32001R1116

Ir-Regolament tal-Kunsill (KE) Nru 1116/2001

tal-5 ta' Ġunju 2001

li jemenda r-Regolament (KEE) Nru 3677/90 li jistabilixxi miżuri li għandhom jittieħdu sabiex jiskoraġġixxu d-diverżjoni ta' ċerti sustanzi lejn il-manifattura illegali ta' drogi narkotiċi u sustanzi psikotropiċi

IL-KUNSILL TA' L-UNJONI EWROPEA,

Wara li kkunsidra t-Trattat li jistabbilixxi l-Komunità Ewropea, u partikolarment l-Artikolu 133 tiegħu,

Wara li kkunsidra l-proposta mill-Kummissjoni,

Billi:

(1) Ir-Regolament (EEC) Nru 3677/90 [1] jipprovdi l-miżuri li għandhom jittieħdu biex jiskoraġġixxu d-devjazzjoni ta' ċerti sustanzi għall-manifattura illeċita ta' drogi narkotiċi u sustanzi psikotropiċi.

(2) Il-miżuri applikabbli għaż-żejt sassafrass huma fil-preżent interpretati b'modi differenti fil-Komunità, peress li huwa meqjus bħala taħlita li fiha s-"safrole" u huwa għalhekk kontrollat f'xi Stati Membri, fil-waqt li fi Stati Membri oħra huwa meqjus bħala prodott naturali mhux suġġett għall-kontrolli. It-tidħil ta' referenza għall-prodotti naturali fit-tifsira ta' sustanza skedata għandu jirriżolvi din id-diskrepanza u għalhekk jippermetti li kontrolli jiġu applikati għaż-żejt sassafrass. Prodotti naturali biss li minnhom sustanzi skedati jistgħu jiġu faċilment estratti għandhom jiġu koperti b'din it-tifsira.

(3) It-twaqqif ta' proċedura ta' koperazzjoni hija maħsuba fil-pjan ta' azzjoni ta' kontra d-droga ta' l-Unjoni Ewropea, approvata mill-Kunsill Ewropew f'Santa Maria da Feira tad-19 u l-20 ta' Ġunju 2000. Biex tiġi sostnuta il-koperazzjoni bejn l-awtoritajiet fl-Istati Membri u l-industrija tal-kimika, b'mod partikolari fir-rigward ta' sustanzi li, għalkemm mhux koperti bir-regoli dwar prekursuri, jistgħu jintużaw fil-manifattura illeċita ta' drogi sintetiċi, il-Kummissjoni għandha tingħata r-responsabbiltà li tħejji linji ta' gwida biex tgħin dik l-industrija.

(4) Il-miżuri meħtieġa għall-implimentazzjoni tar-Regolament (KEE) Nru 3677/90 għandhom jiġu adottati skond id-Deċiżjoni tal-Kunsill 1999/468/KE tat-28 ta' Ġunju 1999 li tipprovdi l-proċeduri għall-eżerċizzju tas-setgħat ta' implimentazzjoni mogħtija lill-Kummissjoni [2].

(5) Ir-Regolament (KEE) Nru 3677/90 għandu jiġi hekk emendat.

ADOTTA DAN IR-REGOLAMENT:

Artikolu 1

Ir-Regolament (KEE) Nru 3677/90 huwa emendat kif ġej:

1. fl-Artikolu 1(2), paragrafu (a) għandu jiġi mibdul b'dan li ġej:

"(a) "sustanza skedata" tfisser kull sustanza elenkata fl-Anness, inklużi taħlitiet u prodotti naturali li fihom dawk is-sustanzi. Dan jeskludi mediċini, prodotti farmaċewtiċi, taħlitiet, prodotti naturali jew prodotti oħra li jkun fihom sustanzi skedati li huma mħallta b'mod li dawk is-sustanzi ma jkunux jistgħu jintużaw jew jiġu rkuprati faċilment b'mezzi faċilment applikabbli jew ekonomikament vijabbli;"

2. għandu jiddaħħal l-Artikolu li ġej:

"L-Artikolu 3a

Linji ta' gwida

1. Sabiex tiġi faċilitata l-koperazzjoni bejn l-awtoritajiet ta' l-Istati Membri u l-industrija tal-kimika b'mod partikolari fir-rigward ta' sustanzi mhux skedati komunement użati fil-manifattura illeċita ta' drogi narkotiċi u sustanzi psikotropiċi, il-Kummissjoni għandha, waqt li taġixxi skond il-proċedura ta' amministrazzjoni msemmija fl-Artikolu 10(2), tħejji u taġġorna l-linji ta' gwida biex tgħin lill-industrija tal-kimika.

2. Il-linji ta' gwida għandhom jipprovdu, b'mod partikolari:

(a) tagħrif ta' kif wieħed jagħraf u jinnotifika transazzjonijiet suspettużi;

(b) lista regolarment aġġornata ta' sustanzi mhux skedati komunement użati fil-manifattura illeċita ta' drogi narkotiċi u sustanzi psikotropiċi, biex jippermettu lill-industrija li timmonitorja fuq bażi volontarja n-negozju f'dawn is-sustanzi;

(ċ) tagħrif ieħor li jista’ jitqies utli.

3. L-Istati Membri għandhom jiżguraw li l-linji ta' gwida u l-lista msemmija fil-paragrafu 2(b) huma regolarment imxerrda b'mod meqjus li hu addattat mill-awtoritajiet kompetenti skond l-oġġettivi tal-linji ta' gwida.";

3. l-Artikolu li ġej għandu jiddaħħal:

"L-Artikolu 9a

Il-miżuri meħtieġa għall-implimentazzjoni ta' dan ir-Regolament li jirrelataw mal-kwistjonijiet imsemmija hawn taħt għandhom jiġu adottati skond il-proċedura ta' amministrazzjoni msemmija fl-Artikolu 10(2):

(a) il-kalkolu tal-kwantitajiet tas-sustanzi skedati elenkati fil-Kategorija 3 u l-identifikazzjoni tat-taħlitiet li fihom sustanzi skedati elenkati fil-Kategorija 3 skond it-tieni subparagrafu ta' l-Artikolu 2a(2);

(b) l-identifikazzjoni tal-pajjiżi u sustanzi skond L-artikolu 5(2);

(ċ) l-adozzjoni ta' ħtiġiet ta' awtorizzazzjoni għall-esportazzjoni skond l-Artikolu 5a(1)(b) kull darba li ma hemmx qbil mal-pajjiż terz in kwistjoni;

(d) l-adozzjoni tal-mudell tal-formola ta' awtorizzazzjoni għall-esportazzjoni msemmija fl-Artikolu 4, kif ukoll ir-regoli dettaljati li jikkonċernaw l-użu tagħha u r-regoli dettaljati għall-implimentazzjoni tas-sistema ta' awtorizzazzjoni individwali miftuħa msemmija f'L-Artikoli 5 u 5a;

(e) l-emenda ta' l-Anness li jinsab ma' dan ir-Regolament fil-każi fejn it-tabelli fl-Anness li jinsab mal-Konvenzjoni tan-Nazzjonijiet Uniti huma emendati huma stess."

4. L-Artikolu 10 għandu jiġi mibdul b'dan li ġej:

"L-Artikolu 10

1. Il-Kummissjoni għandha tkun megħjuna minn Kumitat.

2. Fejn issir referenza għal dan il-paragrafu, l-Artikoli 4 u 7 tad-Deċiżjoni 1999/468/KE [3] għandhom japplikaw.

Il-perijodu msemmi fl-Artikolu 4(3) tad-Deċiżjoni 1999/468/KE għandu jkun iffissat bħala ta' tliet xhur.

3. Il-kumitat għandu jistabbilixxi r-regoli tiegħu ta' proċedura."

Artikolu 2

Dan ir-Regolament għandu jidħol fis-seħħ fl-għoxrin jum wara l-pubblikazzjoni tiegħu fil-Ġurnal Uffiċjali tal-Komunitajiet Ewropej.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fil-Lussemburgu, fil-5 ta' Ġunju 2001.

Għall-Kunsill

Il-President

L. Engqvist

[1] ĠU L 357, ta' l-20.12.1990, p. 1. Regolament kif l-aħħar emendat bir-Regolament tal-Kummissjoni (KEE) Nru 3769/92 (ĠU L 383, tad-29.12.1992, p. 17).

[2] ĠU L 184, tas-17.7.1999, p. 23.

[3] ĠU L 184, tas-17.7.1999, p. 23.

--------------------------------------------------