EUR-Lex Access to European Union law
This document is an excerpt from the EUR-Lex website
Document 62014CJ0250
Sentenza tal-Qorti tal-Ġustizzja (L-Ewwel Awla) tat-23 ta’ Diċembru 2015.
Air France-KLM vs Ministère des Finances et des Comptes publics.
Taxxa fuq il-valur miżjud – Fatt taxxabbli u eżiġibbiltà – Trasport bl-ajru – Biljett mixtri iżda mhux użat – Eżekuzzjoni tas-servizz ta’ trasport – Ħruġ tal-biljett – Mument tal-ħlas tat-taxxa.
Kawża C-250/14.
Sentenza tal-Qorti tal-Ġustizzja (L-Ewwel Awla) tat-23 ta’ Diċembru 2015.
Air France-KLM vs Ministère des Finances et des Comptes publics.
Taxxa fuq il-valur miżjud – Fatt taxxabbli u eżiġibbiltà – Trasport bl-ajru – Biljett mixtri iżda mhux użat – Eżekuzzjoni tas-servizz ta’ trasport – Ħruġ tal-biljett – Mument tal-ħlas tat-taxxa.
Kawża C-250/14.
Court reports – general
Kawżi magħquda C‑250/14 u C‑289/14
Air France‑KLM
u
Hop!-Brit Air SAS
vs
Ministère des Finances et des Comptes publics
(talbiet għal deċiżjoni preliminari mressqa mill-Conseil d’État (Franza))
“Taxxa fuq il-valur miżjud — Fatt taxxabbli u eżiġibbiltà — Trasport bl-ajru — Biljett mixtri iżda mhux użat — Eżekuzzjoni tas-servizz ta’ trasport — Ħruġ tal-biljett — Mument tal-ħlas tat-taxxa”
Sommarju – Sentenza tal-Qorti tal-Ġustizzja (L-Ewwel Awla) tat-23 ta’ Diċembru 2015
Armonizzazzjoni tal-leġiżlazzjonijiet fiskali — Sistema komuni ta’ taxxa fuq il-valur miżjud — Tranżazzjonijiet taxxabbli — Provvista ta’ servizzi bi ħlas — Kunċett — Trasport bl-ajru ta’ passiġġieri — Inklużjoni — Kundizzjonijiet — Biljetti maħruġa mill-kumpannija tal-ajru li ma ntużawx mill-passiġġieri u li ma jistgħu jiġu rrimborsati — Assenza ta’ effett — Ħruġ ta’ biljetti suġġett għat-taxxa fuq il-valur miżjud
(Direttiva tal-Kunsill 77/388, kif emendata bid-Direttiva 1999/59 u bid-Direttiva 2001/115, Artikoli 2(1) u 10(2))
Armonizzazzjoni tal-leġiżlazzjonijiet fiskali — Sistema komuni ta’ taxxa fuq il-valur miżjud — Fatt taxxabbli u eżiġibbiltà tat-taxxa — Xiri ta’ biljett tal-ajru minn passiġġier — Biljett sussegwentement mhux użat — Eżiġibbiltà tat-taxxa fil-mument li jiġi rċevut il-prezz tal-biljett — Riċezzjoni tal-ħlas mill-kumpannija tal-ajru, minn terz li jaġixxi f’ismu u fl-interess tiegħu jew minn terz li jaġixxi f’ismu stess — Assenza ta’ effett
(Direttiva tal-Kunsill 77/388, kif emendata bid-Direttiva 1999/59 u bid-Direttiva 2001/115, Artikolu 2(1) u l-ewwel u t-tieni subparagrafi tal-Artikolu 10(2))
Armonizzazzjoni tal-leġiżlazzjonijiet fiskali — Sistema komuni ta’ taxxa fuq il-valur miżjud — Tranżazzjonijiet taxxabbli — Provvista ta’ servizzi bi ħlas — Kunċett — Trasport bl-ajru ta’ passiġġieri — Inklużjoni — Kummerċjalizzazzjoni minn terz tal-biljetti ta’ kumpannija tal-ajru fl-interess ta’ din tal-aħħar fil-kuntest ta’ ftehim ta’ konċessjoni — Somma b’rata fissa mħallsa mit-terz lill-kumpannija tal-ajru, għall-biljetti maħruġa u skaduti, ikkalkolata bħala perċentwali tad-dħul mill-bejgħ annwali mwettaq fuq il-linji tal-ajru korrispondenti — Somma taxxabbli bħala korrispettiv għall-imsemmija biljetti
(Direttiva tal-Kunsill 77/388, kif emendata bid-Direttiva 1999/59 u bid-Direttiva 2001/115, Artikoli 2(1) u 10(2))
L-Artikoli 2(1) u 10(2) tas-Sitt Direttiva 77/388 fuq l-armonizzazzjoni tal-liġijiet tal-Istati Membri dwar taxxi fuq id-dħul mill-bejgħ, kif emendata bid-Direttiva 1999/59, u sussegwentement bid-Direttiva 2001/115, għandhom jiġu interpretati fis-sens li l-ħruġ ta’ biljetti minn kumpannija tal-ajru huwa suġġett għat-taxxa fuq il-valur miżjud, meta l-biljetti maħruġa ma jkunux intużaw mill-passiġġieri u meta dawn tal-aħħar ma jistgħux jiksbu r-rimbors tagħhom.
Fil-fatt, provvista ta’ servizzi, bħat-trasport bl-ajru ta’ passiġġieri, hija suġġetta għat-taxxa fuq il-valur miżjud meta, minn naħa, is-somma mħallsa minn passiġġier lil kumpannija tal-ajru, fil-kuntest tar-relazzjoni ġuridika li sseħħ permezz tal-kuntratt ta’ trasport, tkun marbuta direttament ma’ servizz identifikabbli li hija tikkostitwixxi r-remunerazzjoni għalih u, min-naħa l-oħra, meta jitwettaq l-imsemmi servizz.
Madankollu, it-twettiq tas-servizzi li l-provvista tagħhom tikkorrispondi għall-eżekuzzjoni tal-obbligi li jirriżultaw minn kuntratt ta’ trasport bl-ajru ta’ persuni huwa possibbli biss bil-kundizzjoni li l-passiġġier tal-kumpannija tal-ajru jippreżenta ruħu fid-data u fil-post tal-imbark previsti, fejn l-imsemmija kumpannija tirriżervalu d-dritt li jibbenefika minn dawn is-servizzi sal-ħin tal-imbark fiċ-ċirkustanzi speċifikati mill-kuntratt ta’ trasport konkluż max-xiri tal-biljett.
Għalhekk, il-valur ekwivalenti tal-prezz imħallas max-xiri tal-biljett jikkonsisti fid-dritt li jislet minnu l-passiġġier li jibbenefika mill-eżekuzzjoni tal-obbligi li jirriżultaw mill-kuntratt ta’ trasport, indipendentement minn jekk il-passiġġier jimplementax dan id-dritt, billi l-kumpannija tal-ajru twettaq is-servizz meta tqiegħed lill-passiġġier f’pożizzjoni li jibbenefika minn dawn is-servizzi.
(ara l-punti 25‑28, 35, u d-dispożittiv 1)
L-Artikolu 2(1) u l-ewwel u t-tieni subparagrafi tal-Artikolu 10(2) tas-Sitt Direttiva 77/388 fuq l-armonizzazzjoni tal-liġijiet tal-Istati Membri dwar taxxi fuq id-dħul mill-bejgħ, kif emendata bid-Direttiva 1999/59, u sussegwentement bid-Direttiva 2001/115, għandhom jiġu interpretati fis-sens li t-taxxa fuq il-valur miżjud imħallsa fil-mument tax-xiri tal-biljett tal-ajru mill-passiġġier li ma jkunx uża l-biljett tiegħu ssir dovuta fil-mument li jiġi rċevut il-prezz tal-biljett, kemm jekk mill-kumpannija tal-ajru nfisha, kemm jekk minn terz li jaġixxi f’ismu u fl-interess tiegħu, kif ukoll jekk minn terz li jaġixxi f’ismu stess iżda fl-interess tal-kumpannija tal-ajru.
(ara l-punt 43 u d-dispożittiv 2)
L-Artikoli 2(1) u 10(2) tas-Sitt Direttiva 77/388 fuq l-armonizzazzjoni tal-liġijiet tal-Istati Membri dwar taxxi fuq id-dħul mill-bejgħ, kif emendata bid-Direttiva 1999/59, u sussegwentement bid-Direttiva 2001/115, għandhom jiġu interpretati fis-sens li, fil-każ li terz jikkummerċjalizza l-biljetti ta’ kumpannija tal-ajru fl-interess ta’ din tal-aħħar fil-kuntest ta’ ftehim ta’ konċessjoni u jħallasha, għall-biljetti maħruġa u skaduti, somma b’rata fissa kkalkolata bħala perċentwali tad-dħul mill-bejgħ annwali mwettaq fuq il-linji tal-ajru korrispondenti, din is-somma tikkostitwixxi somma taxxabbli bħala korrispettiv għall-imsemmija biljetti.
Fil-fatt, skont l-Artikolu 21(1)(a) tas-Sitt Direttiva u tas-Sitt Direttiva emendata, il-persuna responsabbli għall-ħlas tat-taxxa fuq il-valur miżjud dovuta fuq il-prezz tal-biljett mibjugħ hija l-kumpannija tal-ajru li twettaq is-servizz ta’ trasport.
Jekk terz jaġixxi f’isem u fl-interess tal-kumpannija tal-ajru fil-kummerċjalizzazzjoni tal-biljetti, hija din tal-aħħar li għandha tħallas it-taxxa fuq il-valur miżjud fuq il-biljetti.
Is-somma b’rata fissa mħallsa mit-terz lill-kumpannija tal-ajru għall-biljetti mibjugħa li jkunu skadew ma tistax titqies li tikkorrispondi għal kumpens imħallas mit-terz għal dannu mġarrab mill-kumpannija tal-ajru li jirriżulta mill-fatt li l-passiġġier li ma jitfaċċax ma jippreżentax ruħu għall-imbark. Dan il-passiġġier iħallas il-prezz tas-servizz ta’ trasport fil-mument tax-xiri tal-biljett. Il-kumpannija tal-ajru twettaq is-servizz li għalih hija tiġi inkarigata bis-sempliċi fatt li l-passiġġier ikollu d-dritt li jibbenefika mill-eżekuzzjoni tal-obbligi li jirriżultaw mill-kuntratt ta’ trasport bl-ajru ta’ persuni.
Minn dan isegwi li l-prezz tal-biljett miżmum mill-kumpannija jikkostitwixxi r-remunerazzjoni għas-servizz ta’ trasport li l-kumpannija toffri lill-klijent, u dan anki jekk dan tal-aħħar ma jużax is-servizz.
F’dawn iċ-ċirkusstanzi, is-somma b’rata fissa hija r-remunerazzjoni li rċeviet il-kumpannija tal-ajru bħala korrispettiv għal biljetti li nħarġu mit-terz fl-interess tal-imsemmija kumpannija, iżda li ma ntużawx mix-xerrejja. Għalhekk teżisti rabta diretta bejn il-provvista ta’ servizzi mwettqa u r-remunerazzjoni rċevuta għal din il-provvista.
(ara l-punti 45, 47‑52, u d-dispożittiv 3)