Huwa jistabbilixxi l-Programm ta’ Riċerka u Taħriġ tal-Komunità Ewropea tal-Enerġija Atomika għall-perjodu mill-1 ta’ Jannar 2021 sal-31 ta’ Diċembru 2025 (il-programm Euratom). Huwa parti mill-programm Orizzont Ewropa u jikkondividi l-istess regoli għall-parteċipazzjoni.

PUNTI EWLENIN

Il-programm idum 5 snin, mill-2021 sal-2025, li se jiġi estiż b’sentejn fl-2025 sabiex jiġi allinjat mal-qafas finanzjarju pluriennali tal-2021-2027 tal-Unjoni Ewropea (UE).

Partijiet mill-programm jistgħu jiġu implimentati permezz ta’ sħubijiet Ewropej.
Il-programm japplika approċċ ta’ xjenza miftuħa għall-proċess xjentifiku, abbażi ta’ kooperazzjoni u għodod miftuħa, u t-tixrid tal-għarfien.
Il-programm huwa soġġett għal monitoraġġ, rappurtar, evalwazzjoni u awditjar.
Ir-Regolament (Euratom) 2018/1563 huwa mħassar.

Il-programm għandu azzjonijiet diretti u indiretti.

L-azzjonijiet diretti huma attivitajiet imwettqa miċ-Ċentru Konġunt tar-Riċerka tal-Kummissjoni Ewropea kif deskritt fi programm ta’ ħidma pluriennali maħluq mill-Kummissjoni.
Azzjonijiet indiretti huma attivitajiet ta’ riċerka mwettqa minn konsorzji b’diversi sħab u implimentati minn programmi ta’ ħidma, inkluża stima tad-distribuzzjoni tas-somom allokati għal kull azzjoni u skeda ta’ żmien.

Baġit

Il-programm għandu baġit totali ta’ EUR 1.38 biljun:

EUR 583 miljun għal azzjonijiet indiretti fir-riċerka u l-iżvilupp tal-fużjoni;
EUR 266 miljun għal azzjonijiet indiretti fil-fissjoni nukleari, is-sikurezza u l-protezzjoni mir-radjazzjoni;
EUR 532 miljun għal azzjonijiet diretti mwettqa miċ-Ċentru Konġunt tar-Riċerka.

L-objettivi tal-programm u l-oqsma eliġibbli għall-finanzjament:

is-sikurezza nukleari, is-sigurtà, is-salvagwardji u l-protezzjoni mir-radjazzjoni nukleari mtejba;
l-użu sikur u sigur tal-enerġija nukleari;
il-ġestjoni u d-dekummissjonar sikuri tal-fjuwil użat u tal-iskart radjuattiv;
l-użu sikur ta’ applikazzjonijiet mhux tal-enerġija ta’ radjazzjoni jonizzanti u r-riċerka dwarhom;
l-iżvilupp kontinwu tal-għarfien espert u l-kompetenza nukleari;
it-trawwim tal-enerġija mill-fużjoni bħala sors potenzjali futur tal-enerġija;
l-appoġġ għall-politiki ta’ titjib kontinwu tal-UE u tal-Istati Membri tal-UE dwar is-sikurezza u s-sigurtà nukleari;
it-titjib fl-infrastrutturi tal-edukazzjoni, tat-taħriġ u tal-aċċess tar-riċerka;
it-titjib fil-mobbiltà tax-xjenzati nukleari.

L-involviment ta’ pajjiżi mhux tal-UE

Orizzont Ewropa huwa miftuħ għall-parteċipazzjoni ta’ entitajiet legali minn kwalunkwe post fid-dinja, skont il-kundizzjonijiet stabbiliti fir-regoli, u fejn applikabbli flimkien ma’ kwalunkwe kundizzjoni addizzjonali fil-livell tal-programm ta’ ħidma/sejħa. Il-parteċipazzjoni fil-programm fil-forma ta’ assoċjazzjonijiet ta’ pajjiżi mhux tal-UE hija miftuħa għal:

pajjiżi taż-Żona Ekonomika Ewropea (ŻEE) u tal-Assoċjazzjoni Ewropea tal-Kummerċ Ħieles (EFTA);
il-pajjiżi aderenti, il-pajjiżi kandidati u l-kandidati potenzjali;
il-pajjiżi tal-politika Ewropea tal-viċinat;
pajjiżi mhux tal-UE b’kapaċità tajba fix-xjenza, fit-teknoloġija u fl-innovazzjoni u impenn għal ekonomija tas-suq miftuħa bbażata fuq ir-regoli.

Il-komunikazzjoni u l-pubbliċità

Il-benefiċjarji jridu jirrikonoxxu l-oriġini tal-finanzjament tal-programm, speċjalment meta jippromwovu l-azzjonijiet u r-riżultati tagħhom, b’kampanji ta’ informazzjoni koerenti u effettivi mmirati lejn diversi udjenzi, inklużi l-media u l-pubbliku.

MINN META SE JIBDA JAPPLIKA R-REGOLAMENT?

Dan ilu japplika mill-1 ta’ Jannar 2021.

SFOND

Skeda informattiva: Il-programm ta’ riċerka u innovazzjoni tal-Euratom għall-perjodu 2021-2025 (il-Kummissjoni Ewropea)
Orizzont Ewropa (il-Kummissjoni Ewropea).

DOKUMENT EWLIENI

Ir-Regolament tal-Kunsill (Euratom) 2021/765 tal-10 ta’ Mejju 2021 li jistabbilixxi l-Programm ta’ Riċerka u Taħriġ tal-Komunità Ewropea tal-Enerġija Atomika għall-perijodu 2021-2025 li jikkumplimenta Orizzont Ewropa – il-Programm Qafas għar-Riċerka u l-Innovazzjoni u li jħassar ir-Regolament (Euratom) 2018/1563 (ĠU L 167, 12.5.2021, pp. 81-100)

DOKUMENTI RELATATI

Id-Deċiżjoni tal-Kunsill (UE) 2021/764 tal-10 ta’ Mejju 2021 li tistabbilixxi l-Programm Speċifiku li jimplimenta Orizzont Ewropa — il-Programm Qafas għar-Riċerka u l-Innovazzjoni, u li jħassar id-Deċiżjoni 2013/743/UE (ĠU L 167I, 12.5.2021, pp. 1-80)

Ir-Regolament (UE) 2021/695 tal-Parlament Ewropew u tal-Kunsill tat-28 ta’ April 2021 jistabbilixxi l-Orizzont Ewropa — il-Programm Qafas għar-Riċerka u l-Innovazzjoni, li jistabbilixxi r-regoli tiegħu għall-parteċipazzjoni u d-disseminazzjoni, u li jħassar ir-Regolamenti (UE) Nru 1290/2013 u (UE) Nru 1291/2013 (ĠU L 170, 12.5.2021, pp. 1-68)

Ir-Regolament (UE, Euratom) 2018/1046 tal-Parlament Ewropew u tal-Kunsill tat-18 ta’ Lulju 2018 dwar ir-regoli finanzjarji applikabbli għall-baġit ġenerali tal-Unjoni, li jemenda r-Regolamenti (UE) Nru 1296/2013, (UE) Nru 1301/2013, (UE) Nru 1303/2013, (UE) Nru 1304/2013, (UE) Nru 1309/2013, (UE) Nru 1316/2013, (UE) Nru 223/2014, (UE) Nru 283/2014, u d-Deċiżjoni Nru 541/2014/UE u li jħassar ir-Regolament (UE, Euratom) Nru 966/2012 (ĠU L 193, 30.7.2018, pp. 1-222)

l-aħħar aġġornament 07.07.2021

Top