Il-ġlieda kontra l-frodi fil-kummerċjalizzazzjoni tal-ikel - it-treġġigħ lura tal-fiduċja tal-konsumatur

Fil-każ ta' suspett ta' frodi fl-oqsma tal-ikel għall-bnedmin u l-għalf għall-annimali, il-Kummissjoni Ewropea għandha s-setgħat li tirrakkomanda pjanijiet mifruxin madwar l-UE kollha kkoordinati sabiex tistabbilixxi l-prevalenza ta' perikli u riskji fl-għalf, fl-ikel jew fl-annimali.

ATT

Rakkomandazzjoni tal-Kummissjoni tad-19 ta’ Frar 2013 dwar pjan ta’ kontroll koordinat bil-ħsieb li jistabbilixxi l-prevalenza tal-prattiċi frawdolenti fil-kummerċjalizzazzjoni ta’ ċerti oġġetti tal-ikel (2013/99/UE)

SOMMARJU

Kmieni fl-2013, kontrolli uffiċjali f'bosta Stati Membri kixfu li ċerti prodotti ppakkjati minn qabel, bħal hamburgers, kien fihom il-laħam taż-żiemel, li ma kienx iddikjarat fil-lista ta' ingredjenti li kien hemm direttament fuq l-ippakkjar jew fuq it-tikketta tal-pakkett. It-tikkettar ta' dan l-ikel, b'mod qarrieqi kien jirreferi biss għall-preżenza ta' ċanga, ingredjent li l-prezz tiegħu huwa ferm ogħla minn dak tal-laħam taż-żiemel.

Il-laħam taż-żiemel huwa ingredjent leġittimu fih innifsu jekk miksub minn żwiemel apposta għall-ikel maqtulin f'biċċeriji approvati u jekk jgħaddi mill-ispezzjonijiet veterinarji meħtieġa. Il-kwistjoni tħawdet iktar bil-fatt li l-użu tal-mediċina veterinarja, phenylbutazone, huwa permess fil-każ taż-żwiemel mhux għall-ikel. Kien hemm il-biża' li l-laħam taż-żiemel minn dawn l-oriġini daħal fil-katina tal-ikel tal-bniedem.

Dawn iċ-ċirkustanzi wasslu lill-awtoritajiet Ewropej (il-Kummissjoni Ewropea u l-Aġenzija tas-Sigurtà tal-Ikel Ewropea), flimkien mal-awtoritajiet kompetenti tal-Istati Membri, megħjunin mill-Europol, huma u jaħdmu flimkien sabiex jinvestigaw il-firxa tal-problema, sabiex jiżviluppaw pjan sabiex jindirizzaw u jreġġgħu lura l-fiduċja tal-konsumaturi fl-ikel li huma jixtru.

Il-Kummissjoni fasslet pjan ta' kontroll ikkoordinat madwar l-Ewropea kollha sabiex jistabbilixxi l-prevalenza ta' prattiċi frodulenti u l-awtoritajiet nazzjonali kellhom jieħdu żewġ azzjonijiet:

• kontrolli tal-ikel ikkummerċjalizzat u/jew ittikkettjat bħala li fih iċ-ċanga sabiex ikun magħruf jekk dan kienx fih il-laħam taż-żiemel;
• kontrolli tal-laħam taż-żiemel destinat għall-konsum mill-bniedem sabiex jikxfu l-preżenza possibbli ta' residwi ta' phenylbutazone.

Ir-riżultati pożittivi kollha kellhom jiġu nnotifikati minnufih lill-Kummissjoni u ġew mgħoddija wkoll madwar l-UE kollha permezz tas-Sistema ta' Twissija Bikrija għall-Ikel u l-Għalf (RASFF).

Din l-azzjoni kkoordinata madwar l-UE kollha malajr tat riżultati bl-identifikazzjoni ta' dawk involuti fil-katina tal-produzzjoni tal-ikel u l-ġbir lura tal-prodotti li ġew identifikati.

Aktar azzjonijiet meħudin jinkludu:

• l-istabbiliment fi ħdan id-dipartiment tal-Kummissjoni responsabbli għas-saħħa u l-konsumaturi (DĠ Saħħa u konsumaturi) ta' tim tal-UE kontra l-frodi fl-ikel;
• l-adozzjoni, f'Mejju 2013 mill-Kummissjoni ta' pakkett ta' proposti li jsaħħaħ l-infurzar tal-istandards tas-saħħa u s-sigurtà għall-katina kollha tal-agri-ikel. Dawn il-proposti, fost affarijiet oħrajn, jeħtieġu lill-pajjiżi membri sabiex jintegraw b'mod sħiħ kontrolli kontra l-frodi fil-pjanijiet ta' kontroll nazzjonali tagħhom u jiżguraw li l-penali finanzjarji fil-każ ta' frodi jiġu stabbiliti f'livelli dissważivi;
• rapport dwar il-possibilità li jiġi estiż it-tikkettar ta' oriġini mandatorju għal-laħam użat bħala ingredjent f'ikel ippakkjat minn qabel li għandu jitħejja mill-Kummissjoni skont liġi tal-UE ġdida dwar l-informazzjoni dwar l-ikel għall-konsumaturi, li sejra tidħol fis-seħħ f'Diċembru 2014, tressaq għal Diċembru 2013. Il-Kummissjoni qiegħda tikkunsidra jekk tippreżentax proposta leġiżlattiva.

Proposti

Proposal għal Regolament tal-Parlament Ewropew u tal-Kunsill dwar is-Saħħa tal-Annimali - (COM(2013)260 final tas-6.5.2013 - mhux ippubblikata fil-Ġurnal Uffiċjali).

Proposta għal Regolament tal-Parlament Ewropew u tal-Kunsill dwar il-kontrolli uffiċjali u attivitajiet uffiċjali oħra mwettqa biex jiżguraw l-applikazzjoni tal-liġi tal-ikel u tal-għalf, regoli dwar is-saħħa u l-benessri tal-annimali, dwar is-saħħa tal-pjanti, dwar il-materjal riproduttiv tal-pjanti, u dwar prodotti għall-ħarsien tal-pjanti, u li jemenda r-Regolamenti (KE) Nri 999/2001, 1829/2003, 1831/2003, 1/2005, 396/2005, 834/2007, 1099/2009, 1069/2009, 1107/2009, Regulations (EU) Nru 1151/2012, [….]/2013, u d-Direttivi 98/58/KE, 1999/74/KE, 2007/43/KE, 2008/119/KE, 2008/120/KE u 2009/128/KE (Ir-Regolament dwar il-Kontrolli Uffiċjali) (COM(2013)265 final tas-6.5.2013 - mhux ippubblikata fil-Ġurnal Uffiċjali).

Komunikazzjoni

Komunikazzjoni mill-Kummissjoni Ewropea lill-Kunsill u lill-Parlament Ewropew: Annimali u Pjanti aktar b’saħħithom u Katina Agroalimentari aktar Sigura - Qafas legali modernizzat għal UE aktar kompetittiva (COM(2013)264 final tas-6.5.2013 - mhux ippubblikata fil-Ġurnal Uffiċjali).

L-aħħar aġġornament: 05.02.2014