Strument ta’ Rkupru tal-UE NextGenerationEU

 

SOMMARJU TA’:

Ir-Regolament (UE) 2020/2094 li jistabbilixxi Strument tal-Unjoni Ewropea għall-Irkupru biex jappoġġa l-irkupru wara l-kriżi tal-COVID-19

X’INHU L-GĦAN TAR-REGOLAMENT?

Huwa jistabbilixxi l-Istrument tal-Unjoni Ewropea għall-Irkupru NextGenerationEU biex jappoġġa l-irkupru mill-kriżi tal-COVID-19 u jfassal kif ser jopera.

PUNTI EWLENIN

NextGenerationEU huwa strument temporanju ta’ rkupru li jiswa sa EUR 750 biljun skont prezzijiet tal-2018. Huwa jinsab fil-qalba tar-rispons tal-Unjoni Ewropea (UE) għall-kriżi tal-COVID-19 u għandu l-għan li jsostni l-irkupru u jibni futur iktar ekoloġiku, iktar diġitali u iktar reżiljenti, speċjalment biex isaħħaħ mill-ġdid il-potenzjal għat-tkabbir sostenibbli u għall-impjiegi sabiex jappogga t-tranżizzjoni tal-Istati Membri lejn ekonomija iktar ekoloġika u diġitali.

L-istrument ser jgħin ukoll biex isewwi l-ħsara ekonomika u soċjali immedjata li ġabet magħha l-kriżi tal-COVID 19 u biex jibni Ewropa ta’ wara l-COVID-19 li tkun attrezzata aħjar biex tkampa mal-isfidi kurrenti u dawk futuri.

Il-qofol ta’ NextGenerationEU huwa l-allokazzjoni ta’ finanzjament lill-Faċilità tal-Irkupru u tar-Reżiljenza — billi joffri għotjiet u self ta’ flus biex jappoġġaw ir-riformi u l-investimenti fl-Istati Membri b’valur totali ta’ EUR 672.5 biljun skont prezzijiet tal-2018:

• sa EUR 312.5 biljun ser jiġu pprovduti f’forma ta’ għotjiet ta’ flus;
• sa EUR 360 biljun ser jipprovdu self ta’ flus mill-UE lill-Istati Membri individwali. Dan is-self ta’ flus ser jitħallas lura minn dawk l-Istati Membri.

Barra minn hekk, NextGenerationEU ser isaħħaħ bosta programmi tal-UE kif ġej:

• Koeżjoni, taħt l-Assistenza fl-Irkupru għall-Koeżjoni u għat-Territorji tal-Ewropa (REACT-EU), biex tgħin tindirizza l-konsegwenzi ekonomiċi tal-COVID-19 fl-ewwel snin tal-irkupru— b’EUR 47.5 biljun;
• Fond għal Tranżizzjoni Ġusta b’EUR 10 biljun;
• Żvilupp rurali b’EUR 7.5 biljuni;
• InvestEU b’EUR 5.6 biljuni;
• Mekkaniżmu tal-Unjoni għall-Protezzjoni Ċivili, taħt rescEU, b’ EUR 1.9 biljuni;
• Orizzont Ewropa, b’EUR 5 biljun.

Biex tiffinanzja NextGenerationEU, id-Deċiżjoni dwar ir-Riżorsi Proprji (Deċiżjoni (UE, Euratom) 2020/2053) (ara s-sommarju) ser tippermetti l-Kummissjoni Ewropea tissellef fuq is-swieq tal-kapital f’isem l-UE. Kif hemm fid-Deċiżjoni dwar ir-Riżorsi Proprji, il-pagament lura jista’ jseħħ fuq medda ta’ snin, sa mhux iktar tard mill-2058. Dan ser jevita li jagħmel pressjoni immedjata fuq il-finanzi nazzjonali tal-Istati Membri u jippermettilhom jikkonċentraw il-ħiliet tagħhom fuq l-irkupru.

Iktar informazzjoni:

• approprjazzjonijiet ta’ impenn* għal kull nefqa, minbarra t-EUR 360 biljun ta’ self, ser ikunu disponibbli hekk kif id-Deċiżjoni dwar ir-Riżorsi Proprji ser tidħol fis-seħħ, b’mill-inqas 60 % impenjati sal-31 ta’ Diċembru 2022 u kwalunkwe ammont li jifdal sal-31 ta’ Diċembru 2023;
• deċiżjonijiet dwar kif ser jingħataw it-EUR 360 biljun f’self ser jiġu adottati sal-31 ta’ Diċembru 2023;
• kundizzjonijiet speċifiċi ser japplikaw għall-garanziji tal-baġit u tal-investiment tal-UE.

Ir-regolament ma japplikax fir-Renju Unit.

Il-Kummissjoni ser tissottometti rapport lill-Kunsill sal-31 ta’ Ottubru 2022 dwar kif il-fondi allokati taħt dan l-istrument qed jintużaw.

MINN META JAPPLIKA R-REGOLAMENT?

Ilu japplika mit-23 ta’ Diċembru 2020.

SFOND

Bit-total kollu ta’ EUR 1.8 triljun, NextGeneration EU u l-baġit tal-UE 2021-2027 jiffurmaw l-ikbar pakkett ta’ stimolu li l-baġit tal-UE qatt iffinanzja.

Il-pakkett ser jgħin ukoll biex terġa’ tinbena Ewropa wara l-COVID-19 li ser tkun iktar ekoloġika, iktar diġitali, iktar reżiljenti u attrezzata aħjar biex tilqa’ l-isfidi preżenti u dawk futuri.

Barra dan ir-Regolament, il-pakkett jinkludi wkoll:

• il-qafas finanzjarju plurjennali 2021-2027 (Regolament (UE, Euratom) 2020/2093) — ara s-sommarju;
• Il-ftehim interistituzzjonali dwar id-dixxiplina baġitarja (ara s-sommarju);
• Ir-Regolament (UE, Euratom) 2020/2092 dwar reġim ġenerali ta’ kondizzjonalità għall-protezzjoni tal-baġit tal-UE — ara s-sommarju;
• id-Deċiżjoni dwar ir-Riżorsi Proprji (Deċiżjoni (UE, Euratom) 2020/2053).

TERMINI EWLENIN

DOKUMENT EWLIENI

Ir-Regolament tal-Kunsill (UE) 2020/2094 tal-14 ta’ Diċembru 2020 li jistabbilixxi Strument tal-Unjoni Ewropea għall-Irkupru biex jappoġġa l-irkupru wara l-kriżi tal-COVID-19 (ĠU L 433I, 22.12.2020, pp. 23-27)

DOKUMENTI RELATATI

Ftehim Interistituzzjonali bejn il-Parlament Ewropew, il-Kunsill tal-Unjoni Ewropea u l-Kummissjoni Ewropea dwar dixxiplina baġitarja, dwar kooperazzjoni f’materji baġitarji u dwar ġestjoni finanzjarja tajba, kif ukoll dwar riżorsi proprji ġodda, inkluż pjan direzzjonali lejn l-introduzzjoni ta’ Ftehim Interistituzzjonali ta’ riżorsi proprji ġodda tas-16 ta’ Diċembru 2020 bejn il-Parlament Ewropew, il-Kunsill tal-Unjoni Ewropea u l-Kummissjoni Ewropea dwar dixxiplina baġitarja, dwar kooperazzjoni f’materji baġitarji u dwar ġestjoni finanzjarja tajba, kif ukoll dwar riżorsi proprji ġodda, inkluż pjan direzzjonali lejn l-introduzzjoni ta’ riżorsi proprji ġodda (ĠU L 433I, 22.12.2020, pp. 28-46)

Id-Deċiżjoni tal-Kunsill (UE, Euratom) 2020/2053 tal-14 ta’ Diċembru 2020 dwar is-sistema tar-riżorsi proprji tal-Unjoni Ewropea u li tħassar id-Deċiżjoni 2014/335/UE, Euratom (ĠU L 424, 15.12.2020, pp. 1-10)

Ir-Regolament (UE, Euratom) 2018/1046 tal-Parlament Ewropew u tal-Kunsill tat-18 ta’ Lulju 2018 dwar ir-regoli finanzjarji applikabbli għall-baġit ġenerali tal-Unjoni, li jemenda r-Regolamenti (UE) Nru 1296/2013, (UE) Nru 1301/2013, (UE) Nru 1303/2013, (UE) Nru 1304/2013, (UE) Nru 1309/2013, (UE) Nru 1316/2013, (UE) Nru 223/2014, (UE) Nru 283/2014, u d-Deċiżjoni Nru 541/2014/UE u li jħassar ir-Regolament (UE, Euratom) Nru 966/2012 (ĠU L 193, 30.7.2018, pp. 1-222)

Emendi suċċessivi għar-Regolament (UE, Euratom) 2018/1046 ġew inkorporati fid-dokument oriġinali. Din il-verżjoni konsolidata għandha valur dokumentarju biss.

l-aħħar aġġornament 20.05.2021