinanza tal-Ministru tal-Finanzi tal-24 ta’ Diċembru 2003 (minn hawn ’il quddiem l- “Ordinanza”).

(47)

B’mod iktar partikolari l-Polonja għamlet disponibbli għall-Kummissjoni leġiżlazzjoni rilevanti bhal-Liġi tat-30 ta’ Lulju 1997 dwar l-Intrapriża Statali tas-servizz pubbliku PP, il-Liġi Postali tat-12 ta’ Lulju 2003 u l-emenda sussegwenti tagħha, l-Ordinanza tal-Ministru tal-Finanzi tal-24 ta’ Diċembru 2003 u l-Att tal-5 ta’ Settembru 2008 dwar il-kummerċjalizzazzjoni tas-servizz pubbliku PP.

(48)

Il-Polonja ressqet informazzjoni dettaljata dwar il-metodoloġija tas-separazzjoni tal-kontabbiltà u l-allokazzjoni tal-ispejjeż adottati mill-operatur postali sabiex tikkwantifika l-ispejjeż (21) tas-servizz postali universali.

(49)

Il-Polonja bagħtet dejta dwar kategoriji differenti ta’ spejjeż u dħul, riżultati skont il-qasam tal-attività (22), riżultati dettaljati għal servizzi individwali, dikjarazzjonijiet finanzjarji u tip ieħor ta’ dejta finanzjarja.

(50)

Ir-rapporti kollha tas-snin li għaddew (23) maħruġa kull sena mill-Awtorità Regolatorja Nazzjonali saru disponibbli għall-Kummissjoni.

(51)

L-awtoritajiet Pollakki indikaw li s-sistema interna tal-kontabbiltà tal-PP taħdem fuq il-bażi ta’ prinċipji ta’ kontabbiltà tal-ispejjeż applikati b’mod konsistenti u oġġettivament ġustifikabbli, b’mod konformi mad-dispożizzjonijiet tal-Liġi Postali li tittrasponi fil-leġiżlazzjoni Pollakka l-Artikolu 14(2) tad-Direttiva 97/67/KE li jimponi kontijiet separati fis-sistema interna ta’ kontabbiltà tal-fornituri tas-servizz universali.

(52)

Fuq il-bażi tal-Artikolu 52(1) (24) u l-Artikolu 52(2) (25) tal-Liġi Postali Pollakka, PP għandu jżomm il-kontijiet b’tali mod, li i) jippermetti li l-ispejjeż jiġu kkalkulati separatament, għal kull servizz riżervat, u kollettivament għal servizzi mhux riżervati (servizz universali kif ukoll servizzi mhux universali) kif ukoll ii) jippermetti l-kalkolu tal-ispejjeż tal-unità. Skont il-Liġi Postali, fl-24 ta’ Diċembru 2003, il-Ministru tal-Finanzi ħareġ Ordinanza dwar il-metodu tal-allokazzjoni tal-ispejjeż tal-operatur li jipprovdi s-servizz postali universali (26). Din l-ordinanza (27), li daħlet fis-seħħ fl-1 ta’ Jannar 2004, timplimenta l-Artikolu 14(3) tad-Direttiva 97/67/KE.

(53)

PP jaqsam is-sistema ta’ kontabbiltà integrata tiegħu fi tliet kategoriji ewlenin:

(54)

Fis-sistema tal-kontabbiltà finanzjarja (a), l-ispejjeż jiġu rreġistrati skont it-tip (28).

(55)

Fis-sistema tal-kontabbiltà analitika (b), ir-reġistri tal-kontabbiltà tal-ispejjeż u d-dħul ikopru:

(56)

Fis-sistema tal-allokazzjoni tal-ispejjeż għas-servizzi (c), l-ispejjeż huma maqsuma fi:

—   spejjeż diretti: dawn l-ispejjeż jistgħu jiġu direttament attribwiti għal servizz speċifiku fuq il-bażi ta’ kejl dirett jew dokument tas-sors. Fl-2006, dawn irrappreżentaw […] (*) tal-ispejjeż totali tal-PP. Pereżempju, dawn l-ispejjeż jinkludu l-ispejjeż tal-formoli meħtieġa għal servizzi partikolari, ħlas finali lil amministrazzjonijiet postali barranin jew l-ispejjeż għat-tħaddim tal-unitajiet għall-ġestjoni tal-abbonamenti għall-RTV,

—   spejjeż indiretti: dawn l-ispejjeż, li ma jistgħux jiġu direttament attribwiti għal servizzzi huma miktuba fil-kontijiet tal-ispejjeż indiretti, u wara allokati fost servizzi li jużaw metodi ta’ allokazzjoni speċifiċi. Fl-2006, dawn irrappreżentaw […] tal-ispejjeż totali tal-PP. Il-kategoriji ewlenin tal-ispejjeż indiretti (29) huma:

(a)   Spejjeż operattivi (30) : fl-2006, dawn irrappreżentaw […] tal-ispejjeż totali tal-PP. Dawn l-ispejjeż jirrigwardaw il-proċess teknoloġiku tal-għoti ta’ servizzi bħal tneħħija, tqassim u kunsinna ta’ oġġetti postali. Dan il-proċess jinvolvi l-akbar numru tal- ħaddiema tal-PP, li jispjega l-ammont għoli ta’ dawn l-ispejjeż. Barra minn hekk, dawn l-ispejjeż jinkludu wkoll deprezzament u l-manutenzjoni tat-tagħmir użat fil-proċess tekonoloġiku, bħal magni tat-tqassim, ċineg tat-trasport, imwieżen, eċċ. L-ispejjeż operattivi huma allokati għal servizzi li jużaw metodi bbażati fuq il-ħin meħtieġ għall-provvista tas-servizzi. L-attivitajiet individwali mwettqa fl-uffiċċji postali, l-uffiċċji ewlenin u ż-żoni ta’ kunsinna huma standardizzati (31). Fl-2006, PP għadd madwar 600 attività standardizzata li jiġu aġġornati regolarment. Fl-2006, l-evalwazzjoni kopriet 5 577 uffiċċju postali, 242 uffiċċju ewlieni u 23 800 żona ta’ kunsinna;

(b)   Spejjeż ta’ trasport (32) : fl-2006, dawn irrappreżentaw […] tal-ispejjeż totali tal-PP. Dawn l-ispejjeż jinkludu l-ispejjeż tal-ġarr ta’ merkanziji tal-posta miċ-Ċentru tal-Loġistika u l-ispejjeż tal-merkanziji postali li jġorru t-trasportaturi barranin. L-ispejjeż tat-trasport huma allokati għal servizzi li jużaw metodi bbażati l-aktar fuq il-piż (33) tal-oġġett postali trasportat;

(c)   Spejjeż tal-manutenzjoni tan-netwerk (34) : fl-2006, dawn irrappreżentaw […] tal-ispejjeż totali tal-PP. Dawn l-ispejjeż jikkonċernaw il-manutenzjoni tal-uffiċċju postali, eż. kiri, enerġija, tagħmir, żamma u manutenzjoni tal-bini, tassazzjoni u ħlas. Skont il-Polonja dawn l-ispejjeż huma allokati fost it-tipi kollha tas-servizzi u mhux biss għas-servizzi postali pubbliċi li għalihom ġiet mibnija u hija miżmuma għalihom dik in-netwerk. Dawn huma attribwiti għal servizzi rigward is-somma ta’ (i) spejjeż diretti u (ii) spejjeż operattivi indiretti flimkien ma’ (iii) spejjeż indiretti tat-trasport diġà attribwiti għas-servizzi.

(d)   Spejjeż indiretti oħra (35) : fl-2006, dawn irrappreżentaw […] tal-ispejjeż totali tal-PP. Dawn l-ispejjeż jinkludu b’mod partikolari l-ispejjeż taċ-Ċentru tal-Loġistika marbuta mal-kunsinna ta’ pakketti u oġġetti li jitħallsu mal-kunsinna, il-kunsinna u l-ġbir ta’ posta espressa, telegrammi, l-ispejjeż ta’ servizzi ta’ terzi persuni fit-tbattil tal-kaxex postali tagħhom, il-kunsinna tal-posta, posta mingħajr indirizz u servizzi ta’ spedizzjoni u tqassim, l-ispejjeż tat-trasportazzjoni domestika bl-ajru u servizzi ta’ terzi persuni. L-ispejjeż tal-kunsinna ta’ dawn l-oġġetti huma allokati għal servizzi li jużaw metodi li huma bbażati l-aktar fuq reġistrazzjonijiet tan-numru ta’ oġġetti kkonsenjati

—   Spejjeż oħra (jew “Spejjeż ġenerali” (36)): Dawn l-ispejjeż komuni jiġu allokati għal servizzi fuq il-bażi ta’ allokatur ġenerali jiġifieri jiġu allokati proporzjonalment, allura skont il-perċentwali taż-żieda fl-ispejjeż allokati preċedentement. Il-kategoriji ewlenin ta’ dawn l-ispejjeż huma:

(a)   Spejjeż ġenerali, amministrattivi u ta’ żvilupp (37) : fl-2006, dawn irrappreżentaw […] tal-ispejjeż tas-servizzi kollha. Dawn l-ispejjeż jirrigwardaw b’mod partikolari n-nefqa għall-finijiet tal-amministrazzjoni, il-kontabbiltà u l-finanzi ġenerali, kif ukoll spejjeż ta’ żvilupp. Dawn jinkludu: deprezzament tal-bini, strutturi u fondi, kif ukoll magni u tagħmir kemm għall-użu ġenerali kif ukoll dawk li jikkostitwixxu tagħmir għal postijiet tax-xogħol tas-servizzi amministrattivi, l-ispejjeż tat-tħaddim u l-manutenzjoni tal-fondi amministrattivi u t-tagħmir tagħhom, ħlas u kontribuzzjonijiet lill-persunal, kartolerija u tagħmir tal-uffiċċji użat mill-persunal amministrattiv, l-ispejjeż tal-proġetti ta’ żvilupp u implimentazzjoni u impriżi oħra implimentati fuq livell ċentrali. Dawn huma assenjati lil prodott permezz tal-metodoloġija “cost to cost” (38).

(b)   Spejjeż tal-bejgħ u spejjeż kummerċjali: fl-2006, dawn irrappreżentaw […] tal-ispejjeż tas-servizzi kollha.

—   Spejjeż tal-bejgħ (39) : dawn huma l-ispejjeż li jappartjenu fil-bejgħ tas-servizzi, li jinkludu wkoll l-ispejjeż tal-ġestjoni tal-bejgħ, spejjeż kummerċjali u spejjeż ta’ reklamar. L-ispejjeż tal-bejgħ huma assenjati għal servizzi li jużaw il-metodoloġija “cost to cost”.

—   Spejjeż kummerċjali (40) : dawn huma l-ispejjeż imġarrba fit-twettiq ta’ attivitajiet kummerċjali, inkluż il-bejgħ u d-distribuzzjoni tal-prodotti kummerċjali fl-uffiċċji postali, f’pompi tal-petrol, f’buffets u oġġetti filateliċi. Dawn ġeneralment huma l-ispejjeż tal-ħażna ta’ oġġetti kummerċjali, u l-ispejjeż tal-persunal u l-ispejjeż materjali ta’ din l-attività. Dawn l-ispejjeż jiġu assenjati lill-ispiża tax-xiri tal-oġġetti u l-materjali mibjugħa.

(c)   Spejjeż finanzjarji: dawk l-ispejjeż finanzjarji marbuta mal-imgħax, id-differenzi fir-rati tal-kambju u l-kiri tal-mezzi tat-trasport u assi fissi oħra huma inklużi f’dan il-kalkolu tal-ispejjeż tas-servizzi. Fl-2006 dawn irrappreżentaw […] tal-ispiża totali tas-servizzi tal-PP.

(57)

Il-kontabbiltà analitika tal-PP titwettaq fi ħdan il-kontabbiltà ġenerali.

(58)

Parti konsiderevoli tal-ispejjeż fil-Posta Pollakka tikkostitwixxi spejjeż indiretti li għalihom hemm possibbiltà ta’ identifikazzjoni tat-trasportaturi tal-ispejjeż u l-kejl tagħhom. “Spejjeż oħra”, li ma jistgħux jiġu klassifikati bħala diretti jew indiretti, huma allokati għas-servizzi fl-istadju tal-kalkolu tal-ispiża ta’ unità b’mod proporzjonali mal-ispejjeż allokati preċedentement għal servizzi individwali (41).

(59)

Il-metodoloġija tal-kalkolu tal-ispiża tal-unità ġiet suġġetta għal bidliet eż. l-ordni tal-allokazzjoni ta’ “spejjeż oħra” imħallsa permezz taż-żieda fil-ħlas proporzjonalment mal-ispejjeż diretti u indiretti allokati preċedentement inbidlet (42). Il-kalkolu tal-ispiża tal-unità fil-Posta Pollakka jitwettaq miċ-Ċentru ta’ Kontabbiltà tal-kumpanija.

Il-mudell tal-kontabbiltà tal-PP

(60)

Id-dħul mill-bejħ joriġina mill-attivitajiet postali, finanzjarji u attivitajiet oħra (43) mwettqa mill-PP. Dħul finanzjarju jinkludi ġeneralment dividendi jew imgħax irċevuti (eż. fuq depożiti, debituri tan-negozju). Dħul ieħor operattiv jikkonsisti l-aktar fi dħul miksub mit-tneħħija ta’ assi fissi mhux finanzjarji, kumpens għad-danni, rinunzji ta’ dejn li għadhom ma tħallsux, kanċellament ta’ provvisti mhux użati u dħul minn attivitajiet ta’ benesseri soċjali.

(61)

Dħul minn bejgħ jista’ tipikament jiġi allokat direttament għal servizzi. Dħul finanzjarju u dħul operattiv ieħor li jistgħu jiġu assenjati direttament lil grupp ta’ servizzi partikolari ġew allokati kif ġej:

—   dħul finanzjarju minn differenzi fir-rata tal-kambju: li […] minnhom huma differenzi pożittivi fir-rata tal-kambju kkawżati bħala riżultat ta’ ħlasijiet bejn l-amministrazzjonijiet għal oġġetti postali fil-fatturat barrani ġew assenjati lill-grupp ta’ servizzi postali (universali u mhux universali) u l-[…] oħra tad-dħul direttament marbut mal-bejgħ tal-muniti ġew assenjati lit-tielet grupp “oħrajn” (44),

—   dħul ieħor operattiv minn sussidji fuq servizzi suġġetti għal eżenzjoni statutorja minn ħlasijiet: ġew assenjati kompletament lil servizzi universali li rreferew għalihom l-eżenzjonijiet.

(62)

Dħul finanzjarju u dħul ieħor operattiv li ma setax jiġi assenjat direttament lis-servizzi ġie assenjat lill-gruppi tas-servizz fi proporzjonijiet użati għall-allokazzjoni ta’ spejjeż finanzjarji u spejjeż oħra operattivi għal dawn il-gruppi tas-servizz.

(63)

Il-151 servizz tal-PP huma miġbura fi 3 makro-kategoriji: servizzi postali, servizzi finanzjarji u oħrajn. Kull wieħed mis-servizzi għandu kont separat. It-tqassim tal-ispejjeż u d-dħul tal-2006 fit-3 kategoriji tas-servizz ewlenin tal-PP jidher fl-Anness 1.

(64)

Il-Liġi Postali tipprovdi (45) min-naħa waħda, li l-Awtorità Regolatorja Nazzjonali tiżgura b’mod korrett li l-PP iżomm reġistri ta’ kontabbiltà skont id-dispożizzjonijiet tal-Liġi Postali u tal-Ordinanza tat-23 ta’ Diċembru 2003, u, min-naħa l-oħra, li l-kumpanija tal-verifika responsabbli għaċ-ċertifikazzjoni tal-kontijiet tal-fornitur tas-servizz universali għandha tivverifika wkoll li l-kontijiet jikkonformaw mar-regoli msemmija qabel għal kontabbiltà separata.

(65)

Skont il-Polonja, l-Awtorità Regolatorja Nazzjonali (UKE) evalwat effettivament, fost kwistjonijiet oħra, sa liema punt il-PP issodisfa r-rekwiżiti li jirriżultaw mill-Artikolu 52 tal-Liġi Postali u r-Regolament tal-Ministru tal-Finanzi tal-24 ta’ Diċembru 2003. F’din l-eżaminazzjoni dejjem ġie konkluż li i) kalkolu tal-ispiża ta’ unità jitwettaq għal kull servizz mill-qasam riżervat u ii) il-proċeduri tal-kalkolu tal-ispiża koprew separatament servizzi postali mhux riżervati u servizzi li ma jappartjenux lil servizzi postali universali jiġifieri l-PP żamm il-kotba tal-kontabbiltà tiegħu u d-dikjarazzjoni tal-ispiża konformi mar-rekwiżiti speċifikati fl-Artikolu 52 Taqsima 1 tal-Liġi Postali. Barra minn hekk, l-awdituri kellhom assigurazzjoni raġonevoli fis-sena li PP alloka spejjeż għas-servizzi b’mod dirett u indirett u l-allokazzjonijiet twettqu skont il-metodu definit fir-Regolament tal-Ministru tal-Finanzi tal-24 ta’ Diċembru 2003 rigward il-metodu tal-qsim tal-ispejjeż imġarrba mill-operatur li jipprovdi servizzi postali universali.

(66)

Bħala riżultat tal-verifika annwali mwettqa mill-Awtorità Nazzjonali Regolatorja ġabra ta’ rakkomandazzjonijiet hija proposta fir-rapport. Skont il-Polonja proċeduri u linji gwida ġew introdotti fl-aħħar snin biex itejbu l-kwalità jew l-implimentazzjoni tal-metodi tal-allokazzjoni użati, eż. proċedura tal-kontroll tal-ispiża diretta ġiet introdotta fil-PP li fiha dawn l-inkarigi huma previsti li jseħħu (a) evalwazzjoni mill-ġdid ta’ jekk ċertu tip ta’ spiża diretta tistax isseħħ f’servizz partikolari (b) verifika tal-allokazzjoni korretta tal-ispejjeż diretti bejn is-servizzi, eż. is-servizzi riżervati u mhux riżervati, servizzi kummerċjali u prijoritarji (c) monitoraġġ tal-approċċ uniformi għar-reġistrazzjoni tal-ispejjeż diretti tas-servizzi f’kull wieħed mill-Fergħat Reġjonali taċ-Ċentru tal-Kontabbiltà u d) reviżjoni perjodika tal-ispejjeż ġenerali sabiex jiġu identifikati kwalunkwe spejjeż li mhumiex marbuta mal-provvista tas-servizzi postali.

(67)

Skont l-Art 52a.1 (46) tal-Liġi Postali PP għandu d-dritt li jirċievi kumpens għat-telf imġarrab fuq is-servizzi universali iżda dan l-ammont ma jistax jaqbeż id-differenza bejn l-ispejjeż tal-provvisti tas-servizzi postali universali u d-dħul miksub minn dawn is-servizzi (ara l-Art 52a.2 (47)).

(68)

Skont l-Art. 52a.4. “Is-sussidju għas-sena, li fiha t-telf imġarrab huwa mogħti sal-31 ta’ Diċembru ta’ kull sena wara s-sena, li s-sussidju jirreferi għaliha, fuq il-bażi sottomessa mill-President tal-UKE, sat-30 ta’ Novembru tas-sena ta’ wara s-sena, li s-sussidju jirreferi għaliha, lill-Ministru kompetenti għall-posta u t-telekomunikazzjonijiet: 1) kopja tar-rapport finanzjarju tal-operatur pubbliku eżaminat mill-awditur, li huwa msemmi fl-Artikolu 52 paragrafu 6; 2) informazzjoni li l-kundizzjonijiet, kif imsemmi fl-Att tal-Liġi, skont liema s-servizzi universali huma assenjati, huma milħuqa; 3) informazzjoni li tikkonċerna rekwiżiti verifikati biex jinżammu kotba ta’ kontabbiltà u kontabbiltà tal-ispejjeż, kif imsemmi fl-Artikolu 52 paragrafu 1 u 2.; 5. Id-dispożizzjonijiet tal-Artikolu 33a għandhom ikunu rispettivament applikabbli għas-sussidju, kif imsemmi fil-paragrafu 1.”.

(69)

L-awtoritajiet Pollakki indikaw li ebda telf ma kien imġarrab għall-provvista tas-servizz postali universali fil-perjodu 1998-2008. Għaldaqstant, ma kien hemm ebda kumpens mill-Istat f’dak il-perjodu.

(70)

Tqassim iktar dettaljat tar-riżultati tal-2006 fis-servizzi postali jidher fl-Anness 2.

(71)

Skont il-figuri previsti għall-2009-2011 żieda netta hija mistennija li tiġi reġistrata fil-qasam UPS. Allura matul dan il-perjodu kollu tal-iskema, jiġfieri 2006-2011, PP huwa preżunt li ma jirċievi ebda kumpens għat-twettiq tal-obbligi tas-servizz postali universali (ara informazzjoni iktar dettaljata dwar spejjeż u dħul miksuba u mistennija li jinkisbu fil-qasam tas-servizz postali universali fl-Anness 3).

Tabella 1

(72)

Il-Polonja kkwantifikat l-ispejjeż u d-dħul tas-servizz postali universali fuq il-bażi tas-separazzjoni tal-kontabbiltà u l-metodoloġija tal-allokazzjoni indikata hawn fuq.

(73)

Il-Polonja indikat li b’kunsiderazzjoni ta’ (i) l-informazzjoni pprovduta mill-Polonja dwar il-metodoloġija tal-kontabbiltà tal-ispejjeż u proċeduri marbuta, (ii) id-dejta provduta (iii) id-dispożizzjoni legali eżistenti għall-kumpens u (iv) in-nuqqas ta’ inklużjoni ta’ qligħ raġonevoli fil-bażi għall-kalkolu tal-ammont ta’ kumpens, l-iskema ma tikkompensax iż-żejjed lill-PP għat-twettiq tal-obbligu tas-servizz pubbliku.

(74)

Skont l-Artikolu 107(1) TFUE, “Ħlief għad-derogi previsti fit-Trattat, kull għajnuna, ta’ kwalunkwe forma, mogħtija minn Stat Membru jew permezz ta’ riżorsi tal-Istat, li twassal għal distorsjoni jew theddida ta’ distorsjoni għall-kompetizzjoni billi tiffavorixxi ċerti impriżi jew ċerti produtturi għandha, safejn tolqot il-kummerċ bejn l-Istati Membri, tkun inkompatibbli mas-suq intern”.

(75)

Sabiex jikkwalifikaw bħala għajnuna mill-Istat, vantaġġi għandhom ikunu imputabbli lill-Istat u jkunu mogħtija direttament jew indirettament permezz ta’ riżorsi Statali.

(76)

Fil-każ in kwistjoni, il-kumpens li jingħata lill-PP għat-twettiq tal-obbligi universali postali tiegħu għandu jitħallas mill-baġit tal-Istat. Strumenti legali speċifiċi, bħal-“Liġi tat-30.7.1997 dwar l-Intrapriża Statali tas-servizz pubbliku PP”, “Liġi Postali”, l-“Ordinanza tal-Ministru tal-Infrastruttura tad-9 ta’ Jannar 2004 dwar il-kundizzjonijiet għall-provvista tas-servizzi postali universali” u “Ordinanza tal-Ministru tal-Finanzi tal-24 ta’ Diċembru 2003” huma l-bażi legali għall-għoti ta’ dan il-kumpens.

(77)

Għalhekk, iż-żewġ kundizzjonijiet kumulattivi msemmija hawn fuq huma milħuqa fil-każ preżenti.

(78)

Barra minn hekk, l-Artikolu 107(1) TFUE jipprojbixxi għajnuna li “tiffavorixxi ċerti impriżi jew ċerti produtturi”, jiġifieri, għajnuna selettiva.

(79)

Il-kumpens għandu jingħata esklussivament lill-PP, u għalhekk huwa selettiv.

(80)

Sabiex tikkostitwixxi għajnuna mill-Istat, miżura għandha tikkonferixxi vantaġġ lir-reċipjenti tagħha.

(81)

Huwa evidenti mill-każistika tal-Qorti tal-Ġustizzja tal-Komunitajiet Ewropej li kumpens tas-servizz pubbliku ma jikkostitwix għajnuna mill-Istat skont it-tifsira tal-Artikolu 107(1) TFUE jekk jissodisfa ċerti kundizzjonijiet (48). Madankollu, jekk il-kumpens tas-servizz pubbliku ma jissodisfax dawn il-kundizzjonijiet u jekk il-kriterji ġenerali għall-applikabblità tal-Artikolu 107(1) TFUE jiġu sodisfati, dan il-kumpens jikkostitwixxi għajnuna mill-Istat.

(82)

Fis-sentenza tagħha f’Altmark, il-Qorti tal-Ġustizzja stabbiliet il-kundizzjonijiet skont liema l-kumpens tas-servizz pubbliku ma jikkostitwix għajnuna mill-Istat kif ġej:

(83)

Meta jintlaħqu dawn l-erba’ kriterji kumulattivi, il-kumpens tas-servizz pubbliku ma jikkostitwix għajnuna mill-Istat għax ma jagħtix vantaġġ ekonomiku u l-Artikolu 107(1) u 108 TFUE ma japplikawx. Jekk l-Istati Membri ma jirrispettawx dawn il-kriterji u jekk jintlaħqu l-kriterji ġenerali għall-applikabbiltà tal-Artikolu 107(1) TFUE, kumpens tas-servizz pubbliku jikkostitwixxi għajnuna mill-Istat, li għandha tiġi notifikata skont l-Artikolu 108(3) TFUE.

(84)

Fil-każ in kwistjoni, il-Kummissjoni tikkunsidra li r-raba’ kriterju ma ntlaħaqx.

(85)

L-ewwel nett, is-servizz pubbliku ma ngħatax bħala riżultat ta’ proċedura miftuħa tal-appalt pubbliku.

(86)

Fit-tieni lok, la l-awtoritajiet Pollakki ma argumentaw li PP qed jiġi kkumpensat skont l-ispejjeż ta’ impriża tipika fis-settur, u lanqas il-Kummissjoni ma hi f’pożizzjoni li tikkonkludi li l-ispejjeż ta’ PP huma dawk ta’ impriża tipika mmexxija tajjeb. Barra minn hekk, is-sussidji previsti jirreferu għal telf imġarrab. Għalhekk, jista’ jiġi konkluż li l-miżura selettiva in kwistjoni għandha tiġi kkunsidrata bħala waħda li tikkonferixxi vantaġġ fuq PP, li jista’ jiġi kkwalifikat bħala vantaġġ ekonomiku skont it-tifsira tal-Artikolu 107(1) TFUE.

(87)

L-Artikolu 107(1) TFUE jipprojbixxi wkoll għajnuna li taffettwa l-kummerċ bejn l-Istati Membri u li twassal għal tfixkil jew theddida ta’ tfixkil għall-kompetizzjoni.

(88)

Fl-evalwazzjoni tagħha ta’ dawk iż-żewġ kundizzjonijiet, il-Kummissjoni mhix mitluba tistabbilixxi li l-għajnuna għandha effett reali fuq il-kummerċ bejn l-Istati Membri u li hemm attwalment tfixkil għall-kompetizzjoni, iżda li teżamina biss jekk dik l-għajnuna tistax taffettwa dak il-kummerċ u twassal għal tfixkil għall-kompetizzjoni (49). Meta għajnuna mogħtija minn Stat Membru ssaħħaħ il-pożizzjoni ta’ impriża meta mqabbla ma’ impriżi oħra li jikkompetu f’kummerċ fl-Unjoni, dawn tal-aħħar għandhom jitqiesu bħala affettwati minn dik l-għajnuna.

(89)

Mhuwiex meħtieġ li PP innifsu jkun involut fil-kummerċ fl-Unjoni. Għajnuna mogħtija minn Stat Membru lil impriża tista’ tgħin biex iżżomm jew tnaqqas attività domestika, bir-riżultat li impriżi stabbiliti fi Stati Membri oħra jkollhom inqas ċans li jippenetraw is-suq tal-Istat Membru kkonċernat. Barra minn hekk, it-tisħiħ ta’ impriża li, sa dakinhar, ma kinetx involuta f’kummerċ fl-Unjoni jista’ jqiegħed lil dik l-impriża f’pożizzjoni li tippermetti li din tippenetra fis-suq ta’ Stat Membru ieħor.

(90)

Fir-rigward tas-segment tal-ittri ’l barra mill-qasam riżervat, tliet operaturi għandhom liċenzja biex iwettqu dawn is-servizzi. Dawn il-kumpaniji huma PP, “Dystrybucja Polska Sp. z o.o” u “Indesys Dominik Steinhaus”. Skont l-awtoritajiet Pollakki, il-pożizzjoni kurrenti ta’ Poczta Polska fuq dan is-segment għadha b’saħħitha, għax wieħed mill-kompetituri (“Dystrybucja Polska Sp. z o.o.”) jikkonċentra fuq id-distribuzzjoni ta’ reklamar stampat u l-ieħor jillimita l-attivitajiet tiegħu għar-reġjun tal-Masovja.

(91)

Is-segment tal-pakketti u s-servizzi tal-kurriera Pollakki huwa kompetittiv ħafna. Is-sehem fis-suq tal-PP tas-segment tal-pakketti jammonta għal […] u s-sehem fis-suq tiegħu tas-segment tal-kurrier għal […] (50). Kumpaniji li joperaw f’dan is-suq huma kumpaniji li jipprovdu servizzi ta’ kwalità għolja mħallsa bi prezz għoli (DHL, TNT, UPS) jew kumpaniji li jipprovdu servizzi bażiċi (eż. General logistic systems, Opek, Schenker, X-Press Couriers, Blyskawica).

(92)

Is-sehem ta’ PP fis-segment tal-kunsinna tar-reklamar huwa ta’ madwar […], filwaqt li fis-segment tal-formoli stampati mingħajr indirizz huwa ta’ madwar […] (51). Minkejja l-[…] sehem fis-suq tal-PP, qed tiġi osservata politika aggressiva tal-kompetituri li qed jiżdiedu.

(93)

Rigward servizzi finanzjarji, il-Kummissjoni tfakkar li s-settur bankarju ilu miftuħ għall-kompetizzjoni għal ħafna snin. Liberalizzazzjoni progressiva żiedet il-kompetizzjoni li setgħet irriżultat diġà mill-moviment ħieles tal-kapital provdut fit-TFUE.

(94)

L-attivitajiet finanzjarji tal-PP jinkludu l-bejgħ ta’ prodotti li jappartjenu lill-Bank Pocztowy (sussidjarju tal-bank PKO BP) jiġifieri self, kontijiet u depożiti, servizzi ta’ kiri (permezz tas-sussidjarja tal-PP-Post Media Serwis), servizzi finanzjarji differenti inkluż trasferimenti ta’ flus f’kontijiet tal-bank, kunsinna ta’ flus fid-dar tad-destinatarju fil-forma ta’ Struzzjoni ta’ Ħlas tal-Flus Postali, ġbir ta’ miżati tal-liċenzja tar-Radju u tat-TV u pproċessar ta’ ċekkijiet bankarji maħruġa minn banek differenti u krediti tal-flus. PP huwa attiv ukoll fis-suq tal-assigurazzjoni bid-distribuzzjoni ta’ prodotti tal-assigurazzjoni u finanzjarji minn intrapriżi li għandhom rabtiet tal-kapital ma’ Poczta Polska, jiġifieri PAUF, OFE Pocztylion u TUW Pocztowe. PP imexxi wkoll fond ta’ pensjoni bl-isem Pocztylion -Arka PTE S.A.

(95)

Minħabba l-fatt li PP jiddistribwixxi prodotti tal-assigurazzjoni u finanzjarji minn kumpaniji sussidjarji jew kumpaniji marbuta dan huwa f’kompetizzjoni ma’ banek oħra, kumpaniji tal-assigurazzjoni u intermedjarji. Barra minn hekk, fis-snin riċenti, PP kabbar b’mod sinifikanti l-medda tas-servizzi ta’ ħlas tiegħu lill-klijenti, billi żied mal-għodda postali tradizzjonali serje ta’ għodda li qabel kienu f’idejn il-banek (karti tad-debitu u tal-kreditu, trasferimenti ta’ kreditu, servizzi ta’ addebitu fil-kont għall-ħlas tal-kontijiet tad-dawl u tal-ilma). Dawn l-evoluzzjonijiet żiedu s-sostitwibbiltà tas-servizzi finanzjarji offruti minn PP ma’ dawk offruti mill-banek.

(96)

Istituzzjonijiet finanzjarji minn Stati Membri differenti joperaw fil-Polonja, jew direttament permezz ta’ fergħat jew uffiċċji rappreżentattivi, jew indirettament billi jikkontrollaw banek u istituzzjonijiet finanzjarji bbażati fil-Polonja.

(97)

Bħala konklużjoni, hemm kompetizzjoni fost kumpaniji minn Stati Membri differenti fis-settur tas-servizzi postali u finanzjarji. Il-kumpens tas-servizz pubbliku li jista’ jingħata lil PP isaħħaħ il-pożizzjoni ta’ PP fir-rigward ta’ impriżi postali u finanzjarji stabbiliti fil-Polonja jew Stati Membri oħra li, bħala konsegwenza, jistgħu jsibuha aktar diffiċli biex jidħlu fis-suq Pollakk. Għalhekk il-miżura tista’ twassal għal tfixkil tal-kompetizzjoni u taffettwa l-kummerċ bejn l-Istati Membri.

(98)

Kwalunkwe kumpens mogħti skont din l-iksema lil PP jammonta għal għajnuna mill-Istat skont it-tifsira tal-107(1) TFUE.

(99)

Kif imsemmi fit-Taqsima I fuq, wara d-Deċiżjoni tad-9 ta’ Jannar 2007, il-proċedimenti skont l-Artikolu 88(2) tat-Trattat KE jibqgħu miftuħin mill-perjodu tal-1 ta’ Jannar 2006, ‘il quddiem.

(100)

Il-punt 25 tal-qafas Komunitarju tal-2005 dwar għajnuna mill-Istat forma ta’ kumpens tas-servizz pubbliku (52) (minn hawn ‘il quddiem il-“Qafas”) jiddikjara li “Dan il-qafas għandu japplika għal perjodu ta’ sitt snin mid-data tal-pubblikazzjoni tiegħu f’Il-Ġurnal Uffiċjali tal-Unjoni Ewropea”. Il-punt 26 tal-qafas jindika li “Il-Kummissjoni għandha tapplika d-dispożizzjonijiet ta’ dan il-qafas għall-proġetti ta’ għajnuna kollha nnotifikati lilha u għandha tieħu deċiżjoni fuq dawk il-proġetti wara li l-qafas huwa ppublikat fil-Ġurnal Uffiċjali, anke jekk il-proġetti kienu nnotifikati qabel din il-pubblikazzjoni”.

(101)

L-għajnuna in kwistjoni kienet innotifikata mill-awtoritajiet Pollakki fil-proċedura tal-“mekkaniżmu interim” (ara d-Deċiżjoni biex tinbeda l-proċedura stabbilita fl-Artikolu 88(2) tal-25 ta’ Ġunju 2005). Minn dan, isegwi li d-dispożizzjonijiet legali applikabbli għall-evalwazzjoni tal-kumpatibbiltà tal-iskema matul il-perjodu tal-2006-2011 huwa l-qafas Komunitarju għall-għajnuna mill-Istat forma ta’ kumpens tas-servizz pubbliku.

(102)

Il-Kummissjoni tikkunsidra li, “fl-istadju kurrenti tal-iżvilupp tas-suq intern, il-kumpens tas-servizz pubbliku li huwa għajnuna mill-Istat skont it-tifsira tal-Artikolu 107(1) TFUE jista’ jkun iddikjarat kumpatibbli mat-Trattat skont l-Artikolu 106(2) jekk dan ikun meħtieġ għat-tħaddim tas-servizz ta’ interess ekonomiku ġenerali u ma jaffettwax l-iżvilupp tal-kummerċ għal tali punt li jkun kuntarju għall-interessi tal-Unjoni”.

(103)

Sabiex tikseb dan il-bilanċ, il-Kummissjoni tapplika d-dispożizzjonijiet tal-Qafas sabiex tevalwa l-kumpatibbiltà tal-każ in kwistjoni. Skont il-Qafas it-tliet kriterji bażiċi tal-kumpatibbiltà huma li (i) is-servizz in kwistjoni huwa servizz pubbliku ġenwin (jiġifieri l-kwalifikazzjoni tjegħu bħala servizz ta’ interess ġenerali ekonomiku mhuwiex żball evidenti), li (ii) is-servizz jiġi assenjat lill-impriża permezz ta’ att uffiċjali li jinkludi l-elementi speċifikati fit-Taqsima 2.3 tal-qafas Komunitarju imsemmi qabel, u li (iii) l-impriża ma tingħatax kumpens żejjed għall-provvista tas-servizz pubbliku (wara kunsiderazzjoni ta’ qligħ raġonevoli).

(104)

Kif indikat fil-Qafas, l-Istati Membri għandhom marġni wiesgħa ta’ diskrezzjoni rigward in-natura ta’ servizzi li jistgħu jiġu kklassifikati bħala servizzi ta’ interess ekonomiku ġenerali. Ix-xogħol tal-Kummissjoni huwa li tiżgura li l-marġni ta’ diskrezzjoni jiġi applikat mingħajr żball evidenti fir-rigward tad-definizzjoni tas-servizz ta’ interess ekonomiku ġenerali.

(105)

L-obbligu tas-servizz pubbliku inkarigat lil PP huwa s-servizz postali universali skont id-Direttiva Postali (ara t-Taqsima II.2 fuq). Il-provvista tas-servizzi postali universali fit-territorju Pollakk sabiex ikunu offruti lill-popolazzjoni Pollakka l-istess servizzi bażiċi bl-istess prezz huwa każ klassiku ta’ SGEI.

(106)

Konsegwentemnt, is-servizz postali universali fdat lill-PP jikkwalifika bħala servizz ta’ interess ekonomiku ġenerali skont it-tifsira tal-Artikolu 106 TFUE.

(107)

Kif indikat fil-Qafas, il-kunċett ta’ servizz ta’ interess ekonomiku ġenerali skont it-tifsira tal-Artikolu 86 tat-Trattat ifisser li l-impriża in kwistjoni ġiet fdata b’kariga speċjali. Ir-responsabbiltà tat-tħaddim tas-servizz ta’ interess ekonomiku ġenerali għandha tiġi fdata lill-impriża kkonċernata permezz ta’ att uffiċjali wieħed jew iktar minn wieħed.

(108)

Fil-każ in kwistjoni, il-liġi Postali tat-12 ta’ Lulju 2003 u l-“Ordinanza tal-Ministru tal-Infrastruttura tad-9 ta’ Jannar 2004 dwar il-kundizzjonijiet għall-provvista ta’ servizzi postali universali” jikkostitwixxu l-istrumenti legali li jiddefinixxu u jafdaw lil PP is-servizz ta’ interess ekonomiku ġenerali rappreżentat mis-servizz postali universali (ara t-Taqsimiet II.2, II.3 u IV.4 fuq).

(109)

B’konformità mat-Taqsima 2.3 tal-qafas Komunitarju msemmi qabel, dawn l-atti jispeċifikaw, b’mod partikolari:

(110)

Filwaqt li l-Art 52 u 52.a tal-Liġi Postali u l-Ordinanza tal-Ministru tal-Finanzi tal-24 ta’ Diċembru 2003 diġà stabbilew xi prinċipji dwar il-kumpens (53) dawn mhumiex suffiċjenti biex jiġi kkunsidrat li r-rekwiżit stabbilit fil-punt 12(d) u 12(e) tal-Qafas huwa totalment milħuq.

(111)

Preżentement, skont il-punt 2.2 tal-“Ordinanza” it-tip ta’ riżultati li għandhom jiġu allokati għal servizzi huwa limitat għal “Spejjeż ta’ prodotti, prodotti u materjali mibjugħa”, “Spejjeż ta’ bejgħ”, “Spejjeż ġenerali u amministrattivi” u “Imgħax minn obbligazzjonijiet li jiffinanzjaw servizzi postali inkluż differenzi fir-rati tal-kambju barranin”. Għalhekk, il-Kummissjoni tikkunsidra li mhux il-parametri kollha relevanti għall-kalkolu tal-kumpens ġew speċifikati fl-atti nazzjonali. Minħabba l-fatt li ċertu spejjeż u dħul (54) tħallew barra totalment fl-atti nazzjonali mil-lista ta’ oġġetti li għandhom jiġu allokati għal servizzi, il-kontroll u r-reviżjoni sussegwenti tagħhom tħalliet barra wkoll (ara t-Taqsima V.2.3.3 isfel).

(112)

L-Artikolu 52.a.4. jistabbilixxi xi rekwiżiti imposti fuq UKE sabiex jipproċedi bl-approvazzjoni ta’ sussidju li jikkumpensa lill-operatur postali għat-twettiq tal-USO jiġfieri sottomissjoni preċedenti ta’ 1) ir-rapport finanzjarju tal-operatur pubbliku eżaminat mill-awditur, 2) informazzjoni dwar it-twettiq tal-kundizzjonijiet ta’ affidament u 3) informazzjoni li tikkonċerna rekwiżiti verifikati sabiex jinżammu kotba ta’ kontabbiltà u kontabbiltà tal-ispejjeż kif imsemmi fl-Artikolu 52 paragrafu 1 u 2. Għall-istess raġunijiet spjegati qabel, peress li l-Artikolu 52.2 jagħmel referenza diretta għall-Ordinanza u din tispeċifika biss l-allokazzjoni ta’ ċerti spejjeż għal servizzi, il-Kummissjoni tikkunsidra li mhux il-parametri kollha relevanti għall-kalkolu tal-kumpens ġew ikkunsidrati fl-att(i) nazzjonali relevanti. Konsegwentment, jekk mhux il-parametri kollha relevanti għall-kalkolu tal-kumpens ġew ikkunsidrati r-rekwiżit rigward l-ispeċifikazzjoni fl-atti nazzjonali relevanti tal-arraġamenti għall-evitar ta’ kwalunkwe għoti ta’ kumpens żejjed għandu jiġi kkunsidrat li ma ntlaħaqx totalment ukoll. L-ambitu limitat tal-verifiki annwali mwettqa kull sena jikkonferma dan il-fatt (ara spjegazzjonijiet addizzjonali fit-Taqsima V.2.3.5 isfel). B’mod analogu, id-dispożizzjonijiet eżaminati mill-Kummissjoni ma jidhirx li jinkludu xi arraġament dwar il-ħlas lura ta’ kwalunkwe kumpens żejjed possibbli.

(113)

Għalhekk, il-Kummissjoni ssib li r-rekwiżiti rigward l-ispeċifikazzjoni fl-atti relevanti nazzjonali ta’ i) il-parametri għall-kalkolu, il-kontroll u r-reviżjoni tal-kumpens (Artikolu 12(d) tal-Qafas) u ta’ ii) l-arranġamenti għall-evitar u l-ħlas lura ta’ kwalunkwe għoti ta’ kumpens żejjed (Artikolu 12(e) tal-Qafas) ma ntlaħqux kompletament. Barra minn hekk, għar-raġunijiet spjegati qabel, il-Kummissjoni tqis li huwa adatt li tispeċifika b’mod ċar fl-att nazzjonali relevanti l-għan tal-verifika annwali, li huwa li tiżgura li ma jseħħ ebda għoti ta’ kumpens żejjed.

(114)

Bħala konklużjoni, l-affidabbiltà ma tinkludix l-elementi kollha mitluba mill-Qafas għall-għajnuna mill-Istat forma ta’ kumpens ta’ servizz pubbliku, jiġifieri dawk imsemmija fil-punt 12d u l-punt 12e tal-Qafas. Konsegwentement, it-tieni kriterju jista’ jitqies bħala milħuq parzjalment biss u għandhom jiġu adottati rimedji xierqa biex jinkludu l-ispejjeż u d-dħul imsemmija fil-punt 128.i) sabiex jiġi evalwat jekk l-għoti ta’ kumpens lil PP skont il-miżura in kwistjoni huwiex meħtieġ u biex tiġi żgurata l-kompatibbiltà ta’ dak il-kumpens.

(115)

L-analiżi tal-implimentazzjoni tal-iskema fit-Taqsima V.2.3 isfel għandha turi b’mod iktar ċar il-konsegwenzi fil-prattika ta’ definizzjoni mhux kompluta tal-parametri u tal-arraġamenti għall-evitar tal-għoti ta’ kumpens żejjed.

(116)

Skont l-Artikolu 14 tal-Qafas “(…) l-ammont tal-kumpens ma jaqbiżx dak li huwa meħtieġ biex ikopri l-ispejjeż fit-twettiq tal-obbligi tas-servizz pubbliku, b’kunsiderazzjoni tal-irċevuti rilevanti u l-qligħ raġonevoli għat-twettiq ta’ dawn l-obbligi.” Dan jindika wkoll li “(…) l-ispejjeż li għandhom ikunu kkunsidrati jinkludu l-ispejjeż kollha mġarrba fit-tħaddim tas-servizzi ta’ interess ekonomiku ġenerali. (…) Meta intrapriża twettaq ukoll attivitajiet barra l-ambitu tas-servizzi ta’ interess ekonomiku ġenerali, l-ispejjeż li huma assoċjati mas-servizz ta’ interess ekonomiku ġenerali biss jistgħu jkunu kkunsidrati (…)”.

(117)

L-attivitajiet tal-PP mhumiex limitati għas-servizzi ta’ interess ekonomiku ġenerali (ara t-Taqsima II.1 fuq).

(118)

Sabiex jiġi konkluż li dan il-kriterju jkun intlaħaq hija meħtieġa f’dan il-każ il-kwantifikazzjoni tal-ispejjeż tal-obbligu tas-servizz pubbliku (servizz postali universali) imposti fuq PP mill-atti ta’ affidament u wara jitqabblu mal-vantaġġi li għandhom jingħataw lill-PP mill-Istat.

(119)

L-Artikolu 52a tal-Liġi Postali Pollakka diġà jistqarr b’mod ċar il-projbizzjoni tal-għoti ta’ kumpens żejjed “1. L-Operatur pubbliku obbligat li jipprovdi servizzi postali universali, għandu jirċievi mill-baġit tal-istat sussidju għas-servizzi postali universali provduti, jekk iġarrab telf. 2. L-ammont tas-sussidju għandu jkun stabbilit fl-Att tal-Liġi – il-Liġi tal-Baġit, wara li jkun ikkunsidrat il-prinċipju, li l-ammont totali ta’ sussidju ma jistax jaqbeż id-differenza bejn spejjeż ta’ provvisti ta’ servizzi postali universali u dħul, li jinkiseb minn dawn is-servizzi…”.

(120)

Il-Kummissjoni sabet li s-somom ta’ ċerti kategoriji ta’ dħul u spejjeż indikati fil-kontabbiltà analitika kienu reġistrati wkoll fid-dikjarazzjonijiet finanzjarji. Minħabba l-fatt li l-kontabbiltà analitika titwettaq fil-kontabbiltà finanzjarja (55) u din hija suġġetta kull sena għal verifika indipendenti, li ma rriżultat f’ebda osservazzjonijiet materjali, il-Kummissjoni m’għandha ebda raġuni biex tiddubita li d-dħul u l-ispejjeż interni ppreżentati seħħew attwalment.

(121)

Peress li PP mhuwiex biss fornitur ta’ Servizzi ta’ Interess Ekonomiku Ġenerali (SGEI) iżda wkoll fornitur ta’ servizzi kummerċjali oħra l-Artikolu 14(2) tad-Direttiva 97/67/KE jimponi obbligu fuq l-impriża biex tissepara l-kontijiet fil-kontabbiltà interna.

(122)

Fuq il-bażi tal-Artikolu 52(1) tal-Liġi Postali, PP għandu jżomm il-kontijiet b’tali mod, li jippermetti li l-ispejjeż jiġuu kkalkulati separatament, għal kull servizz riżervat, u kollettivament għal servizzi mhux riżervati maqsuma f’servizzi postali universali u servizzi li mhumiex servizzi postali universali.

(123)

Il-Kummissjoni vverifikat li s-sistema tal-kontabbiltà interna tiddistingwi b’mod ċar il-kontijiet għal servizzi universali (maqsuma f’riżervati u mhux riżervati) u servizzi mhux universali. Il-Polonja ssottomettiet evidenza ta’ din is-separazzjoni billi uriet riżultati permezz ta’ kontijiet ta’ servizz individwali u riżultati aggregati għal kull grupp ta’ servizzi.

(124)

Kif muri mill-informazzjoni provduta lill-Kummissjoni u mill-eżaminazzjoni annwali mwettqa mir-Regolatur Nazzjonali r-riżultati tal-PP huma kkalkulati għal kull servizz riżervat separatament (56) u kollettivament għal kull wieħed minn dawn il-gruppi i) servizzi postali universali mhux riżervati u ii) servizzi kummerċjali oħra (barra mill-SGEI) skont ir-rekwiżiti stabbiliti fl-Artikolu 52(1) tal-Liġi Postali.

(125)

B’mod partikolari, għas-snin 2006 u 2007, ir-rapporti tal-Awtorità Regolatorja Nazzjonali jindikaw li PP, bħala operatur pubbliku fornitur ta’ servizzi postali universali, wettaq iż-żamma tal-kotba tiegħu u l-kontabbiltà tal-ispejjeż b’tali mod li jagmel possibbli s-separazzjoni tal-ispejjeż għal kull servizz riżervat u kollettivament għal servizzi mhux riżervati, b’distinzjoni bejn servizzi postali universali u servizzi postali mhux universali skont ir-rekwiżiti stabbiliti fl-Artikolu 52 (1) tal-Liġi Postali.

(126)

Fuq il-bażi tal-informazzjoni mibgħuta mill-Polonja dwar is-separazzjoni tal-kontijiet tal-PP, bl-evidenza ta’ verifika esterna mwettqa rigward id-diviżjoni korretta tal-kontijiet għal servizzi universali u mhux universali u dwar il-verifiki mwettqa mill-Kummissjoni jista’ jiġi konkluż b’mod raġonevoli li l-qasma fil-kontijiet bejn attivitajiet kummerċjali u attivitajiet imħaddma mill-PP skont l-obbligi tas-servizzi pubbliċi hija adattata. Il-Kummissjoni hija għalhekk tal-opinjoni li PP jissepara b’mod adegwat il-kontijiet tiegħu b’tali mod li jagħmel il-kalkolu tal-ispejjeż possibbli separatament għal kull servizz mill-qasam riżervat u kollettivament għal servizzi mhux riżervati b’diviżjoni f’UPS u mhux UPS kif speċifikat fl-Artikolu 14(2) tad-Direttiva 97/67/KE.

(127)

Bħala parti mill-eżaminazzjoni l-Kummissjoni wettqet test ta’ kompletezza tad-dejta finanzjarja provduta billi qabblet id-dejta aggregata tal-PP mill-kontabbiltà analitika mal-Kont tal-Qligħ u t-Telf.

(128)

Il-Kummissjoni sabet li i) spejjeż u dħul minn ċerti kategoriji jiġfieri “riżultati operattivi oħra” (57), “riżultati straordinarji” u xi “riżultati finanzjarji” ma kienux distribwiti għal servizzi u li ii) l-Ordinanza tal-Ministru tal-Finanzi tal-24 ta’ Diċembru 2003 kienet tillimita t-tip ta’ spejjeż li għandhom jiġu allokati għal servizzi lil’ “Spejjeż ta’ prodotti, oġġetti u materjali mibjugħa”, “Spejjeż ta’ bejgħ”, “Spejjeż ġenerali u amministrattivi” u “Imgħax minn obbligazzjonijiet li jiffinanzjaw servizzi postali inkluż differenzi fir-rati tal-kambju barranin”. L-importanza relattiva ta’ dawn l-ispejjeż u dħul, li għalihom allokazzjoni mhix prevista fid-dispożizzjonijiet nazzjonali, irrappreżentat 2.5 % u 1.5 % tat-totali rispettivi tagħhom fis-sena 2006. Għalkemm l-ispejjeż u d-dħul li ma kinux allokati għas-servizzi jistgħu jkunu kkunsidrati bħala marġinali fl-imgħoddi minħabba l-importanza relattiva tagħhom, l-importanza tagħhom tista’ tkun materjali fil-ġejjieni.

(129)

Madankollu, rigward l-imgħoddi, il-Polonja ssottomettiet informazzjoni ġdida li fiha dawn ir-“riżultati mhux allokati” ġew ex-post attribwiti għal servizzi universali (riżervati u mhux riżervati) u servizzi mhux universali (maqsuma f’servizzi postali, finanzjarji u servizzi oħra). Barra minn hekk, il-Polonja ssottomettiet spjegazzjoni tal-metodoloġija użata biex tallokahom għal servizzi. Dan kollu juri li PP ippreżenta metodoloġija raġonevoli sabiex jalloka dawk ir-riżultati.

(130)

Il-kategoriji l-oħra ta’ spejjeż u dħul interni (58) jistgħu jitqabblu mal-kont ta’ Qligħ u Telf.

(131)

Għalhekk, il-Kummissjoni tqis li d-distribuzzjoni sistematika lil servizzi tad-dħul u l-ispejjeż kollha msemmija fl-Artikolu 128.i) hija meħtieġa, b’konformità mal-prinċipju tal-allokazzjoni totali tar-riżultati u mal-kundizzjonijiet stabbiliti fil-Qafas.

(132)

Kif iddikjarat fuq l-Art 52(2) tal-Liġi Postali jitlob li l-“Ministru kompetenti għall-kwistjonijiet finanzjarji pubbliċi, f’konsultazzjoni mal-Ministru kompetenti għall-posta u t-telekomunikazzjonijiet għandu jistabbilixxi permezz ta’ Ordinanza, il-metodu tal-allokazzjoni tal-ispejjeż, fuq bażi tal-prinċipju, li dan il-metodu għandu jippermetti l-kalkolu tal-ispejjeż tal-unità, b’kunsiderazzjoni tat-taqsima 1”.

(133)

Skont l-Art 52(2) imsemmi qabel, fl-24 ta’ Diċembru 2003, il-Ministru tal-Finanzi ħareġ Ordinanza dwar il-metodu għall-allokazzjoni tal-ispejjeż tal-operatur li jipprovdi s-servizz postali universali li jimplimenta l-Artikolu 14(3) tad-Direttiva.

(134)

Ir-rapporti maħruġa mill-Awtorità Regolatorja Nazzjonali jindikaw li PP alloka spejjeż direttament jew indirettament lill-ispejjeż tas-servizzi provduti u wettaq din l-allokazzjoni kif stabbilit fl-Ordinanza tal-Ministru tal-Finanzi tal-24 ta’ Diċembru 2003 dwar il-metodu għall-allokazzjoni ta’ spejjeż għall-fornituri ta’ servizzi postali universali. L-Awtorità Regolatorja Nazzjonali kkonfermat kull sena li l-ispejjeż tal-PP kienu assenjati b’dan il-mod:

(135)

Għalkemm fl-2006 […] biss ta’ spejjeż kienu kkunsidrati bħala spejjeż diretti l-Kummissjoni ma sabet ebda raġuni biex tiddubita d-diviżjoni korretta tal-ispejjeż fi spejjeż diretti u indiretti. Barra minn hekk, il-verifiki mwettqa mill-Awtorità Nazzjonali Regolatorja u l-awdituri kkonkludew li “il-kontroll tal-ispejjeż diretti ġie implimentat u jaħdem b’mod effettiv”.

(136)

Rigward spejjeż indiretti (ara Taqsima “IV.2.1. Sistema ta’ allokazzjoni ta’ spejjeż” fuq) il-Kummissjoni hija tal-opinjoni li l-metodi użati biex jitqassmu l-kategoriji differenti ewlenin ta’ spejjeż indiretti (jiġifieri spejjeż operattivi, spejjeż tat-trasport, spejjeż ta’ manutenzjoni tan-netwerk u spejjeż indiretti oħra, għal servizzi, għalkemm ta’ numru limitat, huma madankollu raġonevoli.

(137)

Pereżempju, jidher raġonevoli li l-metodu użat biex jitqassmu “spejjeż operattivi” huwa “l-ħin ta’ ħidma f’minuti użati għat-twettiq ta’ servizzi partikolari” (59) minħabba d-diffikultà li jitniżżlu fil-kontijiet tas-servizzi l-ispejjeż għat-twettiq ta’ attivitajiet ta’ tneħħija, tqassim u kunsinna marbuta mal-provvista ta’ servizzi differenti. Il-Kummissjoni hija konxja tal-introduzzjoni riċenti fis-sistema ta’ kontabbiltà tal-PP ta’ diviżjoni iktar preċiża ta’ spejjeż operattivi flimkien ma’ żieda fin-numru ta’ metodi ta’ allokazzjoni li għandhom itejbu l-preċiżjoni tal-informazzjoni tal-kontabbiltà interna.

(138)

B’mod simili l-metodu tal-“piż tal-oġġett postali kkonsenjat” jidher aċċettabbli għad-distribuzzjoni tal-“ispejjeż tat-trasport”. Għalhekk, għall-iskop tad-distribuzzjoni ta’ spejjeż tat-trasport lil servizzi l-Kummissjoni taċċetta l-preżunzjoni wara l-metodu stabbilit li kull kilò ta’ kwalunkwe servizz jfisser bl-istess mod l-element tal-ispiża tat-“trasport”.

(139)

Sabiex PP ikun jista’ jwettaq id-distribuzzjoni ta’ “spejjeż indiretti oħra” għal servizzi għandu jiġbor dejta dwar i) il-piż tal-oġġetti postali kkonsenjati, ii) l-ammont/in-numru tal-oġġetti postali kkonsenjati u iii) il-ħin ta’ ħidma meħtieġ sabiex jitwettqu l-attivitajiet differenti. Dawn l-istatistiċi jinġabru permezz ta’ “riżultati tar-riċerka statistika” (60), “ammonti tal-valuri tas-servizzi” (61) u “riċerka dwar l-ammont ta’ xogħol” (62) rispettivament. Rigward ir-riċerka dwar l-ammont ta’ xogħol din titwettaq darba fis-sena għal xahar u tkopri l-uffiċċji postali, iċ-ċentri tad-distribuzzjoni u r-reġjuni tal-kunsinna kollha. Il-proċess tal-provvista ta’ servizzi individwali huwa maqsum f’attivitajiet dettaljati ħafna mwettqa mill-impjegati tal-PP li għahom huwa stimat standard ta’ ħin ta’ ħidma fuq bażi ta’ din ir-riċerka. Il-Kummissjoni m’għandha ebda raġuni biex tiddubita l-korrettezza tal-perjodiċità tad-dejta miġbura.

(140)

Fl-aħħar nett, l-attribuzzjoni ta’ servizzi ta’ “spejjeż għall-manutenzjoni tan-netwerk” rigward is-somma ta’ i) l-ispejjeż diretti u ii) l-ispejjeż operattivi indiretti flimkien ma’ iii) l-ispejjeż indiretti tat-trasport diġà attribwiti għal servizzi, għalkemm aċċettabbli, tidher li hi iktar ‘il bogħod mir-rabta ta’ kawżalità mill-allokazzjonijiet tal-ispejjeż imsemmija qabel.

(141)

Minħabba n-natura tal-biċċa l-kbira mid-dħul iggwadanjat minn PP dawn jistgħu jiġu allokati direttament għas-servizzi. Għalhekk, il-Kummissjoni ma tikkontestax l-allokazzjoni korretta ta’ “dħul mill-bejgħ” għal servizzi.

(142)

L-awtoritajiet Pollakki kellhom jipprovdu lill-Kummissjoni, fuq talba tagħha (63), id-distribuzzjoni tar-riżultati kollha skont il-kategoriji tas-servizzi (servizzi universali maqsuma f’riżervati u mhux riżervati u servizzi mhux universali maqsuma f’servizzi postali, finanzjaji u servizzi oħra) kif ukoll spjegazzjoni tal-metodoloġija ntużata biex tallokahom għal servizzi. Il-fatt li l-informazzjoni meħtieġa ngħatat juri li din l-informazzjoni tal-kontabbiltà interna tista’ tiġi provduta bil-livell tad-dettall meħtieġ. Il-Kummissjoni ma sabet ebda żball evidenti fil-metodoloġija applikata għall-allokazzjoni ta’ “riżultati operattivi oħra” (64), “riżultati straordinarji” (65) u “riżultati finanzjarji” (66) għal grupp ta’ servizzi.

(143)

Il-Kummissjoni tosserva wkoll li parti sinifikanti tal-ispejjeż tal-PP hija allokata għal servizzi permezz ta’ spejjeż b’metodu ta’ proporzjon (madwar […] tal-ispejjeż kollha ġew allokati għal servizzi proporzjonalment ma’ servizzi allokati preċedentement notevolment dawk l-ispejjeż li jappartjenu fil-kategorija ta’ “spejjeż oħra” jiġifieri “spejjeż ġenerali, amministrattivi u ta’ żvilupp”, “spejjeż ta’ bejgħ” u “ċerti spejjeż finanzjarji” (67)). Konsegwenetement, għandhom isisru sforzi biex titnaqqas kemm jista’ jkun ir-rilevanza tal-metodu ta’ proporzjon fil-metodu tal-kalkolu tal-ispejjeż ta’ PP sabiex tinkiseb rabta iktar b’saħħitha bejn spejjeż u servizzi. Fil-qosor, il-metodoloġija tal-allokazzjoni hija aċċettabbli iżda tista’ tiġi mtejba jekk il-metodi tal-allokazzjoni użati jipprovdu kemm jista’ jkun għal rabta bejn l-ispejjeż tar-riżorsi użati u s-servizz ġenerat minn dawk ir-riżorsi.

(144)

F’dan ir-rigward, PP informa lill-Kummissjoni dwar l-introduzzjoni regolari ta’ dispożizzjonijiet dettaljati u proċeduri (68) kif ukoll metodi ta’ allokazzjoni iktar preċiżi sabiex jirriflettu r-rabtiet bejn il-kawża u l-effett bejn it-tipi ta’ spejjeż imġarrba u l-allokazzjoni tagħhom għal servizzi sabiex tiġi mtejba s-sodezza f’termini tal-preċiżjoni tas-sistema tal-kontabbiltà interna. Għall-istess skop PP qed iħabrek ukoll biex jintroduċi kompletament il-Kalkolu tal-Ispejjeż fuq Bażi tal-Attivitajiet fil-ġestjoni tal-kontabbiltà tiegħu li ċertament għandu jtejjeb it-traċċabbiltà tal-ispejjeż tat-twettiq ta’ attività għal servizzi.

(145)

B’mod simili regoli speċifiċi tad-diviżjoni tal-ispejjeż f’diretti u indiretti kif ukoll regoli għall-kalkolu tal-metodi tad-diviżjoni jiġu aġġornati fuq bażi regolari, eż. fl-2007 Proċedura għall-Kontroll tal-Ispejjeż Diretti (69) ġiet imnedija bil-għan li tintroduċi regoli anqas ambigwi għall-kontroll ta’ spiża sempliċi diretta u spiża diretta komuni reġistrati fil-kontijiet tas-servizz (70). Barra minn hekk, il-fatt li l-metodi tal-allokazzjoni għal spejjeż indiretti jiġu determinati fuq il-livell ċentrali (71) għandu jikkontribwixxi biex jiżgura applikazzjoni iktar omoġenja ta’ dawk il-metodi fil-kumpanija kollha. Barra minn hekk, mill-1 ta’ Jannar 2007 Unitjiet Organizzativi tal-Posta Pollakka li jikkalkolaw il-metodi tad-diviżjoni ġew obbligati li jissottomettu l-metodi liċ-Ċentru tal-Kontabbiltà. F’dan ir-rigward il-Kummissjoni tirrikonoxxi t-titjib li sar fl-ambjent tal-kontroll tal-PP, b’mod iktar partikolari rigward il-proċeduri ta’ kontroll li jikkonċernaw ir-reġistrazzjonijiet ta’ spejjeż diretti u indiretti.

(146)

Barra minn hekk, l-Awtorità Nazzjonali Regolatorja qiegħda toħroġ rakkomandazzjonijiet biex telimina wkoll xi dgħufijiet oħra (72) li nstabu matul l-eżerċizzju tal-verifika annwali. Skont l-awtoritajiet Pollakki numru ta’ rakkomandazzjonijiet espressi matul l-eżerċizzju tal-2005 u l-2006 diġà ġew implimentati (73) jew dalwaqt jiġu implimentati. Il-Kummissjoni tqis li huwa importanti li r-rakkomandazzjonijiet miftuħin kollha jiddaħħlu fis-seħħ malajr kemm jista’ jkun sabiex tinkiseb sistema ta’ informazzjoni tal-kontabbiltà interna iktar soda.

(147)

Konsegwentement, fuq il-bażi tal-informazzjoni pprovduta mill-Polonja dwar il-metodu tal-allokazzjoni tal-ispejjeż applikat, il-Kummissjoni hija tal-opinjoni li l-Posta Pollakka tuża metodi ta’ allokazzjoni b’rabta każwali raġonevoli bejn l-ispiża attribwita għal servizz u s-sors ta’ dik l-ispiża. Barra minn hekk, il-Kummissjoni tirrikonoxxi l-isforzi magħmula minn PP (i) biex isaħħaħ l-ambjent ta’ kontroll marbut mal-informazzjoni tal-ġestjoni u (ii) biex itejjeb il-metodoloġija tal-allokazzjoni tal-ispiża, li huma l-bażi għall-kalkolu fil-ġejjieni tal-kumpens.

(148)

Madankollu, kif imsemmi qabel fit-Taqsima V.2.3.3, sabiex jiġi kkalkulat b’mod korrett ir-riżultat nett għat-twettiq tal-Obbligu Postali Universali kif ukoll ir-riżultat barra l-UPS, għandu jiġi żgurat li ebda spiża jew dħul ma jibqa’ ma jiġix allokat u li r-riżultati kollha (74) (dħul u spejjeż) jiġu allokati b’mod adegwat għal kull wieħed mis-servizzi riżervati u mhux riżervati fis-Servizz Postali Universali u lis-Servizz Postali mhux Universali.

(149)

Skont l-Art 52(3) tal-Liġi Postali l-operatur li jipprovdi s-servizzi postali universali għandu jissottometti lill-President tal-UKE dikjarazzjoni dwar il-konformità mar-rekwiżiti, li huma msemmija fit-Taqsima 1, kull sena, sal-31 ta’ Marzu ta’ kull sena fir-rigward tas-sena preċedenti. Barra minn hekk il-President tal-UKE għandu jkun obbligat li jivverifika l-konformità mar-rekwiżiti, li huma msemmija fit-Taqsimiet 1 u 2 tal-Art 52(4).

(150)

L-“Operatur pubbliku għandu jkun obbligat jissottometti lill-President tal-UKE, mhux iktar tard mill-31 ta’ Lulju ta’ kull sena, fir-rigward tas-sena preċedenti, ir-rapport finanzjarju eżaminat mill-awditur, fl-ambitu konsistenti mal-Att tal-Liġi tad-29 ta’ Settembru 1994 r. dwar il-kontabbiltà (Ġurnal tal-Liġi tas-sena 2002 Nru 76, pos. 694 u tas-sena 2003 Nru 60, pos. 535) u konsistenti mat-Taqsimiet 1 u 2”.

(151)

Kif iddikjarat qabel il-Kummissjoni rċeviet rapporti dettaljati miktuba kull sena mill-Awtorità Nazzjonali Regolatorja flimkien ma’ awditur indipendenti dwar it-twettiq tar-rekwiżiti tas-separazzjoni tal-kontijiet u l-allokazzjoni tal-ispejjeż. Ġie konkluż f’dawk ir-rapporti li l-kontabbiltà interna tal-PP kienet ibbażata fuq prinċipji ta’ kontabbiltà ġeneralment aċċettati u, għalhekk, kienet addattata għall-kwantifikazzjoni tal-ispejjeż żejda tas-servizz postali universali fdat lilu, b’konformità mal-Artikolu 14(3) tad-Direttiva postali.

(152)

B’kunsiderazzjoni tal-fatt li l-kontabbiltà analitika titwettaq fil-kontabbiltà ġenerali huwa importanti bl-istess mod li din tal-aħħar tiġi riveduta wkoll. Kull sena d-dikjarazzjonijiet finanzjarji tal-PP jiġu suġġetti għal verifika indipendenti (ara t-Taqsima V.2.3.1 fuq). Barra minn hekk, l-awditur għandu jissorvelja wkoll il-konformità tar-reġistrazzjonijiet tal-kontabbiltà mar-rekwiżiti dettaljati tal-Liġi Postali (jiġifieri l-Artikolu 52).

(153)

Madankollu, il-fatt li r-rapporti annwali maħruġa mill-UKE flimkien ma’ kumpanija ta’ verifika indipendenti dejjem iddikjaraw li l-ambitu tal-verifika annwali indipendenti huwa limitat għall-evalwazzjoni ta’ ‘sa liema punt l-operatur pubbliku ssodisfa r-rekwiżiti li jirriżultaw mill-Artikolu 52 tal-Liġi Postali u l-“Ordinanza” u dan huwa limitat għal eżaminazzjoni ta’ ċerti tipi ta’ spejjeż biss (75) juri li l-arranġamenti magħmula sa issa għall-evitar tal-għoti ta’ kumpens żejjed mhumiex suffiċjenti jekk ir-rimedji msemmija fit-Taqsima V.2.3.3 fuq ma jiġux introdotti. Il-Kummissjoni tikkunsidra l-ambitu ta’ din il-verifika bħala limitat wisq sabiex jiggarantixxi b’mod korrett it-twettiq tal-għan tal-verifika jiġfieri jiżgura li ebda għoti ta’ kumpens żejjed ma jseħħ (ara l-punt 20 tal-Qafas u l-Artikolu 52.a tal-Liġi Postali (76)).

(154)

Għalhekk, kif diġà ddikjarat fuq fit-Taqsima V.2.2, il-Kummissjoni tikkunsidra li huwa meħtieġ li tinkludi fl-ambitu tal-verifika annwali “Dħul operattiv ieħor”, “Spejjeż operattivi oħra”, “Dħul finanzjarju”, “Spejjeż finanzjarji” u “Riżultati straordinarji” kif ukoll “dħul mill-bejgħ”.

(155)

Bħala konklużjoni, il-Kummissjoni hija tal-opinjoni li l-ambitu tal-verifika tal-kont għandu jitkabbar sabiex jiżgura li l-kategoriji kollha tal-ispejjeż u d-dħul rilevanti għall-kalkolu tal-ammont tal-kumpens għandhom jiġu kkunsidrati.

(156)

Skont il-previżjoni tal-kumpanija (ara l-figuri isfel) PP huwa mistenni wkoll li ma jġarrabx telf nett għat-twettiq tal-obbligu tas-servizz pubbliku fis-snin li ġejjin tal-iskema (ara informazzjoni iktar dettaljata fl-Anness 3). Konsegwentement, ebda kumpens ma huwa previst mill-iskema in kwistjoni għall-perjodu 2009-2011.

Tabella 2

(157)

Kif jidher fuq l-eċċess nett ta’ PP miksub mill-UPS qed jonqos kostantement sena wara sena. Minkejja din ix-xejra attwali PP ippreveda titjib kostanti ta’ dan ir-riżultat finanzjaru għas-snin li ġejjin tal-iskema. Ir-raġunijiet li jispjegaw il-bidla fix-xejra huma bbażati fuq l-introduzzjoni ta’ programm ta’ ottimizzazzjoni tal-ispejjeż imniedi fit-tmiem tal-2008 li għandu jwassal għal tnaqqis fl-ispejjeż u konsegwentement għal titjib gradwali tar-riżultati finanzjarji tal-PP. Dan il-programm iffoka mhux biss fuq il-qasam SGEI iżda wkoll fuq il-qasam kummerċjali tal-PP ‘il barra mill-SGEI, eż. xi servizzi pprovduti skont l-attività awżiljari li tagħmel telf m’għandhomx jiġu offruti fil-ġejjieni. Barra minn hekk xi miżuri ġew imfassla biex iżidu d-dħul kemm ġewwa kif ukoll barra l-SGEI, eż. bejgħ ta’ proprjetà attwali statli mhux meħtieġa, il-modernizzazzjoni ta’ xi servizzi finanzjarji biex iżidu l-kompetittività tal-PP, eċċ.

(158)

Il-preżunzjonijiet ewlenin magħmula biex jiġu kkalkolati l-figuri previsti qegħdin f’parametri bħal-livell ta’ bidla mistenni fl-istruttura organizattiva, il-livell ta’ prezzijiet għas-servizzi postali differenti, varjazzjonijiet fl-ispejjeż tax-xogħol u spejjeż oħra, in-numru ta’ impjegati jew indikaturi makroekonomiċi (tkabbir fil-GDP, rata ta’ qgħad, rata ta’ inflazzjoni, rata ta’ kambju EUR/PLN u USD/PLN).

(159)

Barra minn hekk, kif diġà ssemma’ qabel, għalkemm PP ikun awtorizzat skont il-Qafas li “jgawdi qligħ raġonevoli” l-awtoritajiet Pollakki avżaw lill-Kummissjoni li, skont il-leġiżlazzjoni nazzjonali applikabbli, PP għandu jiġi kkumpensat biss għal telf imġarrab b’rabta mal-provvista ta’ servizzi postali universali. Konsegwentement, l-ammont ta’ kumpens ma għandux ikopri qligħ raġonevoli, li jrrappreżenta assigurazzjoni addizzjonali għall-ġejjieni li ma għandu jseħħ ebda għoti ta’ kumpens żejjed.

(160)

Il-Kummissjoni m’għandhiex raġuni biex tiddubita l-preżunzjonijiet magħmula biex jiġu kkalkolati l-ispejjeż u d-dħul għas-snin li jifdal tal-iskema. Barra minn hekk, it-titjib li qed jiġi introdott regolarment fl-ambjent tal-kontroll u fis-sistema tal-kontabbiltà interna tal-PP jipprovdi assigurazzjoni addizzjonali tal-allokazzjoni korretta tar-riżultati lill-SGEI u ‘l barra mill-SGEI.

(161)

Peress li PP qed jippjana li dalwaqt jintroduċi mudell ġdid biex jikkalkola l-ispejjeż integrat fil-kalkolu tal-ispejjeż ibbażati fuq l-Attività (Activity-based-costing/ABC), il-Kummissjoni titlob li tiġi infurmata fit-tliet xhur mill-introduzzjoni tiegħu jew ta’ kwalunkwe tibdil sinifikanti ieħor fis-sistema interna ta’ kontabbiltà tal-PP.

(162)

Il-Polonja inizjalment talbet lill-Kummissjoni biex testendi l-investigazzjoni sal-2012. Madankollu, peress li r-regoli kurrenti għall-evalwazzjoni tal-kumpatibbiltà tal-kumpens tas-servizz pubbliku jiġifieri l-“Qafas Komunitarju għall-għajnuna mill-Istat forma ta’ kumpens tas-servizz pubbliku” se jiskadu fl-2011, l-awtoritajiet Pollakki jaċċettaw approvazzjoni tal-iskema sas-sena 2011.

(163)

Fuq il-bażi ta’ dak li ssemma’ qabel, il-Kummissjoni tikkonkludi li, jekk jitħallas kumpens għat-twettiq tal-obbligu tas-servizz pubbliku skont l-iskema eżaminata fil-perjodu 2006-2011, dak il-kumpens għandu jikkostitwixxi għajnuna mill-Istat skont l-Artikolu 107(1) TFUE li jkun kumpatibbli skont l-Artikolu 106(2) tat-TFUE sakemm il-kundizzjonijiet imsemmija qabel jiġu sodisfati.

(164)

Jirriżulta minn dak li ssemma qabel li l-iskema tissodisfa r-rekwiżiti stabbiliti fil-Qafas sabiex il-Kummissjoni tikkunsidra l-iskema kumpatibbli sakemm jintlaħqu dawn il-kundizzjonijiet: (1) Il-Polonja għandha ttejjeb id-definizzjoni tal-parametri għall-kalkolu, il-kontroll u r-reviżjoni tal-kumpens sabiex tiżgura li r-riżultati kollha jiġu attribwiti għal servizzi permezz tal-metodoloġija aċċettata, (2) il-Polonja għandha ttejjeb l-arranġamenti għall-evitar u l-ħlas lura ta’ kumpens żejjed sabiex tiżgura li r-riżultati kollha relevanti għall-kalkolu tal-kumpens jiġu kkunsidrati u li arranġamenti xierqa għall-ħlas lura ta’ kumpens żejjed ikunu fis-seħħ, u (3) il-Polonja tiżgura li l-metodu ġdid tal-allokazzjoni tal-ispejjeż jibqa’ kumpatibbli mar-regoli tal-Artikolu 14 tad-Direttiva 97/67/KE u f’dan ir-rigward għandha tinforma lill-Kummissjoni fi żmien tliet xhur mill-implimentazzjoni ta’ kwalunkwe bidla sinifikanti fis-sistema ta’ kontabbiltà interna tal-PP,

(1)

ittejjeb id-definizzjoni tal-parametri għall-kalkolu, il-kontroll u r-reviżjoni tal-kumpens sabiex tiżgura li r-riżultati kollha jiġu attribwiti għal servizzi skont il-metodoloġija aċċettata;

(2)

ittejjeb l-arranġamenti għall-evitar u l-ħlas lura ta’ kumpens żejjed sabiex tiżgura li r-riżultati kollha relevanti għall-kalkolu tal-kumpens jiġu kkunsidrati u li jiġu implimentati arranġamenti xierqa għall-ħlas lura ta’ kumpens żejjed;

(3)

tiżgura li l-metodu ġdid tal-allokazzjoni tal-ispejjeż jibqa’ kumpatibbli mar-regoli tal-Artikolu 14 tad-Direttiva 97/67/KE u f’dan ir-rigward tinforma lill-Kummissjoni fi żmien tliet xhur mill-implimentazzjoni ta’ kwalunkwe bidla sinifikanti fis-sistema ta’ kontabbiltà interna tal-PP.