12006E063

Artikolu 63

Il-Kunsill, li jaġixxi skond il-proċedura msemmija fl-Artikolu 67, għandu, f' terminu ta’ ħames snin wara d-dħul fis-seħħ tat-Trattat ta’ Amsterdam, jadotta:

1) miżuri dwar l-asil, skond il-Konvenzjoni ta’ Ġinevra tat- 28 ta’ Lulju 1951 u l-Protokoll tal- 31 ta’ Jannar 1967 li għandu x’jaqsam mal-qagħda ta’ refuġjati u t-trattati l-oħra rilevanti, f’dawn l-oqsma li ġejjin:

a) kriterji u mekkaniżmi biex jiġi determinat liema Stat Membru jkun responsabbli biex jikkonsidra l-applikazzjoni għal asil sottomessa minn persuna ta’ ċittadinanza ta’ xi pajjiż terz f’wieħed mill-Istati Membri,

b) standards minimi dwar kif jintlaqgħu dawk li jfittxu asil fi Stati Membri,

ċ) standards minimi f’dak li għandu x’jaqsam mal-kwalifika bħala refuġjati ta' persuni ta’ ċittadinanza ta’ pajjiżi terzi,

d) standards minimi dwar il-proċeduri fi Stati Membri għar-rikonoxximent jew it-tneħħija ta' l-istat ta’ refuġjat;

2) miżuri dwar refuġjati u persuni maqlugħa minn pajjiżhom li jaqgħu taħt dawn l-oqsma li ġejjin:

a) standards minimi għall-protezzjoni temporanja ta' persuni maqlugħa minn pajjiżi terzi li ma jkunux jistgħu jerġgħu lura lejn il-pajjiż tagħhom ta' l-oriġini u għal persuni li għal xi raġuni oħra ikollhom bżonn ta’ protezzjoni internazzjonali,

b) il-promozzjoni ta’ bilanċ ta’ sforzi bejn Stati Membri li jirċievu u jsofru l-konsegwenzi talli jirċievu refuġjati u persuni maqlugħa minn pajjiżhom;

3) miżuri dwar politika dwar l-immigrazzjoni f’dawn l-oqsma li ġejjin:

a) il-kondizzjonijiet tad-dħul u r-residenza, u standards dwar proċeduri għall-għoti minn Stati Membri ta’ visa għal termini twal u permessi għal residenza, inklużi dawk għall-iskopijiet tar-riunjoni tal-familji,

b) l-immigrazzjoni illegali u r-residenza illegali, inkluża r-ripatrijazzjoni ta’ residenti illegali;

4) miżuri li jiddefinixxu d-drittijiet u l-kondizzjonijiet li bihom persuni ta’ ċittadinanza ta' pajjiżi terzi li jkunu legalment residenti fi Stat Membru jkunu jistgħu jabitaw fi Stati Membri oħra.

Miżuri adottati mill-Kunsill skond il-punti 3 u 4 m’għandhomx ifixklu xi Stat Membru milli jżomm jew jintroduċi fl-oqsma kkonċernati disposizzjonijiet nazzjonali li jkunu kompatibbli ma' dan it-Trattat u ma' ftehim internazzjonali.

Miżuri li għandhom ikunu adottati skond il-punti 2(b), 3(a) u 4 m’għandhomx ikunu soġġetti għat-terminu ta’ ħames snin imsemmi hawn fuq.

--------------------------------------------------