Il-finanzjament tal-operazzjonijiet militari u tad-difiża tal-Unjoni Ewropea (Athena)

SOMMARJU TAD-DOKUMENT:

Deċiżjoni tal-Kunsill (PESK) 2015/528 — il-finanzjament tal-ispejjeż komuni tal-operazzjonijiet tal-UE li jkollhom implikazzjonijiet militari jew ta’ difiża (Athena)

SOMMARJU

X’TAGĦMEL DIN ID-DEĊIŻJONI TAL-KUNSILL?

—	Hija tistabbilixxi mekkaniżmu sabiex jiġi amministrat il-finanzjament tal-ispejjeż komuni tal-operazzjonijiet tal-UE li jkollhom implikazzjonijiet militari jew ta’ difiża, magħruf bħala l-mekkaniżmu Athena.

—	Athena huwa mingħajr skop ta’ qligħ u għandu l-kapaċità legali meħtieġa sabiex, fost l-oħrajn, jidħol f’kuntratti u jkun parti għall-proċedimenti legali.

PUNTI EWLENIN

—

Il-korp tat-teħid tad-deċiżjonijiet ta’ Athena huwa l-Kumitat Speċjali, li huwa kompost minn rappreżentant wieħed minn kull wieħed mis-27 pajjiż tal-UE li jikkontribwixxu għall-finanzjament tal-operazzjonijiet militari tal-UE (id-Danimarka hija eżentata mill-attivitajiet relatati mad-difiża fil-kuntest tal-UE).

—

Jeżistu tliet korpi amministrattivi taħt il-kumitat speċjali: — l-Amministratur, li jfassal l-abbozzi tal-baġits (li jiġu sottomessi lill-Kumitat Speċjali) u jimplimenta d-deċiżjonijiet tal-Kumitat Speċjali; — il-Kmandant tal-Operazzjoni li, fost l-oħrajn, jibgħat proposti dwar in-nefqa lill-Amministratur; u — l-Uffiċjal tal-Kontabbiltà .

—

Din id-deċiżjoni tiddefinixxi l-ispejjeż eliġibbli tal-finanzjament konġunt minn Athena, skont il-fażi tal-operazzjoni, li hija definita fl-annessi tagħha: — Anness I: l-ispejjeż komuni koperti minn Athena kull meta dawn isiru; — Anness II: l-ispejjeż imġarrba mill-fażi preparatorja tal-operazzjonijiet (eż. missjonijiet esploratorji, evakwazzjoni medika ta’ emerġenza meta ma jkunx jista’ jiġi pprovdut trattament mediku fuq il-post); u — Anness III: l-ispejjeż imġarrba mill-fażi attiva tal-operazzjonijiet, eċċ. Dawn huma marbutin mal-ispejjeż tal-kwartieri ġenerali tal-operazzjonijiet immexxija mill-UE, tat-trasport, tal-kwartieri u l-akkomodazzjoni, tal-komunikazzjoni, eċċ.

—

Kull sena, l-Amministratur jipproponi l-abbozz ta’ baġit lill-Kumitat Speċjali għas-sena ta’ wara. Dan jitfassal bl-appoġġ ta’ kull kmandant ta’ operazzjoni. Huwa jrid jinkludi previżjoni tad-dħul sabiex tkun koperta n-nefqa, kif ukoll l-allokazzjonijiet finanzjarji sabiex ikunu koperti: — l-ispejjeż komuni mġarrba fit-tħejjija għall-operazzjonijiet, — l-ispejjeż għall-operazzjonijiet li għaddejjin jew dawk li huma diġà ppjanati.

Eżempji ta’ operazzjonijiet li jibbenifikaw mill-finanzjament ta’ Athena jinkludu:

—	EUFOR ALTHEA fil-Bożnija-Ħerzegovina

—	EUNAVFOR ATALANTA (il-Qarn tal-Afrika)

—	EUMAM RCA (ir-Repubblika Ċentru-Afrikana).

META TAPPLIKA DIN ID-DEĊIŻJONI?

Hija daħlet fis-seħħ fis-27 ta’ Marzu 2015.

SFOND

Il-Kunsill tal-UE adotta l-ewwel dokument (10155/02) dwar il-finanzjament tal-operazzjonijiet tal-immaniġġar ta’ kriżijiet immexxija mill-UE fl-2002. Sadanittant, id-Deċiżjoni 2004/197/PESK kienet l-ewwel li ħolqot il-mekkaniżmu Athena. Dik id-deċiżjoni ġiet emendata bosta drabi u finalment kienet sostitwita mid-Deċiżjoni (PESK) 2015/528 fl-2015 .

Athena — il-finanzjament tal-operazzjonijiet militari ta’ sigurtà u difiża fuq il-websajt tal-Kunsill tal-Unjoni Ewropea.

ATT

Deċiżjoni tal-Kunsill (PESK) 2015/528 tas-27 ta’ Marzu 2015 li tistabbilixxi mekkaniżmu sabiex jiġi amministrat il-finanzjament tal-ispejjeż komuni tal-operazzjonijiet tal-Unjoni Ewropea li jkollhom implikazzjonijiet militari jew ta’ difiża (Athena) u li tħassar id-Deċiżjoni 2011/871/PESK (ĠU L 84, 28.3.2015, p. 39–63)

l-aħħar aġġornament 16.11.2015