Ftehim dwar żona komuni tal-avjazzjoni bejn l-UE u l-Georgia

 

SOMMARJU TA’:

Il-Ftehim dwar Spazju Komuni tal-Avjazzjoni bejn l-Unjoni Ewropea u l-Istati Membri tagħha, minn naħa waħda, u l-Georgia, minn naħa oħra

Id-Deċiżjoni 2012/708/UE dwar l-iffirmar u l-applikazzjoni proviżorja tal-Ftehim dwar Spazju Komuni tal-Avjazzjoni bejn l-Unjoni Ewropea u l-Membri tagħha, minn naħa waħda, u l-Georgia, minn naħa oħra

Id-Deċiżjoni (UE) 2020/948 dwar il-konklużjoni, f’isem l-Unjoni, tal-Ftehim dwar Spazju Komuni tal-Avjazzjoni bejn l-Unjoni Ewropea u l-Membri tagħha, minn naħa waħda, u l-Georgia, min-naħa l-oħra

X’INHU L-GĦAN TAL-FTEHIM U TAD-DEĊIŻJONIJIET?

• Il-ftehim jiftaħ is-suq għal titjiriet diretti għal-linji tal-ajru kollha tal-Unjoni Ewropea (UE) u tal-Georgia bejn l-UE u l-Georgia. Jipprovdi wkoll qafas regolatorju u jistabbilixxi standards għal firxa wiesgħa ta’ kwistjonijiet marbuta mal-avjazzjoni li magħhom il-liġi Ġeorġjana se tiġi gradwalment allinjata, bħas-sikurezza tal-avjazzjoni, is-sigurtà, id-drittijiet tal-passiġġieri, il-ġestjoni tat-traffiku tal-ajru, ir-regolamentazzjoni ekonomika, il-kwistjonijiet tal-kompetizzjoni u l-aspetti soċjali.
• Id-Deċiżjoni 2012/708/UE tawtorizza l-iffirmar u l-applikazzjoni proviżorja tal-ftehim.
• Id-Deċiżjoni (UE) 2020/948 tikkonkludi l-ftehim f’isem l-UE.

PUNTI EWLENIN

Il-ftehim ikopri 3 oqsma ewlenin ta’ kooperazzjoni.

• 1.

  Regoli ekonomiċi

  Il-ftehim jistabbilixxi regoli dwar għadd ta’ aspetti ta’ kooperazzjoni ekonomika bejn l-UE u l-Georgia, inklużi:

  • id-drittijiet tat-traffiku — inkluż id-dritt illimitat ta’ titjir bejn l-UE u l-Georgia jew fuq it-territorju tal-parti l-oħra jew biex issir waqfa fit-territorju tal-parti l-oħra għal skopijiet mhux ta’ traffiku;
  • l-awtorizzazzjonijiet — għat-trasportaturi tal-ajru ta’ kull parti biex joperaw fit-territorju tal-oħra;
  • regoli biex tiġi żgurata kompetizzjoni ġusta u jiġu ffaċilitati l-attivitajiet kummerċjali;
  • regoli dwar it-tariffi tal-utent għal faċilitajiet u servizzi tal-ajruporti u tal-avjazzjoni.
• 2.

  Kooperazzjoni regolatorja (sikurezza tal-avjazzjoni, sigurtà u ġestjoni tat-traffiku tal-ajru)

  Iż-żewġ partijiet iridu:

  • jikkonformaw ma’ ċerta leġiżlazzjoni tal-UE dwar is-sikurezza, kif elenkat fl-anness tal-ftehim;
  • jirrikonoxxu ċ-ċertifikati tas-sikurezza ta’ xulxin;
  • jikkooperaw dwar is-sigurtà u jaħdmu favur ir-rikonoxximent reċiproku tal-istandards tas-sigurtà ta’ xulxin;
  • jikkooperaw fil-ġestjoni tat-traffiku tal-ajru bil-għan li jestendu l-ajru uniku Ewropew għall-Georgia, u jikkonformaw mal-leġiżlazzjoni tal-UE dwar il-ġestjoni tat-traffiku tal-ajru, kif elenkat fl-anness tal-ftehim.
• 3.

  Regoli istituzzjonali (amministrazzjoni u infurzar)

  • Kull parti hija responsabbli għall-infurzar tar-regoli tal-ftehim fit-territorju tagħha.
  • Kumitat konġunt magħmul minn rappreżentanti taż-żewġ partijiet, u li jiltaqa’ mill-inqas kull sena, huwa responsabbli għall-amministrazzjoni tal-ftehim u biex jiżgura l-implimentazzjoni xierqa tagħha.
  • Il-ftehim jinkludi mekkaniżmu għas-soluzzjoni tat-tilwim u jipprevedi l-possibbiltà li kwalunkwe parti tieħu miżuri ta’ salvagwardja f’każ li l-obbligi tagħha ma jiġux sodisfatti mill-parti l-oħra.

DATA TAD-DĦUL FIS-SEĦĦ

Il-ftehim daħal fis-seħħ fit-2 ta’ Awwissu 2020.

SFOND

Dan huwa wieħed minn għadd ta’ ftehimiet bilaterali li jsaħħu r-relazzjonijiet tal-ajru bejn l-UE u l-pajjiżi ġirien tal-Lvant tagħha fil-kuntest tal-komunikazzjoni tal-Kummissjoni Ewropea dwar l-iżvilupp tal-aġenda għall-politika esterna tal-UE dwar l-avjazzjoni.

Ara wkoll:

• Il-politika esterna tal-UE dwar l-avjazzjoni — Nindirizzaw l-isfidi tal-futur (il-Kummissjoni Ewropea)
• L-Istrateġija tal-Avjazzjoni tal-UE (il-Kummissjoni Ewropea)
• Il-Politika esterna dwar l-avjazzjoni (il-Kummissjoni Ewropea).

DOKUMENTI EWLENIN

Il-Ftehim dwar Spazju Komuni tal-Avjazzjoni bejn l-Unjoni Ewropea u l-Istati Membri tagħha, minn naħa waħda, u l-Georgia, minn naħa oħra (ĠU L 321, 20.11.2012, pp. 3-32)

Id-Deċiżjoni 2012/708/UE tal-Kunsill u tar-Rappreżentanti tal-Gvernijiet tal-Istati Membri, imlaqqgħin fi ħdan il-Kunsill tal-15 ta’ Ottubru 2010 dwar l-iffirmar u l-applikazzjoni proviżorja tal-Ftehim dwar Spazju Komuni tal-Avjazzjoni bejn l-Unjoni Ewropea u l-Membri tagħha, minn naħa waħda, u l-Georgia, minn naħa oħra (ĠU L 321, 20.11.2012, pp. 1-2)

Id-Deċiżjoni tal-Kunsill (UE) 2020/948 tas-26 ta’ Ġunju 2020 dwar il-konklużjoni, f’isem l-Unjoni, tal-Ftehim dwar Spazju Komuni tal-Avjazzjoni bejn l-Unjoni Ewropea u l-Membri tagħha, minn naħa waħda, u l-Georgia, min-naħa l-oħra (ĠU L 212, 3.7.2020, pp. 3-4)

DOKUMENTI RELATATI

Il-Protokoll li jemenda l-Ftehim dwar l-Ispazju Komuni tal-Avjazzjoni bejn l-Unjoni Ewropea u l-Istati Membri tagħha minn naħa, u l-Georgia min-naħa l-oħra, biex tittieħed inkunsiderazzjoni l-adeżjoni tar-Repubblika tal-Kroazja mal-Unjoni Ewropea (ĠU L 365, 19.12.2014, pp. 3-5)

Id-Deċiżjoni tal-Kunsill 2014/928/UE tat-8 ta’ Ottubru 2014 dwar l-iffirmar, f’isem l-Unjoni u l-Istati Membri tagħha, u l-applikazzjoni provviżorja tal-Protokoll li jemenda l-Ftehim dwar l-Ispazju Komuni tal-Avjazzjoni, bejn l-Unjoni Ewropea u l-Istati Membri tagħha minn naħa, u l-Georgia min-naħa l-oħra, biex tittieħed inkunsiderazzjoni l-adeżjoni tar-Repubblika tal-Kroazja mal-Unjoni Ewropea (ĠU L 365, 19.12.2014, pp. 1-2)

Id-Deċiżjoni tal-Kunsill (UE) 2020/949 tas-26 ta’ Ġunju 2020 dwar il-konklużjoni, f’isem l-Unjoni Ewropea u l-Istati Membri tagħha, ta’ Protokoll li jemenda l-Ftehim dwar l-Ispazju Komuni tal-Avjazzjoni, bejn l-Unjoni Ewropea u l-Istati Membri tagħha minn naħa waħda, u l-Georgia min-naħa l-oħra, biex tittieħed inkunsiderazzjoni l-adeżjoni tar-Repubblika tal-Kroazja mal-Unjoni Ewropea (ĠU L 212, 3.7.2020, p. 5)

Informazzjoni dwar id-dħul fis-seħħ tal-Ftehim dwar Spazju Komuni tal-Avjazzjoni bejn l-Unjoni Ewropea u l-Istati Membri tagħha, minn naħa waħda, u l-Georgia, min-naħa l-oħra (ĠU L 277, 26.8.2020, p. 3)

Informazzjoni dwar id-dħul fis-seħħ tal-Protokoll li jemenda l-Ftehim dwar l-Ispazju Komuni tal-Avjazzjoni bejn l-Unjoni Ewropea u l-Istati Membri tagħha, minn naħa, u l-Georgia, min-naħa l-oħra, sabiex titqies l-adeżjoni tar-Repubblika tal-Kroazja mal-Unjoni Ewropea (ĠU L 275, 24.8.2020, p. 2)

l-aħħar aġġornament 26.10.2020