Uffiċċju Ewropew għas-Selezzjoni tal-Persunal (EPSO)

 

SOMMARJU TA’

Deċiżjoni 2002/620/KE li tistabbilixxi uffiċċju ta’ għażla tal-persunal għall-istituzzjonijiet tal-UE

Deċiżjoni 2002/621/KE dwar l-organizzazzjoni u t-tħaddim tal-uffiċċju tal-għażla tal-persunal għall-istituzzjonijiet tal-UE

X’INHU L-GĦAN TA’ DAWN ID-DEĊIŻJONIJIET?

• Id-Deċiżjoni 2002/620/KE tistabbilixxi l-Uffiċċju Ewropew għas-Selezzjoni tal-Persunal (EPSO) responsabbli għar-reklutaġġ ta’ persunal għall-istituzzjonijiet, aġenziji u korpi tal-UE.
• Id-Deċiżjoni 2002/621/KE tistabbilixxi r-regoli dwar l-organizzazzjoni u l-operat tal-EPSO.

PUNTI EWLENIN

Dmirijiet

• L-EPSO huwa responsabbli biex jopera l-proċess tal-għażla tal-persunal għall-istituzzjonijiet, aġenziji u korpi tal-UE. Jagħmel dan billi jorganizza kompetizzjonijiet miftuħin, li r-riżultati tagħhom jippermettulu jfassal listi ta’ riżerva ta’ kandidati xierqa.
• Jaħdem mill-qrib mal-istituzzjonijiet sabiex jevalwa l-ħtiġijiet futuri tal-persunal u jħejji programm ta’ kompetizzjonijiet biex jissodisfa dawk il-ħtiġijiet.
• Jiżviluppa metodi u tekniki ta’ għażla li huma bbażati fuq l-aħjar prattika u huma konformi mal-profili tal-ħiliet meħtieġa.
• Imexxi u jimmonitorja l-użu tal-listi ta’ riżerva mħejjija wara l-kompetizzjonijiet.

Proċeduri tas-selezzjoni

• Kull istituzzjoni tal-UE għandha tagħmel numru suffiċjenti ta’ membri tal-bord tal-għażla, eżaminaturi u superviżuri disponibbli għall-EPSO biex tippermetti li l-proċeduri tal-għażla jipproċedu bla xkiel.
• Id-deċiżjoni li jinħatru kandidati magħżula tittieħed mill-awtoritajiet tal-ħatra tal-istituzzjonijiet, aġenziji u korpi rilevanti tal-UE.

Servizzi addizzjonali

L-EPSO jista’ wkoll jagħmel dan li ġej.

• Jaqbel li jorganizza proċeduri ta’ għażla għall-persunal reklutat minn kwalunkwe korp, uffiċċju jew aġenzija. Qabel ma jaqbel li jagħmel dan, il-kap tal-EPSO jeħtieġ l-approvazzjoni tal-bord ta’ ġestjoni tal-EPSO. Kwalunkwe ftehim bħal dan għandu jkopri l-arranġamenti finanzjarji relatati mas-servizzi pprovduti mill-EPSO.
• Jipprovdi appoġġ tekniku għal kompetizzjonijiet interni organizzati minn istituzzjonijiet, uffiċċji, aġenziji u korpi individwali.
• Jorganizza proċeduri ta’ għażla għal kategoriji oħra għajr uffiċjali, bħal aġenti kuntrattwali u aġenti temporanji, u jfassal listi ta’ riserva ta’ applikanti xierqa.

Bord tat-Tmexxija

• L-EPSO għandu bord tat-tmexxija li jinkludi membru wieħed għal kull istituzzjoni u tliet rappreżentanti tal-persunal bi status ta’ osservatur maħtura mill-kumitati tal-persunal tal-istituzzjonijiet (trejdunjins).
• Il-kompiti prinċipali tal-bord tat-tmexxija jinkludu:
  • l-approvazzjoni tar-regoli dwar l-operat tal-EPSO u l-istruttura organizzattiva tiegħu;
  • l-approvazzjoni tal-prinċipji li jirregolaw il-politika tal-għażla tal-EPSO;
  • l-approvazzjoni tar-rati taxxabbli għas-servizzi addizzjonali tal-EPSO;
  • regoli li bihom kull istituzzjoni għandha tagħmel numru xieraq ta’ membri tal-bord tal-għażla, eżaminaturi u superviżuri disponibbli għall-EPSO.

Ħatra tal-persunal tal-EPSO

Il-Kummissjoni Ewropea taħtar il-kap tal-EPSO ladarba l-bord tat-tmexxija jkun ħareġ opinjoni favorevoli fir-rigward tal-kandidat. Il-kap huwa responsabbli għall-operat bla xkiel tal-EPSO u għall-ħatra tal-persunal tiegħu. Il-kap jinħatar għal terminu ta’ 5 snin li jista’ jiġġedded darba.

Baġit u kontijiet

Il-baġit tal-EPSO jaqa’ taħt is-sezzjoni tal-baġit tal-UE relatata mal-Kummissjoni Ewropea. Il-kontijiet tal-EPSO għandhom jitfasslu skont ir-regoli u l-metodi tal-kontabilità tal-Kummissjoni. Għandu jżomm kontijiet separati tad-dħul mill-pagamenti għas-servizzi pprovduti.

MINN META JAPPLIKAW ID-DEĊIŻJONIJIET?

Id-Deċiżjonijiet 2002/620/KE u 2002/621/KE ilhom japplikaw mis- 26 ta’ Lulju 2002.

SFOND

Għal aktar informazzjoni, ara:

• L-Uffiċċju Ewropew għas-Selezzjoni tal-Persunal (Europa).

DOKUMENTI EWLENIN

Id-Deċiżjoni 2002/620/KE tal-Parlament Ewropew, tal-Kunsill, tal-Kummissjoni, tal-Qorti tal-Ġustizzja, tal-Qorti tal-Awdituri, tal-Kumitat Ekonomiku u Soċjali, tal-Kumitat tar-Reġjuni u tal-Ombudsman Ewropew tal-25 ta’ Lulju 2002 li tistabbilixxi Uffiċċju Ewropew għas-Selezzjoni tal-Persunal - Dikjarazzjoni mill-Bureau tal-Parlament Ewropew (ĠU L 197, 26.7.2002, pp. 53-55)

Deċiżjoni 2002/621/KE tas-Segretarji Ġenerali tal-Parlament Ewropew, il-Kunsill u l-Kummissjoni, ir-Reġistratur tal-Qorti tal-Ġustizzja, is-Segretarji Ġenerali tal-Qorti tal-Awdituri, il-Kumitat Ekonomiku u Soċjali u l-Kumitat tar-Reġjuni, u r-Rappreżentant tal-Ombudsman Ewropew tal-25 ta’ Lulju 2002 dwar l-organizzazzjoni u t-tħaddim tal-Uffiċċju tas-Selezzjoni tal-Persunal tal-Komunitajiet Ewropej (ĠU L 197, 26.7.2002, pp. 56-59)

Emendi suċċessivi għad-Deċiżjoni 2002/621/KE ġew inkorporati fid-dokument oriġinali. Din il-verżjoni kkonsolidata hija ta’ valur dokumentarju biss.

l-aħħar aġġornament 07.11.2017