Is-sigurtà ta’ operazzjonijiet taż-żejt u l-gass lil hinn mill-kosta

 

SOMMARJU TA’:

Id-Direttiva 2013/30/UE dwar l-operazzjonijiet taż-żejt u tal-gass offshore

X’INHU L-GĦAN TAD-DIRETTIVA?

• Din teħtieġ operaturi taż-żejt u tal-gass offshore fl-Unjoni Ewropea (UE) biex:
  • jieħdu l-miżuri kollha meħtieġa biex jipprevjenu kwalunkwe aċċidenti maġġuri;
  • ikollhom disponibbli riżorsi fiżiċi, umani u finanzjarji suffiċjenti biex jillimitaw il-konsegwenzi meta tali aċċidenti jseħħu.
• Din tapplika għall-installazzjonijiet kollha eżistenti u dawk futuri.
• Hija tgħin biex tassigura l-protezzjoni tal-ambjent tal-baħar, partikolarment biex jinkiseb jew jinżamm stat ambjentali tajjeb, li huwa oġġettiv stabbilit fid-direttiva kwadru dwar l-istrateġija marina — Direttiva 2008/56/KE (ara s-sommarju), li tistabbilixxi qafas għal azzjoni fil-qasam tal-politika tal-ambjent marin.

PUNTI EWLENIN

Liċenzjar u regolamentazzjoni

• Sabiex jitwettqu attivitajiet ta’ żejt u gass offshore, l-operaturi għandhom jingħataw liċenzja minn awtorità indipendenti. Sabiex jipprevjenu kwalunkwe kunflitt ta’ interess, l-Istati Membri tal-UE għandhom jiżguraw separazzjoni ċara bejn dan ir-regolament dwar is-sigurtà offshore u l-fatturi ambjentali u funzjonijiet oħrajn relatati mal-iżvilupp ekonomiku, ħruġ ta’ liċenzji u ġestjoni tal-introjtu.
• Qabel ma tibda attività, l-operatur jew is-sid ta’ installazzjoni għandu jipprovdi lill-awtorità relevanti b’:
  • kopja tal-politika korporattiva għall-prevenzjoni ta’ aċċidenti serji;
  • dettalji dwar is-sistema tal-kumpanija għall-immaniġġjar tas-sigurtà u l-ambjent; u
  • rapport dwar perikli serji.

Pjanijiet għal rispons f’każ ta’ emerġenza

• L-operaturi għandhom jippreparaw ukoll pjanijiet interni għal rispons f’każ ta’ emerġenza sabiex jirrispondu għal kwalunkwe periklu serju. Dan għandu jinkludi analiżi ta’ kif għandu jiġi ġestit it-tixrid taż-żejt.
• L-awtoritajiet nazzjonali għandhom jiżviluppaw pjanijiet ta’ rispons f’każ ta’ emerġenza li jkopru kull installazzjoni u infrastruttura taż-żejt u l-gass offshore, inklużi żoni li setgħu kienu potenzjalment affettwati fi ħdan il-ġurisdizzjoni tagħhom.

Informazzjoni pubblika

• Id-direttiva tistipula li bir ta’ esplorazzjoni ma jistax jitħaffer qabel ma l-pubbliku jkollu l-opportunità illi jkun infurmat bis-sħiħ u jagħti l-opinjonijiet tiegħu dwar effetti possibbli ta’ kwalunkwe operazzjoni ppjanata offshore.
• Minħabba l-impatt transfruntiera potenzjali ta’ aċċident, l-awtoritajiet nazzjonali għandhom, b’mod regolari, jagħmlu skambju ta’ għarfien, informazzjoni u esperjenza mal-kontroparti tagħhom f’postijiet oħrajn tal-UE u jikkonsultaw mal-industrija, ma’ partijiet interessati oħrajn u mal-Kummissjoni Ewropea.

Ir-Rwol tal-Aġenzija Ewropea għas-Sigurtà Marittima

L-Aġenzija Ewropea għas-Sigurtà Marittima, imwaqqfa taħt ir-Regolament (KE) Nru 1406/2002 (ara s-sommarju) tista’ tgħin lill-Istati Membri jfasslu l-pjanijiet ta’ rispons f’każ ta’ emerġenza u biex isibu u jimmonitorjaw tixrid taż-żejt u tal-gass.

Emenda tad-definizzjoni tal-ħsara tal-ilma

Id-Direttiva 2013/30/UE temenda d-definizzjoni tal-ħsara lill-ilma fid-Direttiva 2004/35/KE dwar ir-responsabbiltà tal-ħsara ambjentali (ara s-sommarju), sabiex iġġibha konformi mad-definizzjonijiet fid-Direttiva 2000/60/KE (id-direttiva qafas tal-UE dwar l-ilma — ara s-sommarju) u d-Direttiva 2008/56/KE (ara hawn fuq). Dan ifisser li ħsara lill-ilma hija għalhekk definita bħala ħsara li taffettwa ħafna l-istat tal-ambjent (ekoloġikament, kimika jew kwantittiva) u tar-riżorsi tal-ilma tal-baħar.

Ir-Regolament Emendatorju (UE) 2018/1999

Ir-Regolament (UE) 2018/1999 dwar il-Governanza tal-Unjoni tal-Enerġija u tal-Azzjoni Klimatika li jemenda l-Artikolu 25(1) tad-Direttiva 2013/30/UE li teħtieġ lill-Istati Membri biex tal-inqas jirrappurtaw annwalment lill-Kummissjoni l-informazzjoni li ġejja, bħala parti mir-rappurtar annwali skont ir-Regolament (UE) 2018/1999:

• l-għadd, l-età u l-post tal-installazzjonijiet;
• l-għadd u t-tip ta’ spezzjonijiet u investigazzjonijiet li twettqu u kwalunkwe azzjonijiet jew kundanni ambjentali;
• data dwar inċidenti meħtieġa mis-sistema komuni ta’ rappurtar;
• kwalunkwe bidla maġġuri fil-qafas regolatorju offshore;
• il-prestazzjoni ta’ operazzjonijiet għaż-żejt u għall-gass offshore relatati mal-prevenzjoni ta’ aċċidenti maġġuri u l-limitazzjoni tal-konsegwenzi ta’ aċċidenti maġġuri li jseħħu.

MINN META TAPPLIKA D-DIRETTIVA?

Id-Direttiva 2013/30/UE kellha ssir liġi fl-Istati Membri sad-19 ta’ Lulju 2015.

SFOND

Għal aktar informazzjoni, ara:

• Id-Direttiva dwar is-sigurtà ta’ operazzjonijiet taż-żejt u l-gass offshore (Il-Kummissjoni Ewropea).

DOKUMENT EWLIENI

Id-Direttiva2013/30/UE tal-Parlament Ewropew u tal-Kunsill tat-12 ta’ Ġunju 2013 dwar l-operazzjonijiet taż-żejt u tal-gass offshore u li temenda d-Direttiva 2004/35/KE (ĠU L 178, 28.6.2013, pp. 66–106).

L-emendi suċċessivi għad-Direttiva 2013/30/UE ġew inkorporati fit-test oriġinali. Din il-verżjoni konsolidata għandha biss valur dokumentarju.

DOKUMENTI RELATATI

Id-Direttiva 2008/56/KE tal-Parlament Ewropew u tal-Kunsill tas-17 ta’ Ġunju 2008 li tistabbilixxi qafas għal azzjoni komunitarja fil-qasam tal-politika tal-ambjent marin (Direttiva Kwadru dwar l-Istrateġija Marina) (ĠU L 164, 25.6.2008, pp. 19-40).

Ara l-verżjoni konsolidata.

Id-Direttiva 2004/35/KE tal-Parlament Ewropew u tal-Kunsill tal-21 ta’April 2004 dwar ir-responsabbiltà ambjentali f’dak li għandu x’jaqsam mal-prevenzjoni u r-rimedju għal danni ambjentali (ĠU L 143, 30.4.2004, pp. 56–75).

Ara l-verżjoni konsolidata.

Ir-Regolament (KE) Nru 1406/2002 tal-Parlament Ewropew u tal-Kunsill tas-27 ta’ Ġunju 2002 li jistabbilixxi l-Aġenzija Ewropea tas-Sigurtà Marittima (ĠU L 208, 5.8.2002, p. 1–9).

Ara l-verżjoni konsolidata.

Id-Direttiva 2000/60/KE tal-Parlament Ewropew u tal-Kunsill tat-23 ta’ Ottubru 2000 li tistabilixxi qafas għal azzjoni Komunitarja fil-qasam tal-politika tal-ilma (ĠU L 327, 22.12.2000, pp. 1–73).

Ara l-verżjoni konsolidata.

l-aħħar aġġornament 17.12.2021