IL-KUMMISSJONI EWROPEA

Brussell, 15.7.2015

SWD(2015) 136 final

DOKUMENT TA’ ĦIDMA TAL-PERSUNAL TAL-KUMMISSJONI

SOMMARJU EŻEKUTTIV TAL-VALUTAZZJONI TAL-IMPATT

Li jakkumpanja d-dokument

Proposta għal Direttiva tal-Parlament Ewropew u tal-Kunsill

li temenda d-Direttiva 2003/87/KE biex ittejjeb it-tnaqqis kosteffettiv tal-emissjonijiet u investimenti b'emissjonijiet baxxi ta' karbonju

{COM(2015) 337 final}
{SWD(2015) 135 final}

1.Definizzjoni tal-problema

L-analiżi tal-problema ġenerali tal-miri ta' politika dwar it-tibdil fil-klima għall-2030 tal-UE u l-ETS twettqet fil-Valutazzjoni tal-Impatt 1 għall-qafas għall-klima u l-enerġija għall-2030 2 . F'Ottubru 2014, il-Kunsill Ewropew qabel dwar il-qafas għall-2030 inkluż tnaqqis domestiku vinkolanti ta' mill-inqas 40 % sal-2030 meta mqabbel mal-1990, u mira ta' tnaqqis fl-emissjonijiet korrispondenti għall-iskema għall-iskambju ta' kwoti tal-emissjonijiet tal-UE (ETS) ta' 43 % meta mqabbel mal-2005, kif ukoll kontinwazzjoni tal-allokazzjoni bla ħlas lill-industrija u dwar li jiġu stabbiliti mekkaniżmi ta' finanzjament biex tiġi żgurata t-tranżizzjoni tal-UE lejn emissjonijiet baxxi tal-karbonju. Il-problema li trid tiġi indirizzata hija kif se jiġu adattati d-dispożizzjonijiet rispettivi tad-Direttiva tal-ETS għal wara l-2020 filwaqt li titjieb ulterjorment is-sistema abbażi tal-esperjenza miksuba.

1.1.L-allokazzjoni bla ħlas u l-indirizzar tar-riskju ta' rilokazzjoni tal-emissjonijiet tal-karbonju

Il-kwoti bla ħlas lill-industrija jingħataw biex jiġi indirizzat ir-riskju potenzjali ta' rilokazzjoni tal-emissjonijiet tal-karbonju 3 fin-nuqqas ta' miżuri ta' politika dwar it-tibdil fil-klima komparabbli f'ekonomiji ewlenija oħrajn. Il-problema li trid tiġi indirizzata hija kif għandhom jiġu stabbiliti regoli fil-ġejjieni għall-allokazzjoni bla ħlas lill-industrija, sabiex jiġu allokati bl-aħjar mod il-madwar 6,3 biljun allokazzjoni bla ħlas disponibbli abbażi tal-prinċipji definiti mill-Kunsill Ewropew.

1.2.Mekkaniżmi ta' finanzjament għal emissjonijiet baxxi tal-karbonju

Bħala parti mill-qafas għall-2030, il-Kunsill Ewropew qabel li joħloq tliet mekkaniżmi ta' finanzjament għal emissjonijiet baxxi tal-karbonju. L-ewwel, Fond għall-Innovazzjoni ta' 400 miljun kwota li jappoġġja proġetti innovattivi ħafna u bla preċedent b'emissjonijiet baxxi tal-karbonju fl-industrija u fl-enerġija Ewropea, li jibni fuq il-faċilità eżistenti NER 300. Barra minn hekk, madwar 310 miljun kwota se jintużaw għal Fond għall-Modernizzazzjoni biex jappoġġja Stati Membri tal-UE 4 bi dħul aktar baxx fit-titjib tal-effiċjenza tal-enerġija u l-immodernizzar tas-sistemi tal-enerġija. Fl-aħħar nett, l-għażla eżistenti għal Stati Membri bi dħul aktar baxx biex jagħtu kwoti bla ħlas lis-settur tal-enerġija tagħhom tkompli, b'limitu ta' mhux iżjed minn 40 % tal-kwoti tagħhom għall-irkantar qabel id-distribuzzjoni mill-ġdid. Din il-valutazzjoni tal-impatt tanalizza l-aħjar għażliet għat-tfassil ta' dawn il-mekkaniżmi ta' finanzjament għal emissjonijiet baxxi tal-karbonju.

1.3.Titjib ulterjuri għas-sett attwali ta' regoli

Ir-regoli attwali għall-EU ETS ilhom fis-seħħ sa mill-2013 u huma relattivament reċenti, iżda abbażi tal-esperjenza, wara l-2020 għandhom jitqiesu ċerti bidliet limitati għal aspetti ewlenin tal-ETS (il-validità tal-kwoti, ir-reġistru tal-Unjoni u l-emittenti żgħar).

2.Għanijiet

L-għan ġenerali tal-politika dwar it-tibdil fil-klima tal-UE, u tal-EU ETS bħala l-istrument prinċipali tagħha, huwa li tikkontribwixxi għal-limitazzjoni taż-żieda fit-temperaturi medji globali għal mhux iżjed minn 2 gradi Celsius 'il fuq mil-livell preindustrijali. L-għan speċifiku tal-politika huwa li tirfina u ttejjeb ir-regoli tal-EU ETS wara l-2020, u tallinjahom mal-mira ta' tnaqqis fl-emissjonijiet għall-2030. L-għanijiet operazzjonali għat-tliet gruppi (l-allokazzjoni bla ħlas, il-mekkaniżmi ta' finanzjament għal emissjonijiet baxxi tal-karbonju u t-titjib ulterjuri tar-regoli attwali) għandhom l-għan li jindirizzaw il-problemi kif iddefiniti hawn fuq.

3.L-għażliet u l-impatti

3.1.L-allokazzjoni bla ħlas u l-indirizzar tar-riskju ta' rilokazzjoni tal-emissjonijiet tal-karbonju

Ġew żviluppati diversi għażliet politiċi għal kull wieħed mill-elementi tas-sistema ta' allokazzjoni bla ħlas u għall-ikkumpensar tal-ispejjeż indiretti, li jsegwu l-prinċipji ta' gwida tal-konklużjonijiet tal-Kunsill Ewropew.

Il-valuri tal-parametri referenzjarji Hemm diversi għażliet dwar kif u kemm-il darba jiġu aġġornati l-valuri tal-parametri referenzjarji (kwoti għal kull tunnellata ta' prodott). Il-valutazzjoni tal-impatt tqis l-għażla tal-linja bażi (aġġornament ibbażat fuq dejta ġdida rrapportata mill-operaturi), aġġornament tar-rata unika fissa, aġġornament rikorrenti tar-rata fissa, aġġornament ibbażat fuq dejta ġdida kkombinat ma' aġġornament tar-rata fissa u aġġornament sħiħ rikorrenti tal-ġbir tad-dejta.

Il-livell u l-aġġustamenti tal-produzzjoni. Il-livell tal-produzzjoni huwa mmultiplikat bil-valur tal-parametru referenzjarju sabiex jiġi ddeterminat l-ammont ta' kwoti għal kull installazzjoni. Hemm diversi għażliet dwar in-numru ta' snin li jridu jintużaw għal-livelli ta' produzzjoni, il-frekwenza tal-aġġornament ta' dawn is-snin, u kif jiġu ttrattati l-bidliet annwali fil-livelli tal-produzzjoni. Il-valutazzjoni tal-impatt tqis l-għażla tal-linja bażi (livelli tal-produzzjoni ddeterminati darba u r-regoli kurrenti għall-bidliet fil-produzzjoni), alternattiva b'livelli tal-produzzjoni storiċi ddefiniti darba u bbażati fuq ħames snin (2013/17) għall-perjodu sħiħ ta' 10 snin u alternattiva oħra b'livelli tal-produzzjoni għal żewġ perjodi ta' ħames snin (2013-17, 2018-22 rispettivament). Żidiet u tnaqqis sinifikanti fil-produzzjoni huma indirizzati permezz tal-istess livelli limitu għall-produzzjoni miżjuda u mnaqqsa. L-allokazzjoni miżjuda għall-produzzjoni miżjuda tiġi mir-riżerva ta' dawk li jidħlu ġodda, li hija jew ammont fiss (linja bażi) jew tiżdied mill-kwoti mhux użati matul dak il-perjodu. Din tista' tiġi ffinanzjata mill-kwoti tal-fażi 4, jew mill-250 miljun kwota mhux allokati fil-fażi 3.

Gruppi u kriterji tar-rilokazzjoni tal-emissjonijiet tal-karbonju Is-setturi meqjusin li huma esposti għal riskju sinifikanti ta' rilokazzjoni tal-emissjonijiet tal-karbonju minħabba l-intensità tal-emissjonijiet tal-karbonju u l-kummerċ tagħhom jirċievu iżjed kwoti bla ħlas. Fil-preżent, hemm differenzjazzjoni limitata ħafna fost is-setturi, għaliex 97 % huma fuq il-lista ta' rilokazzjoni tal-emissjonijiet tal-karbonju. Il-valutazzjoni tal-impatt tesplora għażliet għal approċċ iżjed immirat, ibbażat fuq id-differenzjazzjoni tas-setturi skont il-livell ta' esponiment tagħhom għar-riskju ta' rilokazzjoni tal-emissjonijiet tal-karbonju – modifika żgħira tal-kriterji attwali; tapplika fatturi uniformi għal kollha; u tiddifferenzja s-setturi f'4 gruppi.

Kumpens għall-ispejjeż indiretti L-ispejjeż indiretti tal-karbonju huma l-ispejjeż tal-emissjonijiet tad-diossidu tal-karbonju relatati mal-produzzjoni tal-elettriku li jiġu mgħoddija lill-konsumaturi industrijali tal-elettriku. Fil-preżent, l-Istati Membri jistgħu jagħtu sussidji lil ċerti industriji elettrointensivi li jikkumpensaw parzjalment għal dawn l-ispejjeż indiretti, soġġett għar-regoli dwar l-għajnuna mill-Istat. Il-valutazzjoni tal-impatt tikkunsidra l-linja bażi (it-tkomplija tal-approċċ attwali), għażla li tistabbilixxi skema ta' kumpens għall-UE obbligatorja, iffinanzjata mid-dħul mill-irkantar nazzjonali jew minn allokazzjoni bla ħlas, u kombinazzjoni ta' skema ta' kumpens għall-UE ffinanzjata permezz ta' allokazzjoni bla ħlas flimkien ma' kumpens fakultattiv fil-livell nazzjonali.

L-għażliet għal kull elementi ġew skrinjati bl-użu ta' għanijiet operazzjonali marbuta mal-konklużjonijiet tal-Kunsill Ewropew, u dawk bl-ogħla punteġġi kienu kkombinati f'pakketti ta' għażliet:

'Il-linja bażi A' tirrifletti d-Direttiva tal-ETS kif inhi, iżda ma tikkorrispondix għall-konklużjonijiet tal-Kunsill Ewropew u ma ġietx ivvalutata.

'Il-linja bażi B' tissoponi li r-regoli attwali jiġġeddu għall-fażi li jmiss u li l-pakketti kollha jkunu vvalutati billi jitqabblu magħha.

'Il-linja bażi Bbis' hija simili ħafna għal-"Linja bażi B" b'aġġustamenti limitati għall-kriterji dwar ir-rilokazzjoni tal-emissjonijiet tal-karbonju.

Il-pakkett 'Sempliċi' huwa mfassal biex inaqqas il-piż amministrattiv u l-kumplessità.

Il-pakkett 'Immirat' huwa bbażata fuq għażliet ta' politika li għandhom l-għan li jiżguraw li l-installazzjonijiet l-aktar effiċjenti ma jkollhomx spejjeż mhux dovuti, filwaqt li, fl-istess ħin, jiġi evitat il-qligħ mhux mistenni.

'Sempliċi' u 'Mmirat' jirrappreżentaw modi differenti biex jiġu indirizzati l-kompromessi bejn il-prinċipji ta' gwida, minħabba li l-maġġoranza tal-għażliet ta' politika fil-pakkett “Immirat” jeħtieġu l-ġbir tad-dejta.

Il-pakkett 'Bidliet limitati' huwa kombinazzjoni tal-pakketti “Sempliċi” u “Mmirat”.

L-impatti    

L-allokazzjoni bla ħlas li tindirizza r-riskju ta' rilokazzjoni tal-emissjonijiet tal-karbonju għandha impatt dirett fuq installazzjonijiet industrijali koperti mill-ETS u mill-baġits tal-Istati Membri.

Il-kobor tal-impatti ekonomiċi tar-regoli dwar l-allokazzjoni bla ħlas huwa ta' madwar 6,3 biljun kwota, li jista' jammonta għal madwar EUR 150 biljun 5 . Dawn ir-riżorsi pubbliċi jeħtieġu jkunu allokati fl-aħjar mod u jrid ikun żgurat li ma jfixklux il-prinċipju ta' min iniġġes iħallas.

L-ispejjeż tal-konformità għas-setturi jiddependu fuq il-prezz tal-karbonju, il-livell ta' allokazzjoni bla ħlas, u l-emissjonijiet mill-produzzjoni. Il-prezz tal-karbonju mhuwiex affettwat b'mod dirett mir-regoli għall-allokazzjoni bla ħlas, għaliex l-ammont totali ta' kwoti disponibbli (il-limitu massimu) huwa ffissat minn qabel. L-ispejjeż totali tal-karbonju fil-livell makro huma ddeterminati mill-mira ta' tnaqqis globali fl-emissjonijiet ta' 40 %, u l-mira speċifika ta' tnaqqis ta' 43 % għall-ETS, kif analizzat fil-valutazzjoni tal-impatt għall-qafas għall-klima u l-enerġija għall-2030.

Ma ġiet identifikata l-ebda differenza sinifikanti bejn il-pakketti tal-għażliet politiċi għall-allokazzjoni bla ħlas f'termini ta' impatti ambjentali għaliex dawn jiddependu l-aktar fuq it-tnaqqis totali tal-emissjonijiet ta' 43 % fl-2030 iddeterminat mil-limitu massimu.

Għall-impatti soċjali, id-differenzi bejn il-pakketti tal-għażliet huma pjuttost żgħar, u jikkonċernaw biss il-prezzijiet tat-tisħin distrettwali.

Rigward l-għanijiet operazzjonali u l-konnessjoni tagħhom mal-elementi tal-pakketti tal-għażliet, wieħed jista' jinnota dan li ġej:

Il-valuri tal-parametri referenzjarji se jiġu allinjati aktar mill-qrib mal-progress teknoloġiku permezz ta' aġġornamenti regolari tal-parametri referenzjarji bbażati fuq ġbir ta' dejta sħiħa (il-pakketti 'Linja bażi', 'Bidliet limitati' u 'Mmirat'). Aġġornamenti bbażati fuq rata unika fissa (il-pakkett 'Sempliċi') se jagħtu valur ta' parametri referenzjarji aktar impenjattiv għas-setturi b'kapaċitajiet teknoloġiċi taħt il-medja meta mqabbla mas-setturi b'kapaċitajiet teknoloġiċi ogħla mill-medja. Approċċ aktar sfumat, pereżempju b'aġġornament ibbażat fuq rati fissi multipli (eż. baxxa, medja, għolja) u/jew ikkumplimentat bil-ġbir tad-dejta, jista' joħloq allinjament eqreb mal-progress teknoloġiku miksub f'setturi differenti.

Jekk l-allokazzjoni bla ħlas tkun allinjata wisq mill-qrib mal-karatteristiċi ta' industrija (il-progress teknoloġiku, il-livelli ta' produzzjoni jew emissjoni) dan jista' jnaqqas l-inċentivi għall-innovazzjoni.

Sabiex l-allokazzjoni bla ħlas tkun immirata aħjar lejn dawk l-installazzjonijiet li għandhom l-aħjar prestazzjoni u li huma l-aktar esposti għar-riskji ta' rilokazzjoni tal-emissjonijiet tal-karbonju, l-ammont tal-allokazzjoni bla ħlas irid ikun allinjat mal-livell ta' riskju ta' rilokazzjoni tal-emissjonijiet tal-karbonju li s-setturi huma esposti għalih. Il-pakketti “Linja bażi” ma jiksbux allokazzjoni mmirata għaliex il-fattur ta' korrezzjoni – li jista' jiżdied għal madwar 35 % fl-2030 – inaqqas l-allokazzjoni bla ħlas tul is-setturi irrispettivament mir-riskji ta' rilokazzjoni tal-emissjonijiet tal-karbonju tagħhom. Il-pakketti ta' għażla “Bidliet limitati” u “Mmirat” jindirizzaw aħjar id-differenzi fir-riskji ta' rilokazzjoni tal-emissjonijiet tal-karbonju permezz tal-klassifikazzjoni tas-setturi f'4 gruppi ta' rilokazzjoni tal-emissjonijiet tal-karbonju u għandhom il-potenzjal li jevitaw il-fattur ta' korrezzjoni.

Ir-regoli għall-aġġustamenti għall-bidliet fil-livelli tal-produzzjoni u r-riżerva għal dawk li jidħlu ġodda jistgħu jittejbu (bħal fil-pakketti tal-għażliet 'Sempliċi', 'Bidliet limitati' u 'Mmirat') u b'hekk jikkontribwixxu biex inaqqsu l-fattur ta' korrezzjoni u jipprovdu iżjed kwoti bla ħlas għal kumpaniji li qed jikbru malajr.

Sistema ta' allokazzjoni mmirata aħjar (bħalma hu l-każ tal-pakketti 'Bidliet limitati' u 'Mmirat') ukoll sejra tnaqqas il-probabbiltà għal qligħ mhux mistenni, filwaqt li sistema ta' allokazzjoni kompletament immirata ġġib magħha kumplessità amministrattiva eċċessiva.

Kumpens iżjed armonizzat tal-ispejjeż indiretti tal-karbonju – iffinanzjat mid-dħul mill-irkanti tal-EU ETS għall-Istati Membri – joffri protezzjoni ogħla għal industriji elettrointensivi, iżda bir-riżultat li d-dħul mill-irkanti ma jistax jintuża għal skopijiet oħra, eż. biex jappoġġja l-ġenerazzjoni ta' elettriku rinnovabbli li jista' jnaqqas iżjed l-ispejjeż tal-karbonju fuq terminu twil.

Minħabba l-vantaġġi u l-iżvantaġġi tal-pakketti differenti, tista' titqies ukoll kombinazzjoni, pereżempju ċerti miżuri tal-pakkett 'Sempliċi' li għandhom prestazzjoni tajba fir-rigward ta' inċentivi ekonomiċi u s-sempliċità amministrattiva – eż. valuri ta' parametri referenzjarji bbażati fuq rata/i fissi (multipli) u allinjament aħjar mad-dejta tal-produzzjoni – ikkombinati mar-regoli dwar ir-rilokazzjoni tal-emissjonijiet tal-karbonju (mill-pakketti “Bidliet limitati” u “Mmirat”) sabiex jimmiraw aħjar il-kwoti bla ħlas lejn dawk is-setturi li huma l-aktar esposti għar-regoli dwar ir-rilokazzjoni tal-emissjonijiet tal-karbonju. Madankollu, l-għażla politika fl-aħħar mill-aħħar tiddependi fuq l-enfasi li dawk li jieħdu d-deċiżjonijiet ipoġġu fuq l-għanijiet differenti.

3.1.Mekkaniżmi ta' Finanzjament għal Emissjonijiet Baxxi tal-Karbonju

Għall-Fond għall-Innovazzjoni, qed jitqiesu bidliet għar-regoli attwali tal-NER 300 għall-iskrinjar tal-proġetti u l-approċċ ta' kondiviżjoni tar-riskji, b'mod partikolari għall-proġetti tal-industrija.

Għall-analiżi tal-proġetti, il-qafas attwali huwa bbażat fuq valutazzjoni tal-eliġibbiltà għall-potenzjal innovattiv u l-vijabbiltà teknika u ekonomika u għażla bbażata fuq il-klassifikazzjoni tal-prestazzjoni tal-ispiża għal kull unità. Dan jista' jinżamm jew jiġi mibdul għall-industrija permezz taż-żieda ta' kriterji dwar ir-replikabilità u l-klassifikazzjoni tal-proġetti bbażati fuq l-innovazzjoni.

Bidliet potenzjali għall-mod kif jingħata l-appoġġ finanzjarju huma żieda fir-rata massima ta' finanzjament u l-irbit ta' parti mill-appoġġ mal-istadji aktar bikrin fiċ-ċiklu tal-ħajja tal-proġett bħat-tragwardji matul il-fażi ta' kostruzzjoni. Bidla ferm iżjed estensiva hija s-sostituzzjoni tal-għotja attwali mhux rimborżabbli bbażata fuq il-prestazzjoni minn strument finanzjarju bħal garanzija jew parteċipazzjoni fl-ekwità. Fuq il-bażi ta' dawn l-aspetti, qed jiġu kkunsidrati żewġ pakketti ta' għażliet:

Għażla 1 - bidliet għar-regoli attwali b'approċċ adattat aktar għal proġetti tal-industrija u żieda fir-rata ta' finanzjament. L-impatti ta' żieda fir-rata ta' finanzjament huma kkunsidrati f'din il-valutazzjoni tal-impatt, iżda huwa meħtieġ ittestjar tas-suq iżjed estensiv fil-kuntest tal-leġiżlazzjoni ta' implimentazzjoni għall-RES, is-CCS u l-industrija.

Għażla 2 - bidlet għar-regoli attwali: appoġġ mogħti minn faċilità finanzjarja permanenti permezz ta' strument finanzjarju.

L-analiżi tal-għażliet turi diversi kompromessi: il-kisba ta' innovazzjoni rivoluzzjonarja filwaqt li l-appoġġ jiġi immirat biex isir l-aħjar użu tal-fondi limitati; l-indirizzar tal-ostakli finanzjarji għall-innovazzjoni b'emissjonijiet baxxi tal-karbonju filwaqt li tiġi stabbilita struttura ta' ġestjoni effiċjenti u sempliċi. Għażla 1 tkun effettiva biex tindirizza ostakli finanzjarji speċifiċi għall-innovazzjoni b'emissjonijiet baxxi tal-karbonju għall-isponsors tal-proġetti. Din tista' tirriżulta f'ingranaġġ aktar baxx u numru aktar baxx ta' proġetti appoġġjati milli kieku jitkomplew ir-regoli attwali jew l-Għażla 2, iżda għandha l-ogħla potenzjal biex tindirizza l-ostakli speċifiċi għall-appoġġ tal-kummerċjalizzazzjoni ta' innovazzjoni rivoluzzjonarja għas-CCS, l-RES u l-industrija. Din tista' tagħti wkoll valur miżjud tal-UE sinifikanti billi tikkunsidra r-replikabilità tal-proġetti tal-industrija. Jistgħu wkoll jintlaħqu riżultati simili permezz tal-proċess ta' għażla ta' min jiġi l-ewwel jinqeda l-ewwel, ipprovdut mill-Għażla 2, iżda din l-għażla tillimita l-paragun bejn il-proposti tal-proġetti u tista' tkun trid tiġi kkombinata ma' mezzi oħra biex tappoġġja proġetti innovattivi ħafna.

Għall-Fond għall-Modernizzazzjoni, l-għażliet ewlenin meqjusin huma relatati mal-istruttura tal-governanza, u r-rwoli differenti li l-Istati Membri, il-Kummissjoni Ewropea u l-BEI jista' jkollhom biex jiksbu progress fuq l-għanijiet tal-Fond. 

Żewġ fatturi ewlenin jistgħu jiġu varjati rigward ir-rwol tal-Istati Membri u l-Kummissjoni: il-limitu sa fejn hemm linji gwida dwar l-eliġibbiltà, l-għażla u l-investiment iddefiniti fil-leġiżlazzjoni ta' implimentazzjoni mill-Kummissjoni; u l-kompożizzjoni tal-Bord ta' Tmexxija li jiddefinixxi ulterjorament ir-regoli u l-linji gwida.

Il-Bord ta' Tmexxija jista' jinkludi l-Istati Membri benefiċjarji, jew l-Istati Membri kollha (donaturi u benefiċjarji) u l-Kummissjoni. Il-BEI jista' jew iwettaq biss id-diliġenza dovuta u jkollu rwol konsultattiv, jew jista' jaġixxi bħala maniġer ta' fond f'isem l-Istati Membri benefiċjarji u l-Kummissjoni. L-għażliet ta' hawn taħt jirriflettu kombinazzjonijiet differenti:

Għażla 1: diskrezzjoni u responsabbiltà kbira għall-Istati Membri benefiċjarji, Fond għall-Modernizzazzjoni mfassal skont il-ħtiġijiet nazzjonali speċifiċi. Bord ta' Tmexxija tal-Istati Membri benefiċjarji jiddefinixxi l-kriterji tal-eliġibbilà u l-proġetti. Il-leġiżlazzjoni ta' implimentazzjoni tinkludi gwida ġenerali bid-dettalji tad-deċiżjonijiet meħudin mill-Bord ta' Tmexxija. Il-Kummissjoni tgħin fl-amministrazzjoni, il-BEI iwettaq id-diliġenza dovuta.

Għażla 2: kooperazzjoni akbar. Il-linji gwida dwar l-investiment jintlaħaq qbil dwarhom mill-Bord ta' Tmexxija tal-Istati Membri kollha u mill-Kummissjoni. Il-Kummissjoni tgħin fl-amministrazzjoni, il-BEI iwettaq id-diliġenza dovuta. Il-BEI għandu rwol ikbar bħala maniġer ta' fond u jibqa' responsabbli quddiem il-Bord ta' Tmexxija, jivvaluta programmi individwali, proġetti, u strumenti finanzjarji, u jissorvelja l-indikaturi tal-prestazzjoni.

Għażla 3: l-Istati Membri benefiċjarji jidentifikaw firxa ta' proġetti biex jiġu ffinanzjati permezz ta' strumenti finanzjarji, li jikkonformaw mal-kriterji ta' eliġibbiltà u l-prinċipji ġenerali għall-għażla tal-proġetti stabbiliti fil-leġiżlazzjoni ta' implimentazzjoni. Il-Kummissjoni tgħin fl-amministrazzjoni, il-BEI iwettaq id-diliġenza dovuta.

Il-Fond għall-Modernizzazzjoni huwa mistenni li joħloq investimenti li, skont it-tip ta' proġett appoġġjat, jistgħu joħolqu opportunitajiet ta' impjieg, inaqqsu l-emissjonijiet ta' gassijiet serra u jtejbu l-kwalità tal-arja lokali. It-tliet għażliet huma mqabbla, abbażi tal-effikaċja, il-koerenza, id-distorsjoni tas-suq u l-piż amministrattiv u hemm kompromessi. L-”effikaċja” hija importanti biex tiżgura li l-istruttura ta' governanza tikkontribwixxi lejn l-għanijiet tal-Fond. L-Għażla 3 għandha struttura ta' governanza sempliċi, iżda tista' timmobilizza inqas investimenti privati. L-Għażla 1 tindirizza l-prijoritajiet nazzjonali, iżda ma tista' ma tirriflettix bis-sħiħ il-prijoritajiet Ewropej. Jista' jkun hemm riskju ta' distorsjonijiet interni tas-suq tal-enerġija u frammentazzjoni li tikkawża piżijiet għall-investituri li jirriżulta f'effikaċja aktar baxxa. Għażla 2 tinvolvi approċċ bilanċjat li jippermetti ammont massimu ta' investiment privat u jikkunsidra kemm il-prijoritajiet nazzjonali kif ukoll dawk Ewropej.

Għall-allokazzjoni bla ħlas mhux obbligatorja għall-promozzjoni ta' investimenti għall-immodernizzar tas-settur tal-enerġija, l-aspetti ewlenin ivvalutati huma t-twaqqit, l-għażla tal-investimenti u r-rapportar, għaliex dawn fil-preżent jew ivarjaw bejn l-Istati Membri li jużaw din l-għażla, li jaffettwa l-volum u t-twaqqit tal-kwoti li jridu jiġu rkantati, jew għandhom effett negattiv fuq l-għanijiet operazzjonali (it-trasparenza, is-sempliċità u d-distorsjoni potenzjali tas-suq tal-enerġija).

Il-bidliet possibbli jinkludu s-sostituzzjoni tal-pjanijiet nazzjonali attwali b'kompetizzjoni miftuħa bbażata fuq prestazzjoni mmirata (sejħa għal offerti jew offerti kompetittivi fejn jintgħażlu / jingħataw prijorità investimenti li jirrappreżentaw l-aħjar valur għall-flus), jew il-pubblikazzjoni mill-Kummissjoni minflok ir-rapportar mill-Istati Membri. Jista' jintgħażel li jkun hemm ammont ugwali ta' allokazzjonijiet bla ħlas kull sena minflok l-approċċ attwali bi trajettorja li tonqos, li jaffettwa d-distribuzzjoni tal-investimenti matul il-perjodu u l-provvista ta' kwoti lis-suq. Fl-aħħar nett, regoli konsistenti dwar l-irkantar jekk il-kwoti ma jingħatawx bla ħlas jistgħu jnaqqsu l-varjazzjoni attwali bejn l-Istati Membri u jistabbilixxu skeda ta' żmien ċara għall-irkantar tal-kwoti mhux użati. Fuq il-bażi ta' dawn l-aspetti, qed jitqiesu tliet pakketti tal-għażliet.

Għażla 1: approċċ simplifikat b'regoli u proċeduri aktar konsistenti, li jillimita d-dewmien għall-investimenti u r-rapporti ppubblikati mill-Kummissjoni. Dan inaqqas id-differenzi fil-metodoloġiji bejn l-Istati Membri filwaqt li jżomm il-maġġoranza tal-prinċipji.

Għażla 2: bidliet li jiffukaw fuq għażla kompetittiva u miftuħa ta' investimenti. Kompetizzjoni miftuħa, ibbażata fuq l-aħjar valur għall-flus, tnaqqas ir-riskju potenzjali ta' distorsjoni tas-suq għal investimenti kbar. Investimenti iżgħar jistgħu jkunu approvati taħt eżenzjoni ta' kategorija ġenerali futura possibbli għar-regoli dwar l-għajnuna mill-Istat. L-irkantar tal-kwoti mhux użati jista' jiddewwem għal sena jew sentejn.

Għażla 3: l-ogħla livell ta' standardizzazzjoni b'perċentwal fiss ta' allokazzjoni bla ħlas fuq bażi annwali. L-approċċ huwa kompletament prevedibbli għas-suq. L-għażla tal-investimenti kollha eliġibbli hija permezz ta' kompetizzjoni miftuħa bbażata fuq l-aħjar valur għall-flus.

Hemm ċerti kompromessi prinċipali għall-għażliet meqjusin: l-approċċ simplifikat fl-Għażla 1 jagħti titjib limitat għat-trasparenza u jnaqqas il-piż amministrattiv, iżda ma jbiddilx l-għażla tal-investimenti għalhekk l-effikaċja ma tinbidilx b'mod sinifikanti. Il-bidla fit-trajettorja tal-allokazzjoni bla ħlas u l-inklużjoni ta' proċess ta' għażla kompetittiv jistgħu jwasslu għal piż amministrattiv ogħla, iżda għandhom potenzjal ikbar li jtejbu l-effikaċja u t-trasparenza. Għat-tliet għażliet kollha tista' titqies il-possibbiltà li l-Istati Membri jkunu jistgħu jinkludu l-kwoti tagħhom għal allokazzjoni bla ħlas fil-Fond għall-Modernizzazzjoni, li jipprovdi struttura unika għal investituri potenzjali.

Ġew identifikati tliet interkonnessjonijiet bejn il-mekkaniżmi ta' finanzjament għal emissjonijiet baxxi tal-karbonju: il-ħtieġa għal monetizzazzjoni iżjed bilanċjata ta' kwoti li tippermetti bidu fil-ħin dovut filwaqt li tnaqqas kemm jista' jkun l-impatt fuq is-suq tal-karbonju (il-Fond għall-Innovazzjoni u l-Fond għall-Modernizzazzjoni), similarità bejn l-investimenti aktar immirati fl-effiċjenza tal-enerġija u l-immodernizzar tas-settur tal-enerġija li jenfasizza l-ħtieġa li titqies l-akkumulazzjoni potenzjali (il-Fond għall-Modernizzazzjoni u allokazzjoni bla ħlas mhux obbligatorja lis-settur tal-enerġija), u l-impatt tat-traspożizzjoni u l-implimentazzjoni tar-regoli għall-Istati Membri benefiċjarji tal-Fond għall-Modernizzazzjoni u l-allokazzjoni bla ħlas fakultattiva lill-enerġija.

3.2.Titjib ulterjuri għas-sett attwali ta' regoli

L-arkitettura attwali tal-EU ETS hija relattivament reċenti, iżda abbażi tal-esperjenza, wara l-2020 għandhom jitqiesu ċerti bidliet limitati.

Dawn jistgħu jikkonċernaw:

il-validità tal-kwoti fil-fażijiet tal-ETS;

il-possibbiltà għall-Istati Membri li jeskludu ċerti installazzjonijiet żgħar mill-EU ETS u jkunu soġġetti għal miżuri ekwivalenti;

il-finanzjament sostenibbli tar-reġistru uniku tal-Unjoni għall-EU ETS.

(1)

Valutazzjoni tal-Impatt dwar Qafas ta' Politika għall-klima u l-enerġija fil-perjodu ta' bejn l-2020 u l-2030, SWD(2014) 15 final.

(2)

Komunikazzjoni mill-Kummissjoni dwar Qafas ta' politika għall-klima u l-enerġija fil-perjodu ta' bejn l-2020 u l-2030.

(3)

Żieda fl-emissjonijiet ta' gassijiet serra f'pajjiżi terzi fejn l-industrija mhijiex soġġetta għal restrizzjonijiet tal-karbonju komparabbli.

(4)

10 Stati Membri, b'PDG per capita għall-prezzijiet tas-suq fl-2013 inqas minn 60 % tal-medja tal-UE.

(5)

 Ikkalkulata bil-prezzijiet tal-kwoti stmati fl-“EU Energy, Transport and GHG emissions Trends to 2050 – Reference scenario 2013 ( http://ec.europa.eu/clima/policies/2030/docs/eu_trends_2050_en.pdf )