31997R0476

Ir-Regolament tal-Kunsill (KE) Nru 476/97

tat-13 Marzu 1997

li jemenda, għal dak li għandu x’jaqsam mat-territorju statistiku, Regolament (KE) Nru 1172/95 dwar l-istatistika tal-kummerċ tal-Komunità u l-Istati Membri ma’ pajjiżi li mhumiex membri.

IL-KUNSILL TA' L-UNJONI EWROPEA,

Wara li kkunsidra t-Trattat li jistabbilixxi il-Komunitajiet Ewropej, u b'mod partikolari l-Artikolu 113 tiegħu,

Wara li kkunsidra l-proposta tal-Kummissjoni,

Billi r-Repubblika Franċiża ddeċidiet li tinkludi d-dipartimenti barranin fit-territorju statistiku ta' Franza mill-1 ta' Jannar 1997;

Billi r-Renju ta' Spanja ddeċieda li jinkludi l-Gżejjer Kanarji fit-territorju statistiku ta' Spanja mill-istess data;

Billi d-definizzjoni ta' territorju statistiku tal-Komunità msemmi fl-Artikolu 3 tar-Regolament (KE) Nru 1172/95 [1] u l-isfera ta' applikazzjoni tal-istatistika li għandha x’taqsam mal-kummerċ tal-Komunità u l-Istati Membri ma’ pajjiżi li mhumiex membri kif imsemmi fl-Artikolu 4 tar-Regolament imsemmi jeħtieġ jinbidel,

ADDOTTA DAN IR-REGOLAMENT:

Artikolu 1

Ir-Regolament (KE) Nru 1172/95 huwa emendat kif ġej:

1. Artikolu 3(2) huwa mibdul b'dan li ġej:

"2. B'deroga mill-paragrafu 1, it-territorju statistiku tal-Komunità għandu jinkludi Helgoland.";

2. it-tieni paragrafu ta' Artikolu 4(1) huwa mħassar.

Artikolu 2

Dan ir-Regolament ser jiġi fis-seħħ fis-seba’ jum wara d-data tal-pubblikazzjoni tiegħu fil-Ġurnal Uffiċċjali tal-Komunitajiet Ewropej.

Dan għandu japplika b'effett mill-1 ta' Jannar 1997.

Dan ir-Regolament jorbot fl-intier tiegħu u huwa applikabbli direttament fl-Istati Membri kollha.

Magħmul fi Brussel, fit-13 ta' Marzu 1997.

Għall-Kunsill

Il-President

M. Patijn

[1] ĠU L 118, tal-25.5.1995, p. 10.

--------------------------------------------------