Tagħmir li jaħraq karburanti gassużi (mill-2018)

 

SOMMARJU TA’:

Ir-Regolament (UE) 2016/426 dwar tagħmir li jaħraq karburanti gassużi

X’INHU L-GĦAN TAR-REGOLAMENT?

• Jimmodifika u jaġġorna r-regoli stabbiliti fil-leġiżlazzjoni preċedenti (Direttiva 2009/142/KE).
• Jistabbilixxi r-regoli għat-tqegħid fis-suq u għall-operar ta’ tagħmir li jaħraq karburanti gassużi u tal-aċċessorji tiegħu.
• Jipprovdi aċċess għas-suq tal-Unjoni Ewropea (UE) għat-tagħmir u għall-aċċessorji koperti f’dak li għandu x’jaqsam mas-sikurezza tal-gass tagħhom.
• Jindirizza l-effiċjenza enerġetika ta’ dawn il-prodotti, sakemm ma tkunx tapplika leġiżlazzjoni oħra tal-UE li hija aktar speċifika.

PUNTI EWLENIN

Il-kamp ta’ applikazzjoni

• Ir-regolament japplika għal tagħmir u għal aċċessorji tal-gass fejn:
  • “tagħmir” huwa tagħmir li jaħraq karburanti gassużi użat għat-tisjir, għat-tisħin, għall-produzzjoni tal-ilma jaħraq, għat-tkessiħ, għat-tidwil jew għall-ħasil kif ukoll berners tal-kurrent sfurzat (“forced draught burners”)* u ħiters li magħhom jitqabbdu berners bħal dawn;
  • “aċċessorji” huma apparati tas-sikurezza, apparati tal-kontroll jew apparati tar-regolamentazzjoni u l-partijiet tagħhom, imfasslin sabiex jitqabbdu ma’ tagħmir li jaħraq karburant gassuż jew użati sabiex jinbena tagħmir bħal dan.
• Ir-regolament ma japplikax għal tagħmir imfassal apposta għall-użu:
  • fi proċessi industrijali mwettqin f’siti industrijali;
  • fuq inġenji tal-ajru u ferroviji; jew
  • għal skopijiet ta’ riċerka temporanja fil-laboratorji.

Kundizzjonijiet li jridu jiġu ssodisfati meta jitqiegħdu t-tagħmir jew l-aċċessorji fis-suq

• It-tagħmir u l-aċċessorji jridu jirrispettaw ir-regolament — li r-rekwiżiti essenzjali tiegħu huma stabbiliti f'Anness I — qabel ma jkunu jistgħu jitqiegħdu fis-suq u jiġu operati fl-UE.
• Tagħmir kopert mir-regolament irid ikun imfassal u mibni b’tali mod li jopera b’mod sikur u ma jippreżenta ebda periklu għall-persuni, għall-annimali domestiċi jew għall-proprjetà meta jintuża b’mod normali*.
• It-tagħmir kollu jrid ikun akkumpanjat minn:
  • struzzjonijiet tekniċi għall-installatur, li jkun fihom l-istruzzjonijiet kollha għall-installazzjoni, għall-aġġustament u għas-servizz ta’ manutenzjoni meħtieġ sabiex jiġi żgurat li dawk l-operazzjonijiet jitwettqu kif suppost, u li t-tagħmir ikun jista’ jintuża b’mod sikur, inklużi, pereżempju
    • dettalji dwar it-tip ta’ gass u l-pressjoni tal-provvista użata
    • il-fluss ta’ arja friska meħtieġ, kif ukoll
    • il-kundizzjonijiet għat-tixrid tal-prodotti tal-kombustjoni;
  • l-istruzzjonijiet għall-użu u għas-servizz ta’ manutenzjoni maħsubin għall-utent li jkun fihom l-informazzjoni kollha meħtieġa għall-użu sikur u li jiġbdu l-attenzjoni tal-utent lejn kwalunkwe restrizzjoni fuq l-użu;
  • twissijiet li jindikaw it-tip ta’ gass li jrid jintuża, il-pressjoni tal-provvista tal-gass u kwalunkwe restrizzjoni fuq l-użu, b’mod partikolari r-restrizzjonijiet fuq l-installazzjoni tat-tagħmir biss f’żoni fejn hemm biżżejjed ventilazzjoni.

Eżami tat-tip

• Il-manifattur irid jippreżenta applikazzjoni għal eżami tal-UE tat-tip ma’ korp innotifikat* wieħed. Din l-applikazzjoni jrid ikun fiha:
  • l-isem u l-indirizz tal-manifattur;
  • dikjarazzjoni bil-miktub li ma ġietx ippreżentata applikazzjoni ma’ xi korp innotifikat ieħor;
  • dokumentazzjoni teknika, kif deskritta f’dan ir-regolament.
• Meta t-tip jissodisfa l-kriterji stabbiliti minn dan ir-regolament, il-korp innotifikat jeħtieġlu joħroġ ċertifikat tal-eżami tal-UE tat-tip lill-applikant.

Dikjarazzjoni tal-konformità tal-UE

• Qabel ma jqiegħed tagħmir jew tip ta’ aċċessorju fis-suq, il-manifattur jeħtieġlu jagħmlu soġġett għal sorveljanza tal-fażi tal-produzzjoni minn korp innotifikat.
• Wara valutazzjoni tal-konformità b’suċċess tal-prodott, il-manifattur irid ifassal dikjarazzjoni tal-konformità tal-UE* li tiddikjara li l-prodott ikkonċernat jikkonforma mar-rekwiżiti ta’ dan ir-Regolament.
• It-tagħmir li jaħdem bil-gass jew il-pjanċa tad-data tiegħu jrid ikollhom fuqhom il-marka CE u l-informazzjoni li ġejja:
  • l-isem tal-manifattur;
  • l-isem kummerċjali reġistrat;
  • il-kategorija tat-tagħmir; u
  • il-pressjoni tal-provvista tal-gass;
  • l-aħħar żewġ figuri tas-sena li fiha żdiedet il-marka “CE”.
• Il-manifatturi jeħtiġilhom
  • iżommu d-dokumentazzjoni teknika rilevanti u d-dikjarazzjoni tal-konformità tal-UE għal 10 snin wara t-tqegħid fis-suq tat-tagħmir/tal-aċċessorju;
  • jinformaw lill-awtoritajiet nazzjonali bi kwalunkwe tagħmir li jista’ joħloq riskju.
• L-importaturi jeħtiġilhom jiżguraw li t-tagħmir u l-aċċessorji li jqiegħdu fis-suq jikkonformaw ma’ dan ir-regolament, inkluż li twettqu l-proċeduri ta’ valutazzjoni tal-konformità u li l-markar CE u d-dokumentazzjoni mfassla mill-manifatturi huma disponibbli għall-ispezzjoni mill-awtoritajiet. Jenħtieġ li l-isem u d-dettalji ta’ kuntatt tagħhom ikunu indikati fuq it-tagħmir jew l-aċċessorju.
• Id-distributuri jeħtiġilhom
  • jiżguraw li jaġixxu bl-attenzjoni dovuta sabiex jiżguraw li t-tqandil tagħhom ta’ tagħmir jew ta’ aċċessorju ma jaffettwax il-konformità ta’ dan;
  • jivverifikaw li kwalunkwe tagħmir li jqiegħdu għad-dispożizzjoni fis-suq ikollu fuqu l-markar CE u li dan huwa akkumpanjat minn dikjarazzjoni tal-konformità
• Il-gvernijiet tal-UE jinformaw lill-Kummissjoni Ewropea dwar il-korpi nnotifikati li huma awtorizzati biex iwettqu l-kompiti tal-valutazzjoni tal-konformità.
• Il-Kummissjoni tikkoordina l-kollaborazzjoni reċiproka bejn l-awtoritajiet nazzjonali.
• Il-pajjiżi tal-UE jridu jinformaw lill-Kummissjoni dwar it-tipi ta’ gass u l-pressjonijiet tal-provvista korrispondenti użati fit-territorju tagħhom sal-21 ta’ Ottubru 2017. Iridu jinnotifikaw ukoll kwalunkwe tibdil sussegwenti f’dawn il-kundizzjonijiet minn qabel.
• Il-pajjiżi tal-UE jrid ikollhom penali fis-seħħ għal kwalunkwe ksur tal-liġi sal-21 ta’ Marzu 2018.

META JAPPLIKA R-REGOLAMENT?

Japplika mill-21 ta’ April 2018, apparti ċerti artikoli li fil-parti l-kbira jikkonċernaw il-korpi nnotifikati u l-proċeduri, kif ukoll in-notifika tat-tipi ta’ gass u l-pressjonijiet tal-provvista korrispondenti użati fit-territorji tal-pajjiżi tal-UE. Dawn japplikaw mill-21 ta’ Ottubru 2016.

SFOND

Għal aktar tagħrif, ara:

• “It-tagħmir tal-gass” fuq is-sit web tal-Kummissjoni Ewropea.

* TERMINI EWLENIN

DOKUMENT EWLIENI

Ir-Regolament (UE) 2016/426 tal-Parlament Ewropew u tal-Kunsil tad-9 ta’ Marzu 2016 dwar tagħmir li jaħraq karburanti gassużi u li jħassar id-Direttiva 2009/142/KE (ĠU L 81, 31.3.2016, pp. 99–147)

DOKUMENTI RELATATI

Id-Direttiva 2009/142/KE tal-Parlament Ewropew u tal-Kunsill tat-30 ta’ Novembru 2009 rigward tagħmir li juża l-gass (ĠU L 330, 16.12.2009, pp. 10–27)

l-aħħar aġġornament 06.03.2017