Kawża T-229/04

Ir-Renju ta’ l-Iżvezja

vs

Il-Kummissjoni tal-Komunitajiet Ewropej

“Direttiva 91/414/KEE — Prodotti għall-protezzjoni tal-pjanti — Sustanza attiva parakwat — Awtorizzazzjoni għal tqegħid fis-suq — Proċedura ta’ awtorizzazzjoni — Ħarsien tas-saħħa tal-bniedem u ta’ l-annimali”

Sentenza tal-Qorti tal-Prim’Istanza (It-Tieni Awla Estiża) tal-11 ta’ Lulju 2007   II - 2441

Sommarju tas-sentenza

1. Agrikoltura – Approssimazzjoni tal-liġijiet – Tqegħid fis-suq ta’ prodotti għall-protezzjoni tal-pjanti – Direttiva 91/414

   (Regolament tal-Kummissjoni Nru 3600/92, Artikolu 7(1)(ċ) u (3); Direttiva tal-Kunsill 91/414; Direttiva tal-Kummissjoni 2003/112)

2. Agrikoltura – Approssimazzjoni tal-liġijiet – Tqegħid fis-suq ta’ prodotti għall-protezzjoni tal-pjanti – Direttiva 91/414

   [Direttiva tal-Kunsill 91/414, Artikoli 4(1)(b)(iv) u 5(1) u (4) u Anness I]

3. Agrikoltura – Approssimazzjoni tal-liġijiet – Tqegħid fis-suq ta’ prodotti għall-protezzjoni tal-pjanti – Direttiva 91/414

   [Direttiva tal-Kunsill 91/414, Artikolu 4(1)(b)(iv) u (v), it-tieni inċiż ta’ l-Artikolu 4(1)(b)(v) u l-Artikolu 5(1)(b)]

1.  Fil-kuntest ta’ l-adozzjoni tad-Direttiva 2003/112 tagħha, li temenda d-Direttiva tal-Kunsill 91/414, li tikkonċerna t-tqegħid fis-suq ta’ prodotti għall-protezzjoni tal-pjanti, biex ikun inkluż il-parakwat bħala sustanza attiva fl-Anness I, il-Kummissjoni, billi sostniet, fir-rapport ta’ eżami tagħha, li m’hemmx indikazzjoni ta’ newrotossiċità tal-parakwat, ma tissodisfax il-ħtiġijiet proċedurali stabbiliti mill-Artikolu 7 tar-Regolament Nru 3600/92, li jistabbilixxi r-regoli dettaljati għall-implimentazzjoni ta’ l-ewwel stadju tal-programm ta’ xogħol imsemmi fl-Artikolu 8(2) tad-Direttiva 91/414, fir-rigward ta’ l-eżami ta’ rabta eventwali bejn il-parakwat u l-marda ta’ Parkinson.

   Fil-fatt, l-indikazzjonijiet ta’ rabta bejn l-użu tal-parakwat u l-preżenza tal-marda ta’ Parkinson jinsabu fit-tagħrif relatat man-newrotossiċità tal-parakwat. Għaldaqstant, minkejja li l-Istat Membru Relatur evalwa t-tagħrif li jirrigwarda r-rabta eventwali bejn il-marda ta’ Parkinson u l-parakwat, din l-evalwazzjoni saret fl-ambitu ta’ l-eżami tan-newrotossiċità tal-parakwat. L-Artikolu 7(1)(ċ) tar-Regolament Nru 3600/92 jeżiġi li l-evalwazzjoni ta’ sustanza attiva li ssir mill-Istat Membru Relatur twassal għal rapport tal-Kummissjoni, li, skond l-Artikolu 7(3) ta’ l-istess Regolament għandu jintbagħat lill-Kumitat Permanenti tal-Katina ta’ l-Ikel u s-Saħħa ta’ l-Annimali u lill-Istati Membri l-oħra għall-informazzjoni tagħhom.

   Ir-rapporti ta’ l-Istat Membru Relatur ma kienu jinkludu l-ebda evalwazzjoni tat-tagħrif relatat mar-rabtiet eventwali bejn il-parakwat u l-marda ta’ Parkinson. Barra minn hekk, il-Kummissjoni ma stabbilixxietx u lanqas ma allegat li din l-evalwazzjoni ġiet ikkomunikata lill-imsemmi Kumitat Permanenti.

   (ara l-punti 108-110)

2.  Sabiex sustanza tkun tista’ tiġi inkluża fl-Anness I tad-Direttiva 91/414, li tikkonċerna t-tqegħid fis-suq ta’ prodotti għall-protezzjoni tal-pjanti, l-Artikolu 5(1) ta’ din l-istess direttiva jipprovdi li għandu jiġi mistenni, billi jittieħed in kunsiderazzjoni l-istat ta’ għarfien xjentifiku u tekniku, li l-użu tal-prodotti għall-protezzjoni tal-pjanti inkluża s-sustanza attiva in kwistjoni, wara applikazzjoni li timxi skond il-prattiċi tajbin tal-protezzjoni tal-pjanti, ma tagħmilx ħsara lis-saħħa tal-bniedem u ta’ l-annimali, skond l-Artikolu 4(1)(b)(iv) tad-Direttiva 91/414.

   L-Artikolu 5(1) tad-direttiva ċċitata iktar ’il fuq, interpretat flimkien mal-prinċipju ta’ prekawzjoni, jimplika li, fir-rigward tas-saħħa tal-bniedem u ta’ l-annimali, l-eżistenza ta’ indikazzjonijiet serji li, mingħajr ma tiġi eskluża l-inċertezza xjentifika, jippermettu raġjonevolment li titqiegħed fid-dubju s-sigurtà ta’ sustanza, tmur kontra, bħala regola ġenerali, l-inklużjoni ta’ din is-sustanza fl-Anness I ta’ din id-direttiva. Fil-fatt, il-prinċipju ta’ prekawzjoni huwa intiż sabiex jipprevjeni r-riskji potenzjali. Min-naħa l-oħra, riskji purament ipotetiċi, li jistrieħu fuq ipoteżi xjentifiċi li mhumiex sostnuti, m’għandhomx jiġu milqugħa.

   Barra minn hekk, l-Artikolu 5(4) tad-Direttiva 91/414, li jipprovdi li l-inklużjoni ta’ sustanza attiva fl-Anness I tista’ tiġi suġġetta għal ċerti restrizzjonijiet ta’ użu, għandu bħala effett li jippermetti l-inklużjoni ta’ sustanzi li ma jissoddisfawx l-eżiġenzi ta’ l-Artikolu 5(1) ta’ din l-istess direttiva billi jimponi ċerti restrizzjonijiet li jeskludu l-użu problematiku tas-sustanza in kwistjoni.

   Peress li din id-dispożizzjoni tidher li tattenwa l-Artikolu 5(1) tad-Direttiva 91/414, hija għandha tiġi interpretata fid-dawl tal-prinċipju ta’ prekawzjoni. Għaldaqstant, qabel l-inklużjoni ta’ sustanza fl-Anness I ta’ l-imsemmija direttiva, għandu jiġi stabbilit, lil hinn minn kull dubju raġjonevoli, li r-restrizzjonijiet għall-użu tas-sustanza in kwistjoni jippermettu li jiġi żgurat użu ta’ din is-sustanza li huwa konformi ma’ l-eżiġenzi ta’ l-imsemmi Artikolu 5(1).

   (ara l-punti 160, 161, 169, 170, 223, 224, 227)

3.  L-Artikolu 5(1) tad-Direttiva 91/414, li tikkonċerna t-tqegħid fis-suq ta’ prodotti għall-protezzjoni tal-pjanti, jagħmel distinzjoni bejn, minn naħa, is-saħħa tal-bniedem jew ta’ l-annimali, fir-rigward ta’ liema l-eżistenza ta’ effetti dannużi mhijiex tollerata u, min-naħa l-oħra, l-ambjent fir-rigward ta’ liema huma biss l-effetti inaċċettabbli li mhumiex ammessi. Bl-istess mod, l-Artikolu 4(1)(b) tad-Direttiva 91/414 jittratta separatament il-kwistjoni ta’ l-effetti dannużi fuq is-saħħa tal-bniedem jew ta’ l-annimali [Artikolu 4(1)(b)(iv)] u l-kwistjoni ta’ l-impatt inaċċettabbli fuq l-ambjent [Artikolu 4(1)(b)(v)]. Jirriżulta minn din l-istruttura ta’ l-Artikoli 4 u 5 tad-Direttiva 91/414 li, ladarba l-kwistjoni tirrigwarda l-evalwazzjoni ta’ sustanza attiva mill-aspett tal-ħarsien tas-saħħa ta’ l-annimali skond l-Artikolu 5(1)(b) ta’ l-imsemmija direttiva, ir-referenza li tagħmel din id-dispożizzjoni għall-Artikolu 4(1)(b) ta’ l-istess direttiva tirrigwarda biss id-dispożizzjoni ta’ dan l-artikolu ta’ l-aħħar li jikkonċerna speċifikament is-saħħa ta’ l-annimali, jiġifieri l-Artikolu 4(1)(b)(iv) tad-direttiva in kwistjoni.

   Għaldaqstant, minħabba l-fatt li l-Artikolu 4(1)(b)(iv) tad-Direttiva 91/414 jittratta diġà b’mod speċifiku l-kwistjoni ta’ l-effetti tal-prodott li jinkludi s-sustanza attiva fuq is-saħħa ta’ l-annimali, it-tieni inċiż ta’ l-Artikolu 4(1)(b)(v) ta’ l-istess direttiva dwar in-nuqqas ta’ impatt inaċċettabbli fuq l-ambjent meta jittieħed in kunsiderazzjoni l-effett tiegħu fuq l-ispeċi li mhumiex imsemmija, mhuwiex rilevanti fl-evalwazzjoni tal-fatt jekk sustanza tissoddisfax il-kundizzjonijiet ta’ l-Artikolu 5(1)(b) tad-Direttiva fir-rigward ta’ l-effett fuq l-ispeċi li mhumiex imsemmija.

   (ara l-punti 254, 255)