EUR-Lex Access to European Union law
This document is an excerpt from the EUR-Lex website
Document 32005D0636
2005/636/EC: Commission Decision of 1 September 2005 concerning a financial contribution by the Community towards a baseline survey on the prevalence of Salmonella spp. in broiler flocks of Gallus gallus to be carried out in the Member States (notified under document number C(2005) 3276)
2005/636/KE: Deċiżjoni tal-Kummissjoni ta’ l- 1 ta’ Settembru 2005 dwar kontribut finanzjarju mill-Komunità lejn servej ta' bażi dwar il-prevalenza tas-Salmonella fil-qatgħat tal-brojlers ta’ Gallus gallus li jrid jitwettaq fl-Istati Membri (notifikata taħt dokument numru C(2005) 3276)
2005/636/KE: Deċiżjoni tal-Kummissjoni ta’ l- 1 ta’ Settembru 2005 dwar kontribut finanzjarju mill-Komunità lejn servej ta' bażi dwar il-prevalenza tas-Salmonella fil-qatgħat tal-brojlers ta’ Gallus gallus li jrid jitwettaq fl-Istati Membri (notifikata taħt dokument numru C(2005) 3276)
ĠU L 228, 3.9.2005, p. 14–18
(ES, CS, DA, DE, ET, EL, EN, FR, IT, LV, LT, HU, NL, PL, PT, SK, SL, FI, SV)
ĠU L 349M, 12.12.2006, p. 319–323
(MT)
In force
12.12.2006 |
MT |
Il-Ġurnal Uffiċjali ta’ l-Unjoni Ewropea |
319 |
DEĊIŻJONI TAL-KUMMISSJONI
ta’ l-1 ta’ Settembru 2005
dwar kontribut finanzjarju mill-Komunità lejn servej ta' bażi dwar il-prevalenza tas-Salmonella fil-qatgħat tal-brojlers ta’ Gallus gallus li jrid jitwettaq fl-Istati Membri
(notifikata taħt dokument numru C(2005) 3276)
(2005/636/KE)
IL-KUMMISSJONI TAL-KOMUNITAJIET EWROPEJ,
Wara li kkunsidrat it-Trattat li jistabbilixxi l-Komunità Ewropea,
Wara li kkunsidrat id-Deċiżjoni tal-Kunsill 90/424/KEE tas-26 ta’ Ġunju 1990 dwar in-nefqa fil-kamp veterinarju (1), u b’mod partikolari l-Artikolu 20 tagħha,
Billi:
(1) |
Billi skond id-Deċiżjoni 90/424/KEE, il-Komunità għandha tieħu jew tassisti lill-Istati Membri ħalli jieħdu l-miżuri tekniċi u xjentifiċi neċessarji għall-iżvilupp tal-leġiżlazzjoni veterinarja u għall-iżvilupp ta’ l-edukazzjoni jew it-taħriġ veterinarju. |
(2) |
Skond l-Artikolu 4 tar-Regolament (KE) Nru 2160/2003 tal-Parlament Ewropew u tal-Kunsill tas-17 ta' Novembru 2003 dwar il-kontroll tas-salmonella u ta’ aġenti żoonotiċi speċifikati oħrajn li jinġarru ma’ l-ikel (2), għandha tiġi stabbilita mira Komunitarja għat-tnaqqis tal-prevalenza tas-salmonella f’popolazzjonijiet ta’ qatgħat ta’ brojlers ta’ Gallus gallus (“brojlers”) sa tmiem l-2006. |
(3) |
Sabiex tiġi ffissata l-mira Komunitarja, jeħtieġ li tkun disponibbli data komparabbli dwar il-prevalenza tas-salmonella fil-popolazzjonijiet tal-brojlers fl-Istati Membri. Dan it-tip ta’ informazzjoni mhix disponibbli u għaldaqstant għandu jsir servej speċjali sabiex tiġi mmoniterjata l-prevalenza tas-salmonella fil-brojlers matul perjodu xieraq sabiex jiġu kkunsidrati l-varjazzjonijiet staġjonali possibbli. |
(4) |
Is-servej għandu jipprovdi l-informazzjoni teknika neċessarja għall-iżvilupp tal-leġiżlazzjoni veterinarja Komunitarja. B’kunsiderazzjoni ta' l-importanza tal-ġbir tad-data komparabbli dwar il-prevalenza tas-salmonella fil-brojlers fl-Istati Membri, dawn għandhom jingħataw kontribut finanzjarju mill-Komunità għall-implimentazzjoni tar-rekwiżiti speċifiċi tas-servej. Jixraq li 100 % ta' l-ispejjeż imġarrba għat-testijiet fil-laboratorju jiġu rimborżati soġġetti għal limitu ta’ nfiq. L-ispejjeż l-oħra kollha bħat-teħid tal-kampjuni, l-ivvjaġġar, l-amministrazzjoni, eċċ. m'għandhom ikunu eliġibbli għal ebda kontribut finanzjarju Komunitarju. |
(5) |
Għandu jingħata kontribut mill-Komunità dment li s-servej jitwettaq skond id-dispożizzjonijiet relevanti tal-liġi Komunitarja u suġġett li jkun konformi ma' ċerti kundizzjonijiet oħra. |
(6) |
Jingħata kontribut finanzjarju mill-Komunità sakemm l-azzjonijiet previsti jitwettqu b'mod effettiv u jekk l-awtoritajiet ifornu l-informazzjoni kollha neċessarja fil-limiti ta' żmien previsti. |
(7) |
Jeħtieġ li tiġi ċċarata r-rata li għandha tintuża għall-konverżjoni ta' l-applikazzjonijiet għall-ħlas imressqa fil-muniti nazzjonali kif imfisser fl-Artikolu 1(d) tar-Regolament tal-Kunsill (KE) Nru 2799/98 tal-15 ta' Diċembru 1998 li jistabbilixxi arranġamenti agromonetarji għall-euro (3). |
(8) |
Il-miżuri previsti f’din id-Deċiżjoni huma skond l-opinjoni tal-Kumitat Permanenti dwar il-Katina Alimentari u s-Saħħa ta’ l-Annimali, |
ADOTTAT DIN ID-DEĊIŻJONI:
Artikolu 1
L-għan tas-servej u dispożizzjonijiet ġenerali
1. Għandu jitwettaq servej sabiex tiġi evalwata l-prevalenza tas-Salmonella spp. madwar il-Komunità fil-qatgħat ta’ brojlers ta’ Gallus gallus (“brojlers”) li jittieħdu l-kampjuni minnhom tliet ġimgħat qabel jinħarġu mill-istabbiliment agrikolu magħżul sabiex jittieħdu għall-qatla (“is-servej”).
2. Ir-riżultati tas-servej għandhom jintużaw sabiex jiġu ffissati l-miri Komunitarji kif previst fl-Artikolu 4 tar-Regolament (KE) Nru 2160/2003.
3. Is-servej għandu jkopri perjodu ta’ sena li jibda mill-1 ta’ Ottubru 2005.
4. Għall-finijiet ta’ din id-Deċiżjoni, “l-awtorità kompetenti” għandha tkun l-awtorità jew l-awtoritajiet ta’ Stat Membru kif iddeżinjat skond l-Artikolu 3 tar-Regolament (KE) Nru 2160/2003.
Artikolu 2
Qafas għat-teħid tal-kampjuni
1. It-teħid tal-kampjuni għall-finijiet tas-servej għandu jiġi organizzat mill-Istati Membri u għandu jitwettaq mill-1 ta' Ottubru 2005 fi stabbilimenti agrikoli li fihom talanqas 5 000 tajra. F’kull stabbiliment agrikolu magħżul, għandhom jittieħdu l-kampjuni minn qatgħa waħda ta’ brojlers ta’ l-età adatta.
Madankollu, f’pajjiżi fejn in-numru kkalkulat ta’ qatgħat li għandhom jittieħdu l-kampjuni minnhom jisboq in-numru ta’ stabbilimenti agrikoli disponibbli b’talanqas 5 000 tajra, sabiex jinkiseb in-numru kkalkulat ta’ qatgħat, jistgħu jittieħdu l-kampjuni minn massimu ta’ erba’ qatgħat fl-istess stabbiliment agrikolu. Fejn possibbli, kull waħda mill-qatgħat addizzjonali minn stabbiliment agrikolu wieħed għandha tkun minn maqjel tal-brojlers differenti u l-kampjuni għandhom jittieħdu fi staġuni differenti.
Jekk in-numru ta’ qatgħat li minnhom iridu jittieħdu l-kampjuni xorta ma jkunx biżżejjed, jistgħu jintgħażlu wkoll stabbilimenti agrikoli progressivament iżgħar sakemm jinkisbu, fejn possibbli, talanqas 154 qatgħa.
Jekk in-numru ta’ qatgħat li minnhom iridu jittieħdu l-kampjuni xorta ma’ jkunx biżżejjed, jistgħu jittieħdu l-kampjuni minn aktar minn erba' qatgħat fl-istess stabbiliment agrikolu, b'konċentrazzjoni fuq l-akbar stabbilimenti agrikoli.
Fil-każ ta’ pajjiżi fejn anqas minn 80 % tat-tjur jinżammu fi stabbilimenti agrikoli b’aktar minn 5 000 tiġieġa tal-brojler, stabbilimenti agrikoli progressivament iżgħar jistgħu jintgħażlu mill-bidu.
2. It-teħid tal-kampjuni għandu jsir mill-awtorità kompetenti jew taħt is-superviżjoni tagħha.
Artikolu 3
Id-detezzjoni tas-Salmonella spp u l-klassifikazzjoni abbażi tas-serotip ta’ l-iżolati relevanti
1. Id-detezzjoni tas-Salmonella spp u l-klassifikazzjoni abbażi tas-serotip ta’ l-iżolati relevanti għandhom jitwettqu f'laboratorji referenzjarji nazzjonali għas-salmonella.
Madankollu, fejn xi laboratorju referenzjarju nazzjonali ma jkunx jiflaħ għat-twettiq ta' l-analiżi kollha jew jekk dan ma jkunx il-laboratorju li rutinament iwettaq id-detezzjoni, l-awtoritajiet kompetenti jistgħu jinnominaw numru limitat ta' laboratorji oħrajn li jkunu involuti fil-kontrolli uffiċjali tas-salmonella ħalli dawn iwettqu l-analiżi.
Dawk il-laboratorji għandu jkollhom esperjenza ppruvata fl-użu tal-metodu ta' detezzjoni rekwiżit, għandhom jimplimentaw sistema ta' assikurazzjoni tal-kwalità li tkun konformi ma' l-istandard ta' l-ISO 17025, u għandhom ikunu sorveljati mil-laboratorju referenzjarju nazzjonali.
2. Id-detezzjoni tas-Salmonella spp. għandha titwettaq skond il-metodu rrakkomandat mil-laboratorju referenzjarju Komunitarju għas-salmonella.
3. Il-klassifikazzjoni abbażi tas-serotip ta’ l-iżolati relevanti għandha titwettaq skond l-iskema Kaufmann-White.
Artikolu 4
Il-ġbir tad-data, l-evalwazzjoni u r-rappurtar
1. L-awtorità nazzjonali responsabbli mit-tħejjija tar-rapport nazzjonali annwali skond l-Artikolu 9(1) tad-Direttiva 2003/99/KE (4) għandha tiġbor u tevalwa r-riżultati miksuba skond l-Artikolu 3 ta' din id-Deċiżjoni abbażi tal-qafas għat-teħid tal-kampjuni msemmi fl-Artikolu 2 tagħha, u għandha tirrapporta d-data neċessarja kollha u l-evalwazzjoni tagħha lill-Kummissjoni.
2. Id-data relevanti miġbura għall-finijiet tas-servej għandha tiġi fornuta mill-Istati Membri lill-Awtorità Ewropea għas-Sigurtà Alimentari, fuq talba tal-Kummissjoni.
3. Id-data u r-riżultati kumplessivi nazzjonali għandhom ikunu disponibbli pubblikament f’għamla li tiżgura l-kunfidenzjalità.
Artikolu 5
Speċifikazzjonijiet tekniċi
Il-kompiti u l-attivitajiet imsemmija fl-Artikoli 2, 3 u 4 ta’ din id-Deċiżjoni għandhom jitwettqu b’mod konformi ma’ l-ispeċifikazzjonijiet tekniċi ppreżentati fil-laqgħa tal-Kumitat Permanenti dwar il-Katina Alimentari u s-Saħħa ta’ l-Annimali tad-19 ta' Lulju 2005 kif ippubblikati fil-websajt tal-Kummissjoni [http://europa.eu.int/comm/food/food/biosafety/salmonella/index_ en.htm].
Artikolu 6
L-ambitu tal-kontribut finanzjarju Komunitarju
1. Il-Komunità għandha tipprovdi kontribut finanzjarju għall-ispejjeż imġarrba mill-Istati Membri għall-ittestjar fil-laboratorju, jiġifieri d-detezzjoni batterjoloġika tas-Salmonella spp. u l-klassifikazzjoni abbażi tas-serotip ta' l-iżolati relevanti.
2. Il-kontribut finanzjarju massimu mill-Komunità għandu jkun ta’ EUR 20 għal kull test f’dik li hija detezzjoni batterjoloġika tas-Salmonella spp. u EUR 30 f'dik li hija klassifikazzjoni abbażi tas-serotip ta' l-iżolati relevanti.
3. Il-kontribut finanzjarju mill-Komunità m’għandux jaqbeż l-ammonti ffissati fl-Anness I għal tul il-perjodu tas-servej.
Artikolu 7
Il-kundizzjonijiet għall-għotja ta’ kontribut finanzjarju Komunitarju
1. Il-kontribut finanzjarju previst fl-Artikolu 6 għandu jingħata lill-Istati Membri sakemm is-servej ikun implimentat skond id-dispożizzjonijiet relevanti tal-liġi Komunitarja, inklużi r-regoli dwar il-kompetizzjoni u l-għoti ta' kuntratti pubbliċi, u suġġett għall-konformità mal-kundizzjonijiet li ġejjin:
a) |
il-liġijiet, ir-regolamenti u d-dispożizzjonijiet amministrattivi meħtieġa sabiex jiġi implimentat is-servej għandhom jidħlu fis-seħħ sa l-1 ta' Ottubru 2005; |
b) |
għandu jingħadda rapport dwar il-progress li jkopri l-ewwel tliet xhur tas-servej sal-31 ta’ Jannar 2006; |
c) |
għandu jingħadda rapport finali sa mhux aktar tard mill-31 ta’ Ottubru 2006 dwar l-eżekuzzjoni teknika tas-servej, flimkien ma’ evidenza ta’ verifika li turi l-ispejjeż imġarrba u r-riżultati miksuba matul il-perjodu mill-1 ta' Ottubru 2005 sat-30 ta' Settembru 2006; l-evidenza ta' l-ispejjeż magħmula għandha talanqas tinkludi l-informazzjoni stipulata fl-Anness II; |
d) |
is-servej għandu jiġi implimentat b’mod effettiv. |
2. 50 % ta' l-ammont totali msemmi fl-Anness I jista' jitħallas bil-quddiem fuq rikjesta ta' l-Istat Membru kkonċernat.
3. In-nuqqas ta' konformità mal-limitu ta' żmien fil-paragrafu 1(c) għandu jwassal għal tnaqqis progressiv tal-kontribut finanzjarju li jkollu jitħallas, li jammonta sa 25 % ta’ l-ammont totali sal-15 ta' Novembru 2006, 50 % sa l-1 ta’ Diċembru 2006 u 100 % sal-15 ta’ Diċembru 2006.
Artikolu 8
Ir-rata tal-kambju għal applikazzjonijiet f’muniti nazzjonali
Ir-rata tal-kambju għal applikazzjonijiet sottomessi f’muniti nazzjonali f’xahar “n” għandha tkun dik għall-10 jum tax-xahar “n+1” jew ta’ l-ewwel jum qabel dak il-jum li għalih tkun ikkwotata rata.
Artikolu 9
Applikazzjoni
Din id-Deċiżjoni għandha tapplika mill-1 ta’ Ottubru 2005.
Artikolu 10
Id-destinatarji
Din id-Deċiżjoni hija indirizzata lill-Istati Membri.
Magħmul fi Brussell, nhar l-1 ta’ Settembru 2005.
Għall-Kummissjoni
Markos KYPRIANOU
Membru tal-Kummissjoni
(1) ĠU L 224, 18.8.1990, p. 19. Deċiżjoni kif emendata l-aħħar mir-Regolament (KE) Nru 806/2003 (ĠU L 122, 16.5.2003, p. 1).
(2) ĠU L 325, 12.12.2003, p. 1. Regolament kif l-aħħar emendat mir-Regolament tal-Kummissjoni (KE) Nru 1003/2005 (ĠU L 170, 1.7.2005, p. 12).
(3) ĠU L 349, 24.12.1998, p. 1.
(4) ĠU L 325, 12.12.2003, p. 31.
ANNESS I
Il-kontribut finanzjarju Komunitarju massimu lill-Istati Membri
(€) |
|
Stat Membru |
Ammont |
Il-Belġju — BE |
53 940 |
Ir-Repubblika Ċeka — CZ |
50 605 |
Id-Danimarka — DK |
46 545 |
Il-Ġermanja — DE |
54 085 |
L-Estonja — EE |
22 330 |
Il-Greċja — EL |
54 375 |
Spanja — ES |
55 390 |
Franza — FR |
55 535 |
L-Irlanda — IE |
49 300 |
L-Italja — IT |
54 665 |
Ċipru — CY |
45 675 |
Il-Latvija — LV |
22 330 |
Il-Litwanja — LT |
22 330 |
Il-Lussemburgu — LU |
5 800 |
L-Ungerija — HU |
50 605 |
Malta — MT |
22 330 |
L-Olanda — NL |
54 085 |
L-Awstrija — AT |
51 620 |
Il-Polonja — PL |
55 245 |
Il-Portugall — PT |
54 085 |
Is-Slovenja — SI |
51 040 |
Is-Slovakkja — SK |
44 660 |
Il-Finlandja — FI |
45 530 |
L-Iżvezja — SE |
44 080 |
Ir-Renju Unit — UK |
54 375 |
Totali |
1 120 560 |