Il-konservazzjoni u l-ġestjoni ta’ riżorsi tas-sajd f’ibħra internazzjonali fin-Nofsinhar tal-Oċean Paċifiku
SOMMARJU TA’:
Konvenzjoni dwar il-Konservazzjoni u l-Ġestjoni ta’ Riżorsi tas-Sajd f’Ibħra Miftuħa fin-Nofsinhar tal-Oċean Paċifiku
Id-Deċiżjoni 2011/189/UE dwar l-iffirmar, f’isem l-UE, tal-Konvenzjoni dwar il-Konservazzjoni u l-Ġestjoni ta’ Riżorsi tas-Sajd f’Ibħra Internazzjonali fin-Nofsinhar tal-Oċean Paċifiku
Id-Deċiżjoni 2012/130/UE, dwar l-approvazzjoni, f’isem l-UE, tal-Konvenzjoni dwar il-Konservazzjoni u l-Ġestjoni ta’ Riżorsi tas-Sajd f’Ibħra Miftuħa fin-Nofsinhar tal-Oċean Paċifiku
Id-depożitu tal-UE tal-istrument tagħha ta’ approvazzjoni tal-Konvenzjoni dwar il-Konservazzjoni u l-Ġestjoni ta’ Riżorsi tas-Sajd f’Ibħra Internazzjonali fin-Nofsinhar tal-Oċean Paċifiku
X’INHU L-GĦAN TAL-KONVENZJONI U TAD-DEĊIŻJONI?
- Il-konvenzjoni timmira li tiżgura l-konservazzjoni fit-tul u l-użu sostenibbli tar-riżorsi tas-sajd, filwaqt li tissalvagwardja l-ekosistemi tal-baħar li jeżistu fihom dawn ir-riżorsi. Dan japplika għan-Nofsinhar tal-Oċean Paċifiku lil hinn miż-żoni ta’ ġuriżdizzjoni nazzjonali, f’konformità mad-dritt internazzjonali. Il-konvenzjoni tkopri r-riżorsi tas-sajd kollha minbarra:
- l-ispeċijiet sedentarji (fl-istadju li jistgħu jinħasdu, li jew ma jiċċaqalqux fuq qiegħ il-baħar jew taħu jew li ma jkunux jistgħu jiċċaqilqu ħlief f’kuntatt fiżiku kostanti ma’ qiegħ il-baħar jew mas-sottoswol),
- l-ispeċijiet li jpassu ħafna,
- l-ispeċijiet anadromi (ħut li jgħix fil-baħar u li jemigra lejn l-ilma ħelu biex jipproduċi),
- l-ispeċijiet katadromi (ħut li jqatta’ l-biċċa l-kbira ta’ ħajtu fl-ilma ħelu, imbagħad jemigra lejn il-baħar biex jipproduċi), u
- il-mammiferi tal-baħar, ir-rettili tal-baħar u t-tjur tal-baħar.
- Id-deċiżjoni tapprova l-konvenzjoni f’isem l-Unjoni Ewropea (UE).
- Biex tikkonkludi l-konvenzjoni, l-UE ddepożitat l-istrument tagħha ta’ approvazzjoni fit-18 ta’ Ottubru 2011 mal-gvern ta’ New Zealand bħala d-depożitarju għall-konvenzjoni.
PUNTI EWLENIN
Il-Partijiet għall-konvenzjoni għandhom japplikaw il-prinċipji li ġejjin, filwaqt li jadottaw approċċ prekawzjonarju u ekosistemiku.
- Il-konservazzjoni u l-ġestjoni tar-riżorsi tas-sajd għandhom ikunu trasparenti, responsabbli u inklużivi, filwaqt li jqisu l-aħjar prattika internazzjonali.
- Is-sajd għandu jkun sostenibbli, iqis l-impatt fuq l-ispeċijiet mhux fil-mira u assoċjati jew dipendenti u l-obbligu li l-ambjent tal-baħar jiġi protett u ppreservat.
- Is-sajd eċċessiv u l-kapaċità żejda għas-sajd għandhom ikunu evitati jew eliminati.
- Id-data kollha dwar is-sajd, inkluż l-impatt fuq l-ekosistemi tal-baħar, għandha tinġabar u tiġi kondiviża.
- Id-deċiżjonijiet għandhom ikunu bbażati fuq l-aħjar informazzjoni xjentifika u teknika disponibbli u fuq il-parir tal-korpi sussidjarji rilevanti kollha.
- Jiġu promossi l-kooperazzjoni u l-koordinazzjoni fost il-partijiet għall-konvenzjoni biex jassiguraw li l-miżuri ta’ konservazzjoni u ta’ ġestjoni adottati mill-Kummissjoni maħtura skont il-konvenzjoni jkunu kompatibbli ma’ dawk applikati f’żoni taħt il-ġurisdizzjoni nazzjonali.
- L-ekosistemi tal-baħar għandhom ikunu protetti, b’mod partikolari dawk li jieħdu żmien twil biex jirkupraw wara li jkunu ġew imfixkla.
- Għandhom jiġu rikonoxxuti l-interessi tal-pajjiżi li qed jiżviluppaw, it-territorji u l-possessjonijiet — flimkien mal-ħtiġijiet tal-komunitajiet kostali tagħhom.
- Għandha tiġi żgurata l-konformità mal-miżuri ta’ konservazzjoni u ġestjoni flimkien ma’ sanzjonijiet biex jiskoraġġixxu l-ksur u biex it-trasgressuri jiġu evitati milli jibbenefikaw mill-attivitajiet illegali tagħhom.
- It-tniġġis u l-iskart mill-bastimenti tas-sajd, ir-rimi, il-qbid minn irkaptu mitluf jew abbandunat u l-impatti fuq speċijiet oħra u fuq l-ekosistemi tal-baħar għandhom jiġu mminimizzati.
Fl-applikazzjoni tal-approċċ prekawzjonarju, il-partijiet għandhom:
- ikunu aktar kawti meta l-informazzjoni tkun inċerta, mhux affidabbli jew adegwata;
- ma jużawx in-nuqqas ta’ informazzjoni xjentifika adegwata bħala raġuni għan-nuqqas ta’ teħid ta’ azzjoni ta’ konservazzjoni u ta’ ġestjoni;
- iqisu l-aħjar prattika internazzjonali.
L-approċċ ekosistemiku huwa approċċ integrat fejn jittieħdu deċiżjonijiet biex jissalvagwardjaw l-ekosistemi tal-baħar usa’ u biex jiġu żgurati l-konservazzjoni fit-tulu l-użu sostenibbli tar-riżorsi.
Organizzazzjoni
Il-konvenzjoni tistabbilixxi l-Organizzazzjoni Reġjonali għall-Ġestjoni tas-Sajd fin-Nofsinhar tal-Paċifiku (SPRFMO). L-SPRFMO tikkonsisti mill-korpi li ġejjin, kif ukoll minn kwalunkwe korp sussidjarju li l-Kummissjoni tista’ tistabbilixxi skont il-konvenzjoni.
- Il-Kummissjoni
- Il-Kumitat Xjentifiku
- Il-Kumitat Tekniku u dwar il-Konformità
- Il-Kumitat ta’ Ġestjoni Subreġjonali tal-Lvant
- Il-Kumitat ta’ Ġestjoni Subreġjonali tal-Punent
- Il-Kumitat tal-Finanzi u l-Amministrazzjoni
- Is-Segretarjat.
Kull parti kontraenti għall-konvenzjoni hija membru tal-Kummissjoni u taħtar rappreżentant wieħed għall-Kummissjoni u għall-kumitati. Dan ir-rappreżentant jista’ jkun akkumpanjat minn rappreżentanti, esperti u konsulenti sostituti. Kull membru tal-Kummissjoni, inkluża l-UE, għandu:
- jimplimenta l-konvenzjoni u kwalunkwe miżura adottata mill-Kummissjoni, u jiżgura l-effettività tagħhom;
- jikkoopera fil-kisba tal-objettiv tal-konvenzjoni;
- jaġixxi biex jevita, jiskoraġġixxi u jelimina s-sajd illegali:
- jiġbor, jirraporta u jagħmel skambju ta’ data xjentifika, teknika u statistika li għandha x’taqsam mar-riżorsi tas-sajd u mal-ekosistemi tal-baħar;
- jiżgura li l-bastimenti tas-sajd jtajru l-bandiera tiegħu:
- jikkonforma mal-konvenzjoni u mal-miżuri ta’ konservazzjoni u ta’ ġestjoni adottati mill-Kummissjoni,
- ma jwettaqx sajd mhux awtorizzat fl-ilmijiet koperti mill-konvenzjoni,
- jopera tagħmir li jikkonforma mal-istandards tas-sistema ta’ monitoraġġ tal-bastimenti,
- iħott l-art jew jittrasborda l-ħut maqbud fiż-żona tal-konvenzjoni f’konformità mal-istandards u l-proċedura;
- iżomm reġistru ta’ bastimenti tas-sajd awtorizzati intitolati li jtajru l-bandiera tiegħu;
- immedjatament jinvestiga u jirrapporta bis-sħiħ dwar azzjonijiet li jittieħdu bi tweġiba għal kwalunkwe allegat ksur u jiżgura penali xierqa.
Konservazzjoni u ġestjoni
Il-Kummissjoni hija responsabbli biex tiddetermina:
- in-natura u l-estensjoni tas-sajd għal kull riżorsa tas-sajd, inkluż qabda totali permissibbli jew sforz tas-sajd massimu permissibbli;
- iż-żoni fejn jista’ jsir is-sajd;
- il-perjodi meta jista’ jsir is-sajd;
- il-limiti tad-daqs ta’ qabda li tista’ tinżamm;
- it-tipi permessi ta’ rkaptu, teknoloġija jew prattiki.
Il-Kummissjoni tista’ tapplika miżuri ta’ emerġenza, fejn is-sajd jippreżenta theddida serja għas-sostenibbiltà tar-riżorsi tas-sajd jew għall-ekosistema tal-baħar jew meta fenomenu naturali jew diżastru kkawżat mill-bniedem ikollu, jew x’aktarx ikollu, impatt negattiv sinifikanti fuq ir-riżorsi tas-sajd.
Is-sajd ġdid jew esploratorju jista’ jkun miftuħ għas-sajd biss meta l-Kummissjoni tkun adottat miżuri preliminari kawti ta’ konservazzjoni u ġestjoni.
Il-Kummissjoni għandha tistabbilixxi proċeduri kooperattivi xierqa għall-monitoraġġ, il-kontroll u s-sorveljanza tas-sajd, sabiex tkun żgurata l-konformità mal-konvenzjoni.
Il-Kummissjoni għandha tistabbilixxi wkoll Programm ta’ Osservaturi biex jiġbor data vverifikata dwar il-qbid u l-isforzi, data xjentifika oħra u informazzjoni addizzjonali relatata mal-attività tas-sajd u mal-impatti tagħha fuq l-ambjent tal-baħar.
Partijiet għall-konvenzjoni
Il-membri tal-SPRFMO bħalissa jinkludu l-Awstralja, iċ-Ċilì, iċ-Ċina, il-Gżejjer Cook, Kuba, l-Ekwador, l-UE, id-Danimarka (għall-Gżejjer Faroe), New Zealand, il-Perù, ir-Russja, il-Korea t’Isfel, It-Tajwan (it-Tajpej Ċiniż), l-Istati Uniti u Vanuatu.
Annessi
L-annessi għall-konvenzjoni jiddefinixxu:
- ż-żoni tan-Nofsinhar tal-Oċean Paċifiku koperti mill-Kumitati ta’ Ġestjoni Subreġjonali tal-Lvant u tal-Punent rispettivament;
- regoli addizzjonali biex ikunu stabbiliti l-qabdiet totali permissibbli jew l-isforz tas-sajd massimu permissibbli f’ċirkostanzi speċifiċi;
- il-kompożizzjoni u l-kompiti tal-Kumitat ta’ Rieżami li jittratta kwalunkwe oġġezzjoni li jqajmu l-membri għad-deċiżjonijiet tal-Kummissjoni;
- iċ-ċirkostanzi li fihom l-entitajiet tas-sajd jistgħu jesprimu impenn biex jimxu mat-termini tal-konvenzjoni.
DATA TAD-DĦUL FIS-SEĦĦ
It-test tal-konvenzjoni ġie miftiehem f’Novembru 2009 u kien miftuħ għall-iffirmar mill-1 ta’ Frar 2010 sal-31 ta’ Jannar 2011. L-UE ffirmat it-test tal-konvenzjoni fis-26 ta’ Lulju 2010 u approvatu fit-3 ta’ Ottubru 2011.
Il-konvenzjoni daħlet fis-seħħ fl-24 ta’ Awwissu 2012 u tibqa’ miftuħa għall-adeżjoni.
SFOND
Ara wkoll:
- Dwar l-SPRFMO (Organizzazzjoni Reġjonali għall-Ġestjoni tas-Sajd fin-Nofsinhar tal-Paċifiku).
DOKUMENTI EWLENIN
Konvenzjoni dwar il-Konservazzjoni u l-Ġestjoni ta’ Riżorsi tas-Sajd f’Ibħra Miftuħa fin-Nofsinhar tal-Oċean Paċifiku (ĠU L 67, 6.3.2012, pp. 3–28).
Id-Deċiżjoni tal-Kunsill 2011/189/UE tal-24 ta’ Ġunju 2010 dwar l-iffirmar, f’isem l-Unjoni Ewropea, tal-Konvenzjoni dwar il-Konservazzjoni u l-Ġestjoni ta’ Riżorsi tas-Sajd f’Ibħra Internazzjonali fin-Nofsinhar tal-Oċean Paċifiku (ĠU L 81,29.3.2011, pp. 1–2).
Id-Deċiżjoni tal-Kunsill 2012/130/UE tat-3 ta’ Ottubru 2011 dwar l-approvazzjoni, f’isem l-Unjoni Ewropea, tal-Konvenzjoni dwar il-Konservazzjoni u l-Ġestjoni ta’ Riżorsi tas-Sajd f’Ibħra Miftuħa fin-Nofsinhar tal-Oċean Paċifiku (ĠU L 67, 6.3.2012, pp. 1–2).
Konvenzjoni dwar il-Konservazzjoni u l-Ġestjoni ta’ Riżorsi tas-Sajd f’Ibħra Internazzjonali fin-Nofsinhar tal-Oċean Paċifiku — Id-depożitu tal-istrument tal-approvazzjoni mill-Unjoni Ewropea (ĠU L 255, 21.9.2012, p. 2).
DOKUMENTI RELATATI
Ir-Regolament (UE) 2018/975 tal-Parlament Ewropew u tal-Kunsill tal-4 ta’ Lulju 2018 li jistabbilixxi miżuri ta’ ġestjoni, ta’ konservazzjoni u ta’ kontroll li japplikaw fl-Organizzazzjoni Reġjonali għall-Ġestjoni tas-Sajd fin-Nofsinhar tal-Paċifiku (SPRFMO) Żona tal-Konvenzjoni (ĠU L 179, 16.7.2018, pp. 30–75).
l-aħħar aġġornament 08.11.2021