Katina ta’ provvista li tiffunzjona tajjeb u effiċjenti

Il-Kummissjoni Ewropea tixtieq telimina jew tnaqqas il-prattiki żleali applikati minn bejjiegħa bl-imnut kbar u fornituri tal-ikel kontra partijiet kummerċjali iktar dgħajfa.

ATT

Komunikazzjoni tal-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni L-indirizzar ta’ prattiki kummerċjali żleali (PKŻ) fil-katina ta’ provvista alimentari bejn in-negozji (COM(2014) 472 final tal-15.7.2014)

SOMMARJU

Il-Kummissjoni Ewropea tixtieq telimina jew tnaqqas il-prattiki żleali applikati minn bejjiegħa bl-imnut kbar u fornituri tal-ikel kontra partijiet kummerċjali iktar dgħajfa.

X’TAGĦMEL IL-KOMUNIKAZZJONI?

Il-komunikazzjoni tenfasizza l-importanza tan-negozji żgħar fil-katina ta’ provvista* tal-Unjoni Ewropea (UE). Din ma tipproponix leġiżlazzjoni biex tiżgura kundizzjonijiet ekwi bejn fornituri u bejjiegħa bl-imnut iżgħar fuq naħa u manifatturi u supermarkets multinazzjonali kbar fuq in-naħa l-oħra. Minflok, tissuġġerixxi ġabra ta’ inizjattivi volontarji u miżuri ta’ infurzar nazzjonali biex jiġu evitati prattiki kummerċjali żleali.

PUNTI EWLENIN

Il-komunikazzjoni tissuġġerixxi tliet oqsma ta’ azzjoni:

• 1.

  Appoġġ għall-inizjattiva tal-katina ta’ provvista volontarja Imnedija f’Settembru 2013, din tippromwovi kodiċi volontarji tal-imġiba sabiex jiġu żgurati relazzjonijiet kummerċjali ġusti u sostenibbli.

• 2.

  Użu ta’ prinċipji ta’ prattika tajba mal-UE kollha. Sar qbil dwar sett ta’ prinċipji ta’ prattika tajba mill-partijiet interessati kollha fil-katina ta’ provvista tal-ikel tal-UE. Dawn il-prinċipji jistgħu jkunu l-bażi għal fehim komuni ta’ x’jikkostitwixxi prattiki ta’ negozju ġusti u sostenibbli.

• 3.

  L-iżgurar ta’ infurzar nazzjonali effettiv. Standards minimi tal-infurzar mal-UE kollha jkunu fattur kredibbli ta’ deterrent kontra l-applikazzjoni ta’ prattiki żleali u jgħinu fl-indirizzar tal-“fattur ta’ biża’” tal-parti iktar dgħajfa f’relazzjoni kummerċjali.

SFOND

Madwar 47 miljun persuna, ħafna f’negozji żgħar, jaħdmu fil-katina ta’ provvista tal-ikel li tirrappreżenta suq ta’ EUR 1.05 triljun. Il-komunikazzjoni hija segwitu għall-Pjan ta’ Azzjoni Ewropew għas-Settur tal-Konsumaturi u Green Paper tal-Kummissjoni Ewropea, it-tnejn li huma ppubblikati f’Jannar tal-2013, li enfasizzaw l-effetti ta’ ħsara ta’ prattiki kummerċjali żleali, speċjalment għal negozji żgħar.

TERMINU EWLIENI

Katina ta’ provvista tal-ikel hija l-proċess li permezz tiegħu l-ikel minn razzett jispiċċa fuq l-imwejjed tal-ikel tagħna. Din tinkludi l-fażijiet ta’ produzzjoni, l-ipproċessar, distribuzzjoni, konsum u rimi.

ATTI RELATATI

Green Paper dwar prattiki kummerċjali inġusti fil-katina tal-provista alimentari u mhux alimentari minn negozju għal negozju fl-Ewropa (COM(2013) 37 final tal-31 ta’ Jannar 2013).

Komunikazzjoni tal-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni - Pjan ta’ azzjoni Ewropew għas-Settur tal-Konsumaturi (COM(2013) 36 final tal-31.1.2013)

l-aħħar aġġornament 08.12.2014