Armi tan-nar — il-ġlieda kontra l-iffabrikar illeċitu u l-ittraffikar
SOMMARJU TAD-DOKUMENT:
Regolament (UE) Nru 258/2012: l-implimentazzjoni tal-Protokoll tan-Nazzjonijiet Uniti kontra l-iffabrikar illeċitu ta’ u l-ittraffikar fl-armi tan-nar
SOMMARJU
X'JAGĦMEL IR-REGOLAMENT?
PUNTI EWLENIN
-
Anness I tar-Regolament fih lista tal-armi tan-nar, il-partijiet u l-munizzjon tagħhom li jeħtieġu l-awtorizzazzjoni għall-esportazzjoni. Il-Kummissjoni Ewropea għandha l-poter li temenda din il-lista.
-
L-awtorità rilevanti tal-pajjiż tal-UE fejn huwa bbażat esportatur prospettiv tista’ tagħti awtorizzazzjoni tal-esportazzjoni wara li tirċievi formola tal-awtorizzazzjoni għall-esportazzjoni mill-esportatur.
-
Meta jesporta armi tan-nar, il-partijiet u l-munizzjon tagħhom barra l-UE, esportatur għandu jipprovdi lill-awtorità rilevanti fil-pajjiż tiegħu bl-awtorizzazzjoni mill-pajjiż mhux tal-UE li jkun qed jirċievi l-ispedizzjoni, u minn kull pajjiż barra l-UE li minnu tgħaddi l-kunsinna. L-awtorità mbagħad għandha tipproċessa l-applikazzjoni tal-esportazzjoni fi żmien 60 ġurnata.
-
Għal skopijiet ta’ traċċabilità, awtorizzazzjonijiet tal-esportazzjoni u l-importazzjoni u d-dokumentazzjoni mehmuża tagħhom għandu jkun fihom informazzjoni inkluż, pereżempju:
-
il-post u d-data tal-ħruġ,
-
id-dati ta’ skadenza,
-
il-pajjiż esportatur u l-pajjiż importatur,
-
il-pajjiżi ta’ transitu,
-
id-destinatarju finali, u
-
id-deskrizzjoni u l-kwantità tal-armi tan-nar, il-partijiet u l-munizzjon tagħhom.
-
Jeżistu proċeduri ssimplifikati għal armi tan-nar, il-partijiet u l-ammunizzjoni tagħhom użati għall-kaċċa u l-isparar sportiv.
-
Meta jiddeċiedu jekk jagħtux awtorizzazzjoni għall-esportazzjoni, pajjiżi tal-UE għandhom jagħtu kas tal-konsiderazzjonijiet bħal:
-
trattati internazzjonali u
-
politika barranija u ta’ sigurtà nazzjonali.
-
Il-pajjiżi tal-UE jeħtieġ iqisu konsiderazzjonijiet koperti mill-Pożizzjoni Komuni tal-Kunsill 2008/994/PESK li tiddefinixxi r-regoli tal-UE dwar il-kontroll tal-esportazzjoni ta’ teknoloġija u tagħmir militari. Dawn jinkludu aspetti bħal:
-
riskju li l-utent intenzjonat juża t-teknoloġija jew it-tagħmir militari biex jiġi esportat b’mod aggressiv kontra pajjiż ieħor jew biex jafferma dritt territorjali bil-forza, jew
-
riskju li t-teknoloġija jew tagħmir militari jiġi devjat fi ħdan il-pajjiż xerrej jew riesportat taħt kundizzjonijiet mhux mixtieqa.
-
Pajjiżi tal-UE għandhom jirrifjutaw li joħorġu awtorizzazzjoni tal-esportazzjoni jekk l-applikant ikollu rekords kriminali. Barra minn hekk, għandhom iħassru, jissospendu, jimmodifikaw jew jirrevokaw l-awtorizzazzjoni tal-esportazzjoni jekk il-kundizzjonijiet ma jibqgħux issodisfati.
-
Ir-regolament ma japplikax għal armi tan-nar antiki jew diżattivati, jew għal armi tan-nar maħsuba għall-użu militari jew mill-pulizija.
META JAPPLIKA R-REGOLAMENT?
Ilu japplika mit-30 ta’ Settembru 2013.
SFOND
Il-Protokoll tan-Nazzjonijiet Uniti kontra l-Iffabrikar illeċitu ta’ u t-Traffikar fl-Armi tan-Nar, il-Partijiet, Komponenti u Munizzjon tagħhom huwa l-uniku strument legalment vinkolanti fuq armi żgħar f’livell globali. Dan jistabbilixxi sett ta’ regoli biex il-pajjiżi jikkontrollaw u jirregolaw l-armi tan-nar u armi illeċiti, jipprevjenu d-devjazzjoni tagħhom fil-kriminalità, u jiffaċilitaw l-investigazzjoni u l-prosekuzzjoni ta’ reati relatati mingħajr ma jfixklu l-kummerċ leġittimu.
Il-Protokoll jissupplimenta l-Konvenzjoni tan-Nazzjonijiet Uniti kontra l-Kriminalità Organizzata Transnazzjonali.
Għal aktar informazzjoni, ara “t-Traffikar fl-armi tan-nar” fuq il-websajt tal-Kummissjoni Ewropea
ATT
Regolament (UE) Nru 258/2012 tal-Parlament Ewropew u tal-Kunsill tal-14 ta’ Marzu 2012 li jimplimenta l-Artikolu 10 tal-Protokoll tan-Nazzjonijiet Uniti kontra l-iffabrikar illeċitu ta’ u l-ittraffikar fl-Armi tan-Nar, il-Partijiet u l-Komponenti u l-Ammunizzjoni tagħhom, u jissupplimenta l-Konvenzjoni tan-Nazzjonijiet Uniti kontra l-Kriminalità Organizzata Transnazzjonali (il-Protokoll tan-NU dwar l-Armi tan-Nar), u li jistabbilixxi awtorizzazzjoni għall-esportazzjoni, u miżuri rigward l-importazzjoni u t-transitu għall-armi tan-nar, il-partijiet u l-komponenti tagħhom u l-ammunizzjoni (ĠU L 94, 30.3.2012, p. 1–15)
ATTI RELATATI
Il-Pożizzjoni Komuni tal-Kunsill 2008/944/PESK tat-8 ta’ Diċembru 2008 li tiddefinixxi regoli komuni li jirregolaw il-kontroll ta’ esportazzjonijiet ta’ teknoloġija u tagħmir militari (ĠU L 335, 13.12.2008, p. 99–103)
l-aħħar aġġornament 21.04.2016