Azzjoni globali għall-qerda tal-faqar u l-iżvilupp b'mod sostenibbli wara l-2015

 

SOMMARJU TAD-DOKUMENT:

Komunikazzjoni (COM(2015) 44 final) — Sħubija Globali għall-Qerda tal-Faqar u l-Iżvilupp Sostenibbli wara l-2015

X’INHU L-GĦAN TA’ DIN IL-KOMUNIKAZZJONI?

• Billi tressaq proposti dwar kif il-komunità internazzjonali għandha torganizza l-azzjonijiet tagħha biex twassal riżultati dwar l-Għanijiet ta’ Żvilupp Sostenibbli (SDGs), il-komunikazzjoni tal-Kummissjoni turi speċifikament kif l-Unjoni Ewropea (UE), il-pajjiżi tal-UE u oħrajn jistgħu jikkontribwixxu għall-isforz internazzjonali biex tiġi implimenta l-Aġenda tal-2030.
• Hija tistabbilixxi l-fehmiet tal-Kummissjoni Ewropea dwar is-sħubija globali biex jinqered il-faqar u tingħata spinta lill-iżvilupp sostenibbli fil-kuntest tan-negozjati intergovernattivi li jwasslu għall-Aġenda ta’ Azzjoni ta’ Addis Ababa u l-Aġenda tal-2030 għall-Iżvilupp Sostenibbli.

PUNTI EWLENIN

Il-Kummissjoni tiddeskrivi l-prinċipji ġenerali u l-komponenti neċessarji għas-sħubija globali meħtieġa għall-implimentazzjoni tal-Aġenda tal-2030 għall-Iżvilupp Sostenibbli (qabel l-adozzjoni tagħha fis-Summit tan-NU f’Settembru 2015).

Prinċipji

Il-Kummissjoni talbet li s-sħubija globali tkun ibbażata fuq valuri universali bħal ma huma:

• id-drittijiet tal-bniedem,
• il-governanza tajba u l-istat tad-dritt,
• l-appoġġ għall-istituzzjonijiet demokratiċi,
• l-inklużività,
• in-nondiskriminazzjoni u
• l-ugwaljanza bejn is-sessi.

Komponenti

Is-sħubija għandha wkoll:

• 1.

  tippromwovi ambjent ta’ politika li jiffavorixxi l-implimentazzjoni tal-Aġenda tal-2030 permezz ta’ prattiki, azzjonijiet u riżorsi kemm fil-livell internazzjonali kif ukoll f’dak nazzjonali;

• 2.

  tiżviluppa kapaċitajiet addizzjonali u ġodda f’pajjiżi sħab u ttejjeb il-ħiliet billi tiffoka fuq l-iżvilupp tar-riżorsi umani u l-proċessi għall-ippjanar, il-ġestjoni u l-monitoraġġ;

• 3.

  tiżgura li r-riżorsi pubbliċi nazzjonali huma mobilizzati b’mod effettiv u sostenibbli;

• 4.

  tikkontribwixxi biex tinżamm il-mira tan-NU ta’ 0.7 % tad-Dħul Nazzjonali Gross għall-finanzjament talGħajnuna Uffiċjali għall-Iżvilupp (ODA) u tiffoka fuq li tirċievi kontribuzzjonijiet minn pajjiżi b'introjtu bejn medju u għoli u minn ekonomiji emerġenti (bħaċ-Ċina jew il-Brażil);

• 5.

  iżżid il-kummerċ bħala fattur ewlieni għat-tkabbir inklużiv u sostenibbli u l-iżvilupp sostenibbli permezz ta’ Ftehimiet għall-Faċilitazzjoni tal-Kummerċ;

• 6.

  tagħmel użu mil-potenzjal offrut mix-xjenza, it-teknoloġija u l-innovazzjoni, pereżempju, biex tgħin lin-nies jaħarbu mill-faqar, tippromwovi l-konsum sostenibbli jew tnaqqas il-vulnerabilità għad-diżastri;

• 7.

  tinkoraġġixxi lis-settur privat domestiku u internazzjonali biex jinvesti f’sistemi tat-trasport u tal-enerġija effiċjenti u sostenibbli, u fl-infrastrutturi diġitali;

• 8.

  tisfrutta l-effetti pożittivi tal-migrazzjoni u tippermetti lill-migranti legali biex iżommu iktar minn dak li jaqilgħu u tirrikonoxxi l-ħiliet u l-kwalifiki tagħhom;

• 9.

  timmonitorja u tevalwa aħjar l-implimentazzjoni tal-SDGs biex tiżgura li tkun ibbażata fuq prinċipji ta' trasparenza, inklużività, il-kapaċità ta’ reazzjoni, effettività u effiċjenza, inkluż fl-aspetti finanzjarji tagħha.

Dawn il-proposti fformaw parti mill-pożizzjoni ta’ negozjar tal-UE għall-Konferenza għall-Finanzjament għall-Iżvilupp li saret f’Addis Ababa f’Lulju tal-2015 u s-Summit tan-NU fi New York f’Settembru tal-2015 li wasslu għall-adozzjoni tal-Aġenda tal-2030. Il-komunikazzjoni tal-Kummissjoni wasslet għall-Konklużjonijiet tal-Kunsill f’Mejju tal-2015.

SFOND

• In-Nazzjonijiet Uniti (NU) mexxew proċess intergovernattiv biex jgħin fid-definizzjoni tal-qafas ta’ żvilupp globali futur biex jieħu post l-Għanijiet ta’ Żvilupp tal-Millennju (MDGs) u jingħata segwitu għall-konferenzi ta’ Rio +20 u Monterrey.
• Bejn l-2013 u Settembru tal-2015, l-UE kellha rwol attiv fid-diskussjonijiet preparatorji li wasslu għall-adozzjoni tal-Aġenda tal-2030 għall-Iżvilupp Sostenibbli u tat il-kontribut tagħha f’dokumenti ewlenin (ara s-sezzjoni Dokumenti relatati hawn taħt). Dawn id-dokumenti jservu wkoll bħala bażi għal negozjati mal-imsieħba internazzjonali kollha.
• Għal aktar informazzjoni, ara:
  • “L-aġenda tal-2030 għall-Iżvilupp Sostenibbli” fuq is-sit elettroniku tal-Kummissjoni Ewropea
  • “Sħubija Globali għall-Qerda tal-Faqar u l-Iżvilupp Sostenibbli wara l-2015” — l-Iskeda tal-Unjoni Ewropea.

DOKUMENT EWLIENI

Komunikazzjoni tal-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni Sħubija Globali għall-Qerda tal-Faqar u l-Iżvilupp Sostenibbli wara l-2015 (COM(2015) 44 final, 5.2.2015)

DOKUMENTI RELATATI

Komunikazzjoni tal-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni: Ħajja diċenti għal kulħadd: Neqirdu l-faqar u nagħtu lid-dinja futur sostenibbli (COM(2013) 92 final, 27.2.2013)

Komunikazzjoni tal-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni: Ħajja diċenti għal kulħadd: minn viżjoni għal azzjoni kollettiva (COM(2014) 335 final, 2.6.2014)

l-aħħar aġġornament 08.12.2016