Prospettar, esplorazzjoni u produzzjoni ta’ idrokarburi

 

SOMMARJU TA’:

Id-Direttiva 94/22/KE — kondizzjonijiet għall-għoti u l-użu ta’ awtorizzazzjonijiet għall-prospettar, l-esplorazzjoni u l-produzzjoni ta’ idrokarburi

X’INHU L-GĦAN TAD-DIRETTIVA?

Tistabbilixxi regoli madwar l-UE biex tiggarantixxi l-aċċess mhux diskriminatorju għall-attivitajiet ta’ prospettar, esplorazzjoni u produzzjoni ta’ idrokarburi.

Dawn ir-regoli jfittxu li:

• jintegraw aktar is-suq intern tal-enerġija tal-UE;
• jinkoraġġixxu kompetizzjoni akbar fi ħdanu; u
• jtejbu s-sigurtà tal-provvista.

PUNTI EWLENIN

Id-direttiva tikkonċerna awtorizzazzjonijiet għad-drittijiet ta’ prospettar jew esplorazzjoni għal jew produzzjoni ta’ idrokarburi.

Tiddikjara li l-limiti ġeografiċi ta’ awtorizzazzjoni u l-limitu ta’ żmien ta’ dik l-awtorizzazzjoni għandhom jiġu determinati skont l-aħjar mod possibbli biex jitwettqu dawn l-attivitajiet mil-lat ekonomiku u tekniku. L-għan ta’ din huwa li tipprevjeni entità waħda milli jkollha drittijiet esklużivi għal żona li l-prospettar, l-esplorazzjoni u l-produzzjoni tagħha jistgħu jitwettqu b’mod aktar effettiv minn diversi entitajiet.

Il-liġijiet li rriżervaw għal entità waħda d-dritt li tikseb awtorizzazzjonijiet għal żona ġeografika speċifika fit-territorju ta’ pajjiż tal-UE kellhom jitneħħew mill-pajjiżi kkonċernati sal-1 ta’ Jannar 1997.

Il-proċeduri għall-għoti ta’ awtorizzazzjonijiet għandhom ikunu trasparenti u bbażati fuq kriterji oġġettivi u mhux diskriminatorji. Għalhekk iridu jkunu miftuħa għall-entitajiet interessati kollha.

L-għażla minn fost l-entitajiet varji trid tkun ibbażata fuq:

• il-kapaċitajiet tekniċi u finanzjarji tagħhom;
• il-mod kif jipproponu l-prospettar, l-esplorazzjoni u/jew id-dħul fil-produzzjoni taż-żona ġeografika inkwistjoni; u
• il-prezz li l-entità hija lesta li tħallas sabiex tikseb l-awtorizzazzjoni (fil-każ li l-awtorizzazzjoni titqiegħed għall-bejgħ).

L-informazzjoni kollha relatata mal-awtorizzazzjoni (it-tip ta’ awtorizzazzjoni, iż-żona ġeografika li għaliha tista’ ssir applikazzjoni bis-sħiħ jew parzjali, l-iskadenza prevista għall-għoti tal-awtorizzazzjoni, il-kriterji tal-għażla, eċċ.) hija ppubblikata fil-Ġurnal Uffiċjali tal-Unjoni Ewropea mill-inqas 90 jum qabel l-iskadenza għas-sottomissjoni tal-applikazzjonijiet.

Madankollu, il-pajjiżi tal-UE għandhom iżommu d-dritt li jagħmlu l-aċċess g ħal dawn l-attivitajiet u l-eżerċitar tagħhom soġġetti għal kunsiderazzjonijiet ta’:

• sigurtà nazzjonali;
• sikurezza pubblika;
• saħħa pubblika;
• sigurtà tat-trasport;
• protezzjoni tal-ambjent;
• protezzjoni ta’ riżorsi bijoloġiċi;
• il-ġestjoni ppjanata ta’ riżorsi ta’ idrokarburi jew għall-ħlas ta’ kontribuzzjoni finanzjarja jew kontribuzzjoni f’idrokarburi.

Qed jiġu introdotti proċeduri għal ftehim reċiproku ma’ pajjiżi mhux tal-UE, sabiex l-entitajiet tal-pajjiżi tal-UE għandhom ikunu jistgħu jirċievu trattament f’pajjiżi mhux tal-UE li huwa komparabbli ma’ dak li entitajiet ta’ pajjiżi mhux tal-UE jirċievu fl-UE.

Id-Direttiva 94/22/KE tikkumplimenta d-Direttiva 2014/25/UE — akkwist pubbliku — regoli għas-setturi tal-ilma, l-enerġija, it-trasport u s-servizzi postali.

META TIBDA TAPPLIKA D-DIRETTIVA?

Ilha tapplika mit-30 ta’ Ġunju 1994 u kellha ssir liġi fil-pajjiżi tal-UE sal-1 ta’ Lulju 1995.

SFOND

Il-pajjiżi tal-UE għandhom drittijiet sovrani fuq ir-riżorsi tal-idrokarburi fit-territorji tagħhom, għalhekk huwa f’idejn kull pajjiż li jiddetermina ż-żoni ġeografiċi li fihom jistgħu jiġu eżerċitati d-drittijiet għall-prospettar, l-esplorazzjoni għal u l-produzzjoni tal-idrokarburi u li jawtorizzaw lill-entitajiet biex jeżerċitaw dawk id-drittijiet.

Għal aktar informazzjoni, ara:

• Liċenzjar taż-żejt u l-gass (Kummissjoni Ewropea).

DOKUMENT EWLIENI

Id-Direttiva 94/22/KE tal-Parlament Ewropew u tal-Kunsill tat-30 ta’ Mejju 1994 dwar il-kondizzjonijiet għall-għoti u l-użu ta’ awtorizzazzjonijiet għall-prospettar, l-esplorazzjoni u l-produzzjoni tal-idrokarboni (ĠU L 164, 30.6.1994, p. 3-8)

DOKUMENT RELATAT

Id-Direttiva 2014/25/KE tal-Parlament Ewropew u tal-Kunsill tas-26 ta’ Frar 2014 dwar l-akkwist minn entitajiet li joperaw fis-setturi tal-ilma, l-enerġija, it-trasport u s-servizzi postali u li tħassar id-Direttiva 2004/17/KE (ĠU L 94, 28.3.2014, p. 243-374)

Emendi suċċessivi għad-Direttiva 2014/25/UE ġew inkorporati fit-test oriġinali. Din il-verżjoni konsolidata hija biss ta’ valur dokumentarju .

l-aħħar aġġornament 23.01.2019