Keywords
Summary

Keywords

Tariffa Doganali Komuni — Intestaturi tariffarji

Summary

Kards magħquda, intiżi sabiex jiddaħħlu f’laptops, li, minħabba l-fatt li għandhom il-funzjoni “modem”, jistgħu jservu għall-iskambju ta’ informazzjoni permezz ta’ netwerks esterni, għandhom jiġu kklassifikati, wara l-1 ta’ Jannar 1996, bħala magni għall-ipproċessar tad-data, taħt l-intestatura 8471 tan-Nomenklatura Magħquda, li hemm fl-Anness I tar-Regolament Nru 2658/87, dwar in-nomenklatura tat-tariffa u l-istatistika u dwar it-Tariffa Doganali Komuni, kif emendata bir-Regolament Nru 3009/95.

Huma fil-fatt jissodisfaw it-tliet kundizzjonijiet stabbiliti min-Nota 5 B tal-Kapitolu 84 tan-Nomenklatura Magħquda safejn dawn ikunu użati biss meta mdaħħla f’laptops, jaħdmu biss jekk jekk ikunu mqabbda ma’ dan it-tip ta’ kompjuters u jkunu kapaċi jikkonvertu s-sinjali li jidħlu bħala data li tista’ tintuża minn magna awtomatika għal ipproċessar tad-data u s-sinjali li joħorġu f’data li tista’ tintuża mill-ambjent estern, kemm jekk ikunu trażmessi f’netwerk lokali (“LAN”) kif ukoll estern (“WAN).

Dawn il-kards ma jeżerċitawx “funzjoni speċifika” fis-sens tan-Nota 5 E tal-Kapitolu 84 tan-Nomenklatura Magħquda. Il-“funzjoni speċifika” eżerċitata minn magna li taħdem ma’ magna awtomatika għal ipproċessar tad-data għandha fil-fatt jkollha funzjoni “minbarra l-ipproċessar tad-data”. Issa, safejn dawn il-kards magħquda huma intiżi li jittrasferixxu informazzjoni bejn diversi kompjuters u, sabiex jagħmlu hekk, jirrendu, fid-dħul, sinjali esterni li jinftehmu mill-kompjuter u jittasformaw, fil-ħruġ, is-sinjali pproċessati minn dan ta’ l-aħħar f’sinjali li jistgħu jintużaw mill-ambjent estern, indipendentement mill-fatt li s-sinjal irċevut jew trażmess ikun analoġiku jew diġitali, il-funzjoni illi huma jissodisfaw tikkonsisti fl-ipproċessar tad-data.

(ara l-punti 22, 25, 30, 32 u d-dispożittiv)