Il-ftehim jistabbilixxi qafas formali għal kooperazzjoni f’oqsma ta’ interess komuni meta l-partijiet ikunu jappoġġaw attivitajiet ta’ riċerka u żvilupp biex imexxu ’l quddiem ix-xjenza u/jew it-teknoloġija rilevanti għal dawk l-oqsma ta’ interess. Il-ftehim ġie emendat darba fl-1999 u b’mod partikolari l-Artikolu 4(2) tiegħu, jiġifieri l-kamp ta’ applikazzjoni.

Bid-deċiżjonijiet tiegħu, il-Kunsill approva l-konklużjoni tal-ftehim, u l-emenda sussegwenti tiegħu, f’isem il-Komunità Ewropea (issa l-Unjoni Ewropea — UE).

PUNTI EWLENIN

L-attivitajiet li saru taħt il-ftehim huma bbażati fuq sett ta’ prinċipji:

benefiċċju reċiproku;
skambju f’waqtu ta’ informazzjoni li tista’ taffettwa l-azzjonijiet tal-parteċipanti f’attivitajiet ta’ kooperazzjoni;
protezzjoni effettiva u tqassim ġust tad-drittijiet tal-proprjetà intellettwali; u
it-tħabrik għal benefiċċji ekonomiċi u soċjali ta’ attivitajiet ta’ kooperazzjoni għall-UE u għall-Awstralja.

Kamp ta’ applikazzjoni

L-oqsma ta’ kooperazzjoni huma ddefiniti kif ġej:

Għall-UE, dawn jistgħu jinkludu l-attivitajiet kollha ta’ riċerka u żvilupp teknoloġiku u ta’ dimostrazzjoni koperti mill-Artikoli 180(a) (Implimentazzjoni ta’ programmi ta’ riċerka, żvilupp teknoloġiku u ta’ dimostrazzjoni, bil-promozzjoni ta’ kooperazzjoni ma’ u bejn l-impriżi, iċ-ċentri ta’ riċerka u l-universitajiet) u 180(d) (Stimulazzjoni tat-taħriġ u l-mobbiltà tar-riċerkaturi fl-UE) tat-Trattat dwar il-Funzjonament tal-Unjoni Ewropea (TFUE), dan tal-aħħar biss sa fejn huma kkonċernati n-netwerks bejn l-operaturi tal-infrastruttura u l-proġetti ta’ riċerka relatati.
Għall-Awstralja, dawn jistgħu jinkludu kwalunkwe attività xjentifika u teknoloġika ffinanzjata jew imwettqa mill-Gvern tal-Awstralja, il-Gvernijiet u t-Territorji tal-Istat, l-awtoritajiet mhux governattivi inklużi s-setturi tar-riċerka u tan-negozju tas-settur privat u kwalunkwe entità ta’ riċerka interessata.

Attivitajiet

Il-kooperazzjoni tista’ tinkludi l-attivitajiet li ġejjin:

parteċipazzjoni ta’ persuni u entitajiet legali*, istituti tar-riċerka, u korpi oħra, inklużi l-partijiet infushom, fi proġetti ta’ riċerka mmexxija mill-Awstralja jew mill-UE, b’konformità mal-proċeduri fis-seħħ għal kull parti;
l-użu bi sħab ta’ faċilitajiet tar-riċerka biex tinstab kooperazzjoni fi proġetti ta’ riċerka;
żjarat u skambji ta’ xjenzjati, inġiniera u persunal xieraq ieħor għall-iskop ta’ parteċipazzjoni f’seminars, simposji u workshops rilevanti għall-koperazzjoni skont dan il-ftehim;
skambju ta’ informazzjoni bħal prattiki, liġijiet, regolamenti u programmi rilevanti għall-koperazzjoni skont dan il-ftehim; u
attivitajiet oħra li jistgħu jiġu miftiehma bejn xulxin mill-Kumitat Konġunt għal Koperazzjoni fix-Xjenza u t-Teknoloġija bejn l-UE u l-Awstralja.

DATA TAD-DĦUL FIS-SEĦĦ

Il-ftehim daħal fis-seħħ fil-25 ta’ Lulju 1994 u l-ftehim li jemendah daħal fis-seħħ fid-9 ta’ Diċembru 1999. It-tul tiegħu huwa indefinit u jista’ jintemm fi kwalunkwe ħin minn kwalunkwe parti fi żmien tnax-il xahar ta’ avviż bil-miktub.

SFOND

Il-ftehim Xjentifiku u Teknoloġiku (S&T) tal-1994 kien l-ewwel ftehim ta’ kooperazzjoni fix-xjenza u t-teknoloġija konkluż mill-Komunità Ewropea ma’ pajjiż industrijalizzat barra l-Ewropa. Dan jifforma parti minn relazzjonijiet bilaterali usa’ bejn l-UE u l-Awstralja li bħalissa huma bbażati fuq il-Qafas ta’ Sħubija bejn l-UE u l-Awstralja tal-2008. Fl-2017, ġie ffirmat Ftehim Qafas ġdid, aktar komprensiv, u ilu japplika b’mod provviżorju għal ċerti setturi mill-4 ta’ Ottubru 2018.

Għal aktar informazzjoni, ara:

L-Awstralja u l-UE (Servizz Ewropew għall-Azzjoni Esterna)

Għal aktar informazzjoni dwar il-kooperazzjoni fir-Riċerka u l-Innovazzjoni (R&I) mal-Awstralja, ara:

Kooperazzjoni internazzjonali tar-R&I mal-Awstralja (il-Kummissjoni Ewropea)
Pjan direzzjonali għall-kooperazzjoni xjentifika u teknoloġika bejn l-UE u l-Awstralja (il-Kummissjoni Ewropea).

TERMINI EWLENIN

Entitajiet legali: kumpaniji, organizzazzjonijiet u individwi li għandhom drittijiet u obbligi legali.

DOKUMENTI EWLENIN

Ftehim relatat mal-koperazzjoni xjentifika u teknika bejn il-Komunità Ewropea u l-Awstralja (ĠU L 188, 22.7.1994, pp. 18-25)

Emendi suċċessivi għall-ftehim ġew inkorporati fit-test oriġinali. Din il-verżjoni konsolidata hija ta’ valur dokumentarju biss.

Id-Deċiżjoni tal-Kunsill 99/510/KE tad-29 ta’ April 1999 li tirrigwardja l-konklużjoni tal-Ftehim li jemenda l-Ftehim li għandu x’jaqsam ma’ koperazzjoni xjentifika u teknika bejn il-Komunità Ewropea u l-Awstralja (ĠU L 195, 28.7.1999, p. 31)

Id-Deċiżjoni tal-Kunsill 94/457/KE tas-27 ta’ Ġunju 1994 dwar il-konklużjoni ta’ Ftehim li għandu x’jaqsam mal-kooperazzjoni xjentifika u teknika bejn il-Komunitajiet Ewropej u l-Awstralja (ĠU L 188, 22.7.1994, p. 17)