Il-ftehim għandu l-għan li jiżgura livell għoli ta’ protezzjoni għall-indikazzjonijiet ġeografiċi (IĠ) tal-UE elenkati fl-annessi tiegħu fl-UE u fiċ-Ċina, u li jsaħħaħ il-kooperazzjoni dwar kwistjonijiet relatati mal-IĠ bejn l-UE u ċ-Ċina.
Id-Deciżjoni (UE) 2020/1111 tapprova l-iffirmar tal-ftehim mill-UE u d-Deċiżjoni (UE) 2020/1832 tikkonkludi l-ftehim f’isem l-UE.

PUNTI EWLENIN

Indikazzjonijiet ġeografiċi

IĠ hija sinjal distintiv użat biex jidentifika prodott li l-kwalità, ir-reputazzjoni jew tali karatteristiċi oħra tiegħu huma relatati mal-oriġini ġeografika tiegħu.
L-IĠ jiffurmaw parti mill-iskemi tal-kwalità tal-UE stabbiliti fir-Regolamenti (UE) Nru 1151/2012 (ara s-sommarju), Nru 1308/2013 (ara s-sommarju) u Nru 2019/787 (ara s-sommarju).

Kamp ta’ applikazzjoni

Il-ftehim japplika għar-rikonoxximent u għall-protezzjoni tal-IĠ għall-prodotti li joriġinaw fit-territorji tal-2 partijiet u elenkati fl-Annessi III, IV, V u VI tal-ftehim.
Iż-2 partijiet jaqblu li jikkunsidraw l-estensjoni tal-kamp ta’ applikazzjoni tal-ftehim biex jiġu inklużi IĠ addizzjonali.

Indikazzjonijiet ġeografiċi stabbiliti

Il-ftehim jistabbilixxi l-elementi essenzjali għall-protezzjoni tal-IĠ, inklużi l-proċessi u l-kontrolli amministrattivi, u proċedura ta’ oppożizzjoni għall-protezzjoni ta’ utenti preċedenti tal-ismijiet.
L-ispeċifikazzjonijiet huma stabbiliti fl-Anness II.
Kull parti taqbel li tipproteġi l-IĠ tal-oħra. L-IĠ rispettivi huma stabbiliti fl-Annessi III, IV, V u VI tal-ftehim.

Protezzjoni

L-IĠ elenkati fl-annessi għall-ftehim huma protetti kontra:

kwalunkwe formulazzjoni jew preżentazzjoni li tindika jew tissuġġerixxi li l-prodott joriġina xi mkien ieħor mill-post veru tal-oriġini tiegħu;
kwalunkwe użu biex jiġi identifikat prodott komparabbli li ma joriġinax fil-post indikat mill-IĠ inkwistjoni, anke jekk tiġi indikata l-oriġini vera tal-merkanzija jew l-isem protett jiġi tradott, traskritt, traslitterat jew akkumpanjat minn espressjonijiet bħal “natura”, “tip”, “stil”, “imitazzjonijiet” jew simili;
kwalunkwe użu biex jiġi identifikat prodott komparabbli mhux konformi mal-ispeċifikazzjoni tal-prodott tal-isem protett.

Drittijiet

Isem protett jista’ jintuża fuq kwalunkwe prodott leġittimu li jikkonforma mal-ispeċifikazzjonijiet tekniċi tal-IĠ u mal-liġijiet tal-parti kkonċernata.

Trademarks

Iż-żewġ partijiet jaqblu li jannullaw jew jirrifjutaw li jirreġistraw trademark li tikser ir-regoli li jipproteġu l-IĠ, jekk applikazzjoni biex tiġi rreġistrata l-IĠ tkun saret qabel l-applikazzjoni tat-trademark.

Implimentazzjoni

Kumitat Konġunt, magħmul minn rappreżentanti miż-żewġ partijiet jissorvelja l-implimentazzjoni u l-funzjonament tal-ftehim.

Kooperazzjoni

Il-partijiet jaqblu li jikkooperaw bil-ħsieb li jappoġġaw l-implimentazzjoni tal-impenji u l-obbligi meħuda fil-ftehim.

DATA TAD-DĦUL FIS-SEĦĦ

Dan daħal fis-seħħ fl-1 ta’ Marzu 2021.

SFOND

Għal aktar informazzjoni, ara:

Tikketti ta’ kwalità (il-Kummissjoni Ewropea)
Indikazzjonijiet ġeografiċi (il-Kummissjoni Ewropea).
Kummerċ — Ċina (il-Kummissjoni Ewropea).

DOKUMENTI EWLENIN

Ftehim bejn l-Unjoni Ewropea u l-Gvern tar-Repubblika tal-Poplu taċ-Ċina dwar il-Kooperazzjoni b’rabta ma’ indikazzjonijiet ġeografiċi u l-protezzjoni tagħhom (ĠU L 408 I, 4.12.2020, pp. 3-43)

L-emendi suċċessivi għall-ftehim ġew inkorporati fit-test oriġinali. Din il-verżjoni konsolidata għandha valur dokumentarju biss.

Id-Deċiżjoni tal-Kunsill (UE) 2020/1832 tat-23 ta’ Novembru 2020 dwar il-konklużjoni tal-Ftehim bejn l-Unjoni Ewropea u l-Gvern tar-Repubblika tal-Poplu taċ-Ċina dwar il-kooperazzjoni b’rabta ma’ indikazzjonijiet ġeografiċi u l-protezzjoni tagħhom (ĠU L 408I, 4.12.2020, pp. 1-2)

Id-Deċiżjoni tal-Kunsill (UE) 2020/1111 tal-20 ta’ Lulju 2020 dwar l-iffirmar, f’isem l-Unjoni, tal-Ftehim bejn l-Unjoni Ewropea u l-Gvern tar-Repubblika tal-Poplu taċ-Ċina dwar il-koperazzjoni b’rabta ma’ indikazzjonijiet ġeografiċi u l-protezzjoni tagħhom (ĠU L 244, 29.7.2020, p. 8)