16.4.2008

MT

Il-Ġurnal Uffiċjali ta’ l-Unjoni Ewropea

L 106/6

---

DEĊIŻJONI TAL-KUNSILL

tat-18 ta’ Frar 2008

dwar il-konklużjoni tal-Ftehim bejn il-Komunità Ewropea u r-Repubblika tal-Panama dwar ċerti aspetti tas-servizzi ta’ l-ajru

(2008/305/KE)

IL-KUNSILL TA’ L-UNJONI EWROPEA,

Wara li kkonsidra t-Trattat li jistabbilixxi il-Komunità Ewropea, u b’mod partikolari l-Artikolu 80(2), flimkien ma’ l-ewwel sentenza ta’ l-ewwel subparagrafu ta’ l-Artikolu 300(2) u l-ewwel subparagrafu ta’ l-Artikolu 300(3) tiegħu,

Wara li kkunsidra l-proposta tal-Kummissjoni,

Wara li kkunsidra l-opinjoni tal-Parlament Ewropew,

Billi:

(1)	Fil-5 ta’ Ġunju 2003, il-Kunsill awtorizza lill-Kummissjoni tiftaħ in-negozjati ma’ pajjiżi terzi dwar is-sostituzzjoni ta’ ċerti dispożizzjonijiet fi ftehimiet bilaterali eżistenti bi ftehim Komunitarju.

(2)

Il-Kummissjoni nnegozjat f'isem il-Komunità ftehim mal-Panama dwar ċerti aspetti tas-servizzi ta’ l-ajru (“Il-Ftehim”) fi qbil mal-mekkanizmi u d-Direttivi fl-Anness tad-Deċiżjoni tal-Kunsill li tawtorizza lill-Kummissjoni tiftaħ negozjati ma’ pajjiżi terzi dwar il-bdil ta’ ċerti dispożizzjonijiet fi ftehimiet bilaterali eżistenti bi ftehim Komunitarju;

(3)	Il-Ftehim ġie ffirmat fl-1 ta’ Ottubru 2007 f’isem il-Komunità Ewropea suġġett għall-konklużjoni possibbli tiegħu f’data aktar tard.

(4)	Il-Ftehim għandu jiġi approvat,

IDDEĊIEDA KIF ĠEJ:

Artikolu 1

1.   Il-Ftehim bejn il-Komunità Ewropea u r-Repubblika tal-Panama dwar ċerti aspetti tas-servizzi ta’ l-ajru huwa b'dan approvat f'isem il-Komunità.

2.   It-test tal-Ftehim huwa anness ma’ din id-Deċiżjoni (1).

Artikolu 2

Il-President tal-Kunsill b'dan huwa awtorizzat li jinnomina l-persuna li għandha s-setgħa tagħmel in-notifika li dwarha jipprovdi l-Artikolu 9(1) tal-Ftehim.

---

(1)  Ara paġna 7 ta’ dan il-Ġurnal Uffiċjali.

---

16.4.2008

MT

Il-Ġurnal Uffiċjali ta’ l-Unjoni Ewropea

L 106/7

---

FTEHIM

bejn il-Komunità Ewropea u r-Repubblika tal-Panama dwar ċerti aspetti tas-servizzi ta’ l-ajru

IL-KOMUNITÀ EWROPEA

minn naħa waħda, u

IR-REPUBBLIKA TAL-PANAMA,

min-naħa l-oħra

(minn hawn 'il quddiem “il-Partijiet”)

FILWAQT LI JINNUTAW li ftehim ta’ servizzi bilaterali ta’ l-ajru ġew iffirmati bejn bosta Stati Membri tal-Komunità Ewropea u r-Repubblika tal-Panama, li fihom dispożizzjonijiet li jmorru kontra l-liġi tal-Komunità Ewropea,

FILWAQT LI JINNUTAW li l-Komunità Ewropea għandha l-kompetenza esklussiva fir-rigward ta’ bosta aspetti li jistgħu jiġu inklużi fi ftehim bilaterali ta’ servizzi ta’ l-ajru bejn l-Istati Membri tal-Komunità Ewropea u pajjiżi terzi,

FILWAQT LI JINNUTAW li, skond il-liġi tal-Komunità Ewropea, it-trasportaturi ta’ l-ajru Komunitarji stabbiliti f'xi wieħed mill-Istati Membri għandhom id-dritt għal aċċess mhux diskriminatorju għar-rotot ta’ l-ajru bejn l-Istati Membri tal-Komunità Ewropea u pajjiżi terzi.

WARA LI KKUNSIDRAW il-ftehim bejn il-Komunità Ewropea u ċerti pajjiżi terzi li jipprovdu l-possibbiltà għaċ-ċittadini ta’ dawn il-pajjiżi terzi li jiksbu dritt ta’ proprjetà fi trasportatur ta’ l-ajru lliċenzjat f'konformità mal-liġi tal-Komunità Ewropea,

FILWAQT LI JIRRIKONOXXU li ċerti dispożizzjonijiet tal-ftehim bilaterali għal servizzi ta’ l-ajru bejn Stati Membri tal-Komunità Ewropea u r-Repubblika tal-Panama, li huma kontra l-liġi tal-Komunità Ewropea, għandhom jinġiebu f'konformità sħiħa magħha sabiex tiġi stabbilita bażi ġuridika tajba għas-servizzi ta’ l-ajru bejn il-Komunità Ewropea u r-Repubblika tal-Panama u biex titħares it-tkomplija ta’ servizzi ta’ l-ajru bħal dawn,

FILWAQT LI JINNUTAW li mhuwiex għan tal-Komunità Ewropea, bħala parti minn dawn in-negozjati, li jiżdied il-volum totali ta’ traffiku ta’ l-ajru bejn il-Komunità Ewropea u r-Repubblika tal-Panama, jew li jiġi affettwat il-bilanċ bejn trasportaturi ta’ l-ajru tal-Komunità u trasportaturita' l-ajru tar-Repubblika tal-Panama, jew li jiġu nnegozjati emendi lid-dispożizzjonijiet li diġà jeżistu ta’ ftehim bilaterali għal servizzi ta’ l-ajru dwar drittijiet tat-traffiku.

FTIEHMU KIF ĠEJ:

Artikolu 1

Dispożizzjonijiet ġenerali

1.   Għall-finijiet ta’ dan il-Ftehim, l-espressjoni “Stati Membri” tfisser l-Istati Membri tal-Komunità Ewropea. “L-Istati Membri ta’ l-LACAC” tfisser l-Istati Membri tal-Kummissjoni ta’ l-Avjazzjoni Ċivili ta’ l-Amerika Latina.

2.   Ir-referenzi f'kull ftehim elenkat fl-Anness I liċ-ċittadini ta’ l-Istat Membru li huwa parti fil-ftehim għandhom jinftiehmu li qed jirriferu għaċ-ċittadini ta’ l-Istati Membri tal-Komunità Ewropea.

3.   Ir-referenzi f'kull ftehim elenkat fl-Anness I għat-trasportaturi ta’ l-ajru jew linji ta’ l-ajru ta’ l-Istat Membru li huwa parti fil-ftehim għandhom jinftiehmu bħala li qed jirriferu għat-trasportaturi ta’ l-ajru jew linji ta’ l-ajru ddeżinjati minn dak l-Istat Membru.

Artikolu 2

Deżinjazzjoni, Awtorizzazzjoni u Revoka

1.   Id-dispożizzjonijiet fil-paragrafi 2 u 3 ta’ dan l-Artikolu għandhom jieħdu post id-dispożizzjonijiet li jikkorrispondu magħhom fl-Artikoli elenkati fl-Anness II(a) u (b) rispettivament, f'dak li għandu x'jaqsam mad-deżinjazzjoni tal-kumpaniji ta’ l-ajru mill-Istat Membru kkonċernat, l-awtorizzazzjonijiet u l-permessi mogħtija mir-Repubblika tal-Panama, u r-rifjut, ir-revoka, is-sospensjoni jew il-limitazzjoni ta’ l-awtorizzazzjonijiet jew permessi tat-trasportatur ta’ l-ajru, rispettivament. Id-dispożizzjonijiet fil-paragrafi 4 u 5 ta’ dan l-Artikolu għandhom jieħdu post id-dispożizzjonijiet li jikkorrispondu magħhom fl-Artikoli elenkati fl-Anness II(a) u (b) rispettivament, f'dak li għandu x'jaqsam mad-deżinjazzjoni tat-trasportatur ta’ l-ajru mir-Repubblika tal-Panama, l-awtorizzazzjonijiet u permessi tiegħu mogħtija mill-Istat Membru, u r-rifjut, ir-revoka, is-sospensjoni jew il-limitazzjoni ta’ l-awtorizzazzjonijiet jew permessi tat-trasportatur ta’ l-ajru, rispettivament.

2.   Malli tirċievi deżinjazzjoni mingħand Stat Membru, ir-Repubblika tal-Panama għandha tagħti l-awtorizzazzjonijiet u l-permessi xierqa bl-anqas dewmien proċedurali, bil-kundizzjoni li:

(i)	it-trasportatur ta’ l-ajru jkun stabbilit, skond it-Trattat li jistabbilixxi l-Komunità Ewropea, fit-territorju ta’ l-Istat Membru li għamel id-deżinjazzjoni, u jkollu Liċenzja Operattiva valida f'konformità mal-liġi tal-Komunità Ewropea;

(ii)	ikun eżerċitat u miżmum il-kontroll regolatorju effettiv tat-trasportatur ta’ l-ajru mill-Istat Membru responsabbli għall-ħruġ taċ-Ċertifikat ta’ l-Operaturi ta’ l-Ajru tiegħu u l-awtorità aeronawtika rilevanti tkun identifikata biċ-ċar fid-deżinjazzjoni; kif ukoll

(iii)

it-trasportatur ta’ l-ajru jkun proprjetà, direttament jew permezz ta’ l-akbar sehem azzjonarju, u kkontrollat effettivament mill-Istati Membri u/jew miċ-ċittadini ta’ l-Istati Membri, jew mill-istati l-oħra elenkati fl-Anness III u/jew miċ-ċittadini ta’ dawn l-istati l-oħra.

3.   Ir-Repubblika tal-Panama tista’ tirrifjuta, tirrevoka, tissospendi jew tillimita l-awtorizzazzjonijiet jew il-permessi ta’ kumpanija ta’ l-ajru ddeżinjata minn Stat Membru fejn:

(i)	it-trasportatur ta’ l-ajru ma jkunx stabbilit, taħt it-Trattat li jistabbilixxi l-Komunità Ewropea, fit-territorju ta’ l-Istat Membru li għamel id-deżinjazzjoni, jew ma jkollux Liċenzja Operattiva valida skond il-liġi tal-Komunità Ewropea; jew

(ii)	ma jkunx eżerċitat jew miżmum kontroll regolatorju effettiv tat-trasportatur ta’ l-ajru mill-Istat Membru responsabbli għall-ħruġ taċ-Ċertifikat ta’ l-Operaturi ta’ l-Ajru tiegħu, jew l-awtorità aeronawtika rilevanti ma tkunx identifikata biċ-ċar fid-deżinjazzjoni; jew

(iii)

it-trasportatur ta’ l-ajru ma jkunx il-proprjetà ta’ u ma jkunx effettivament ikkontrollat direttament jew permezz ta’ l-akbar sehem azzjonarju mill-Istati Membri u/jew miċ-ċittadini ta’ l-Istati Membri, jew mill-istati l-oħra elenkati fl-Anness III u/jew miċ-ċittadini ta’ dawn l-istati l-oħra; jew

(iv)

it-trasportatur ta’ l-ajru jkun diġà awtorizzat li jopera fl-ambitu ta’ ftehim bilaterali bejn ir-Repubblika tal-Panama u xi Stat Membru ieħor u r-Repubblika tal-Panama turi li, billi jeżerċita d-drittijiet tat-traffiku fl-ambitu ta’ dan il-Ftehim fuq rotta li tinkludi punt f'dak l-Istat Membru l-ieħor, dan ikun qed jevita r-restrizzjonijiet fuq id-drittijiet tat-traffiku imposti minn dak il-ftehim l-ieħor; jew

(v)

it-trasportatur ta’ l-ajru jkun fil-pussess ta’ Ċertifikat ta’ l-Operaturi ta’ l-Ajru maħruġ mill-Istat Membru u ma jkun hemm l-ebda ftehim bilaterali dwar servizzi ta’ l-ajru bejn ir-Repubblika tal-Panama u dak l-Istat Membru, u d-drittijiet tat-traffiku lejn dak l-Istat Membru jkunu ġew miċħuda lit-trasportatur ta’ l-ajru ddeżinjat mir-Repubblika tal-Panama.

Waqt li qed teżerċita d-dritt tagħha taħt dan il-paragrafu, ir-Repubblika tal-Panama ma għandhiex tiddiskrimina bejn it-trasportaturi ta’ l-ajru tal-Komunità abbażi tan-nazzjonalità.

4.   Malli jirċievi deżinjazzjoni mingħand ir-Repubblika tal-Panama, Stat Membru għandu jagħti l-awtorizzazzjonijiet u l-permessi xierqa bl-anqas dewmien proċedurali possibbli, sakemm:

(i)	it-trasportatur ta’ l-ajru jkun stabbilit fir-Repubblika tal-Panama; kif ukoll

(ii)	ir-Repubblika tal-Panama jkollha u żżomm kontroll regolatorju effettiv tat-trasportatur ta’ l-ajru u tkun responsabbli mill-ħruġ taċ-Ċertifikat ta’ l-Operaturi ta’ l-Ajru tiegħu; kif ukoll

(iii)

it-trasportatur ta’ l-ajru jkun il-proprjetà ta’ l-Istati Membri ta’ l-LALAC u/jew ta’ ċittadini mill-Istati Membri ta’ l-LALAC u jkun effettivament ikkontrollat minnhom sew direttament inkella permezz ta’ sehem maġġoritarju.

5.   Stat Membru jista’ jirrifjuta, jirrevoka, jissospendi jew jillimita l-awtorizzazzjonijiet jew il-permessi ta’ trasportatur ta’ l-ajru ddeżinjat mir-Repubblika tal-Panama fejn:

(i)	it-trasportatur ta’ l-ajru jkun stabbilit fir-Repubblika tal-Panama; jew

(ii)	il-kontroll regolatorju effettiv tat-trasportatur ta’ l-ajru ma jkunx eżerċitat jew miżmum mir-Repubblika tal-Panama jew ir-Repubblika tal-Panama ma tkunx responsabbli mill-ħruġ taċ-Ċertifikat ta’ l-Operaturi ta’ l-Ajru tiegħu; jew

(iii)

it-trasportatur ta’ l-ajru ma jkunx il-proprjetà ta’ l-Istati Membri ta’ l-LALAC u/jew ta’ ċittadini mill-Istati Membri ta’ l-LALAC u ma jkunx effettivament ikkontrollat minnhom sew direttament inkella permezz ta’ sehem maġġoritarju; jew

(iv)

it-trasportatur ta’ l-ajru jkun diġà awtorizzat jopera fl-ambitu ta’ ftehim bilaterali bejn l-Istat Membru u Stat Membru ieħor ta’ l-LALAC, u l-Istat Membru juri li, billi jeżerċita d-drittijiet fuq it-traffiku fl-ambitu ta’ dan il-Ftehim fuq rotta li tinkludi punt f'dak l-Istat Membru l-ieħor ta’ l-LALAC, dan ikun qed jevita r-restrizzjonijiet fuq id-drittijiet tat-traffiku imposti minn dak il-ftehim l-ieħor.

Artikolu 3

Sikurezza

1.   Id-dispożizzjonijiet fil-paragrafu 2 ta’ dan l-Artikolu għandhom jikkomplementaw id-dispożizzjonijiet korrispondenti fl-Artikoli elenkati fl-Anness II(ċ).

2.   Fejn Stat Membru jkun iddeżinja trasportatur ta’ l-ajru li l-kontroll regolatorju tiegħu huwa eżerċitat u miżmum minn Stat Membru ieħor, id-drittijiet tar-Repubblika tal-Panama taħt id-dispożizzjonijiet ta’ sikurezza tal-ftehim bejn l-Istat Membru li ddeżinja t-trasportatur ta’ l-ajru u r-Repubblika tal-Panama għandu japplika bl-istess mod fir-rispett ta’ l-adozzjoni, l-eżerċizzju jew il-manteniment ta’ l-istandards tas-sikurezza mill-Istat Membru l-ieħor u b'rispett ta’ l-awtorizzazzjoni għall-operazzjoni ta’ dik it-trasportatur ta’ l-ajru.

Artikolu 4

Tassazzjoni tal-karburant ta’ l-avjazzjoni

1.   Id-dispożizzjonijiet fil-paragrafi 2 u 3 ta’ dan l-Artikolu jikkomplementaw id-dispożizzjonijiet korrispondenti fl-Artikoli elenkati fl-Anness II(d).

2.   Minkejja kull dispożizzjoni oħra kontra dan, xejn f'kull wieħed mill-ftehim elenkati fl-Anness II(d) ma għandu jżomm l-Istati Membri milli jimponu, fuq bażi mhux diskriminatorja, taxxi, imposti, dazji, drittijiet jew ħlasijiet fuq karburant li jiġi fornut fit-territorju tagħhom għall-użu f'inġenju ta’ l-ajru ta’ trasportatur ta’ l-ajru ddeżinjat tar-Repubblika tal-Panama li jopera bejn punt fit-territorju ta’ Stat Membru u punt ieħor fit-territorju ta’ dak l-Istat Membru jew fit-territorju ta’ Stat Membru ieħor.

3.   Minkejja kull dispożizzjoni oħra kontra dan, xejn f'kull wieħed mill-ftehim elenkati fl-Anness II(d) ma għandu jżomm Stat Membru milli jimponi taxxi, imposti, dazji, drittijiet jew ħlasijiet fuq karburant li jiġi fornut fit-territorju tiegħu għall-użu f'inġenju ta’ l-ajru ta’ trasportatur ta’ l-ajru ddeżinjat tar-Repubblika tal-Panama li jopera bejn punt fit-territorju ta’ Stat Membru u punt ieħor fit-territorju ta’ dak l-Istat Membru jew fit-territorju ta’ Stat Membru ieħor.

Artikolu 5

It-tariffi għall-ġarr

1.   Id-dispożizzjonijiet fil-paragrafi 2 u 3 ta’ dan l-Artikolu għandhom jikkomplementaw l-Artikoli elenkati fl-Anness II(e).

2.   It-tariffi li jintalbu mit-trasportatur(i) ta’ l-ajru ddeżinjata/i mir-Repubblika tal-Panama permezz ta’ ftehim elenkat fl-Anness I li fih dispożizzjoni elenkata fl-Anness II(e) għal ġarr li jseħħ kollu kemm hu fi ħdan il-Komunità Ewropea għandhom ikunu suġġetti għal-liġi tal-Komunità Ewropea. Il-liġi tal-Komunità Ewropea hija applikata fuq bażi mhux diskriminatorja.

3.   It-tariffi li jintalbu mit-trasportatur(i) ta’ l-ajru ddeżinjat(i) minn Stat Membru fl-ambitu ta’ xi ftehim elenkat fl-Anness I li jkun fihom dispożizzjoni elenkata fl-Anness II(e) għall-ġarr bejn ir-Repubblika tal-Panama u xi Stat Membru ieħor ta’ l-LALAC għandhom ikunu suġġetti għal-liġi tal-Panama rigward il-price leadership u jiġu applikati fuq bażi mhux diskriminatorja.

Artikolu 6

Il-kompatibbiltà mar-regoli tal-kompetizzjoni

1.   Minkejja kull dispożizzjoni għall-kuntrarju, xejn f'kull wieħed mill-ftehim elenkati fl-Anness I ma għandu (i) jiffavorixxi l-adozzjoni ta’ ftehim bejn impriżi, deċiżjonijiet minn assoċjazzjonijiet ta’ impriżi jew prattiki miftiehma li jipprevjenu, jgħawġu jew jirrestrinġu l-kompetizzjoni; (ii) isaħħaħ l-effetti ta’ kwalunkwe ftehim, deċiżjoni jew prattika miftiehma bħal dan; jew (iii) jiddelega lill-operaturi ekonomiċi privati r-responsabbiltà għat-teħid ta’ miżuri li jipprevjenu, jgħawġu jew jirrestrinġu l-kompetizzjoni.

2.   Id-dispożizzjonijiet fil-ftehim elenkati fl-Anness I li mhumiex kompatibbli mal-paragrafu 1 ta’ dan l-Artikolu ma għandhomx jiġu applikati.

Artikolu 7

Annessi ta’ dan il-Ftehim

L-Annessi ta’ dan il-Ftehim se jiffurmaw parti integrali minnu.

Artikolu 8

Reviżjonijiet jew emendi

Il-Partijiet jistgħu, f'kull ħin, jirrevedu jew jemendaw dan il-Ftehim b'kunsens reċiproku.

Artikolu 9

Dħul fis-seħħ

Dan il-Ftehim għandu jidħol fis-seħħ meta l-Partijiet ikunu nnotifikaw lil xulxin bil-miktub li jkunu tlestew il-proċeduri interni rispettivi tagħhom meħtieġa għad-dħul fis-seħħ tiegħu.

Artikolu 10

Terminazzjoni

1.   Fil-każ li jiġi tterminat ftehim elenkat fl-Anness I, id-dispożizzjonijiet kollha ta’ dan il-Ftehim li għandhom x'jaqsmu mal-ftehim elenkat fl-Anness I ikkonċernat għandhom jiġu tterminati fl-istess ħin.

2.   Fil-każ li jiġu tterminati l-ftehim kollha elenkati fl-Anness I, dan il-Ftehim jiġi tterminat fl-istess waqt.

---

ANNESS I

Lista ta’ ftehim imsemmija fl-Artikolu 1 ta’ dan il-Ftehim

(a)

Ftehim dwar servizzi ta’ l-ajru bejn ir-Repubblika tal-Panama u Stati Membri tal-Komunità Ewropea li, fid-data ta’ l-iffirmar ta’ dan il-Ftehim, kienu ġew konklużi, iffirmati u/jew qed jiġu applikati provviżorjament — Il-Ftehim bejn ir-Repubblika Federali tal-Ġermanja u r-Repubblika tal-Panama dwar it-Trasport bl-Ajru, magħmul fil-Panama fit-13 ta’ Diċembru 1999, minn hawn 'il quddiem “il-Ftehim Panama – Ġermanja” fl-Anness II. — Il-Ftehim bejn il-Gvernijiet tar-Repubblika tal-Panama u tar-Renju tal-Belġju dwar servizzi ta’ l-ajru, magħmul fil-belt ta’ Panama fit-12 ta’ Jannar 1966, minn hawn 'il quddiem “il-Ftehim Panama – Belġju” fl-Anness II. — Il-Ftehim bejn ir-Renju ta’ Spanja u r-Repubblika tal-Panama, magħmul fil-belt ta’ Panama fis-7 ta’ Awissu 2001, minn hawn 'il quddiem “il-Ftehim Panama – Spanja” fl-Anness II. — Il-Protokoll tal-Laqgħa bejn id-delegazzjonijiet aeronawtiċi tal-Gvern tar-Repubblika Taljana u l-Gvern tar-Repubblika tal-Panama, magħmul f'Ruma fil-11 ta’ Novembru 1970, minn hawn 'il quddiem “il-Protokoll Panama – Italja” fl-Anness II. — Il-Ftehim bejn ir-Repubblika tal-Panama u r-Renju ta’ l-Olanda dwar servizzi ta’ l-ajru bejn it-territorji tagħhom u lil hinn minnhom, inizjalat bħala l-Anness II tal-Memorandum ta’ Qbil magħmul f'Den Haag fis-7 ta’ Ġunju 1995, minn hawn 'il quddiem “il-Ftehim Panama – Olanda” fl-Anness II. — Il-Ftehim bejn il-Gevrn tar-Renju tal-Gran Brittanja u l-Irlanda ta’ Fuq u l-Gvern tar-Repubblika tal-Panama, inizjalat bħala l-Anness B tal-Memorandum ta’ Qbil iffirmat f'Londra fis-26 ta’ Awissu 1997, minn hawn 'il quddiem “il-Ftehim Panama – Renju Unit” fl-Anness II.

(b)	Ftehim dwar servizzi ta’ l-ajru u arranġamenti oħra inizjalati jew iffirmati bejn ir-Repubblika tal-Panama u Stati Membri tal-Komunità Ewropea li, dakinhar ta’ l-iffirmar ta’ dan il-Ftehim, kienu għadhom ma daħlux fis-seħħ u li mhumiex qed jiġu applikati provviżorjament.

---

ANNESS II

Lista ta’ Artikoli fil-ftehim elenkati fl-Anness I u msemmija fl-Artikoli 2 sa 5 ta’ dan il-Ftehim

(a)	Deżinjazzjoni: — l-Artikolu 3 tal-Ftehim Panama – Ġermanja; — l-Artikolu 3 tal-Ftehim Panama – Spanja; — l-Artikolu 4 tal-Ftehim Panama – Olanda; — L-Artikolu 4 tal-Ftehim Panama – Renju Unit.

(b)

Rifjut, Revoka, Sospensjoni jew Limitazzjoni ta’ l-Awtorizzazzjonijiet jew il-Permessi: — l-Artikolu 3 tal-Ftehim Panama – Ġermanja; — l-Artikolu 9 tal-Ftehim Panama – Belġju; — l-Artikolu 4 tal-Ftehim Panama – Spanja; — l-Artikolu 5 tal-Ftehim Panama – Olanda; — l-Artikolu 5 tal-Ftehim Panama – Renju Unit.

(c)	Kontroll regolatorju: — l-Artikolu 12 tal-Ftehim Panama – Ġermanja; — l-Artikolu 11 tal-Ftehim Panama – Spanja.

(d)	It-Tassazzjoni tal-Karburant ta’ l-Avjazzjoni: — l-Artikolu 6 tal-Ftehim Panama – Ġermanja; — l-Artikolu 7 tal-Ftehim Panama – Belġju; — l-Artikolu 5 tal-Ftehim Panama – Spanja; — l-Artikolu 10 tal-Ftehim Panama – Olanda; — L-Artikolu 8 tal-Ftehim Panama – Renju Unit.

(e)	It-tariffi fuq il-ġarr — l-Artikolu 10 tal-Ftehim Panama – Ġermanja; — l-Artikolu 5 tal-Ftehim Panama – Belġju; — l-Artikolu 7 tal-Ftehim Panama – Spanja; — l-Artikolu 6 tal-Ftehim Panama – Olanda; — L-Artikolu 7 tal-Ftehim Panama – Renju Unit.

---

ANNESS III

Lista ta’ Stati oħra msemmija fl-Artikolu 2 ta’ dan il-Ftehim

(a)	Ir-Repubblika ta l-Iżlanda (skond il-Ftehim dwar iż-Żona Ekonomika Ewropea);

(b)	Il-Prinċipat ta’ Liechtenstein (skond il-Ftehim dwar iż-Żona Ekonomika Ewropea);

(ċ)	Ir-Renju tan-Norveġja (skond il-Ftehim dwar iż-Żona Ekonomika Ewropea);

(d)	Il-Konfederazzjoni Żvizzera (skond il-Ftehim bejn il-Komunità Ewropea u l-Konfederazzjoni Żvizzera dwar it-Trasport bl-Ajru ).