20.7.2007

MT

Il-Ġurnal Uffiċjali ta’ l-Unjoni Ewropea

L 189/24

---

DEĊIŻJONI TAL-KUNSILL U TAL-KUMMISSJONI

tal-25 ta' Ġunju 2007

dwar il-firma, f'isem il-Komunità Ewropea u l-Komunità Ewropea għall-Enerġija Atomika, u l-applikazzjoni provviżorja tal-Ftehim dwar il-Kooperazzjoni Xjentifika u Teknoloġika bejn il-Komunità Ewropea u l-Komunità Ewropea għall-Enerġija Atomika fuq naħa, u l-Konfederazzjoni Żvizzera fuq l-oħra

(2007/502/KE, Euratom)

IL-KUNSILL TA' L-UNJONI EWROPEA U L-KUMMISSJONI TAL-KOMUNITAJIET EWROPEJ,

Wara li kkunsidraw it-Trattat li jistabbilixxi l-Komunità Ewropea, u b'mod partikolari l-Artikolu 170, flimkien ma' l-ewwel sentenza ta' l-ewwel subparagrafu ta' l-Artikolu 300(2) tiegħu,

Wara li kkunsidraw it-Trattat li jistabbilixxi l-Komunità Ewropea għall-Enerġija Atomika, u b'mod partikolari t-tieni paragrafu ta' l-Artikolu 101 tiegħu,

Wara li kkunsidraw il-proposta tal-Kummissjoni,

Billi:

(1)

Il-Kummissjoni nnegozjat, f'isem il-Komunitajiet, Ftehim għall-Kooperazzjoni Xjentifika u Teknoloġika bejn il-Komunità Ewropea u l-Komunità Ewropea għall-Enerġija Atomika fuq naħa, u l-Konfederazzjoni Żvizzera fuq l-oħra, li jipprovdi għall-applikazzjoni provviżorja tal-Ftehim mill-1 ta' Jannar 2007. L-applikazzjoni provviżorja tippermetti lil entitajiet Żvizzeri jipparteċipaw fl-ewwel sejħiet għal proposti taħt is-Seba' Programm ta' Qafas.

(2)	Il-Ftehim kien inizjalat fis-27 ta' Frar 2007.

(3)	Il-Ftehim għandu jiġi ffirmat u applikat fuq bażi provviżorja, pendenti t-tkomplija tal-proċeduri għall-konklużjoni formali tiegħu.

IDDEĊIDEW KIF ĠEJ:

Artikolu 1

1.   L-iffirmar tal-Ftehim dwar Kooperazzjoni Xjentifika u Teknoloġika bejn il-Komunità Ewropea u l-Komunità Ewropea għall-Enerġija Atomika, fuq naħa, u l-Konfederazzjoni Żvizzera, fuq l-oħra, flimkien ma' l-Att Finali, huwa b' dan approvat f' isem il-Komunità Ewropea u l-Komunità Ewropea għall-Enerġija Atomika, soġġett għall-konklużjoni ta' l-imsemmi Ftehim.

2.   It-test tal-Ftehim huwa mehmuż ma' din id-Deċiżjoni.

Artikolu 2

1.   Suġġett għall-konklużjoni tal-Ftehim aktar tard, il-President tal-Kunsill huwa b' dan awtorizzat jiffirma l-Att Finali f'isem il-Komunità Ewropea.

2.   Suġġett għall-konklużjoni tal-Ftehim aktar tard, il-President tal-Kummissjoni huwa b' dan awtorizzat li jaħtar il-persuna(i) bis-setgħa li tiffirma l-Ftehim u l-Att Finali f'isem il-Komunità Ewropea għall-Enerġija Atomika.

Artikolu 3

Il-Ftehim dwar Kooperazzjoni Xjentifika u Teknoloġika bejn il-Komunità Ewropea u l-Komunità Ewropea għall-Enerġija Atomika, fuq naħa, u l-Konfederazzjoni Żvizzera, fuq l-oħra, għandu jiġi applikat provviżorjament.

Artikolu 4

1.   Il-Kummissjoni għandha tadotta l-pożizzjoni tal-Komunitajiet li għandha tittieħed fil-Kumitat għar-Riċerka Żvizzera/Komunitajiet stabbilit fl-Artikolu 10 tal-Ftehim ta' Qafas dwar Kooperazzjoni Xjentifika u Teknika bejn il-Komunitajiet Ewropej u l-Konfederazzjoni Żvizzera (1) fir-rigward ta' deċiżjonijiet skond l-Artikolu 2 (1) tal-Ftehim dwar l-applikabilità fl-Iżvizzera tar-regoli għat-twaqqif ta' l-istrutturi ġuridiċi maħluqa taħt l-Artikoli 169 u 171 tat-Trattat tal-KE.

2.   Il-Kummissjoni għanda tadotta l-pożizzjoni tal-Komunitajiet li għandha tittieħed fil-Kumitat għar-Riċerka Żvizzera/Komunitajiet stabbilit fl-Artikolu 10 tal-Ftehim ta' Qafas għall-Kooperazzjoni Xjentifika u Teknika bejn il-Komunitajiet Ewropej u l-Konfederazzjoni Żvizzera fir-rigward ta' deċiżjonijiet skond l-Artikolu 6 (2) u 6 (3) tal-Ftehim li jidentifika reġjuni fl-Iżvizzera li jistgħu jkunu reġjuni eliġibbli li jibbenefikaw mill-azzjonijiet ta' riċerka taħt il-Programm ta' Ħidma “Potenzjal ta' Riċerka” taħt il-programm speċifiku “Kapaċitajiet”.

Artikolu 5

Din id-Deċiżjoni għandha tiġi pubblikata fil-Ġurnal Uffiċjali ta' l-Unjoni Ewropea.

---

(1)  ĠU L 313, 22.11.1985, p. 6.

---

ANNESS A

PRINĊIPJI FUQ L-ALLOKAZZJONI TAD-DRITTIJIET TAL-PROPRJETA' INTELLETTWALI

I.   Ambitu

Għall-finijiet ta' dan il-Ftehim, “proprjetà intellettwali” għandu jkollha t-tifsira kif definita fl-Artikolu 2 tal-Konvenzjoni li tistabbilixxi l-Organizzazzjoni Dinjija tal-Proprjetà Intellettwali, ffirmata fi Stokkolma fl-14 ta' Lulju 1967.

Għall-finijiet ta' dan il-Ftehim, “għarfien” tfisser ir-riżultati, inkluż l-informazzjoni, sew jekk jistgħu jiġu protetti jew le, kif ukoll id-drittijiet ta' l-awtur jew id-drittijiet marbutin ma' din l-informazzjoni, wara li jkunu saru applikazzjonijiet għal, jew għall-ħruġ ta', brevetti, diżinji, varjetajiet ta' pjanti, ċertifikati ta' ħarsien supplementari jew forom simili ta' ħarsien.

II.   Drittijiet tal-proprjeta' intellettwali ta' l-entitajiet ġuridiċi tal-partijiet

1.

Kull Parti għandha tiżgura li d-drittijiet tal-proprjetà intellettwali ta' l-entitajiet ġuridiċi tal-Parti l-oħra li qed tipparteċipa fl-attivitajiet imwettqa skond dan il-Ftehim u d-drittijiet u l-obbligi li jirriżultaw minn din il-parteċipazzjoni huma ttrattati b'mod li jkun kompatibbli mal-konvenzjonijiet internazzjonali rilevanti applikabbli għall-Partijiet, b'mod partikolari il-Ftehim TRIPS (Ftehim dwar l-Aspetti Relatati mal-Kummerċ tad-Drittijiet tal-Proprjetà Intellettwali amministrat mill-Organizzazzjoni Dinjija tal-Kummerċ), il-Konvenzjoni ta' Berna (l-Att ta' Pariġi 1971) u l-Konvenzjoni ta' Pariġi (l-Att ta' Stokkolma 1967).

2.

Entitajiet ġuridiċi stabbiliti fl-Iżvizzera u li qed jipparteċipaw f'azzjonijiet indiretti taħt is-Seba' Programmi ta' Qafas tal-KE u l-Euratom għandu jkollhom drittijiet tal-proprjetà intellettwali u obbligi skond il-kundizzjonijiet stipulati fir-Regolament (KE) Nru 2321/2002 (1) tal-Parlament Ewropew u tal-Kunsill modifikat bir-Regolament (KE) Nru 1906/2006, fir-Regolament tal-Kunsill Nru 2322/2002 (2), modifikat bir-Regolament tal-Kunsill (Euratom) Nru 1908/2006 tat-18 ta' Diċembru, 2006 u fil-ftehim ta' l-għotjiet u/jew kuntratti konkluż mal-Komunità Ewropea, f'konformità mal-punt 1. Fejn l-Iżvizzera tipparteċipa f'azzjonijiet indiretti taħt is-Seba' Programm ta' Qafas tal-KE, implimentat f'konformità ma' l-Artikolu 169 u l-Artikolu 171 tat-Trattat li jistabbilixxi l-Komunità Ewropea, l-Iżvizzera għandu jkollha l-istess drittijiet tal-proprjetà intellettwali u obbligi bħall-Istati Membri li qed jipparteċipaw fihom, kif stipulat fid-dispożizzjonijiet rilevanti.

3.

Entitajiet ġuridiċi stabbiliti fi Stat Membru ta' l-Unjoni Ewropea li qed jipparteċipa fi programmi ta' riċerka u/jew proġetti Żvizzeri għandu jkollhom l-istess drittijiet tal-proprjetà intellettwali u obbligi bħal entitajiet ġuridiċi stabbiliti fl-Iżvizzera li qed jipparteċipaw f'dawn il-programmi ta' riċerka u proġetti, f'konformità ma' l-punt 1.

III.   Id-drittijiet tal-prorjeta' intellettwali tal-partijiet

1.

Sakemm il-Partijiet ma jiftiehmux mod ieħor bejniethom, ir-regoli li ġejjin għandhom japplikaw għall-għarfien maħluq mill-Partijiet matul l-attivitajiet mwettqa f'konformità ma' l-Artikolu 2(4) ta' dan il-Ftehim: (a) il-Parti li toħloq l-għarfien għandu jkollha s-sjieda tiegħu. Fejn is-sehem rispettiv tagħhom fix-xogħol ma jistax ikun determinat, il-Partijiet għandhom ikunu sidien flimkien ta' l-għarfien; (b) il-Parti li għandha s-sjieda għandha tagħti lill-Parti l-oħra d-drittijiet ta' l-aċċess għall-għarfien fid-dawl ta' l-attivitajiet imsemmija fl-Artikolu 2(4) ta' dan il-Ftehim. Ma għandu jintalab l-ebda ħlas għall-għoti tad-drittijiet ta' aċċess għall-għarfien.

2.

Sakemm il-Partijiet ma jaqblux bejniethom mod ieħor, ir-regoli li ġejjin għandhom japplikaw għal xogħlijiet letterarji xjentifiċi mill-Partijiet: (a) meta Parti tippubblika data, informazzjoni u riżultati tekniċi u xjentifiċi maħluqa minn attivitajiet imwettqa skond dan il-Ftehim f'rivisti, artikli, rapporti u kotba, inklużi xogħlijiet awdjoviżivi u software, liċenzja dinjija, mhux esklużiva, irrevokabbli u mingħajr ħlas għandha tingħata lill-Parti l-oħra għat-traduzzjoni, l-adattament, it-trażmissjoni u t-tixrid pubbliku tax-xogħlijiet imsemmija; (b) il-kopji kollha tad-data u t-tagħrif bid-drittijiet ta' l-awtur li se jitqassmu lill-pubbliku u mħejjija skond din is-sezzjoni għandhom jindikaw l-ismijiet ta' l-awtur jew ta' l-awturi, sakemm awtur espressament ma jirrifjutax li jkun imsemmi. Il-kopji għandu jkollhom ukoll rikonoxximent viżibbli ċar ta' l-appoġġ kooperattiv tal-Partijiet.

3.

Sakemm il-Partijiet ma jaqblux bejniethom mod ieħor, ir-regoli li ġejjin għandhom japplikaw għall-informazzjoni tal-Partijiet li għandha tibqa' mistura: (a) meta tingħata lill-Parti l-oħra informazzjoni marbuta ma' attivitajiet imwettqa skond dan il-Ftehim, kull Parti għandha tidentifika l-informazzjoni li hija tixtieq li tibqa' mistura; (b) għall-finijiet speċifiċi ta' l-applikazzjoni ta' dan il-Ftehim, il-Parti destinatarja tista', bir-responsabbiltà tagħha, tikkomunika informazzjoni mistura lil korpi jew persuni taħt l-awtorità tagħha; (ċ) bil-permess miktub bil-quddiem tal-Parti li qed tagħti l-informazzjoni mistura, il-Parti destinatarja tista' xxerred dan it-tagħrif b'mod usa' milli kieku huwa permess mis-subparagrafu (b). Il-Partijiet għandhom jikkooperaw biex jiżviluppaw proċeduri biex jintalab u jingħata l-permess bil-miktub minn qabel għat-tixrid usa', u kull Parti għandha tagħti din l-approvazzjoni sa fejn jippermettu l-politika, ir-regolamenti u l-liġijiet domestiċi tagħha; (d) informazzjoni mistura mhux dokumentarja jew konfidenzjali li tingħata f'seminars jew laqgħat oħra tar-rappreżentanti tal-Partijiet organizzati skond dan il-Ftehim, jew informazzjoni li toħroġ mill-assenjazzjoni ta' l-istaff, l-użu ta' faċilitajiet jew azzjonijiet indiretti għandu jibqa' kunfidenzjali, meta d-destinatarju ta' din l-informazzjoni sigrieta jew ta' informazzjoni oħra kunfidenzjali jew privileġġata jkun ġie mgħarraf bil-karattru ta' kunfidenzjalità ta' l-informazzjoni qabel ma tkun ġiet ikkomunikat skond is-subparagrafu (a); (e) kull Parti għandha tassigura li informazzjoni sigrieta li takkwista skond is-subparagrafi (a) u (d) għandha tkun ikkontrollata kif stipulat f'dan il-Ftehim. Jekk waħda mill-Partijiet issir taf li mhux se tkun, jew tkun mistennija li ma tkunx kapaċi li timxi mad-dispożizzjonijiet kontra t-tixrid fis-subparagrafi (a) u (d), għandha minnufih tinforma lill-Parti l-oħra. Wara dan il-Partijiet għandhom jidħlu f'konsultazzjoni biex ifasslu kif għandhom jimxu.

---

(1)  ĠU L 355, 30.12.2002, p. 23.

(2)  ĠU L 335, 30.12.2002, p. 35.

---

ANNESS B

REGOLI FINANZJARJI LI JIRREGOLAW IL-KONTRIBUZZJONI TA' L-IŻVIZZERA IMSEMMIJA FL-ARTIKOLU 5 TA' DAN IL-FTEHIM

I.   Id-determinazzjoni tal-parteċipazzjoni finanzjarja

1.

Il-Kummissjoni għandha tikkomunika lill-Iżvizzera flimkien ma' materjal ta' sfond rilevanti mill-aktar fis possibbli u mhux aktar tard mill-1 ta' Settembru ta' kull sena: (a) l-ammonti fl-approprjazzjonijiet ta' l-impenn fid-dikjarazzjoni ta' l-infiq ta' l-abbozz tal-baġit preliminari ta' l-Unjoni Ewropea li jikkorrispondi għaż-żewġ Programmi ta' Qafas; (b) l-ammont stmat tal-kontribuzzjonijiet li ġejjin mill-abbozz ta' baġit preliminari, li jikkorrispondi għall-parteċipazzjoni ta' l-Iżvizzera fiż-żewġ Programmi ta' Qafas. Madankollu, bil-għan li jkunu ffaċilitati l-proċeduri baġitarji interni, is-servizzi tal-Kummissjoni għandhom jagħtu ċ-ċifri indikattivi korrispondenti mhux aktar tard mill-31 ta' Mejju ta' kull sena.

2.	Malli l-baġit ġenerali jkun adottat definittivament, il-Kummissjoni għandha tikkomunika lill-Iżvizzera l-ammonti msemmija hawn fuq fid-dikjarazzjoni ta' l-infiq li tikkorrispondi għall-parteċipazzjoni ta' l-Iżvizzera.

II.   Proċeduri ta' pagament

1.

Il-Kummissjoni għandha tippubblika, f'Ġunju u f'Novembru ta' kull sena finanzjarja, sejħa għall-fondi għall-Iżvizzera li jikkorrispondu għall-kontribuzzjoni tagħha skond dan il-Ftehim. Dawn is-sejħiet għall-fondi għandhom jagħmlu tajjeb rispettivament għall-ħlas ta' sitta minn kull tnax tal-kontribuzzjoni ta' l-Iżvizzera għal kull sejħa għall-fondi u mhux aktar tard minn 30 jum wara l-wasla tas-sejħa korrispondenti għall-fondi. Madankollu, fl-aħħar sena taż-żewġ Programmi ta' Qafas, l-ammont sħiħ tal-kontribuzzjoni ta' l-Iżvizzera għandu jitħallas mhux aktar tard minn 30 jum wara l-wasla tas-sejħa għall-fondi.

2.	Il-kontribuzzjonijiet ta' l-Iżvizzera għandhom jiġu espressi u mħallsa bl-Euro.

3.

L-Iżvizzera għandha tħallas il-kontribuzzjoni tagħha taħt dan il-Ftehim skond l-iskeda fil-paragrafu 1. Kull dewmien fil-ħlas iwassal għall-ħlas ta' imgħax bir-rata ugwali għar-rata offerta interbankarja ta' xahar (EURIBOR) kif tidher f'paġna 248 tat-Telerate. Din ir-rata għandha tiżdied b“1,5 punti perċentwali għal kull xahar ta' dewmien. Ir-rata miżjuda għandha tkun applikata għall-perjodu kollu ta' dewmien. Madankollu l-imgħax għandu jkun dovut biss jekk il-kontribuzzjoni titħallas iktar minn 30 jum wara d-dati fl-iskeda tal-pagament skond il-paragrafu 1.

4.

L-ispejjeż ta' l-ivvjaġġar magħmula mir-rappreżentanti u l-esperti Żvizzeri biex jieħdu sehem fix-xogħol tal-kumitati ta' riċerka u ta' dawk involuti fl-implimentazzjoni taż-żewġ Programmi ta' Qafas għandhom jiġu rimborżati mill-Kummissjoni fuq l-istess bażi bħal, u skond, il-proċeduri attwalment fis-seħħ għar-rappreżentanti u l-esperti ta' l-Istati Membri tal-Komunitajiet.

III.   Il-kundizzjonijiet għall-implimentazzjoni

1.	Il-kontribuzzjoni finanzjarja ta' l-Iżvizzera għaż-żewġ Programmi ta' Qafas f'konformità ma' l-Artikolu 5 ta' dan il-Ftehim għandha normalment tibqa” mhux mibdula għas-sena finanzjarja kkonċernata.

2.

Il-Kummissjoni, meta jingħalqu l-kontijiet ta' kull sena finanzjarja (n), fil-qafas tad-determinazzjoni tal-kont ta' dħul u nfiq, għandha tara li ssir ir-regolarizzazzjoni tal-kontijiet fil-konfront tal-parteċipazzjoni ta' l-Iżvizzera, filwaqt li tikkunsidra l-modifiki li jkunu saru, sew bi trasferiment, tħassir, it-tmexxija ta' ammonti minn kont għal ieħor, jew b'baġits supplementari u korrettivi matul is-sena finanzjarja.

Din ir-regolarizzazzjoni għandha ssir fiż-żmien ta' l-ewwel ħlas għas-sena n + 1. Madankollu, l-aħħar regolarizzazzjoni għandha ssir mhux aktar tard minn Lulju tar-raba' sena wara t-tmiem taż-żewġ Programmi ta' Qafas. Il-ħlas mill-Iżvizzera għandu jkun ikkreditat lill-programmi tal-Komunitajiet Ewropej bħala dħul għall-baġit allokat għal-linja tal-baġit approprjata fid-dikjarazzjoni tad-dħul tal-baġit ġenerali ta' l-Unjoni Ewropea.

IV.   Informazzjoni

1.

Sa mhux aktar tard mill-31 ta' Mejju ta' kull sena finanzjarja (n + 1), l-istqarrija ta' l-approprjazzjonijiet għaż-żewġ Programmi ta' Qafas, relatati għas-sena finanzjarja preċedenti (n), għandha tkun imħejjija u trażmessa lill-Iżvizzera bħala informazzjoni, skond il-format tal-kont ta' dħul u nfiq tal-Kummissjoni.

2.	Il-Kummissjoni għandha tgħaddi lill-Iżvizzera statistiċi u kull data finanzjarja ġenerali oħra marbuta ma' l-implimentazzjoni taż-żewġ Programmi ta' Qafas li hija għad-dispożizzjoni ta' l-Istati Membri.

---

ANNESS C

IL-KONTROLL FINANZJARJU TAL-PARTEĊIPANTI ŻVIZZERI FIL-PROGRAMMI TAL-KOMUNITÀ KOPERTI MINN DAN IL-FTEHIM

I.   Komunikazzjoni diretta

Il-Kummissjoni għandha tikkomunika direttament mal-parteċipanti fis-Seba’ Programmi ta’ Qafas tal-KE u l-Euratom istabbiliti fl-Iżvizzera u mas-sottokuntratturi tagħhom. Huma jistgħu jissottomettu direttament lill-Kummissjoni l-informazzjoni u d-dokumentazzjoni rilevanti kollha li huma mitlubin li jissottomettu fuq il-bażi ta’ l-istrumenti msemmija f’dan il-Ftehim u tal-ftehimiet għall-għotjiet u/jew kuntratti konklużi biex jimplimentawhom.

II.   Verifika

1.

B’konformità mar-Regolament tal-Kunsill (KE, Euratom) Nru 1605/2002 (1), emendat bir-Regolament tal-Kunsill (KE, Euratom) Nru 1995/2006 (2) u r-Regolament tal-Kummissjoni (KE, Euratom) Nru 2342/2002 (3) emendat mir-Regolament (KE, Euratom) 1248/2006 (4) tas-7 ta’ Awwissu 2006 u bir-regoli l-oħra msemmija f’dan il-Ftehim, il-ftehimiet għall-għotjiet u/jew kuntratti konklużi mal-parteċipanti fil-programmi stabbiliti fl-Iżvizzera jistgħu jwasslu għall-verifiki xjentifiċi, finanzjarji, teknoloġiċi jew oħrajn li jistgħu jitwettqu f’kull ħin fil-bini tal-parteċipanti u tas-sottokuntratturi tagħhom minn aġenti tal-Kummissjoni jew minn persuni oħrajn b’mandat mill-Kummissjoni.

2.

Aġenti tal-Kummissjoni u persuni oħra b’mandat tal-Kummissjoni għandu jkollhom aċċess xieraq għal siti, xogħlijiet u dokumenti u għal kull tagħrif meħtieġ bil-għan li jsiru dawn il-verifiki, inkluż ukoll f’forma elettronika. Dan id-dritt ta’ aċċess għandu jkun iddikjarat b’mod espliċitu fil-ftehimiet għall-għotjiet u/jew kuntratti konklużi biex jimplimentaw l-istrumenti msemmija f’dan il-Ftehim.

3.	Il-Qorti Ewropea tal-Verifika għandu jkollha l-istess drittijiet bħall-Kummissjoni.

4.	Il-verifiki jistgħu jsiru wara li s-Seba’ Programm ta’ Qafas tal-KE u l-Euratom jew dan il-Ftehim ikunu laħqu t-tmiem tagħhom, skond it-termini stipulati fil-ftehimiet għall-għotjiet u/jew kuntratti kkonċernati.

5.	L-Uffiċċju tal-Verifika Federali Żvizzeru għandu jkun infurmat bil-quddiem bil-verifiki li jsiru fit-territorju Żvizzeru. Din in-notifika Ma għandhiex titqies bħala prekondizzjoni skond il-liġi biex isiru dawn il-verifiki.

III.   Kontrolli fuq il-post

1.

Fi ħdan il-qafas ta’ dan il-Ftehim, il-Kummissjoni (OLAF) għandha tkun awtorizzata li tagħmel kontrolli fuq il-post u spezzjonijiet fit-territorju Żvizzeru, f’konformità mat-termini u l-kundizzjonijiet stipulati fir-Regolament tal-Kunsill (Euratom, KE) Nru 2185/96 (5) u r-Regolament (KE) Nru 1073/1999 tal-Parlament Ewropew u tal-Kunsill (6).

2.

Il-kontrolli fuq il-post u l-ispezzjonijiet għandhom ikunu mħejjija u mmexxija mill-Kummissjoni b’kollaborazzjoni mill-qrib ma’ l-Uffiċċju tal-Verifika Federali Żvizzeru jew ma’ awtoritajiet kompetenti oħra Żvizzeri maħtura mill-Uffiċċju tal-Verifika Federali Żvizzeru, li għandu jkun mgħarraf fi żmien xieraq dwar l-oġġett, l-għan u l-bażi tal-kontrolli u l-ispezzjonijiet, biex ikunu jistgħu jagħtu l-għajnuna kollha meħtieġa. Għal dan il-għan, l-uffiċjali ta’ l-awtoritajiet Żvizzeri kompetenti, jistgħu jipparteċipaw f’kontrolli u spezzjonijiet fuq il-post.

3.	Jekk l-awtoritajiet Żvizzeri kkonċernati jixtiequ, il-kontrolli u l-ispezzjonijiet fuq il-post jistgħu jsiru konġuntament mill-Kummissjoni u minnhom.

4.

Fejn il-parteċipanti fis-Seba’ Programm ta’ Qafas tal-KE u l-Euratom jirreżistu għall-kontroll jew spezzjoni fuq il-post, l-awtoritajiet Żvizzeri, b’azzjoni f’konformità mar-regoli nazzjonali, għandhom jagħtu lill-ispetturi tal-Kummissjoni l-assistenza li jkollhom bżonn biex ikunu jistgħu jagħmlu dmirhom fit-twettiq tal-kontroll jew l-ispezzjoni fuq il-post.

5.

Il-Kummissjoni għandha tirrapporta mill-aktar fis possibbli lill-Uffiċċju tal-Verifika Federali Żvizzeru kull fatt jew suspett marbut ma’ xi irregolarità li ssir taf biha waqt li jkunu għaddejjin kontrolli u spezzjonijiet fuq il-post. F’kull każ il-Kummissjoni għandha tinforma lill-awtorità imsemmija hawn fuq bir-riżultat ta’ dawn il-kontrolli u spezzjonijiet.

IV.   Informazzjoni u konsultazzjoni

1.	Bil-għan li dan l-Anness ikun implimentat kif xieraq, l-awtoritajiet kompetenti Żvizzeri u Komunitarji għandhom fuq bażi regolari jibdlu tagħrif u, fuq talba ta’ waħda mill-Partijiet, imexxu konsultazzjonijiet.

2.

L-awtoritajiet kompetenti Żvizzeri għandhom jinfurmaw lill-Kummissjoni mingħajr dewmien dwar kull fatt jew suspett li jsiru jafu bih marbut ma’ xi irregolarità b’rabta mal-konklużjoni u l-implimentazzjoni tal-ftehimiet għall-għotjiet u/jew kuntratti konklużi fl-applikazzjoni ta’ l-istrumenti msemmija f’dan il-Ftehim.

V.   Kunfidenzjalità

Informazzjoni kkomunikata jew miksuba b’kull forma skond dan l-Anness għandha tkun koperta mis-segretezza professjonali u mħarsa bl-istess mod kif informazzjoni simili hija mħarsa mil-liġi Żvizzera u mid-dispożizzjonijiet korrispondenti applikabbli għall-istituzzjonijiet tal-Komunità. Din l-informazzjoni Ma għandhiex tingħata lill-persuni ħlief dawk fl-istituzzjonijiet tal-Komunità jew fl-Istati Membri jew l-Iżvizzera li r-rwol tagħhom jitlob li jkunu jafuha u lanqas Ma għandha tintuża għal għanijiet ħlief dawk biex jiggarantixxu l-ħarsien effettiv ta’ l-interessi finanzjarji tal-Partijiet.

VI.   Miżuri u sanzjonijiet amministrattivi

Mingħajr preġudizzju għall-applikazzjoni tal-liġi kriminali Żvizzera, miżuri u sanzjonijiet amministrattivi jistgħu jiġu imposti mill-Kummissjoni f’konformità mar-Regolamenti (KE, Euratom) Nru 1605/2002, emendat bir-Regolament (KE, Euratom) Nru 1995/2006, u (KE, Euratom) Nru 2342/2002, emendat bir-Regolament (KE, Euratom) Nru 1248/2006, u bir-Regolament tal-Kunsill (KE, Euratom) Nru 2988/95 tat-18 ta’ Diċembru 1995 fuq il-ħarsien ta’ l-interessi finanzjarji tal-Komunitajiet Ewropej (7).

VII.   Rkupru u infurzar

Deċiżjonijiet meħuda mill-Kummissjoni skond is-Seba’ Programm ta’ Qafas tal-KE fl-ambitu ta’ dan il-Ftehim li jimponi obbligu ta’ ħlas ta’ flus fuq persuni li m’humiex Stati għandhom ikunu infurzabbli fl-Iżvizzera. L-ordni ta’ infurzar għandu jinħareġ, mingħajr aktar kontrolli mill-verifika ta’ l-awtentiċità ta’ l-att, mill-awtoritajiet maħtura mill-gvern Żvizzeru, li għandhom jinfurmaw b’dan lill-Kummissjoni. L-infurzar għandu jseħħ f’konformità mar-regoli ta’ proċedura Żvizzeri. Il-legalità tad-deċizjoni ta’ infurzar għandha tkun suġġetta għall-kontroll tal-Qorti tal-Ġustizzja tal-Komunitajiet Ewropej. Ġudizzji mogħtija mill-Qorti tal-Ġustizzja tal-Komunitajiet Ewropej skond klawżola ta’ arbitraġġ f’kuntratt taħt is-Seba’ Programm ta’ Qafas tal-KE u l-Euratom għandhom ikunu infurzabbli fuq l-istess termini.

---

(1)  ĠU L 248, 16.9.2002, p. 1.

(2)  ĠU L 390, 30.12.2006, p. 1.

(3)  ĠU L 357, 31.12.2002, p. 1.

(4)  ĠU L 227, 19.8.2006, p. 3.

(5)  ĠU L 292, 15.11.1996, p. 2.

(6)  ĠU L 136, 31.5.1999, p. 1.

(7)  ĠU L 312, 23.12.1995, p. 1.

---

Dikjarazzjoni konġunta tal-partijiet kontraenti dwar djalogu mill-qrib fid-dawl ta' strutturi ġodda fl-implimentazzjoni ta' l-Artikoli 169 u 171 at-Trattat tal-KE

Iż-żewġ Partijiet jiddikjaraw li, bil-għan li tkun żgurata l-implimentazzjoni xierqa ta' l-Artikolu 2.1 ta' dan il-Ftehim, il-Konfederazzjoni Żvizzera għandha tkun mgħarrfa fil-ħin kif xieraq fuq ix-xogħlijiet ta' tħejjija dwar l-istrutturi bbażati fuq l-Artikoli 169 u/jew 171 tat-Trattat tal-KE li għandhom ikunu implimentati skond is-Seba' Programmi ta' Qafas.

---

Dikjarazzjoni tal-Kunsill dwar l-attendenza Żvizzera fil-Kumitati

Il-Kunsill jaqbel li r-rappreżentanti ta' l-Iżvizzera jistgħu, sakemm l-argumenti jinteressaw lilhom, jattendu laqgħat bħala osservaturi

—	tal-Kumitati kollha stabbiliti taħt is-Seba’ Programmi ta' Qafas tal-KE u l-Euratom inkluż il-Kumitat għar-Riċerka Xjentifika u Teknika (CREST)

—	tal-Bord tal-Gvernaturi taċ-Ċentru Konġunt tar-Riċerka

Ir-rappreżentanti ta' l-Iżvizzera ma għandhomx ikunu preżenti meta dawn il-kumitati jivvutaw.

---

Dikjarazzjoni tal-Komunitajiet dwar it-Trattament ta' Riċerkaturi ta' l-UE fl-Iżvizzera taħt dan il-Ftehim

Il-Komunitajiet jistennew li l-Iżvizzera sa fejn hija tapplika limitu massimu ta' numru ta' permessi ta' residenza għal ċittadini ta' kull Stat Membru ta' l-Unjoni Ewropa, il-permessi ta' residenza maħruġa għar-riċerkaturi parteċipanti ma għandhomx jgħoddu fil-kalkolu ta' dan il-limitu massimu. Il-Komunitajiet barra minn hekk jistennew li r-riċerkaturi li qed jipparteċipaw fi proġetti u li huma impjegati miċ-Ċentru Konġunt tar-Riċerka tal-Komunitajiet jistgħu jibbenefikaw ugwalment mill-Artikolu 12(3) tal-Ftehim ta' Kooperazzjoni bejn l-Euratom u l-Konfederazzjoni Żvizzera fil-qasam tal-fużjoni termonukleari kkontrollata u l-fiżika tal-plażma (ĠU L 242/1 ta' l-4.9.1978).

---

Dikjarazzjoni tal-Gvern ta' l-Iżvizzera

Il-gvern ta' l-Iżvizzera jqis li d-dikjarazzjoni tal-Komunitajiet dwar it-trattament tar-riċerkaturi ta' l-UE fl-Iżvizzera taħt dan il-ftehim għandha tkun mingħajr preġudizzju għad-drittijiet u l-obbligi tal-Partijiet Kontraenti taħt il-Ftehim u taħt l-ordni ġuridiku Żvizzeru.

---

20.7.2007

MT

Il-Ġurnal Uffiċjali ta’ l-Unjoni Ewropea

L 189/26

---

FTEHIM

dwar Kooperazzjoni Xjentifika u Teknoloġika bejn il-Komunità Ewropea u l-Komunità Ewropea għall-Enerġija Atomika, fuq naħa, u l-Konfederazzjoni Żvizzera, fuq l-oħra

IL-KUNSILL TA' L-UNJONI EWROPEA,

li qed jaġixxi f'isem il-Komunità Ewropea,

u

L-KUMMISSJONI TAL-KOMUNITAJIET EWROPEJ

(minn hawn ‘il quddiem imsejħa “il-Kummissjoni”),

li qed taġixxi f'isem il-Komunità Ewropea għall-Enerġija Atomika,

minn hawn ‘il quddiem imsejħin kollettivament “il-Komunitajiet”,

fuq naħa,

u

L-KUNSILL FEDERALI ŻVIZZERU,

li qed jaġixxi f'isem il-Konfederazzjoni Żvizzera, minn hawn ‘il quddiem imsejħa “Żvizzera”,

fuq in-naħa l-oħra,

minn hawn ‘il quddiem imsejħin “il-Partijiet”,

Waqt li JIKKUNSIDRAW li r-relazzjoni mill-qrib bejn l-Iżvizzera u l-Komunitajiet hija ta' benefiċċju għall-Partijiet;

Waqt li JIKKUNSIDRAW l-importanza tar-riċerka xjentifika u teknoloġika għall-Komunitajiet u għall-Iżvizzera u l-interess reċiproku tagħhom li jikkooperaw f'dan il-qasam bil-għan li jsir użu aħjar mir-riżorsi u biex ma jkunx hemm duplikazzjoni mingħajr bżonn;

BILLI l-Iżvizzera u l-Komunitajiet bħalissa qed jimplimentaw programmi ta' riċerka f'oqsma ta' interess komuni;

BILLI l-Komunitajiet u l-Iżvizzera għandhom interess li jikkooperaw f'dawn il-programmi għall-benefiċċju reċiproku tagħhom;

Waqt li JIKKUNSIDRAW l-interess tal-Partijiet li jinkoraġġixxu l-aċċess reċiproku ta' l-entitajiet ta' riċerka tagħhom għal attivitajiet ta' riċerka u żvilupp teknoloġiku fl-Iżvizzera, fuq naħa, u għall-Programmi ta' Qafas tal-Komunitajiet għar-riċerka u l-iżvilupp teknoloġiku fuq l-oħra;

BILLI l-Komunità Ewropea għall-Enerġija Atomika u l-Iżvizzera laħqu Ftehim ta' Kooperazzjoni fl-1978 fil-qasam tal-fużjoni termonukleari kontrollata u l-fiżika tal-plażma (minn hawn ‘il quddiem imsejjaħ il-“Ftehim tal-Fużjoni”)

BILLI l-Partijiet laħqu Ftehim ta' Qafas fit-8 ta' Jannar 1986 għall-kooperazzjoni xjentifika u teknika, li daħal fis-seħħ fis-17 ta' Lulju 1987 (minn hawn ‘il quddiem imsejjaħ “Il-Ftehim ta' Qafas”);

Waqt li JIKKUNSIDRAW li l-Artikolu 6 tal-Ftehim ta' Qafas jgħid li l-kooperazzjoni maħsuba mill-Ftehim ta' Qafas għandha titwettaq permezz ta' ftehimiet xierqa;

BILLI fis-16 ta' Jannar 2004 il-Komunitajiet u l-Iżvizzera iffirmaw Ftehim għall-Kooperazzjoni Xjentifika u Teknoloġika (1), li kien provviżorjament applikat mill-1 ta' Jannar 2004 u li daħal fis-seħħ fis-16 ta' Mejju 2006;

Waqt li JIKKUNSIDRAW li l-Artikolu 9(2) tal-Ftehim imsemmi hawn fuq jipprovdi għat-tiġdid tal-Ftehim bil-ħsieb ta' parteċipazzjoni fi Programmi ta' Qafas multi-annwali ġodda għar-riċerka u l-iżvilupp teknoloġiku, skond kundizzjonijiet maqbulin reċiprokament;

BILLI s-Seba' Programm ta' Qafas tal-Komunità Ewropea għar-riċerka, żvilupp teknoloġiku u attivitajiet ta' dimostrazzjoni (2007 sa 2013) (minn hawn “il quddiem imsejjaħ is-‘Seba’ Programm ta' Qafas tal-KE”) ġie adottat b'Deċiżjoni Nru 1982/2006/KE (2) u r-Regolament (KE) Nru 1906/2006 (3) tal-Parlament Ewropew u tal-Kunsill, u bid-Deċiżjonijiet tal-Kunsill 2006/971/KE (4), 2006/972/KE (5), 2006/973 KE (6), 2006/974 KE (7) u 2006/975 KE (8) u s-Seba' Programm ta' Qafas tal-Komunità Ewropea għall-Enerġija Atomika (Euratom) għar-riċerka nukleari u attivitajiet ta' taħriġ (2007 sa 2011), u li jikkontribwixxi wkoll għall-ħolqien taż-Żona Ewropea tar-Riċerka kien adottat b'Deċiżjoni tal-Kunsill 2006/970/Euratom (9), ir-Regolament tal-Kunsill (Euratom) Nru 1908/2006 (10) u d-Deċiżjonijiet tal-Kunsill 2006/976/Euratom (11) u 2006/977/Euratom (12) (minn hawn “il quddiem imsejħin is-‘Seba’ Programmi ta' Qafas tal-KE u l-Euratom”);

BILLI mingħajr preġudizzju għad-dispożizzjonijiet tat-Trattati li jistabbilixxu l-Komunitajiet, dan il-Ftehim u kull attività li ssir taħtu bl-ebda mod ma taffettwa l-poteri fis-setgħa ta' l-Istati Membri li jkollhom attivitajiet bilaterali ma' l-Iżvizzera fl-oqsma tax-xjenza, it-teknoloġija, ir-riċerka u l-żvilupp, u li jilħqu, fejn xieraq, ftehimiet għal dak il-għan,

QABLU KIF ĠEJ;

Artikolu 1

Suġġett

1.   Il-forma u l-kundizzjonijiet tal-parteċipazzjoni Żvizzera fl-implimentazzjoni tas-Seba' Programm ta' Qafas tal-KE u l-Euratom kollu għandhom ikunu kif stipulati f'dan il-Ftehim, mingħajr preġudizzju għat-termini tal-Ftehim tal-Fużjoni.

Entitajiet ġuridiċi stabbiliti fl-Iżvizzera jistgħu jipparteċipaw fil-programmi speċifiċi kollha tas-Seba' Programm ta' Qafas tal-KE u l-Euratom.

2.   Entitajiet ġuridiċi Żvizzeri jistgħu jippartecipaw fl-attivitajiet taċ-Ċentru Konġunt tar-Riċerka tal-Komunitajiet, kemm-il darba din il-parteċipazzjoni m'hijiex koperta mill-paragrafu 1.

3.   Entitajiet ġuridiċi stabbiliti fil-Komunitajiet, inkluż iċ-Ċentru Konġunt tar-Riċerka, jistgħu jipparteċipaw fi programmi ta' riċerka u/jew proġetti fl-Iżvizzera fuq temi ekwivalenti għal dawk tal-programmi tas-Seba' Programm ta' Qafas tal-KE u l-Euratom.

4.   Għall-fini ta' dan il-Ftehim “entità ġuridika” tfisser kull persuna naturali jew ġuridika stabbilita skond il-liġi nazzjonali fil-post fejn tkun twaqqfet jew skond il-Liġi tal-Komunità, li għandha personalità ġuridika u li tkun intitolata li jkollha drittijiet u obbligi ta' kull għamla f'isimha. Din għandha tinkludi, inter alia, universitajiet, organizzazzjonijiet ta' riċerka, kumpaniji industrijali, inklużi intrapriżi żgħar u ta' daqs medju, u individwi.

Artikolu 2

Forom u mezzi ta' kooperazzjoni

Il-kooperazzjoni għandha tieħu l-forom li ġejjin:

1.

Il-parteċipazzjoni ta' entitajiet ġuridiċi stabbiliti fl-Iżvizzera fil-programmi speċifiċi kollha adottati mis-Seba' Programm ta' Qafas tal-KE u l-Euratom, f'konformità mat-termini u l-kundizzjonijiet stabbiliti fir-regoli għall-parteċipazzjoni ta' intrapriżi, ċentri ta' riċerka u universitajiet kemm fir-riċerka, żvilupp teknoloġiku u attivitajiet ta' dimostrazzjoni tal-Komunità Ewropea u f'attivitajiet ta' riċerka u taħriġ tal-Komunità Ewropea għall-Enerġija Atomika. Kemm-il darba l-Komunità tagħmel dispożizzjonijiet għall-implimentazzjoni ta' l-Artikoli 169 u 171 tat-Trattat li jistabbilixxi l-Komunità Ewropea l-Iżvizzera għandha titħalla tipparteċipa fl-istrutturi ġuridiċi maħluqa skond dawn id-dispożizzjonijiet suġġetta għar-regoli li jiġu adottati għat-twaqqif ta' dawn l-istrutturi ġuridiċi u kemm-il darba dawn ir-regoli jsiru applikabbli fl-Iżvizzera. Il-Kumitat għar-Riċerka Żvizzera/Komunitajiet għandu jiddeċiedi dwar l-applikabilità ta' dawn ir-regoli fl-Iżvizzera. Entitajiet ġuridiċi stabbiliti fl-Iżvizzera jkunu eliġibbli li jipparteċipaw f'azzjonijiet indiretti bbażati fuq l-Artikoli 169 u 171 tat-Trattat li jistabbilixxi l-Komunità Ewropea.

2.	Il-kontribuzzjoni finanzjarja mill-Iżvizzera għall-baġits tal-programmi adottati għall-implimentazzjoni tas-Seba' Programm ta' Qafas tal-KE u l-Euratom, kif imfisser fl-Artikolu 5(2).

3.

Il-parteċipazzjoni ta' entitajiet ġuridiċi stabbiliti fil-Komunitajiet fi programmi ta' riċerka Żvizzeri u/jew proġetti deċiżi mill-Kunsill Federali fuq temi ekwivalenti għal dawk tas-Seba' Programm ta' Qafas tal-KE u l-Euratom, f'konformità mat-termini u l-kundizzjonijiet stabbiliti fir-regolamenti rilevanti Żvizzeri u bil-qbil ta' l-imsieħba fil-proġett speċifiku u l-ġestjoni tal-programm Żvizzeru korrispondenti. Entitajiet ġuridiċi stabbiliti fil-Komunitajiet li jipparteċipaw fi programmi ta' riċerka u/jew proġetti Żvizzeri għandhom jagħmlu tajjeb għall-ispejjeż tagħhom, inkluż is-sehem relattiv tal-ġestjoni ġenerali u ta' l-ispejjeż amministrattivi tal-proġett.

4.

Minbarra l-għoti f'waqtu ta' tagħrif u dokumentazzjoni li tikkonċerna l-implimentazzjoni tas-Seba' Programm ta' Qafas tal-KE u l-Euratom u tal-programmi u/jew proġetti Żvizzeri, il-kooperazzjoni bejn il-Partijiet tista' tinkludi l-forom u l-mezzi li ġejjin: (a) skambji regolari ta' fehmiet dwar linji gwida ta' politika għar-riċerka u prijoritajiet u pjanijiet fl-Iżvizzera u l-Komunitajiet; (b) skambji ta' fehmiet dwar il-prospetti u l-iżvilupp ta' kooperazzjoni; (ċ) bdil f'waqtu ta' tagħrif fuq l-implimentazzjoni tal-programmi u l-proġetti ta' riċerka fl-Iżvizzera u fil-Komunitajiet u fuq ir-riżultati tax-xogħol imwettaq taħt dan il-Ftehim; (d) laqgħat konġunti; (e) żjajjar u skambji ta' riċerkaturi, inġiniera u tekniċi; (f) kuntatti regolari u segwiti bejn il-mexxejja ta' programmi jew proġetti fl-Iżvizzera u fil-Komunitajiet; (g) parteċipazzjoni ta' esperti f'seminars, konferenzi u laqgħat ta' ħidma.

Artikolu 3

Adattament

Il-kooperazzjoni tista' tiġi adattata u żviluppata f'kull ħin bi qbil reċiproku bejn il-Partijiet.

Artikolu 4

Drittijiet u obbligi dwar il-proprjetà intellettwali

1.   Suġġetti għall-Anness A u l-liġi applikabbli, entitajiet ġuridiċi stabbiliti fl-Iżvizzera li qed jipparteċipaw fil-programmi ta' riċerka tal-Komunitajiet, f'dak li għandu x'jaqsam mas-sjieda, l-isfruttament u t-tixrid ta' informazzjoni u proprjetà intellettwali li toħroġ minn din il-parteċipazzjoni, għandhom l-istess drittijiet u obbligi bħal entitajiet ġuridiċi stabbiliti fil-Komunitajiet. Din id-dispożizzjoni ma tapplikax għar-riżultati miksuba minn proġetti li bdew qabel l-applikazzjoni provviżorja ta' dan il-Ftehim.

2.   Suġġetti għall-Anness A u għal-liġi applikabbli, entitajiet ġuridiċi stabbiliti fil-Komunitajiet li qed jieħdu sehem fi programmi ta' riċerka u/jew proġetti Żvizzeri, kif jistipula l-Artikolu 2(3), f'dak li għandu x'jaqsam mas-sjieda, l-isfruttament u t-tixrid ta' informazzjoni u proprjetà intellettwali li toħroġ minn din il-parteċipazzjoni, għandhom l-istess drittijiet u obbligi bħal entitajiet ġuridiċi stabbiliti fl-Iżvizzera u li qed jipparteċipaw fil-programmi u/jew il-proġetti kkonċernati.

Artikolu 5

Dispożizzjonijiet finanzjarji

1.   Impenji li jkunu daħlu għalihom il-Komunitajiet taħt is-Seba' Programm ta' Qafas tal-KE u l-Euratom qabel l-applikazzjoni provviżorja ta' dan il-Ftehim – kif ukoll il-ħlasijiet li jirriżultaw minn dawn – ma għandhom iwasslu għal ebda kontribuzzjoni minn naħa ta' l-Iżvizzera. Il-kontribuzzjoni finanzjarja ta' l-Iżvizzera marbuta mal-parteċipazzjoni fl-implimentazzjoni tas-Seba' Programm ta' Qafas tal-KE u l-Euratom għandha tkun stabbilita fi proporzjon għal u b'żieda ma' l-ammont disponibbli kull sena fil-baġit ġenerali ta' l-Unjoni Ewropea għall-allokazzjonijiet maħsuba biex jaqdu l-obbligi finanzjarji tal-Kummissjoni li joħorġu mill-ħidma li trid titwettaq fil-forom meħtieġa għall-implimentazzjoni, għall-ġestjoni u t-twettiq tal-programmi u ta' l-attivitajiet koperti minn dan il-Ftehim.

2.   Il-fattur ta' proporzjonalità li jirregola l-kontribuzzjoni ta' l-Iżvizzera għas-Seba' Programm ta' Qafas tal-KE u l-Euratom, bl-eċċezzjoni tal-Programm tal-Fużjoni, għandu jinkiseb billi jkun stabbilit ir-rapport bejn il-prodott gross domestiku Żvizzeru, skond il-prezzijiet tas-suq, u s-somma tal-prodott gross domestiku, skond il-prezzijiet tas-suq, ta' l-Istati Membri ta' l-Unjoni Ewropea. Il-kontribuzzjoni Żvizzera għall-Programm tal-Fużjoni għandha tibqa' tiġi kkalkulata fuq il-bażi ta' l-aħħar dati statistiċi mill-Eurostat, disponibbli fil-mument tal-pubblikazzjoni ta' l-abbozz ta' baġit preliminari ta' l-Unjoni Ewropea għall-istess sena.

3.   Ir-regoli li jirregolaw il-kontribuzzjoni finanzjarja ta' l-Iżvizzera huma stipulati fl-Anness B.

Artikolu 6

Kumitat għar-Riċerka Żvizzera/Komunitajiet

1.   Il-Kumitat għar-Riċerka Żvizzera/Komunitajiet stabbilit fil-Ftehim ta' Qafas għandu jeżamina, jevalwa u jiżgura l-implimentazzjoni xieraq ta' dan il-Ftehim. Kwistjonijiet li jinqalgħu mill-implimentazzjoni jew l-interpretazzjoni ta' dan il-Ftehim għandhom jitressqu quddiem dan il-Kumitat.

2.   Il-Kumitat jista' jidentifika fuq talba ta' l-Iżvizzera reġjuni ta' l-Iżvizzera li jissodisfaw il-kriterji mniżżla fl-Artikolu 5(1) tar-Regolament tal-Kunsill (KE) Nru 1083/2006 (13) u għalhekk ikunu reġjuni eliġibbli biex jibbenefikaw minn azzjonijiet ta' riċerka skond il-Programm ta' Ħidma “Potenzjal ta' riċerka” taħt il-programm speċifiku “Kapaċitajiet”.

3.   Il-Kumitat jista' jiddeċiedi li jemenda r-referenzi għal atti tal-Komunità fl-Anness C.

Artikolu 7

Parteċipazzjoni

1.   Mingħajr preġudizzju għad-dispożizzjonijiet ta' l-Artikolu 4, entitajiet ġuridiċi stabbiliti fl-Iżvizzera u li qed jipparteċipaw fis-Seba' Programm ta' Qafas tal-KE u l-Euratom għandu jkollhom l-istess drittijiet u obbligi kontrattwali bħal entitajiet stabbiliti fil-Komunitajiet.

2.   Għal entitajiet ġuridiċi stabbiliti fl-Iżvizzera, it-termini u l-kundizzjonijiet applikabbli għas-sottomissjoni u l-evalwazzjoni ta' proposti u dawk għall-għoti u l-konklużjoni ta' ftehimiet ta' għotjiet u/jew kuntratti taħt il-programmi tal-Komunitajiet għandhom ikunu l-istess bħal dawk applikabbli għal ftehimiet għall-għotjiet u/jew kuntratti miftehma taħt l-istess programmi ma' entitajiet ġuridiċi stabbiliti fil-Komunitajiet.

3.   Entitajiet ġuridiċi stabbiliti fl-Iżvizzera għandhom ikunu eliġibbli għal self li l-EIB jagħti b'appoġġ għal għanijiet ta' riċerka stabbiliti taħt is-Seba' Programm ta' Qafas tal-KE.

4.   Għadd xieraq ta' esperti Żvizzeri għandhom jiġu kkunsidrati fl-għażla ta' evalwaturi jew arbitri taħt il-programmi ta' riċerka u ta' żvilupp teknoloġiku tal-Komunitajiet billi jiġu kkunsidrati l-ħiliet u l-għarfien xierqa għall-ħidmiet assenjati lilhom.

5.   Mingħajr preġudizzju għad-dispożizzjonijiet fl-Artikolu 1(3), l-Artikolu 2(3) u l-Artikolu 4(2) u għal regolamenti u regoli ta' proċedura eżistenti, entitajiet ġuridiċi stabbiliti fil-Komunitajiet jistgħu jipparteċipaw taħt termini u kundizzjonijiet ekwivalenti ta' l-imsieħba Żvizzeri fi programmi u/jew proġetti tal-programmi ta' riċerka Żvizzeri msemmija fl-Artikolu 2(3). L-awtoritajiet Żvizzeri jistgħu jagħmlu l-parteċipazzjoni fi proġett minn entità jew aktar stabbilita fil-Komunitajiet suġġetta għall-parteċipazzjoni konġunta ma' mill-inqas entità waħda Żvizzera.

Artikolu 8

Mobilità

Kull Parti għandha, f'konformità mar-regolamenti eżistenti u l-ftehimiet fis-seħħ, tiggarantixxi d-dħul u l-permanenza – safejn huwa indispensabbli għat-twettiq b'suċċess ta' l-attività kkonċernata – ta' għadd limitat ta' riċerkaturi tagħhom li qed jipparteċipaw, fl-Iżvizzera u fil-Komunitajiet, fl-attivitajiet koperti mill-Ftehim.

Artikolu 9

Reviżjoni u kollaborazzjoni futura

1.   Jekk il-Komunitajiet jiddeċiedu li jirrevedu jew jestendu l-programmi ta' riċerka tagħhom, dan il-Ftehim jista' jkun rivedut jew estiż skond kundizzjonijiet maqbula reċiprokament. Il-Partijiet għandhom jagħmlu skambju ta' informazzjoni u fehmiet dwar din ir-reviżjoni jew estensjoni, kif ukoll dwar kull materja oħra li taffettwa direttament jew indirettament il-kooperazzjoni ta' l-Iżvizzera fl-oqsma koperti mis-Seba' Programmi ta' Qafas tal-KE u l-Euratom. L-Iżvizzera għandha tiġi mgħarrfa bil-kontenut eżatt tal-programmi riveduti jew estiżi fi żmien ġimgħatejn mill-adozzjoni tagħhom mill-Komunitajiet. Fil-każ ta' din ir-reviżjoni jew estensjoni tal-programmi ta' riċerka, l-Iżvizzera tista' ttemm dan il-Ftehim billi tagħti avviż ta' sitt xhur. Il-Partijiet għandhom jagħtu avviż dwar l-intenzjoni li jtemmu jew jestendu dan il-Ftehim fi żmien tliet xhur wara l-adozzjoni tad-deċiżjoni tal-Komunitajiet.

2.   Jekk il-Komunitajiet jadottaw Programm ta' Qafas multi-annwali ġdid għar-riċerka u l-iżvilupp teknoloġiku, dan il-Ftehim jista' jiġi mġedded jew rinegozjat b'kundizzjonijiet maqbula flimkien bejn il-Partijiet. Il-Partijiet għandhom jibdlu tagħrif u fehmiet fuq it-tħejjija ta' dawn il-programmi jew attivitajiet ta' riċerka oħra preżenti u futuri permezz tal-Kumitat għar-Riċerka Żvizzera/Komunitajiet.

Artikolu 10

Rabta ma' ftehimiet internazzjonali oħra

1.   Id-dispożizzjonijiet ta' dan il-Ftehim għandhom japplikaw mingħajr preġudizzju għall-vantaġġi previsti minn ftehimiet internazzjonali oħra li jorbtu waħda mill-Partijiet u riżervati biss għal entitajiet ġuridiċi stabbiliti fit-territorji ta' dik il-Parti.

2.   Entità ġuridika stabbilita f'pajjiż ieħor assoċjat mas-Seba' Programm ta' Qafas (Pajjiż Assoċjat) igawdi mill-istess drittijiet u obbligi taħt dan il-Ftehim bħal entitajiet ġuridiċi li huma stabbiliti fi Stat Membru kemm-il darba l-Pajjiż Assoċjat li fih l-entità hija stabbilita wera l-qbil li jagħti lil entitajiet ġuridiċi mill-Iżvizzera l-istess drittijiet u obbligi.

Artikolu 11

Applikazzjoni territorjali

Dan il-Ftehim għandu japplika, fuq naħa, għat-territorji li fihom it-Trattati li jistabbilixxu l-Komunitajiet huma applikati u taħt il-kundizzjonijiet stipulati f'dawk it-Trattati u, fuq in-naħa l-oħra, għat-territorju ta' l-Iżvizzera.

Artikolu 12

Annessi

Annessi A, B u C għandhom ikunu parti integrali minn dan il-Ftehim.

Artikolu 13

Emenda u terminazzjoni

1.   Dan il-Ftehim għandu japplika għat-tul tas-Seba' Programmi ta' Qafas tal-KE u l-Euratom.

2.   Dan il-Ftehim jista' jiġi emendat biss bil-miktub bi qbil komuni bejn il-Partijiet. Din il-proċedura għad-dħul fis-seħħ ta' l-emendi għandha tkun l-istess bħall-proċedura applikabbli għal dan il-Ftehim.

3.   Kull Parti tista' ttemm dan il-Ftehim f'kull ħin, suġġetta għal notifika bil-miktub sitt xhur qabel.

4.   Proġetti u attivitajiet li jkunu għaddejjin meta jiġi mitmum u/jew fl-iskadenza ta' dan il-Ftehim għandhom jibqgħu għaddejjin sat-tmiem tagħhom skond il-kundizzjonijiet f'dan il-Ftehim. Il-Partijiet għandhom isolvu b'kunsens komuni kull konsegwenza oħra tat-terminazzjoni.

Artikolu 14

Dħul fis-seħħ u applikazzjoni provviżorja

1.   Dan il-Ftehim għandu jkun ratifikat jew konkluż mill-Partijiet f'konformità mar-regoli rispettivi tagħhom. Għandu jidħol fis-seħħ fid-dati ta' l-aħħar notifika tal-konklużjoni tal-proċeduri meħtieġa għal dan il-għan. Għandu jkun applikat provviżorjament mill-1 ta' Jannar 2007.

2.   Jekk waħda mill-Partijiet tinforma lill-oħra li ma tkunx se tikkonkludi dan il-Ftehim, huwa hawnhekk maqbul li:

—	il-Komunitajiet iroddu lura lill-Iżvizzera l-kontribuzzjoni tagħha għall-baġit ġenerali ta' l-Unjoni Ewropea, kif jitlob l-Artikolu 2(2),

—	madankollu, il-fondi impenjati mill-Komunitajiet għall-parteċipazzjoni minn entitajiet ġuridiċi stabbiliti fl-Iżvizzera f'azzjonijiet indiretti, inklużi l-ħlasijiet lura skond l-Artikolu 2(1), għandhom jitnaqqsu mill-Komunitajiet mill-ħlasijiet imsemmija hawn fuq,

—	proġetti u attivitajiet li jkunu bdew waqt l-applikazzjoni provviżorja u li jkunu għadhom għaddejjin fi żmien in-notifika msemmija hawn fuq għandhom jibqgħu għaddejjin sa ma jintemmu skond il-kundizzjonijiet stipulati f'dan il-Ftehim.

Dan il-Ftehim għandu jitfassal f'żewġ kopji fil-lingwi Bulgaru, Ċek, Daniż, Olandiż, Ingliż, Estonjan, Finlandiż, Franċiż, Ġermaniż, Grieg, Ungeriż, Taljan, Latvjan, Litwan, Malti, Polakk, Portugiż, Rumen, Slovakk, Sloven, Spanjol u Svediż, u kull wieħed minn dawk it-testi jkun ugwalment awtentiku.

---

(1)  ĠU L 32, 5.2.2004, p. 22.

(2)  ĠU L 412, 30.12.2006, p. 1.

(3)  ĠU L 391, 30.12.2006, p. 1.

(4)  ĠU L 400, 30.12.2006, p. 86. Il-verżjoni kkoreġuta ppubblikata fil-ĠU L 54, 22.2.2007, p. 30.

(5)  ĠU L 400, 30.12.2006, p. 242. Il-verżjoni kkoreġuta ppubblikata fil-ĠU L 54, 22.2.2007, p. 81.

(6)  ĠU L 400, 30.12.2006, p. 269. Il-verżjoni kkoreġuta ppubblikata fil-ĠU L 54, 22.2.2007, p. 91.

(7)  ĠU L 400 30.12.2006, p. 298. Il-verżjoni kkoreġuta ppubblikata fil-ĠU L 54, 22.2.2007, p. 101.

(8)  ĠU L 400, 30.12.2006, p. 367. Il-verżjoni kkoreġuta ppubblikata fil-ĠU L 54, 22.2.2007, p. 126.

(9)  ĠU L 400, 30.12.2006, p. 60. Il-verżjoni kkoreġuta ppubblikata fil-ĠU L 54, 22.2.2007, p. 21.

(10)  ĠU L 400, 30.12.2006, p. 1. Il-verżjoni kkoreġuta ppubblikata fil-ĠU L 54, 22.2.2007, p. 4.

(11)  ĠU L 400, 30.12.2006, p. 403. Il-verżjoni kkoreġuta ppubblikata fil-ĠU L 54, 22.2.2007, p. 139.

(12)  ĠU L 400, 30.12.2006, p. 433. Il-verżjoni kkoreġuta ppubblikata fil-ĠU L 54, 22.2.2007, p. 149.

(13)  ĠU L 210, 31.7.2006, p. 25.

20.7.2007

MT

Il-Ġurnal Uffiċjali ta’ l-Unjoni Ewropea

L 189/38

---

ATT FINALI

Il-Plenipotenzjarji

tal-KOMUNITÀ EWROPEA

u

tal-KONFEDERAZZJONI ŻVIZZERA,

f'laqgħa fil- … fi … għall-iffirmar tal-Ftehim għall-Kooperazzjoni Xjentifika u Teknoloġika bejn il-Komunità Ewropea u l-Komunità Ewropea għall-Enerġija Atomika fuq naħa, u l-Konfederazzjoni Żvizzera fuq l-oħra, adottaw id-Dikjarazzjoni Konġunta li ġejja, li hija mehmuża ma' dan l-Att Finali:

Dikjarazzjoni Konġunta tal-Partijiet Kontraenti dwar djalogu mill-qrib fid-dawl ta' strutturi ġodda li jimplimentaw l-Artikoli 169 u 171 tat-Trattat tal-KE.

Huma kkunsidraw ukoll id-Dikjarazzjonijiet li ġejjin, li huma mehmuża ma' dan l-Att Finali:

Dikjarazzjoni tal-Kunsill dwar l-attendenza Żvizzera għall-kumitati.

Dikjarazzjoni tal-Komunitajiet dwar it-trattament fl-Iżvizzera tar-riċerkaturi ta' l-UE skond dan il-Ftehim.