Linji gwida għas-sottomissjoni ta’ programmi ta’ żvilupp

 

SOMMARJU TA’:

Ir-Regolament ta’ Implimentazzjoni (UE) Nru 288/2014 — kundizzjonijiet uniformi għall-preżentazzjoni ta’ informazzjoni għal programmi ta’ żvilupp tal-UE

X’INHU L-GĦAN TAR-REGOLAMENT?

• Huwa jistabbilixxi mudelli uniformi għall-preżentazzjoni ta’ informazzjoni għal programmi operazzjonali:
  • wieħed għall-programmi operazzjonali taħt il-mira ta’ investment għat-tkabbir u għall-impjiegi tal-Unjoni Ewropea (UE),
  • u ieħor għall-programmi ta’ kooperazzjoni taħt il-mira kooperazzjoni territorjali Ewropea.
• Dawn ir-regoli jiżguraw li l-informazzjoni tkun konsistenti, komparabbli u, fejn meħtieġ, tista’ tiġi aggregata.
• Huma jiżguraw ukoll li l-programmi jaderixxu mal-għanijiet ta’ tkabbir intelliġenti, sostenibbli u inklussiv.

PUNTI EWLENIN

Il-Fond Ewropew għall-Iżvilupp Reġjonali, il-Fond Soċjali Ewropew u l-Fond ta’ Koeżjoni jikkontribwixxu biex jiżviluppaw u jsegwu azzjonijiet tal-UE li jsaħħu l-koeżjoni ekonomika, soċjali u territorjali, tagħha, billi jsegwu żewġ għanijiet ewlenin.

• 1.
  Investment għat-tkabbir u għall-impjiegi

  Ir-Regolament Emendatorju (UE) 2021/435 issostitwixxa l-Anness I tar-Regolament (UE) Nru 288/2014 u introduċa bidliet fil-mudelli għall-programmi operazzjonali taħt l-Investiment għall-mira tat-tkabbir u l-impjiegi biex tingħata assistenza taħt l-objettiv tematiku “It-trawwim tat-tiswija tal-kriżijiet fil-kuntest tal-pandemija tal-COVID-19 u l-konsegwenzi soċjali tagħha u t-tħejjija ta’ rkupru ekoloġiku, diġitali u reżiljenti tal-ekonomija”.

  Din l-emenda qieset il-possibilità biex temporanjament tapplika rata ta’ kofinanzjament ta’ 100 % għal nefqa ddikjarata f’applikazzjonijiet ta’ pagamenti waqt is-sena ta’ kontabilità li tibda fl-1 ta’ Lulju 2020 u tintemm fit-30 ta’ Ġunju 2021 għal assi ta’ prijorità waħda jew aktar fi programm appoġġat mill-Fond Ewropew għall-Iżvilupp Reġjonali, il-Fond Soċjali Ewropew jew il-Fond ta’ Koeżjoni.

  Il-mudell stabbilit fir-regolament għall-preżentazzjoni ta’ informazzjoni għal dawn il-programmi jistabbilixxi l-linji gwida li ġejjin:

  • il-finanzjament huwa prinċipalment ipprovdut permezz tal-Fond Ewropew għall-Iżvilupp Reġjonali u l-Fond Soċjali Ewropew, bħal permezz tal-inizjattiva favur l-impjieg taż-żgħażagħ;
  • ir-riżorsi huma assenjati għal tliet kategoriji ta’ reġjuni tal-UE:
    • inqas żviluppati*,
    • ta’ tranżizzjoni*,
    • aktar żviluppat*;
  • programmi operazzjonali huma komposti minn assi prijoritarji li jistgħu jikkonċernaw aktar minn kategorija waħda ta’ reġjun u jistgħu jgħaqqdu l-investiment minn fondi differenti tal-UE;
  • kif il-programm operazzjonali jikkontribwixxi għal tkabbir intelliġenti, sostenibbli u inklużiv u biex tinkiseb koeżjoni ekonomika, soċjali u territorjali — inkluż ġustifikazzjoni tal-għażliet ta’ politika, prijoritajiet ta’ investiment u livell ta’ finanzjament;
  • jekk ass prijoritarju jkopri aktar minn fond wieħed, l-appoġġ tal-UE u dak tal-kontraparti nazzjonali tiegħu huma mqassma skont il-fond b’rata ta’ kofinanzjament separata għal kull fond;
  • jekk ass prijoritarju jkopri iktar minn kategorija waħda ta’ reġjun, l-appoġġ tal-UE u dak tal-kontraparti nazzjonali tiegħu huma mqassma skont il-kategorija tar-reġjun b’rata separata ta’ kofinanzjament għal kull kategorija;
  • il-programm operazzjonali għandu:
    • jinkludi indikaturi speċifiċi skont objettiv speċifiku flimkien ma’ indikaturi ta’ riżultati komuni b’valuri fil-mira stabbiliti;
    • jirrispetta ċerti prinċipji ġenerali:
      • żvilupp sostenibbli,
      • opportunitajiet indaqs u nondiskriminazzjoni,
      • l-ugwaljanza bejn in-nisa u l-irġiel.
• 2.
  Kooperazzjoni territorjali Ewropea (Interreg)

  Ir-Regolament Emendatorju (UE) 2021/435 jemenda wkoll l-Anness II tar-Regolament (UE) Nru 288/2014 u jintroduċi bidliet fil-mudelli għall-programmi operazzjonali skont l-għan ta’ kooperazzjoni territorjali Ewropea li tingħata assistenza taħt l-objettiv tematiku “It-trawwim tat-tiswija tal-kriżijiet fil-kuntest tal-pandemija tal-COVID-19 u l-konsegwenzi soċjali tagħha u t-tħejjija ta’ rkupru ekoloġiku, diġitali u reżiljenti tal-ekonomija”.

  Din l-emenda tqis il-possibilità biex temporanjament tapplika rata ta’ kofinanzjament ta’ 100 % għal nefqa ddikjarata f’applikazzjonijiet ta’ pagamenti waqt is-sena ta’ kontabilità li tibda fl-1 ta’ Lulju 2020 u tintemm fit-30 ta’ Ġunju 2021 għal assi ta’ prijorità waħda jew aktar fi programm appoġġat mill-Fond Ewropew għall-Iżvilupp Reġjonali, il-Fond Soċjali Ewropew jew il-Fond ta’ Koeżjoni.

  Il-mudell stabbilit fir-regolament għall-preżentazzjoni ta’ informazzjoni għal dawn il-programmi jistabbilixxi l-linji gwida li ġejjin:

  • jipprovdi bażi għall-implimentazzjoni ta’ azzjonijiet konġunti u skambji ta’ politika bejn atturi nazzjonali, reġjonali u lokali minn Stati Membri tal-UE differenti;
  • il-kooperazzjoni tista’ tkun transfruntiera, transnazzjonali jew interreġjonali;

  • għall-perjodu tal-2021–2027, Interreg qed tfittex li tinkoraġġixxi l-iżvilupp armonjuż ekonomiku, soċjali u territorjali tal-UE in ġenerali u l-viċinat tagħha, Ewropa aktar ekoloġika u b’karbonju baxx, governanza ta’ kooperazzjoni aħjar u Ewropa aktar sigura;
  • fejn programmi ta’ reġjuni l-aktar imbiegħda tal-UE jgħaqqdu elementi transfruntiera u transnazzjonali, se jiġu stabbiliti assi ta’ prijorità separati għal kull wieħed minn dawn;
  • kif il-programm jikkontribwixxi għall-għanijiet ta’ tkabbir intelliġenti, sostenibbli u inklussiv u biex tinkiseb koeżjoni ekonomika, soċjali u territorjali — inkluż ġustifikazzjoni tal-għanijiet ta’ politika u prijoritajiet ta’ investiment u livell ta’ finanzjament;
  • jinkludi deskrizzjoni tal-approċċ għall-iżvilupp territorjali inkluż, fejn xieraq:
    • żvilupp lokali ta’ approċċ immexxi mill-komunità,
    • integrati b’approċċ ta’ tmexxija mill-komunità għal żvilupp urban sostenibbli;
  • jinkludi indikaturi tal-output tal-programm komuni u speċifiċi inklużi l-miri finali;
  • fejn programmi ta’ reġjuni mbiegħda jgħaqqdu allokazzjonijiet għal kooperazzjoni transfruntiera u transnazzjonali, se jiġu stabbiliti assi ta’ prijorità separati għal kull wieħed minn dawn;
  • jirrispetta ċerti prinċipji ġenerali:
    • żvilupp sostenibbli,
    • opportunitajiet indaqs u nondiskriminazzjoni,
    • l-ugwaljanza bejn in-nisa u l-irġiel.

L-Azzjoni tal-Koeżjoni għar-Refuġjati fl-Ewropa (CARE) — appoġġ ta’ emerġenza għan-nies li qed jaħarbu mill-invażjoni Russa tal-Ukrajna

Ir-Regolament ta’ Implimentazzjoni (UE) 2022/872 jemenda r-Regolament ta’ Implimentazzjoni (UE) Nru 288/2014, u jagħmel bidliet kemm lill-mudell għall-programm operazzjonali taħt l-għan tal-Investment għat-tkabbir u għall-impjiegi (Anness I) kif ukoll għall-mudell għall-programmi ta’ kooperazzjoni taħt l-għan għall-kooperazzjoni territorjali Ewropea (Anness II) fir-rigward tal-azzjoni ta’ koeżjoni għar-refuġjati fl-Ewropa (CARE), adottat taħt ir-Regolament (UE) 2022/562 — inizjattiva li tippermetti lill-Istati Membri u r-reġjuni jipprovdu appoġġ ta’ emerġenza għan-nies li qed jaħarbu mill-invażjoni Russa tal-Ukrajna (ara s-sommarju).

MINN META JAPPLIKA R-REGOLAMENT?

Ilu japplika mit-23 ta’ Marzu 2014.

SFOND

Għal aktar informazzjoni, ara:

• Politika ta’ koeżjoni 2021-2027 (Il-Kummissjoni Ewropea).

TERMINI EWLENIN

DOKUMENTI PRINĊIPALI

Ir-Regolament ta’ Implimentazzjoni tal-Kummissjoni (UE) Nru 288/2014 tal-25 ta’ Frar 2014 li jistabbilixxi regoli skont ir-Regolament (UE) Nru 1303/2013 tal-Parlament Ewropew u tal-Kunsill li jistabbilixxi dispożizzjonijiet komuni dwar il-Fond Ewropew għall-Iżvilupp Reġjonali, il-Fond Soċjali Ewropew, il-Fond ta’ Koeżjoni, il-Fond Agrikolu Ewropew għall-Iżvilupp Rurali u l-Fond Ewropew Marittimu u tas-Sajd u li jistabbilixxi dispożizzjonijiet ġenerali dwar il-Fond Ewropew għall-Iżvilupp Reġjonali, il-Fond Soċjali Ewropew, il-Fond ta’ Koeżjoni u l-Fond Ewropew Marittimu u tas-Sajd fir-rigward ta’ mudell għal programmi operazzjonali skont l-għan ta’ Investiment għat-tkabbir u l-impjiegi u skont ir-Regolament (UE) Nru 1299/2013 tal-Parlament Ewropew u tal-Kunsill dwar dispożizzjonijiet speċifiċi għall-appoġġ mill-Fond Ewropew għall-Iżvilupp Reġjonali għall-għan ta’ kooperazzjoni territorjali Ewropea fir-rigward ta’ mudell għall-programmi ta’ kooperazzjoni skont il-mira ta’ kooperazzjoni territorjali Ewropea. (ĠU L 87, 22.3.2014, pp. 1-48).

L-emendi suċċessivi għar-Regolament (UE) Nru 288/2014 ġew inkorporati fit-test oriġinali. Din il-verżjoni konsolidata għandha valur dokumentarju biss.

DOKUMENTI RELATATI

Ir-Regolament (UE) 2022/562 tal-Parlament Ewropew u tal-Kunsill tas-6 ta’ April 2022 li jemenda r-Regolamenti (UE) Nru 1303/2013 u (UE) Nru 223/2014 fir-rigward tal-Azzjoni tal-Koeżjoni għar-Refuġjati fl-Ewropa (CARE) (ĠU L 109, 8.4.2022, pp. 1-5).

Ir-Regolament (UE) Nru 1303/2013 tal-Parlament Ewropew u tal-Kunsill tas-17 ta’ Diċembru 2013 li jistabbilixxi dispożizzjonijiet komuni dwar il-Fond Ewropew għall-Iżvilupp Reġjonali, il-Fond Soċjali Ewropew, il-Fond ta’ Koeżjoni, il-Fond Agrikolu Ewropew għall-Iżvilupp Rurali u l-Fond Marittimu u tas-Sajd Ewropew u li jistabbilixxi d-dispożizzjonijiet ġenerali dwar il-Fond Ewropew għall-Iżvilupp Reġjonali, il-Fond Soċjali Ewropew, il-Fond ta’ Koeżjoni u l-Fond Ewropew għall-Affarijiet Marittimi u s-Sajd u li jħassar ir-Regolament tal-Kunsill (KE) Nru 1083/2006 (ĠU L 347, 20.12.2013, pp. 320-469).

Ara l-verżjoni konsolidata.

Ir-Regolament (UE) 1304/2013 tal-Parlament Ewropew u tal-Kunsill tas-17 ta’ Diċembru 2013 dwar il-Fond Soċjali Ewropew u li jħassar ir-Regolament tal-Kunsill (KE) Nru 1081/2006 (ĠU L 347, 20.12.2013, pp. 470-486).

Ara l-verżjoni konsolidata.

Ir-Regolament (UE) Nru 1300/2013 tal-Parlament Ewropew u tal-Kunsill tas-17 ta’ Diċembru 2013 dwar il-Fond Soċjali Ewropew u li jħassar ir-Regolament tal-Kunsill (KE) Nru 1084/2006 (ĠU L 347, 20.12.2013, pp. 281-288).

Ir-Regolament (UE) Nru 1299/2013 tal-Parlament Ewropew u tal-Kunsill tas-17 ta’ Diċembru 2013 dwar dispożizzjonijiet speċifiċi għall-appoġġ mill-Fond Ewropew għall-Iżvilupp Reġjonali għall-għan ta’ kooperazzjoni territorjali Ewropea (ĠU L 347, 20.12.2013, pp. 259-280).

l-aħħar aġġornament 18.07.2022