Programm speċifiku li jimplimenta Orizzont Ewropa — il-programm qafas għar-riċerka u l-innovazzjoni

 

SOMMARJU TA’:

Deċiżjoni (UE) 2021/764 li tistabbilixxi l-programm speċifiku li jimplimenta Orizzont Ewropa — il-programm qafas għar-riċerka u l-innovazzjoni

X’INHU L-GĦAN TAD-DEĊIŻJONI?

Din id-deċiżjoni

• timplimenta r-Regolament (UE) 2021/695 Orizzont Ewropa (ara s-sommarju) — il-programm qafas għar-riċerka u l-innovazzjoni (R&I), billi jiddefinixxi r-regoli dettaljati għall-implimentazzjoni ta’ dan il-programm speċifiku, jiffissa t-tul tiegħu u jipprovdi għall-mezzi meqjusa meħtieġa.

Id-deċiżjoni tirrevoka d-Deċiżjoni 2013/743/UE.

PUNTI EWLENIN

Ara s-sommarju tar-Regolament (UE) 2021/695 għal aktar dettalji dwar l-għanijiet, l-istruttura u l-baġit ta’ Orizzont Ewropa.

Il-programm speċifiku jikkontribwixxi għall-objettivi ġenerali u speċifiċi stabbiliti fir-regolament Orizzont Ewropa (Regolament (UE) 2021/695).

L-għanijiet operattivi tal-programm speċifiku huma dawn li ġejjin:

• li tissaħħaħ ir-riċerka bażika u tal-fruntiera b’mod eċċellenti;
• li tissaħħaħ u tinfirex l-eċċellenza, inkluż permezz tat-trawwim ta’ parteċipazzjoni usa’ fl-Unjoni Ewropea (UE) kollha;
• li jissaħħu r-rabtiet bejn ir-riċerka, l-innovazzjoni u, fejn xieraq, l-edukazzjoni u politiki oħra, inklużi l-komplementarjetajiet mal-politiki u l-attivitajiet nazzjonali, reġjonali u tal-UE dwar l-R&I;
• li tappoġġa l-implimentazzjoni tal-prijoritajiet tal-politika tal-UE, inklużi b’mod partikolari l-għanijiet ta’ żvilupp sostenibbli tan-NU (SDGs) u l-Ftehim ta’ Pariġi;
• li jiġi promoss R&I responsabbli, b’kont meħud tal-prinċipju ta’ prekawzjoni;
• li tissaħħaħ id-dimensjoni tal-ġeneru tul il-programm speċifiku;
• li jiżdiedu r-rabtiet ta’ kollaborazzjoni fl-R&I Ewropew u bejn setturi u dixxiplini, inklużi x-xjenzi soċjali u l-istudji umanistiċi;
• li tissaħħaħ il-kooperazzjoni internazzjonali;
• li jiġu konnessi u żviluppati infrastrutturi ta’ riċerka fiż-Żona Ewropea tar-Riċerka (ŻER) u tipprovdi aċċess transnazzjonali;
• li jiġi attirat talent u għat-tħarriġ u ż-żamma ta’ riċerkaturi u innovaturi fiż-ŻER, inkluż permezz tal-mobilità;
• li titrawwem xjenza miftuħa u tiżgura viżibilità għall-pubbliku u aċċess miftuħ għal pubblikazzjonijiet xjentifiċi u dejta ta’ riċerka, inklużi eċċezzjonijiet xierqa;
• li jiġi mħeġġeġ l-isfruttament tar-riżultati tar-R&I u jiġu mxerrda u sfruttati b’mod attiv ir-riżultati, b’mod partikolari l-influwenza tal-investimenti privati u l-iżvilupp tal-politika;
• it-twettiq, permezz ta’ missjonijiet tar-R&I, fuq għanijiet ambizzjużi fi żmien stabbilit;
• it-titjib tar-relazzjoni u l-interazzjoni bejn ix-xjenza u s-soċjetà, inkluża l-viżibilità tax-xjenza fis-soċjetà u l-komunikazzjoni tax-xjenza, u biex jiġi promoss l-involviment taċ-ċittadini u l-utenti finali fil-proċessi ta’ kodisinn u koħolqien;
• l-aċċellerazzjoni tat-trasformazzjoni industrijali, inkluż permezz ta’ ħiliet imtejba għall-innovazzjoni;
• l-istimulazzjoni ta’ attivitajiet ta’ R&I f’intrapriżi żgħar u ta’ daqs medju (SMEs) u l-ħolqien u t-tkabbir ta’ kumpaniji innovattivi, b’mod partikolari negozji ġodda, SMEs u, f’każijiet eċċezzjonali, kumpaniji żgħar ta’ daqs medju;
• it-titjib tal-aċċess għall-finanzjament tar-riskju, inkluż permezz ta’ sinerġiji mal-programm InvestEU stabbilit bir-Regolament (UE) 2021/523 (ara s-sommarju), b’mod partikolari fejn is-suq ma jipprovdix finanzjament vijabbli.

Fit-twettiq ta’ dawn l-għanijiet, jista’ jittieħed kont ta’ ħtiġijiet ġodda u mhux previsti li jinqalgħu matul il-perjodu ta’ implimentazzjoni tal-programm speċifiku. Dan jista’, jekk debitament ġustifikat, jinkludi tweġibiet għal opportunitajiet emerġenti, kriżijiet u theddid, kif ukoll tweġibiet għal ħtiġijiet relatati mal-iżvilupp ta’ politiki ġodda tal-UE.

L-istruttura tal-programm speċifiku (li tirrifletti l-istruttura tar-regolament Orizzont Ewropa, bl-eċċezzjoni tal-Istitut Ewropew tal-Innovazzjoni u t-Teknoloġija) hija kif ġej:

• Pilastru I — Xjenza eċċellenti;
• Pilastru II — Sfidi globali u kompetittività industrijali Ewropea;
• Pilastru III — Ewropa innovattiva;
• Parti — Inkabbru l-parteċipazzjoni u nsaħħu ż-ŻER.

Il-pjan strateġiku u l-programmi ta’ ħidma

Il-programm speċifiku huwa ffaċilitat minn pjan strateġiku pluriennali ta’ attivitajiet ta’ R&I, li jippromwovi wkoll il-konsistenza bejn il-programmi ta’ ħidma, il-prijoritajiet tal-UE u l-prijoritajiet nazzjonali.

Ir-riżultat tal-ippjanar strateġiku huwa stabbilit fi pjan strateġiku pluriennali, għat-tħejjija tal-kontenut fi programmi ta’ ħidma li jimplimentaw il-programm speċifiku, li se jkun fih, kif xieraq u fost affarijiet oħra:

• l-impatt mistenni;
• indikazzjoni tal-ammont allokat għal kull azzjoni u missjoni u skeda indikattiva ta’ implimentazzjoni;
• il-punti li ġejjin b’rabta ma’ għotjiet:
  • il-prijoritajiet
  • il-kriterji tal-għażla u tal-għoti, u l-piż relattiv tal-kriterji differenti tal-għoti
  • ir-rata massima ta’ finanzjament tal-ispejjeż totali eliġibbli.

Il-pjan strateġiku jkopri perjodu massimu ta’ 4 snin, filwaqt li jżomm flessibilità suffiċjenti sabiex l-UE tkun tista’ tirrispondi malajr għal sfidi ġodda u emerġenti, opportunitajiet mhux mistennija u kriżijiet. Il-pjan strateġiku jiffoka b’mod partikolari fuq il-pilastru “Sfidi Globali u kompetittività industrijali Ewropea” u jkopri wkoll attivitajiet rilevanti f’pilastri oħra u fil-parti “Tkabbir tal-parteċipazzjoni u tisħiħ taż-ŻER”.

Baġit

Il-programm speċifiku għandu baġit ta’ EUR 83,397 biljun fi prezzijiet attwali, b’baġit addizzjonali ta’ EUR 2,790 biljun fi prezzijiet kostanti tal-2018 li jirriżultaw mill-Artikolu 5 tar-Regolament (UE, Euratom) 2020/2093 (il-qafas finanzjarju pluriennali 2021-2027, ara s-sommarju) u baġit ieħor ta’ EUR 5,000 biljun fi prezzijiet kostanti tal-2018 mill-Istrument ta’ Rkupru tal-UE biex jappoġġja l-irkupru wara l-kriżi COVID-19 (Regolament (UE) 2020/2094, ara s-sommarju).

MINN META TAPPLIKA D-DEĊIŻJONI?

Dan ilu japplika mill-1 ta’ Jannar 2021.

SFOND

Ara wkoll:

• Orizzont Ewropa (il-Kummissjoni Ewropea)
• Orizzont Ewropa: Il-programm ta’ riċerka u innovazzjoni tal-UE 2021-2027 (Il-Kummissjoni Ewropea).

DOKUMENT EWLIENI

Id-Deċiżjoni tal-Kunsill (UE) 2021/764 tal-10 ta’ Mejju 2021 li tistabbilixxi l-Programm Speċifiku li jimplimenta Orizzont Ewropa — il-Programm Qafas għar-Riċerka u l-Innovazzjoni, u li jħassar id-Deċiżjoni 2013/743/UE (ĠU L 167I, 12.5.2021, pp. 1-80)

DOKUMENTI RELATATI

Ir-Regolament (UE) 2021/695 tal-Parlament Ewropew u tal-Kunsill tat-28 ta’ April 2021 jistabbilixxi l-Orizzont Ewropa — il-Programm Qafas għar-Riċerka u l-Innovazzjoni, li jistabbilixxi r-regoli tiegħu għall-parteċipazzjoni u d-disseminazzjoni, u li jħassar ir-Regolamenti (UE) Nru 1290/2013 u (UE) Nru 1291/2013 (ĠU L 170, 12.5.2021, pp. 1-68)

Ir-Regolament tal-Kunsill (UE) 2020/2094 tal-14 ta’ Diċembru 2020 li jistabbilixxi Strument tal-Unjoni Ewropea għall-Irkupru biex jappoġġa l-irkupru wara l-kriżi tal-COVID-19 (ĠU L 433I, 22.12.2020, pp. 23-27)

l-aħħar aġġornament 02.07.2021