This document is an excerpt from the EUR-Lex website
Document 02012D0481-20181023
Commission Decision of 16 August 2012 establishing the ecological criteria for the award of the EU Ecolabel for printed paper (notified under document C(2012) 5364) (Text with EEA relevance) (2012/481/EU)Text with EEA relevance
Consolidated text: Deċiżjoni tal-Kummissjoni tas-16 ta’ Awwissu 2012 li tistabbilixxi l-kriterji ekoloġiċi għall-għoti tal-Ekotikketta tal-UE għall-karta stampata (notifikata bid-dokument numru C(2012) 5364) (Test b’relevanza għaż-ŻEE) (2012/481/UE)Test b’relevanza għaż-ŻEE
Deċiżjoni tal-Kummissjoni tas-16 ta’ Awwissu 2012 li tistabbilixxi l-kriterji ekoloġiċi għall-għoti tal-Ekotikketta tal-UE għall-karta stampata (notifikata bid-dokument numru C(2012) 5364) (Test b’relevanza għaż-ŻEE) (2012/481/UE)Test b’relevanza għaż-ŻEE
No longer in force
02012D0481 — MT — 23.10.2018 — 003.001
Dan it-test hu maħsub purament bħala għodda ta’ dokumentazzjoni u m’għandu l-ebda effett legali. L-istituzzjonijiet tal-Unjoni m'għandhom l-ebda responsabbiltà għall-kontenut tiegħu. Il-verżjonijiet awtentiċi tal-atti rilevanti, inklużi l-preamboli tagħhom, huma dawk ippubblikati fil-Ġurnal Uffiċjali tal-Unjoni Ewropea u disponibbli f’EUR-Lex. Dawk it-testi uffiċjali huma aċċessibbli direttament permezz tal-links inkorporati f’dan id-dokument
|
DEĊIŻJONI TAL-KUMMISSJONI tas-16 ta’ Awwissu 2012 li tistabbilixxi l-kriterji ekoloġiċi għall-għoti tal-Ekotikketta tal-UE għall-karta stampata (notifikata bid-dokument numru C(2012) 5364) (Test b’relevanza għaż-ŻEE) (ĠU L 223 21.8.2012, p. 55) |
Emendata bi:
|
|
|
Il-Ġurnal Uffiċjali |
||
|
Nru |
Paġna |
Data |
||
|
L 170 |
64 |
11.6.2014 |
||
|
DEĊIŻJONI TAL-KUMMISSJONI (UE) 2015/877 Test b'rilevanza għaż-ŻEE tal-4 ta' Ġunju 2015 |
L 142 |
32 |
6.6.2015 |
|
|
DEĊIŻJONI TAL-KUMMISSJONI (UE) 2018/1590 Test b'rilevanza għaż-ŻEE tad-19 ta' Ottubru 2018 |
L 264 |
24 |
23.10.2018 |
|
Ikkoreġuta bi:
DEĊIŻJONI TAL-KUMMISSJONI
tas-16 ta’ Awwissu 2012
li tistabbilixxi l-kriterji ekoloġiċi għall-għoti tal-Ekotikketta tal-UE għall-karta stampata
(notifikata bid-dokument numru C(2012) 5364)
(Test b’relevanza għaż-ŻEE)
(2012/481/UE)
Artikolu 1
1. Il-grupp ta' prodotti ta' “karta stampata” għandu jinkludi kull prodott tal-karta stampata li jikkonsisti, f'tal-anqas 90 % mill-piż tiegħu, minn karta, kartuna tal-karta jew sustrati bbażati fuq il-karta, għajr kotba, katalgi, ktejbiet jew formoli, li għandhom jikkonsistu, f'tal-anqas 80 % mill-piż tagħhom, minn karta, kartuna tal-karta jew sustrati bbażati fuq il-karta. Il-partijiet miżjuda, il-qxur u kwalunkwe parti bil-karta stampata tal-karta stampata aħħarija għandhom jitqiesu bħala parti mill-prodott tal-karta stampata.
2. Il-partijiet miżjuda (inserts) li jiġu ffissati fuq il-prodott tal-karta stampata (u li mhux maħsub li jinqalgħu) għandhom jilħqu r-rekwiżiti tal-Anness għal din id-Deċiżjoni. Il-partijiet miżjuda li ma jkunux iffissati fuq il-karta stampata (ngħidu aħna, fuljetti jew stikers li jinqalgħu) iżda jinbiegħu jew jiġu pprovduti magħha, għandhom jilħqu r-rekwiżiti tal-Anness għal din id-Deċiżjoni biss jekk ikun maħsub li l-Ekotikketta tal-UE titqiegħed fuqhom.
3. Il-grupp ta’ prodotti ta’ “karta stampata” ma għandux jinkludi dawn li ġejjin:
(a) karta iġjenika stampata;
(b) prodotti tal-karta stampata użati għall-ippakkjar u għat-tgeżwir;
(c) fowlders, envelops, ring binders u prodotti tal-karti għall-kartolerija.
Artikolu 2
Għall-finijiet ta’ din id-Deċiżjoni, għandhom japplikaw id-definizzjonijiet li ġejjin:
(1) “Kotba” tfisser prodotti tal-karta stampata marbutin bl-ispaga jew imwaħħlin bil-kolla, bi qxur ibsin jew rotob, bħal kotba tal-iskola, kotba letterarji jew mhux letterarji, rapporti, manwali u paperbacks. “Kotba” ma jinkludux ġurnali, fuljetti, rivisti, katalgi ppubblikati b'mod regolari u rapporti annwali;
(2) “Oġġetti ta’ konsum” tfisser prodotti kimiċi użati waqt il-proċessi tal-istampar, il-kisi u t-tlestija, kapaċi li jiġu kkonsmati, meqruda, dissipati, moħlija jew użati. L-“oġġetti ta’ konsum” jinkludu prodotti bħal linek u koloranti tal-istampar, toners, verniċi għal fuq l-istampar u verniċi oħrajn, adeżivi, aġenti tal-ħasil, u soluzzjonijiet għall-umidifikazzjoni;
(3) “Fowlder” tfisser kaxxa jew qoxra li tintlewa biex iżżomm karti sfużi. Il-“fowlders” jinkludu prodotti bħad-dividers bil-werrej, kartiera tad-dokumenti, fowlders maqtugħin f’forma ta’ kaxxa, suspension files, kaxex tal-kartun, u fowlders bi tliet flaps;
(4) “Solvent aloġenat organiku” tfisser solvent organiku li jkollu fih minn tal-anqas atoma waħda ta’ bromin, klorin, fluworin jew jodju għal kull molekola;
(5) “Parti miżjuda” jew “insert” tfisser folja jew sezzjoni żejda, stampata b’mod indipendenti mill-prodott tal-karta stampata, li titqiegħed qalb il-paġni ta’ prodott tal-karta stampata u tista’ tinqala’ (loose insert), jew inkella tiġi legata fil-paġni tal-prodott tal-karta stampata, u b’hekk tiġi tifforma parti integrali minnha (fixed insert). Il-“partiijet miżjuda” jew “inserts” jinkludu riklami ta’ iktar minn paġna, ktejbiet, fuljetti, kartolini ta’ tweġiba, jew materjal promozzjonali ieħor;
(6) “Gazzetta” tfisser pubblikazzjoni li toħroġ kuljum jew kull ġimgħa, li fiha aħbarijiet u tkun stampata fuq grad ta’ karta tal-gazzetti, magħmul mill-polpa u/jew mill-karta rkuprata, b’piż ta’ bejn 40 u 65 g/m2;
(7) “Komponenti mhux tal-karta” tfisser il-partijiet kollha ta’ prodott tal-karta stampata li ma jikkonsistux f’karta, f’kartuna tal-karta, jew sustrati bbażati fuq il-karta;
(8) “Imballaġġ” tfisser il-prodotti kollha magħmula minn kwalunkwe materjal tkun xi tkun in-natura tiegħu, sabiex jintużaw għaż-żamma, il-protezzjoni, l-immaniġġjar, it-twassil u l-preżentazzjoni ta’ prodotti, minn materja prima sa prodotti pproċessati, mill-produttur sal-utent jew il-konsumatur;
(9) “Prodott tal-karta stampata” tfisser il-prodott li jirriżulta mill-ipproċessar ta' materjal stampat. L-ipproċessar jikkonsisti fl-istampar fuq karta. Minbarra l-istampar, l-ipproċessar jista' jinkludi t-tlestija, pereżempju t-tiwi, l-ittimbrar, il-qtugħ jew l-immuntar, bl-użu tal-kolla, tal-legatura jew tal-ispag. Il-prodotti tal-karta stampata jinkludu gazzetti, materjal ta' riklamar u folji ta' aħbarijiet, ġurnali, katalgi, kotba, volantuni, fuljetti, kartelluni, biljetti ta' kuntatt, u tikketti;
(10) “Stampar” (jew il-proċess tal-istampar) tfisser proċess li bih materjal ta’ stampar jiġi pproċessat fi prodott tal-karta stampata. L-“istampar” jinkludi l-operazzjonijiet ta’ pre-press, press, u post-press;
(11) “Riċiklaġġ” tfisser kwalunkwe operazzjoni ta’ rkupru li biha l-materjali tal-iskart jiġu pproċessati mill-ġdid fi prodotti, materjali jew sustanzi għall-użu oriġinali jew għal skopijiet oħra. Dan jinkludi l-ipproċessar mill-ġdid ta’ materjal organiku iżda ma jinkludix l-irkupru ta’ enerġija, jew l-ipproċessar mill-ġdid f’materjali li għandhom jintużaw bħala fjuwils jew għal operazzjonijiet ta’ rdim mill-ġdid;
(12) “VOC” (Komposti Organiċi Volatili) tfisser kull kompost organiku kif ukoll il-frazzjoni tal-krijożot, li f’temperatura ta’ 293,15 K ikollu pressjoni ta’ fwar ta’ 0,01 kPa jew aktar, jew li jkollu volatilità korrispondenti fil-kundizzjonijiet partikulari tal-użu tiegħu;
(13) “Aġenti tal-ħasil” tfisser li ġej: (a) kimiċi likwidi li jintużaw għall-ħasil tal-forom tal-istampar, kemm separati (off-press) kif ukoll integrati (in-press), u pressi tal-istampar għat-tneħħija tal-linek tal-istampar, it-trab tal-karta u prodotti simili; (b) prodott tat-tindif għall-magni ta’ tlestija jew ta’ stampar, bħal prodotti li jneħħu l-adeżiv u r-residwi tal-verniċ; (c) prodotti li jneħħu l-linek tal-istampar, li jintużaw biex ilaħalħu l-linek tal-istampar li jkunu nixfu. L-“aġenti tal-ħasil” ma jinkludux l-aġenti tat-tindif għal partijiet oħra tal-magna tal-istampar jew għat-tindif ta’ magni li ma jkunux għall-istampar jew għat-tlestija;
(14) “Karta skartata” tfisser karta li tiġi ġġenerata matul il-proċessi ta’ stampar u ta’ tlestija, jew waqt li l-karta tkun qiegħda titqaxxar jew tinqata’, jew waqt l-ewwel tiraturi fl-istamperija u fil-kamra tal-legatura, li ma jifformawx parti mill-prodott tal-karta stampata aħħari.
Artikolu 3
Sabiex jingħata l-Ekotikketta tal-UE skont ir-Regolament (KE) Nru 66/2010, oġġett ta’ karta stampata għandu jaqa’ fil-grupp tal-prodotti “Karta stampata” kif iddefinit fl-Artikolu 1 ta’ din id-Deċiżjoni, u għandu jkun konformi mal-kriterji kif ukoll mar-rekwiżiti relatati ta’ valutazzjoni u verifika stabbiliti fl-Anness għal din id-Deċiżjoni.
Artikolu 4
Il-kriterji ekoloġiċi għall-grupp ta' prodotti tal-“karta stampata”, kif ukoll ir-rekwiżiti ta' valutazzjoni u ta' verifika relatati magħhom, għandhom jibqgħu validi sal-31 ta' Diċembru 2020.
Artikolu 5
Għal skopijiet amministrattivi, in-numru tal-kodiċi assenjat lill-“karta stampata” għandu jkun “028”.
Artikolu 6
Din id-Deċiżjoni hija indirizzata lill-Istati Membri.
ANNESS
QAFAS
Għanijiet tal-kriterji
L-għan tal-kriterji huwa b’mod partikulari li jippromwovu l-effiċjenza ambjentali tal-kapaċità ta’ tneħħija tal-linka (de-inkability) u ta’ riċiklagg għall-prodotti tal-karta stampata, it-tnaqqis tal-emissjonijiet tal-VOC, it-tnaqqis jew il-prevenzjoni tar-riskji għall-ambjent u għas-saħħa tal-bniedem marbutin mal-użu ta’ sustanzi perikolużi. Il-kriterji huma ffissati f’livelli li jippromwovu t-tikkettar tal-prodotti tal-karta stampata li għandhom impatt ambjentali baxx.
KRITERJI
Dawn il-kriterji huma stabbiliti għal kull wieħed mill-aspetti li ġejjin:
1. Sustrati
2. Sustanzi u taħlitiet esklużi jew limitati
3. Kapaċità ta’ riċiklaġġ
4. Emissjonijiet
5. Skart
6. Enerġija
7. Taħriġ
8. Adegwatezza għall-użu
9. Informazzjoni dwar il-prodott
10. Informazzjoni li tidher fuq l-Ekotikketta tal-UE
Il-kriterji 1, 3, 8, 9 u 10 japplikaw għall-prodott tal-karta stampata aħħari.
Il-kriterju 2 japplika kemm għall-komponenti mhux tal-karta tal-prodott tal-karta stampata, kif ukoll għall-proċessi ta’ stampar, kisi u tlestija tal-komponenti tal-karta.
Il-kriterji 4, 5, 6 u 7 japplikaw għall-proċessi ta’ stampar, kisi u tlestija tal-komponenti tal-karta biss.
Dawn il-kriterji japplikaw għall-proċessi kollha ta’ dan it-tip, li jsiru fuq il-post jew fil-postijiet fejn jiġi mmanifatturat il-prodott tal-karta stampata. Jekk ikun hemm proċessi ta’ stampar, kisi u tlestija li jintużaw esklussivament għall-prodotti bl-ekotikketta, il-kriterji 2, 4, 5, 6 u 7 għandhom japplikaw biss għal dawk il-proċessi.
Il-kriterji ekoloġiċi ma jkoprux it-trasport tal-materja prima, l-oġġetti ta’ konsum u l-prodotti aħħarija.
Rekwiżiti ta’ valutazzjoni u verifika
Ir-rekwiżiti speċifiċi ta’ valutazzjoni u verifika huma indikati f’kull kriterju.
Kull stampar fuq il-prodott tal-karta stampata għandu jilħaq il-kriterji. Għaldaqstant, partijiet mill-prodott li jiġu stampati minn subkuntrattur għandhom jilħqu l-kriterji tal-istampar ukoll. L-applikazzjoni għandha tinkludi lista tal-istamperiji u s-subkuntratturi kollha involuti fil-produzzjoni tal-karta stampata, bil-postijiet ġeografiċi tagħhom.
L-applikant għandu jipprovdi lista tal-prodotti kimiċi użati fl-istamperija għall-produzzjoni tal-prodotti tal-karta stampata. Dan ir-rekwiżit japplika għall-oġġetti tal-konsum kollha użati matul il-proċessi ta’ stampar, kisi u tlestija. Il-lista pprovduta mill-applikant għandha tinkludi l-ammont, il-funzjoni u l-fornitur ta’ kwalunkwe prodott kimiku li jintuża, flimkien mal-Folja dwar id-Dejta tas-Sikurezza, iddiżinjata skont id-Direttiva tal-Kummissjoni 2001/58/KE ( 1 ).
Fejn l-applikant ikun meħtieġ jipprovdi dikjarazzjonijiet, dokumentazzjoni, analiżijiet, rapporti ta’ testijiet, jew evidenza oħra li turi konformità mal-kriterji, huwa mifhum li dawk jistgħu joriġinaw mingħand l-applikant u/jew il-fornitur(i) tiegħu, kif ikun xieraq.
Fejn ikun xieraq, jistgħu jintużaw metodi ta’ ttestjar differenti minn dawk indikati għal kull kriterju, jekk tiġi aċċettata l-ekwivalenza tagħhom mill-korp kompetenti li jivvaluta l-applikazzjoni.
Fejn possibbli, l-ittestjar għandu jitwettaq minn laboratorji li jissodisfaw ir-rekwiżiti ġenerali ta’ EN ISO 17025 jew l-ekwivalenti.
Fejn xieraq, il-korpi kompetenti jistgħu jitolbu dokumentazzjoni ta’ appoġġ u jistgħu jwettqu verifiki indipendenti.
KRITERJI TAL-EKOTIKKETTA TAL-UE
Kriterju 1 — Sustrati
(a) Il-prodott tal-karta stampata għandu jiġi stampat biss fuq karta li jkollha l-Ekotikketta tal-UE, kif stabbilit fid-Deċiżjoni tal-Kummissjoni 2011/333/UE ( 2 ).
(b) Fejn tintuża karta tal-gazzetti, il-prodott tal-karta stampata għandu jiġi stampat biss fuq karta li jkollha l-Ekotikketta tal-UE, kif stabbilit fid-Deċiżjoni tal-Kummissjoni 2012/448/UE ( 3 ).
Valutazzjoni u verifika: l-applikant għandu jipprovdi l-ispeċifikazzjonijiet tal-prodotti tal-karta stampata kkonċernati, inklużi l-ismijiet kummerċjali, l-ammonti, u l-piż għal kull m2 tal-karta li tintuża. Il-lista għandha tinkludi wkoll l-ismijiet tal-fornituri tal-karti użati. L-applikant għandu jipprovdi kopja ta’ ċertifikat validu tal-Ekotikketta tal-UE għall-karta li tintuża.
Kriterju 2 — Sustanzi jew taħlitiet esklużi jew limitati
(a) Sustanzi u taħlitiet perikolużi
L-oġġetti ta’ konsum li jistgħu jispiċċaw fil-prodott tal-karta stampata aħħari, u li fihom sustanzi u/jew taħlitiet li jilħqu l-kriterji għall-klassifikazzjoni mad-dikjarazzjonijiet ta’ periklu jew espressjonijiet ta’ riskju speċifikati iktar ’l isfel skont ir-Regolament (KE) Nru 1272/2008 tal-Parlament Ewropew u tal-Kunsill ( 4 ) jew id-Direttiva tal-Kunsill 67/548/KEE ( 5 ), jew sustanzi msemmija fl-Artikolu 57 tar-Regolament (KE) Nru 1907/2006 tal-Parlament Ewropew u tal-Kunsill ( 6 ), ma għandhomx jintużaw għall-operazzjonijiet ta’ stampar, kisi jew tlestija tal-prodott tal-karta stampata aħħari.
Dan ir-rekwiżit ma għandux japplika għat-toluwen li jintuża fil-proċessi ta’ stampar bir-rotogravur, fejn stallazzjoni magħluqa jew f’kapsula jew sistema ta’ rkupru, jew kwalunkwe sistema ekwivalenti, tkun lesta biex tikkontrolla u tissorvelja l-emissjonijiet maħruba, u fejn l-effiċjenza tal-irkupru tkun tal-anqas 92 %. Il-verniċ UV u l-linek UV ikklassifikati bħala H412/R52-53 huma wkoll eżenti minn dan ir-rekwiżit.
Il-komponenti mhux tal-karta (sa 20 % mill-piż tagħhom, kif speċifikat fl-Artikolu 1) li huma parti mill-prodott tal-karta aħħari ma għandux ikun fihom is-sustanzi msemmija iktar ’il fuq.
Lista ta’ dikjarazzjonijiet ta’ periklu u espressjonijiet ta’ riskju:
|
Dikjarazzjoni ta’ Periklu (1) |
Espressjoni ta’ Riskju (2) |
|
H300 Joqtol jekk jinbela’ |
R28 |
|
H301 Tossiku jekk jinbela’ |
R25 |
|
H304 Jista’ joqtol jekk jinbela’ u jidħol fil-pajpijiet tan-nifs |
R65 |
|
H310 Fatali jekk imiss mal-ġilda |
R27 |
|
H311 Tossiku jekk imiss mal-ġilda |
R24 |
|
H330 Fatali jekk jiġi inalat |
R23 jew R26 |
|
H331 Tossiku jekk jinġibed man-nifs |
R23 |
|
H340 Jista’ jwassal għal difetti ġenetiċi |
R46 |
|
H341 Suspettat li jikkawża difetti ġenetiċi |
R68 |
|
H350 Jista’ jikkawża l-kanċer |
R45 |
|
H350i Jista’ jikkawża l-kanċer jekk jinġibed man-nifs |
R49 |
|
H351 Suspettat li jikkawża l-kanċer |
R40 |
|
H360F Jista’ jagħmel ħsara lill-fertilità |
R60 |
|
H360D Jista’ jagħmel ħsara lit-tarbija li għadha ma twelditx |
R61 |
|
H360FD Jista’ jagħmel ħsara lill-fertilità. Jista’ jagħmel ħsara lit-tarbija li għadha ma twelditx |
R60; R61; R60-61 |
|
H360Fd Jista’ jagħmel ħsara lill-fertilità. Suspettat li jagħmel ħsara lit-tarbija li għadha ma twelditx |
R60-R63 |
|
H360Df Jista’ jagħmel ħsara lit-tarbija li għadha ma twelditx. Suspettat li jagħmel ħsara lill-fertilità |
R61-R62 |
|
H361f Suspettat li jagħmel ħsara lill-fertilità |
R62 |
|
H361d Suspettat li jagħmel ħsara lit-tarbija li għadha ma twelditx |
R63 |
|
H361fd Suspettat li jagħmel ħsara lill-fertilità. Suspettat li jagħmel ħsara lit-tarbija li għadha ma twelditx |
R62-63 |
|
H362 Jista’ jikkawża ħsara lit-trabi mreddgħa |
R64 |
|
H370 Jikkawża ħsara lill-organi |
R39/23; R39/24; R39/25; R39/26; R39/27; R39/28 |
|
H371 Jista’ jikkawża ħsara lill-organi |
R68/20; R68/21; R68/22 |
|
H372 Jikkawża ħsara lill-organi f’każ ta’ esponiment ripetut jew tul perjodu ta’ żmien |
R48/25; R48/24; R48/23 |
|
H373 Jista’ jikkawża ħsara lill-organi f’każ ta’ esponiment ripetut jew tul perjodu ta’ żmien |
R48/20; R48/21; R48/22 |
|
H400 Tossiku ħafna għall-flora u l-fawna akkwatiċi |
R50 |
|
H410 Tossiku ħafna għall-flora u l-fawna akkwatiċi b’effetti fit-tul |
R50-53 |
|
H411 Tossiku għall-flora u l-fawna akkwatiċi b’effetti fit-tul |
R51-53 |
|
H412 Jagħmel ħsara lill-flora u l-fawna akkwatika b’effetti fit-tul |
R52-53 |
|
H413 Jista’ jkollu effetti ta’ ħsara fit-tul lill-flora u l-fawna akkwatika |
R53 |
|
EUH059 Perikoluż għas-saff tal-ożonu |
R59 |
|
EUH029 Jerħi gass tossiku kif imiss mal-ilma |
R29 |
|
EUH031 Jerħi gass tossiku kif imiss mal-aċtu |
R31 |
|
EUH032 Jerħi gass tossiku ħafna kif imiss mal-aċtu |
R32 |
|
EUH070 Tossiku jekk imiss l-għajnejn |
R39-41 |
|
(1) Kif ipprovdut fir-Regolament (KE) Nru 1272/2008. (2) Kif ipprovdut fid-Direttiva 67/548/KEE. |
|
Is-sustanzi jew taħlitiet li mal-ipproċessar jibdlu l-karatteristiċi tagħhom (eż. ma jibqgħux aktar bijodisponibbli, jgħaddu minn modifika kimika) b’mod li l-periklu identifikat ma japplikax aktar, huma eżentati mir-rekwiżit ta’ hawn fuq.
Il-limiti ta’ konċentrazzjoni għal sustanzi u taħlitiet li jistgħu jiġu assenjati jew li ġew assenjati d-dikjarazzjonijiet ta’ periklu jew il-frażijiet ta’ riskju elenkati hawn fuq, jew li jissodisfaw il-kriterji għall-klassifikazzjoni fil-klassijiet jew il-kategoriji ta’ periklu elenkati fit-tabella hawn fuq, u l-limiti ta’ konċentrazzjoni għas-sustanzi li jissodisfaw il-kriterji stabbiliti fl-Artikolu 57(a), (b) jew (c) tar-Regolament (KE) Nru 1907/2006, ma għandhomx jaqbżu l-limiti ġeneriċi jew speċifiċi ta’ konċentrazzjoni ddeterminati skont l-Artikolu 10 tar-Regolament (KE) Nru 1272/2008. Fejn ikunu stabbiliti limiti speċifiċi ta’ konċentrazzjoni, dawn għandhom jieħdu preċedenza fuq dawk ġeneriċi.
Il-limiti ta’ konċentrazzjoni għal sustanzi li jissodisfaw il-kriterji stabbiliti fl-Artikolu 57(d), (e) jew (f) tar-Regolament (KE) Nru 1907/2006 ma għandhomx jaqbżu 0,1 % piż skont il-piż.
Valutazzjoni u verifika: Għas-sustanzi li mhumiex diġà kklassifikati skont ir-Regolament (KE) Nru 1272/2008, l-applikant għandu jagħti prova tal-konformità tiegħu ma’ dawn il-kriterji, billi jipprovdi: (i) dikjarazzjoni li l-komponenti mhux tal-karta li huma parti mill-prodott aħħari ma fihomx is-sustanzi msemmija f’dawn il-kriterji f’xi konċentrazzjoni ’l fuq mil-limiti awtorizzati; (ii) dikjarazzjoni li l-oġġetti ta’ konsum li jistgħu jispiċċaw fil-prodott tal-karta stampata aħħari, u li jintużaw għall-proċessi ta’ stampar, kisi u tlestija, ma fihomx is-sustanzi msemmija f’dawn il-kriterji f’xi konċentrazzjoni ’l fuq mil-limiti awtorizzati; (iii) lista tal-oġġetti ta’ konsum kollha użati għall-istampar, għat-tlestija u għall-kisi tal-prodotti ta’ karta stampata. Din il-lista għandha tinkludi l-kwantità, il-funzjoni u l-fornituri tal-oġġetti ta’ konsum kollha użati fil-proċess tal-produzzjoni.
L-applikant għandu juri l-konformità tiegħu ma’ dan il-kriterju billi jipprovdi dikjarazzjoni dwar in-nuqqas ta’ klassifikazzjoni ta’ kull sustanza fi kwalunkwe mill-klassijiet ta’ periklu marbutin mad-dikjarazzjonijiet ta’ periklu msemmija fil-lista ta’ hawn fuq skont ir-Regolament (KE) Nru 1272/2008, safejn dan jista’ jiġi ddeterminat, bħala minimu, mit-tagħrif li jilħaq ir-rekwiżiti elenkati fl-Anness VII tar-Regolament (KE) Nru 1907/2006. Din id-dikjarazzjoni għandha tiġi appoġġata minn tagħrif fil-qosor dwar il-karatteristiċi rilevanti marbutin mad-dikjarazzjonijiet ta’ periklu msemmija fil-lista ta’ hawn fuq, sal-livell ta’ dettall speċifikat fit-taqsimiet 10, 11 u 12 tal-Anness II għar-Regolament (KE) Nru 1907/2006 (Rekwiżiti għall-Ikkompilar tal-Folji dwar id-Dejta tas-Sikurezza).
It-tagħrif dwar il-karatteristiċi intrinsiċi tas-sustanzi jista’ jiġi ġġenerat mod ieħor flok b’testijiet, ngħidu aħna bl-użu ta’ metodi alternattivi bħal in vitro, mudelli ta’ attività bi struttura kwantitattiva, jew bl-użu ta’ ggruppar jew read-across, skont l-Anness XI għar-Regolament (KE) Nru 1907/2006. Il-qsim tad-dejta rilevanti jitħeġġeġ bil-qawwi.
It-tagħrif ipprovdut għandu jkun marbut mal-forom jew mal-istati fiżiċi tas-sustanza jew tat-taħlita kif tintuża fil-prodott aħħari.
Għas-sustanzi elenkati fl-Annessi IV u V tar-REACH, eżentati mill-obbligi ta’ reġistrazzjoni skont l-Artikoli 2(7)(a) u (b) tar-Regolament (KE) Nru 1907/2006 REACH, stqarrija f’dan ir-rigward tkun biżżejjed biex tikkonforma mar-rekwiżiti ta’ iktar ’il fuq.
L-applikant għandu jipprovdi dokumentazzjoni xierqa dwar l-effiċjenza tal-irkupru tal-istallazzjoni magħluqa jew f’kapsula jew tas-sistema ta’ rkupru, jew kwalunkwe sistema ekwivalenti, li tkun ġiet implimentata għall-użu tat-toluwen fi proċessi ta’ stampar bir-rotogravur.
(b) Sustanzi elenkati skont l-Artikolu 59(1) tar-Regolament (KE) Nru 1907/2006
Ma għandha tingħata l-ebda deroga mill-projbizzjoni stipulata fil-punt (a) tal-Artikolu 6(6) tar-Regolament (KE) Nru 66/2010 fir-rigward tas-sustanzi identifikati bħala sustanzi ta’ tħassib kbir u inklużi fil-lista pprovduta għall-Artikolu 59 tar-Regolament (KE) Nru 1907/2006, preżenti f’taħlitiet f’konċentrazzjonijiet ogħla minn 0,1 %. Il-limiti ta’ konċentrazzjoni speċifiċi stabbiliti skont l-Artikolu 10 tar-Regolament (KE) Nru 1272/2008 għandhom japplikaw meta l-konċentrazzjoni tkun aktar baxxa minn 0,1 %.
Valutazzjoni u verifika: il-lista ta’ sustanzi identifikati bħala sustanzi ta’ tħassib kbir ħafna u inklużi fil-lista tal-kandidati skont l-Artikolu 59 tar-Regolament (KE) Nru 1907/2006 tista’ tinstab fuq is-sit elettroniku (bl-Ingliż):
http://echa.europa.eu/chem_data/authorisation_process/candidate_list_table_en.asp
Għandha ssir referenza għal-lista fid-data tal-applikazzjoni.
L-applikant għandu jagħti prova tal-konformità ma’ dan il-kriterju billi jipprovdi dejta dwar l-ammont ta’ sustanzi użati għall-istampar tal-prodotti ta’ karta stampata, kif ukoll stqarrija li s-sustanzi msemmija f’dan il-kriterju ma jinżammux fil-prodott aħħari f’livell ogħla mil-limiti ta’ konċentrazzjoni speċifikati. Il-konċentrazzjoni għandha tiġi speċifikata fil-Folja dwar id-Dejta tas-Sikurezza skont l-Artikolu 31 tar-Regolament (KE) Nru 1907/2006.
(c) Bijoċidi
Il-bijoċidi, kemm bħala parti mill-formulazzjoni jew bħala parti minn taħlita inkluża fil-formulazzjoni, li jintużaw biex jippreservaw il-prodott u li huma kklassifikati H410/R50-53 jew H411/R51-53 skont id-Direttiva 67/548/KEE, id-Direttiva tal-Kunsill 1999/45/KE ( 7 ) jew ir-Regolament (KE) Nru 1272/2008, huma permessi biss jekk il-potenzjali ta’ bijoakkumulazzjoni tagħhom huma kkaratterizzati minn log Pow (log ottanol/koeffiċjent tal-partizzjoni tal-ilma) < 3,0 jew fattur ta’ bijokonċentrazzjoni (BCF) iddeterminat b’mod sperimentali ≤ 100.
Valutazzjoni u verifika: l-applikant għandu jipprovdi kopji tal-Folja dwar id-Dejta tas-Sikurezza tal-materjali għall-bijoċidi kollha użati tul l-istadji varji tal-produzzjoni, flimkien mad-dokumentazzjoni tal-konċentrazzjonijiet tal-bijoċidi fil-prodott aħħari.
(d) Aġenti tal-ħasil
L-aġenti tal-ħasil li jintużaw għat-tindif waqt il-proċessi u/jew subproċessi ta’ stampar, li jkun fihom idrokarbonju aromatiku, għandhom jitħallew jintużaw biss jekk ikunu konformi mal-punt 2(b), u jekk tintlaħaq waħda mill-kundizzjonijiet li ġejjin:
(i) L-ammont ta’ idrokarbonji aromatiċi fil-prodotti tal-aġent tal-ħasil użat ma jaqbiżx 0,1 % (w/w);
(ii) L-ammont ta’ aġent tal-ħasil ibbażat fuq l-idrokarbonju aromatiku użat kull sena ma jaqbiżx 5 % mill-ammont totali tal-aġent tal-ħasil li jintuża f’sena kalendarja.
Dan il-kriterju ma għandux japplika għat-toluwen li jintuża bħala aġent tal-ħasil fl-istampar bir-rotogravur.
Valutazzjoni u verifika: l-applikant għandu jipprovdi l-Folja dwar id-Dejta tas-Sikurezza għal kull aġent tal-ħasil użat fi stamperija matul is-sena li għaliha jirreferi l-konsum annwali. Il-fornituri tal-aġent tal-ħasil għandhom jipprovdu dikjarazzjonijiet tal-kontenut ta’ idrokarbonju fl-aġenti tal-ħasil.
(e) Alkilfenoletossilati — Solventi aloġenati — Ftalati
Is-sustanzi jew preparazzjonijiet li ġejjin ma għandhomx jiżdiedu ma’ linek, koloranti, toners, adeżivi jew aġenti tal-ħasil jew kimiċi oħra għat-tindif użati għall-istampar tal-prodott ta’ karta stampata:
— L-alkilfenoletossilati u d-derivattivi tagħhom jistgħu jipproduċu alkilfenoli bid-degradazzjoni.
— Is-solventi aloġenti li, fi żmien l-applikazzjoni, ikunu klassifikati fil-kategoriji ta’ periklu jew riskju elenkati fil-punt 2(a).
— Il-ftalati li, fi żmien l-applikazzjoni, ikunu kklassifikati bl-espressjonijiet ta’ riskju H360F, H360D, H361f skont ir-Regolament (KE) Nru 1272/2008.
Valutazzjoni u verifika: l-applikant għandu jipprovdi dikjarazzjoni ta’ konformità ma’ dan il-kriterju.
(f) Linek tal-istampar u oħrajn, toners, verniċ, pellikoli tal-aluminju, u laminati
Il-metalli tqal li ġejjin jew il-komposti tagħhom m’għandhomx jintużaw f’linek tal-istampar u oħrajn, toners, verniċ, pellikoli tal-aluminju jew laminati (la bħala sustanza u lanqas bħala parti minn kwalunkwe preparazzjoni użata): il-kadmju, ir-ram (għajr ir-ram-ftalosjanin), iċ-ċomb, in-nikil, il-kromu VI, il-merkurju, l-arseniku, il-barju solubbli, is-selenju, l-antimonju. Il-kobalt jista’ jintuża sa 0,1 % (w/w).
L-ingredjenti jista’ jkun fihom traċċi ta’ dawn il-metalli sa 0,01 % (w/w) li jiġu mill-impuritajiet fil-materja prima.
Valutazzjoni u verifika: l-applikant għandu jipprovdi dikjarazzjoni ta’ konformità ma’ dan il-kriterju, kif ukoll dikjarazzjonijiet mill-fornituri tal-ingredjenti.
Kriterju 3 — Riċiklabbiltà
Il-prodott tal-karta stampata għandu jkun riċiklabbli. Il-karta stampata għandha tkun b'tali mod li tkun tista' tinqala' minn fuqha l-linka, u l-komponenti mhux tal-karta tal-prodott ta' karta stampata għandu jkun possibbli li jitneħħew faċilment, b'mod li jiżgura li tali komponenti ma jfixklux il-proċess ta' riċiklaġġ.
(a) L-aġenti tar-reżistenza għall-ilma għandhom jintużaw biss jekk tista' tiġi pprovata r-riċiklabbiltà tal-prodott lest.
(b) L-adeżivi jistgħu jintużaw biss jekk tista' tiġi pprovata l-kapaċità li jitneħħew.
(c) Il-verniċi għall-kisi u l-laminazzjoni, inklużi l-polieten u/jew il-polieten/polipropilen, jistgħu jintużaw biss għall-qxur tal-kotba, ir-rivisti u l-katalgi.
(d) Għandha tkun provata l-possibbiltà li tinqala' l-linka minn fuq il-karta.
Valutazzjoni u verifika: l-applikant għandu jipprovdi r-riżultati tat-testijiet tar-riċiklabbiltà għall-aġenti tar-reżistenza għall-ilma, kif ukoll tal-kapaċità li jitneħħew l-adeżivi. Il-metodi ta' ttestjar ta' referenza huma l-metodu PTS-RH 021/97 (għall-aġenti tar-reżistenza għall-ilma), il-metodu INGEDE 12 (għat-tneħħija tal-adeżivi mhux solubbli), jew metodi ta' ttestjar ekwivalenti. Il-kapaċità li tinqala' l-linka għandha tkun provata bl-użu tad-“Deinking Scorecard” ( 8 ) tal-Kunsill Ewropew għall-Karta Rkuprata, jew metodi ta' ttestjar ekwivalenti. L-ittestjar għandu jsir fuq tliet tipi ta' karta: il-karta mhux miksija, il-karta miksija, u l-karta trattata fuq il-wiċċ. Jekk tip ta' linka għall-istampar jinbiegħ biss għal tip speċifiku wieħed jew tnejn ta' karta, ikun biżżejjed li jiġi/u ttestjat(i) t-tip(i) ta' karta inkwistjoni. L-applikant għandu jipprovdi dikjarazzjoni li l-prodotti tal-karta stampata miksija u laminati huma konformi mal-punt 3(c). Meta parti minn prodott tal-karta stampata tkun tista' titneħħa faċilment (ngħidu aħna, qoxra tal-plastik), it-test tar-riċiklabbiltà jista' jsir mingħajr dan il-komponent. Il-kapaċità li jitneħħew faċilment il-komponenti mhux tal-karta għandha tkun provata b'dikjarazzjoni mill-impriża tal-ġbir tal-karta, mill-impriża tar-riċiklaġġ jew minn organizzazzjoni ekwivalenti. Jistgħu jintużaw ukoll metodi ta' ttestjar li juru riżultati ekwivalenti, imwettqa minn parti terza kompetenti u indipendenti.
Kriterju 4 — Emissjonijiet
(a) L-emissjonijiet fl-ilma
L-ilma għat-tlaħliħ li jkun fih il-fidda mill-ipproċessar tal-pellikoli, kif ukoll mill-produzzjoni tal-pjanċi, u l-fotokimiċi, ma għandhomx jiġu rrilaxxati f’impjant tat-trattament tad-drenaġġ.
Valutazzjoni u verifika: L-applikant għandu jipprovdi dikjarazzjoni ta’ konformità ma’ dan il-kriterju, flimkien ma’ deskrizzjoni tal-ġestjoni fuq il-post tal-ilma tat-tlaħliħ li jkun fih fotokimiċi u l-fidda. Fejn l-ipproċessar tal-pellikoli u/jew il-produzzjoni tal-pjanċi jintbagħtu f’idejn ħaddieħor, is-sottokuntrattur għandu jipprovdi dikjarazzjoni ta’ konformità ma’ dan il-kriterju, flimkien ma’ deskrizzjoni tal-ġestjoni, fuq il-post tas-sottokuntrattur, tal-ilma tat-tlaħliħ li jkun fih fotokimiċi u l-fidda.
L-ammont ta’ Cr u Cu rrilaxxat f’impjant tat-trattament tad-drenaġġ ma għandux jaqbeż il-45 mg kull m2 u l-400 mg kull m2 rispettivament tas-superfiċje taċ-ċilindru tal-istampar imħaddem.
Valutazzjoni u verifika: Ir-rilaxx tas-Cr u tas-Cu fid-drenaġġ għandu jiġi vverifikat fl-impjanti tal-istampar bir-rotogravura, wara t-trattament u qabel ir-rilaxx stess. Kull xahar għandu jinġabar kampjun rappreżentattiv tar-rilaxxi tas-Cr u tas-Cu. Tal-anqas test analitiku wieħed għandu jsir kull sena minn laboratorju akkreditat, sabiex jiġi ddeterminat il-kontenut tas-Cr u tas-Cu f’sottokampjun rappreżentativ ta’ dawn il-kampjuni. Il-konformità ma’ dawn il-kriterji għandha tiġi vverifikata billi jiġi diviż il-kontenut tas-Cr u tas-Cu, kif iddeterminat minn dak it-test analitiku annwali, bis-superfiċje taċ-ċilindru mħaddem waqt l-istampar. Is-superifiċje taċ-ċilindru mħaddem waqt l-istampar tiġi kkalkulata billi tiġi mmultiplikata s-superfiċje taċ-ċilindru (= 2πrL, fejn r hija r-radju u L hija t-tul taċ-ċilindru) bl-għadd ta’ produzzjonijiet stampati matul sena (l-għadd ta’ kompiti differenti ta’ stampar).
(b) Emissjonijiet fl-arja
Komposti Organiċi Volatili (VOCs)
Għandu jintlaħaq il-kriterju li ġej:
(PVOC – RVOC)/Pkarta < 5 [kg/tunnellati]
Fejn:
|
PVOC |
= |
il-kilogrammi totali fis-sena ta’ VOCs inklużi fil-prodotti kimiċi mixtrija, użati għall-produzzjoni totali fis-sena ta’ prodotti stampati |
|
RVOC |
= |
il-kilogrammi totali fis-sena ta’ VOCs meqruda bit-taffija, irkuprati mill-proċess tal-istampar u mibjugħa jew użati mill-ġdid |
|
Pkarta |
= |
it-tunnellati ta’ karta kull sena mixtrija u użati għall-produzzjoni ta’ prodotti stampati. |
Meta stamperija tuża teknoloġiji differenti tal-istampar, dan il-kriterju għandu jintlaħaq għal kull waħda minnhom b’mod separat.
It-terminu PVOC għandu jiġi kkalkulat mill-informazzjoni SDS marbuta mal-kontenut ta’ VOCs, jew minn dikjarazzjoni simili pprovduta mill-fornitur tal-prodotti kimiċi.
It-terminu RVOC għandu jiġi kkalkulat mid-dikjarazzjoni dwar il-kontenut ta’ VOCs inklużi fil-prodotti kimiċi mibjugħa, jew mir-reġistru tal-għadd intern (jew kwalunkwe dokument ieħor ekwivalenti), li jirrapporta l-ammont annwali tal-VOCs irkuprati jew użati mill-ġdid fuq il-post.
Kundizzjonijiet speċifiċi għall-istampar heat-set (issettjar bis-sħana):
(i) Għall-istampar offset bl-issettjar bis-sħana (heat-set), b’unità integrata għal wara l-kombustjoni, għandu japplika l-metodu ta’ kalkolu li ġej:
|
PVOC |
= |
90 % tal-kilogrammi totali annwali ta’ VOCs inklużi fis-soluzzjonijiet għall-umidifikazzjoni, użati għall-produzzjoni annwali ta’ prodotti stampati, + 85 % mill-kilogrammi totali annwali ta’ VOCs inklużi fl-aġenti tal-ħasil użati għall-produzzjoni annwali tal-prodotti stampati; |
(ii) Għall-istampar offset bl-issettjar bis-sħana (heat-set), mingħajr unità integrata għal wara l-kombustjoni, għandu japplika l-metodu ta’ kalkolu li ġej:
|
PVOC |
= |
90 % tal-kilogrammi totali annwali ta’ VOCs inklużi fis-soluzzjonijiet għall-umidifikazzjoni, użati għall-produzzjoni annwali ta’ prodotti stampati, + 85 % mill-kilogrammi totali annwali ta’ VOCs inklużi fl-aġenti tal-ħasil użati għall-produzzjoni annwali tal-prodotti stampati, + 10 % mill-kilogrammi totali annwali ta’ VOCs inklużi fil-linek tal-istampar użata għall-produzzjoni annwali ta’ prodotti stampati. |
Għall-punti (i) u (ii), jistgħu jintużaw perċentwali proporzjonalment iktar baxxi minn 90 % u 85 % f’dan il-kalkolu, jekk jiġi demostrat li iktar minn 10 % jew 15 %, rispettivament, mill-kilogrammi totali annwali tal-VOCs inklużi fis-soluzzjonijiet għall-umidifikazzjoni jew fl-aġenti tal-ħasil użati għall-produzzjoni annwali tal-prodotti stampati, ġew imtaffija fis-sistema ta’ trattament għall-gassijiet ta’ kombustjoni mill-proċess tat-tnixxif.
Valutazzjoni u verifika: Għandha tiġi pprovduta, mill-fornitur tal-kimiki, dikjarazzjoni tal-kontenut ta’ VOCs fl-alkoħol, l-aġenti tal-ħasil, il-linek, is-soluzzjonijiet għall-umidifikazzjoni, jew prodotti kimiċi oħra korrispondenti. L-applikant għandu jipprovdi evidenza tal-kalkolu skont il-kriterji stipulati hawn fuq. Il-perjodu għall-kalkoli għandu jissejjes fuq il-produzzjoni ta’ matul 12-il xahar. Fil-każ ta’ impjant ġdid jew mibni mill-ġdid, il-kalkoli għandhom jissejsu fuq mill-inqas tliet xhur ta’ funzjonament rappreżentattiv tal-impjant.
(c) Emissjonijiet mill-istampar bir-rotogravura ta’ pubblikazzjonijiet
(i) L-emissjonijiet ta’ VOCs fl-arja mill-istampar bir-rotogravura ta’ pubblikazzjonijiet ma għandhomx jaqbżu l-50 mg C/Nm3;
Valutazzjoni u verifika: L-applikant għandu jipprovdi d-dokumentazzjoni rilevanti li turi l-konformità ma’ dawn il-kriterji.
(ii) Għandu jiġi installat tagħmir għat-tnaqqis tal-emissjonijiet tas-Cr6 + fl-arja;
(iii) L-emissjonijiet tas-Cr6 + fl-arja ma għandhomx jaqbżu l-15-il mg għal kull tunnellata karta.
Valutazzjoni u verifika: L-applikant għandu jipprovdi dikjarazzjoni tas-sistema implimentata, flimkien ma’ dokumentazzjoni marbuta mal-kontroll u mal-monitoraġġ tal-emissjonijiet tas-Cr6+. Id-dokumentazzjoni għandha tinkludi r-riżultati tal-ittestjar marbutin mat-tnaqqis tal-emissjonijiet fl-arja tas-Cr6+.
(d) Proċessi tal-istampar fejn ma tapplika l-ebda miżura leġiżlattiva
Is-solventi volatili mill-proċess ta’ tnixxif tal-istampar offset bl-issettjar bis-sħana u bil-flessografija għandhom ikunu ġġestiti permezz tal-irkupru, tal-kombustjoni, jew ta’ kwalunkwe sistema ekwivalenti. Fil-każijiet kollha fejn ma tapplika l-ebda miżura leġiżlattiva, l-emissjonijiet fl-arja tal-VOCs ma għandhomx jaqbżu l-20 mg C/Nm3.
Dan ir-rekwiżit ma japplikax għall-ipprintjar bl-iskrin jew għall-ipprintjar diġitali. Barra minn hekk, ma japplikax għall-installazzjonijiet tal-issettjar bis-sħana jew tal-flessografija b’konsum tas-solventi ta’ inqas minn 15-il tunnellata fis-sena.
Valutazzjoni u verifika: L-applikant għandu jipprovdi dikjarazzjoni tas-sistema implimentata, flimkien ma’ dokumentazzjoni u riżultati tal-ittestjar marbutin mal-kontroll u mal-monitoraġġ tal-emissjonijiet fl-arja.
Kriterju 5 — L-iskart
(a) Il-ġestjoni tal-iskart
Il-faċilità fejn isiru l-prodotti tal-karta stampata għandu jkollha implimentata sistema għall-ġestjoni tal-iskart, inklużi l-prodotti reżidwali mnisslin mill-produzzjoni ta’ prodotti tal-karta stampata, kif iddefinit mill-awtoritajiet regolatorji rilevanti lokali u nazzjonali.
Is-sistema għandha tiġi ddokumentata jew spjegata, u għandha tinkludi informazzjoni tal-anqas dwar il-punti li ġejjin:
(i) il-proċeduri għall-manipulazzjoni, il-ġbir, is-separazzjoni u l-użu ta’ materjali riċiklabbli mill-fluss tal-iskart;
(ii) il-proċeduri għall-irkupru minn qabel ta’ materjali għal użi oħra, bħall-inċinerazzjoni, sabiex jiġġeneraw fwar jew sħana għall-proċess, jew għal użu agrikolu;
(iii) il-proċeduri għall-manipulazzjoni, il-ġbir, is-separazzjoni u r-rimi tal-iskart perikoluż, kif iddefinit mill-awtoritajiet regolatorji rilevanti lokali u nazzjonali.
Valutazzjoni u verifika: L-applikant għandu jipprovdi dikjarazzjoni tal-konformità ma’ dan il-kriterju, flimkien ma’ deskrizzjoni tal-proċeduri adottati għall-ġestjoni tal-iskart. Fejn xieraq, kull sena l-applikant għandu jipprovdi d-dikarazzjoni korrispondenti lill-awtorità lokali. Fejn il-ġestjoni tal-iskart tintbagħat f’idejn ħaddieħor, is-sottokuntrattur għandu jipprovdi dikjarazzjoni ta’ konformità ma’ dan il-kriterju wkoll.
(b) Karta għall-iskart
L-ammont “X” ta’ karta għall-iskart prodotta għandu jkun:
|
Metodu tal-istampar |
Massimu ta’ karti għall-iskart (%) |
|
Folja offset |
23 |
|
Coldset, gazzetti |
10 |
|
Coldset, stampar ta’ formoli |
18 |
|
Rotazzjoni coldset (għajr gazzetti u formoli) |
19 |
|
Rotazzjoni bl-issettjar bis-sħana (heatset) |
21 |
|
Stampar bil-gravura |
15 |
|
Flessografija (għajr il-bord tal-fibri mmewweġ) |
11 |
|
Stampar diġitali |
10 |
|
Flessografija, bord tal-fibri mmewweġ |
17 |
|
Stampar bl-iskrin |
23 |
fejn:
|
X |
= |
it-tunnellati annwali ta’ karta għall-iskart prodotta waqt l-istampar (inklużi l-proċessi ta’ tlestija) tal-prodott tal-karta stampata bl-Ekotikketta, diviżi bit-tunnellati annwali tal-karta mixtrija u użati għall-produzzjoni tal-prodott tal-karta stampata bl-Ekotikketta. |
Fejn l-istamperija twettaq proċessi ta’ tlestija f’isem stamperija oħra, l-ammont tal-karta għall-iskart prodotta f’dawk il-proċessi ma għandux jiġi inkluż fil-kalkolu ta’ “X”.
Fejn il-proċessi ta’ tlestija jintbagħtu f’idejn impriża oħra sottokuntrattata, l-ammont tal-karta għall-iskart li jirriżulta mix-xogħol sottokuntrattat għandu jiġi kkalkulat u ddikjarat fil-kalkolu ta’ “X”.
Valutazzjoni u verifika: L-applikant għandu jipprovdi deskrizzjoni tal-kalkolu tal-ammont tal-karta għall-iskart, flimkien ma’ dikjarazzjoni mill-kuntrattur li jiġbor il-karta għall-iskart mill-istamperija. Għandhom jiġu pprovduti t-termini u l-kalkoli tas-sottokuntrattar fir-rigward tal-ammont tal-karta għall-iskart involut fil-proċessi ta’ tlestija. Il-perjodu għall-kalkoli għandu jissejjes fuq il-produzzjoni ta’ matul 12-il xahar. Fil-każ ta’ impjant ġdid jew mibni mill-ġdid, il-kalkoli għandhom jissejsu fuq mill-inqas tliet xhur ta’ funzjonament rappreżentattiv tal-impjant.
Kriterju 6 — Użu tal-enerġija
L-istamperija għandha tistabbilixxi reġistru tat-tagħmir kollu li jikkonsma l-enerġija (inklużi l-makkinerija, id-dawl, il-kundizzjonament tal-arja, u t-tiksiħ), kif ukoll programm li jikkonsisti f’miżuri għat-titjib tal-effiċjenza fl-użu tal-enerġija.
Valutazzjoni u verifika: L-applikant għandu jipprovdi r-reġistru tat-tagħmir li jikkonsma l-enerġija flimkien mal-programm ta’ titjib.
Kriterju 7 — Taħriġ
Kull membru tal-persunal li jieħu sehem fl-operat ta’ kuljum għandu jingħata l-għarfien meħtieġ sabiex ikun żgurat li r-rekwiżiti tal-Ekotikketta jintlaħqu u jittejbu kontinwament.
Valutazzjoni u verifika: L-applikant għandu jipprovdi dikjarazzjoni tal-konformità ma’ dan il-kriterju, flimkien mad-dettalji tal-programm ta’ taħriġ, il-kontenut tiegħu, u indikazzjoni dwar liema mill-persunal irċieva t-taħriġ, liema taħriġ u meta. L-applikant għandu jipprovdi wkoll kampjun tal-materjal tat-taħriġ lill-awtorità kompetenti.
Kriterju 8 — Adegwatezza għall-użu
Il-prodott għandu jkun adattat għall-iskop tiegħu.
Valutazzjoni u verifika: L-applikant għandu jipprovdi d-dokumentazzjoni rilevanti li turi l-konformità ma’ dan il-kriterju. L-istandards nazzjonali jew kummerċjali, fejn rilevanti, jistgħu jintużaw mill-applikant biex juri l-adegwatezza għall-użu tal-prodotti tal-karta stampata.
Kriterju 9 — Informazzjoni fuq il-prodott
L-informazzjoni li ġejja għandha tidher fuq il-prodott:
“Jekk jogħġbok żomm il-karta użata għar-riċiklaġġ”.
Evalwazzjoni u verifika: l-applikant għandu jipprovdi kampjun tal-prodott li jkollu l-informazzjoni meħtieġa.
Kriterju 10 — L-informazzjoni li tidher fuq l-Ekotikketta tal-UE
It-tikketta fakultattiva b’kaxxa testwali għandha tinkludi t-test li ġej:
— Dan il-prodott stampat huwa riċiklabbli;
— Stampat fuq karta b’impatt ambjentali baxx;
— Ġew limitati l-emissjonijiet ta’ kimiki fl-ajra u fl-ilma mill-produzzjoni tal-karta u mill-proċess tal-istampar.
Il-linji gwida għall-użu tat-tikketta fakultattiva bil-kaxxa testwali jistgħu jinstabu fil-“Linji gwida għall-użu tal-logo tal-Ekotikketta tal-UE” fuq is-sit elettroniku:
http://ec.europa.eu/environment/ecolabel/promo/pdf/logo%20guidelines.pdf
Valutazzjoni u verifika: L-applikant għandu jipprovdi kampjun tal-prodott tal-karta stampata li juri t-tikketta, flimkien ma’ dikjarazzjoni ta’ konformità ma’ dan il-kriterju.
( 1 ) ĠU L 212, 7.8.2001, p. 24.
( 2 ) Id-Deċiżjoni tas-7 ta’ Ġunju 2011 dwar l-istabbiliment tal-kriterji ekoloġiċi għall-għoti tal-Ekotikketta tal-UE għall-karta għall-ikkupjar u l-karta grafika (ĠU L 149, 8.6.2011, p. 12).
( 3 ) Id-Deċiżjoni tat-12 ta’ Lulju 2012 li tistabbilixxi l-kriterji ekoloġiċi għall-għoti tal-Ekotikketta tal-UE għall-karta tal-gazzetti (ĠU L 202, 28.7.2012, p. 26).
( 4 ) ĠU L 353, 31.12.2008, p. 1.
( 5 ) ĠU L 196, 16.8.1967, p. 1.
( 6 ) ĠU L 396, 30.12.2006, p. 1.
( 7 ) ĠU L 200, 30.7.1999, p. 1.
( 8 ) Assessment of Print Product Recyclability — Deinkability Score — User's Manual, www.paperrecovery.org, “Publications”.