Ċentru Ewropew ta’ Kompetenza u network ta’ ċibersigurtà

 

SOMMARJU TA’:

Regolament (UE) 2021/887 li jistabbilixxi ċ-Ċentru Ewropew ta’ Kompetenza Industrijali, Teknoloġika u tar-Riċerka fil-qasam taċ-Ċibersigurtà u n-Network ta’ Ċentri Nazzjonali ta’ Koordinazzjoni

X’INHU L-GĦAN TAR-REGOLAMENT?

• Huwa jistabbilixxi ċ-Ċentru Ewropew ta’ Kompetenza taċ-Ċibersigurtà (ECCC) u Network ta’ Ċentri Nazzjonali ta’ Koordinazzjoni (in-“network”).
• Huwa jistipula regoli għaċ-ċentri nazzjonali ta’ koordinazzjoni (NCCs) u għall-istabbiliment tal-Komunità ta’ Kompetenza taċ-Ċibersigurtà.

L-ECCC għandu rwol essenzjali fil-programm diġitali Ewropew (stabbilita taħt ir-Regolament (UE) 2021/694 — ara s-sommarju) u jikkontribwixxi għal Orizzont Ewropa. Huwa joħloq qafas għaż-żieda u l-koordinament ta’ investimenti fiċ-ċibersigurtà bejn l-Unjoni Ewropea (UE), l-Istati Membri tal-UE u, indirettament, l-industrija.

PUNTI EWLENIN

Missjoni

Il-missjoni tal-ECCC u tan-network hija li tgħin lill-UE:

• issaħħaħ it-tmexxija tal-UE fiċ-ċibersigurtày* billi ttejjeb il-fiduċja u s-sigurtà, inkluż il-kunfidenzjalità, l-integrità u l-aċċessibilità tad-data;
• tappoġġa r-reżiljenza u l-affidabbiltà tas-sistemi tan-netwerk u tal-informazzjoni, inkluż infrastruttura kritika u ħardwer u softwer komunement użati; u
• iżżid il-kompetittività u l-istandards globali għoljin tal-industrija taċ-ċibersigurtà tal-UE, u ddawwar iċ-ċibersigurtà f’vantaġġ kompetittiv għall-industrija tal-UE.

Għanijiet

L-għanijiet speċifiċi tal-ECCC iwassalu għal kompiti strateġiċi u kompiti ta’ implimentazzjoni:

• itejbu l-kapaċitajiet, l-abbiltajiet, l-għarfien u l-infrastruttura taċ-ċibersigurtà;
• jippromwovu r-reżiljenza, l-aħjar prattiki, is-sigurtà permezz tad-disinnn taċ-ċibersigurtà u ċ-ċertifikazzjoni tas-sigurtà ta’ prodotti u servzzi diġitali;
• jikkontribwixxu għal ekosistema Ewropea ta’ ċibersigurtà b’saħħitha u tgħaqqad lill-partijiet interessati.

Dawn il-kompiti jkunu kompluti permezz ta’:

• l-istabbiliment ta’ orjentazzjonijiet strateġiċi għar-riċerka, l-innovazzjoni u l-iskjerar, u t-tfassil ta’ prjioritajiet;
• l-implimentazzjoni ta’ partijiet tal- programmi rilevanti ta’ finanzjament tal-UE;
• l-inkoraġġiment tal-kooperazzjoni u l-koordinazzjoni fil-livelli nazzjonali u tal-UE; u
• l-iffaċilitar ta’ investiment konġunt.

Ċentri nazzjonali ta’ koordinazzjoni (NCCs)

• NCC waħda tiġi nominata minn kull Stat Membru u l-Kummissjoni Ewropea tiġi notifikata bid-deċiżjoni.
• Kull NCC għandu jkollu aċċess għar-riċerka taċ-ċibersigurtà u għarfien espert teknoloġika.
• NCCs jistgħu, taħt ċertu kundizzjonijiet, jirċievu għotjiet diretti mill-UE u jistgħu jipprovdu appoġġ finanzjarju lil partijiet terzi.

Il-funzjonijiet ewlenin tal-NCCs jinkludu:

• li jaġixxu bħala punti ta’ kuntatt fil-livell nazzjonali;
• li jipprovdu għarfien espert u jikkontribwixxu għal kompiti strateġiċi;
• li jiffaċilitaw il-parteċipazzjoni fi proġetti transkonfinali u azzjonijiet taċ-ċibersigurtà ffinanzjati mill-UE;
• li jipprovdu assistenza teknika lill-partijiet interessati fi proġetti mmaniġjati mill-ECCC;
• li jfittxu sinerġiji ma’ attivitajiet fil-livelli nazzjonali, reġjonali u lokali, bħall-politiki nazzjonali fuq ir-riċerka, l-iżvilupp u l-innovazzjoni;
• li jimplimentaw azzjonijiet speċifiċi li ngħataw għotjiet għalihom mill-ECCC;
• li jikkontribwixxu għal programmi edukattivi.

Komunità tal-Kompetenza taċ-Ċibersigurtà

• Tikkontribwixxi għall-missjonijiet tal-ECCC u n-network, u taqsam u xxerred l-għarfien espert taċ-ċibersigurtà.
• Tikkonsisti f’industrija, inklużi intrapriżi żgħar u ta’ daqs medju, organizzazzjonijiet akkademiċi u ta’ riċerka, assoċjazzjonijiet tas-soċjetà ċivili, organizzazzjonijiet tal-istandards, entitajiet pubbliċi rilevanti u partijiet interessati li qed jiffaċċjaw sfidi fiċ-ċibersigurtà.

Struttura tal-ECCC

L-istruttura amministrattiva u ta’ governanza tal-ECCC tinkludi:

• Bord ta’ Tmexxija li jipprovdi orjentazzjoni strateġika u tissorvelja l-attivitajiet;
• direttur eżkuttiv, ir-rappreżentant legali tal-ECCC u l-persuna responabbli għall-maniġment ta’ kuljum; u
• Grupp Strateġiku Konsultattiv li jiżgura djalogu bejn il-Komunità tal-Kompetenza taċ-Ċibersigurtà u l-ECCC.

Bord ta’ Tmexxija

• Rappreżentant minn kull Stat Membru u tnejn mill-Kummissjoni, b’għarfien dwar iċ-ċibersigurtà u ħiliet maniġerjali.
• Osservaturi, inkluż bħala osservatur permanenti l-Aġenziji tal-Unjoni Ewropea għaċ-Ċibersigurtà stabbilita taħt ir-Regolament (UE) 2019/881.
• President u deputat eletti mill-membri tal-Bord ta’ Tmexxija.

Id-direttur eżekuttiv jieħu sehem fil-laqgħat imma ma jistax jivvota.

Grupp Strateġiku Konsultattiv

• Għoxrin membru maħtura mill-Bord ta’ Tmexxija.
• Jiltaqgħu mill-inqas tliet darbiet fis-sena.
• Jagħti pariri lill-Bord ta’ Tmexxija dwar l-istabbiliment ta’ gruppi ta’ ħidma.
• Jorganizza konsultazzjonijiet pubbliċi biex jiġbor input għall-aġenda u l-programmi ta’ ħidma tal-ECCC.

Finanzjar

L-ECCC huwa ffinanzjat mill-UE, filwaqt li azzjonijiet konġunti huma ffinanzjati mill-UE u kontribuzzjonijiet volontarji tal-Istati Membri:

• sa EUR 1 649 566 000 mill-programm Ewropa Diġitali, inkluż sa EUR 32 000 000 għall-amministrazzjoni;
• ammont minn Orizzont għal azzjonijiet konġunti, li jqabblu l-kontribuzzjonijiet tal-Istati Membri u f’allinjament mal-ippjanar ta’ Orizzont Ewropa;
• ammont minn programmi tal-UE oħra, kif meħtieġ biex jimplimenta l-għanijiet tal-ECCC.

Ir-regolament jippermetti u jinkoraġġixxi lill-Istati Membri jikkontribwixxu mir-riżorsi proprji. Jekk l-Istati Membri jikkontribwixxu għar-riżorsi mmaniġjati mill-ECCC, huma għandhom ukoll jikkontribwixxu għall-ispejjeż amministrattivi.

MINN META JAPPLIKA R-REGOLAMENT?

Dan ilu japplika mit-28 ta’ Ġunju 2021.

SFOND

Ara wkoll:

• L-istrateġija taċ-ċibersigurtà (Il-Kummissjoni Ewropea)
• Ċibersigurta: kif l-UE tindirizza t-theddid ċibernetiku (Il-Kunsill tal-Unjoni Ewropea)
• Ċentru Ewropew ta’ Kompetenza u Network ta’ Ċibersigurtà (Il-Kummissjoni Ewropea)
• Ċentru Ewropew taċ-Ċiberkriminalità (EC3) (Europol).

TERMINI EWLENIN

DOKUMENT EWLIENI

Ir-Regolament (UE) 2021/887 tal-Parlament Ewropew u tal-Kunsill tal-20 ta’ Mejju 2021 lli jistabbilixxi ċ-Ċentru Ewropew ta’ Kompetenza Industrijali, Teknoloġika u tar-Riċerka fil-qasam taċ-Ċibersigurtà u n-Network ta’ Ċentri Nazzjonali ta’ Koordinazzjoni(ĠU L 202, 8.6.2021, pp. 1-31)

DOKUMENTI RELATATI

Ir-Regolament (UE) 2021/694 tal-Parlament Ewropew u tal-Kunsill tad-29 ta’ April 2021 i jistabbilixxi l-Programm Ewropa Diġitali u li jħassar id-Deċiżjoni (UE) Nru 2015/2240 (ĠU L 166, 11.5.2021, pp. 1-34)

Komunikazzjoni tal-Kummissjoni lill-Parlament Ewropew, lill-Kunsill Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni dwar l-Istrateġija tal-UE dwar l-Unjoni tas-Sigurtà(COM(2020) 605 final, 24.7.2020)

Id-Direttiva (UE) 2016/1148 tal-Parlament Ewropew u tal-Kunsill tas-6 ta’ Lulju 2016 dwar miżuri għal livell għoli komuni ta’ sigurtà tan-netwerks u tas-sistemi tal-informazzjoni madwar l-Unjoni (ĠU L 194, 19.7.2016, pp. 1-30)

Ir-Regolament (UE) 2019/881tal-Parlament Ewropew u tal-Kunsill tas-17 ta’ April 2019 dwar l-ENISA (l-Aġenzija tal-Unjoni Ewropea għaċ-Ċibersigurtà) u dwar iċ-ċertifikazzjoni taċ-ċibersigurtà tat-teknoloġija tal-informazzjoni u tal-komunikazzjoni u li jħassar ir-Regolament (UE) Nru 526/2013 (l-Att dwar iċ-Ċibersigurtà) (ĠU L 151, 7.6.2019, pp. 15-69)

l-aħħar aġġornament 27.07.2021