Kejl armonizzat tal-inflazzjoni madwar l-UE

 

SOMMARJU TA’:

Ir-Regolament (UE) 2016/792 dwar l-indiċijiet armonizzati tal-prezzijiet għall-konsumatur u l-indiċi armonizzat tal-prezzijiet tad-djar

X’INHU L-GĦAN TAR-REGOLAMENT?

Huwa jistabbilixxi sett komuni ta’ regoli għall-iżvilupp, il-produzzjoni u t-tixrid tal-indiċijiet armonizzati nazzjonali u tal-UE tal-prezzijiet għall-konsumatur u tad-djar.

PUNTI EWLENIN

• Il-leġiżlazzjoni tapplika għal dawn li ġejjin:
  • l-indiċi armonizzat tal-prezzijiet għall-konsumatur* (HICP);
  • l-indiċi armonizzat tal-prezzijiet għall-konsumatur b’rati tat-taxxa kostanti (HICP-CT);
  • l-indiċi armonizzat tal-prezzijiet tad-djar okkupati mis-sidien stess (OOH);
  • l-indiċi armonizzat tal-prezzijiet tad-djar (HPI).
• L-awtoritajiet nazzjonali tal-pajjiżi tal-UE:
  • jipprovdu lill-uffiċċju tal-istatistika tal-Kummissjoni Ewropea, l-Eurostat, b’indiċijiet armonizzati;
  • jaġġornaw il-peżar tal-kategorija tal-prodotti għall-indiċijiet kull sena.
• Kull bidla fil-prezzijiet tad-djar mixtrija minn unitajiet domestiċi jew ta’ prodotti oħra li l-unitajiet domestiċi jixtru bħala residenzi okkupati mill-proprjetarji huma inklużi fl-OOH iżda esklużi mill-HICP u l-HICP-CT.
• Barra minn hekk, id-data għal dawn li ġejjin mhijiex inkluża fl-HICP u fl-HICP-CT:
  • narkotiċi;
  • logħob tal-azzard;
  • prostituzzjoni;
  • assigurazzjoni fuq il-ħajja;
  • servizzi finanzjarji intermedjarji mkejla b’mod indirett (FISIM) — il-valur tas-servizzi finanzjarji intermedjarji huwa pprovdut, iżda mhux direttament iddebitati, mill-istituzzjonijiet finanzjari.
• Il-Kummissjoni tista’ tadotta miżuri ulterjuri, sakemm dawn ma jimponux piż addizzjonali sinifikanti, biex tiżgura li l-indiċijiet armonizzati komparabbli huma prodotti taħt kundizzjonijiet uniformi. Dawn ikopru:
  • it-teħid ta’ kampjuni u r-rappreżentanza;
  • il-ġbir u t-trattament tal-prezzijiet;
  • is-sostituzzjonijiet u l-aġġustament tal-kwalità;
  • il-kompilazzjoni tal-indiċijiet;
  • ir-reviżjonijiet;
  • l-indiċijiet speċjali;
  • it-trattament tal-prodotti* f’oqsma speċifiċi.
• L-awtoritajiet nazzjonali jipprovdu lill-Eurostat bid-data tal-HICP u l-HICP-CT kull xahar u bid-data tal-HPI u tal-OOH kull tliet xhur.
• L-indiċijiet armonizzati u s-subindiċi jiġu aġġustati għal referenza tal-indiċijiet komuni ġdida meta jkun hemm bidla kbira fil-metodoloġija, jew kull 10 snin sa mill-2015.
• Il-Kummissjoni kellha tħejji rapport dwar l-integrazzjoni tal-indiċi tal-prezzijiet tal-OOH fil-kopertura tal-HICP sal-31 ta’ Diċembru 2018.
• Il-Kummissjoni kellha tħejji rapport dwar l-użu tas-setgħat delegati sat-13 ta’ Settembru 2020.

Att ta’ implimentazzjoni

Fl-2020, il-Kummissjoni adottat ir-Regolament ta’ Implimentazzjoni (UE) 2020/1148, li jistabbilixxi l-ispeċifikazzjonijiet metodoloġiċi u tekniċi f’konformità mar-Regolament (UE) 2016/792 fir-rigward tal-indiċijiet armonizzati tal-prezzijiet għall-konsumatur u l-indiċi tal-prezzijiet tad-djar. Ir-regolament:

• jistabbilixxi kundizzjonijiet uniformi għall-produzzjoni:
  • tal-HICP u l-HICP-CT u
  • tal-indiċi tal-prezzijiet tal-OOH u l-HPI;
• jintegra r-regoli rilevanti minn — u jirrevoka — ir-Regolamenti (KE) Nru 1749/96, (KE) Nru 2214/96, (KE) Nru 1687/98, (KE) Nru 2646/98, (KE) Nru 1617/1999, (KE) Nru  2166/1999, (KE) Nru 2601/2000, (KE) Nru 2602/2000, (KE) Nru 1920/2001, (KE) Nru 1921/2001, (KE) Nru 1708/2005, (KE) Nru 701/2006, (KE) Nru 330/2009, (KE) Nru 1114/2010 and (UE) Nru 93/2013, adottati abbażi tar-Regolament (KE) Nru 2494/95 (li r-Regolament (UE) 2016/792 ukoll jissostitwixxi u jirrevoka).

MINN META JAPPLIKA R-REGOLAMENT?

Ir-Regolament (UE) 2016/792 ilu japplika mit-13 ta’ Ġunju 2016. Intuża għall-ewwel darba għad-data ta’ Jannar 2017.

SFOND

• L-HICP ikejjel ir-rati tal-inflazzjoni fuq livell nazzjonali u tal-UE. Il-Kummissjoni u l-Bank Ċentrali Ewropew jużaw dan l-indiċi biex jivvalutaw l-istabbiltà tal-prezzijiet fil-pajjiżi tal-UE u fiż-żona tal-euro.
• L-istatistika tal-prezzijiet ta’ kwalità għolja u komparabbiltà hi essenzjali għal dawk responsabbli għall-politika pubblika fl-UE, ir-riċerkaturi u ċ-ċittadini Ewropej kollha.

Għal aktar informazzjoni, ara:

• Il-Leġiżlazzjoni dwar l-Indiċijiet Armonizzati tal-Prezzijiet għall-Konsumatur (HICP) (il-Kummissjoni Ewropea)
• L-Indiċi armonizzat tal-prezzijiet għall-konsumatur (HICP) (prc_hicp) (il-Kummissjoni Ewropea).

TERMINI EWLENIN

DOKUMENT EWLIENI

Ir-Regolament (UE) 2016/792 tal-Parlament Ewropew u tal-Kunsill tal-11 ta’ Mejju 2016 dwar l-indiċijiet armonizzati tal-prezzijiet għall-konsumatur u l-indiċi armonizzat tal-prezzijiet tad-djar, u li jħassar ir-Regolament tal-Kunsill (KE) Nru 2494/95 (ĠU L 135, 24.5.2016, pp. 11-38)

DOKUMENTI RELATATI

Ir-Regolament ta’ Implimentazzjoni tal-Kummissjoni (UE) 2020/1148 tal-31 ta’ Lulju 2020 li jistabbilixxi l-ispeċifikazzjonijiet metodoloġiċi u tekniċi f’konformità mar-Regolament (UE) 2016/792 tal-Parlament Ewropew u tal-Kunsill fir-rigward tal-indiċijiet armonizzati tal-prezzijiet għall-konsumatur u l-indiċi tal-prezzijiet tad-djar (ĠU L 252, 4.8.2020, pp. 12-23)

Ir-Rapport tal-Kummissjoni lill-Parlament Ewropew u lill-Kunsill dwar l-eżerċizzju tas-setgħa li tadotta atti delegati mogħtija lill-Kummissjoni skont ir-Regolament (UE) 2016/792 dwar l-indiċijiet armonizzati tal-prezzijiet għall-konsumatur u l-indiċi armonizzat tal-prezzijiet tad-djar (COM(2020) 354 final, 4.8.2020)

Ir-Rapport tal-Kummissjoni lill-Parlament Ewropew u lill-Kunsill dwar l-adegwatezza tal-indiċi tal-prezzijiet tal-abitazzjonijiet okkupati mis-sidien stess (OOH) għal integrazzjoni fil-kopertura tal-indiċi armonizzat tal-prezzijiet għall-konsumatur (HICP) (COM(2018) 768 final, 29.11.2018)

l-aħħar aġġornament 21.10.2020